(1)

Il-Ftehim ta' Pariġi, adottat fit-12 ta' Diċembru 2015 skont il-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) (il-"Ftehim ta' Pariġi"), daħal fis-seħħ fl-4 ta' Novembru 2016. Il-Partijiet għall-Ftehim ta' Pariġi qablu li jżommu ż-żieda fit-temperatura medja globali sew taħt 2 °C 'il fuq mil-livelli preindustrijali u jagħmlu sforzi biex jillimitaw iż-żieda fit-temperatura għal 1,5 °C 'il fuq mil-livelli preindustrijali. Dak l-impenn ġie msaħħaħ bl-adozzjoni, fl-ambitu tal-UNFCCC, tal-Patt Klimatiku ta' Glasgow fit-13 ta' Novembru 2021, li fih il-Konferenza tal-Partijiet għall-UNFCCC, li sservi bħala l-laqgħa tal-Partijiet għall-Ftehim ta' Pariġi, tirrikonoxxi li l-impatti tat-tibdil fil-klima se jkunu ħafna aktar baxxi b'żieda fit-temperatura ta' 1,5 °C, meta mqabbla ma' 2 °C, u tiddeċiedi li tkompli bi sforzi biex iż-żieda fit-temperatura tiġi limitata għal 1,5 °C.

(2)

Fir-Rapport ta' Valutazzjoni Globali tagħha tal-2019 dwar il-Bijodiversità u s-Servizzi Ekosistemiċi, il-Pjattaforma Intergovernattiva tal-Politika tax-Xjenza dwar il-Bijodiversità u s-servizzi Ekosistemiċi (IPBES) ipprovdiet l-aħħar evidenza xjentifika dwar l-erożjoni tal-bijodiversità li għaddejja fid-dinja kollha. Il-komunikazzjoni tal-Kummissjoni tal-20 ta' Mejju 2020 dwar Strateġija tal-UE għall-Bijodiversità għall-2030 – Inreġġgħu n-natura lura f'ħajjitna (l-"Istrateġija tal-UE għall-Bijodiversità għall-2030") tintensifika l-ambizzjoni tal-Unjoni rigward il-protezzjoni u r-restawr tal-bijodiversità u ekosistemi li jiffunzjonaw tajjeb. Il-foresti u l-ħamrija b'saħħitha huma estremament importanti għall-bijodiversità, iżda wkoll għall-purifikazzjoni tal-arja u tal-ilma, is-sekwestru u l-ħżin tal-karbonju, u l-provvista ta' prodotti tal-injam b'ħajja twila minn sorsi sostenibbli. In-natura u l-funzjoni tal-foresti jvarjaw ħafna madwar l-Unjoni, fejn ċerti tipi ta' foresti huma aktar vulnerabbli għat-tibdil fil-klima minħabba impatti diretti, bħal nixfa, qerda tal-foresti kkawżata mit-temperatura jew bidliet fl-aridità. Id-deforestazzjoni u d-degradazzjoni tal-foresti jikkontribwixxu għall-kriżi klimatika globali peress li jżidu l-emissjonijiet tal-gassijiet serra, inter alia permezz ta' nirien fil-foresti assoċjati, u b'hekk ineħħu b'mod permanenti l-kapaċitajiet tal-bjar tal-karbonju, inaqqsu r-reżiljenza għat-tibdil fil-klima taż-żoni milquta u jnaqqsu b'mod sostanzjali l-bijodiversità tagħhom.

Il-karbonju organiku fil-ħamrija u r-raggruppamenti tal-karbonju ta' injam mejjet, li ħafna minnu jalimenta r-raggruppament tal-karbonju fil-ħamrija, huma wkoll ta' rilevanza għolja partikolari f'għadd ta' kategoriji ta' rapportar, kemm għall-azzjoni klimatika kif ukoll għall-protezzjoni tal-bijodiversità. Kemm il-komunikazzjoni tal-Kummissjoni tas-16 ta' Lulju 2021 dwar l-Istrateġija l-ġdida tal-UE għall-Foresti għall-2030 (l-"Istrateġija l-ġdida tal-UE għall-Foresti għall-2030") kif ukoll il-komunikazzjoni tal-Kummissjoni tas-17 ta' Novembru 2021 dwar l-Istrateġija tal-UE dwar il-ħamrija għall-2030 – Ingawdu l-benefiċċji ta' ħamrija b'saħħitha għan-nies, l-ikel, in-natura u l-klima (l-"Istrateġija tal-UE dwar il-Ħamrija għall-2030") – irrikonoxxew il-ħtieġa li tiġi protetta u mtejba l-kwalità tal-foresti u tal-ekosistemi tal-ħamrija fl-Unjoni, u li jitħeġġu prattiki ta' ġestjoni sostenibbli msaħħa li jistgħu jtejbu s-sekwestru tal-karbonju u jsaħħu r-reżiljenza tal-foresti u tal-ħamrija fid-dawl tal-kriżijiet klimatiċi u tal-bijodiversità. It-torbieri huma l-akbar ħażna terrestri ta' karbonju organiku, u t-titjib tal-ġestjoni u l-protezzjoni tat-torbieri huwa aspett importanti li jikkontribwixxi għall-mitigazzjoni tat-tibdil fil-klima, u għall-protezzjoni tal-bijodiversità u tal-ħamrija kontra l-erożjoni.

(3)

Il-komunikazzjoni tal-Kummissjoni tal-11 ta' Diċembru 2019 dwar il-Patt Ekoloġiku Ewropew (il-"Patt Ekoloġiku Ewropew") tipprovdi punt tat-tluq għall-kisba tal-objettiv tan-newtralità klimatika tal-Unjoni sa mhux aktar tard mill-2050 u l-għan li jinkisbu emissjonijiet negattivi minn wara dik id-data kif stabbilit fl-Artikolu 2(1) tar-Regolament (UE) 2021/1119 tal-Parlament Ewropew u tal-Kunsill (4). Dan jikkombina sett komprensiv ta' miżuri u inizjattivi ta' tisħiħ reċiproku bil-għan li tinkiseb in-newtralità klimatika fl-Unjoni sal-2050, u jistabbilixxi strateġija ġdida ta' tkabbir li għandha l-għan li tittrasforma l-Unjoni f'soċjetà ġusta u prospera, b'ekonomija moderna, effiċjenti fl-użu tar-riżorsi u kompetittiva fejn it-tkabbir ekonomiku jkun diżakkoppjat mill-użu tar-riżorsi. Għandu wkoll l-għan li jipproteġi, jippreserva u jsaħħaħ il-kapital naturali tal-Unjoni, u jipproteġi s-saħħa u l-benesseri taċ-ċittadini mir-riskji u l-impatti relatati mal-ambjent. Fl-istess ħin, dik it-tranżizzjoni għandha aspetti ta' ugwaljanza bejn il-ġeneri kif ukoll impatti partikolari fuq xi gruppi żvantaġġati u vulnerabbli, bħall-persuni akbar fl-età, il-persuni b'diżabilità, il-persuni bi sfond razzjali jew etniku minoritarju. Għalhekk irid jiġi żgurat li t-tranżizzjoni tkun ġusta u inklużiva, u ma tħalli lil ħadd jibqa' lura.

(4)

L-indirizzar tal-isfidi relatati mal-klima u mal-ambjent u l-ilħuq tal-objettivi tal-Ftehim ta' Pariġi huma fil-qalba tal-Patt Ekoloġiku Ewropew. Fir-riżoluzzjoni tiegħu tal-15 ta' Jannar 2020 dwar il-Patt Ekoloġiku Ewropew (5), il-Parlament Ewropew appella għat-tranżizzjoni meħtieġa għal soċjetà newtrali għall-klima sa mhux aktar tard mill-2050 u, fir-riżoluzzjoni tiegħu tat-28 ta' Novembru 2019 dwar l-emerġenza klimatika u ambjentali, iddikjara emerġenza klimatika u ambjentali (6). Il-ħtieġa u l-valur tal-Patt Ekoloġiku Ewropew kibru biss fid-dawl tal-effetti severi ħafna tal-pandemija tal-COVID-19 fuq is-saħħa u l-benesseri ekonomiku taċ-ċittadini tal-Unjoni.

(5)

Huwa importanti li jiġi żgurat li l-miżuri meħuda biex jintlaħqu l-objettivi ta' dan ir-Regolament jiġu segwiti f'konformità mal-objettiv tal-promozzjoni tal-iżvilupp sostenibbli kif stabbilit fl-Artikolu 3 tat-Trattat dwar l-Unjoni Ewropea (TUE), filwaqt li jitqiesu l-Għanijiet ta' Żvilupp Sostenibbli tan-NU, il-Ftehim ta' Pariġi u l-prinċipju "la tagħmilx ħsara sinifikanti", fejn rilevanti, skont it-tifsira tal-Artikolu 17 tar-Regolament (UE) 2020/852 tal-Parlament Ewropew u tal-Kunsill (7).

(6)

L-Unjoni impenjat ruħha li sal-2030 tnaqqas l-emissjonijiet netti ta' gassijiet serra fl-ekonomija kollha tal-Unjoni b'mill-inqas 55 % meta mqabbel mal-livelli tal-1990 fil-kontribut aġġornat iddeterminat fil-livell nazzjonali ppreżentat lis-Segretarjat tal-UNFCCC fis-17 ta' Diċembru 2020.

(7)

Permezz tal-adozzjoni tar-Regolament (UE) 2021/1119, l-Unjoni naqqxet l-objettiv li jintlaħaq bilanċ bejn l-emissjonijiet antropoġeniċi fl-ekonomija kollha minn fonti u l-assorbiment minn bjar ta' gassijiet serra domestikament fl-Unjoni sal-2050 u, kif xieraq, li jinkisbu emissjonijiet negattivi minn hemm 'il quddiem fil-leġiżlazzjoni. Dak ir-Regolament jistabbilixxi wkoll mira vinkolanti tal-Unjoni għat-tnaqqis domestiku tal-emissjonijiet netti ta' gassijiet serra (emissjonijiet wara t-tnaqqis tal-assorbimenti) b'mill-inqas 55 % meta mqabbel mal-livelli tal-1990 sal-2030. Is-setturi kollha tal-ekonomija huma mistennija jikkontribwixxu għall-ilħuq ta' dik il-mira, inkluż is-settur tal-użu tal-art, tat-tibdil fl-użu tal-art u tal-forestrija ("LULUCF"). Sabiex jiġi żgurat li jitwettqu sforzi ta' mitigazzjoni suffiċjenti f'setturi oħra sal-2030, il-kontribut tal-assorbimenti netti għall-mira klimatika tal-Unjoni għall-2030 huwa limitat għal 225 miljun tunnellata ta' ekwivalenti ta' CO2. Fil-kuntest tar-Regolament (UE) 2021/1119, il-Kummissjoni affermat mill-ġdid f'dikjarazzjoni korrispondenti l-intenzjoni tagħha li tipproponi reviżjoni tar-Regolament (UE) 2018/841 tal-Parlament Ewropew u tal-Kunsill (8), f'konformità mal-ambizzjoni li sal-2030, l-assorbimenti netti tal-karbonju jiżdiedu għal livelli ogħla minn 300 miljun tunnellata ta' ekwivalenti ta' CO2 fis-settur tal-LULUCF.

(8)

Sabiex jikkontribwixxu għaż-żieda fl-ambizzjoni li jitnaqqsu l-emissjonijiet netti ta' gassijiet serra minn b'mill-inqas 40 % għal b'mill-inqas 55 % meta mqabbel mal-livelli tal-1990, u biex jiġi żgurat li s-settur tal-LULUCF jagħti kontribut fit-tul sostenibbli u prevedibbli għall-objettiv tan-newtralità klimatika tal-Unjoni, jenħtieġ li jiġu stabbiliti miri vinkolanti għall-assorbimenti netti ta' gassijiet serra għal kull Stat Membru fis-settur tal-LULUCF fil-perjodu mill-2026 sal-2030, li jirriżultaw f'mira ta' assorbimenti netti ta' 310 miljun tunnellata ta' ekwivalenti ta' CO2 għall-Unjoni kollha kemm hi fl-2030. Il-metodoloġija użata biex jiġu stabbiliti l-miri nazzjonali għall-2030 jenħtieġ li tqis id-distakk bejn il-mira tal-Unjoni u l-emissjonijiet u l-assorbimenti medji ta' gassijiet serra mis-snin 2016, 2017 u 2018, irrapportati minn kull Stat Membru fil-preżentazzjoni tal-2020 tiegħu, u tirrifletti l-prestazzjoni tal-mitigazzjoni attwali tas-settur tal-LULUCF, u s-sehem ta' kull Stat Membru miż-żona tal-art ġestita fl-Unjoni, filwaqt li tqis il-kapaċità ta' dak l-Istat Membru li jtejjeb il-prestazzjoni tiegħu fis-settur permezz ta' prattiki tal-ġestjoni tal-art jew bidliet fl-użu tal-art li jkunu ta' benefiċċju għall-klima u l-bijodiversità. Jekk l-Istati Membri jkollhom prestazzjoni superjuri għall-miri dan ikompli jikkontribwixxi biex jintlaħqu l-objettivi klimatiċi tal-Unjoni.

(9)

Il-miri vinkolanti għall-ambizzjoni miżjuda ta' emissjonijiet u assorbimenti netti ta' gassijiet serra jenħtieġ li jiġu ddeterminati għal kull Stat Membru permezz ta' trajettorja lineari. It-trajettorja jenħtieġ li tibda fl-2022 fil-medja tal-emissjonijiet ta' gassijiet serra rrapportati minn dak l-Istat Membru matul l-2021, l-2022 u l-2023, u tintemm fl-2030 fuq il-mira stabbilita għal dak l-Istat Membru. Sabiex tiġi żgurata l-kisba kollettiva tal-mira tal-Unjoni għall-2030 filwaqt li titqies il-varjabbiltà interannwali tal-emissjonijiet u tal-assorbimenti ta' gassijiet serra fis-settur tal-LULUCF, huwa xieraq li għal kull Stat Membru jiġi stabbilit impenn li jikseb somma ta' emissjonijiet u assorbimenti netti ta' gassijiet serra għall-perjodu mill-2026 sal-2029 (il-"baġit għall-perjodu mill-2026 sal-2029") b'żieda mal-mira nazzjonali għas-sena 2030.

(10)

Ir-regoli kontabilistiċi stabbiliti fl-Artikoli 6, 7, 8 u 10 tar-Regolament (UE) 2018/841 tfasslu biex jiddeterminaw sa liema punt il-prestazzjoni tal-mitigazzjoni fis-settur tal-LULUCF tista' tikkontribwixxi għall-mira tal-Unjoni għall-2030 ta' tnaqqis fl-emissjonijiet netti ta' gassijiet serra b'40 %, li ma kinitx tinkludi s-settur tal-LULUCF. Sabiex jiġi ssimplifikat il-qafas regolatorju għal dak is-settur, ir-regoli kontabilistiċi attwali jenħtieġ li ma japplikawx wara l-2025, u l-konformità mal-miri nazzjonali tal-Istati Membri jenħtieġ li tiġi vverifikata abbażi tal-emissjonijiet u tal-assorbimenti ta' gassijiet serra rrapportati. Dan jipprovdi konsistenza metodoloġika mad-Direttiva 2003/87/KE tal-Parlament Ewropew u tal-Kunsill (9), u mar-Regolament (UE) 2018/842 tal-Parlament Ewropew u tal-Kunsill (10), u mal-mira l-ġdida għat-tnaqqis fl-emissjonijiet netti ta' gassijiet serra b'mill-inqas 55 %, li tinkludi s-settur tal-LULUCF.

(11)

Fis-16 ta' Ġunju 2022, il-Kunsill adotta Rakkomandazzjoni dwar l-iżgurar ta' tranżizzjoni ġusta lejn in-newtralità klimatika (11), fejn enfasizza l-ħtieġa ta' miżuri ta' akkumpanjament u l-ħtieġa li tingħata attenzjoni partikolari biex jiġu appoġġjati dawk ir-reġjuni, l-industriji, l-intrapriżi mikro, żgħar u ta' daqs medju, il-ħaddiema, l-unitajiet domestiċi u l-konsumaturi li se jiffaċċjaw l-akbar sfidi. Dik ir-Rakkomandazzjoni tħeġġeġ lill-Istati Membri jqisu sett ta' miżuri fl-oqsma tat-tranżizzjonijiet tal-impjiegi u tas-suq tax-xogħol, il-ħolqien tal-impjiegi u l-intraprenditorija, is-saħħa u s-sikurezza fuq il-post tax-xogħol, l-akkwist pubbliku, it-tassazzjoni u s-sistemi ta' protezzjoni soċjali, is-servizzi essenzjali u l-akkomodazzjoni, kif ukoll, fost l-oħrajn, bil-ħsieb li jsaħħu l-ugwaljanza bejn il-ġeneri, l-edukazzjoni u t-taħriġ.

(12)

Meta wieħed iqis l-ispeċifiċitajiet tas-settur tal-LULUCF f'kull Stat Membru, kif ukoll il-fatt li l-Istati Membri jridu jżidu l-prestazzjoni tagħhom biex jilħqu l-miri vinkolanti nazzjonali tagħhom, jenħtieġ li tibqa' għad-dispożizzjoni tal-Istati Membri firxa ta' flessibbiltajiet, inkluż l-iskambjar tas-surpluses u l-estensjoni ta' flessibbiltajiet speċifiċi għall-foresti, filwaqt li tiġi rrispettata l-integrità ambjentali tal-miri.

(13)

Dispożizzjonijiet alternattivi għad-disturbi naturali (abijotiċi u bijotiċi) bħan-nirien, it-tifqiegħ ta’ pesti, il-maltempati u l-avvenimenti estremi, sabiex jiġu indirizzati l-inċertezzi minħabba l-proċessi naturali fis-settur tal-LULUCF, jenħtieġ li jkunu disponibbli fl-2032 għall-Istati Membri li jkunu għamlu l-almu tagħhom biex iqisu kwalunkwe opinjoni tal-Kummissjoni indirizzata lilhom fil-kuntest ta' azzjoni korrettiva introdotta permezz ta' dan ir-Regolament emendatorju, dment li dawn ikunu eżawrew il-flessibbiltajiet l-oħrajn kollha għad-dispożizzjoni tagħhom u stabbilew miżuri xierqa biex inaqqsu l-vulnerabbiltà tal-art tagħhom għal tali disturbi, u li l-mira tal-Unjoni għall-2030 għas-settur tal-LULUCF tkun intlaħqet.

(14)

Barra minn hekk, jenħtieġ li jitqiesu l-effetti diffużi u fit-tul tat-tibdil fil-klima, b'kuntrast mad-disturbi naturali li huma, essenzjalment, aktar temporanji u ġeografikament lokalizzati. Jenħtieġ li dan jippermetti wkoll li jitqiesu l-effetti ta' legat ta' miżuri ta' ġestjoni tal-passat marbuta ma' proporzjon ta' ħamrija organika fuq art ġestita li hija eċċezzjonalment għolja meta mqabbla mal-medja tal-Unjoni fi ftit Stati Membri. L-ammonti ta' kumpens mhux użati disponibbli skont l-Anness VII tul il-perjodu mill-2021 sal-2030 jenħtieġ li jkunu disponibbli għal dak l-iskop, abbażi tal-preżentazzjoni ta' evidenza lill-Kummissjoni mill-Istati Membri kkonċernati abbażi tal-aħjar għarfien xjentifiku disponibbli u ta' indikaturi oġġettivi, li jistgħu jitkejlu u komparabbli bħall-indiċi tal-aridità, fis-sens tal-Konvenzjoni tan-Nazzjonijiet Uniti għall-ġlieda kontra d-deżertifikazzjoni f'dawk il-pajjiżi li qed jesperjenzaw nixfa serja u/jew deżertifikazzjoni, b'mod partikolari fl-Afrika (12), definiti bħala l-proporzjon bejn il-preċipitazzjoni annwali medja u l-evapotraspirazzjoni annwali medja. Jenħtieġ li l-allokazzjoni fost l-Istati Membri ssir, fid-dawl tal-evidenza ppreżentata, abbażi tal-proporzjon bejn l-ammont ta' 50 Mt ta' ekwivalenti ta' CO2 disponibbli u l-ammont totali ta' kumpens mitlub minn dawk l-Istati Membri.

(15)

Sabiex jiġu żgurati kundizzjonijiet uniformi għall-implimentazzjoni tad-dispożizzjonijiet tar-Regolament (UE) 2018/841 fir-rigward tal-istabbiliment tal-emissjonijiet u l-assorbimenti annwali ta' gassijiet serra għal kull sena fil-perjodu mill-2026 sal-2029 stabbiliti abbażi ta' trajettorja lineari li tintemm fil-mira għall-2030 għall-Istati Membri, u jiġu adottati regoli dettaljati dwar il-metodoloġija għall-evidenza dwar l-impatti fit-tul tat-tibdil fil-klima li mhumiex fil-kontroll tal-Istati Membri u li jikkonċernaw l-effetti ta' proporzjon eċċezzjonalment għoli ta' ħamrija organika, jenħtieġ li l-Kummissjoni tingħata setgħat ta' implimentazzjoni. Jenħtieġ li dawk is-setgħat ikunu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (13).

(16)

Jenħtieġ li r-regoli għall-governanza jiġu stabbiliti b'mod li jippromwovi azzjoni bikrija favur il-kisba tal-mira klimatika intermedja tal-Unjoni għall-2030 u l-objettiv tan-newtralità klimatika fl-ekonomija kollha tal-Unjoni, filwaqt li tiġi segwita t-trajettorja għas-snin mill-2026 sal-2029 introdotta permezz ta' dan ir-Regolament emendatorju. Il-prinċipji stabbiliti fir-Regolament (UE) 2018/842 jenħtieġ li japplikaw mutatis mutandis, b'multiplikatur ikkalkolat bil-mod li ġej: 108 % tad-distakk bejn il-baġit ta' Stat Membru għall-perjodu mill-2026 sal-2029 u l-assorbimenti netti korrispondenti rrapportati se jiżdiedu maċ-ċifra rrapportata għall-2030 minn dak l-Istat Membru. Barra minn hekk, jenħtieġ li jitqies kwalunkwe defiċit akkumulat sal-2030 minn kull Stat Membru meta l-Kummissjoni tippreżenta proposti dwar il-perjodu ta' wara l-2030.

(17)

L-Unjoni u l-Istati Membri tagħha huma partijiet għall-Konvenzjoni tal-Kummissjoni Ekonomika għall-Ewropa tan-Nazzjonijiet Uniti dwar l-aċċess għall-informazzjoni, il-parteċipazzjoni tal-pubbliku fit-teħid ta' deċiżjonijiet u l-aċċess għall-ġustizzja fi kwistjonijiet ambjentali (14) ("il-Konvenzjoni ta' Aarhus"). L-iskrutinju pubbliku u l-aċċess għall-ġustizzja huma elementi essenzjali tal-valuri demokratiċi tal-Unjoni u għodda biex jiġi ssalvagwardjat l-istat tad-dritt.

(18)

Sabiex tkun tista' tittieħed azzjoni rapida u effettiva, meta l-Kummissjoni ssib li Stat Membru ma jkunx qed jagħmel biżżejjed progress lejn il-mira tiegħu għall-2030, filwaqt li jitqiesu t-trajettorja, il-baġit għall-perjodu mill-2026 sal-2029 u l-flessibbiltajiet skont dan ir-Regolament, jenħtieġ li japplika mekkaniżmu ta' azzjoni korrettiva biex jgħin lil dak l-Istat Membru jerġa' lura għat-trajettorja lejn l-2030, billi jiżgura li jittieħdu azzjonijiet addizzjonali, li jwasslu għal assorbimenti netti mtejba ta' gassijiet serra.

(19)

L-inventarji tal-gassijiet serra se jitjiebu b'aktar użu ta' teknoloġija ta' monitoraġġ u għarfien aħjar. Għall-Istati Membri li jtejbu l-metodoloġija tagħhom għall-kalkolu tal-emissjonijiet u tal-assorbimenti, jenħtieġ li jiġi introdott kunċett ta' aġġustament metodoloġiku. Il-kwistjonijiet li ġejjin, pereżempju, jistgħu jwasslu għal aġġustament metodoloġiku: bidliet fil-metodoloġiji ta' rapportar, data ġdida jew korrezzjonijiet ta' żbalji statistiċi, inklużjoni ta' gassijiet jew raggruppamenti ġodda tal-karbonju, kalkolu mill-ġdid ta' stimi storiċi abbażi ta' evidenza xjentifika ġdida, skont il-Linji Gwida għall-Inventarji Nazzjonali tal-Gassijiet Serra tal-IPCC tal-2006, l-inklużjoni ta' elementi ġodda ta' rapportar u monitoraġġ imtejjeb tad-disturbi naturali. Jenħtieġ li jiġi applikat aġġustament metodoloġiku għad-data tal-inventarju tal-emissjonijiet ta' gassijiet serra ta' dak l-Istat Membru sabiex jinnewtralizza l-effett tal-bidliet fil-metodoloġija fuq il-valutazzjoni tal-kisba kollettiva tal-mira tal-Unjoni għall-2030, sabiex tiġi titħares l-integrità ambjentali.

(20)

Fl-Ewropa, l-Inventarji Nazzjonali tal-Foresti jintużaw biex jipprovdu informazzjoni għall-valutazzjonijiet tas-servizzi tal-ekosistema tal-foresti. Is-sistema ta' monitoraġġ tal-inventarji tal-foresti tvarja minn pajjiż għall-ieħor, peress li kull pajjiż għandu s-sistema ta' inventarju tal-foresti tiegħu bil-metodoloġija tiegħu. L-istrateġija l-Ġdida tal-UE għall-Foresti għall-2030 enfasizzat il-ħtieġa ta' ppjanar strateġiku tal-foresti fl-Istati Membri kollha, abbażi ta' monitoraġġ u data affidabbli, governanza trasparenti u skambju kkoordinat fil-livell tal-Unjoni. Għal dak il-għan, il-Kummissjoni ħabbret li biħsiebha tippreżenta proposta leġiżlattiva biex tistabbilixxi qafas integrat ta' monitoraġġ tal-foresti fl-Unjoni kollha.

(21)

Sabiex jiġu emendati u ssupplimentati l-elementi mhux essenzjali tar-Regolamenti (UE) 2018/841 u (UE) 2018/1999, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tas-supplimentar tar-Regolament (UE) 2018/841 sabiex jiġu stabbiliti r-regoli għar-reġistrazzjoni u t-twettiq preċiż ta' operazzjonijiet fir-Reġistru tal-Unjoni stabbilit skont l-Artikolu 40 tar-Regolament (UE) 2018/1999 u fir-rigward tal-emendar tal-Parti 3 tal-Anness V tar-Regolament (UE) 2018/1999 billi tiġi aġġornata l-lista ta' kategoriji f'konformità mal-leġiżlazzjoni rilevanti tal-Unjoni. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (15). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(22)

Il-komunikazzjoni tal-Kummissjoni tas-17 ta' Settembru 2020 dwar It-tisħiħ tal-ambizzjoni klimatika tal-Ewropa għall-2030 iddeskriviet perkorsi u għażliet ta' politika differenti biex tintlaħaq il-mira klimatika miżjuda tal-Unjoni għall-2030. Din saħqet li l-kisba tan-newtralità klimatika se tirrikjedi li l-azzjoni tal-Unjoni tiżdied b'mod sinifikanti fis-setturi kollha tal-ekonomija. Il-bjar tal-karbonju għandhom rwol essenzjali fit-tranżizzjoni lejn in-newtralità klimatika fl-Unjoni, u b'mod partikolari, is-setturi tal-agrikoltura, tal-forestrija u tal-użu tal-art jistgħu jagħtu kontribut importanti f'dak il-kuntest. Meta l-Kummissjoni twettaq valutazzjoni tal-operat tar-Regolament (UE) 2018/841 bħala parti mir-rieżami introdott b'dan ir-Regolament emendatorju, u tħejji rapport għall-Parlament Ewropew u għall-Kunsill, jenħtieġ li tinkludi x-xejriet attwali u l-projezzjonijiet futuri tal-emissjonijiet ta' gassijiet serra mill-agrikoltura, minn naħa waħda, u tal-emissjonijiet u tal-assorbimenti ta' gassijiet serra mir-raba', mill-bwar u mill-artijiet mistagħdra, min-naħa l-oħra, u tesplora għażliet regolatorji biex tiżgura li jkunu konsistenti mal-objettiv li jinkiseb tnaqqis fit-tul tal-emissjonijiet ta' gassijiet serra fis-setturi kollha tal-ekonomija f'konformità mal-objettiv ta' newtralità klimatika tal-Unjoni u l-miri klimatiċi intermedji. Barra minn hekk, jenħtieġ li l-Kummissjoni tagħti attenzjoni speċifika lill-effetti tal-istruttura tal-età tal-foresti, inkluż meta dawk l-effetti jkunu marbuta ma' ċirkostanzi speċifiċi ta' żmien il-gwerra jew ta' wara l-gwerra, b'mod xjentifikament robust, affidabbli u trasparenti, u bil-ħsieb li jiġu żgurati r-reżiljenza fit-tul u l-kapaċità ta' adattament tal-foresti.

Filwaqt li jitqiesu l-importanza li kull settur jagħti kontribut ġust u l-fatt li t-tranżizzjoni lejn in-newtralità klimatika tirrikjedi bidliet fl-ispettru kollu tal-politika u sforz kollettiv tas-setturi kollha tal-ekonomija u tas-soċjetà, kif enfasizzat fil-Patt Ekoloġiku Ewropew, jenħtieġ li l-Kummissjoni tippreżenta proposti leġiżlattivi, fejn xieraq, li jistabbilixxu l-qafas għal wara l-2030.

(23)

Il-bidliet antropoġeniċi mistennija rigward l-emissjonijiet u l-assorbimenti ta' gassijiet serra fl-ambjenti tal-baħar u tal-ilma ħelu jistgħu jkunu sinifikanti, u huma mistennija li jvarjaw fil-futur b'riżultat tal-bidliet fl-użu permezz ta', pereżempju, l-espansjoni ppjanata tal-enerġija offshore, iż-żieda potenzjali fil-produzzjoni tal-akkwakultura u l-livelli dejjem jiżdiedu ta' protezzjoni tan-natura meħtieġa biex jintlaħqu l-miri tal-Istrateġija tal-UE għall-Bijodiversità għall-2030. Bħalissa, dawk l-emissjonijiet u l-assorbimenti ma humiex inklużi fit-tabelli ta' rapportar standard lill-UNFCCC. Sussegwentement għall-adozzjoni tal-metodoloġija ta' rapportar, jenħtieġ li l-Kummissjoni tkun tista’ tqis ir-rapportar dwar il-progress, il-fattibbiltà tal-analiżi u l-impatt tal-estensjoni tar-rapportar għall-ambjenti tal-baħar u tal-ilma ħelu abbażi tal-aħħar evidenza xjentifika ta' dawk il-flussi meta twettaq ir-rieżami introdott b'dan ir-Regolament emendatorju.

(24)

Sabiex tintlaħaq il-mira ta' newtralità klimatika sal-2050 u bil-għan li jinkisbu emissjonijiet negattivi minn hemm 'il quddiem, huwa ta' importanza assoluta li l-assorbimenti tal-gassijiet serra fl-Unjoni jiżdiedu kontinwament, filwaqt li jiġi żgurat li tinżamm il-permanenza tagħhom. Jistgħu jkunu meħtieġa, meta jkun xieraq, soluzzjonijiet tekniċi, bħall-bijoenerġija bil-qbid u l-ħżin tal-karbonju ("BECCS"), kif ukoll soluzzjonijiet ibbażati fuq in-natura għall-qbid u l-ħżin tal-emissjonijiet tas-CO2. B'mod partikolari, il-bdiewa individwali, is-sidien tal-art u tal-foresti jew dawk responsabbli mill-ġestjoni tal-foresti jenħtieġ li jiġu mħeġġa jaħżnu aktar karbonju fuq l-art tagħhom u fil-foresti tagħhom, filwaqt li jagħtu prijorità lill-approċċi bbażati fuq l-ekosistema u l-prattiki li ma jagħmlux ħsara lill-bijodiversità, bħalma huma l-prattiki ta' forestrija qrib in-natura, iż-żoni ta' serħan tal-art, ir-restawr tal-ħażniet tal-karbonju tal-foresti, l-espansjoni tal-kopertura tal-agroforestrija, is-sekwestru tal-karbonju fil-ħamrija u r-restawr tal-artijiet mistagħdra kif ukoll soluzzjonijiet innovattivi oħra. Tali inċentivi jtejbu l-mitigazzjoni tat-tibdil fil-klima u t-tnaqqis tal-emissjonijiet b'mod ġenerali mis-setturi kollha fil-bijoekonomija, inkluż permezz tal-użu ta' prodotti durabbli tal-injam maħsud, b'rispett sħiħ tal-prinċipji ekoloġiċi li jrawmu l-bijodiversità u l-ekonomija ċirkolari. Jenħtieġ li jkun possibbli li jitqies l-istabbiliment ta' proċess għall-inklużjoni ta' prodotti għall-ħżin sostenibbli tal-karbonju fil-kamp ta' applikazzjoni tar-Regolament (UE) 2018/841 fir-rieżami introdott b'dan ir-Regolament emendatorju, li jipprevedi konsistenza ma' objettivi ambjentali oħra tal-Unjoni, kif ukoll mal-Linji Gwida tal-IPCC.

(25)

Minħabba l-importanza li jingħata appoġġ finanzjarju lis-sidien jew lill-dawk responsabbli mill-ġestjoni tal-art u tal-foresti biex jintlaħqu l-miri stabbiliti f'dan ir-Regolament emendatorju, jenħtieġ li l-Kummissjoni, meta tivvaluta l-abbozzi tal-aġġornamenti tal-aħħar pjanijiet nazzjonali integrati għall-enerġija u l-klima notifikati skont ir-Regolament (UE) 2018/1999, tiżgura li l-appoġġ finanzjarju, inkluż is-sehem rilevanti tad-dħul iġġenerat mill-irkant tal-kwoti tal-EU ETS skont id-Direttiva 2003/87/KE li jintużaw għas-settur tal-LULUCF, ikun dirett lejn politiki u miżuri mfassla apposta biex jinkisbu l-baġits u l-miri tal-Istati Membri stabbiliti f'dan ir-Regolament emendatorju. Fil-valutazzjoni tagħha, il-Kummissjoni jenħtieġ li tagħti attenzjoni partikolari lill-promozzjoni ta' approċċi bbażati fuq l-ekosistema u l-ħtieġa li tiġi żgurata l-permanenza ta' assorbimenti addizzjonali ta' gassijiet serra, filwaqt li titqies il-leġiżlazzjoni eżistenti.

(26)

L-iffissar tal-mira tal-Unjoni għall-2030 tiġi bbażata fuq id-data tal-inventarju rrapportata mill-Istati Membri għas-snin 2016, 2017 u 2018. Ir-robustezza tar-rapporti tal-inventarju ppreżentati hija ta' importanza kbira. Għalhekk, il-metodoloġiji applikati mill-Istati Membri jenħtieġ li jiġu vverifikati meta l-assorbimenti netti jkunu naqsu b'mod sinifikanti għas-snin 2016, 2017 u 2018. F'konformità mal-prinċipju ta' trasparenza u biex tissaħħaħ il-fiduċja fil-progress miksub fir-rapportar, ir-riżultati ta' dawk il-verifiki jenħtieġ li jkunu disponibbli għall-pubbliku. Abbażi ta' dawk il-verifiki, jenħtieġ li l-Kummissjoni, meta jkun xieraq, tagħmel proposti biex tiżgura li l-Unjoni tibqa' fit-triq it-tajba biex tilħaq il-mira tagħha ta' tneħħija netta ta' 310 Mt

(27)

Bil-għan li tiġi stabbilita t-trajettorja għall-Istati Membri għall-perjodu mill-2026 sal-2029, il-Kummissjoni jenħtieġ li twettaq rieżami komprensiv biex tivverifika d-data tal-inventarju tal-gassijiet serra għas-snin 2021, 2022 u 2023. Għal dak il-fini, jenħtieġ li jsir rieżami komprensiv fl-2025, minbarra r-rieżamijiet komprensivi li l-Kummissjoni għandha twettaq fl-2027 u fl-2032 f'konformità mal-Artikolu 38 tar-Regolament (UE) 2018/1999.

(28)

Il-valuri għal kull Stat Membru għall-kopertura tal-qċaċet tas-siġar fl-Anness II tar-Regolament (UE) 2018/841 jenħtieġ li jiġu allinjati mal-valuri rrapportati lill-UNFCCC jew mal-aġġornamenti prevedibbli ta' dawk il-valuri.

(29)

Minħabba l-introduzzjoni ta' miri bbażati fuq ir-rapportar b'riżultat ta' dan ir-Regolament emendatorju, l-emissjonijiet u l-assorbimenti ta' gassijiet serra jridu jiġu stmati b'livell ogħla ta' akkuratezza. Barra minn hekk, l-Istrateġija tal-UE għall-Bijodiversità għall-2030, il-komunikazzjoni tal-Kummissjoni tal-20 ta' Mejju 2020 dwar Strateġija mill-Għalqa sal-Platt għal sistema tal-ikel ġusta, tajba għas-saħħa u favur l-ambjent, l-Istrateġija l-ġdida tal-UE għall-Foresti għall-2030, l-Istrateġija tal-UE dwar il-Ħamrija għall-2030, il-komunikazzjoni tal-Kummissjoni tal-15 ta' Diċembru 2021 dwar Ċikli tal-Karbonju Sostenibbli, id-Direttiva (UE) 2018/2001 tal-Parlament Ewropew u tal-Kunsill (16) u l-komunikazzjoni tal-Kummissjoni tal-24 ta' Frar 2021 dwar Insawru Ewropa reżiljenti għall-klima – l-Istrateġija l-ġdida tal-UE dwar l-Adattament għat-Tibdil fil-Klima kollha se jirrikjedu monitoraġġ imtejjeb tal-art, u b'hekk titħares u tittejjeb ir-reżiljenza tal-assorbimenti tal-karbonju bbażati fuq in-natura madwar l-Unjoni. Il-monitoraġġ u r-rapportar tal-emissjonijiet u tal-assorbimenti jeħtieġ li jittejbu, fejn applikabbli, bl-użu ta' teknoloġiji avvanzati disponibbli taħt il-programmi tal-Unjoni, bħal Copernicus, u ta' data diġitali miġbura taħt il-Politika Agrikola Komuni, u bl-applikazzjoni tat-tranżizzjoni doppja tal-innovazzjoni ekoloġika u diġitali.

(30)

Jenħtieġ li jiġu introdotti dispożizzjonijiet relatati mal-immappjar u l-monitoraġġ, kemm fil-post kif ukoll monitoraġġ permezz ta' detezzjoni mill-bogħod, sabiex l-Istati Membri jkun jista' jkollhom informazzjoni ġeografikament espliċita biex jidentifikaw oqsma ta' prijorità li jkollhom il-potenzjal li jikkontribwixxu għall-azzjoni klimatika. Bħala parti mit-titjib ġenerali tal-monitoraġġ, ir-rapportar u l-verifika, il-ħidma jenħtieġ li tiffoka wkoll fuq l-armonizzazzjoni u l-irfinar ta' bażijiet ta' data ta' fatturi ta' attività u emissjonijiet biex jiġu mtejba l-inventarji tal-gassijiet serra.

(31)

Minħabba li l-objettivi ta' dan ir-Regolament, b'mod partikolari li jiġu aġġustati, fid-dawl tar-Regolament (UE) 2021/1119, l-impenji tal-Istati Membri għas-settur tal-LULUCF li jikkontribwixxu għall-kisba tal-objettivi tal-Ftehim ta' Pariġi u għall-ilħuq tal-mira ta' tnaqqis tal-emissjonijiet ta' gassijiet serra tal-Unjoni għall-perjodu mill-2021 sal-2030, ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-iskala jew l-effetti tagħhom, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta' sussidjarjetà kif stabbilit fl-Artikolu 5 tat-TUE. F'konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa neċessarju sabiex jinkisbu dawk l-objettivi.

(32)

Għalhekk, ir-Regolamenti (UE) 2018/841 u (UE) 2018/1999 jenħtieġ li jiġu emendati konsegwentement,