Ftehim bejn l-UE u l-Moldova dwar it-trasport tal-merkanzija bit-triq

 

SOMMARJU TA’:

Ftehim bejn l-Unjoni Ewropea u r-Repubblika tal-Moldova dwar it-trasport tal-merkanzija bit-triq

Id-Deċiżjoni (UE) 2022/1165 dwar l-iffirmar, f’isem l-Unjoni Ewropea, u l-applikazzjoni proviżorja tal-Ftehim bejn l-UE u l-Moldova dwar it-trasport tal-merkanzija bit-triq

Id-Deċiżjoni (UE) 2022/2417 dwar il-konklużjoni, f’isem l-Unjoni Ewropea, tal-Ftehim bejn l-UE u l-Moldova dwar it-trasport tal-merkanzija bit-triq

X’INHU L-GĦAN TAL-FTEHIM U TAD-DEĊIŻJONIJIET?

• Il-ftehim għandu l-għan li jiffaċilita temporarjament it-trasport tal-merkanzija bit-triq bejn u minn ġot-terrirorju tal-Unjoni Ewropea (UE) u tal-Moldova fid-dawl tal-gwerra ta’ aggressjoni tar-Russja fuq l-Ukrajna.
• Id-Deċiżjoni (UE) 2022/1165 tapprova l-iffirmar tal-ftehim f’isem l-UE.
• Id-Deċiżjoni (UE) 2022/2417 tapprova l-ftehim innifsu.

PUNTI EWLENIN

Ir-relazzjonijiet bejn l-UE u l-Moldova

Ir-relazzjonijiet bejn l-UE u l-Moldova huma bbażati fuq ftehim ta’ assoċjazzjoni (ara s-sommarju) bejn il-partijiet.

Kamp ta’ applikazzjoni

• Il-Ftehim jagħti drittijiet addizzjonali ta’ tranżitu u trasport bilaterali ta’ merkanzija lil operaturi bbażati f’waħda miż-żewġ partijiet.
• Huwa japplika għat-tranżitu u għat-trasport ta’ merkanzija bit-triq bi ħlas.
• It-trasport ta’ merkanzija bit-triq fi Stat Membru tal-UE jew bejn l-Istati Membri ma huwiex kopert mill-Ftehim.

Operazzjonijiet tat-trasport tal-merkanzija bit-triq

L-operaturi tat-trasport tal-merkanzija bit-triq jistgħu jwettqu dan li ġej mingħajr il-ħtieġa ta’ permessi addizzjonali:

• vjaġġi b’merkanzija fejn il-punt tat-tluq u l-punt tal-wasla huma fit-territorju ta’ żewġ partijiet differenti, bi jew mingħajr tranżitu mit-terrritorju ta’ pajjiż terz;
• vjaġġi b’merkanzija mit-territorju ta’ parti waħda għat-territorju tal-istess parti, u li jgħaddi mit-territorju tal-parti l-oħra;
• vjaġġi b’merkanzija għal jew mit-territorju ta’ parti waħda għal-pajjiż terz, u bi tranżitu mit-territorju tal-parti l-oħra;
• vjaġġi mingħajr merkanzija mwettqa flimkien mal-vjaġġi msemmija hawn fuq.

Sorveljanza

• Il-Ftehim jistabbilixxi Kumitat Konġunt magħmul minn membri taż-żewġ partijiet.
• Il-kumitat jissorvelja u jimmonitorja l-applikazzjoni u l-implimentazzjoni tal-Ftehim u jirrieżamina perjodikament jekk il-Ftehim ikunx qed jissodisfa l-objettivi tiegħu.

DATA TAD-DĦUL FIS-SEĦĦ

Il-ftehim daħal fis-seħħ fil-21 ta’ Awwissu 2023

SFOND

Għal aktar informazzjoni, ara:

• L-appoġġ tal-esportzzjonijiet Ukreni u t-titjib tal-konnessjonijiet lejn l-UE: EU strengthens cooperation with Ukraine and Moldova (l-UE ssaħħaħ il-kooperazzjoni mal-Ukrajna u l-Moldova) (il-Kummissjoni Ewropea).

DOKUMENTI PRINĊIPALI

Ftehim bejn l-Unjoni Ewropea u r-Repubblika tal-Moldova dwar it-Trasport tal-Merkanzija bit-Triq (ĠU L 181, 7.7.2022, pp. 4–10).

Id-Deċiżjoni tal-Kunsill (UE) 2022/116 tas-27 ta’ Ġunju 2022 dwar l-iffirmar, f’isem l-Unjoni, u l-applikazzjoni proviżorja tal-Ftehim bejn l-Unjoni Ewropea u r-Repubblika tal-Moldova dwar it-trasport tal-merkanzija bit-triq (ĠU L 181, 7.7.2022, pp. 1–3).

Id-Deċiżjoni tal-Kunsill (UE) 2022/2417 tal-5 ta’ Diċembru 2022 dwar il-konklużjoni, f’isem l-Unjoni Ewropea, tal-Ftehim bejn l-Unjoni Ewropea u r-Repubblika tal-Moldova dwar it-trasport tal-merkanzija bit-triq (ĠU L 318, 12.12.2022, pp. 1–3).

L-emendi suċċessivi għad-Deċiżjoni (UE) 2022/2417 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Informazzjoni marbuta mad-dħul fis-seħħ tal-Ftehim bejn l-Unjoni Ewropea u r-Repubblika tal-Moldova dwar it-trasport tal-merkanzija bit-triq (ĠU L 226, 14.9.2023, p. 1).

Id-Deċiżjoni Nru 2/2022 tal-Kumitat Konġunt stabbilit bil-Ftehim bejn l-Unjoni Ewropea u r-Repubblika tal-Moldova dwar it-trasport tal-merkanzija bit-triq tal-15 ta’ Diċembru 2022 dwar il-kontinwazzjoni tal-Ftehim [2023/604] (ĠU L 79, 17.3.2023, pp. 185–186).

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Pjan ta’ Azzjoni għal Korsiji ta’ Solidarjetà bejn l-UE u l-Ukrajna għall-faċilitazzjoni tal-esportazzjoni agrikola tal-Ukrajna u l-kummerċ bilaterali mal-UE (COM(2022) 217 final, 12.5.2022).

Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa, u r-Repubblika tal-Moldova, min-naħa l-oħra (ĠU L 260, 30.8.2014, pp. 4–738).

Ara l-verżjoni konsolidata.

l-aħħar aġġornament 29.09.2023