19.3.2014   

MT

Il-Ġurnal Uffiċjali tal-Unjoni Ewropea

L 80/7

(1)

Il-fornituri tas-servizzi li s-servizzi tagħhom jaqgħu fl-ambitu tad-Direttiva 2006/123/KE għandhom ikunu kapaċi jtemmu, permezz tal-Punti ta’ Kuntatt Waħdieni u permezz ta’ mezzi elettroniċi, il-proċeduri u l-formalitajiet meħtieġa għall-aċċess għall-attivitajiet tagħhom, u għall-eżerċizzju ta’ dawn. Fil-limiti stabbiliti fl-Artikolu 5(3) tad-Direttiva 2006/123/KE, xorta jista’ jkun hemm każijiet fejn il-fornituri tas-servizzi jkollhom jissottomettu dokumenti oriġinali, kopji awtentikati jew traduzzjonijiet awtentikati meta jwettqu dawn il-proċeduri u formalitajiet. F’dawk il-każijiet, il-fornituri tas-servizzi jistgħu jkunu meħtieġa li jissottomettu dokumenti ffirmati elettronikament minn awtoritajiet kompetenti.

(2)

L-użu transfruntier ta’ firem elettroniċi avvanzati sostnuti minn ċertifikat ikkwalifikat huwa ffaċilitat permezz tad-Deċiżjoni tal-Kummissjoni 2009/767/KE tas-16 ta’ Ottubru 2009 li tistipula miżuri li jiffaċilitaw l-użu ta’ proċeduri b’mezzi elettroniċi permezz tal-punti ta’ kuntatt waħdieni skont id-Direttiva 2006/123/KE tal-Parlament Ewropew u tal-Kunsill dwar is-servizzi fis-suq intern (2) li, inter alia, timponi obbligu fuq l-Istati Membri sabiex iwettqu valutazzjonijiet tar-riskju qabel ma jeħtieġu dawn il-firem elettroniċi mill-fornituri tas-servizzi u tistabbilixxi regoli għall-aċċettazzjoni mill-Istati Membri ta’ firem elettroniċi avvanzati bbażati fuq ċertifikati kkwalifikati, maħluqa kemm bl-użu ta’ tagħmir għall-ħolqien tal-firem siguri kif ukoll mingħajru. Madankollu, id-Deċiżjoni 2009/767/KE ma tittrattax il-formati ta’ firem elettroniċi f’dokumenti maħruġa minn awtoritajiet kompetenti, li jeħtieġ li jiġu sottomessi mill-fornituri tas-servizz meta jtemmu l-proċeduri u l-formalitajiet rilevanti.

(3)

Minħabba li l-awtoritajiet kompetenti fl-Istati Membri attwalment jużaw formati differenti ta’ firem elettroniċi avvanzati sabiex jiffirmaw id-dokumenti tagħhom elettronikament, l-Istati Membru riċevituri li jkollhom jipproċessaw dawn id-dokumenti jistgħu jħabbtu wiċċhom ma’ diffikultajiet tekniċi minħabba l-varjetà ta’ formati ta’ firem użati. Sabiex jippermettu lill-fornituri tas-servizzi jtemmu l-proċeduri tagħhom u l-formalitajiet bejn il-fruntieri permezz ta’ mezzi elettroniċi, huwa meħtieġ li jiġi żgurat li mill-inqas numru ta’ formati ta’ firem elettroniċi avvanzati jkunu jistgħu jiġu appoġġjati teknikament mill-Istati Membri meta jirċievu d-dokumenti ffirmati elettronikament minn awtoritajiet kompetenti ta’ Stati Membri oħra. Id-definizzjoni ta’ għadd ta’ formati ta’ firem elettroniċi avvanzati li jeħtieġ li jkunu appoġġjati teknikament mill-Istat Membru riċevituri tippermetti awtomizzazzjoni akbar u ttejjeb l-interoperabbiltà transfruntiera tal-proċeduri elettroniċi.

(4)

Inizjalment, biss il-livell bażiku ta’ formati standardizzati ETSI ta’ firem elettroniċi avvanzati kien kopert mid-Deċiżjoni. Huwa xieraq li jiżdiedu wkoll livelli aktar fit-tul ta’ formati standardizzati ETSI li jiffaċilitaw il-konservazzjoni tal-informazzjoni relatata mal-validità tal-firem elettroniċi matul iż-żmien.

(5)

Speċifikazzjonijiet tekniċi ġodda ġew ippubblikati mill-ETSI għal profili bażi għal firem elettroniċi avvanzati li għandhom l-għan li jillimitaw l-għażliet fl-istandards relevanti u b’hekk iżidu l-interoperabbiltà transfruntiera. Dawn il-profili jkopru l-livelli ta’ konformità kollha, minn dak bażiku għal dak fit-tul.

(6)

L-Istati Membri li l-awtoritajiet kompetenti tagħhom jużaw formati ta’ firem elettroniċi li huma differenti minn dawk sostnuti b’mod komuni, jistgħu jkunu implimentaw mezzi ta’ validazzjoni li jippermettu li l-firem tagħhom jiġu vverifikati wkoll bejn il-fruntieri. Meta dan ikun il-każ u sabiex l-Istati Membri riċevituri jkunu jistgħu jiddependu fuq dawn l-għodod ta’ validazzjoni, huwa meħtieġ li l-informazzjoni dwar dawn l-għodod tkun disponibbli b’mod aċċessibbli faċilment sakemm l-informazzjoni meħtieġa ma tkunx inkluża direttament fid-dokumenti elettroniċi, fil-firem elettroniċi jew fil-mezzi portabbli tad-dokumenti elettroniċi.

(7)

Din id-Deċiżjoni ma taffettwax id-determinazzjoni mill-Istati Membri ta’ x’jikkostitwixxi dokument oriġinali, kopja awtentikata jew traduzzjoni awtentikata. L-għan tagħha huwa limitat biex tiffaċilita l-verifika ta’ firem elettroniċi jekk dawn ikunu użati fid-dokumenti oriġinali, kopji awtentikati jew traduzzjonijiet awtentikati li l-fornituri tas-servizzi jistgħu jeħtieġu li jissottomettu permezz tal-Punti ta’ Kuntatt Waħdieni.

(8)

Sabiex l-Istati Membri jkunu awtorizzati jimplimentaw l-għodod tekniċi meħtieġa, huwa xieraq li din id-Deċiżjoni tapplika mill-1 ta’ Diċembru 2014.

(9)

Il-miżuri stabbiliti f’din id-Deċiżjoni huma skont l-opinjoni tal-Kumitat tad-Direttiva tas-Servizzi,

(1)

Il-paragrafu 1 tal-Artikolu 1 huwa sostitwit b’dan li ġej:

“1.   L-Istati Membri għandhom idaħħlu fis-seħħ il-mezzi tekniċi meħtieġa li jippermettulhom jipproċessaw id-dokumenti ffirmati elettronikament li l-fornituri tas-servizzi jissottomettu fil-kuntest tat-twettiq tal-proċeduri u l-formalitajiet permezz tal-Punti ta’ Kuntatt Waħdieni kif stabbilit fl-Artikolu 8 tad-Direttiva 2006/123/KE, u li huma ffirmati mill-awtoritajiet kompetenti ta’ Stati Membri oħra b’firma elettronika avvanzata tal-XML, CMS jew PDF f’kull livell ta’ konformità jew bl-użu ta’ kontenitur assoċjat tal-firem fil-livell bażiku sakemm dawn jikkonformaw mal-ispeċifikazzjonijiet tekniċi stipulati fl-Anness.”

(2)

L-Anness huwa sostitwit bl-Anness għal din id-Deċiżjoni.