(1)

F'konformità mal-Artikolu 6 tad-Deċiżjoni 2005/387/ĠAI, tfassal rapport ta' valutazzjoni tar-riskji dwar is-sustanza psikoattiva l-ġdida N-(1-ammino-3,3-dimetil-1-ossobutan-2-il)-1-(ċikloessilmetil)-1H-indażolu-3-karbossammid (“ADB-CHMINACA”) minn sessjoni speċjali tal-Kumitat Xjentifiku estiż taċ-Ċentru Ewropew għall-Monitoraġġ tad-Droga u d-Dipendenza fuq id-Droga u r-rapport ġie ppreżentat lill-Kummissjoni u lill-Kunsill fl-14 ta' Novembru 2017.

(2)

L-ADB-CHMINACA hija kannabinojdi sintetika. Għandha effetti simili għal dawk tat-THC, li hija responsabbli għall-effetti psikoattivi kbar tal-kannabis, iżda l-ADB-CHMINACA għandha tossiċità addizzjonali ta' theddida għall-ħajja. Il-potenza għolja tal-ADB-CHMINACA minn naħa waħda, u l-fatt li tista' tirrapreżenta proporzjon varjabbli kbir jew mhux magħruf f'taħlitiet tat-tipjip min-naħa l-oħra, ifisser li din tikkostitwixxi riskju sinifikanti ta' avvelenament.

(3)

L-ADB-CHMINACA ilha disponibbli fl-Unjoni mill-inqas minn Awwissu 2014 u ġiet individwata fi 17-il Stat Membru. Minħabba n-natura tal-ADB-CHMINACA, x'aktarx li d-detezzjonijiet ma jiġux rapportati billi l-ADB-CHMINACA mhijiex soġġetta għal kontrolli sistematiċi. Fil-parti l-kbira tal-każijiet, l-ADB-CHMINACA ġiet issekwestrata bħala materjal veġetali jew tal-pjanti u fil-forma ta' trab, iżda ġiet issekwestrata wkoll, għalkemm fuq livell aktar limitat, f'forom fiżiċi oħrajn, pereżempju fil-forma ta' assorbent. Saru aktar minn 630 sekwestru fl-Unjoni.

(4)

Tliet Stati Membri rrapportaw 13-il każ ta' mewt assoċjati mal-ADB-CHMINACA minn tliet Stati Membri. F'mill-inqas disa' każijiet ta' mewt, l-ADB-CHMINACA jew kienet il-kawża tal-mewt jew inkella x'aktarx li kkontribwixxiet għall-mewt. Barra minn hekk, Stat Membru wieħed irrapporta tliet każijiet mhux fatali ta' intossikazzjoni akuta assoċjati mal-ADB-CHMINACA. Minħabba n-natura tal-ADB-CHMINACA, kemm lintossikazzjonijiet mhux fatali kif ukoll l-imwiet x'aktarx ma ġewx individwati kollha u ma ġewx irrapportati kollha.

(5)

Ma hemm ebda informazzjoni dwar l-involviment tal-kriminalità organizzata fil-manifattura, id-distribuzzjoni, it-traffikar u l-forniment tal-ADB-CHMINACA fl-Unjoni. Id-data disponibbli tissuġġerixxi li l-ADB-CHMINACA hija prodotta minn kumpaniji kimiċi bbażati fiċ-Ċina.

(6)

L-ADB-CHMINACA tipikament tinbiegħ f'ammonti żgħar u bl-ingrossa fi ħwienet speċjalizzati (head shops), indikata bħala qisha l-hekk imsejħa droga legali (legal high), bħala taħlitiet tat-tipjip jew bħala trab, kif ukoll fuq l-Internet, indikata bħala qisha l-hekk imsejħa sostituzzjoni legali għall-kannabis. Huwa probabbli wkoll li tinbiegħ direttament fis-suq tad-drogi illeċiti. Billi l-imballaġġ ta' tali prodotti rarament jindikaw l-ingredjenti, ħafna mill-utenti mhumiex konxji li qegħdin jużaw l-ADB-CHMINACA, jew anke kannabinojdi sintetiċi inġenerali.

(7)

L-ADB-CHMINACA ma għandha l-ebda użu mediku għall-bniedem jew veterinarju rikonoxxut fl-Unjoni u lanqas, mid-dehra, barra mill-Unjoni. Ma hemm l-ebda indikazzjoni li l-ADB-CHMINACA tista' tintuża għal xi skop ieħor minbarra bħala standard analitiku ta' referenza u fir-riċerka xjentifika.

(8)

Ir-rapport ta' valutazzjoni tar-riskju juri li ħafna mill-mistoqsijiet relatati mal-ADB-CHMINACA li jqumu minħabba n-nuqqas ta' data dwar ir-riskji għas-saħħa individwali, ir-riskji għas-saħħa pubblika, u r-riskji soċjali, jista' jkollhom risposta permezz ta' iktar riċerka. Madankollu, l-evidenza u l-informazzjoni disponibbli dwar ir-riskji għas-saħħa u soċjali li toħloq is-sustanza jipprovdu raġunijiet suffiċjenti biex l-ADB-CHMINACA tiġi sottoposta għal miżuri ta' kontroll fl-Unjoni kollha.

(9)

L-ADB-CHMINACA mhijiex elenkata għall-kontroll skont il-Konvenzjoni Unika tan-Nazzjonizxjiet Uniti tal-1961 dwar id-Drogi Narkotiċi jew skont il-Konvenzjoni tan-Nazzjonijiet Uniti tal-1971 dwar is-Sustanzi Psikotropiċi. L-ADB-CHMINACA bħalissa mhijiex qed tiġi vvalutata taħt is-sistema tan-Nazzjonijiet Uniti.

(10)

Billi 13-il Stat Membru jikkontrolla l-ADB-CHMINACA fil-leġiżlazzjoni nazzjonali għall-kontroll tad-drogi u erba' Stati Membri jikkontrollaw l-ADB-CHMINACA taħt leġiżlazzjoni oħra, il-fatt li l-ADB-CHMINACA tiġi sottoposta għal miżuri ta' kontroll fl-Unjoni kollha jgħin biex jiġi evitat li jfeġġu ostakli fl-infurzar tal-liġi u fil-kooperazzjoni ġudizzjarja transfruntieri, u jgħin fil-protezzjoni mir-riskji li d-disponibbiltà u l-użu tagħha joħolqu.

(11)

Id-Deċiżjoni 2005/387/ĠAI tikkonferixxi setgħat ta' implimentazzjoni lill-Kunsill bil-ħsieb li jkun hemm reazzjoni rapida u bbażata fuq kompetenza esperta fil-livell tal-Unjoni fil-każ li jfiġġu sustanzi psikoattivi ġodda individwati u rrapportati mill-Istati Membri, billi tissotoponi dawn is-sustanzi għal miżuri ta' kontroll fl-Unjoni kollha. Billi l-kondizzjonijiet u l-proċedura biex jiġi attivat l-eżerċizzju ta' tali setgħat ta' implimentazzjoni ġew issodisfati, jenħtieġ li tiġi adottata deċiżjoni ta' implimentazzjoni sabiex l-ADB-CHMINACA tiġi sottoposta għal miżuri ta' kontroll fl-Unjoni kollha.

(12)

Id-Danimarka hija marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u l-applikazzjoni ta' din id-Deċiżjoni, li timplimenta d-Deċiżjoni 2005/387/ĠAI.

(13)

L-Irlanda hija marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u l-applikazzjoni ta' din id-Deċiżjoni, li timplimenta d-Deċiżjoni 2005/387/ĠAI.

(14)

Ir-Renju Unit mhuwiex marbut bid-Deċiżjoni 2005/387/ĠAI u għalhekk mhuwiex qed jieħu sehem fl-adozzjoni u l-applikazzjoni ta' din id-Deċiżjoni u mhuwiex marbut biha jew soġġett għall-applikazzjoni tagħha,