Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32024L1405

    Direttiva Delegata tal-Kummissjoni (UE) 2024/1405 tal-14 ta’ Marzu 2024 li temenda l-Anness IX tad-Direttiva (UE) 2018/2001 tal-Parlament Ewropew u tal-Kunsill fir-rigward taż-żieda ta’ materja prima għall-produzzjoni tal-bijofjuwils u tal-bijogass

    C/2024/1585

    ĠU L, 2024/1405, 17.5.2024, ELI: http://data.europa.eu/eli/dir_del/2024/1405/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force: This act has been changed. Current consolidated version: 17/05/2024

    ELI: http://data.europa.eu/eli/dir_del/2024/1405/oj

    European flag

    Il-Ġurnal Uffiċjali
    ta'l-Unjoni Ewropea

    MT

    Is-serje L

    2024/1405

    17.5.2024

    DIRETTIVA DELEGATA TAL-KUMMISSJONI (UE) 2024/1405

    tal-14 ta’ Marzu 2024

    li temenda l-Anness IX tad-Direttiva (UE) 2018/2001 tal-Parlament Ewropew u tal-Kunsill fir-rigward taż-żieda ta’ materja prima għall-produzzjoni tal-bijofjuwils u tal-bijogass

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (1), u b’mod partikolari l-Artikolu 28(6), it-tieni subparagrafu tiegħu,

    Billi:

    (1)

    Il-bijofjuwils u l-bijogassijiet sostenibbli għandhom rwol importanti fiż-żieda tas-sehem tal-enerġija rinnovabbli fis-setturi li mistennija jiddependu fuq il-fjuwils likwidi fit-tul. Id-Direttiva (UE) 2018/2001tintroduċi dispożizzjonijiet ġodda għall-promozzjoni tal-użu tal-bijofjuwils u tal-bijogassijiet prodotti mill-materja prima elenkata fl-Anness IX ta’ dik id-Direttiva.

    (2)

    L-analiżi ta’ ċerta materja prima f’konformità mal-prinċipji stabbiliti fl-Artikolu 28(6), it-tielet subparagrafu, tad-Direttiva (UE) 2018/2001 wriet li għandha potenzjal bħala materja prima għall-produzzjoni tal-bijofjuwils u tal-bijogass. Għalhekk jeħtieġ li dik il-materja prima tiżdied fl-Anness IX tad-Direttiva (UE) 2018/2001.

    (3)

    Il-kriterju li jiddetermina jekk materja prima tiżdiedx mal-Parti A jew mal-Parti B tal-Anness IX huwa jekk il-materja prima tistax tiġi pproċessata biss b’teknoloġiji avvanzati jew jekk tistax tiġi pproċessata f’bijofjuwils jew bijogassijiet b’teknoloġiji maturi. Fin-nuqqas ta’ definizzjoni ta’ teknoloġiji avvanzati u maturi fid-Direttiva (UE) 2018/2001, jixraq jitqiesu għadd ta’ fatturi meta tiżdied materja prima fil-Parti A tal-Anness IX jew fil-Parti B tal-Anness IX. Apparti l-indikaturi għat-tħejjija tat-teknoloġija u l-preparatezza kummerċjali dan jinkludi wkoll l-livell ta’ implimentazzjoni tat-teknoloġiji. Barra minn hekk, il-livell ta’ maturità tat-teknoloġija jvarja bejn it-tip ta’ fjuwils li jiġu prodotti. Fir-rigward tal-għelejjel intermedji u tal-għelejjel imkabbra fuq art li ddeterjorat b’mod gravi, it-teknoloġiji meħtieġa għall-ipproċessar ta’ dik il-materja prima f’bijofjuwils użati fl-avjazzjoni għadhom mhumiex implimentati kummerċjalment fuq skala kbira filwaqt li teknoloġiji maturi diġà huma disponibbli u implimentati fuq skala kbira għall-ipproċessar tal-istess materja prima f’tipi oħra ta’ bijofjuwils li jintużaw f’setturi oħra tat-trasport bħall-bijodiżil, il-bijoetanol u l-bijogass. Għalhekk, huwa xieraq li tiżdied dik il-materja prima, esklussivament meta tintuża għall-produzzjoni tal-bijofjuwils għas-settur tal-avjazzjoni, fil-Parti A tal-Anness IX tad-Direttiva, u fil-Parti B tal-Anness IX tad-Direttiva jekk il-materja prima tintuża għall-produzzjoni ta’ tipi oħra ta’ bijofjuils li jintużaw f’setturi oħra tat-trasport.

    (4)

    Jenħtieġ li l-Kummissjoni tivvaluta regolarment jekk il-materja prima inkluża bħala materja prima għall-produzzjoni tal-bijofjuwils u l-bijogassijiet għat-trasport komplietx tissodisfa l-kriterji u l-prinċipji stabbiliti fl-Artikolu 28(6) tar-RED, partikolarment fir-rigward tas-sostenibbiltà, kif ukoll biex tiżgura li l-investimenti fl-aktar teknoloġiji tal-ipproċessar avvanzati, inklużi dawk meħtieġa għall-produzzjoni tal-fjuwils rinnovabbli ta’ oriġini mhux bijoloġika, ma humiex qed jiġu skoraġġuti u li l-miri rilevanti stabbiliti fid-Direttiva (UE) 2018/2001 jistgħu jintlaħqu.

    (5)

    Għalhekk, jenħtieġ li d-Direttiva (UE) 2018/2001 tiġi emendata skont dan,

    ADOTTAT DIN ID-DIRETTIVA:

    Artikolu 1

    L-Anness IX tad-Direttiva (UE) 2018/2001 huwa emendat f’konformità mal-Anness ta’ din id-Direttiva.

    Artikolu 2

    1.   L-Istati Membri għandhom iġibu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva sa mhux aktar tard minn . Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

    Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

    2.   L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.

    Artikolu 3

    Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

    Artikolu 4

    Din id-Direttiva hija indirizzata lill-Istati Membri.

    Magħmul fi Brussell, l-14 ta’ Marzu 2024.

    Għall-Kummissjoni

    Il-President

    Ursula VON DER LEYEN

    (1)   ĠU L 328, 21.12.2018, p. 82, ELI: https://eur-lex.europa.eu/eli/dir/2018/2001/oj?locale=mt.

    ANNESS

    L-Anness IX tad-Direttiva (UE) 2018/2001 huwa emendat kif ġej:

    (1)

    fil-Parti A, tiżdied il-materja prima li ġejja:

    “(r)

    Żjut fusel mid-distillazzjoni alkoħolika;

    (s)

    Metanol mhux ipproċessat minn polpa kraft li ġejja mill-produzzjoni ta’ polpa tal-injam;

    (t)

    Għelejjel intermedji, meta jintużaw għall-produzzjoni tal-bijofjuwil għas-settur tal-avjazzjoni, bħall-għelejjel tat-titwiq u għelejjel ta’ kopertura li jitkabbru f’żoni meta minħabba perjodu qasir ta’ veġetazzjoni l-produzzjoni ta’ għelejjel tal-ikel u tal-għalf tkun limitata għal ħsad wieħed u dment li l-użu tagħhom ma jwassalx għal domanda għal art addizzjonali, u dment li jinżamm il-kontenut ta’ materja organika fil-ħamrija;

    (u)

    Għelejjel imkabbra fuq art li ddeterjorat b’mod gravi, minbarra għelejjel tal-ikel u tal-għalf, meta jintużaw għall-produzzjoni tal-bijofjuwil għas-settur tal-avjazzjoni;

    (v)

    Ċjanobatterji.”;

    (2)

    fil-Parti B, tiżdied il-materja prima li ġejja:

    “(c)

    Għelejjel danneġġati li mhumiex tajbin għall-użu fil-katina tal-ikel jew tal-għalf, minbarra sustanzi li ġew modifikati jew ikkontaminati intenzjonalment sabiex jissodisfaw din id-definizzjoni;

    (d)

    Ilma mormi muniċipali u derivattivi għajr il-ħama tad-drenaġġ;

    (e)

    Għelejjel imkabbra fuq art li ddeterjorat b’mod gravi, minbarra għelejjel tal-ikel u tal-għalf elenkati fil-Parti A ta’ dan l-Anness, meta jintużaw għall-produzzjoni tal-bijofjuwil għas-settur tal-avjazzjoni;

    (f)

    Għelejjel intermedji, meta ma jintużawx għall-produzzjoni tal-bijofjuwil għas-settur tal-avjazzjoni, u jeskludu materja prima elenkata fil-Parti A ta’ dan l-Anness, bħall-għelejjel tat-titwiq u għelejjel ta’ kopertura li jitkabbru f’żoni fejn minħabba perjodu qasir ta’ veġetazzjoni l-produzzjoni ta’ għelejjel tal-ikel u tal-għalf tkun limitata għal ħsad wieħed u dment li l-użu tagħhom ma jwassalx għal domanda għal art addizzjonali, u dment li jinżamm il-kontenut ta’ materja organika fil-ħamrija.”.

    ELI: http://data.europa.eu/eli/dir_del/2024/1405/oj

    ISSN 1977-074X (electronic edition)

    Top