Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 62020TN0364

Kawża T-364/20: Rikors ippreżentat fit-2 ta’ Ġunju 2020 – Id-Danimarka vs Il-Kummissjoni

OJ C 287, 31.8.2020, p. 33–34 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

31.8.2020   

MT

Il-Ġurnal Uffiċjali tal-Unjoni Ewropea

C 287/33

Rikors ippreżentat fit-2 ta’ Ġunju 2020 – Id-Danimarka vs Il-Kummissjoni

(Kawża T-364/20)

(2020/C 287/53)

Lingwa tal-kawża: id-Daniż

Partijiet

Rikorrent: Ir-Renju tad-Danimarka (rappreżentanti: J. Nymann-Lindegren u M. Wolff, bħala aġenti, assistiti minn R. Holdgaard u J. Pinborg, avukati)

Konvenuta: Il-Kummissjoni Ewropea

Talbiet

Ir-rikorrent jitlob li l-Qorti Ġenerali jogħġobha:

—

tannulla l-Artikolu 2 tad-deċiżjoni tal-Kummissjoni Ewropea tal-20 ta’ Marzu 2020 dwar l-għajnuna mill-Istat S.A.39078 – 2019/C (ex 2014/N) implimentata mid-Danimarka favur Femern A/S sa fejn dan jistabbilixxi li “l-miżuri li jikkonsistu f’injezzjonijiet ta’ kapital u f’kombinazzjoni ta’ self mill-Istat u ta’ garanziji mill-Istat favur Femern A/S, parzjalment implimentati b’mod irregolari mid-Danimarka, jikkostitwixxu għajnuna mill-Istat fis-sens tal-Artikolu 107(1) tat-Trattat dwar il-Funzjonament tal-Unjoni Ewropea” [traduzzjoni mhux uffiċjali];

—

tikkundanna lill-Kummissjoni għall-ispejjeż.

Motivi u argumenti prinċipali

Insostenn tar-rikors tiegħu, ir-rikorrent jinvoka żewġ motivi.

1.

L-ewwel motiv ibbażat fuq li l-Kummissjoni b’mod żbaljat ikkonstatat li l-finanzjament ta’ Femern A/S jikkostitwixxi għajnuna mill-Istat fis-sens tal-Artikolu 107(1) TFUE.

L-ewwel motiv huwa maqsum f’erba’ partijiet.

Fl-ewwel lok, ir-rikorrent isostni li d-deċiżjoni kkontestata hija vvizzjata bi żball ta’ liġi sa fejn fil-premessi 190 sa 194 tagħha l-Kummissjoni tikkonstata li l-attivitajiet ta’ Femern A/S ma jaqgħux taħt l-eżerċizzju tal-awtorità pubblika. F’dan ir-rigward, ir-rikorrent isostni:

—

li l-metodu adottat mill-Kummissjoni fil-premessi 190 sa 194 sabiex jiġi ddeterminat jekk l-attivitajiet ta’ Femern A/S jaqgħux taħt l-eżerċizzju tal-awtorità pubblika, imur kontra l-Artikolu 107(1) TFUE;

—

li fl-evalwazzjoni tagħha dwar jekk l-attivitajiet ta’ Femern A/S jaqgħux taħt l-eżerċizzju tal-awtorità pubblika, liema evalwazzjoni ma taqax fil-portata tar-regoli tal-Unjoni Ewropea dwar l-għajnuna mill-Istat u dwar il-kompetizzjoni, il-Kummissjoni wettqet żball ta’ liġi meta tat importanza lill-kwistjoni tal-eżistenza ta’ operaturi privati li l-attivitajiet tagħhom jistgħu jitqiesu bħala alternattivi għal dawk ta’ Femern A/S u li jqisu lilhom infushom li jikkompetu ma’ din tal-aħħar;

—

li billi kkonstatat b’mod konkret li l-attivitajiet ta’ Femern A/S jikkonċernaw l-ippjanar, il-kostruzzjoni u l-operat tal-konnessjoni li tgħaqqad iż-żewġ kosti ma jaqgħux taħt l-eżerċizzju tal-awtorità pubblika, il-Kummissjoni wettqet żball ta’ liġi.

Fit-tieni lok, ir-rikorrent isostni li d-deċiżjoni kkontestata hija vvizzjata bi żball ta’ liġi sa fejn fil-premessa 193 tagħha l-Kummissjoni tikkonstata li Femern A/S toffri servizzi ta’ trasport f’suq f’kompetizzjoni ma’ terzi.

Fit-tielet lok, ir-rikorrent isostni li d-deċiżjoni kkontestata hija vvizzjata bi żball ta’ liġi sa fejn fil-premessi 192 sa 194 u 196 tagħha l-Kummissjoni tikkonstata li Femern A/S hija “operatur ekonomiku” suġġett għal “loġika ekonomika” li “topera b’mod kummerċjali” il-konnessjoni fissa.

Fir-raba’ lok, ir-rikorrent jallega li d-deċiżjoni kkontestata hija vvizzjata bi żball ta’ liġi sa fejn fil-premessi 233 sa 240 tagħha l-Kummissjoni tikkonstata li l-finanzjament ta’ Femern A/S jista’ jwettaq distorsjoni tal-kompetizzjoni u jaffettwa l-kummerċ bejn l-Istati Membri.

2.

It-tieni motiv ibbażat fuq l-iżball ta’ liġi tal-Kummissjoni sa fejn hija tikkonstata li Femern A/S teżerċita attività ekonomika f’kompetizzjoni ma’ terzi qabel il-bidu tal-operat tal-konnessjoni fissa.

Insostenn ta’ dan il-motiv, ir-rikorrent isostni li d-deċiżjoni kkontestata hija vvizzjata bi żball ta’ liġi sa fejn fil-premessa 198 tagħha l-Kummissjoni tikkonstata li l-finanzjament ta’ Femern A/S kien jikkostitwixxi għajnuna mill-Istat li taqa’ taħt l-Artikolu 107(1) TFUE saħansitra mal-bidu tax-xogħol ta’ kostruzzjoni.
Top