EUR-Lex Access to European Union law
This document is an excerpt from the EUR-Lex website
Document 32008R0021
Commission Regulation (EC) No 21/2008 of 11 January 2008 amending Annex X to Regulation (EC) No 999/2001 of the European Parliament and of the Council as regards the lists of rapid tests (Text with EEA relevance )
Regolament tal-Kummissjoni (KE) Nru 21/2008 tal- 11 ta’ Jannar 2008 li jemenda l-Anness X tar-Regolament (KE) Nru 999/2001 tal-Parlament Ewropew u tal-Kunsill fir-rigward tal-listi ta’ testijiet rapidi (Test b’relevanza għaż-ŻEE)
Regolament tal-Kummissjoni (KE) Nru 21/2008 tal- 11 ta’ Jannar 2008 li jemenda l-Anness X tar-Regolament (KE) Nru 999/2001 tal-Parlament Ewropew u tal-Kunsill fir-rigward tal-listi ta’ testijiet rapidi (Test b’relevanza għaż-ŻEE)
OJ L 9, 12.1.2008, p. 3–5
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 03 Volume 017 P. 260 - 262
In force
12.1.2008 |
MT |
Il-Ġurnal Uffiċjali ta’ l-Unjoni Ewropea |
L 9/3 |
REGOLAMENT TAL-KUMMISSJONI (KE) Nru 21/2008
tal-11 ta’ Jannar 2008
li jemenda l-Anness X tar-Regolament (KE) Nru 999/2001 tal-Parlament Ewropew u tal-Kunsill fir-rigward tal-listi ta’ testijiet rapidi
(Test b’relevanza għaż-ŻEE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament (KE) Nru 999/2001 tal-Parlament Ewropew u tal-Kunsill tat-22 ta’ Mejju 2001 li jistabbilixxi regoli għall-prevenzjoni, il-kontroll u l-qerda ta’ ċerti enċefalopatiji sponġiformi li jinxterdu (1), u b’mod partikolari l-ewwel paragrafu ta’ l-Artikolu 23 tiegħu,
Billi:
(1) |
Ir-Regolament (KE) Nru 999/2001 jistipula regoli għall-prevenzjoni, il-kontroll u l-eradikazzjoni ta’ l-enċifalopatiji sponġiformi trasmissibbli (TSEs) fl-annimali. Huwa japplika għall-produzzjoni u t-tqegħid fis-suq ta’ annimali ħajjin u prodotti mill-annimali u f’ċerti każijiet speċifiċi għall-esportazzjoni tagħhom. |
(2) |
L-Anness X, Kapitolu Ċ, tar-Regolament (KE) Nru 999/2001 jistabbilixxi lista ta’ testijiet rapidi approvati għas-sorveljanza tat-TSEs fl-annimali bovini, ovini u kaprini. |
(3) |
It-tibdiliet fit-testijiet rapidi jew fil-protokolli tat-testijiet jistgħu jsiru biss wara notifika minn qabel lil-Laboratorju Komunitarju ta’ Referenza (LKR) għat-TSEs u sakemm l-LKR isib li t-tibdil ma jalterax is-sensitività, l-ispeċifiċità jew l-affidabilità tat-testijiet. Fit-13 ta’ April 2007, l-LKR approva t-tibdil magħmul fit-test rapidu post-mortem tat-TSE li hu fil-preżent approvat, l-“Enfer TSE Kit verżjoni 2.0”, u għalhekk irrakkomanda li l-verżjoni emendata (“Enfer TSE verżjoni 3.0”) għandha tidħol fil-lista fl-Anness X, Kapitolu Ċ tar-Regolament (KE) Nru 999/2001. |
(4) |
Ir-Regolament (KE) Nru 999/2001 għandu għalhekk jiġi emendat skond dan. |
(5) |
Il-miżuri previsti f’dan ir-Regolament huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali, |
ADOTTAT DAN IR-REGOLAMENT:
Artikolu 1
L-Anness X tar-Regolament (KE) Nru 999/2001 huwa emendat b’konformità ma’ l-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 11 ta’ Jannar 2008.
Għall-Kummissjoni
Markos KYPRIANOU
Membru tal-Kummissjoni
(1) ĠU L 147, 31.5.2001, p. 1. Ir-Regolament kif emendat l-aħħar bir-Regolament (KE) Nru 1428/2007 tal-Kummissjoni (ĠU L 317, 5.12.2007, p. 61).
ANNESS
Fl-Anness X, Kapitolu Ċ, tar-Regolament (KE) Nru 999/2001, il-punt 4 jinbidel b’dan li ġej:
“4. Testijiet Rapidi
Għall-għanijiet tat-twettiq tat-testijiet rapidi skond l-Artikolu 5(3) u l-Artikolu 6(1), il-metodi li ġejjin għandhom jintużaw bħala testijiet rapidi għall-monitoraġġ tal-BSE f’annimali bovini:
— |
test immuno-blotting ibbażat fuq il-proċedura Western blotting għall-identifikazzjoni ta’ frak PrPRes reżistenti għall-Proteinase K (Prionics-Check Western test), |
— |
testijiet tal-kemiluminexxenza ELISA li jinvolvu proċess ta’ estrazzjoni u teknika magħrufa bħala ELISA fejn jintuża reaġent kemiluminexxenti żviluppat (Enfer test u Enfer TSE Kit verżjoni 2.0, preparazzjoni awtomatizzata tal-kampjuni), |
— |
immunoanaliżi fuq mikroplakka għall-identifikazzjoni tal-PrPSc (Enfer TSE Verżjoni 3), |
— |
immunoanaliżi sandwich għal PrPRes imwettaq wara l-istadji ta’ denaturazzjoni u konċentrazzjoni (test Bio-Rad TeSeE), |
— |
immunoanaliżi fuq mikroplakka (ELISA) li tidentifika l-PrPRes reżistenti għall-Proteinase K b’antikorpi monoklonali (test Prionics-Check LIA), |
— |
immunoanaliżi dipendenti mill-konformazzjoni, kit għat-test ta’ l-antiġene tal-BSE (Beckman Coulter InPro CDI kit), |
— |
ELISA kemiluminexxenti għad-determinazzjoni kwalitattiva tal-PrPSc (CediTect BSE test), |
— |
immunoanaliżi li tuża polimeru kimiku għall-qbid selettiv tal-PrPSc u antikorp monoklonali ta’ identifikazzjoni dirett kontra r-reġjuni konservati tal-molekula tal-PrP (IDEXX HerdChek BSE Antigen Test Kit, EIA), |
— |
immunoanaliżi kemiluminexxenti fuq mikroplakka għall-identifikazzjoni tal-PrPSc f’tessuti bovini (Institut Pourquier Speed’it BSE), |
— |
immunoanaliżi bi fluss mill-ġenb li tuża żewġ antikorpi monoklonali differenti biex tindividwa l-frazzjonijiet tal-PrP reżistenti għall-Proteinase K (Prionics Check PrioSTRIP), |
— |
immunoanaliżi bilaterali li tuża żewġ antikorpi monoklonali differenti diretti kontra żewġ epitopi preżenti fil-PrPSc bovina fi stat mhux mitni (unfolded) (Roboscreen Beta Prion BSE EIA Test Kit), |
— |
ELISA sandwich għall-individwazzjoni tal-PrPSc reżistenti għall-Proteinase K (Roche Applied Science PrionScreen), |
— |
ELISA li jaqbad l-antiġene li juża żewġ antikorpi monoklonali differenti biex jindividwa l-frazzjonijiet tal-PrP reżistenti għall-Proteinase K (Fujirebio FRELISA BSE post mortem rapid BSE Test). |
Għall-għanijiet tat-twettiq tat-testijiet rapidi skond l-Artikolu 5(3) u l-Artikolu 6(1), il-metodi li ġejjin għandhom jintużaw bħala testijiet rapidi għall-monitoraġġ tal-TSE f’annimali ovini u kaprini:
— |
immunoanaliżi dipendenti mill-konformazzjoni, kit għat-test ta’ l-antiġene tal-BSE (Beckman Coulter InPro CDI kit), |
— |
immunoanaliżi sandwich għal PrPRes imwettaq wara l-istadji ta’ denaturazzjoni u konċentrazzjoni (test Bio-Rad TeSeE), |
— |
immunoanaliżi sandwich għal PrPRes imwettaq wara l-istadji ta’ denaturazzjoni u konċentrazzjoni (Bio-Rad TeSeE test Nagħaġ/Mogħoż), |
— |
test kemiluminexxenti ELISA li jinvolvi proċess ta’ estrazzjoni u teknika magħrufa bħala ELISA fejn jintuża reaġent kemiluminexxenti żviluppat (Enfer TSE Kit verżjoni 2.0), |
— |
immunoanaliżi fuq mikroplakka għall-identifikazzjoni tal-PrPSc (Enfer TSE Verżjoni 3), |
— |
immunoanaliżi li tuża polimeru kimiku għall-qbid selettiv tal-PrPSc u antikorp monoklonali ta’ individwazzjoni dirett kontra r-reġjuni konservati tal-molekula tal-PrP (IDEXX HerdChek BSE-Scrapie Antigen Test Kit, EIA), |
— |
immunoanaliżi kemiluminexxenti fuq mikroplakka għall-identifikazzjoni tal-PrPSc f’tessuti ovini (POURQUIER’S - LIA Scrapie); |
— |
test immuno-blotting ibbażat fuq il-proċedura Western blotting għall-identifikazzjoni ta’ frak PrPRes reżistenti għall-Proteinase K (Prionics-Check Western Small Ruminant test), |
— |
immunoanaliżi kemiluminexxenti fuq mikroplakka għall-identifikazzjoni tal-PrPSc reżistenti għall-Proteinase K (Prionics Check LIA Small Ruminants). |
Għat-testijiet kollha l-kampjun tat-tessut li fuqu t-test irid jiġi applikat għandu jkun konformi ma’ l-istruzzjonijiet għall-użu tal-manifattur.
Il-produttur tat-testijiet rapidi jrid ikollu sistema li tiżgura l-kwalità, approvata mil-Laboratorju Komunitarju ta’ Referenza (LKR), li tiżgura li t-twettiq tat-test ma jinbidilx. Il-produttur irid jipprovdi l-protokoll tat-test lil-LKR.
It-tibdiliet fit-testijiet rapidi jew fil-protokolli tat-testijiet jistgħu jsiru biss wara notifika minn qabel lil-LKR u bil-kundizzjoni li l-LKR isib li t-tibdil ma jalterax is-sensitività, l-ispeċifiċità u l-affidabilità tat-test rapidu. Dan ir-riżultat għandu jiġi kkomunikat lill-Kummisjoni u lil-laboratorji nazzjonali ta’ referenza.”