(1)

Ir-Regolament (UE) 2015/2283 jipprevedi li l-ikel ġdid awtorizzat u inkluż fil-lista tal-Unjoni biss jista’ jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ġie adottat ir-Regolament ta’ Implimentazzjoni tal-Kummissjoni (UE) 2017/2470 (2) li jistabbilixxi lista tal-Unjoni ta’ ikel ġdid awtorizzat.

(3)

Skont l-Artikolu 12 tar-Regolament (UE) 2015/2283, il-Kummissjoni trid tissottometti abbozz ta’ att ta’ implimentazzjoni li jawtorizza t-tqegħid fis-suq tal-Unjoni ta’ ikel ġdid u li jaġġorna l-lista tal-Unjoni.

(4)

Ir-Regolament ta’ Implimentazzjoni tal-Kummissjoni (UE) 2018/1648 (3) awtorizza t-tqegħid fis-suq tal-Unjoni ta’ ksilo-oligosakkaridi bħala ikel ġdid skont ir-Regolament (UE) 2015/2283, biex jintuża f’għadd ta’ kategoriji tal-ikel, jiġifieri ħobż, ċereali tal-kolazzjon, gallettini, xarbiet tas-sojja, jogurt, spreads tal-frott u ħlewwiet taċ-ċikkulata għall-popolazzjoni ġenerali.

(5)

Fil-25 ta’ Novembru 2019, il-kumpanija Shandong Longlive Biotechnology Co. Ltd ippreżentat applikazzjoni quddiem il-Kummissjoni biex jinbidlu l-kundizzjonijiet tal-użu tal-ksilo-oligosakkaridi, skont l-Artikolu 10(1) tar-Regolament (UE) 2015/2283. L-applikazzjoni talbet li jiġi estiż l-użu tal-ksilo-oligosakkaridi fis-supplimenti tal-ikel kif definit fid-Direttiva 2002/46/KE tal-Parlament Ewropew u tal-Kunsill (4) maħsuba għall-popolazzjoni adulta ġenerali fil-livelli massimi tal-użu ta’ 2 g kuljum.

(6)

Il-Kummissjoni tqis li mhijiex meħtieġa evalwazzjoni tas-sikurezza tal-applikazzjoni attwali mill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 10(3) tar-Regolament (UE) 2015/2283, peress li l-estensjoni proposta tal-użu tal-ksilo-oligosakkaridi hija koperta mill-valutazzjoni tas-sikurezza mwettqa mill-Awtorità (5) li fuqha huma bbażati l-awtorizzazzjonijiet tal-ksilo-oligosakkaridi permezz tar-Regolament ta’ Implimentazzjoni (UE) 2018/1648.

(7)

F’dik l-opinjoni, l-Awtorità wettqet valutazzjoni konservattiva tal-esponiment, bl-użu tal-ogħla konsum antiċipat ta’ kuljum abbażi tas-suppożizzjoni li persuna tikkonsma l-prodotti tal-ikel kollha proposti li jkun fihom l-ammont massimu miżjud tal-ksilo-oligosakkaridi. Abbażi ta’ din il-valutazzjoni tal-esponiment, l-Awtorità kkonkludiet li l-għola konsum ta’ kuljum antiċipat ta’ 7,7 g ta’ ksilo-oligosakkaridi kuljum għadu sew taħt kemm il-livelli ta’ konsum ta’ kuljum ta’ bejn 10 u 12-il gramma ta’ ksilo-oligosakkaridi li kienu assoċjati ma’ effetti gastrointestinali akuti u temporanji fl-istudji kliniċi ta’ intervent fil-bniedem, kif ukoll taħt il-Valur ta’ Referenza Dijetetiku (“DRV”) ta’ 25 g ta’ fibra kuljum tal-popolazzjoni adulta ġenerali li ġiet stabbilita qabel mill-Awtorità (6).

(8)

Il-konsum mill-estensjoni proposta tal-użu tal-ksilo-oligosakkaridi fis-supplimenti tal-ikel f’livelli ta’ 2 g kuljum, ikkombinat mal-ogħla konsum ta’ 7,7 g ta’ ksilo-oligosakkaridi mill-użu awtorizzat attwali tiegħu bħala ikel ġdid, jista’ jirriżulta f’doża massima totali ta’ 9,7 g ta’ ksilo-oligosakkaridi kuljum. Dan il-livell totali ta’ konsum se jkun ukoll kemm taħt il-livelli ta’ konsum ta’ 10-12 g ta’ ksilo-oligosakkaridi li kienu assoċjati ma’ effetti gastrointestinali akuti u temporanji fl-istudji kliniċi ta’ intervent fil-bniedem, kif ukoll taħt il-Valur ta’ Referenza Dijetetiku (“DRV”) ta’ 25 g fibra kuljum għall-popolazzjoni adulta ġenerali stabbilita mill-Awtorità.

(9)

L-informazzjoni pprovduta fl-applikazzjoni u l-opinjoni xjentifika tal-Awtorità flimkien mal-kunsiderazzjonijiet ta’ hawn fuq jagħtu raġunijiet suffiċjenti biex jiġi stabbilit li l-estensjoni proposta tal-użu tal-ikel ġdid “ksilo-oligosakkaridi” tikkonforma mal-Artikolu 12 tar-Regolament (UE) 2015/2283.

(10)

Għalhekk huwa xieraq li jiġu emendati l-kundizzjonijiet tal-użu tal-ksilo-oligosakkaridi fil-lista tal-Unjoni ta’ ikel ġdid awtorizzat, billi jiġi inkluż l-użu tal-ksilo-oligosakkaridi fis-supplimenti tal-ikel maħsuba għall-popolazzjoni adulta.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,