Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52013XX1207(04)

Sommarju Eżekuttiv tal-Opinjoni tal-Kontrollur Ewropew għall-Protezzjoni tad-Dejta dwar il-Komunikazzjoni mill-Kummissjoni dwar “The Digital Agenda for Europe — Driving European growth digitally” ( “L-Aġenda Diġitali għall-Ewropa – Inmexxu t-tkabbir Ewropew b'mod diġitali” )

OJ C 358, 7.12.2013, p. 17–18 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
OJ C 358, 7.12.2013, p. 13–13 (HR)

7.12.2013   

MT

Il-Ġurnal Uffiċjali tal-Unjoni Ewropea

C 358/17

Sommarju Eżekuttiv tal-Opinjoni tal-Kontrollur Ewropew għall-Protezzjoni tad-Dejta dwar il-Komunikazzjoni mill-Kummissjoni dwar “The Digital Agenda for Europe — Driving European growth digitally” (“L-Aġenda Diġitali għall-Ewropa – Inmexxu t-tkabbir Ewropew b'mod diġitali”)

(It-test sħiħ ta' din l-Opinjoni jista' jinstab bl-EN, FR u DE fuq il-websajt tal-KEPD http://www.edps.europa.eu)

2013/C 358/10

I.   L-introduzzjoni

1.1.   Il-konsultazzjoni tal-KEPD

1.

Fit-18 ta' Diċembru 2012, il-Kummissjoni adottat Komunikazzjoni dwar “The Digital Agenda for Europe — Driving European growth digitally” (“L-Aġenda Diġitali għall-Ewropa – Inmexxu t-tkabbir Ewropew b'mod diġitali”, li minn hawn 'il quddiem ser tissejjaħ “il-Komunikazzjoni”) (1).

2.

Qabel l-adozzjoni tal-Komunikazzjoni, il-KEPD ingħata l-possibilità li jipprovdi kummenti informali lill-Kummissjoni. Laqa' l-fatt li wħud mill-kummenti tiegħu ttieħdu f'kunsiderazzjoni f'din il-Komunikazzjoni.

3.

Fid-dawl tal-importanza tas-suġġett, il-KEPD iddeċieda li jadotta din l-Opinjoni fuq inizjattiva tiegħu stess.

1.2.   L-għanijiet u l-kamp ta' applikazzjoni tal-Komunikazzjoni u l-għan tal-Opinjoni tal-KEPD

4.

Il-Komunikazzjoni hija proposta mill-Kummissjoni bħala parti mill-Istrateġija Ewropa 2020. Timxi id f'id mal-Aġenda Diġitali adottata fid-19 ta' Mejju 2010 (2). L-għan ta' din il-Komunikazzjoni l-ġdida dwar l-Aġenda Diġitali huwa li tkompli ssaħħaħ it-tmexxija diġitali Ewropea u sabiex tgħin jitlesta s-Suq Diġitali Uniku sal-2015.

5.

Il-Komunikazzjoni tidentifika seba' oqsma politiċi ewlenin fejn il-Kummissjoni ser tkun qed tagħmel sforzi partikolari biex tippermetti u tistimola l-iżvilupp tal-ekonomija diġitali:

—

Ekonomija Ewropea bla fruntieri – is-Suq Uniku Diġitali

—

Tħaffif tal-innovazzjoni fis-settur pubbliku

—

Provvista u domanda għal internet ferm veloċi

—

Cloud computing

—

Fiduċja u sigurtà

—

Intraprenditorija u impjiegi u ħiliet diġitali

—

Lil hinn mir-RŻI (3): Aġenda industrijali għal teknoloġiji abilitanti essenzjali

6.

Il-KEPD jilqa' l-azzjonijiet politiċi proposti bil-għan li jistimolaw l-użu ta' teknoloġiji ġodda min-negozji u individwi. Madankollu, il-KEPD jisħaq li dawn il-miżuri jridu jsiru flimkien ma' attivitajiet xierqa biex jiġi żgurat ir-rispett tal-protezzjoni tad-dejta u l-privatezza.

7.

Uħud mill-isfidi ewlenin għall-protezzjoni tad-dejta mqajma fil-kuntest tal-azzjonijiet politiċi tal-UE fil-qasam tal-Aġenda Diġitali diġà ġew enfasizzati u analizzati mill-KEPD fl-Opinjoni tiegħu tat-18 ta' Marzu 2010 fir-rigward tal-Komunikazzjoni tal-2010 dwar l-Aġenda Diġitali (4). B'mod partikolari, il-KEPD saħaq fuq il-bżonn li tiġi inkorporata privatezza fid-disinn u privatezza prestabbilita fit-tfassil tal-ICT il-ġodda. Għalhekk, f'din l-Opinjoni l-KEPD ser jiffoka fuq l-għoti ta' kummenti dwar l-oqsma li jeħtieġu azzjoni ulterjuri identifikati fil-Komunikazzjoni.

III.   Il-konklużjonijiet

26.

Il-KEPD jilqa' l-fatt li ngħatat xi attenzjoni lejn il-privatezza u l-protezzjoni tad-dejta fil-Komunikazzjoni. Madankollu, il-KEPD jisħaq li r-rekwiżiti dwar il-protezzjoni tad-dejta għandhom jingħataw kunsiderazzjoni xierqa mill-industrija, l-Istati Membri u l-Kummissjoni meta jimplimentaw inizjattivi previsti fl-Aġenda Diġitali. B'mod partikolari:

—

jiddispjaċih li l-Komunikazzjoni ma xeħtitx enfasi importanti fl-introduzzjoni tagħha fuq l-importanza tar-rispett tal-privatezza u l-protezzjoni tad-dejta fl-iskjerament tal-azzjonijiet previsti fiha. Għaldaqstant jiġbed l-attenzjoni tal-kontrolluri tad-dejta fuq il-ħtieġa li jiġu rispettati r-regoli dwar il-privatezza u l-protezzjoni tad-dejta fid-disinn u fl-iskjerament ta' ICT ġodda għall-ambjent diġitali;

—

jiddispjaċih li l-Komunikazzjoni ma rreferietx għall-qafas legali attwali dwar il-protezzjoni tad-dejta stabbilit fid-Direttiva 95/46/KE u d-Direttiva 2002/58/KE, u għall-proposta għal Regolament ġenerali dwar il-Protezzjoni tad-Dejta, li fih ir-regoli u l-prinċipji relevanti li għandhom jittieħdu f'kunsiderazzjoni għall-iskjerament ta' ICT fl-ambjent diġitali;

—

jiddispjaċih li l-prinċipju ta' “privatezza fid-disinn”, li jsir obbligu legali skont l-Artikolu 23 tar-Regolament propost dwar il-Protezzjoni tad-Dejta, ma ġiex enfasizzat fil-Komunikazzjoni. Għalhekk ifakkar lill-kontrolluri u lid-disinjaturi tal-ICT dwar il-ħtieġa li jinkorporaw il-privatezza fid-disinn fl-iżvilupp ta' ICT ġodda għall-ambjent diġitali;

—

jirrakkomanda sabiex l-istrumenti tar-R&Ż jintużaw bil-għan li tiżdied il-kapaċità tal-Ewropa fl-applikazzjoni tal-prinċipju ta' privatezza fid-disinn fid-dixxiplini relevanti kollha u li l-programmi ta' ħidma u s-sejħiet għall-proposti jieħdu dan l-għan f'kunsiderazzjoni;

—

jisħaq li l-interoperabilità ta' databases nazzjonali għandha tiġi pprattikata biss billi jiġu rrispettati bis-sħiħ il-prinċipji dwar il-protezzjoni tad-dejta, b'mod partikolari l-limitazzjoni tal-iskop. Barra minn hekk ifakkar lill-Kummissjoni li għandu jkun hemm bażi legali xierqa għall-użu tal-interoperabilità bħala mezz biex jitħaffef il-qsim tad-dejta, flimkien ma' salvagwardji xierqa ta' protezzjoni tad-dejta;

—

jirrakkomanda li l-KEPD jiġi kkonsultat qabel l-adozzjoni mill-Kummissjoni ta' Rakkomandazzjoni dwar is-salvagwardja tal-internet miftuħ għall-konsumaturi;

—

ifakkar lill-kontrolluri u l-utenti li, filwaqt li l-cloud computing jippreżenta sfidi speċifiċi f'termini ta' protezzjoni tad-dejta, ġiet ipprovduta gwida estensiva minn awtoritajiet għall-protezzjoni tad-dejta dwar l-applikazzjoni tal-liġi attwali dwar il-protezzjoni tad-dejta u mill-KEPD dwar l-impatt tar-Regolament propost dwar il-Protezzjoni tad-Dejta fuq dawk l-isfidi. Din il-gwida għandha tiġi kkonsultata sabiex titrawwem fiduċja fost l-individwi u l-klijenti, li min-naħa tagħha ser tiżgura l-iskjerament b'suċċess ta' mezzi teknoloġiċi ġodda.

Magħmul fi Brussell, l-10 ta’ April 2013.

Peter HUSTINX

Il-Kontrollur Ewropew għall-Protezzjoni tad-Data

(1)  COM(2012) 784 final.

(2)  COM(2010) 245 final.

(3)  Jiġifieri “Riċerka, Żvilupp u Innovazzjoni”.

(4)  Ara l-Opinjoni tal-KEPD dwar il- “Promozzjoni tal-Fiduċja fis-Soċjetà tal-Informazzjoni bit-Trawwim tal-Protezzjoni u tal-Privatezza tad-Dejta”, 18 ta' Marzu 2010, disponibbli fuq il-websajt tal-KEPD fuq http://www.edps.europa.eu

Top