EUR-Lex Access to European Union law
This document is an excerpt from the EUR-Lex website
Document 32019D1749
Council Decision 2019/1749 of 14 October 2019 concerning the request of Ireland to take part in some of the provisions of the Schengen acquis relating to the European Union Agency for the Operational Management of Large-Scale IT Systems in the Area of Freedom, Security and Justice (eu-LISA)
DEĊIŻJONI TAL-KUNSILL (UE) 2019/1749 tal-14 ta’ Ottubru 2019 dwar it-talba tal-Irlanda biex tieħu sehem f’uħud mid-dispożizzjonijiet tal-acquis ta’ Schengen relatati mal-Aġenzija tal-Unjoni Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (eu-LISA)
DEĊIŻJONI TAL-KUNSILL (UE) 2019/1749 tal-14 ta’ Ottubru 2019 dwar it-talba tal-Irlanda biex tieħu sehem f’uħud mid-dispożizzjonijiet tal-acquis ta’ Schengen relatati mal-Aġenzija tal-Unjoni Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (eu-LISA)
ST/12543/2019/INIT
OJ L 268, 22.10.2019, p. 73–76
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
|
22.10.2019 |
MT |
Il-Ġurnal Uffiċjali tal-Unjoni Ewropea |
L 268/73 |
DEĊIŻJONI TAL-KUNSILL (UE) 2019/1749
tal-14 ta’ Ottubru 2019
dwar it-talba tal-Irlanda biex tieħu sehem f’uħud mid-dispożizzjonijiet tal-acquis ta’ Schengen relatati mal-Aġenzija tal-Unjoni Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (eu-LISA)
IL-KUNSILL TAL-UNJONI EWROPEA,
Wara li kkunsidra l-Artikolu 4 tal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea,
Wara li kkunsidra t-talba mill-Gvern tal-Irlanda, bl-ittra tiegħu lill-President tal-Kunsill tal-Unjoni Ewropea tat-12 ta’ April 2019, biex jieħu sehem f’ċerti dispożizzjonijiet tal-acquis ta’ Schengen, kif speċifikat f’dik l-ittra,
Billi:
|
(1) |
Bid-Deċiżjoni 2002/192/KE (1) l-Kunsill awtorizza lill-Irlanda biex tieħu sehem f’uħud mid-dispożizzjonijiet tal-acquis ta’ Schengen, f’konformità mal-kondizzjonijiet imniżżla f’dik id-Deċiżjoni. |
|
(2) |
Ir-Regolament (UE) Nru 1077/2011 tal-Parlament Ewropew u tal-Kunsill (2) stabbilixxa l-Aġenzija Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja, komunement magħrufa bħala eu-LISA, sabiex tiżgura t-tmexxija operattiva tas-Sistema ta’ Informazzjoni ta’ Schengen tat-tieni ġenerazzjoni (SIS II), is-Sistema ta’ Informazzjoni dwar il-Viża (VIS) u l-Eurodac u ta’ ċerti aspetti tal-infrastrutturi ta’ komunikazzjoni tagħhom u potenzjalment dik ta’ sistemi oħra tal-IT fuq skala kbira fl-ispazju ta’ libertà, sigurtà u ġustizzja, abbażi ta’ atti legali separati tal-Unjoni, ibbażati fuq l-Artikoli 67 sa 89 tat-Trattat dwar il-Funzjonament tal-Unjoni Ewropea (TFUE). |
|
(3) |
Bid-Deċiżjoni 2012/764/UE (3) l-Kunsill awtorizza lill-Irlanda biex tieħu sehem fir-Regolament (UE) Nru 1077/2011 sal-miżura li dan hu relatat mat-tmexxija operattiva tal-VIS u l-partijiet tas-SIS II, li fihom l-Irlanda ma tieħux sehem. |
|
(4) |
Fl-14 ta’ Novembru 2018, ir-Regolament (UE) 2018/1726 tal-Parlament Ewropew u tal-Kunsill (4) ġie adottat li jħassar ir-Regolament (UE) Nru 1077/2011. Ir-Regolament (UE) 2018/1726 jistabbilixxi l-Aġenzija tal-Unjoni Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-Lisa) (“l-Aġenzija”), li tissostitwixxi u tissuċċedi l-aġenzija kif stabbilit mir-Regolament (UE) Nru 1077/2011. F’konformità mar-Regolament (UE) 2018/1726, ir-referenzi għar-Regolament (UE) Nru 1077/2011 li tħassar għandhom jitqiesu bħala referenzi għar-Regolament (UE) 2018/1726 u għandhom jinqraw skont it-tabella ta’ korrelazzjoni fl-Anness għal dak ir-Regolament. |
|
(5) |
F’konformità mar-Regolament (UE) 2018/1726, l-Aġenzija hija responsabbli għat-tmexxija operattiva tas-Sistema ta’ Informazzjoni ta’ Schengen (SIS), tal-VIS u tal-Eurodac. L-Aġenzija hija responsabbli wkoll għat-tħejjija, l-iżvilupp jew it-tmexxija operattiva tas-Sistema ta’ Dħul/Ħruġ (EES), DubliNet u s-Sistema Ewropea ta’ Informazzjoni u ta’ Awtorizzazzjoni għall-Ivvjaġġar (ETIAS). L-Aġenzija tista’ wkoll tingħata r-responsabbiltà għat-tħejjija, l-iżvilupp u t-tmexxija operattiva ta’ sistemi oħra tal-IT fuq skala kbira fl-ispazju ta’ libertà, sigurtà u ġustizzja jekk dan ikun previst fl-atti legali rilevanti tal-Unjoni ibbażati fuq l-Artikoli 67 sa 89 tat-TFUE. |
|
(6) |
Is-SIS hija parti mill-acquis ta’ Schengen. Ir-Regolamenti (UE) 2018/1861 (5) u (UE) 2018/1862 (6) tal-Parlament Ewropew u tal-Kunsill jirregolaw l-istabbiliment, it-tħaddim u l-użu tas-SIS fil-qasam tal-verifiki fuq il-fruntieri u, rispettivament, fil-qasam tal-kooperazzjoni tal-pulizija u l-kooperazzjoni ġudizzjarja f’materji kriminali. Barra minn hekk, ir-Regolament (UE) 2018/1860 (7) jirregola l-użu tas-SIS għar-ritorn ta’ ċittadini ta’ pajjiżi terzi b’soġġorn illegali. Ladarba jkunu applikabbli, ir-Regolamenti (UE) 2018/1861 u (UE) 2018/1862 ser jissostitwixxu r-Regolament (KE) Nru 1987/2006 tal-Parlament Ewropew u tal-Kunsill (8) u d-Deċiżjoni tal-Kunsill 2007/533/ĠAI (9) li attwalment japplikaw f’dawk il-materji. Madankollu, l-Irlanda ħadet sehem biss fl-adozzjoni tad-Deċiżjoni tal-Kunsill 2007/533/ĠAI u tar-Regolament (UE) 2018/1862 li jiżviluppaw id-dispożizzjonijiet tal-acquis ta’ Schengen imsemmija fl-Artikolu 1(a)(ii) tad-Deċiżjoni 2002/192/KE. |
|
(7) |
Il-VIS hija wkoll parti mill-acquis ta’ Schengen. L-Irlanda ma ħaditx sehem fl-adozzjoni tad-Deċiżjoni tal-Kunsill 2004/512/KE (10), ir-Regolament (KE) Nru 767/2008 tal-Parlament Ewropew u tal-Kunsill (11) u d-Deċiżjoni tal-Kunsill 2008/633/ĠAI (12) li jirregolaw l-istabbiliment, it-tħaddim u l-użu tal-VIS, u mhix marbuta b’dawn l-atti. |
|
(8) |
L-Eurodac mhix parti mill-acquis ta’ Schengen. L-Irlanda ħadet sehem fl-adozzjoni tar-Regolament (UE) Nru 603/2013 tal-Parlament Ewropew u tal-Kunsill (13) li jirregola l-istabbiliment, it-tħaddim u l-użu tal-Eurodac, u hi marbuta b’dan ir-Regolament. |
|
(9) |
L-EES hija parti mill-acquis ta’ Schengen. L-Irlanda ma ħaditx sehem fl-adozzjoni tar-Regolament (UE) 2017/2226 tal-Parlament Ewropew u tal-Kunsill (14) li jirregola l-istabbiliment, it-tħaddim u l-użu tal-EES, u mhix marbuta b’dan ir-Regolament. |
|
(10) |
L-ETIAS hija wkoll parti mill-acquis ta’ Schengen. L-Irlanda ma ħaditx sehem fl-adozzjoni tar-Regolament (UE) 2018/1240 tal-Parlament Ewropew u tal-Kunsill (15) li jirregola l-istabbiliment, it-tħaddim u l-użu tal-ETIAS, u mhix marbuta b’dan ir-Regolament. |
|
(11) |
DubliNet mhuwiex parti mill-acquis ta’ Schengen. L-Irlanda hija marbuta bir-Regolament tal-Kummissjoni (KE) Nru 1560/2003 (16) li jistabbilixxi DubliNet, mezz separat ta’ trasmissjoni elettronika sigura. |
|
(12) |
Minħabba l-parteċipazzjoni tagħha fil-Eurodac u f’DubliNet u l-parteċipazzjoni parzjali tagħha fis-SIS II, l-Irlanda għandha d-dritt li tipparteċipa fl-attivitajiet tal-Aġenzija, sa fejn l-Aġenzija hija responsabbli għat-tmexxija operattiva tas-SIS II kif irregolata mir-Regolament (UE) 2018/1862, il-Eurodac u DubliNet. |
|
(13) |
L-Aġenzija għandha personalità ġuridika unika u hija kkaratterizzata mill-unità tal-istruttura organizzattiva u finanzjarja tagħha. Għaldaqstant, u f’konformità mal-Artikolu 288 tat-TFUE, l-Aġenzija ġiet stabbilita permezz ta’ strument leġislattiv uniku li hu applikabbli fl-intier tiegħu fl-Istati Membri marbuta bih. Dan jeskludi l-possibbiltà ta’ applikabbiltà parzjali għall-Irlanda. Konsegwentement, għandhom jittieħdu l-passi meħtieġa biex jiġi żgurat li r-Regolament (UE) 2018/1726 fl-intier tiegħu ikun applikabbli għall-Irlanda. |
|
(14) |
F’konformità mal-Artikolu 4 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, l-Irlanda nnotifikat lill-Kummissjoni u lill-Kunsill permezz tal-ittri tat-12 ta’ April 2019, bl-intenzjoni tagħha li taċċetta d-dispożizzjonijiet tar-Regolament (UE) 2018/1726 li jirrigwardaw il-Eurodac u DubliNet. |
|
(15) |
F’konformità mal-proċedura prevista fl-Artikolu 331(1) tat-TFUE, il-Kummissjoni kkonfermat, bid-Deċiżjoni tat-23 ta’ Lulju 2019, l-applikazzjoni tar-Regolament (UE) 2018/1726 għall-Irlanda sa fejn id-dispożizzjonijiet tiegħu jirrigwardaw il-Eurodac u DubliNet. Dik id-Deċiżjoni tipprevedi li r-Regolament (UE) 2018/1726 jidħol fis-seħħ għall-Irlanda fid-data tad-dħul fis-seħħ tad-Deċiżjoni tal-Kunsill li tikkonċerna t-talba tal-Irlanda li tieħu sehem fid-dispożizzjonijiet tar-Regolament (UE) 2018/1726 li jirrigwardaw is-SIS, kif irregolat mir-Regolament (UE) 2018/1861 li ser jissostitwixxi r-Regolament (KE) Nru 1987/2006, u mir-Regolament (UE) 2018/1860, u li jirrigwardaw il-VIS, l-EES u l-ETIAS. |
|
(16) |
Wara l-adozzjoni tad-Deċiżjoni tal-Kummissjoni tat-23 ta’ Lulju 2019, l-ewwel prekondizzjoni biex l-Irlanda tieħu sehem fid-dispożizzjonijiet tar-Regolament (UE) 2018/1726 hija ssodisfata. |
|
(17) |
Sabiex tiġi żgurata l-konformità mat-Trattati u l-Protokolli applikabbli, u fl-istess ħin jiġu ssalvagwardjati l-unità u l-konsistenza tar-Regolament (UE) 2018/1726, l-Irlanda talbet, permezz tal-ittra tat-12 ta’ April 2019 lill-Kunsill, biex tieħu sehem fir-Regolament (UE) 2018/1726 skont l-Artikolu 4 tal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea (“il-Protokoll ta’ Schengen”) sa fejn id-dispożizzjonijiet tar-Regolament (UE) 2018/1726 jirreferu għar-responsabbiltà tal-Aġenzija għat-tmexxija operattiva tas-SIS kif irregolata mir-Regolament (UE) 2018/1861 li ser jissostitwixxi r-Regolament (KE) Nru 1987/2006 u bir-Regolament (UE) 2018/1860, u tal-VIS, l-EES u l-ETIAS. |
|
(18) |
Il-Kunsill jirrikonoxxi d-dritt tal-Irlanda li, f’konformità mal-Artikolu 4 tal-Protokoll ta’ Schengen, tagħmel talba biex tieħu sehem fid-dispożizzjonijiet tar-Regolament (UE) 2018/1726, sa fejn l-Irlanda mhix ser tieħu sehem f’dak ir-Regolament għal raġunijiet oħra. |
|
(19) |
Il-parteċipazzjoni tal-Irlanda fir-Regolament (UE) 2018/1726 hi mingħajr preġudizzju għall-fatt li fil-preżent l-Irlanda ma tieħux sehem u ma tistax tieħu zsehem fid-dispożizzjonijiet tal-acquis ta’ Schengen relatati mal-moviment liberu ta’ ċittadini ta’ pajjiżi terzi, il-politika dwar il-viżi u l-qsim minn persuni tal-fruntieri esterni tal-Istati Membri. Għaldaqstant, ir-Regolament (UE) 2018/1726 fih dispożizzjonijiet speċifiċi li jirriflettu din il-pożizzjoni speċjali tal-Irlanda, b’mod partikolari fir-rigward tad-drittijiet ta’ votazzjoni limitati fil-Bord ta’ Tmexxija tal-Aġenzija. |
|
(20) |
Il-Kumitat Imħallat, stabbilit skont l-Artikolu 3 tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dan tal-aħħar mal-implimentazzjoni, l-applikazzjoni u l-iżvilupp tal-acquis ta’ Schengen (17), ġie infurmat dwar it-tħejjija ta’ din id-Deċiżjoni f’konformità mal-Artikolu 5 ta’ dak il-Ftehim. |
|
(21) |
Il-Kumitat Imħallat, stabbilit skont l-Artikolu 3 tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (18), ġie infurmat dwar it-tħejjija ta’ din id-Deċiżjoni f’konformità mal-Artikolu 5 ta’ dak il-Ftehim, |
ADOTTA DIN ID-DEĊIŻJONI:
Artikolu 1
B’segwitu għad-Deċiżjonijiet 2002/192/KE u 2012/764/UE, l-Irlanda għandha tieħu sehem fir-Regolament (UE) 2018/1726 sa fejn jirrigwarda t-tmexxija operattiva tal-VIS, il-partijiet tas-SIS II li fihom l-Irlanda ma tieħux sehem u l-EES u l-ETIAS.
Artikolu 2
Din id-Deċiżjoni tidħol fis-seħħ fid-data tal-adozzjoni tagħha.
Magħmul fil-Lussemburgu, l-14 ta’ Ottubru 2019.
Għall-Kunsill
Il-President
J. LEPPÄ
(1) Id-Deċiżjoni tal-Kunsill 2002/192/KE tat-28 ta’ Frar 2002 rigward it-talba tal-Irlanda biex tieħu sehem f’xi dispożizzjonijiet tal-acquis ta’ Schengen (ĠU L 64, 7.3.2002, p. 20).
(2) Ir-Regolament (UE) Nru 1077/2011 tal-Parlament Ewropew u tal-Kunsill tal-25 ta’ Ottubru 2011 li jistabbilixxi Aġenzija Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (ĠU L 286, 1.11.2011, p. 1).
(3) Id-Deċiżjoni tal-Kunsill 2012/764/UE tas-6 ta’ Diċembru 2012 dwar it-talba tal-Irlanda biex tieħu sehem f’uħud mid-dispożizzjonijiet tal-acquis ta’ Schengen relatati mal-istabbiliment ta’ Aġenzija Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (ĠU L 337, 11.12.2012, p. 48).
(4) Ir-Regolament (UE) 2018/1726 tal-Parlament Ewropew u tal-Kunsill tal-14 ta’ Novembru 2018 dwar l-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira fiż-Żona ta’ Libertà, Sigurtà u Ġustizzja (eu-LISA), u li jemenda r-Regolament (KE) Nru 1987/2006 u d-Deċiżjoni tal-Kunsill 2007/533/ĠAI u li jħassar ir-Regolament (UE) Nru 1077/2011, (ĠU L 295, 21.11.2018, p. 99).
(5) Ir-Regolament (UE) 2018/1861 tal-Parlament Ewropew u tal-Kunsill tat-28 ta’ Novembru 2018 dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen (SIS) fil-qasam tal-verifiki fuq il-fruntieri, u li jemenda l-Konvenzjoni li timplimenta l-Ftehim ta’ Schengen, u li jemenda u jħassar ir-Regolament (KE) Nru 1987/2006 (ĠU L 312, 7.12.2018, p. 14).
(6) Ir-Regolament (UE) 2018/1862 tal-Parlament Ewropew u tal-Kunsill tat-28 ta’ Novembru 2018 dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen (SIS) fil-qasam tal-kooperazzjoni tal-pulizija u l-kooperazzjoni ġudizzjarja f’materji kriminali, li jemenda u jħassar id-Deċiżjoni tal-Kunsill 2007/533/ĠAI u jħassar ir-Regolament (KE) Nru 1986/2006 tal-Parlament Ewropew u tal-Kunsill u d-Deċiżjoni tal-Kummissjoni 2010/261/UE (ĠU L 312, 7.12.2018, p. 56).
(7) Ir-Regolament (UE) 2018/1860 tal-Parlament Ewropew u tal-Kunsill tat-28 ta’ Novembru 2018 dwar l-użu tas-Sistema ta’ Informazzjoni ta’ Schengen għar-ritorn ta’ ċittadini ta’ pajjiżi terzi b’soġġorn illegali (ĠU L 312, 7.12.2018, p. 1).
(8) Ir-Regolament (KE) Nru 1987/2006 tal-Parlament Ewropew u tal-Kunsill tal-20 ta’ Diċembru 2006 dwar l-istabbiliment, it-tħaddim u l-użu tas-sistema ta’ informazzjoni ta’ Schengen tat-tieni ġenerazzjoni (SIS II) (ĠU L 381, 28.12.2006, p. 4).
(9) Id-Deċiżjoni tal-Kunsill 2007/533/ĠAI tat-12 ta’ Ġunju 2007 dwar l-istabbiliment, it-tħaddim u l-użu tas-sistema ta’ informazzjoni ta’ Schengen tat-Tieni Ġenerazzjoni (SIS II) (ĠU L 205, 7.8.2007, p. 63).
(10) Id-Deċiżjoni tal-Kunsill 2004/512/KE tat-8 ta’ Ġunju 2004 li tistabbilixxi s-Sistema ta’ Informazzjoni dwar il-Viża (VIS) (ĠU L 213, 15.6.2004, p. 5).
(11) Ir-Regolament (KE) Nru 767/2008 tal-Parlament Ewropew u tal-Kunsill tad-9 ta’ Lulju 2008 dwar is-Sistema tal-Informazzjoni dwar il-Viża (VIS) u l-iskambju ta’ data bejn l-Istati Membri dwar viżi għal perjodu qasir (Regolament VIS) (ĠU L 218, 13.8.2008, p. 60).
(12) Id-Deċiżjoni tal-Kunsill 2008/633/ĠAI tat-23 ta’ Ġunju 2008 li tikkonċerna aċċess għall-konsultazzjoni tas-Sistema ta’ Informazzjoni dwar il-Viża (VIS) minn awtoritajiet maħtura ta’ Stati Membri u mill-Europol għall-finijiet tal-prevenzjoni, tal-kxif u tal-investigazzjoni ta’ reati terroristiċi u ta’ reati kriminali serji oħra (ĠU L 218, 13.8.2008, p. 129).
(13) Ir-Regolament (UE) Nru 603/2013 tal-Parlament Ewropew u tal-Kunsill tas-26 ta’ Ġunju 2013 dwar l-istabbiliment tal-“Eurodac” għat-tqabbil ta’ marki tas-swaba’ għall-applikazzjoni effettiva tar-Regolament (UE) Nru 604/2013 li jistabbilixxi l-kriterji u l-mekkaniżmi biex ikun iddeterminat l-Istat Membru responsabbli biex jeżamina applikazzjoni għall-protezzjoni internazzjonali ddepożitata f’wieħed mill-Istati Membri minn ċittadin ta’ pajjiż terz jew persuna apolida u dwar talbiet għat-tqabbil ma’ data tal-Eurodac mill-awtoritajiet tal-infurzar tal-liġi tal-Istati Membri u mill-Europol għall-finijiet ta’ infurzar tal-liġi, u li jemenda r-Regolament (UE) Nru 1077/2011 li jistabbilixxi Aġenzija Ewropea għat-tmexxija operattiva tas-sistemi tal-IT fuq skala kbira fl-ispazju ta’ libertà, sigurtà u ġustizzja (ĠU L 180, 29.6.2013, p. 1).
(14) Ir-Regolament (UE) 2017/2226 tal-Parlament Ewropew u tal-Kunsill tat-30 ta’ Novembru 2017 li jistabbilixxi Sistema ta’ Dħul/Ħruġ (EES) biex tiġi rreġistrata data dwar id-dħul u l-ħruġ u data dwar iċ-ċaħda tad-dħul ta’ ċittadini ta’ pajjiżi terzi li jaqsmu l-fruntieri esterni tal-Istati Membri u li jiddetermina l-kondizzjonijiet għall-aċċess għall-EES għal raġunijiet ta’ infurzar tal-liġi, u li jemenda l- Konvenzjoni li timplimenta l-Ftehim ta’ Schengen u r-Regolamenti (KE) Nru 767/2008 u (UE) Nru 1077/2011 (ĠU L 327, 9.12.2017, p. 20).
(15) Ir-Regolament (UE) 2018/1240 tal-Parlament Ewropew u tal-Kunsill tat-12 ta’ Settembru 2018 li jistabbilixxi Sistema Ewropea ta’ Informazzjoni u ta’ Awtorizzazzjoni għall-Ivvjaġġar (ETIAS) u li jemenda r-Regolamenti (UE) Nru 1077/2011, (UE) Nru 515/2014, (UE) 2016/399, (UE) 2016/1624 u (UE) 2017/2226 (ĠU L 236, 19.9.2018, p. 1).
(16) Ir-Regolament tal-Kummissjoni (KE) Nru 1560/2003 tat-2 ta’ Settembru 2003 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 343/2003 li jistabbilixxi l-kriterji u l-mekkaniżmi biex jiġi determinat l-Istat Membru responsabbli biex jeżamina applikazzjoni għall-asil iddepożitata f’wieħed mill-Istati Membri minn ċittadin ta’ pajjiż terz (ĠU L 222, 5.9.2003, p. 3).