EUR-Lex Access to European Union law
This document is an excerpt from the EUR-Lex website
Document 62013TN0194
Case T-194/13: Action brought on 5 April 2013 — United Parcel Service v Commission
Kawża T-194/13: Rikors ippreżentat fil- 5 ta’ April 2013 — United Parcel Service vs Il-Kummissjoni
Kawża T-194/13: Rikors ippreżentat fil- 5 ta’ April 2013 — United Parcel Service vs Il-Kummissjoni
OJ C 147, 25.5.2013, p. 30–30
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
25.5.2013 |
MT |
Il-Ġurnal Uffiċjali tal-Unjoni Ewropea |
C 147/30 |
Rikors ippreżentat fil-5 ta’ April 2013 — United Parcel Service vs Il-Kummissjoni
(Kawża T-194/13)
2013/C 147/54
Lingwa tal-kawża: l-Ingliż
Partijiet
Rikorrenti: United Parcel Service, Inc. (Atlanta, l-Istati Uniti) (rappreżentanti: A. Ryan, B. Graham, Solicitors, W. Knibbeler u P. Stamou, avukati)
Konvenuta: Il-Kummissjoni Ewropea
Talbiet
— |
tannulla, fit-totalità tagħha, id-Deċiżjoni tal-Kummissjoni Ewropea C(2013) 431, tat-30 ta’ Jannar 2013, li tipprojbixxi l-akkwist ta’ TNT Express N.V. propost minn UPS (Każ COMP/M.6570 — UPS/TNT Express), sa fejn tipprojbixxi l-konċentrazzjoni; u |
— |
tikkundanna lill-konvenuta għall-ispejjeż ta’ dawn il-proċeduri, inklużi dawk ta’ kull eventwali intervenjent. |
Motivi u argumenti prinċipali
Insostenn tar-rikors tagħha, ir-rikorrenti tinvoka l-motivi li ġejjin.
(1) |
L-ewwel motiv, ibbażat fuq l-allegazzjoni li l-Kummissjoni wettqet żball ta’ liġi u żball manifest ta’ evalwazzjoni meta eżaminat l-effetti probabbli tal-konċentrazzjoni fuq il-prezz. Barra minn hekk, il-Kummissjoni kisret l-obbligu tagħha li tagħti raġunijiet u kisret id-drittijiet ta’ difiża ta’ UPS billi biddlet b’mod sostanzjali l-mudell ekonometriku ppreżentat minn UPS mingħajr ma semgħet lil UPS u mingħajr ma spjegat b’mod adegwat it-tibdiliet magħmula. |
(2) |
It-tieni motiv, ibbażat fuq l-allegazzjoni li, bil-fatt li stabbiliet standard arbitrarju sabiex jiġu vverifikati l-effiċjenzi, il-Kummissjoni wettqet żball ta’ liġi u tbiegħdet mill-istandard stabbilit mill-ġurisprudenza. Barra minn hekk, il-Kummissjoni wettqet żball ta’ liġi u żball manifest ta’ evalwazzjoni meta tat piż insuffiċjenti jew ma tat ebda piż lill-effiċjenzi li hija aċċettat fil-prinċipju. Fl-aħħar nett, il-Kummissjoni kisret id-drittijiet ta’ difiża ta’ UPS billi bbażat ir-rifjut tagħha tal-effiċjenzi fuq oġġezzjonijiet li UPS ma kinitx ġiet ikkonfrontata bihom qabel. |
(3) |
It-tielet motiv, ibbażat fuq l-allegazzjoni li l-Kummissjoni wettqet żball ta’ liġi u żball manifest ta’ evalwazzjoni meta applikat ħażin il-kunċett ta’ qrubija tal-kompetizzjoni. Hija żbaljat ukoll meta kkonkludiet, mingħajr ma kellha provi sostantivi, li ż-żidiet potenzjali fil-prezzijiet tal-entità li tirriżulta mill-konċentrazzjoni kienu se jiġu akkomodati mill-kompetitur tal-entità li tirriżulta mill-konċentrazzjoni. |
(4) |
Ir-raba’ motiv, ibbażat fuq l-allegazzjoni li l-Kummissjoni kisret id-drittijiet tad-difiża ta’ UPS billi ċaħħditha mill-aċċess għal provi rilevanti u li kienu jiskaġunawha. Barra minn hekk, il-Kummissjoni naqset milli tagħti raġunijiet, wettqet żball ta’ liġi u ta’ fatt u wettqet żball manifest ta’ evalwazzjoni meta kkonkludiet li kompetituri li ma humiex kompetituri mill-qrib ma setgħux jespandu sabiex irażżnu effettivament l-entità li tirriżulta mill-konċentrazzjoni fil-futur qrib. |
(5) |
Il-ħames motiv, ibbażat fuq l-allegazzjoni li l-Kummissjoni wettqet żball ta’ liġi u żball manifest ta’ evalwazzjoni meta analizzat il-kapaċità tal-konsumaturi li jirrestrinġu l-entità li tirriżulta mill-konċentrazzjoni. |