Reġistru tal-UE tal-iskema għall-iskambju ta’ kwoti tal-emissjonijiet (2013-2020)

 

SOMMARJU TA’:

Ir-Regolament (UE) Nru 389/2013 li jistabbilixxi Reġistru tal-Unjoni

X’INHU L-GĦAN TAR-REGOLAMENT?

• Dan jistabbilixxi Reġistru tal-Unjoni għall-Unjoni Ewropea (UE) kollha, bażi tad-data online li żżomm kontijiet għal installazzjonijiet stazzjonarji, għal operaturi ta’ inġenji tal-ajru u għal kwalunkwe persuna interessata fl-iskambju tal-kwoti tal-emissjonijiet.
• Ir-reġistru għandu l-għan li jiggarantixxi kontabbiltà preċiża għall-kwoti li jinħarġu skont l-iskema tal-UE għall-iskambju ta’ kwoti tal-emissjonijiet (EU ETS), skema mfassla biex tnaqqas l-emissjonijiet tal-gassijiet b’effett ta’ serra b’mod kosteffettiv.
• Ir-regolament ġie revokat mir-Regolament Delegat (UE) 2019/1122 (ara s-sommarju) mill-1 ta’ Jannar 2021. Madankollu, dan baqa’ japplika sal-31 ta’ Diċembru 2025 biex, fost affarijiet oħrajn, il-ħidmiet neċessarji relatati mal-perjodu ta’ skambju bejn l-2013 u l-2020, u notevolment għat-tieni perjodu ta’ impenn tal-Protokoll ta’ Kyoto (PK) sakemm il-perjodu biex jintlaħqu l-impenji (true-up period) fl-2023.

PUNTI EWLENIN

L-iskema tal-UE għall-iskambju ta’ kwoti tal-emissjonijiet

L-EU ETS hija l-qofol tal-politika tal-UE biex jiġi indirizzat it-tibdil fil-klima u hija l-għodda ewlenija tagħha biex jitnaqqsu l-emissjonijiet tal-gassijiet b’effett ta’ serra b’mod kosteffettiv. Din hija l-ewwel suq tal-karbonju ewlieni tad-dinja u tibqa’ l-akbar waħda. L-EU ETS taħdem fuq il-“limitu massimu u l-prinċipju tal-kummerċ”. Limitu massimu jiġi stabbilit fuq l-ammont totali ta’ ċerti gassijiet b’effett ta’ serra li jiġu rilaxxati mill-installazzjonijiet koperti mis-sistema. Il-limitu massimu jitnaqqas matul iż-żmien sabiex jonqsu l-emissjonijiet totali.

Fi ħdan il-limitu massimu, il-kumpaniji jirċievu jew jixtru kwoti tal-emissjonijiet li jistgħu jinnegozjaw ma’ xulxin kif ikun meħtieġ. Fit-tielet fażi tal-ETS (2013-2020), il-kumpaniji jistgħu jixtru wkoll ammonti limitati ta’ krediti internazzjonali minn proġetti li jiffrankaw l-emissjonijiet madwar id-dinja. Il-limitu fuq l-għadd totali ta’ kwoti disponibbli jiżgura li dawn ikollhom valur.

Sal-aħħar ta’ April ta’ kull sena, l-installazzjonijiet u l-operaturi ta’ inġenji tal-ajru koperti mill-EU ETS għandhom iċedu biżżejjed kwoti biex ikopru l-emissjonijiet kollha tagħhom fis-sena preċedenti, jew jirriskjaw multi kbar. Jekk kumpanija tnaqqas l-emissjonijiet tagħha, din tista’ żżomm il-kwoti żejda tagħha biex tkopri l-ħtiġijiet futuri tagħha jew tbigħhom lil kumpanija oħra li ma jkollhiex biżżejjed kwoti.

Reġistru tal-Unjoni

Mill-1 ta’ Jannar 2013, ir-regolament stabbilixxa Reġistru tal-Unjoni għall-UE kollha, bażi tad-data onlajn li żżomm kontijiet għall-installazzjonijiet stazzjonarji, l-operaturi ta’ inġenji tal-ajru (li jkunu ilhom inklużi fl-EU ETS minn Jannar 2012) u għal kwalunkwe persuna interessata fl-iskambju tal-kwoti tal-emissjonijiet.

L-irkant huwa l-metodu awtomatiku għall-allokazzjoni tal-kwoti, pjuttost milli allokazzjoni b’xejn. Ir-regoli armonizzati dwar l-allokazzjoni japplikaw għal dawk il-kwoti li għadhom jiġu allokati b’xejn.

Ir-reġistru jirreġistra:

• listi ta’ installazzjonijiet u operaturi ta’ inġenji tal-ajru koperti mid-Direttiva tal-ETS (Direttiva 2003/87/KE) f’kull Stat Membru tal-UE u kwalunkwe allokazzjoni b’xejn lil kull wieħed minnhom;
• kontijiet ta’ kumpaniji jew individwi li għandhom kwoti tal-emissjonijiet;
• trasferimenti ta’ kwoti (“tranżazzjonijiet”) imwettqa mid-detenturi tal-kontijiet;
• emissjonijiet tad-CO₂ ivverifikati kull sena minn installazzjonijiet u operaturi ta’ inġenji tal-ajru;
• rikonċiljazzjoni annwali ta’ kwoti u ta’ emissjonijiet ivverifikati, fejn kull kumpanija għandha tkun ċediet biżżejjed kwoti biex tkopri l-emissjonijiet ivverifikati kollha tagħha.

Ftuħ ta’ kont

Biex jieħdu sehem fl-ETS tal-UE, il-kumpaniji jew l-individwi għandhom jiftħu kont fir-Reġistru tal-Unjoni, billi jibagħtu talba lill-amministratur nazzjonali, li jiġbor u jivverifika d-dokumentazzjoni kollha ta’ sostenn.

Reġistru tat-Tranżazzjonijiet tal-UE

Ir-Reġistru tat-Tranżazzjonijiet tal-UE (EUTL) jivverifika, jirreġistra u jawtorizza b’mod awtomatiku t-tranżazzjonijiet kollha bejn il-kontijiet fir-Reġistru tal-Unjoni, filwaqt li jiġi żgurat li t-trasferimenti kollha jikkonformaw mar-regoli tal-ETS tal-UE.

L-EUTL huwa s-suċċessur tar-Reġistru Komunitarju Indipendenti tat-Tranżazzjonijiet, li kellu rwol simili qabel ma ġie introdott ir-Reġistru tal-Unjoni.

Ir-reġistri ta’ Kyoto

Ir-Reġistru tal-Unjoni jaġixxi wkoll bħala reġistru tal-PK biex jgħin lill-UE u lill-Istati Membri tagħha jissodisfaw l-obbligi tagħhom bħala parti mill-PK.

Emendi

• Ir-Regolament Emendatorju (UE) 2015/1844 jiddeskrivi l-implikazzjonijiet u l-proċeduri ġodda għal Reġistru tal-Unjoni u r-reġistri KP nazzjonali wara l-Emenda ta’ Doha għall-Protokoll ta’ Kyoto, għal implimentazzjoni konsistenti ta’ rekwiżiti ta’ kontabbiltà mifthiema internazzjonalment.
• Ir-Regolamenti (UE) 2018/208 u 2019/401 introduċew il-possibbiltà li tiġi protetta l-integrità tal-EU ETS fil-każ ta’ Brexit.
• Ir-Regolament (UE) 2019/1122, li se jissostitwixxi dan ir-Regolament mill-1 ta’ Jannar 2021, jistabbilixxi l-possibbiltà li mar-reġistri jintrabtu skemi oħra għall-iskambju ta’ kwoti tal-emissjonijiet tal-gassijiet b’effett ta’ serra.

Revoka

Ir-Regolament (UE) Nru 389/2013 ġie revokat mir-Regolament Delegat (UE) 2019/1122 mill-1 ta’ Jannar 2021, għalkemm dan ikompli japplika sal-31 ta’ Diċembru 2025 u, fost affarijiet oħrajn, l-operazzjonijiet kollha meħtieġa relatati mal-perjodu ta’ kummerċ bejn l-2013 u l-2020 u notabilment għat-tieni perjodu ta’ impenn għall-PK.

MINN META JAPPLIKA R-REGOLAMENT?

Ilu japplika mill-4 ta’ Mejju 2013.

SFOND

Għal aktar informazzjoni, ara:

• It-tieni perjodu ta’ impenn ta’ Kyoto (2013-2020) (Il-Kummissjoni Ewropea)
• Il-Ftehim ta’ Pariġi (Il-Kummissjoni Ewropea)
• L-Iskema tal-UE għall-Iskambju ta’ Kwoti tal-Emissjonijiet (EU ETS) (Il-Kummissjoni Ewropea)
• Ir-Reġistru tal-Unjoni (Il-Kummissjoni Ewropea).

DOCUMENT EWLIENI

Ir-Regolament tal-Kummissjoni (UE) Nru 389/2013 tat-2 ta’ Mejju 2013 li jistabbilixxi Reġistru tal-Unjoni skont id-Direttiva 2003/87/KE tal-Parlament Ewropew u tal-Kunsill, id-Deċiżjonijiet Nri 280/2004/KE u 406/2009/KE tal-Parlament Ewropew u tal-Kunsill, u li jirrevoka r-Regolamenti tal-Kummissjoni (UE) Nru 920/2010 u 1193/2011 (ĠU L 122, 3.5.2013, pp. 1-59).

L-emendi suċċessivi għar-Regolament (UE) Nru 389/2013 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2018/1999 tal-Parlament Ewropew u tal-Kunsill tal-11 ta’ Diċembru 2018 dwar il-Governanza tal-Unjoni tal-Enerġija u tal-Azzjoni Klimatika, li jemenda r-Regolamenti (KE) Nru 663/2009 u (KE) Nru 715/2009 tal-Parlament Ewropew u tal-Kunsill, id-Direttivi 94/22/KE, 98/70/KE, 2009/31/KE, 2009/73/KE, 2010/31/UE, 2012/27/UE u 2013/30/UE tal-Parlament Ewropew u tal-Kunsill, id-Direttivi tal-Kunsill 2009/119/KE u (UE) 2015/652 u li jħassar ir-Regolament (UE) Nru 525/2013 tal-Parlament Ewropew u tal-Kunsill (ĠU L 328, 21.12.2018, pp. 1–77).

Ara l-verżjoni konsolidata.

Id-Deċiżjoni Nru 406/2009/KE tal-Parlament Ewropew u tal-Kunsill tat-23 ta’ April 2009 dwar l-isforz tal-Istati Membri biex inaqqsu l-emissjonijiet tagħhom tal-gassijiet serra biex jonoraw l-impenji tal-Komunità għat-tnaqqis tal-emissjonijiet tal-gassijiet serra sal-2020 (ĠU L 140, 5.6.2009, pp. 136–148).

Ara l-verżjoni konsolidata.

Id-Direttiva2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema ta’ skambju ta’ kwoti ta’ emissjonijiet ta’ gassijiet serra fi ħdan il-Komunità u li temenda d-Direttiva tal-Kunsill 96/61/KE (ĠU L 275, 25.10.2003, pp. 32–46).

Ara l-verżjoni konsolidata.

l-aħħar aġġornament 19.11.2021