(1)

Ir-Regolament (KE) Nru 1333/2008 jistabbilixxi r-regoli dwar l-addittivi tal-ikel, il-klassijiet funzjonali tagħhom u jistabbilixxi l-lista tal-Unjoni tal-addittivi tal-ikel.

(2)

L-Anness I tar-Regolament (KE) Nru 1333/2008 jistipula l-klassijiet funzjonali tal-addittivi tal-ikel fl-ikel u tal-addittivi tal-ikel fl-addittivi tal-ikel u fl-enżimi tal-ikel.

(3)

Il-progress xjentifiku u l-iżvilupp teknoloġiku ppermettew fehim aħjar tal-funzjoni teknoloġika tal-addittiv tal-ikel “il-lattat ferruż (E 585)”. Meta applikat fuq il-faqqiegħ Albatrellus ovinus, il-lattat ferruż ma jagħtix il-kulur waħdu, u lanqas ma jintensifika l-lewn eżistenti tal-Albatrellus oenfvinus. Dan jaffettwa u jbiddel il-kulur tal-Albatrellus ovinus (minn abjad għal skur) billi jirreaġixxi ma' ċerti komponenti tat-tessut tal-faqqiegħ bħal polifenoli. Din il-karatteristika tal-lattat ferruż ma taqax taħt il-klassi funzjonali attwali ta' “stabilizzaturi” u kwalunkwe klassi funzjonali oħra elenkata fl-Anness I tar-Regolament (KE) Nru 1333/2008. Għalhekk, jenħtieġ li l-klassi funzjonali ta' “stabilizzaturi” tiġi emendata billi titneħħa l-kelma “eżistenti” sabiex tkopri l-funzjoni teknoloġika tal-lattat ferruż (E 585) meta jiġi applikat fuq l-Albatrellus ovinus.

(4)

L-Anness II tar-Regolament (KE) Nru 1333/2008 jistabbilixxi lista tal-Unjoni ta' addittivi tal-ikel approvati għall-użu fl-ikel u l-kundizzjonijiet tal-użu tagħhom.

(5)

Il-lista tal-Unjoni tal-addittivi tal-ikel tista' tiġi aġġornata skont il-proċedura komuni msemmija fir-Regolament (KE) Nru 1331/2008 tal-Parlament Ewropew u tal-Kunsill (2), fuq inizjattiva tal-Kummissjoni jew wara li ssir applikazzjoni.

(6)

Fil-25 ta' Ottubru 2016 tressqet applikazzjoni għall-awtorizzazzjoni tal-użu tal-lattat ferruż (E 585) fuq il-faqqiegħ Albatrellus ovinus li jintuża bħala ingredjent tal-ikel fil-pâtés tal-fwied Żvediżi u saret disponibbli għall-Istati Membri skont l-Artikolu 4 tar-Regolament (KE) Nru 1331/2008.

(7)

Fl-Iżvezja, ċertu pâtés tal-fwied (“leverpastej”) tradizzjonalment ikun fihom il-faqqiegħ Albatrellus ovinus bħala ingredjent tal-ikel. Qabel ma jiżdied dan il-faqqiegħ — li huwa abjad b'mod naturali — mal-pâtés tal-fwied, huwa neċessarju, mil-lat teknoloġiku, li jiġi ttrattat bil-lattat ferruż (E 585) sabiex jinkiseb il-kulur skur mixtieq.

(8)

Il-Kumitat Xjentifiku dwar l-Ikel kien ivvaluta s-sikurezza tal-użu tal-lattat ferruż (E 585) fuq iż-żebbuġ bħala aċċettabbli (3). Il-pâtés tal-fwied Żvediżi fihom biss madwar 0,5 % ta' faqqiegħ. L-esponiment addizzjonali għal-lattat ferruż meta dan jiżdied mal-faqqiegħ Albatrellus ovinus li jintuża bħala ingredjent tal-ikel fil-pâtés tal-fwied Żvediżi għalhekk għandu jkun negliġibbli.

(9)

Skont l-Artikolu 3(2) tar-Regolament (KE) Nru 1331/2008, il-Kummissjoni għandha tfittex l-opinjoni tal-Awtorità Ewropea dwar is-Sigurtà fl-Ikel (“L-Awtorità”) sabiex taġġorna l-lista tal-Unjoni tal-addittivi tal-ikel stipulata fl-Anness II tar-Regolament (KE) Nru 1333/2008, ħlief meta l-aġġornament inkwistjoni ma jkunx mistenni li jħalli effett fuq is-saħħa tal-bniedem.

(10)

Billi l-awtorizzazzjoni tal-lattat ferruż (E 585) fil-faqqiegħ Albatrellus ovinus użat bħala ingredjent tal-ikel fil-patès tal-fwied Żvediżi tikkostitwixxi aġġornament tal-lista tal-Unjoni tal-addittivi tal-ikel li mhux mistenni jkollu effett fuq is-saħħa tal-bniedem, mhuwiex meħtieġ li titfittex l-opinjoni tal-Awtorità.

(11)

Għalhekk, huwa xieraq li l-lattat ferruż (E 585) jiġi awtorizzat bħala stabilizzatur għall-faqqiegħ Albatrellus ovinus użat bħala ingredjent tal-ikel fil-pâtés tal-fwied Żvediżi.

(12)

Għalhekk, jenħtieġ li l-Annessi I u II tar-Regolament (KE) Nru 1333/2008 jiġu emendati skont dan.

(13)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,