13.9.2012   

MT

Il-Ġurnal Uffiċjali tal-Unjoni Ewropea

C 277/96

—

jilqa’ b’sodisfazzjon l-idea ta’ regolament distint dwar il-kooperazzjoni territorjali Ewropea (KTE), peress li jipprovdi kontribut importanti għall-għan tal-koeżjoni territorjali, kif ukoll iż-żieda fl-allokazzjoni baġitarja tiegħu; barra minn hekk il-KtR iħeġġeġ li l-fondi tal-UE jiġu allokati mill-programmi ta’ kooperazzjoni u mhux mill-Istati Membri;

—

josserva li, minħabba n-natura multilaterali tagħha, il-KTE ma tistax tiġi ġestita bl-użu tal-ftehimiet ta’ sħubija. Għalhekk għandha tiġi espliċitament eskluża mill-ambitu ta’ dak l-istrument;

—

jiddispjaċih li r-Regolament il-ġdid mhuwiex adattat għall-proġetti ż-żgħar u jitlob li l-Kummissjoni Ewropea tippermetti li jiġu eżentati l-programmi u l-operazzjonijiet transkonfinali żgħar, b’mod partikolari dawk li jiġu allokati inqas minn EUR 35 000;

—

jaħseb li l-konċentrazzjoni tematika m’għandhiex tiġi applikata awtomatikament għall-KTE, peress li jibża’ jekk il-KTE tkun strettament orjentata lejn il-prijoritajiet fundamentali tal-Istrateġija UE 2020, ma tkunx tista’ taqdi r-rwol distint u uniku tagħha; għalhekk jirrakkomanda li n-numru ta’ objettivi tematiċi jiżdiedu minn 4 għal 5 u li tiġi estiża l-lista ta’ prijoritajiet ta’ investiment; għalhekk jitlob li l-objettivi tematiċi jiġu estiżi għal suġġetti oħra, bħat-turiżmu, it-traport marittimu li jirrispetta l-ambjent, il-kultura jew l-impatt fuq it-tibdil demografiku;

—

jemmen li l-KtR għandu jkollu rwol attiv fil-promozzjoni tal-KTE u fl-identifikazzjoni u t-tneħħija ta’ ostakli fl-implimentazzjoni tagħha;

—

jitlob li r-rata ta’ kofinanzjament tiġi ffissata għal 85 % għar-reġjuni l-inqas żviluppati, kif qiegħda stabbilita fir-Regolament Ġenerali Nru 1083/2006;

—

jaqbel li r-reġjuni l-aktar imbiegħda jiġu eżentati f’rabta mar-rati ta’ kofinanzjament u l-finanzjament u jitlob li jiġu stabbiliti kundizzjonijiet speċjali għaż-żoni li sat-30 ta’ April 2004 jew sal-31 ta’ Diċembru 2006 kienu l-fruntieri esterni tal-Unjoni;

—

jitlob li jissaħħu l-mekkaniżmi ta’ koordinazzjoni bejn il-Fondi kollha u l-programmi ta’ kooperazzjoni territorjali; jenfasizza wkoll il-bżonn li jkun hemm koordinazzjoni aħjar bejn il-KTE u l-programmi esterni ta’ finanzjament tal-UE u jiċċara r-regoli dwar il-parteċipazzjoni ta’ pajjiżi terzi fil-programmi tal-KTE.;

—

jenfasizza r-rwol kruċjali tar-REKT sabiex tissaħħaħ il-kooperazzjoni territorjali u jħeġġeġ lill-Istati Membri jneħħu l-ostakli li qegħdin jiskoraġġixxu t-twaqqif jew it-tħaddim tar-REKT.

Relatur

is-Sur OSVALD (CZ/PSE), Kunsillier tal-Belt ta’ Plzeň

Dokument ta’ referenza

Proposta għal Regolament tal-Parlament Ewropew u tal-Kunsill dwar dispożizzjonijiet speċifiċi għall-appoġġ mill-Fond Ewropew għall-Iżvilupp Reġjonali għall-għan tal-kooperazzjoni territorjali Ewropea

COM(2011) 611 final – 2011/0273 (COD)

1.

jilqa’ b’sodisfazzjon l-idea ta’ regolament distint dwar il-kooperazzjoni territorjali Ewropea (KTE) li jippermetti li jitqiesu l-għan, l-aspetti partikolari u l-istatut tal-kooperazzjoni territorjali bħala t-tieni għan tal-politika ta’ koeżjoni; dan ir-regolament separat jenfasizza l-kontribut tal-KTE għall-promozzjoni tal-għan il-ġdid tat-Trattat tal-koeżjoni territorjali u għall-ksib tal-għanijiet tal-politika ta’ koeżjoni b’mod ġenerali. Dan isaħħaħ ukoll l-importanza tal-KTE b’rabta mal-enfasi tiegħu fuq il-kooperazzjoni transkonfinali, transnazzjonali u interreġjonali;

2.

jaqbel mal-idea li r-rwol tal-kooperazzjoni territorjali Ewropea hija dejjem aktar importanti minħabba li l-problemi li jiffaċċjaw l-Istati Membri u r-reġjuni tagħhom imorru lil hinn dejjem aktar il-fruntieri nazzjonali u l-limiti reġjonali u jeħtieġu miżuri konġunti ta’ kooperazzjoni fil-livell territorjali adegwat u li għalhekk, il-KTE tista’ tagħti kontribut importanti għat-tisħiħ tal-objettiv il-ġdid tat-Trattat, jiġifieri l-koeżjoni territorjali;

3.

jappoġġja, fil-prinċipju, il-proposti tal-Kummissjoni sabiex tiġi allinjata l-kooperazzjoni territorjali mal-Istrateġija Ewropa 2020, filwaqt li jindika li għandu jkun hemm biżżejjed flessibbiltà biex jiġu indirizzati l-bżonnijiet lokali; għaldaqstant jilqa’ b’sodisfazzjon iż-żamma tat-tliet elementi (kooperazzjoni transkonfinali, transnazzjonali u interreġjonali) tal-KTE fir-reġjuni kollha tal-Ewropa. Il-kooperazzjoni fi proġetti u strutturi lil hinn mill-fruntieri diġà qed tikkontribwixxi għall-integrazzjoni Ewropea. Il-KtR jilqa’ wkoll il-parteċipazzjoni msaħħa ta’ pajjiżi terzi;

4.

jemmen li l-kooperazzjoni transkonfinali għandha wkoll tkompli taqdi rwol essenzjali fil-kuntest tal-kooperazzjoni territorjali Ewropea u għalhekk japprova fil-prinċipju l-proposta għat-tqassim tar-riżorsi bejn it-tipi differenti tal-KTE;

5.

jindika li speċjalment fir-rigward tal-programmi ż-żgħar ta’ kooperazzjoni transkonfinali, ir-Regolament huwa wisq tqil, kumpless u ddettaljat u b’hekk hemm ir-riskju li jostakola l-implimentazzjoni ta’ operazzjonijiet żgħar iżda ta’ spiss effettivi; għalhekk, jitlob lill-Kummissjoni Ewropea tqis jekk huwiex indispensabbli li d-dispożizzjonijiet kollha ta’ dan ir-Regolament ikunu applikabbli wkoll għal dawn il-programmi. Sabiex jinkiseb il-massimu tal-effikaċja, mhuwiex possibbli li jiġu imposti l-istess rekwiżiti kemm fuq il-programmi u l-operazzjonijiet iż-żgħar kif ukoll fuq il-programmi u l-operazzjonijiet il-kbar;

6.

huwa favur il-metodu użat attwalment sabiex jiġu definiti r-reġjuni għall-finijiet tal-kooperazzjonijiet transkonfinali u jissuġġerixxi li jitwessa’ l-qasam ta’ eliġibbiltà għall-kooperazzjoni transkonfinali (taqsima A) bil-għan li r-rabtiet funzjonali transkonfinali jkunu jistgħu jitqiesu sabiex jiġu inklużi fl-ambitu tal-programm. F’dan ir-rigward, id-deċiżjoni li fil-programm jiġu assoċjati reġjuni funzjonali korrespondenti li huma partikolarment importanti għall-ksib tal-għanijiet m’għandhiex tittieħed qabel il-proċess ta’ approvazzjoni tal-programm. Il-Kumitat japprova wkoll l-akbar opportunitajiet offruti sabiex jitwettqu proġetti multilaterali fiż-żoni fejn mhux ser jiġu implimentati programmi multilaterali ta’ kooperazzjoni;

7.

jenfasizza r-rwol essenzjali tal-KTE għall-iżvilupp tal-kooperazzjoni transnazzjonali, b’mod partikolari sabiex jitħeġġeġ l-iżvilupp territorjali integrat fil-livell ta’ żona koerenti, u għall-appoġġ tal-proġetti għall-iżvilupp tal-istrateġiji makroreġjonali; jilqa’ l-fatt li ż-żoni ta’ kooperazzjoni transnazzjonali (taqsima B) stabbiliti fil-prinċipju ser jinżammu u li l-istrateġiji makroreġjonali tal-UE mhux ser iwasslu għall-ħolqien ta’ żoni ta’ kooperazzjoni ġodda jew għall-esklużjoni ta’ żoni mill-kooperazzjoni transnazzjonali. B’mod ġenerali, il-Kumitat jilqa’ b’sodisfazzjon ukoll il-fatt li l-iżvilupp u l-implimentazzjoni ta’ strateġiji makroreġjonali huma appoġġjati fil-qafas tal-kooperazzjoni transnazzjonali;

8.

jiġbed l-attenzjoni għall-potenzjal tal-kooperazzjoni interreġjonali, b’mod partikolari l-effet ta’ lieva tiegħu fl-użu tal-fondi strutturali; iqis li l-appoġġ għall-kooperazzjoni interreġjonali (taqsima C) huwa mezz eċċellenti biex jiġu appoġġjati l-iskambju tal-esperjenzi u l-kooperazzjoni bejn l-awtoritajiet lokali u reġjonali fil-qasam tal-politika ta’ koeżjoni u jitlob li r-riżultati ta’ dawn l-iskambji jintużaw aktar minn qatt qabel għall-benefiċċju tal-istrateġiji ta’ żvilupp lokali u reġjonali (kapitalizzazzjoni);

9.

madankollu josserva li l-kooperazzjoni territorjali Ewropea għandha qabel kollox:

hekk kif huwa indikat fil-memorandum ta’ spjegazzjoni ta’ din il-proposta għal Regolament;

10.

għaldaqstant il-Kumitat tar-Reġjuni huwa tal-fehma li l-kooperazzjoni territorjali Ewropea għalhekk għandha tikkontribwixxi għall-ħolqien, fil-livell Ewropew, ta’ sens ta’ appartenenza u ta’ dipendenza reċiproka, għat-tneħħija tal-preġudizzji u għall-iżvilupp tar-reġjuni kkonċernati. Għal din ir-raġuni, il-Kumitat tar-Reġjuni jemmen li mhuwiex possibbli li l-konċentrazzjoni tematika tiġi applikata b’mod awtomatiku għall-kooperazzjoni territorjali Ewropea u li huwa neċessarju li jitqiesu l-livell u l-potenzjal tar-reġjuni differenti, mingħajr ma tiġi sfurzata l-applikazzjoni tal-prinċipju one size fits all, jiġifieri l-istess prijoritajiet għal kulħadd, iżda għall-kuntrarju jiġi adottat approċċ ibbażat fuq it-territorju. Il-Kumitat tar-Reġjuni jibża’ li hekk kif il-kooperazzjoni territorjali Ewropea, u speċjalment il-kooperazzjoni transkonfinali, tkun strettament orjentata lejn il-prijoritajiet fundamentali tal-Istrateġija UE 2020 u lejn l-objettivi tematiċi, din il-kooperazzjoni ma tkunx tista’ taqdi r-rwol distint u uniku tagħha u ssir sempliċiment varjant tal-politika ta’ koeżjoni prinċipali, iżda b’forma oħra għat-tqassim tas-sussidji;

11.

jitlob li t-tibdil demografiku u l-effetti tiegħu fuq is-servizzi ta’ interess ġenerali kif ukoll fuq l-iżvilupp reġjonali sostenibbli ikunu temi separati koperti mill-KTE. Għandha tingħata prijorità lill-forom ġodda ta’ sħubija bejn il-bliet u ż-żoni rurali, bħala bażi għall-koeżjoni territorjali fil-livell reġjonali (fid-dawl tal-Aġenda Territorjali 2020). Barra minn hekk, temi importanti bħat-turiżmu, it-traport marittimu li jirrispetta l-ambjent u l-kultura huma nieqsa;

12.

jemmen li fir-rigward tal-kooperazzjoni transkonfinali, huwa essenzjali li jiġi definit il-potenzjal ta’ żvilupp ta’ kull żona transkonfinali, waqt li jitqies il-livell attwali tar-reġjuni inkwistjoni. Il-kooperazzjoni territorjali Ewropea, u b’mod partikolari l-kooperazzjoni transkonfinali, m’għandhiex tkun orjentata prinċipalment lejn il-ksib tal-Istrateġija UE 2020, iżda qabel kollox għandha toħloq il-kundizzjonijiet għall-aktar implimentazzjoni wiesgħa possibbli, u għalhekk pan-Ewropea. Għal din ir-raġuni, speċjalment il-programmi ta’ kooperazzjoni transkonfinali għandhom ikollhom il-possibbiltà li jagħżlu diversi objettivi tematiċi u mhux ikunu llimitati mill-orjentazzjonijiet definiti għalihom minn qabel;

13.

jinnota li koeżjoni territorjali sostenibbli tista’ tinkiseb biss permezz tal-involviment u l-parteċipazzjoni b’suċċess taċ-ċittadini fir-reġjun. Għaldaqstant, jeħtieġ li l-programmi tal-kooperazzjoni territorjali Ewropea jkomplu jappoġġjaw ukoll miżuri fil-qasam tas-soċjetà ċivili u l-kultura (pereżempju proġetti ta’ skambju speċifiċi). F’dan ir-rigward, il-programmi eżistenti diġà jinkludu inizjattivi ta’ suċċess kbir. Għaldaqstant, il-Kumitat jappella sabiex jiġu integrati l-għanijiet tematiċi rilevanti;

14.

jilqa’ bi pjaċir il-proposta tal-Kummissjoni sabiex tiġi żgurata l-kontinwità fl-aspett tal-kooperazzjoni transnazzjonali. Madankollu jikkritika l-fatt li l-prijoritajiet ta’ investiment addizzjonali fil-qasam tal-kooperazzjoni transnazzjonali huma limitati għall-implimentazzjoni ta’ strateġiji makroreġjonali u strateġiji tal-baċini tal-baħar. Fid-dawl tal-bosta sfidi li r-reġjuni qed jiffaċċjaw bħalissa, kif ukoll in-nuqqasijiet eżistenti, ir-reġjuni, is-sottoreġjuni u ż-żoni funzjonali l-oħra jeħtieġu wkoll prijoritajiet ta’ investiment adatti;

15.

jaqbel mal-fatt li l-kooperazzjoni interreġjonali għandu jkollha l-għan li ssaħħaħ l-effikaċja tal-politika ta’ koeżjoni billi tħeġġeġ l-iskambju tal-esperjenzi bejn ir-reġjuni u jiġi żviluppati r-riżultati ta’ dan l-iskambju fil-qafas tal-għan ta’ Investiment għat-tkabbir u l-impjiegi. Jemmen li dan l-iskambju ta’ esperjenzi għandu jkollu bażi soda u m’għandux ikun limitat għar-rwol uniku li jintuża biss bħala komplement tas-Seba’ Programm Qafas;

16.

jemmen li l-Kumitat tar-Reġjuni għandu jkollu rwol attiv fil-promozzjoni tal-kooperazzjoni territorjali Ewropea u fl-identifikazzjoni u t-tneħħija ta’ ostakli fl-implimentazzjoni tagħha sabiex jissaħħu s-sinerġiji mal-aspetti l-oħra tal-politika ta’ koeżjoni;

17.

jilqa’ b’sodisfazzjon il-proposta li jiżdied it-total tar-riżorsi previsti għall-kooperazzjoni territorjali Ewropea;

18.

jemmen li mhuwiex opportun li r-rata ta’ kofinanzjament proposta ta’ 75 % għall-programmi operazzjonali fil-kuntest tal-għan “Kooperazzjoni territorjali Ewropea”, kif inhu stabbilit fir-Regolament ġenerali, tkun inferjuri għar-rata ta’ kofinanzjament prevista għar-reġjuni l-anqas żviluppati fil-kuntest tal-għan “Investiment għat-tkabbir u l-impjiegi”. Din ir-rata ta’ kofinanzjament inferjuri għandha r-riskju li tagħmel il-programmi ta’ kooperazzjoni territorjali Ewropea inqas interessanti għal dawn ir-reġjuni anqas żviluppati. Il-Kumitat tar-Reġjuni jqis din id-differenza bħala mhux ġustifikata u jitlob li r-rata ta’ kofinanzjament tiġi stabbilita fil-livell identiku ta’ 85 % għaż-żewġ għanijiet; huwa tal-fehma wkoll li mhuwiex ġust li r-rata ta’ kofinanzjament applikata għall-allokazzjoni addizzjonali fil-kaz tal-kooperazzjoni interreġjonali fir-reġjuni l-aktar imbiegħda tkun ta’ 50 % u jitlob li din tiġi ffissata għal 85 %;

19.

jinnota li l-kofinanzjament mhux dejjem jiġi provdut mill-imsieħba tal-programm, mill-Istati Membri jew minn korpi pubbliċi oħra, iżda jista’ jiġi pprovdut anke mill-benefiċjarji. Għaldaqstant, ma jistax ikun mistenni b’mod ġenerali li l-Istati Membri parteċipanti jipprovdu r-riżorsi ta’ kofinanzjament meħtieġa għall-implimentazzjoni ta’ programm ta’ kooperazzjoni u għalhekk id-dikjarazzjoni ta’ impenn prevista fil-proposta tal-Kummissjoni għandha titħassar;

20.

jemmen li huwa neċessarju li sabiex tinżamm il-kwalità tal-kooperazzjoni, għandhom jinżammu l-kundizzjonijiet attwali applikabbli għar-rata ta’ kofinanzjament li huma stabbiliti fl-Artikolu 53(3) u (4) tar-Regolament tal-Kunsill (KE) Nru 1083/2006 (Regolament Ġenerali), fejn hemm imniżżel:

“3.   Għal programmi operattivi taħt l-objettiv Koperazzjoni Territorjali Ewropea li fih mill-inqas parteċipant wieħed jappartjeni lil Stat Membru li l-PGD medju tiegħu per capita, għall-perjodu 2001-2003 kien anqas minn 85 % tal-medja tal-UE 25 matul l-istess perjodu, il-kontribuzzjoni mill-FEŻR m’għandhiex tkun aktar minn 85 % tan-nefqa eliġibbli. Għall-programmi operattivi l-oħra kollha, il-kontribuzzjoni mill-FEŻR m’għandhiex tkun ogħla minn 75 % tan-nefqa eliġibbli kofinanzjata mill-FEŻR.

4.   Il-kontribuzzjoni mill-Fondi fil-livell ta’ assi prijoritarju m’għandhiex tkun suġġetta għal-livelli stabbiliti fil-paragrafu 3 u fl-Anness III. Madankollu, hija għandha tkun iffissata sabiex tiżgura l-konformità mal-ammont massimu ta’ kontribuzzjoni mill-Fondi u r-rata ta’ kontribuzzjoni massima għal kull Fond ffissat fil-livell tal-programm operattiv.”;

21.

ma jqisx li huwa opportun li r-rata massima ta’ kofinanzjament tiġi stabbilita għal-livell ta’ kull ass prijoritarju, kif huwa previst fir-Regolament Ġenerali. Għandu jkun possibbli li jiġi aġġustat il-livell tal-kofinanzjament fil-kuntest tal-assi prijoritarji differenti, sabiex il-benefiċjarji jingħataw l-inċentiv li jilħqu ċerti prijoritajiet strateġiċi. Jeħtieġ li kull programm jistabbilixxi rata ta’ kofinanzjament għal kull miżura skont it-tip tagħha, waqt li jitqies il-fatt li mhux il-miżuri kollha għandhom jiksbu r-rata massima ta’ appoġġ;

22.

jaqbel mal-idea li l-programmi ta’ kooperazzjoni li jinvolvu r-reġjuni l-aktar imbiegħda jirċievu mill-inqas 150 % tal-appoġġ li rċevew mill-FEŻR matul il-perjodu 2007-2013 u li barra minn hekk il-kooperazzjoni tar-reġjuni l-aktar imbiegħda tingħata EUR 50 miljun mir-riżorsi tal-kooperazzjoni interreġjonali;

23.

jitlob li jiġu stabbiliti kundizzjonijiet speċjali għaż-żoni li sat-30 ta’ April 2004 jew sal-31 ta’ Diċembru 2006 kienu l-fruntieri esterni tal-Unjoni u li f’dawk id-dati waqfu milli jkunu hekk, bħalma huwa l-każ fil-perjodu ta’ programmazzjoni attwali skont l-Artikolu 52 tar-Regolament (KE) Nru 1083/2006 (Regolment Ġenerali). Seba’ snin ta’ appoġġ ma jistgħux jitqiesu bħala perjodu twil biżżejjed sabiex jiġu solvuti l-problemi ta’ dawn iż-żoni. Il-Kumitat tar-Reġjuni jiġbed l-attenzjoni għall-fatt li ż-żieda fl-għajnuna għal dawk iż-żoni li qabel kienu l-fruntieri tal-UE ma sservix biss sabiex jogħla l-livell ekonomiku tar-reġjuni inkwistjoni, iżda tħalli impatt importanti fuq il-ħolqien ta’ identità Ewropea u ta’ interdipendenza barra milli jingħelbu l-preġudizzji;

24.

jikkritika l-fatt li r-rekwiżiti stabbiliti fl-Artikolu 7(2)(a) jikkostitwixxu piż addizzjonali konsiderevoli għall-ippjanar tal-programm fir-rigward tal-perjodu ta’ appoġġ attwali mingħajr ma jipprovdu valur miżjud magħruf;

25.

josserva li, minħabba n-natura multilaterali tagħha, il-KTE ma tistax tiġi ġestita bl-użu tal-ftehimiet ta’ sħubija. Għaldaqstant għandha titneħħa b’mod espliċitu mill-kamp ta’ applikazzjoni ta’ tali strument;

26.

jemmen li huwa importanti ħafna li titfassal direttiva dwar l-applikazzjoni fil-prattika tar-regoli dwar l-għajnuna mill-Istat għall-programmi tal-KTE u jitlob li anke operaturi privati, b’mod partikolari l-intrapriżi żgħar u ta’ daqs medju (SMEs), jiġu inklużi fost il-benefiċjarji possibbli ta’ miżuri ta’ kooperazzjoni transkonfinali u transnazzjonali, fejn hemm qbil fost l-Istati Membri konċernati mill-programm inkwistjoni;

27.

jitlob li fid-definizzjoni tal-gruppi destinatarji tal-programm tal-KTE jiġu kkunsidrati aħjar l-istrutturi amministrattivi, li jvarjaw ħafna madwar l-Ewropa, fil-livell lokali u reġjonali. L-għan huwa li tiġi kkunsidrata aħjar id-diversità tal-forom organizzattivi tal-partijiet interessati pubbliċi fir-reġjuni tal-Istati Membri. B’mod partikolari, forma organizzattiva mwaqqfa taħt il-liġi privata m’għandhiex twassal għall-esklużjoni tas-settur pubbliku;

28.

iqis li l-obbligi ta’ rappurtaġġ jistgħu jiġu estiżi kemm fir-rigward tal-kamp ta’ applikazzjoni kif ukoll tal-frekwenza tagħhom u jitlob li jinżammu għall-minimu. Għaldaqstant, il-Kumitat jopponi l-fatt li l-iskadenza għat-tressiq tar-rapport annwali jinbidel mit-30 ta’ Ġunju għat-30 ta’ April tas-sena ta’ wara. Il-bżonn li jintlaħaq ftehim bejn diversi msieħba tal-programm li jitkellmu diversi lingwi jeħtieġ aktar xogħol u għalhekk aktar ħin;

29.

jilqa’ b’sodisfazzjon il-fatt li ġew stabbiliti indikaturi komuni tat-twettiq u tar-riżultati bil-għan li l-għanijiet jinkisbu b’mod aktar effikaċi, ikun hemm aktar attenzjoni fuq l-impatt kif ukoll biex tkun tista’ titwettaq valutazzjoni trasversali tal-programmi. Però l-indikaturi proposti fl-anness tar-Regolament dwar il-KTE ftit li xejn huma adatti għar-rekwiżiti speċifiċi tal-KTE u ma jippermettux li l-kwalità tal-KTE tiġi deskritta jew imkejla b’mod suffiċjenti. Għalhekk il-Kumitat jitlob li l-lista tal-indikaturi tiġi riveduta b’mod li r-riżultati speċifiċi tal-KTE jiġu esposti b’mod adatt;

30.

fil-prinċipju jilqa’ l-fatt li r-rata tal-għajnuna teknika ġiet stabbilita għal 6 % tat-total b’ammont minimu ta’ EUR 1,5 miljun. Madankollu, il-Kumitat iqis li l-konverżjoni obbligatorja tal-iskambju tal-informazzjoni kollha għal sistemi elettroniċi ta’ skambju ta’ data abbażi tal-għajnuna teknika sal-31 ta’ Diċembru 2014 hija problematika;

31.

jirrakkomanda li jinżammu l-istrutturi ta’ amministrazzjoni ttestjati fil-perjodu ta’ programmazzjoni 2007-2013 għall-implimentazzjoni ta’ programmi operazzjonali, għall-kontinwità ġenerali tal-istrutturi kif ukoll l-allokazzjoni ċara ta’ kompiti u responsabbiltajiet lid-diversi istituzzjonijiet li jimplimentaw il-programm;

32.

jilqa’ l-possibbiltà li l-kompiti tal-awtoritajiet ta’ amministrazzjoni u tal-awtoritajiet ta’ ċertifikazzjoni (Artikolu 113 tar-Regolament dwar id-Dispożizzjonijiet Komuni) jiġu raggruppati, iżda madankollu jopponi r-raggruppament obbligatorju tagħhom fil-KTE (Artikolu 22 tar-Regolament dwar il-KTE); b’mod ċar jirrifjuta l-akkreditazzjoni prevista tal-awtoritajiet ta’ amministrazzjoni u ta’ kontroll;

33.

jilqa’ b’sodisfazzjon l-isforz li titjieb il-koordinazzjoni bejn il-programmi tal-kooperazzjoni territorjali Ewropea u l-istrumenti l-oħra tal-politika ta’ koeżjoni; f’dan ir-rigward għandha tissaħħaħ il-vijabbiltà tal-finanzjament Komunitarju fil-proġetti ta’ kooperazzjoni, permezz tat-tixrid tar-riżultati ta’ dawn il-proġetti, waqt li titfittex il-multiplikazzjoni tal-impatt tagħhom u jiġu evitati l-azzjonijiet doppji li diġà ġew ippruvati u ttestjati;

34.

jindika madankollu li sabiex jiġi implimentat mekkaniżmu li jassigura l-koordinazzjoni bejn il-fondi u strumenti oħra, jeħtieġ li jkun hemm koordinazzjoni bejn dawn il-Fondi u l-istrumenti fil-livell tal-UE u fil-livell tal-implimentazzjoni fl-Istati Membri differenti. Jeħtieġ li jiġu introdotti proċeduri identiċi u kkoordinati, kif ukoll ġestjoni, kontroll ta’ segwitu, eliġibilità ta’ spejjeż, metodi ta’ preżentazzjoni ta’ indikaturi eċċ., li jkunu identiċi. Ikun utli ħafna wkoll li tiġi assigurata koordinazzjoni bejn il-pajjiżi differenti, peress li dawn qed jipparteċipaw b’numru dejjem ikbar fil-programmi ta’ kooperazzjoni reġjonali Ewropea. Għandha tingħata attenzjoni partikolari għall-koordinazzjoni bejn l-istrumenti finanzjarji esterni. Il-Kumitat tar-Reġjuni jistieden lill-Kumissjoni Ewropea tfassal metodu għall-koordinazzjoni tal-programmi;

35.

jindika li l-Artikolu 10 tal-proposta għar-Regolament dwar il-Fondi Soċjali Ewropej (COM(2011) 607 final) jittratta l-kooperazzjoni transnazzjonali, li tkopri l-istess perjodu tar-Regolament dwar il-KTE, iżda mingħajr l-ebda rabta mar-Regolament dwar il-kooperazzjoni territorjali Ewropea. Madankollu, il-Kumitat tar-Reġjuni jqis indispensabbli preċiżament il-koordinazzjoni bejn il-kooperazzjoni territorjali Ewropea ffinanzjata mill-FEŻR u dik iffinanzjata mill-FSE, peress li jekk l-attivitajiet ta’ dawn iż-żewġ Fondi jitħalltu b’mod adegwat, ikun possibbli li jinkisbu s-sinerġiji neċessarji. Jista’ jiġi previst livell għoli ta’ effikaċja tal-attivitajiet li b’mod ġenerali jseħħu fil-kuntest tal-FSE speċjalment fil-qasam tal-kooperazzjoni transkonfinali, peress li ż-żoni transkonfinali tal-pajjiżi ġirien jippreżentaw sitwazzjoni simili mil-lat tas-suq tax-xogħol, tal-problemi soċjali, eċċ. L-attivitajiet tematiċi li jikkorrespondu għall-FSE jikkostitwixxu element importanti ħafna għall-programmi kollha tal-kooperazzjoni territorjali Ewropea, u huwa għalhekk li l-Kumitat tar-Reġjuni jitlob li l-Kummissjoni Ewropea tagħti l-attenzjoni meħtieġa lill-koordinazzjoni ta’ dawn l-attivitajiet. Sakemm ma tkunx garantita forma aktar profonda ta’ koordinazzjoni, għall-inqas jeħtieġ li l-attivitajiet tematiċi tal-KTE li jappartjenu għall-FSE jkunu jistgħu jiġu ffinanzjati mill-FEŻR;

36.

iqis adegwat ħafna li jiġi kkoordinat l-istrument il-ġdid li jorbot l-Ewropa mal-programmi tal-kooperazzjoni territorjali Ewropea, peress li dan l-istrument il-ġdid għandu jqis ir-relazzjonijiet transkonfinali u internazzjonali;

37.

iqis li huwa importanti ħafna li tiġi assigurata l-koordinazzjoni bejn il-programmi ta’ kooperazzjoni territorjali Ewropea u l-istrumenti ta’ għajnuna finanzjarja lill-pajjiżi terzi. Jeħtieġ li f’dawn il-programmi tiġi integrata direttament sistema li permezz tagħha l-istrumenti inkwistjoni jiġu kkoordinati mal-programmi differenti ta’ kooperazzjoni territorjali Ewropea, sabiex xejn ma jżomm lill-entitajiet ta’ pajjiżi terzi milli jipparteċipaw fi proġetti konġunti. Din is-sistema, fost oħrajn, għandha tassigura l-konformità mal-proċeduri, l-eliġibbiltà tal-ispejjeż, eċċ., bejn il-programmi tal-KTE fil-pajjiżi membri u l-programmi ta’ preadeżjoni u ta’ viċinat. Għandha tassigura wkoll li l-pajjiżi terzi jiggarantixxu l-aċċess, l-amministrazzjoni u l-allokazzjoni ta’ riżorsi adegwati mill-programmi ta’ preadeżjoni u ta’ viċinat għall-programmi tal-KTE;

38.

jaqbel, minn naħa, mal-bżonn li jiġu ċċarati r-regoli fis-seħħ fir-rigward tal-ġestjoni finanzjarja, il-programmazzjoni, is-segwitu, il-valutazzjoni u l-kontroll dwar il-parteċipazzjoni ta’ pajjiżi terzi fil-programmi ta’ kooperazzjoni transnazzjonali u interreġjonali, u, min-naħa l-oħra, mal-idea li dawn ir-regoli għandhom jiġu stabbiliti fil-programmi ta’ kooperazzjoni kkonċernati, jew jekk ikun hemm bżonn, fil-ftehim finanzjarju rilevanti bejn il-Kummissjoni, kull wieħed mill-pajjiżi terzi u l-Istat Membru li fih jinsab il-korp li jmexxi l-programm ta’ kooperazzjoni inkwistjoni. Madankollu, il-Kumitat tar-Reġjuni jiġbed l-attenzjoni għall-bżonn li jiġu żgurat li kwalunkwe problema jew nuqqas ta’ azzjoni minn pajjiżi terzi ma jsarrfux f’dewmien fil-programmi transnazzjonali u interreġjonali u li ma jiġix ipperikolat it-twettiq ta’ dawn il-programmi;

39.

jenfasizza r-rwol tar-REKT bħala strument essenzjali għat-tisħiħ tal-kooperazzjoni territorjali. Minhabba f’hekk itenni l-importanza li r-Regolament rivedut dwar ir-REKT, li m’għandu l-ebda implikazzjoni għall-baġit tal-Unjoni Ewropea, jiġi adottat mingħajr dewmien u mingħajr ma tiġi mistennija l-adozzjoni tal-pakkett leġislattiv sħiħ dwar il-politika ta’ koeżjoni wara l-2013. Jappella wkoll lill-Istati Membri sabiex ineħħu l-ostakli amministrattivi kollha li jew jiskoraġġixxu t-twaqqif ta’ REKT jew jiddiskriminaw kontra l-għażla tar-REKT – b’mod partikolari fir-rigward tat-tassazzjoni u r-reklutaġġ tal-persunal – meta mqabbla ma’ strumenti legali oħra;

40.

jindika li għalkemm l-Istati Membri jridu jitħeġġu jafdaw ir-rwol ta’ korpi ta’ ġestjoni lir-REKT, il-Kummissjoni Ewropea għandha tipproponi mekkaniżmi ġenerali sabiex jiġu ċċarati d-dispożizzjonijiet tal-Artikolu 25(3) tal-proposta għal Regolament, peress li din tobbliga lill-Istati Membri fejn ikun irreġistrat ir-REKT jew fejn ikun jinsab il-benefiċjarju ewlieni li jirrimborsaw l-ammont li ma kellux jitħallas lill-benefiċjarji ta’ pajjiżi oħra. Dan l-obbligu impost fuq l-Istati fejn ikun irreġistrat ir-REKT jew fejn ikun jinsab il-benefiċjarju ewlieni jista’ jillimita r-rieda ta’ dawn l-Istati li jittrasferixxu l-poteri tagħhom ta’ ġestjoni lir-REKT, peress li jistgħu jkunu responsabbli ta’ xi ħaġa li fil-prattika ma jistgħux jinfluwenzaw. Il-Kumitat tar-Reġjuni għalhekk jemmen li għandu jiġi kkonfermat li awtorità fl-Istat Membru tal-benefiċjarju ta’ ammont li ma kellux jitħallas tista’ tingħata l-kunsess minn awtorità fl-Istat Membru fejn huwa rreġistrat ir-REKT għall-irkupru tal-ammont. Inkella jistgħu jiġu applikati l-kundizzjonijiet fis-seħħ matul il-perjodu ta’ programmazzjoni attwali, fejn ir-responsabbiltà tintrefa mill-Istat Membru li fih jinsab il-benefiċjarju li għandu l-obbligu li jħallas lura l-ammonti li ma kellhomx jingħataw;

41.

jilqa’ b’sodisfazzjon l-introduzzjoni ta’ rata fissa għall-persunal, għax din hija miżura tajba ħafna, li twassal għal semplifikazzjoni konsiderevoli għall-benefiċjarju. Ir-rati fissi għall-persunal għandhom ikunu identiċi, ikun liema jkun il-pajjiż tal-operazzjoni, jekk ikunu qegħdin jagħmlu l-istess xogħol. Għandu jkun hemm ukoll metodu armonizzat għall-kontroll u l-eliġibbiltà tal-ispejjeż. Madankollu, il-Kumitat jirrifjuta li r-rata fissa tal-persunal tiġi limitata għal ammont massimu ta’ 15 % tal-ispiża kollha peress li l-kooperazzjoni territorjali fin-natura tagħha tirrikjedi ħafna riżorsi umani u limitu ta’ 15 % tal-ispejjeż tal-persunal huwa ferm inqas mill-medja attwali;

42.

minkejja li jqis importanti ħafna l-protezzjoni tal-ambjent, l-effiċjenza fl-użu tar-riżorsi, il-mitigazzjoni tat-tibdil fil-klima u l-adattament għalih, il-prevenzjoni u l-ġestjoni tar-riskji, il-promozzjoni tal-opportunitajiet indaqs, il-prevenzjoni tad-diskriminazzjoni abbażi tas-sess, l-oriġini etnika jew tar-razza, ir-reliġjon jew it-twemmin, id-diżabilità, l-età jew l-orjentazzjoni sesswali, l-appoġġ għall-opportunitajiet indaqs għall-irġiel u n-nisa, eċċ., il-Kumitat tar-Reġjuni ma jqisx li huwa adegwat li jiġi mitlub li l-applikazzjoni tagħhom tiġi ddikjarata fid-deskrizzjoni ta’ kull programm. Dawn id-dispożizzjonijiet jistgħu jikkomplikaw b’mod sinifikanti u jipparalizzaw b’mod partikolari t-twettiq ta’ programmi żgħar ta’ kooperazzjoni transkonfinali. Għal din ir-raġuni, il-Kumitat tar-Reġjuni jirrakkomanda li dawn id-dispożizzjonijiet ma jiġux applikati b’mod sistematiku iżda biss meta jkun jagħmel sens u huwa rilevanti fir-rigward tal-prijoritajiet u l-operazzjonijiet ikkonċernati; inkella jkun hemm ir-riskju li tiġi imposta ġustifikazzjoni obbligatorja li tkun assurda u illoġika għall-operazzjonijiet li m’għandhom l-ebda rabta;

43.

iqis importanti li l-benefiċjarji jikkooperaw fl-iżvilupp, fit-twettiq, fir-riżorsi umani u fil-finanzjament tal-operazzjonijiet. Madankollu, b’mod partikolari fir-rigward tal-proġetti żgħar, jiġifieri dawk li jiġu allokati inqas minn EUR 35 000 mill-FEŻR, l-obbligu li jiġu ssodisfati l-erba’ kriterji tal-kooperazzjoni jista’ jikkomplika l-iżvilupp u l-implimentazzjoni; għalhekk jemmen li mhux adegwat li dawn il-proġetti jkunu mitluba jissodisfaw din il-kondizzjoni; għal dawn il-proġetti żgħar jipproponi li, bħalma qiegħed isir issa, jiġu soġġetti għall-kundizzjoni li jiġu ssodisfati għallinqas tnejn mill-erba’ kriterji;

44.

minħabba l-enfasi li hemm fuq il-koordinazzjoni, l-effikaċja, it-tneħħija tad-disparitajiet u l-integrazzjoni, għall-perjodu l-ġdid ta’ programmazzjoni jipproponi li jitniedu inizjattivi ġodda li għandhom l-għan li jippromovu l-koordinazzjoni transkonfinali tal-istrateġiji tematiċi u l-iżvilupp (trasport, enerġija, swieq ta’ xogħol, protezzjoni tal-ambjent, xjenza u riċerka, eċċ.) u l-adozzjoni ta’ approċċi integrati. B’dan il-mod jistgħu jiġu individwati, fil-livell transkonfinali, in-nuqqasijiet, il-potenzjal għall-iżvilupp u s-soluzzjonijiet integrati. Sabiex jinstabu soluzzjonijiet għall-problemi identifikati b’mod ċar u sabiex jiġi sfruttat il-potenzjal tal-iżvilupp individwat, jeħtieġ li jipparteċipaw entitajiet kemm pubbliċi kif ukoll privati b’riżorsi finanzjarji li ġejjin minn diversi sorsi. Għall-funzjonament tajjeb ta’ dan l-istrument, jidher opportun li jiġi sfruttat il-potenzjal tar-REKT u tal-Ewroreġjuni. Din l-inizjattiva għandha tibbenefika, fil-kuntest tal-kooperazzjoni territorjali Ewropea, minn allokazzjoni finanzjara adegwata sabiex tiġi garantita l-effikaċja tagħha.