10.2.2010   

MT

Il-Ġurnal Uffiċjali tal-Unjoni Ewropea

L 37/29

(1)

Id-Direttiva 2002/32/KE tistipula li l-użu ta’ prodotti li huma intenzjonati għall-għalf tal-annimali li fihom livelli ta’ sustanzi mhux mixtieqa li jaqbżu l-livelli massimi stipulati fl-Anness I ta’ dik id-Direttiva huwa pprojbit.

(2)

Fir-rigward tal-merkurju, l-Awtorità Ewropea dwar is-Sigurta fl-Ikel (EFSA) ikkonkludiet fl-opinjoni tagħha tal-20 ta' Frar 2008 (2) li l-livell massimu attwali tal-għalf komplut għall-ħut (0,1 mg/kg) u l-livell massimu tal-għalf prodott mill-ipproċessar tal-ħut u annimali oħra tal-baħar (0,5 mg / kg) m'humiex armonizzati. Wara l-iżviluppi reċenti fil-formulazzjoni tal-għalf, l-għalf tal-ħut fih aktar żejt tal-ħut u smida tal-ħut, iżda mad-dispożizzjonijiet legali attwali d-disponibbiltà ta' dan il-materjal importanti ta' għalf fil-produzzjoni ta' għalf għall-ħut qiegħda fil-periklu. Biex tindirizza dan, tkun xierqa żieda żgħira tal-livell massimu tal-għalf tal-ħut u din iż-żieda ma tipperikolax il-konformità ta' ħut ikkultivat mal-livelli massimi stabbiliti għall-merkurju. Barra minn hekk jirriżulta minn dik l-opinjoni li l-livell massimu attwali tal-għalf komplut għal klieb u qtates mhux protettiv biżżejjed. Dak il-livell massimu għandu għalhekk jitbaxxa. Peress li l-grad ta' sensittività tal-annimali tal-pil huwa simili għal dak tal-qtates, dak il-livell massimu għandu japplika wkoll għal annimali tal-pil.

(3)

Fir-rigward tan-nitriti, l-EFSA kkonkludiet, fl-opinjoni tagħha tal-25 ta' Marzu 2009 (3), li għal majjali u baqar, bħala rappreżentanti ta' speċijiet sensittivi li jipproduċu l-ikel, il-marġini ta' sigurtà fir-rigward tal-livell li fih ma jiġix osservat l-ebda effett negattiv (“No Observed Adverse Effect Level” - NOAEL) huma suffiċjenti. Barra minn hekk huwa kkunsidrat li l-preżenza tan-nitriti fi prodotti mill-annimali ma tqajjimx tħassib għas-saħħa tal-bniedem. In-nitrit huwa diġà awtorizzat b'kontenut massimu ta' 100 mg/kg għall-użu ta' preservattiv fl-għalf komplut għal klieb u qtates, b'kontenut ta' ndewwa li taqbeż l-20%, u bħala addittiv fl-għalf (4). In-nitrit għalhekk m'għandux jiġi kkunsidrat bħala sustanza mhux mixtieqa f'għalf komplut bħal dak jew f'għalf iffermentat. Għalhekk, l-ebda livell massimu m'għandu japplika f'dawn il-każijiet.

(4)

Fir-rigward tal-gossypol, l-EFSA kkonkludiet, fl-opinjoni tagħha tal-4 ta' Diċembru 2008, li l-livelli massimi attwali għan-nagħaġ, inklużi l-ħrief, u l-mogħoż, inklużi l-gidien, m'humiex biżżejjed għall-protezzjoni kontra effetti negattivi tas-saħħa. L-EFSA kkonkludiet ukoll li l-espożizzjoni umana għall-gossypol permezz tal-konsum ta' prodotti tal-ikel minn annimali mitmugħa prodotti derivati miż-żerriegħa tal-qoton hija probabbilment baxxa u m'għandhiex tirriżulta f'effetti ħżiena. Abbażi ta' dik l-opinjoni l-livelli massimi għan-nagħaġ, inklużi l-ħrief, u l-mogħoż, inklużi l-gidjien, għandhom jitnaqqsu.

(5)

Fir-rigward tas-saponins fil-Madhuca longifolia L., l-EFSA kkonkludiet fl-opinjoni tagħha tad-29 ta' Jannar 2009 (5) li l-ebda effetti negattivi għas-saħħa tal-annimali m'huma mistennija minħabba l-espożizzjoni negliġibbli fl-Unjoni tal-annimali fil-mira. L-EFSA tikkunsidra li l-espożizzjoni fid-dieta tal-bniedem tas-saponins fil-Madhuca hija negliġibbli, peress li l-prodotti Madhuca ma jiġux ikkonsmati mill-bnedmin u l-ismida Madhuca ma tintużax fl-Unjoni bħala materjal ta' għalf Għalhekk huwa xieraq li titħassar ir-ringiela li tikkonċerna il-Mowrah, Bassia, Madhuca.

(6)

Id-Direttiva 2002/32/KE għandha għalhekk tiġi emendata kif meħtieġ.

(7)

Il-miżuri stipulati f’din id-Direttiva huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponihom,