Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Summaries of EU Legislation

    Il-ftehim bejn l-UE u l-Istati Uniti dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ Galileo u tal-GPS u applikazzjonijiet relatati

    Date of last review:
    10/02/2023
    Author:
    Uffiċċju tal-Pubblikazzjonijiet tal-Unjoni Ewropea
    Responsible entity(ies):
    Id-Direttorat Ġenerali għall-Industrija tad-Difiża u l-Ispazju
    Summarised document(s):

    Il-ftehim bejn l-UE u l-Istati Uniti dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ Galileo u tal-GPS u applikazzjonijiet relatati

     

    SOMMARJU TA’:

    Id-Deċiżjoni 2011/901/UE dwar il-konklużjoni tal-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ GALILEO u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra

    Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ GALILEO u tal-GPS u applikazzjonijiet relatati

    X’INHU L-GĦAN TAL-FTEHIM U TAD-DEĊIŻJONI?

    • Il-ftehim għandu l-għan li jipprovdi qafas ta’ kooperazzjoni bejn l-Istati Uniti u l-Unjoni Ewropea (UE) (il-partijiet) fir-rigward tas-sistemi ta’ navigazzjoni bis-satellita rispettivi tagħhom u Galileo u tal-GPS u applikazzjonijiet relatati.
    • Id-Deċiżjoni tapprova l-Ftehim f’isem l-UE.

    PUNTI EWLENIN

    GPS

    L-Istati Uniti joperaw is-Sistema ta’ Pożizzjonament Globali (GPS), sistema ta’ navigazzjoni bis-satellita b’użu doppju li tipprovdi sinkronizzazzjoni preċiża, u sinjali ta’ navigazzjoni u tal-pożizzjonament. Din tintuża għal użi ċivili, kummerċjali u xjentifiċi paċifiċi fuq bażi kontinwa dinjija, mingħajr tariffi diretti għall-utenti.

    Galileo

    Galileo żviluppata mill-UE hija sistema globali ċivili ta’ navigazzjoni bis-satellita, ta’ sinkronizzazzjoni u ta’ pożizzjonar li hija kompatibbli mal-frekwenza tar-radju bil-GPS u interoperabbli ma’ servizzi ċivili tal-GPS fil-livell tal-utenti .

    Naħdmu flimkien

    Permezz tal-Ftehim, il-partijiet jesprimu l-intenzjoni tagħhom li jaħdmu flimkien biex jippromwovu u jiffaċilitaw l-użu ta’ dawn is-sinjali, is-servizzi u t-tagħmir għal użi ċivili, kummerċjali u xjentifiċi paċifiċi, u għal aktar interessi ta’ sigurtà reċiproka.

    Is-servizzi militari bbażati fuq in-navigazzjoni u l-ħin bis-satellita jaqgħu barra mill-kamp ta’ applikazzjoni tal-ftehim, ħlief fir-rigward tal-kompatibbiltà tal-frekwenza tar-radju.

    Interoperabbiltà u kompatibbiltà

    Il-partijiet jaqblu li:

    • iżommu l-GPS u Galileo, sal-akbar punt possibbli, kompatibbli u interoperabbli mal-frekwenza tar-radju fil-livell tal-utenti mhux militari;
    • iżommu l-kompatibbiltà u l-interoperabbiltà meta jimmodernizzaw jew jiżviluppaw sistema u fi kwalunkwe awmentazzjoni* (soġġett għal ftehim);
    • jistandardizzaw l-oqfsa ta’ referenza ġeodetiċi (post) tagħhom mill-qrib kemm jista’ jkun tas-Sistema Internazzjonali ta’ Referenza Terrestri;
    • jittrażmettu l-kumpens tal-ħin bejn il-ħinijiet tas-sistema Galileo u tal-GPS fil-messaġġi tan-navigazzjoni, sabiex jissinkronizzaw ir-referenzi tal-ħin differenti tagħhom;
    • isaħħu d-disponibbiltà u l-affidabbiltà tas-sinjali permezz ta’ arkitetturi tas-sistema komplementari, għall-benefiċċju tal-utenti madwar id-dinja.

    Standards, ċertifikazzjoni, regolamenti u mandati

    Il-partijiet jaqblu li jikkonsultaw ma’ xulxin qabel ma jieħdu kwalunkwe miżura:

    • li tistabbilixxi standards ta’ disinn jew ta’ prestazzjoni, rekwiżiti ta’ ċertifikazzjoni, rekwiżiti ta’ liċenzjar, regolamenti tekniċi jew rekwiżiti simili;
    • li jkollhom l-effett li jiddaħħal l-użu ta’ kwalunkwe sinjali jew servizzi ta’ navigazzjoni bis-satellita ċivili.

    Nondiskriminazzjoni u kummerċ

    Il-partijiet jaffermaw:

    • approċċ mhux diskriminatorju għall-kummerċ ta’ oġġetti u servizzi;
    • li l-miżuri ma għandhomx jintużaw bħala restrizzjoni moħbija jew ostaklu għall-kummerċ internazzjonali.

    Aċċess miftuħ u tariffi

    Il-partijiet iridu:

    • ma jirrestrinġux l-użu jew l-aċċess għall-informazzjoni dwar il-pożizzjonament, in-navigazzjoni u s-sinkronizzazzjoni tagħhom mill-utenti aħħara, ħlief għal raġunijiet ta’ sigurtà nazzjonali;
    • jagħmlu ħilithom biex jipprovdu sinjali maħsuba għal servizzi tas-sikurezza tal-ħajja;
    • jagħmlu l-informazzjoni disponibbli għall-pubbliku dwar is-sinjali u l-awmentazzjonijiet ċivili tagħhom mhux kriptati ta’ navigazzjoni bis-satellita, biex jiżguraw uportunitajiet ugwali għal dawk li jfittxu li jużaw dawn is-sinjali, it-tagħmir tal-manifattura jew servizzi oħra;
    • jagħtu lill-manifatturi tal-parti l-oħra, soġġetti għall-kontrolli tal-esportazzjoni applikabbli, aċċess għall-informazzjoni meħtieġa biex jinkorporaw kriptaġġ jew karatteristiċi simili fit-tagħmir tagħhom, permezz ta’ liċenzjar bil-prezzijiet tas-suq;
    • jagħmlu ħilithom biex jipprovdu navigazzjoni ta’ servizz miftuħ u sinjali ta’ sinkronizzazzjoni mingħajr tariffi diretti għall-użu finali jew għall-awmentazzjoni;
    • ikunu konsistenti mal-Organizzazzjoni tal-Avjazzjoni Ċivili Internazzjonali u mal-Organizzazzjoni Marittima Internazzjonali meta jitolbu tariffi għall-avjazzjoni internazzjonali jew għall-utenti marittimi tas-sikurezza tal-ħajja;
    • jikkonsultaw ma’ xulxin fejn xieraq dwar il-politiki għall-irkupru tal-ispejjeż, filwaqt li jieħdu passi biex jiżguraw it-trasparenza u l-obbligu ta’ rendikont għat-tariffi mġarrba fil-forniment tas-servizzi tagħhom.

    Kompatibbiltà tas-sigurtà nazzjonali u l-użu tal-ispettru

    Il-partijiet iridu jaħdmu flimkien biex:

    • jippromwovu allokazzjonijiet adegwati tal-frekwenza għas-sinjali tan-navigazzjoni u tal-ħin ibbażati fuq is-satellita;
    • jiżguraw il-kompatibbiltà tal-frekwenza tar-radju fl-użu tal-ispettru bejn is-sinjali ta’ xulxin;
    • jipproteġu s-sinjali ta’ xulxin mill-interferenza;
    • jippromwovu l-użu armonizzat tal-ispettru globalment;
    • jikkooperaw biex jidentifikaw is-sorsi ta’ interferenza u jieħdu azzjoni xierqa;
    • jipprevjenu l-użu ostili tas-servizzi tagħhom.

    Servizzi ta’ tiftix u salvataġġ

    Il-partijiet jaqblu:

    • li jikkooperaw fuq servizzi globali ta’ tiftix u salvataġġ ippjanati bl-użu ta’ Galileo u ġenerazzjonijiet futuri ta’ satelliti tal-GPS;
    • li dawn is-servizzi għandhom ikunu kompatibbli mal-frekwenza tar-radju u, sal-akbar punt possibbli, interoperabbli fil-livell tal-utent.

    Gruppi ta’ ħidma

    Il-partijiet jaqblu li jistabbilixxu erba’ gruppi ta’ ħidma dwar:

    • il-kompatibbiltà u l-interoperabbiltà tal-frekwenza;
    • il-kummerċ u l-applikazzjonijiet ċivili;
    • il-ġenerazzjoni li jmiss ta’ sistemi ta’ navigazzjoni u kronoloġija bis-satellita ċivili;
    • kwistjonijiet ta’ sigurtà.

    DATA TAD-DĦUL FIS-SEĦĦ

    Il-ftehim daħal fis-seħħ fit-12 ta’ Diċembru 2011 għal perjodu ta’ 10 snin. Dan ġie estiż ulterjorment għal 5 snin mit-12 ta’ Diċembru 2021 bid-Deċiżjoni (UE) 2022/1089.

    SFOND

    Għal aktar informazzjoni, ara:

    TERMINI EWLENIN

    Awmentazzjoni. Mekkaniżmi ċivili, li jipprovdu lill-utenti ta’ sinjali tan-navigazzjoni u tas-sinkronizzazzjoni permezz tas-satelliti b’informazzjoni tal-input, addizzjonali għal dik li tiġi derivata mill-kostellazzjoni(jiet) ewlenin li qed jintużaw, u inputs jew korrezzjonijiet addizzjonali fuq id-distanza/psewdodistanza għal, jew titjib ta’ inputs eżistenti ta’ psewdodistanza. Dawn il-mekkaniżmi jippermettu lill-utenti jiksbu prestazzjoni mtejba, bħal żieda fil-preċiżjoni, disponibbiltà, integrità u affidabbiltà.

    DOKUMENTI PRINĊIPALI

    Id-Deċiżjoni tal-Kunsill 2011/901/UE tat-12 ta’ Diċembru 2011 dwar il-konklużjoni tal-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ GALILEO u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra (ĠU L 348, 31.12.2011, pp. 1–2).

    Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ GALILEO u tal-GPS u applikazzjonijiet relatati (ĠU L 348, 31.12.2011, pp. 3–16).

    DOKUMENTI RELATATI

    Informazzjoni dwar l-estensjoni tal-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ Galileo u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra (ĠU L 8, 11.1.2023, p. 1).

    Id-Deċiżjoni tal-Kunsill (UE) 2022/1089 tas-27 ta’ Ġunju 2022 dwar l-estensjoni tal-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ Galileo u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra (ĠU L 176, 1.7.2022, pp. 1–2).

    Informazzjoni relatata mad-data tad-dħul fis-seħħ tal-Ftehim dwar il-promozzjoni, il-provvista u l-użu ta’ sistemi ta’ navigazzjoni bis-satellita ta’ GALILEO u tal-GPS u applikazzjonijiet relatati bejn il-Komunità Ewropea u l-Istati Membri tagħha, minn naħa waħda, u l-Istati Uniti tal-Amerka, min-naħa l-oħra (ĠU L 313, 19.11.2016, p. 1).

    l-aħħar aġġornament 10.02.2023

    Top