This document is an excerpt from the EUR-Lex website
Document 32018R1495
Commission Implementing Regulation (EU) 2018/1495 of 8 October 2018 amending Implementing Regulation (EU) No 540/2011 as regards the conditions of approval of the active substance malathion (Text with EEA relevance.)
Regolament ta' Implimentazzjoni tal-Kummissjoni (UE) 2018/1495 tat-8 ta' Ottubru 2018 li jemenda r-Regolament ta' Implimentazzjoni (UE) Nru 540/2011 fir-rigward tal-kundizzjonijiet għall-approvazzjoni tas-sustanza attiva malatijon (Test b'rilevanza għaż-ŻEE.)
Regolament ta' Implimentazzjoni tal-Kummissjoni (UE) 2018/1495 tat-8 ta' Ottubru 2018 li jemenda r-Regolament ta' Implimentazzjoni (UE) Nru 540/2011 fir-rigward tal-kundizzjonijiet għall-approvazzjoni tas-sustanza attiva malatijon (Test b'rilevanza għaż-ŻEE.)
C/2018/6453
ĠU L 253, 9.10.2018, p. 1–4
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
9.10.2018 |
MT |
Il-Ġurnal Uffiċjali tal-Unjoni Ewropea |
L 253/1 |
REGOLAMENT TA' IMPLIMENTAZZJONI TAL-KUMMISSJONI (UE) 2018/1495
tat-8 ta' Ottubru 2018
li jemenda r-Regolament ta' Implimentazzjoni (UE) Nru 540/2011 fir-rigward tal-kundizzjonijiet għall-approvazzjoni tas-sustanza attiva malatijon
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1107/2009 tal-Parlament Ewropew u tal-Kunsill tal-21 ta' Ottubru 2009 dwar it-tqegħid fis-suq ta' prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (1), u b'mod partikolari t-tieni alternattiva tal-Artikolu 21(3) u l-Artikolu 78(2) tiegħu,
Billi:
(1) |
Is-sustanza attiva malatijon ġiet inkluża fl-Anness I tad-Direttiva tal-Kunsill 91/414/KEE (2) li tikkonċerna t-tqegħid fis-suq ta' prodotti għall-protezzjoni tal-pjanti permezz tad-Direttiva tal-Kummissjoni 2010/17/UE (3), bil-kundizzjoni li l-Istati Membri kkonċernati jiżguraw li l-applikant li fuq talba tiegħu tkun ġiet approvata l-malatijon, fost l-oħrajn jipprovdi aktar informazzjoni ta' konferma dwar ir-riskju akut u fit-tul għall-għasafar insettivori. |
(2) |
Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta' Implimentazzjoni tal-Kummissjoni (UE) Nru 540/2011 (4). |
(3) |
Fil-25 ta' April 2012,, l-applikant ressaq lill-Istat Membru relatur, ir-Renju Unit, l-informazzjoni addizzjonali fil-perjodu ta' żmien previst għas-sottomissjoni tagħha, biex jiġu indirizzati r-rekwiżiti dwar id-data ta' konferma fir-rigward tal-valutazzjoni tar-riskju għall-konsumatur u l-valutazzjoni tar-riskju akut u fit-tul għall-għasafar insettivori, u l-kwantifikazzjoni tal-potenza differenti tal-malaosson u l-malatijon. |
(4) |
Fil-11 ta' Mejju 2015, ir-Renju Unit ivvaluta l-informazzjoni addizzjonali mressqa mill-applikant u ressaq il-valutazzjoni tiegħu lill-Istati Membri l-oħra, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”), fl-għamla ta' addendum tal-abbozz tar-rapport ta' valutazzjoni. |
(5) |
L-Istati Membri l-oħra, l-applikant u l-Awtorità ġew ikkonsultati u mitluba jipprovdu l-kummenti tagħhom dwar il-valutazzjoni tal-Istat Membru relatur. Fit-2 ta' Frar 2016, l-Awtorità ppubblikat rapport tekniku li kien fih l-eżitu fil-qosor ta' din il-konsultazzjoni dwar il-malatijon (5). |
(6) |
L-abbozz tar-rapport ta' valutazzjoni, l-addendum u r-rapport tekniku tal-Awtorità ġew rieżaminati mill-Istati Membri u mill-Kummissjoni fi ħdan il-Kumitat Permanenti dwar il-Pjanti, l-Annimali, l-Ikel u l-Għalf, u ġew iffinalizzati f'Jannar 2018 fl-għamla ta' rapport ta' rieżami tal-Kummissjoni għall-malatijon. |
(7) |
Il-Kummissjoni stiednet lill-applikant iressaq il-kummenti tiegħu dwar ir-rapport ta' rieżami għall-malatijon. L-applikant ressaq il-kummenti tiegħu, li ġew eżaminati bir-reqqa. |
(8) |
Madankollu, l-informazzjoni mressqa mill-applikant mhijiex biżżejjed u twaqqaf lill-Kummissjoni milli tikkonkludi li l-livell ta' riskji akuti u fit-tul għall-għasafar li jirriżultaw mill-użu tal-malatijon huwa aċċettabbli. Barra minn hekk, il-mitigazzjoni ta' dan ir-riskju permezz ta' miżuri ta' mitigazzjoni tar-riskju għajr l-applikazzjonijiet fis-serer ma jistgħux jiġu realment implimentati. |
(9) |
Għaldaqstant, filwaqt li jitqies ir-riskju għoli identifikat għall-għasafar, jixraq li jiġu llimitati iktar il-kundizzjonijiet tal-użu tal-malatijon, u b'mod partikolari li jippermettu biss għal applikazzjonijiet fis-serer bi struttura permanenti. Għaldaqstant, jenħtieġ li l-Anness tar-Regolament ta' Implimentazzjoni tal-Kummissjoni (UE) Nru 540/2011 jiġi emendat skont dan. |
(10) |
Jenħtieġ li l-Istati Membri jingħataw biżżejjed żmien biex jemendaw jew jirtiraw l-awtorizzazzjonijiet tal-prodotti għall-protezzjoni tal-pjanti li fihom il-malatijon. |
(11) |
Fir-rigward tal-prodotti għall-protezzjoni tal-pjanti li fihom il-malatijon, meta l-Istati Membri jagħtu xi perjodu ta' grazzja skont l-Artikolu 46 tar-Regolament (KE) Nru 1107/2009, jenħtieġ li dak il-perjodu jiskadi fid-29 ta' Jannar 2020. |
(12) |
Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni fil-limitu taż-żmien stabbilit mill-President tiegħu. Att ta' implimentazzjoni tqies bħala neċessarju u l-presidenza ssottomettiet l-abbozz tal-att ta' implimentazzjoni lill-kumitat tal-appell għal aktar deliberazzjoni. Il-kumitat ta' appell ma tax opinjoni, |
ADOTTAT DAN IR-REGOLAMENT:
Artikolu 1
Emenda tar-Regolament ta' Implimentazzjoni tal-Kummissjoni (UE) Nru 540/2011
L-Anness tar-Regolament ta' Implimentazzjoni (UE) Nru 540/2011 huwa emendat skont l-Anness ta' dan ir-Regolament.
Artikolu 2
Miżuri tranżizzjonali
B'konformità mar-Regolament (KE) Nru 1107/2009, meta jkun meħtieġ, l-Istati Membri għandhom jemendaw jew jirtiraw l-awtorizzazzjonijiet eżistenti tal-prodotti għall-protezzjoni tal-pjanti li fihom il-malatijon bħala sustanza attiva sa mhux aktar tard mid-29 ta' April 2019.
Artikolu 3
Perjodu ta' grazzja
Kull perjodu ta' grazzja mogħti mill-Istati Membri skont l-Artikolu 46 tar-Regolament (KE) Nru 1107/2009 għandu jkun qasir kemm jista' jkun u għandu jiskadi sa mhux aktar tard mid-29 ta' Jannar 2020.
Artikolu 4
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-8 ta' Ottubru 2018.
Għall-Kummissjoni
Il-President
Jean-Claude JUNCKER
(1) ĠU L 309, 24.11.2009, p. 1.
(2) Id-Direttiva tal-Kunsill 91/414/KEE tal-15 ta' Lulju 1991 li tikkonċerna t-tqegħid fis-suq ta' prodotti għall-protezzjoni tal-pjanti (ĠU L 230, 19.8.1991, p. 1).
(3) Id-Direttiva tal-Kummissjoni 2010/17/UE tad-9 ta' Marzu 2010 li temenda d-Direttiva tal-Kunsill 91/414/KEE biex tinkludi l-malatijon bħala sustanza attiva (ĠU L 60, 10.3.2010, p. 17).
(4) Ir-Regolament ta' Implimentazzjoni tal-Kummissjoni (UE) Nru 540/2011 tal-25 ta' Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f'dak li għandu x'jaqsam mal-lista ta' sustanzi attivi approvati (ĠU L 153, 11.6.2011, p. 1).
(5) EFSA, Technical report on the outcome of the consultation with Member States, the applicant and EFSA on the pesticide risk assessment of confirmatory data for malathion. EFSA Supporting publication 2016:EN-951. 61 pp.
ANNESS
Il-kolonna “Dispożizzjonijiet speċifiċi” tar-ringiela 300, malatijon, tal-Parti A tal-Anness tar-Regolament ta' Implimentazzjoni (UE) Nru 540/2011 hija sostitwita b'dan li ġej:
“PARTI A
L-użi bħala insettiċida fis-serer bi struttura permanenti biss jistgħu jiġu awtorizzati. L-awtorizzazzjonijiet għandhom ikunu limitati għall-utenti professjonali.
PARTI B
Għall-implimentazzjoni tal-prinċipji uniformi, kif imsemmija fl-Artikolu 29(6) tar-Regolament (KE) Nru 1107/2009, għandhom jitqiesu l-konklużjonijiet tar-rapport ta' rieżami dwar il-malatijon, u b'mod partikolari l-Appendiċijiet I u II tiegħu, kif iffinalizzati mill-Kumitat Permanenti dwar il-Pjanti, l-Annimali, l-Ikel u l-Għalf.
F'din il-valutazzjoni globali, l-Istati Membri jridu jagħtu attenzjoni partikolari:
(a) |
lir-rilaxxi minn serer, bħall-kondensazzjoni tal-ilma, l-ilma tad-dranaġġ, il-ħamrija jew is-sottostrat artifiċjali, sabiex jiġi evitat ir-riskju għall-organiżmi akkwatiċi; |
(b) |
lill-protezzjoni ta' kolonji tal-pollinaturi mqegħdin apposta fis-serra; |
(c) |
lill-protezzjoni tal-operaturi u tal-ħaddiema, biex jiġi żgurat li fejn xieraq, il-kundizzjonijiet tal-użu jippreskrivu l-użu ta' tagħmir ta' protezzjoni personali adegwat; |
(d) |
lill-protezzjoni tal-konsumaturi fil-każ ta' komoditajiet proċessati. |
L-Istati Membri għandhom jiżguraw li l-formulazzjonijiet ibbażati fuq il-malatijon ikunu akkumpanjati mill-istruzzjonijiet meħtieġa biex jiġi evitat kull riskju ta' formazzjoni ta' isomalatijon li jkun jaqbeż il-kwantitajiet massimi permessi waqt il-ħażna u t-trasport.
Il-kundizzjonijiet tal-awtorizzazzjoni għandhom jinkludu miżuri għall-mitigazzjoni tar-riskju u jipprevedu tikkettar adegwat tal-prodotti għall-protezzjoni tal-pjanti.”