Xogħol mhux iddikjarat — il-kooperazzjoni bejn il-pajjiżi tal-UE

 

SOMMARJU TAD-DOKUMENT:

Deċiżjoni (UE) 2016/344 dwar l-istabbiliment ta’ Pjattaforma Ewropea biex tissaħħaħ il-kooperazzjoni fl-indirizzar ta’ xogħol mhux iddikjarat

X’INHU L-GĦAN TAD-DEĊIŻJONI?

• Din tistabbilixxi pjattaforma jew forum fil-livell tal-UE fejn rappreżentanti mill-pajjiżi kollha tal-UE jiltaqgħu biex:
  • jiskambjaw l-informazzjoni u l-aħjar prattiki;
  • jiżviluppaw l-għarfien u l-kapaċità; u
  • jaħdmu f’kooperazzjoni transkonfinali aktar mill-qrib biex jiġġieldu x-xogħol mhux iddikjarat* b’mod aktar effettiv u effiċjenti.

PUNTI EWLENIN

• Il-pjattaforma għandha l-għan li:
  • tnaqqas ix-xogħol mhux iddikjarat;
  • ittejjeb il-kundizzjonijiet tax-xogħol;
  • tippromwovi l-integrazzjoni fis-suq tax-xogħol u l-inklużjoni soċjali;
  • ittejjeb l-infurzar tal-liġi fl-integrazzjoni fis-suq tax-xogħol u l-inklużjoni soċjali;
  • tinkoraġġixxi l-iżvilupp ta’ impjiegi formali;
  • tikkontribwixxi għal riformi strutturali fil-qasam tax-xogħol mhux iddikjarat.
• Il-pjattaforma tappoġġa l-kooperazzjoni bejn il-pajjiżi tal-UE permezz ta’:
  • l-iskambju tal-aħjar prattiki u informazzjoni;
  • l-iżvilupp ta’ kompetenza esperta u analiżi;
  • l-inkoraġġiment ta’ modi innovattivi ta’ kooperazzjoni transkonfinali effettivi u effiċjenti;
  • il-promozzjoni ta’ fehim usa’ tal-kwistjonijiet imqajma mix-xogħol mhux iddikjarat.
• L-attivitajiet tal-pjattaforma jinkludu:
  • definizzjonijiet kondiviżi, kunċetti komuni, analiżi komparattiva, ġbir tad-data u l-użu tal-evalwazzjonijiet bejn il-pari;
  • l-analiżi ta’ politiki differenti, miżuri preventivi u penalitajiet;
  • l-istabbiliment ta’ bank ta’ għarfien biex jiġu kondiviżi l-informazzjoni u l-esperjenza;
  • il-produzzjoni ta’ linji gwida għall-infurzar, manwali ta’ prattiki tajba u prinċipji kondiviżi ta’ spezzjoni;
  • l-inkoraġġiment tal-iskambju ta’ uffiċjali nazzjonali u attivitajiet kondiviżi;
  • l-eżami tal-fattibbiltà ta’ sistema ta’ skambju rapidu ta’ informazzjoni u l-kondiviżjoni tad-data mtejba;
  • l-iżvilupp tal-kapaċità ta’ taħriġ;
  • iż-żieda fis-sensibilizzazzjoni dwar il-problema tax-xogħol mhux iddikjarat permezz ta’ kampanji Ewropej u strateġiji reġjonali u madwar l-UE kkoordinati.
• il-pjattaforma tikkoopera mill-qrib ma’ gruppi u kumitati esperti oħra involuti fl-indirizzar ta’ xogħol mhux iddikjarat.
• il-pjattaforma tinkludi rappreżentanti minn kull pajjiż tal-UE, mill-Kummissjoni Ewropea u kemm min-naħa ta’ min iħaddem kif ukoll min-naħa tal-ħaddiema fl-industrija.
• Ir-rappreżentanti tal-imsieħba soċjali, b’mod partikolari f’setturi b’inċidenza għolja ta’ xogħol mhux iddikjarat, il-korpi relevanti tal-UE u dawk internazzjonali, bħall-Aġenzija Ewropea għas-Sigurtà u s-Saħħa fuq il-Post tax-Xogħol, u pajjiżi mhux tal-UE (l-Iżlanda, il-Liechtenstein u n-Norveġja) jistgħu jattendu bħala osservaturi.
• Il-pjattaforma tiltaqa’ mill-inqas darbtejn fis-sena u hija ppreseduta mill-Kummissjoni.
• Il-parteċipazzjoni fil-pjattaforma ma taffettwax l-isforzi nazzjonali u internazzjonali l-oħra tal-pajjiżi tal-UE biex jiġi indirizzat ix-xogħol mhux iddikjarat.
• Il-Kummissjoni tirrapporta dwar l-attivitajiet tal-pjattaforma sat-13 ta’ Marzu 2020. Hija tista’ tagħmel rakkomandazzjonijiet biex tbiddel l-ambitu tal-attivitajiet tagħha.

META TAPPLIKA D-DEĊIŻJONI?

Ilha tapplika mit-12 ta’ Marzu 2016.

SFOND

• Ix-xogħol mhux iddikjarat huwa partikolarment komuni fis-setturi bħall-kostruzzjoni, it-tiswija, ix-xogħol fil-ġnien, it-tindif, l-indukrar tat-tfal, il-catering u l-lukandi.
• Huwa ta’ dannu għall-ekonomija tal-UE, iwassal għall-kompetizzjoni mhux ġusta u jdgħajjef il-protezzjoni soċjali u okkupazzjonali tal-ħaddiema.
• L-awtoritajiet nazzjonali għandhom ir-responsabbiltà ewlenija li jindirizzaw ix-xogħol mhux iddikjarat: jew permezz tad-deterrenza (sanzjonijiet aktar stretti, spezzjonijiet aktar effettivi) jew permezz tal-prevenzjoni (inċentivi fiskali jew amnestiji).

* TERMINI EWLENIN

DOKUMENT EWLIENI

Deċiżjoni (UE) 2016/344 tal-Parlament Ewropew u tal-Kunsill tad-9 ta’ Marzu 2016 dwar l-istabbiliment ta’ Pjattaforma Ewropea biex tissaħħaħ il-kooperazzjoni fl-indirizzar ta’ xogħol mhux iddikjarat (ĠU L 65, 11.3.2016, pp. 12–20)

l-aħħar aġġornament 12.12.2016