Servizz Ewropew għall-Azzjoni Esterna

 

SOMMARJU TA’:

Deċiżjoni 2010/427/EU — li tistabbilixxi l-organizzazzjoni u l-funzjonament tas-Servizz Ewropew għall-Azzjoni Esterna

X’INHU L-GĦAN TAD-DEĊIŻJONI?

Hija tistabbilixxi l-organizzazzjoni u l-funzjonament tas-Servizz Ewropew għall-Azzjoni Esterna (SEAE), stabbilit permezz tat-Trattat ta’ Lisbona, sabiex jappoġġja lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (Rappreżentant Għoli) fit-twettiq tal-kompiti tiegħu/tagħha rigward l-implimentazzjoni tal-politika esterna tal-UE.

PUNTI EWLENIN

Servizz Ewropew għall-Azzjoni Esterna (SEAE)

Is-SEAE huwa taħt l-awtorità tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, u jappoġġjah/a fl-oqsma li ġejjin:

• it-twettiq ta’ politika barranija u ta’ sigurtà komuni tal-UE (PESK), inkluża l-politika ta’ sigurtà u ta’ difiża komuni (PSDK);
• il-Presidenza tal-Kunsill Ewropew għall-Affarijiet Barranin;
• il-Viċi-Presidenza tal-Kummissjoni Ewropea fil-qasam tar-relazzjonijiet esterni.

Is-SEAE wkoll:

• tassisti lis-Segretarjat Ġenerali tal-Kunsill, il-Kummissjoni u s-servizzi diplomatiċi tal-pajjiżi tal-UE biex jiżguraw il-konsistenza tal-azzjoni esterna tal-UE; u
• jappoġġja lill-Kummissjoni fit-tħejjija u l-implimentazzjoni ta’ programmi u strumenti finanzjarji relatati mal-azzjoni esterna tal-UE.

Bil-kwartieri ġenerali tiegħu fi Brussell, is-SEAE huwa ġestit minn Segretarju Ġenerali, assistit minn tliet Viċi Segretarji Ġenerali, li joperaw taħt l-awtorità tar-Rappreżentant Għoli. L-amministrazzjoni ċentrali tas-SEAE hija organizzata f’direttorati maniġerjali li jittrattaw:

• żoni ġeografiċi ta’ azzjoni, li jkopru l-pajjiżi kollha u r-reġjuni globali kollha;
• id-drittijiet tal-bniedem, kwistjonijiet globali u multilaterali;
• PSDK u rispons għall-kriżi.

Delegazzjonijiet tal-UE

• Is-SEAE jikkonsisti wkoll minn delegazzjonijiet tal-UE għal pajjiżi mhux tal-UE u diversi organizzazzjonijiet internazzjonali. Il-bażi legali għad-delegazzjonijiet hija l-Artikolu 221 tat-Trattat dwar il-Funzjonament tal-UE. Kull waħda hija mmexxija minn Kap ta’ Delegazzjoni, taħt l-awtorità tar-Rappreżentant Għoli u tas-SEAE, li jirrappreżenta l-UE fil-pajjiż ikkonċernat. Id-delegazzjonijiet jikkoperaw u jaqsmu informazzjoni mas-servizzi diplomatiċi tal-pajjiżi tal-UE.
• Is-Segretarju Ġenerali tas-SEAE huwa responsabbli għall-evalwazzjoni finanzjarja u amministrattiva ta’ kull delegazzjoni.

Ġestjoni ta’ kriżi

Il-PSDK u l-istrutturi tar-rispons għall-kriżijiet jinkludu:

• Direttorat għall-Maniġġar ta’ Kriżijiet u l-Ippjanar (CMDP);
• Kapaċità Ċivili tal-Ippjanar u t-Tmexxija (CPCC)
• Persunal Militari tal-Unjoni Ewropea (EUMS) Dipartimenti taħt l-awtorità tad-Direttur Ġenerali tal-EUMS:
  • Direttorat tal-Kunċetti u l-Kapaċità,
  • Direttorat tal-Intelligence,
  • Direttorat tal-Operazzjonijiet,
  • Direttorat tal-Loġistika,
  • Direttorat tal-Komunikazzjoni u Sistemi ta’ Informazzjoni u taċ-Ċiberdifiża;
• Ċentru tal-Analiżi tal-Intelligence tal-UE (INTCEN), li qabel kien iċ-Ċentru tas-Sitwazzjoni tal-UE (SITCEN).

MINN META TAPPLIKA D-DEĊIŻJONI?

Din ilha tapplika mis-26 ta’ Lulju 2010.

SFOND

Għal aktar informazzjoni, ara:

• Dwar is-Servizz Ewropew għall-Azzjoni Esterna (Servizz Ewropew għall-Azzjoni Esterna).

DOKUMENT PRINĊIPALI

Deċiżjoni tal-Kunsill 2010/427/UE tas-26 ta’ Lulju 2010 li tistabbilixxi l-organizzazzjoni u l-funzjonament tas-Servizz Ewropew għall-Azzjoni Esterna (ĠU L 201, 3.8.2010, pp. 30-40)

DOKUMENTI RELATATI

Verżjoni konsolidata tat-Trattat dwar il-Funzjonament tal-Unjoni Ewropea — Il-Ħames Parti — L-azzjoni esterna tal-Unjoni — Titolu VI — Ir-relazzjonijiet tal-Unjoni ma’ organizzazzjonijiet internazzjonali u pajjiżi terzi u delegazzjonijiet tal-Unjoni — l-Artikolu 221 (ĠU C 202, 7.6.2016, p. 147)

Id-Deċiżjoni tal-Kunsill 2001/80/PESK tat-22 ta’ Jannar 2001 dwar l-istabbiliment ta’ l-Istaff Militari ta’ l-Unjoni Ewropea (ĠU L 27, 30.1.2001, pp. 7-11)

L-emendi suċċessivi għad-Deċiżjoni 2001/80/CFSP ġew inkorporati fit-test oriġinali. Din il-verżjoni kkonsolidata għandha valur dokumentarju biss.

l-aħħar aġġornament 10.11.2020