Pubblikazzjoni ta' applikazzjoni għal reġistrazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel

2009/C 186/11

Din il-pubblikazzjoni tikkonferixxi d-dritt għal oġġezzjoni għall-applikazzjoni skont l-Artikolu 7 tar-Regolament tal-Kunsill (KE) Nru 510/2006. Id-dikjarazzjonijiet ta’ oġġezzjoni għandhom jaslu għand il-Kummissjoni fi żmien sitt xhur mid-data ta’ din il-pubblikazzjoni.

SINTEŻI

IR-REGOLAMENT TAL-KUNSILL (KE) Nru 510/2006

“PATATA DI BOLOGNA”

Nru tal-KE: IT-PDO-0005-0349-15.06.2004

DPO ( X ) IĠP ( )

Din is-sinteżi tagħti l-elementi ewlenin tal-ispeċifikazzjoni tal-prodott b’għan informattiv biss.

1.   Dipartiment responsabbli fl-istat membru:

2.   Grupp:

3.   Tip ta' prodott:

4.   Speċifikazzjoni:

(sinteżi tar-rekwiżiti skont l-Artikolu 4(2) tar-Regolament (KE) Nru 510/2006)

4.1.   Isem:

“Patata di Bologna”

4.2.   Deskrizzjoni:

4.3.   Żona ġeografika:

Il-Provinċja ta’ Bologna.

4.4.   Prova tal-oriġini:

Fir-rigward tal-kontrolli għall-prova tal-oriġini tal-produzzjoni ta’ din id-D.P.O., il-prova tal-oriġini tal-“Patata di Bologna” miż-żona ġeografika delimitata tiġi ċċertifikata minn entità ta’ kontroll speċifika abbażi tad-diversi rekwiżiti li l-produtturi għandhom jissodisfaw matul iċ-ċiklu kollu tal-produzzjoni. Ir-rekwiżiti ewlenin li jiżguraw it-traċċabbiltà tal-prodott f’kull parti tal-proċess huma dawn: ir-reġistrazzjoni tal-bdiewa u tal-proċessuri fir-reġistri rilevanti tal-Entità ta’ kontroll speċifika; dikjarazzjoni lill-entità ta’ kontroll dwar il-kwantitajiet li jiġu prodotti kull sena.

4.5.   Metodu ta’ produzzjoni:

L-ispeċifikazzjoni tal-prodott tipprevedi, b’mod partikolari, li l-ewwel azzjoni għandha tkun dik tal-preparazzjoni tal-art, li ssir billi tinħarat f’raded. Dan isir fil-ħarifa ta’ qabel iż-żrigħ biex l-aġenti atmosferiċi tax-xitwa, bħax-xita u l-ġelu, jilħqu jkissru l-aktar tub kbar u b’hekk jagħtu konsistenza idonea lill-art għaż-żrigħ tal-patata.

Għaż-żrigħ, iż-żerriegħa tal-patata li tintuża għandha tkun ċertifikata, kemm dik sħiħa kif ukoll dik maqsuma. Din iż-żerriegħa tiġi ppreparata permezz tal-preġerminazzjoni, li biha, iż-żerriegħa tal-patata tikseb il-proprjetà li meta tinżera’ tkun tista’ tiżviluppa bl-aktar mod prekoċi u reżistenti. Waqt din il-fażi, il-patata tinżamm f’ambjent mhux espost għall-ġlata u fejn id-dawl ikun imxerred, biex b’hekk tiżviluppa nebbieta ta’ ftit millimetri tul u ta’ għamla ħoxna u robusta.

Fir-rigward tat-tbiddil tal-uċuħ tar-raba’, il-patata ma tistax tinżera’ fl-istess art għal sena wara l-oħra, iżda tista’ tinżera biss wara sentejn li fihom l-art tkun intużat għall-kultivazzjoni ta’ prodotti oħra.

L-art tingħata d-demel skont il-ħtieġa tal-kultivazzjoni; id-demel għandu jipprovdi l-aktar nutrienti adegwati, bħan-nitroġenu, il-fosfru u l-potassju, sabiex tkun tista’ tinkiseb l-aqwa produzzjoni, kemm mil-lat ta’ kwantità kif ukoll ta’ kwalità. Il-produzzjoni massima hi ta’ 60 tunnellata/ettaru.

It-teknika ta’ kultivazzjoni tiġi kompleta permezz tal-għoti tad-demel u tal-protezzjoni, skont id-dispożizzjonijiet tar-regoli tal-ispeċifikazzjoni tar-Regione Emilia Romagna.

Il-patata għandha tinġabar meta tkun immaturat għal kollox, jiġifieri meta l-qoxra ma titqaxxarx bl-għerik tas-swaba’, tant li tkun tiflaħ għall-intervent ta’ makkinarju li jħaffer għall-patata u jiġborha u li wara jqiegħdha f'kontenituri idonei għat-trasport lejn l-imħażen.

Il-konservazzjoni tal-patata ssir f’kontenituri li jinżammu f’ċelel b’kesħa kontrollata, bejn 4 u 7 °C, il-bogħod mid-dawl.

Jistgħu jsirulha t-trattamenti ta’ wara l-ġbir li huma previsti mil-leġiżlazzjoni fis-seħħ.

Il-“Patata du Bologna” tiġi prodotta biss minn azjendi agrikoli li jinsabu kollha fil-provinċja ta’ Bologna, u tiġi pproċessata u ppakkjata wkoll minn impriżi f’din il-provinċja, peress li l-patata ta’ din id-DPO tippreżenta karatteristiċi ta’ kwalità għolja, kemm organolettiċi kif ukoll kummerċjali, li jistgħu jiġu ppreservati biss permezz ta’ proċessar tajjeb. Fil-fatt, l-operaturi lokali kisbu patrimonju sħiħ ta’ għarfien speċifiku dwar il-prodott, bħall-aħjar mod ta’ kif jiġi pproċessat u ttrasportat, u l-ġestjoni tiegħu immedjatament wara li jinġabar, b’mod partikolari l-konservazzjoni f’ambjent imkessaħ, bl-għan li l-prodott ma jitlifx wisq mill-umdità tiegħu; dan l-għarfien u d-diversi prattiki li jintużaw fuq l-art jikkontribwixxu għall-ħarsien tal-karatteristiċi kwalitattivi tad-DPO “Patata di Bologna”, fir-rigward tal-proċessi fiżjoloġiċi naturali tiegħu.

4.6.   Rabta:

Il-karatteristiċi tad-DPO “Patata di Bologna”, bħar-riħa, it-togħma, u l-intensità tal-kulur tal-polpa u tal-qoxra, minbarra li jiddependu mill-ġenetika, jiġu ddeterminati wkoll mill-ambjent li fih tiġi kkultivata (l-art, il-klima, it-teknika ta’ kultivazzjoni, it-tip ta’ konservazzjoni), li minnu toħroġ ir-rabta ċara bejn il-“Patata di Bologna” u l-provinċja ta’ Bologna.

Il-karatteristiċi morfoloġiċi tal-art, prevelentament tat-tip alluvjali, stratifikata u konsegwentament b’kontenut għoli ta’ ossiġenu, joħolqu kundizzjoni favorevoli ħafna għall-iżvilupp tal-prodott.

Minħabba dan l-ambjent partikolari, li huwa riżultat tal-integrazzjoni bejn l-art (pedoloġija u idrografija) u l-klima (milwiema fil-perjodu tal-ħarifa u x-xitwa, b’temperaturi moderati tar-rebbiegħa sa mill-aħħar jiem ta’ Frar, li waqt li tifforma l-patata jkunu idonei, jiġifieri madwar 25 °C), il-patata li tikber tikseb karatterististiċi fiżiċi, bħall-konsistenza, il-granulometrija tal-polpa, u karatteristiċi organolettiċi, bħar-riħa u t-togħma partikolari, li jagħtuha kwalità speċifika.

Kif deskritt fil-kitba ta’ Contri (1817), l-artijet tal-provinċja ta’ Bologna huma adatti għall-kultivazzjoni tal-patata peress li din tippreferi “ħamrija baxxa, niexfa mill-ilmijiet u depożiti ta’ ħamrija li x-xmajjar iħallu warajhom”, li huma l-karatteristiċi tal-artijiet irreklamati tal-provinċja ta’ Bologna.

It-tibdil li seħħ maż-żmien fuq l-artijiet, ħoloq witat magħmulin minn sedimenti alluvjonali li jinġarru u jiġu ddepożitati mix-xmajjar u n-nixxiegħat tal-Appennini li għadhom attivi sal-lum. Dawn is-sedimenti jiffurmaw depożitu ta’ ħamrija pjuttost fina, fond u niexef biżżejjed, b’valur ta’ pH alkalin, b’kontenut ta’ sustanzi organiċi u tal-aktar nutrienti importanti għat-tkabbir tal-patata, bħall-kontenut għoli tal-potassju u l-kontenut ta’ fosfru u ta’ nitroġenu.

Dawn il-kundizzjonijiet huma favorevoli għall-kultivazzjoni tal-patata, li tgawdi minnhom l-aktar minħabba li l-għeruq tagħha jifforma f’għanqud mingħajr truf orizzontali u b’estensjonijiet radikali ħoxnin.

Mil-lat idroloġiku, l-art tgawdi ħafna mill-preżenza ta’ xmajjar u nixxiegħat naturali – Idice, Reno, Gaiana, Fossatone, Quaderna, Rido, Sillaro, Samoggia, Savena, u anke mill-preżenza ta’ kanali artifiċjali mibnija apposta – Canale Emiliano Romagnolo – biex ifornu l-ilma għall-uċuħ fil-perjodu tar-rebbiegħa u s-sajf, meta jkun meħtieġ l-aktar.

Sa mill-aħħar jiem ta’ Frar jew tal-bidu ta’ Marzu, il-pjanura tal-provinċja ta’ Bologna tkun karatterizzata minn temperaturi moderati tar-rebbiegħa, li huma ideali għall-ġerminazzjoni taż-żerriegħa tal-patata f’dan il-perjodu. Matul l-istadju li fih il-patata tiżviluppa bl-aktar mod imgħaġġel, li jseħħ l-aktar bejn April u Ġunju, it-temperatura titla’ sa 25-28 °C, li tiffavorixxi l-formazzjoni u l-iżvilupp tal-patata b’rata ta’ maturazzjoni regolari. Il-fatt li x-xita tinżel tul is-sena kollha jiffavorixxi l-iżvilupp u t-tuberifikazzjoni fil-fażi inizjali tagħhom, u jiżgura wkoll il-formazzjoni ta’ saffi tal-ilma taħt l-art u jippermetti li l-art tkun tista’ tinħarat għaż-żrigħ tal-patata.

Il-kultivazzjoni tal-patata ilha żmien twil marbuta mat-territorju tal-provinċja ta’ Bologna minħabba l-karatteristiċi idonei tal-artijiet tagħha, id-dispożizzjonijiet kwalitattivi u organolettiċi partikolari ta’ xi varjetajiet u minħabba t-teknika ta’ kultivazzjoni li ilha tintuża ħafna mill-produtturi.

Din ir-rabta mat-terrirorju tal-provinċja ta’ Bologna ġejja mill-ħtieġa kbira li l-popolazzjoni tagħha jkollha x’tiekol, speċjalment fil-perjodi meta l-ħsad tal-qamħ ikun baxx, peress li l-qamħ minn dejjem kien meqjus bħala bażi għall-alimentazzjoni umana u minħabba l-idea li l-iżvilupp tal-kultivazzjoni tal-patata kien ta’ benefiċċju għall-istess provinċja għax b’hekk ma kienx ikollha għalfejn iġġib l-ikel minn stati oħra. Ftit, ftit, din ir-rabta kompliet tissaħħaħ minħabba x-xogħol iebes li l-produtturi wettqu biex ħolqu, pass wara pass, teknika ta’ kultivazzjoni kważi perfetta, fejn bnew għodod dejjem aktar effiċjenti u li jagħmlu inqas dannu lill-prodott, u kkonservawh bl-użu ta’ tekniki avvanzati u strutturi kummerċjali li eventwalment swew biex il-prodott jikseb valur akbar fl-aspetti kummerċjali u kwalitattivi tiegħu, dovut ukoll għall-ispeċjalizzazzjoni dedikata ta’ dan it-territorju.

Fl-ewwel snin tas-seklu dsatax, fil-provinċja ta’ Bologna nxterdet il-kultivazzjoni tal-patata, partikolarment bis-saħħa ta’ Pietro Maria Bignami, espert fl-agronomija li indtroduċa lill-bdiewa ma’ din il-kultivazzjoni. Fl-istess żmien li kienet tintuża bħala għalf għall-animali, il-patata bdiet issib postha wkoll fuq l-imwejjed tal-familji.

Lejn tmiem is-seklu tmintax u tul is-seklu dsatax kollu, diversi studjużi ddeskrivew il-vantaġġi u l-iżvantaġġi ta’ din il-kultivazzjoni, iżda kien minħabba l-kitba ta’ Contri, li fl-1817 bagħat ċirkolari lill-Kardinal Opizzoni, Legat tal-Papa, u li kien fiha deskrizzjoni prattika tal-kultivazzjoni minn ċertu Signor Benni, li l-investimenti fl-artijiet permezz tal-kultivazzjoni tal-patata bdew jiżdiedu b’mod notevoli.

Ta’ min isemmi wkoll il-kitbiet ta’ Berti-Pichat u ta’ Bignardi, ippubblikati fl-aħħar nofs tas-seklu dsatax, li jirreferu għall-patata tal-provinċja ta’ Bologna. Fl-1900, il-firxa tal-kultivazzjoni tal-patata laħqet il-massimu potenzjali tagħha u nxterdet mal-provinċja kollha, mill-pjanura saż-żoni tal-għoljiet u l-muntanji, biex saret font importanti ta’ dħul għall-ekonomija rurali lokali. Minħabba dan il-prodott, ġiet żviluppata s-sistema tal-produzzjoni, kif ukoll inħolqu strutturi ta’ konservazzjoni u kummerċjali moderni u idonei għall-ġestjoni effiċjenti tal-patata.

4.7.   Entità ta’ kontroll:

4.8.   Tikkettar:

Il-karattru tipografiku użat għall-kompożizzjoni ta’ kwalunkwe test hu Avenir Light u Avenir Bold.

Il-marka ma tistax tiġi riprodotta fuq imballaġġi li jkollhom bażi ta’ daqs iżgħar minn 20 mm u, fi kwalunkwe każ, id-DPO “Patata di Bologna” għandha tidher f’ittri ikbar minn dawk ta’ kwalunkwe kliem ieħor fuq it-tikketta.