EUR-Lex Access to European Union law
This document is an excerpt from the EUR-Lex website
Document 32014R0462
Commission Implementing Regulation (EU) No 462/2014 of 5 May 2014 approving the basic substance Equisetum arvense L., in accordance with Regulation (EC) No 1107/2009 of the European Parliament and of the Council concerning the placing of plant protection products on the market, and amending Implementing Regulation (EU) No 540/2011 Text with EEA relevance
Regolament ta' Implimentazzjoni tal-Kummissjoni (UE) Nru 462/2014 tal- 5 ta' Mejju 2014 li japprova s-sustanza bażika Equisetum arvense L., skont ir-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta' prodotti għall-protezzjoni tal-pjanti u li jemenda r-Regolament ta' Implimentazzjoni tal-Kummissjoni (UE) Nru 540/2011 Test b'rilevanza għaż-ŻEE
Regolament ta' Implimentazzjoni tal-Kummissjoni (UE) Nru 462/2014 tal- 5 ta' Mejju 2014 li japprova s-sustanza bażika Equisetum arvense L., skont ir-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta' prodotti għall-protezzjoni tal-pjanti u li jemenda r-Regolament ta' Implimentazzjoni tal-Kummissjoni (UE) Nru 540/2011 Test b'rilevanza għaż-ŻEE
OJ L 134, 7.5.2014, p. 28–31
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
|
7.5.2014 |
MT |
Il-Ġurnal Uffiċjali tal-Unjoni Ewropea |
L 134/28 |
REGOLAMENT TA' IMPLIMENTAZZJONI TAL-KUMMISSJONI (UE) Nru 462/2014
tal-5 ta' Mejju 2014
li japprova s-sustanza bażika Equisetum arvense L., skont ir-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta' prodotti għall-protezzjoni tal-pjanti u li jemenda r-Regolament ta' Implimentazzjoni tal-Kummissjoni (UE) Nru 540/2011
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1107/2009 tal-Parlament Ewropew u tal-Kunsill tal-21 ta' Ottubru 2009 dwar it-tqegħid fis-suq ta' prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (1), u b'mod partikolari l-Artikolu 23(5) flimkien mal-Artikolu 13(2) u l-Artikolu 78(2) tiegħu,
Billi:
|
(1) |
B'konformità mal-Artikolu 23(3) tar-Regolament (KE) Nru 1107/2009, il-Kummissjoni, fit-28 ta' Diċembru 2011, irċeviet applikazzjoni mill-Institut Technique de l'Agriculture Biologique (ITAB) għall-approvazzjoni tal-Equisetum arvense L. bħala sustanza bażika. Dik l-applikazzjoni ġiet akkumpanjata mit-tagħrif meħtieġ skont it-tieni subparagrafu tal-Artikolu 23(3). |
|
(2) |
Il-Kummissjoni talbet lill-Awtorità Ewropea dwar is-Sigurtà fl-Ikel (minn hawn' il quddiem “l-Awtorità”) għal assistenza xjentifika. Fl-24 ta' Mejju 2013, l-Awtorità ppreżentat rapport tekniku dwar is-sustanza kkonċernata lill-Kummissjoni (2). Il-Kummissjoni ppreżentat ir-rapport ta' analiżi u dan l-abbozz ta' regolament dwar l-approvazzjoni ta' Equisetum arvense L. lill-Kumitat Permanenti dwar il-Katina Alimentari u s-Saħħa tal-Annimali fl-20 ta' Marzu 2014. |
|
(3) |
Id-dokumentazzjoni pprovduta mill-applikant u r-riżultati tal-eżaminazzjoni mwettqa mill-Awtorità (3) skont ir-Regolament (KE) Nru 1924/2006 tal-Parlament Ewropew u tal-Kunsill (4) juru li l-Equisetum arvense L. tissodisfa l-kriterji ta' oġġett tal-ikel kif iddefinit fl-Artikolu 2 tar-Regolament (KE) Nru 178/2002 tal-Parlament Ewropew u tal-Kunsill (5). Barra minn hekk, din ma tintużax l-aktar għal finijiet ta' protezzjoni tal-pjanti, iżda tista' tintuża fil-protezzjoni tal-pjanti fi prodott magħmul mis-sustanza fil-kwistjoni u ilma. Konsegwentement, għandha titqies bħala sustanza bażika. |
|
(4) |
Billi s-sustanza bażika ikkonċernata hija prodott tal-ikel li ma jeħtiġx awtorizzazzjoni speċifika skont ir-Regolament (KE) Nru 178/2002, hija meqjusa li tiġi evalwata bħala li m'għandha la effett ta' ħsara immedjat u lanqas ittardjat fuq is-saħħa tal-bniedem jew tal-annimali, u lanqas effett mhux aċċettabbli fuq l-ambjent. |
|
(5) |
Mill-eżamijiet li saru, deher li l-Equisetum arvense L. hija mistennija tissodisfa, b'mod ġenerali, ir-rekwiżiti stabbiliti fl-Artikolu 23 tar-Regolament (KE) Nru 1107/2009/KEE, b'mod partikolari fir-rigward tal-użijiet li ġew eżaminati u spjegati fir-rapport ta' analiżi tal-Kummissjoni. Skont l-Artikolu 13(2) tar-Regolament (KE) Nru 1107/2009 flimkien mal-Artikolu 6 tiegħu kif ukoll fid-dawl tal-għarfien xjentifiku u tekniku attwali, jeħtieġ li jiġu inklużi ċerti kundizzjonijiet għall-approvazzjoni li huma spjegati fl-Anness I ta' dan ir-Regolament. |
|
(6) |
Skont l-Artikolu 23(5) tar-Regolament (KE) Nru 1107/2009, is-sustanzi bażiċi għandhom jiġu elenkati separatament fir-Regolament imsemmi fl- Artikolu 13(4) tar- Regolament (KE) Nru 1107/2009. Għalhekk huwa xieraq li tiżdied Parti C fl-Anness tar-Regolament ta' Implimentazzjoni tal-Kummissjoni (UE) Nru 540/2011 (6). Għalhekk, dak ir-Regolament għandu jiġi emendat skont dan. |
|
(7) |
Il-miżuri stipulati f'dan ir-Regolament huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali, |
ADOTTAT DAN IR-REGOLAMENT:
Artikolu 1
Approvazzjoni ta' sustanza bażika
Is-sustanza attiva Equisetum arvense L., kif speċifikat fl-Anness I, hija approvata skont il-kundizzjonijiet stabbiliti f'dak l-Anness.
Artikolu 2
Emendi fir-Regolament ta' Implimentazzjoni tal-Kummissjoni (UE) Nru 540/2011
(1) Fl-Artikolu 1 tar-Regolament (UE) Nru 540/2011, it-tieni subparagrafu huwa mibdul b'dawn iż-żewġ paragrafi li ġejjin:
“Is-sustanzi attivi approvati skont ir-Regolament (KE) Nru 1107/2009 huma dawk elenkati fil-Parti B tal-Anness ta' dan ir-Regolament. Is-sustanzi bażiċi approvati skont ir-Regolament (KE) Nru 1107/2009 huma dawk elenkati fil-Parti C tal-Anness ta' dan ir-Regolament.”
(2) L-Anness tar-Regolament (UE) Nru 540/2011 huwa emendat skont l-Anness II ta' dan ir-Regolament.
Artikolu 3
Id-dħul fis-seħħ u d-data tal-applikazzjoni
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, il-5 ta' Mejju 2014.
Għall-Kummissjoni
Il-President
José Manuel BARROSO
(1) ĠU L 309, 24.11.2009, p. 1.
(2) Ir-riżultat tal-konsultazzjoni mal-Istati Membri u l-EFSA dwar l-applikazzjoni għas-sustanza bażika Equisetum arvense L. u l-konklużjonijiet li waslet għalihom l-EFSA rigward il-punti speċifiċi li tqajmu. 2013:EN-427.23 pp.
(3) Il-Bord tal-EFSA dwar Prodotti Djetetiċi, Nutrizzjoni u Allerġiji (NDA) EFSA Journal 2009; 7(9): 1289 doi: 10.2903/j.efsa.2009.1289.
(4) Ir-Regolament (KE) Nru 1924/2006 tal-Parlament Ewropew u tal-Kunsill tal-20 ta' Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (ĠU L 404, 30.12.2006, p. 9).
(5) Ir-Regolament (KE) Nru 178/2002 tal-Parlament Ewropew u tal-Kunsill tat-28 ta' Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta' sigurtà tal-ikel (ĠU L 31, 1.2.2002, p. 1).
(6) Ir-Regolament ta' Implimentazzjoni tal-Kummissjoni (UE) Nru 540/2011 tal-25 ta' Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f'dak li għandu x'jaqsam mal-lista ta' sustanzi attivi approvati (ĠU L 153, 11.6.2011, p. 1).
ANNESS I
|
Isem Komuni, Numri ta' Identifikazzjoni |
Isem tal-IUPAC |
Purità (1) |
Data tal-approvazzjoni |
Dispożizzjonijiet speċifiċi |
|
Equisetum arvense L. Nru CAS: mhux assenjat Nru CIPAC: mhux assenjat |
Mhux applikabbli |
Farmakopea Ewropea |
fl-1 ta' Lulju 2014. |
Equisetum arvense L. tista' tintuża skont il-kundizzjonijiet speċifiċi inklużi fil-konklużjonijiet tar-rapport ta' analiżi dwar l-Equisetum arvense L. (SANCO/12386/2013) u b'mod partikolari fl-Appendiċi I u II tiegħu, kif ġie ffinalizzat fil-Kumitat Permanenti dwar il-Katina Alimentari u s-Saħħa tal-Annimali fl-20 ta' Marzu 2014. |
(1) Aktar dettalji dwar l-identità, l-ispeċifikazzjoni u l-modalità tal-użu tas-sustanza attiva jinsabu fir-rapport ta' analiżi.
ANNESS II
L-Anness tar-Regolament ta' Implimentazzjoni (UE) Nru 540/2011 huwa emendat kif ġej:
|
(1) |
It-titolu tal-Anness jinbidel b'dan li ġej: “ANNESS SUSTANZI ATTIVI” |
|
(2) |
Din il-Parti C hija miżjuda: “PARTI C Sustanzi bażiċi Id-dispożizzjonijiet ġenerali li japplikaw għas-sustanzi kollha elenkati f'din il-Parti: il-Kummissjoni għandha żżomm disponibbli r-rapporti ta' analiżi kollha (minbarra informazzjoni kunfidenzjali skont it-tifsira tal-Artikolu 63 tar-Regolament (KE) Nru 1107/2009) biex ikunu jistgħu jiġu kkonsultati minn kwalunkwe partijiet interessati, jew tagħmilhom disponibbli għalihom fuq talba speċifika.
|
(*) Aktar dettalji dwar l-identità, l-ispeċifikazzjoni u l-modalitajiet tal-użu tas-sustanza attiva jinsabu fir-rapport ta' analiżi.”