Patt Ekoloġiku Ewropew

 

SOMMARJU TA’:

Komunikazzjoni mill-Kummissjoni — Il-Patt Ekoloġiku Ewropew

X’INHU L-GĦAN TAL-KOMUNIKAZZJONI?

Hija tistabbilixxi pjan ta’ azzjoni biex tagħmel l-ekonomija tal-UE sostenibbli billi tibdel l-isfidi tal-klima u l-ambjent f’opportunitajiet fl-oqsma kollha tal-politika b’mod li huwa ġust u inklussiv. Il-Patt Ekoloġiku Ewropew huwa l-istrateġija l-ġdida tat-tkabbir għal ekonomija tal-UE li hija sostenibbli, aktar nadifa, sigura u sana.

PUNTI EWLENIN

• Il-komunikazzjoni tinkludi pjan direzzjonali, pjan li jinkludi azzjonijiet konkreti biex:
  • jiżgura li m’hemmx emissjonijiet netti ta’ gassijiet serra sal-2050;
  • jixpruna l-użu effiċjenti tar-riżorsi billi jimxi lejn ekonomija ċirkolari nadifa;
  • jirrestawra l-bijodiversità u jaqta’ t-tniġġis.
• Il-Patt Ekoloġiku Ewropew ikopri s-setturi kollha; il-Kummissjoni Ewropea se toħroġ proposti għal azzjoni f’għadd ta’ oqsma tal-politika:
  • enerġija nadifa;
  • industrija sostenibbli;
  • bini u rinnovazzjoni;
  • mobilità sostenibbli;
  • il-bijodiversità;
  • mir-razzett sal-mejda;
  • l-eliminazzjoni tat-tniġġis;
  • azzjoni klimatika.
• Il-komunikazzjoni tiddeskrivi l-investimenti meħtieġa u l-għodod ta’ finanzjament disponibbli. Il-Kummissjoni ppreżentat Pjan ta’ Investiment Ewropew Sostenibbli u se tippreżenta Strateġija ta’ Finanzjament Ekoloġiku fl-2020.
• Il-Kummissjoni pproponiet Liġi tal-UE dwar il-Klima li se tibdel l-impenn politiku tal-UE sabiex ikun newtrali għall-klima sal-2050 f’obbligu legali.
• Mekkaniżmu ta’ Tranżizzjoni Ġusta se jappoġġja lir-reġjuni tal-UE li jiddependu ħafna fuq attivitajiet intensivi ħafna tal-karbonju.
• Il-Kummissjoni se tniedi Patt Klimatiku Ewropew biex tagħti liċ-ċittadini u lill-partijiet interessati vuċi u rwol fit-tfassil ta’ azzjonijiet klimatiċi, fil-qsim tal-informazzjoni, fit-tnedija ta’ attivitajiet bażiċi u fil-wiri ta’ soluzzjonijiet li ħaddieħor jista’ jsegwi.

SFOND

Għal aktar informazzjoni, ara:

• Patt Ekoloġiku Ewropew (Il-Kummissjoni Ewropea)
• Azzjoni klimatika tal-UE u l-Patt Ekoloġiku Ewropew (Il-Kummissjoni Ewropea).

DOKUMENT PRINĊIPALI

Komunikazzjoni mill-Kummissjoni lill-Parlament Ewropew, il-Kunsill Ewropew, il-Kumitat Ekonomiku u Soċjali Ewropew u l-Kumitat tar-Reġjuni — Il-Patt Ekoloġiku Ewropew (COM (2019) 640 final, 11.12.2019)

l-aħħar aġġornament 23.04.2020