(1)

L-Anness II tar-Regolament (KE) Nru 1333/2008 jistabbilixxi lista tal-Unjoni ta' addittivi tal-ikel approvati għall-użu fl-ikel u l-kundizzjonijiet tal-użu tagħhom.

(2)

Ir-Regolament tal-Kummissjoni (UE) Nru 231/2012 (2) jistabbilixxi l-ispeċifikazzjonijiet għall-addittivi tal-ikel li huma elenkati fl-Annessi II u III tar-Regolament (KE) Nru 1333/2008.

(3)

Il-Kuċċinilja, l-aċidu Karminiku, il-Karmini (E 120) hija sustanza awtorizzata biex tintuża bħala kolorant f'tipi diversi ta' ikel skont l-Anness II tar-Regolament (KE) Nru 1333/2008.

(4)

L-Artikolu 32(1) tar-Regolament (KE) Nru 1333/2008 jistipula li l-addittivi tal-ikel kollha li kienu diġà permessi fl-Unjoni qabel l-20 ta' Jannar 2009 huma soġġetti għal valutazzjoni tar-riskju ġdida mill-Awtorità Ewropea dwar is-Sigurtà fl-Ikel (“l-Awtorità”).

(5)

Għalhekk, fir-Regolament tal-Kummissjoni (UE) Nru 257/2010 (3) hemm stabbilit programm biex issir rivalutazzjoni tal-addittivi tal-ikel, u skont dan il-programm kellha titlesta r-rivalutazzjoni tal-koloranti sal-31 ta' Diċembru 2015.

(6)

Fit-18 ta' Novembru 2015 l-Awtorità tat Opinjoni Xjentifika dwar ir-rivalutazzjoni tal-kuċċinilja, l-aċidu karminiku, il-karmini (E 120) bħala addittiv tal-ikel (4). L-Awtorità kkonkludiet li s-sett tad-data attwali ma ppreżentax ġustifikazzjoni għar-rieżami tal-valur tad-Doża Aċċettabbli ta' Kuljum għall-E 120, u li l-istimi raffinati tal-esponiment tal-gruppi kollha tal-popolazzjoni huma inqas mid-Doża Aċċettabbli ta' Kuljum. Madankollu, l-Awtorità rrakkomandat li t-titlu attwali “Kuċċinilja, aċidu Karminiku, Karmini” jiġi rivedut biex jirrifletti b'mod aktar preċiż il-materjal li jintuża bħala addittiv tal-ikel, u li jiġu aġġornati l-ispeċifikazzjonijiet tal-perċentwal tal-materjal li mhuwiex meqjus, tal-limiti massimi tal-elementi tossiċi u tal-preżenza ta' komposti proteiniċi.

(7)

Skont l-Artikolu 10(3) tar-Regolament (KE) Nru 1333/2008, il-lista tal-Unjoni tal-adittivi tal-ikel approvati għandha tiġi emendata skont il-proċedura msemmija fir-Regolament (KE) Nru 1331/2008 tal-Parlament Ewropew u tal-Kunsill (5).

(8)

L-Artikolu 3(1) tar-Regolament (KE) Nru 1331/2008 jistipula li l-lista tal-Unjoni ta' addittivi tal-ikel tista' tiġi aġġornata jew fuq l-inizjattiva tal-Kummissjoni jew inkella wara li ssir applikazzjoni.

(9)

Għaldaqstant jixraq li jiġu emendati l-Anness II tar-Regolament (KE) Nru 1333/2008 u l-Anness tar-Regolament (UE) Nru 231/2012.

(10)

Jenħtieġ li jitħalla jgħaddi żmien raġonevoli qabel ma jibdew japplikaw l-emendi biex l-operaturi tan-negozji tal-ikel jingħataw biżżejjed ħin biex jissodisfaw ir-rekwiżiti l-ġodda stabbiliti f'dan ir-Regolament.

(11)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,