Ftehimiet mal-Kanada dwar materji doganali

PUNTI EWLENIN

Il-ftehim bejn l-UE u l-Kanada dwar materji doganali

Kooperazzjoni doganali

Il-partijiet jimpenjaw ruħhom li jiżviluppaw kooperazzjoni doganali billi:

• jissimplifikaw u jarmonizzaw il-proċeduri doganali tagħhom;
• jeżaminaw modi kif isolvu problemi relatati mad-dwana;
• jiskambjaw il-persunal;
• jikkompjuterizzaw il-proċeduri u l-formalitajiet doganali.

Assistenza amministrattiva reċiproka

Il-partijiet jimpenjaw ruħhom li jassistu lil xulxin, jew fuq talba jew fuq inizjattiva tagħhom stess. Huma jikkondividu l-informazzjoni kollha xierqa li tgħin sabiex tiġi żgurata l-applikazzjoni xierqa tal-leġiżlazzjoni doganali u l-prevenzjoni u l-ġlieda kontra kwalunkwe ksur ta’ tali leġiżlazzjoni. Sabiex jiksbu dan, huma jikkomunikaw lil xulxin kwalunkwe teknika ta’ infurzar tal-liġi doganali ġodda u kwalunkwe xejra u mezz ġdid ta’ twettiq ta’ ksur tal-leġiżlazzjoni doganali.

L-awtoritajiet doganali jipprovdu wkoll lil xulxin b’informazzjoni dwar l-operazzjonijiet, lesti jew ippjanati, li jidhru li jikkostitwixxu ksur ta’ leġiżlazzjoni doganali fit-territorju tal-parti kontraenti l-oħra.

Assistenza fuq talba

L-awtorità li ssirilha t-talba² tinforma lill-awtorità applikanti³ bil-leġiżlazzjoni u l-proċeduri doganali applikabbli fit-territorju tagħha u li jkunu rilevanti għad-domandi fir-rigward ta’ ksur tal-leġiżlazzjoni doganali. Din l-informazzjoni tista’ tkun relatata mal-leġittimità tal-proċeduri għall-esportazzjoni u l-importazzjoni ta’ oġġetti bejn iż-żewġ partijiet kontraenti u l-proċedura doganali applikata.

Il-ftehim jipprovdi wkoll għal sorveljanza speċjali tal-persuni li jkunu wettqu ksur tal-leġiżlazzjoni doganali jew li jkun hemm suspett li għamlu dan. Din is-sorveljanza tista’ tiġi applikata wkoll għall-oġġetti li jwasslu għal traffikar illeċitu u għat-trasport u l-post użat għal dan il-għan.

Assistenza spontanja

Waħda miż-żewġ partijiet tista’ tipprovdi informazzjoni fuq inizjattiva tagħha f’każijiet serji li jistgħu jinvolvu dannu sostanzjali lill-ekonomija, lis-saħħa pubblika, lis-sigurtà pubblika jew lil kwalunke interess vitali ieħor tal-parti kontraenti l-oħra.

Aspetti formali u eċċezzjonijiet għall-assistenza

• It-talbiet iridu jsiru bil-miktub, ħlief f’każijiet urġenti fejn isiru talbiet orali, u jiġu kkonfermati bil-miktub wara. It-talbiet irid ikun fihom:
  • data dwar l-awtorità doganali applikanti;
  • il-miżura mitluba;
  • l-objettiv tat-talba u r-raġuni warajha;
  • il-leġiżlazzjoni involuta; u
  • d-dettalji tal-individwi li jkunu soġġetti għall-investigazzjoni.
• Il-parti mitluba tista’ tirrifjuta milli tipprovdi assistenza jekk biex tagħmel dan ikun probabbli li tippreġudika s-sovranità, il-politika pubblika, is-sigurtà jew interess essenzjali ieħor ta’ waħda mill-partijiet. L-obbligu li tiġi pprovduta assistenza jista’ jiġi wkoll pospost għar-raġuni li jinterferixxi ma’ investigazzjoni, prosekuzzjoni jew proċess li jkunu għadhom għaddejjin.
• Il-ftehim fih klawżoli ta’ kunfidenzjalità fir-rigward tal-informazzjoni fornuta. Jingħata livell għoli ta’ protezzjoni lid-data personali.
• Il-ftehim jipprovdi għall-istabbiliment ta’ Kumitat Konġunt għall-Kooperazzjoni Doganali li jieħu ħsieb il-funzjonament xieraq ta’ dan il-ftehim u jeżamina l-materji kollha li jirriżultaw mill-applikazzjoni tiegħu.

Il-kooperazzjoni doganali fir-rigward tas-sigurtà tal-katina tal-provvista

• Skont id-Deċiżjoni 2014/941/UE, il-kooperazzjoni doganali bejn il-partijiet ġiet estiża biex tkopri s-sigurtà tal-katina tal-provvista. Skont dan il-ftehim, l-UE u l-Kanada fittxew li jiżguraw il-katina tal-loġistika filwaqt li fl-istess ħin jiffaċilitaw il-kummerċ leġittimu.
• Aspetti koperti mill-ftehim jinkludu:
  • it-tfassil ta’ standards minimi għall-ġestjoni tar-riskju;
  • il-ħidma lejn rikonoxximent reċiproku tat-tekniki tal-immaniġġjar tar-riskju, l-istandards tar-riskju, il-kontrolli tas-sigurtà, is-sigurtà tal-kontenituri u programmi ta’ sħubija kummerċjali, inklużi miżuri tal-faċilitazzjoni tal-kummerċ ekwivalenti;
  • il-kondiviżjoni ta’ informazzjoni għas-sigurtà tal-katina tal-provvista u ġestjoni tar-riskju skont ir-rekwiżiti tal-kunfidenzjalità tad-data u tal-protezzjoni tad-data personali;
  • l-introduzzjoni ta’ interfaċċa għall-kondiviżjoni tad-data, inkluż għall-wasla minn qabel jew għat-tluq minn qabel tad-data;
  • l-iżvilupp ta’ strateġija li tippermetti sħubiji doganali kooperattivi fir-rigward tal-ispezzjoni tal-merkanzija.