Notifika rigward talba skont l-Artikolu 30 tad-Direttiva 2004/17/KE

Talba mingħand entità kontraenti

2011/C 102/11

Fit-23 ta' Marzu 2011, il-Kummissjoni rċeviet talba skont l-Artikolu 30(5) tad-Direttiva 2004/17/KE tal-Parlament Ewropew u tal-Kunsill tal-31 ta' Marzu 2004 li tikkoordina l-proċeduri ta' akkwisti ta' entitajiet li joperaw fis-setturi tas-servizzi tal-ilma, l-enerġija, it-trasport u postali. L-ewwel jum tax-xogħol wara l-wasla tat-talba kien l-24 ta' Marzu 2011.

Din it-talba, li saret mill-assoċjazzjoni Taljana tal-industrija taż-żejt u minjieri – Assomineraria, f’isem l-entitajiet kontraenti tas-settur, hija dwar l-esplorazzjoni taż-żejt u l-gass u l-estrazzjoni taż-żejt fl-Italja. L-Artikolu 30 imsemmi hawn fuq jistipula li d-Direttiva 2004/17/KE ma tapplikax meta l-attività konċernata hi esposta direttament għal kompetizzjoni fi swieq li l-aċċess għalihom mhuwiex limitat. L-evalwazzjoni ta' dawn il-kundizzjonijiet għandha ssir esklussivament skont id-Direttiva 2004/17/KE, u hi bla ħsara għall-applikazzjoni tar-regoli tal-kompetizzjoni.

Il-Kummissjoni għandha tliet xhur żmien mill-ġurnata tax-xogħol imsemmija hawn fuq biex tieħu deċiżjoni dwar din it-talba. Għaldaqstant, id-data tal-iskadenza hija l-24 ta' Ġunju 2011.

Dan il-perjodu jista' eventwalment jiġi estiż bi tliet xhur. Din l-estensjoni għandha tiġi ppubblikata.

Skont it-tieni subparagrafu tal-Artikolu 30(6), talbiet ġodda rigward l-esplorazzjoni u l-estrazzjoni taż-żejt u l-gass fl-Italja li jitressqu qabel l-iskadenza tal-perjodu previst għat-talba preżenti, ma jagħtux lok għal proċedimenti ġodda iżda jiġu trattati fil-kuntest ta’ din it-talba.