EUR-Lex Access to European Union law
This document is an excerpt from the EUR-Lex website
Document 32018D0618
Commission Implementing Decision (EU) 2018/618 of 19 April 2018 amending Implementing Decision 2012/535/EU as regards measures to prevent the spread within the Union of Bursaphelenchus xylophilus (Steiner et Buhrer) Nickle et al. (the pine wood nematode) (notified under document C(2018) 2227)
Deċiżjoni ta' Implimentazzjoni tal-Kummissjoni (UE) 2018/618 tad-19 ta' April 2018 li temenda d-Deċiżjoni ta' Implimentazzjoni 2012/535/UE dwar il-miżuri ta' emerġenza għall-prevenzjoni tat-tixrid fl-Unjoni tal-Bursaphelenchus xylophilus (Steiner et Buhrer) Nickle et al. (in-nematodu tal-injam tal-arżnu) (notifikata bid-dokument C(2018) 2227)
Deċiżjoni ta' Implimentazzjoni tal-Kummissjoni (UE) 2018/618 tad-19 ta' April 2018 li temenda d-Deċiżjoni ta' Implimentazzjoni 2012/535/UE dwar il-miżuri ta' emerġenza għall-prevenzjoni tat-tixrid fl-Unjoni tal-Bursaphelenchus xylophilus (Steiner et Buhrer) Nickle et al. (in-nematodu tal-injam tal-arżnu) (notifikata bid-dokument C(2018) 2227)
C/2018/2227
OJ L 102, 23.4.2018, p. 17–20
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
23.4.2018 |
MT |
Il-Ġurnal Uffiċjali tal-Unjoni Ewropea |
L 102/17 |
DEĊIŻJONI TA' IMPLIMENTAZZJONI TAL-KUMMISSJONI (UE) 2018/618
tad-19 ta' April 2018
li temenda d-Deċiżjoni ta' Implimentazzjoni 2012/535/UE dwar il-miżuri ta' emerġenza għall-prevenzjoni tat-tixrid fl-Unjoni tal-Bursaphelenchus xylophilus (Steiner et Buhrer) Nickle et al. (in-nematodu tal-injam tal-arżnu)
(notifikata bid-dokument C(2018) 2227)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-prodotti tal-pjanti u kontra t-tixrid tagħhom ġewwa l-Komunità (1), u b'mod partikolari r-raba' sentenza tal-Artikolu 16(3) tagħha,
Billi:
(1) |
L-għadd ta' pjanti suxxettibbli milquta minn nirien estensivi fiż-żona ta' lqugħ tal-Portugall kontinentali fl-2017 laħaq proporzjonijiet straordinarji. B'riżultat ta' dan, l-għadd ta' siġar f'kundizzjoni ħażina li jeħtieġ li jinqatgħu, jitneħħew u jintremew żdied f'daqqa u għall-għarrieda għal madwar 1,5 miljun siġra. Minkejja l-fatt li l-awtoritajiet Portugiżi reġgħu gradwalment żiedu l-kapaċità tagħhom biex jittrattaw sa 300 000 siġra fis-sena u huma mistennija li jkomplu jżidu l-kapaċitajiet tagħhom skont il-ħtiġijiet li dejjem qed jiżdiedu, ikun impossibbli għalihom li jipproċedu bil-qtugħ, it-tneħħija u r-rimi tas-siġar kollha ġodda f'qagħda ħażina skont l-iskadenzi legali, kif meħtieġ bid-Deċiżjoni ta' Implimentazzjoni tal-Kummissjoni 2012/535/UE (2). |
(2) |
Għalhekk, u fuq talba tal-Portugall, jenħtieġ li tiġi introdotta deroga temporanja mid-dispożizzjonijiet legali stabbiliti fil-punt 3(b) tal-Anness II ta' dik id-Deċiżjoni, biex il-Portugall jingħata l-possibilità li jlesti dawk l-attivitajiet ta' qtugħ fiż-żona ta' lqugħ ikkonċernata fi żmien perjodu itwal, iżda mhux aktar tard mill-31 ta' Marzu 2020. Dan se jipprovdi aktar żmien lill-awtoritajiet Portugiżi biex jipproċedu bl-attivitajiet ta' qtugħ meħtieġa, li l-volum tagħhom żdied b'mod sinifikanti minħabba l-iskala ta' dawk in-nirien. |
(3) |
Dik id-deroga jenħtieġ li tkun soġġetta għas-sottomissjoni ta' pjan ta' azzjoni annwali mill-Portugall, biex tkun żgurata azzjoni koordinata u mħejjija tajjeb. Il-pjan ta' azzjoni jenħtieġ jagħti dettalji dwar il-pjanti suxxettibbli b'riskju ogħla ta' infezzjoni min-nematodu tal-arżnu (“PWN”) li jeħtieġu azzjonijiet iktar mgħaġġla, ir-riżorsi neċessarji li jridu jiġu allokati kif ukoll dettalji rilevanti oħra, bħalma huma l-miżuri li jridu jiġu implimentati biex jiġi mmitigat ir-riskju ta' infestazzjoni bil-PWN sakemm dawk il-pjanti jinqatgħu, jitneħħew u jintremew, inkluż attivitajiet ta' stħarriġ intensifikat tal-pjanti suxxettibbli u l-vetturi għad-ditezzjoni bikrija tal-preżenza tal-PWN u d-dati ta' skadenza għall-implimentazzjoni tagħhom. Il-livell ta' riskju li jinħoloq minn dawk il-pjanti jenħtieġ li jiġi vvalutat fuq bażi annwali u l-pjan ta' azzjoni jenħtieġ li jiġi aġġornat skont dan, sabiex il-pjanti li jippreżentaw l-ogħla riskju li jikkawżaw it-tixrid tal-PWN jiġu ttrattati bi prijorità. |
(4) |
Għalhekk, jenħtieġ li d-Deċiżjoni ta' Implimentazzjoni 2012/535/UE tiġi emendata skont dan, |
(5) |
Il-miżuri previsti f'din id-Deċiżjoni huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DIN ID-DEĊIŻJONI:
Artikolu 1
L-Anness II tad-Deċiżjoni ta' Implimentazzjoni 2012/535/UE huwa emendat kif indikat fl-Anness ta' din id-Deċiżjoni.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, id-19 ta' April 2018.
Għall-Kummissjoni
Vytenis ANDRIUKAITIS
Membru tal-Kummissjoni
(1) ĠU L 169, 10.7.2000, p. 1.
(2) Id-Deċiżjoni ta' Implimentazzjoni tal-Kummissjoni 2012/535/UE tas-26 ta' Settembru 2012 dwar il-miżuri ta' emerġenza għall-prevenzjoni tat-tixrid fl-Unjoni tal-Bursaphelenchus xylophilus (Steiner et Buhrer) Nickle et al. (in-nematodu tal-injam tal-arżnu) (ĠU L 266, 2.10.2012, p. 42).
ANNESS
Il-Punt 3(b) tal-Anness II tad-Deċiżjoni ta' Implimentazzjoni 2012/535/UE huwa sostitwit b'li ġej:
“(b) |
L-Istati Membri għandhom, fiż-żoni ta' lqugħ ikkonċernati kollha, jidentifikaw u jaqtgħu l-pjanti kollha suxxettibbli li jkunu mejtin, morda jew li ntlaqtu minn nirien jew tempesti. Huma għandhom ineħħu u jarmu l-pjanti li jkunu qatgħu flimkien mal-fdalijiet tagħhom, filwaqt li jieħdu l-prekawzjonijiet neċessarji kollha biex iwaqqfu t-tixrid tal-PWN u l-vettur tiegħu, qabel u matul il-qtugħ, u sa ma jintremew il-pjanti li nqatgħu flimkien mal-fdalijiet tagħhom, skont il-kundizzjonijiet li ġejjin:
B'deroga mill-punti (i) u (ii), il-Portugall jista' jiddeċiedi li jkompli bil-qtugħ, it-tneħħija u r-rimi tal-pjanti suxxettibbli, li huma uffiċjalment iddeżinjati bħala milquta min-nirien fl-2017, mill-korp uffiċjali responsabbli, għal perjodu itwal, u sa mhux aktar tard mill-31 ta' Marzu 2020. Għall-finijiet tal-qtugħ, it-tneħħija u r-rimi f'dak il-perjodu, għandhom jingħataw prijorità l-pjanti suxxettibbli li jinsabu fiż-żoni li ġejjin:
Dawk il-pjanti suxxettibbli għandhom jinqatgħu u jinqerdu fil-post, jiġu ttrasportati taħt kontroll uffiċjali lejn iż-żona infestata inkella jitneħħew. F'dak il-każ, l-injam u l-qoxra ta' dawk il-pjanti għandhom jiġu ttrattati kif stabbilit fil-punt 2(a) tat-Taqsima 1 tal-Anness III, inkella pproċessati kif stabbilit fil-punt 2(b) tat-Taqsima 2 tal-Anness III. Il-pjanti suxxettibbli li ma jistgħux jintużaw mill-insett vettur għat-tlestija taċ-ċiklu tal-ħajja tiegħu jistgħu jinżammu fil-post mingħajr ma jinqerdu. Sal-31 ta' Mejju 2018, il-Portugall għandu jressaq pjan ta' azzjoni annwali lill-Kummissjoni u lill-Istati Membri, li jkun fih mapep li jindikaw fejn jinsabu l-pjanti milquta min-nirien fiż-żona ta' lqugħ, il-post fejn jinsabu ż-żoni msemmija fit-tieni subparagrafu u l-ġustifikazzjoni għal dik l-għażla, il-miżuri li jkunu se jiġu implimentati għall-mitigazzjoni tar-riskju minn infestazzjoni tal-PWN sakemm jinqatgħu, jitneħħew u jintremew dawk il-pjanti, inklużi attivitajiet ta' stħarriġ intensifikat tal-pjanti suxxettibbli u tal-vetturi għad-ditezzjoni bikrija tal-preżenza tal-PWN, ir-riżorsi meħtieġa u l-iskadenzi rilevanti biex jitwettqu dawk il-miżuri. Sal-31 ta' Mejju 2019, il-Portugall għandu jressaq pjan ta' azzjoni annwali ieħor bl-istess kontenut. Il-livell ta' riskju li jinħoloq minn dawk il-pjanti għandu jiġi vvalutat fuq bażi annwali u l-pjan ta' azzjoni għandu jiġi aġġornat kif xieraq. L-attivitajiet previsti f'dak il-pjan ta' azzjoni għandhom jitqiesu meta jkun qed jitħejja l-pjan ta' azzjoni ġenerali msemmi fl-Artikolu 9. Il-Portugall għandu jippreżenta rapport dwar ir-riżultati annwali lill-Kummissjoni u lill-Istati Mmebri, u dan għandu jinkludi r-riżultati tal-istħarriġ intensifikat dwar il-vetturi, kif ukoll kwalunkwe aġġornament ta' dak il-pjan ta' azzjoni sat-30 ta' April tas-sena ta' wara s-sena kkonċernata. Il-pjanti suxxettibbli li jinqatgħu, minbarra l-pjanti li nqerdu kompletament bin-nirien tal-foresti, għandu jitteħdilhom kampjun u jsirulhom testijiet għall-preżenza tal-PWN, skont skema ta' teħid ta' kampjuni li tista' tikkonferma b'affidabbiltà ta' 99 % li l-livell tal-preżenza tal-PWN f'dawk il-pjanti suxxettibbli huwa aktar baxx minn 0,02 %.” |