32003R2181

Ir-Regolament tal-Kunsill (KE, EURATOM) Nru 2181/2003

tat-8 ta' Diċembru 2003

dwar miżuri transitorji li għandhom jiġu adottati għar-riforma tar-Regolamenti tal-Persunal, b'mod partikolari fir-rigward tal-paga u tal-pensjoni

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 283 tiegħu,

Wara li kkunsidra l-Artikolu 13 tal-Protokoll dwar il-Privileġġi u Immunitajiet tal-Komunitajiet Ewropej,

Wara li kkunsidra l-proposta mill-Kummissjoni sottomessa wara li kisbet l-opinjoni tal-Kumitat tar-Regolamenti tal-Persunal,

Wara li kkunsidra l-opinjoni tal-Parlament Ewropew [1];

Wara li kkunsidra l-opinjoni tal-Qorti tal-Ġustizzja [2],

Wara li kkunsidra l-opinjoni tal-Qorti ta' l-Awdituri [3];

Billi:

(1) Ir-reviżjoni totali tar-Regolamenti taL-Persunal kurrenti ta' uffiċjali u l-Kondizzjonijiet ta' l-Impjieg applikabbli għall-aġenti l-oħra tal-Komunitajiet Ewropej, li ġew oriġinarjament adottati fl-1962, wassal għal ħtieġa li ċerti miżuri ta' riforma jidħlu b'mod gradwali: l-aġġustament annwali ta' l-iskali tal-paga fuq il-bażi tal-metodi kurrenti, imposta speċjali ġdida u rata ta' kontribuzzjoni għall-pensjoni ġdida għandhom jidħlu fis-seħħ mill-1 ta' Jannar 2004, bħala miżuri transitorji, fil-waqt li r-regolament revedut li jemenda r-Regolamenti tal-Persunal għandu jidħol fis-seħħ fl-1 ta' Mejju 2004.

(2) Fid-19 ta' Mejju 2003, il-Kunsill adotta linji gwida u fid-29 ta' Settembru 2003 huwa approva r-rapport tal-Kumitat Konsultattiv stabbilit bid-deċiżjoni tal-Kunsill tat-23 ta' Ġunju 1981.

(3) L-imposta speċjali ġdida idaħħlet sabiex jiġu reflessi l-ispejjeż tal-politika soċjali, titjib fil-kondizzjonijiet tax-xogħol u l-iskejjel Ewropej.

(4) L-Artikolu 83(4) tar-Regolamenti tal-Persunal jistipula li rata ġdida ta' kontribuzzjoni għandha tiġi stabbilita fejn stima attwali ta' l-iskema tal-pensjonijiet turi li l-kontribuzzjonijiet minn uffiċjali mhumiex biżżejjed sabiex jiffinanzjaw terz tal-benefiċċji mħallsa taħtha.. Stima bħal din uriet li l-kontribuzzjonijiet preżenti mhumiex biżżejjed biex jiffinanzjaw terz tal-benefiċċji pagabbli.

(5) Skond l-Artikolu 65 tar-Regolamenti tal-Persunal, il-Kunsill kull sena għandu jirrevedi, u jekk jixraq jaġġusta, ir-rimunerazzjoni ta' l-uffiċjali u l-aġenti l-oħra tal-Komunitajiet. Skond il-proposta addottata mill-Kunsill, l-iskali tal-paga jiġu aġġustati fuq il-bażi tal-metodu kurrenti. Għal dan l-iskop, il-perjodu ta' validità ta' l-Anness XI tar-Regolamenti tal-Persunal, li ma baqax applikabbli fit-30 ta' Ġunju 2003, għandu għalhekk ikun estiż,

ADOTTA DAN IR-REGOLAMENT:

Artikolu 1

L-Artikolu 66a(1) sa (5) tar-Regolamenti tal-Persunal huwa sostitwit b'dan li ġej:

"1. Bħala deroga ta' l-Artikolu 3(1) tar-Regolament (KEE, Euratom, KEFA) Nru 260/68 [4], miżura temporanja dwar ir-remunerazzjoni mħallsa mill-Komunitajiet lill-persunal f'impieg attiv, li għandha tkun magħrufa bħala "imposta speċjali" għandha tkun applikata mill-1 ta' Jannar 2004.

2. Ir-rata ta' l-imposta speċjali, li għandha tiġi applikata għall-bażi definit fil-paragrafu 3, għandha tkun ta' 2.5 %.

3. (a) Il-bażi ta' l-imposta speċjali għandu jkun is-salarju bażiku tal-grad u tarġa użati sabiex jikkalkulaw ir-rimunerazzjoni, nieqes:

- il-kontribuzzjonijiet għas-sigurta' soċjali u għall-pensjoni u t-taxxa, qabel l-imposta speċjali, pagabbli minn uffiċjal ta' l-istess grad u tarġa bla dipendenti fit-tifsira ta' l-Artikolu 2 ta' l-Anness VII, u

- ammont daqs is-salarju bażiku ta' uffiċjal fil-grad D4, tarġa 1.

(b) Il-komponenti użati sabiex jiġi stabbilit il-bażi għall-imposta speċjali għandhom ikunu espressi f'euro u b'ko-effiċjenti ta' 100.

4. L-imposta speċjali għandha titnaqqas kull xaħar fis-sors; il-ġbir għandu jiddaħħal bħala dħul fil-baġit ġenerali tal-Komunitajiet Ewropei."

Artikolu 2

Mill-1 ta' Jannar 2004, ir-rata ta' kontribuzzjoni stabbilita fl-Artikolu 83(2) tar-Regolamenti tal-Persunal għandha tiġi fissata għal 9,25 %. Ir-rata massima għall-pagamenti skond l-Artikolu 42 tal-Kondizzjonijiet ta' l-Impieg applikabbli għall-aġenti l-oħra tal-Komunitajiet Ewropej għandha tiġi fissata għal 18,5 %.

Artikolu 3

1. Fl-Artikolu 15(1) ta' l-Anness XI tar-Regolamenti tal-Persunal, id-data "30 ta' Ġunju 2003" għandha tiġi sostitwita bi "30 ta' Ġunju 2004".

2. Għall-2003, l-aġġustament tar-rimunerazzjoni prevista fl-Artikolu 65(1) tar-Regolamenti tal-Persunal għandu jidħol fis-seħħ, b'deroga mill-Artikolu 3(1) ta' l-Anness XI tar-Regolamenti tal-Persunal, fl-1 ta' Jannar 2004.

3. Skond il-fatturi stabbiliti fl-Anness XI tar-Regolamenti tal-Persunal, il-valur ta' dan l-aġġustament għandu jkun ta' 3,4 %.

Artikolu 4

Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

Huwa għandu japplika mit-8 ta' Diċembru 2003 sad-data ta' applikabbilità tar-Regolament tal-Kunsill li jemenda r-Regolamenti tal-Persunal għall-uffiċjali u l-Kondizzjonijiet ta' l-Impieg applikabbli għall-aġenti l-oħra tal-Komunitajiet Ewropej, propost mill-Kummissjoni fit-18 ta' Novembru 2003, imma mhux iktar tard mit-30 ta' Ġunju 2004.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-8 ta' Diċembru 2003.

Għall-Kunsill

Il-President

F. Frattini

[1] Opinjoni mogħtija fl-4 ta' Diċembru 2003 (s'issa mhux ipubblikata fil-Ġurnal Uffiċjali)

[2] Opinjoni mogħtija fil-5 ta' Novembru 2003 (s'issa mhux ipubblikata fil-Ġurnal Uffiċjali).

[3] Opinjoni mogħtija fis-27 ta' Novembru 2003 (s'issa mhux ipubblikata fil-Ġurnal Uffiċjali)

[4] ĠU L 56, ta'l-4.3.1968, p. 3. Regolament kif l-aħħar emendat bir-Regolament (KE, Euratom) Nru. 1750/2002 (Ġu L 264, tat-2.10.2002. p. 15).

--------------------------------------------------