L-istatistika dwar ix-xjenza u t-teknoloġija

 

SOMMARJU TA’:

Id-Deċiżjoni Nru 1608/2003/KE — il-produzzjoni u l-iżvilupp tal-istatistika Komunitarja dwar ix-xjenza u t-teknoloġija

X’INHU L-GĦAN TAD-DEĊIŻJONI?

Hija tistabbilixxi sistema ta’ tagħrif statistiku sabiex tappoġġa l-ġestjoni tal-politiki dwar ix-xjenza u t-teknoloġija fl-UE. Din tippermetti l-valutazzjoni tar-riċerka u l-iżvilupp (R&D) kif ukoll tal-kapaċità tar-reġjuni tal-UE għall-innovazzjoni, filwaqt li tikkunsidra appoġġ mill-Fondi Strutturali.

PUNTI EWLENIN

Il-ħolqien ta’ sistema ta’ tagħrif statistiku tal-UE dwar ix-xjenza, it-teknoloġija u l-innovazzjoni jinvolvi 2 aspetti ewlenin.

• 1.

  L-għoti ta’ statistika mill-pajjiżi tal-UE fuq bażi regolari u f’perijodi perentorji speċifikati, b’mod partikolari data dwar:

  • l-attività tal-R&D fis-setturi kollha ta’ prestazzjoni,
  • il-finanzjament tal-attività R&D, inkluż l-appoġġ tal-gvern għall-R&D, filwaqt li tiġi kkunsidrata d-dimensjoni reġjonali bil-produzzjoni ta’ statistika bbażata fuq in-nomenklatura ta’ unitajiet territorjali għall-istatistika (klassifikazzjoni tan-NUTS).
• 2.

  L-iżvilupp ta’ varjabbli statistiċi ġodda li għandhom jiġu prodotti fuq bażi permanenti. Dak jista’ jrendi informazzjoni aktar dettaljata dwar ix-xjenza u t-teknoloġija.

B’mod partikolari dawn jiffukaw fuq il-kejl ta’:

• l-output tal-attivitajiet tax-xjenza u tat-teknoloġija,
• it-tixrid tal-għerf,
• il-prestazzjoni tal-innovazzjoni.

Oqsma ta’ prijorità

• Dawk li jfasslu l-politika jeħtieġu informazzjoni għall-formolazzjoni u l-istima tal-politiki tax-xjenza u t-teknoloġija fil-pajjiżi tal-UE, peress li l-ekonomiji tagħhom qegħdin ikunu dejjem aktar imsejsa fuq l-għerf. Fl-oqsma li ġejjin tingħata prijorità għall-iżvilupp tad-data:
  • l-innovazzjoni (kemm teknoloġika kif ukoll mhux teknoloġija, eż. innovazzjoni fis-settur tas-servizzi bħal bidla fl-istruttura organizzazzjonali),
  • ir-riżorsi umani involuti fix-xjenza u t-teknoloġija,
  • il-privattivi (id-data għandha tiġi derivata mill-uffiċċji nazzjonali tal-privattivi),
  • l-istatistiċi dwar it-teknoloġija għolja (l-identifikazzjoni u l-klassifikazzjoni tal-prodotti u tas-servizzi, il-kejl tal-prestazzjoni tal-ekonomija u l-kontribuzzjoni għat-tkabbir ekonomiku),
  • l-istatistiċi mhux aggregati skont is-sess (jiġifieri ċifri maqsuma skont is-sess) dwar ix-xjenza u t-teknoloġija.
• L-istandards u l-manwali dwar il-kunċetti u l-metodi se jitjiebu wkoll, b’enfasi partikolari fuq il-kunċetti fis-settur tas-servizzi u l-metodi kkordinati għall-kejl tal-attività tal-R&D.
• L-UE se taħdem ukoll mill-qrib mal-Organizzazzjoni għall-Kooperazzjoni u l-Iżvilupp Ekonomiċi (OECD) u ma’ organizzazzjonijiet internazzjonali oħra bil-ħsieb li tiżgura l-paragunabbiltà tal-informazzjoni u tevita d-duplikazzjoni tal-isforzi.
• Fl-2009, il-Kumitat tas-Sistema Ewropea tal-Istatistika issostitwixxa l-Kumitat għall-Programm Statistiku. Dan huwa responsabbli biex jappoġġa lill-Kummissjoni Ewropea fl-implimentazzjoni ta’ din id-deċiżjoni. Huwa jinvolvi rappreżentanti tal-pajjiżi tal-UE u huwa ppresedut mill-Kummissjoni.

MINN META TAPPLIKA D-DEĊIŻJONI?

Hija bdiet tapplika mis-6 ta’ Ottubru 2003.

SFOND

Għalaktar informazzjoni, ara:

• Statistika dwar ir-riċerka u l-innovazzjoni fil-livell reġjonali (Eurostat).

DOKUMENT EWLIENI

Deċiżjoni Nru 1608/2003/KE tal-Parlament Ewropew u tal-Kunsill tat-22 ta’ Lulju 2003 li tirrigwarda l-produzzjoni u l-iżvilupp ta’ l-istatistika Komunitarja dwar ix-xjenza u t-teknoloġija (ĠU L 230, 16.9.2003, pp. 1-3)

l-aħħar aġġornament 08.09.2017