29.6.2006

MT

Il-Ġurnal Uffiċjali ta’ l-Unjoni Ewropea

337

---

REGOLAMENT TAL-KUNSILL (KE) Nru 2187/2005

tal-21 ta' Diċembru 2005

għall-konservazzjoni ta' riżorsi tas-sajd permezz ta' miżuri tekniċi fil-Baħar Baltiku, fil-Belts u fis-Sound, li jemenda r-Regolament (KE) Nru 1434/98 u jħassar ir-Regolament (KE) Nru 88/98

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 37 tiegħu,

Wara li kkunsidra l-proposta mill-Kummissjoni (1),

Wara li kkunsidra l-Opinjoni tal-Parlament Ewropew (2),

Billi:

(1)

Skond l-Artikoli 2 u 4 tar-Regolament tal-Kunsill (KE) Nru 2371/2002 ta' l-20 ta' Diċembru 2002 dwar il-konservazzjoni u l-isfruttar sostenibbli ta' riżorsi tas-sajd skond il-Politika Komuni dwar is-Sajd (3), il-Kunsill, filwaqt li jieħu kont tal-parir xjentifiku, tekniku u ekonomiku disponibbli, għandu jistabbilixxi l-miżuri Komunitarji meħtieġa sabiex jiġi żgurat l-isfruttament ta' riżorsi akwatiċi ħajjin li jipprovdi kondizzjonijiet ekonomiċi, ambjentali u soċjali sostenibbli. Għak dak il-għan, il-Kunsill jista' jadotta miżuri tekniċi sabiex jillimita l-mortalità tal-ħut u l-impatt ambjentali ta' l-attivitajiet tas-sajd.

(2)

L-adeżjoni tal-Komunità mal-Konvenzjoni dwar is-Sajd u l-Konservazzjoni tar-Riżorsi Ħajjin fil-Baħar Baltiku u fil-Belts, kif emendata bil-Protokoll tal-Konferenza tar-rappreżentanti ta' l-Istati Partijiet għall-Konvenzjoni (minn hawn 'il quddiem imsejħa ’l-Konvenzjoni ta' Gdansk’) ġiet approvata permezz tad-Deċiżjoni tal-Kunsill 83/414/KEE (4).

(3)

Mindu ġiet stabbilita mill-Konvenzjoni ta' Gdansk, il-Kummissjoni Internazzjonali tas-Sajd fil-Baħar Baltiku (IBSFC) adottat pakkett ta' miżuri għall-konservazzjoni u l-immaniġġar tar-riżorsi tas-sajd fil-Baħar Baltiku. Il-Kummissjoni nnotifikat lill-Partijiet Kontraenti dwar ċerti rakkomandazzjonijiet għall-modifika ta' dawk il-miżuri tekniċi.

(4)

Huwa kunsiljabbli għall-Komunità li jiġu attwati tali rakkomandazzjonijiet. Madankollu, billi l-IBSFC tista' tiġi sostitwita minn koperazzjoni bilaterali mal-Federazzjoni Russa, ir-regoli Komunitarji ma għandhomx isegwu b'mod strett dawk ir-rakkomandazzjonijiet iżda minflok għandhom ifittxu li jistabbilixxu sistema komprensiva u konsistenti ta' miżuri tekniċi għall-ilmijiet Komunitarji, ibbażata fuq regoli eżistenti. Hemm lok għal simplifikazzjoni f'ċerti każi fejn ir-regoli eżistenti huma dettaljati mingħajr ħtieġa u/jew ma jistgħux ikunu ġustifikati għall-konservazzjoni tar-riżorsi.

(5)	Ir-Regolament (KE) Nru 88/98 (5) stabbilixxa ċerti miżuri tekniċi għall-konservazzjoni tar-riżorsi tas-sajd fl-ilmijiet tal-Baħar Baltiku, tal-Belts u tas-Sound.

(6)

L-applikazzjoni tar-Regolament (KE) Nru 88/98 uriet biċ-ċar ċerti defiċjenzi f'dak ir-Regolament rriżultaw fi problemi ta' applikazzjoni u ta' infurzar u li għandhom jiġu rettifikati, speċjalment billi jiġu definiti l-ispeċi mmirati u l-perċentwali rekwiżiti tal-qbid applikabbli għal skali ta' daqsijiet ta' malji ta' xbieki u għal żoni ġeografiċi differenti meta s-sajd isir b'ċertu tagħmir.

(7)	Il-mod li bih għandhom jiġu kalkolati l-perċentwali ta' l-ispeċi mmirati u ta' speċi oħra għandu jiġi definit.

(8)	Id-daqs minimu ta' kull speċi għandu jiġi ffissat b'kont meħud tas-selettività tad-daqs tal-malji tat-tagħmir tas-sajd li jista' jintuża għal dik l-ispeċi.

(9)	L-informazzjoni xjentifika turi li qiegħed isir qbid sekondarju (by-catches) ta' ammonti kbar ta' merluzz mhux adult fis-sajd tas-sallur bit-tkarkir. Is-sajd għas-sallur b'tagħmir attiv għandu jkun għaldaqstant projbit.

(10)

Il-Golf ta' Riga huwa ekosistema tal-baħar unika u pjuttost sensittiva li teħtieġ miżuri speċjali sabiex jiġi żgurat sfruttament sostenibbli tar-riżorsi tagħha u sabiex jitnaqqas l-impatt ta' l-attivitajiet tas-sajd. L-Artikolu 21 ta' l-Att ta' l-Adeżjoni ta' l-2003, għaldaqstant, jipprovdi li l-Kunsill għandu jemenda r-Regolament (KE) Nru 88/98 qabel id-data ta' adeżjoni bil-ħsieb li jiġu adottati l-miżuri meħtieġa ta' konservazzjoni fil-Golf ta' Riga.

(11)	Sabiex jiġu kontrollati l-attivitajiet tas-sajd, l-aċċess għall-Golf ta' Riga għandu jkun suġġett għal permessi speċjali tas-sajd kif imsemmi fir-Regolament tal-Kunsill (KE) Nru 1627/94 tas-27 ta' Ġunju 1994 li jistabbilixxi dispożizzjonijiet ġenerali dwar permessi speċjali tas-sajd (6).

(12)

L-informazzjoni xjentifika tindika li, għall-merluzz, it-tagħmir irmunkat mingħajr tieqa ta' ħruġ u immaljat normalment f'forma ta' djamanti fl-ixkora u fil-biċċa ta' l-estensjoni huwa inqas selettiv minn dak bit-tieqa ta' ħruġ tat-tip “BACOMA” jew fejn il-malji fl-ixkora u fil-biċċa ta' l-estensjoni ikunu mdawra 90°. Huwa għalhekk kunsiljabbli li fl-ilmijiet Komunitarji u għall-bastimenti Komunitarji ma jkunx permess l-użu ta' tagħmir irmunkat mingħajr it-tieqa tal-ħruġ tat-tip “BACOMA” jew mingħajr li l-malji ta' l-ixkora u tal-biċċa ta' l-estensjoni ikunu mdawra 90° meta l-merluzz ikun l-ispeċi mmirat.

(13)	Ir-Regolament (KE) Nru 1434/98 stabbilixxa l-kondizzjonijiet li taħthom jistgħu jinħattu l-aringi għal skopijiet industrijali diversi mill-konsum uman dirett (7).

(14)

Sabiex jiġu simplifikati r-regoli kumplessi tar-Regolament (KE) Nru 1434/98, id-dispożizzjonijiet ta' dak ir-Regolament li huma relevanti għall-Baħar Baltiku għandhom jiġu sostitwiti minn dispożizzjonijiet ġenerali, f'dan ir-Regolament, dwar qabdiet mhux magħżula. Ir-Regolament (KE) Nru 1434/98 għandu jiġi emendat f'dan is-sens.

(15)	Il-miżuri meħtieġa għall-implementazzjoni ta' dan ir-Regolament għandhom jiġu adottati skond id-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' implementazzjoni konferiti lill-Kummissjoni (8).

(16)	Għandhom jiġu adottati wkoll, skond id-Deċiżjoni 1999/468/KE, l-emendi għall-Anness I u l-Appendiċi 1 u 2 ta' l-Anness II ta' dan ir-Regolament.

(17)	Minħabba n-numru u l-firxa ta' bidliet li għandhom isiru lir-regoli, ir-Regolament (KE) Nru 88/98 għandu jitħassar u jiġi sostitwit minn test ġdid,

ADOTTA DAN IR-REGOLAMENT:

KAPITOLU I

AMBITU TA' APPLIKAZZJONI U DEFINIZZJONIJIET

Artikolu 1

Materja u ambitu ta' applikazzjoni

Dan ir-Regolament jistabbilixxi l-miżuri tekniċi ta' konservazzjoni fir-rigward tal-qbid u tal-ħatt ta' riżorsi tas-sajd fl-ilmijiet tal-baħar taħt is-sovranità jew il-ġurisdizzjoni ta' l-Istati Membri u li jinsabu fiż-żona ġeografika speċifikata fl-Anness I.

Artikolu 2

Definizzjonijiet

Għall-iskopijiet ta' dan ir-Regolament:

(a)

“tagħmir attiv” tfisser kwalunkwe tagħmir tas-sajd li l-operazzjoni tal-qbid għalih teħtieġ ċaqliq attiv tat-tagħmir, inklużi b'mod partikolari t-tagħmir irmunkat u t-tagħmir ċirkolanti; (i) “xibka tat-tkarkir” tfisser tagħmir li jkun irmunkat b'mod attiv minn bastiment tas-sajd jew aktar u li jikkonsisti fi xbiek li jkollu struttura f'forma ta' kon jew ta' piramida (bħala struttura tat-tagħmir tat-tkarkir) magħluqa fuq wara bi xkora (codend); (ii) “tkarkir bil-lasta” (beam trawl) tfisser tagħmir b'xibka tat-tkarkir miftuħa orizzontalment b'tubu ta' l-azzar jew ta' l-injam, il-lasta, u bi xbiek b'katini ta' l-art, tapiti tal-ktajjen (chain mats) jew ktajjen tat-tħarbit (tickler chains) li jkun irmunkat b'mod attiv fil-qiegħ mill-magna tal-bastiment; (iii) “tartarun Daniż” tfisser tagħmir ċirkolanti u rmunkat, operat minn dgħajsa permezz ta' żewġt iħbula twal (ħbula tat-tartarun) imfassal sabiex jidderiġi l-ħut lejn il-fetħa tat-tartarun. It-tagħmir magħmul minn xbiek, simili għax-xibka tat-tkarkir tal-qiegħ fid-disinn u d-daqs, jinkludi żewġ ġwienaħ twal, korp u xkora; (iv) “gangmu” tfisser xbiek jew nassa tal-metall immuntati fuq qafas ta' daqs u forma varjabbli, b'xafra li tobrox, xi drabi bis-snien, fin-naħa t'isfel tagħhom; (v) “tartarun xkora” tfisser tagħmir ċirkolanti magħmul minn xbiek fejn il-qiegħ tiegħu jingħaqad permezz ta' lenza ta' l-ixkora fil-qiegħ tax-xibka, li tgħaddi minn serje ta' anelli tul il-ħabel ta' l-art, li tippermetti li x-xibka tinġibed f'borża u tingħalaq.

(b)

“tagħmir passiv” tfisser kwalunkwe tagħmir tas-sajd li l-operazzjoni tal-qbid għalih ma teħtieġx ċaqliq attiv tat-tagħmir, u jinkludi għeżuli, xbieki tat-tħabbil, pariti, xbieki bin-nassa, lenez, drajnat u nases. Ix-xbieki jistgħu jikkonsistu minn xibka separata jew aktar attrezzati bi ħbula minn fuq, minn isfel u minn waħda għall-oħra, u jistgħu jiġu armati b'tagħmir għall-ankoraġġ, tal-wiċċ u għan-navigazzjoni. (i) “għeżula” u “xbiek tat-tħabbil” tfisser tagħmir magħmul minn biċċa waħda ta' xbiek u miżmuma wieqfa fl-ilma permezz ta' sufruni u piżijiet. Hija taqbad riżorsi akwatiċi ħajjin bit-tħabbil jew bit-tagħqid; (ii) “parit” tfisser tagħmir magħmul minn biċċtejn xibka jew aktar imdendla flimkien b'mod parallel fuq lenza waħda u miżmuma wieqfa fl-ilma permezz ta' sufruni jew piżijiet; (iii) “lenez” tfisser numru ta' lenez marbuta flimkien, jew imqiegħda fil-qiegħ jew jimxu mal-kurrent, b'kull waħda jkollha numru kbir ta' snanar bil-lixka;

(ċ)	“snanar” tfisser fil ta' l-azzar, mgħawweġ u misnun, li normalment ikollu l-garġi.

(d)	“ħin ta' immersjoni” tfisser il-perjodu mill-mument meta x-xbieki jitniżżlu l-ewwel darba fl-ilma sal-mument meta x-xbieki jittellgħu kompletament abbord il-bastiment tas-sajd;

(e)	“xbieki b'malji kwadri” tfisser kostruzzjoni ta' xbiek immuntat b'tali mod li miż-żewġ settijiet ta' linji paralleli ffurmati mill-ġnub tal-malji, sett wieħed ikun parallel, u l-ieħor f'angolu rett, ma' l-assi t-twil tax-xibka;

(f)	“xkora” tfisser l-aħħar 8 m tax-xibka tat-tkarkir, li tkun f'forma ta' ċilindru, jiġifieri bl-istess ċirkonferenza t-tul kollu, jew f'forma konika;

(g)	“borża ta' rinforz” tfisser biċċa xibka ċilindrika li ddawwar kompletament l-ixkora tax-xibka tat-tkarkir u li tista' tiġi marbuta ma' l-ixkora f'intervalli;

(h)	“ċinga ta' wara” tfisser iċ-ċinga ċirkolanti li tkun l-aktar lura u marbuta ma' l-ixkora, imkejla meta l-malji jiġu miġbuda fit-tul;

(i)	“ċinga ta' l-irfigħ” tfisser biċċa ħabel li ddawwar iċ-ċirkonferenza ta' l-ixkora jew tal-borża ta' rinforz, jekk ikun hemm waħda, u marbuta magħha permezz ta' ingases jew ħoloq;

(j)	“ċinga ċirkolanti” tfisser biċċa ħabel li ddawwar iċ-ċirkonferenza ta' l-ixkora jew tal-borża ta' rinforz u li tkun marbuta magħha;

(k)	“flapper” tfisser biċċa xbiek marbuta fuq ġewwa ta' tagħmir attiv b'mod li tippermetti l-qabdiet jgħaddu minn quddiem għal wara tat-tagħmir iżda li tillimita l-possibbiltà tagħhom li jerġgħu lura;

(l)	“baga ta' l-ixkora” tfisser unità, li żżomm fil-wiċċ, marbuta ma' l-ixkora;

(m)	“ħabel tal-baga” tfisser ħabel li jgħaqqad il-baga ta' l-ixkora ma' dik il-parti tat-tagħmir tas-sajd li tkun miżmuma fil-post jew immarkata;

(n)	“biċċa ta' estensjoni” tfisser sezzjoni mhux konika tax-xibka tat-tkarkir li jkollha forma ċilindrika, jiġifieri l-istess ċirkonferenza ta' l-ixkora t-tul kollu, li tkun magħquda jew tkompli, bħala estensjoni, ma' l-ixkora.

KAPITOLU II

XBIEKI U KONDIZZJONIJIET GĦALL-UŻU TAGĦHOM

TAQSIMA I

Speċi mmirati

Artikolu 3

Speċi mmirati u daqsijiet minimi tal-malji tax-xbieki

1.   Għal kull wieħed mis-suddiviżjonijiet elenkati fl-Anness I, id-daqsijiet tal-malji tax-xbieki ammissibbli għal kull speċi mmirata għandhom ikunu kif definiti fl-Anness II għas-sajd bit-tkarkir, bit-tartarun Daniż u b'tagħmir simili u kif definiti fl-Anness III għas-sajd bl-għeżuli, bix-xbieki tat-tħabbil u bil-pariti. L-ebda parti mit-tagħmir jew mix-xbieki ma għandha jkollha d-daqs tal-malji inqas mill-iżgħar daqs tal-malji f'kull skala ta' daqsijiet tal-malji.

2.   Il-perċentwali minima ta' l-ispeċi mmirati fost ir-riżorsi akwatiċi ħajjin li jinżammu abbord għal kull suddiviżjoni ġeografika u għal kull skala ta' daqsijiet tal-malji hija stabbilita fl-Anness II u fl-Anness III.

3.   Matul kull vjaġġ ta' sajd meta jinġarru gangmi abbord, għandu jkun projbit li tinżamm abbord u li titniżżel l-art kwalunkwe kwantità ta' riżorsi akwatiċi ħajjin ħlief jekk mill-inqas 85 % tal-piż ħaj tagħha jikkonsisti minn molluski u/jew Furcellaria lumbricalis.

4.   L-użu, f'xi suddiviżjoni, ta' għeżuli jew ta' xbieki tat-tħabbil b'daqsijiet tal-malji iżgħar minn dawk imsemmija fl-Anness III għandu jkun projbit.

5.   Għandu jkun projbit l-użu, f'kull suddiviżjoni, ta' pariti b'daqs tal-malji, f'dik il-parti tax-xibka bl-akbar malji, li ma jikkorrispondix ma' waħda mill-kategoriji stabbiliti fl-Anness III ħlief jekk id-daqs tal-malji fil-parti tax-xibka bl-iżgħar malji jkun iżgħar minn 16 mm. Jekk id-daqs ta' l-iżgħar malji ikun inqas minn 16 mm, il-malji kollha ta' daqs akbar minn 16 mm għandhom jikkorrispondu għall-kategoriji stabbiliti fl-Anness III.

6.   Għal kull vjaġġ ta' sajd, għandu jkun projbit li jitniżżlu l-art qabdiet li jkunu saru fis-suddiviżjonijiet elenkati fl-Anness I, u li nżammu abbord, meta ma jikkonformawx mal-kondizzjonijiet korrispondenti stabbiliti fl-Anness II jew l-Anness III.

Artikolu 4

Kalkolu ta' perċentwali ta' speċi mmirati

1.   Il-perċentwali ta' speċi mmirati msemmija fl-Annessi II u III għandhom jiġu kalkolati bħala l-proporzjon skond il-piż ħaj ta' l-ispeċi kollha elenkati fl-Annessi II u III li jinżammu abbord wara li jiġu magħżula jew li jitniżżlu l-art.

2.   Il-perċentwali ta' speċi mmirati u ta' speċi oħra għandha tinkiseb billi jiġi kalkolat it-total tal-kwantitajiet kollha ta' l-ispeċi mmirati u ta' speċi oħra elenkati fl-Annessi II u III li jinżammu abbord.

3.   Għandu jittieħed kont tal-kwantitajiet ta' speċi elenkati fl-Annessi II u III li jkunu ġew trasbordati minn xi bastiment tas-sajd meta jiġu kalkolati l-perċentwali ta' speċi mmirati għal dak il-bastiment.

4.   Il-perċentwali ta' speċi mmirati jistgħu jiġu kalkolati abbażi ta' kampjun rappreżentattiv wieħed jew aktar.

TAQSIMA II

Tagħmir attiv

Artikolu 5

Struttura tat-tagħmir tas-sajd

1.   Ma għandu jintuża l-ebda apparat li jostakola jew li altrimenti jnaqqas id-daqs tal-malji ta' l-ixkora.

2.   B'deroga mill-paragrafu 1, għandu jkun permess li jitwaħħal man-naħa ta' barra tal-parti ta' isfel ta' l-ixkora ta' kwalunkwe tagħmir attiv, xi kanvas, xibka jew materjal ieħor li jkollu l-għan li jipproteġiha jew inaqqas milli titgħarraq. Dan il-materjal għandu jkun imwaħħal biss tul it-truf ta' quddiem u tal-ġenb ta' l-ixkora.

3.   B'deroga mill-paragrafu 1, għas-sajd bit-tkarkir, bit-tartarun Daniż jew b'tagħmir simili b'daqs tal-malji iżgħar minn 90 mm, għandu jkun permess li titwaħħal borża ta' rinforz man-naħa ta' barra ta' l-ixkora. Id-daqs tal-malji tal-borża tar-rinforz għandu jkun mill-inqas id-doppju ta' dak ta' l-ixkora u fl-ebda każ ma jkun inqas minn 80 mm.

Tista' titwaħħal borża ta' rinforz fil-postijiet li ġejjin:

(a)	fit-tarf ta' quddiem,

(b)	fit-tarf ta' wara, jew

(ċ)	fiċ-ċirkonferenza bejn in-naħa ta' wara u dik ta' quddiem.

Borża tar-rinforz tista' tinqafel

(a)	maċ-ċirkonferenza ta' l-ixkora u tal-biċċa ta' l-estensjoni madwar ringiela ta' malji; jew

(b)	fit-tul ma' ringiela waħda ta' malji.

4.   B'deroga mill-paragrafu 1, għandu jkun permess li:

(a)

tintuża f'tagħmir attiv xibka bla ritorn jew flapper. Il-flapper tista' titwaħħal ġewwa l-ixkora jew inkella quddiem l-ixkora. Id-dispożizzjonijiet dwar l-iżgħar daqsijiet tal-malji stabbiliti fl-Anness II ma għandhomx japplikaw għall-flapper. Id-distanza mill-punt fuq quddiem fejn tkun imwaħħla l-flapper sat-tarf ta' wara ta' l-ixkora għandha tkun mill-inqas tliet darbiet daqs it-tul tal-flapper;

(b)	jitwaħħal man-naħa ta' barra ta' kwalunkwe parti ta' l-ixkora sensur maħsub għall-kejl tal-volum tal-qabdiet;

(ċ)	jintużaw għas-sajd bit-tkarkir, bit-tartarun Daniż jew b'tagħmir simili b'daqs tal-malji iżgħar minn 90 mm, ċineg ċirkolanti u ċinga ta' l-irfigħ imwaħħla man-naħa ta' barra ta' l-ixkora;

(d)	tintuża għas-sajd bit-tkarkir, bit-tartarun Daniż jew b'tagħmir simili b'daqs tal-malji ta' 90 mm jew akbar, ċinga ta' l-irfigħ waħda mwaħħla man-naħa ta' barra ta' l-ixkora;

(e)	jitwaħħlu sufruni fuq iż-żewġ ċmusi laterali ta' l-ixkora;

(f)	tintuża ċinga ta' wara mwaħħla man-naħa ta' barra ta' l-ixkora. Id-distanza bejn iċ-ċinga ta' wara u s-siegla ta' l-għeluq (codline) għandha tkun ta' daqs jew inqas minn 50 cm.

Artikolu 6

Strutturi projbiti speċifiċi

Għandu jkun projbit l-użu ta':

(a)	kwalunkwe xkora li fiha n-numru ta' malji, ugwalment imdaqqsa, madwar kwalunkwe ċirkonferenza ta' l-ixkora jiżdied min-naħa ta' quddiem għan-naħa ta' wara;

(b)	kwalunkwe estensjoni li ċ-ċirkonferenza tagħha, fi kwalunkwe punt, tkun iżgħar miċ-ċirkonferenza tat-tarf ta' quddiem nett ta' l-ixkora li magħha tkun imwaħħla l-estensjoni;

(ċ)	kwalunkwe xkora ta' daqs tal-malji ta' 32 mm jew akbar li jkollha fiha xi malji li mhumiex f'forma ta' djamant jew kwadri;

(d)	kwalunkwe xibka tat-tkarkir, tartarun Daniż jew tagħmir simili b'daqs tal-malji ta' 90 mm jew akbar li miegħu jkun hemm imwaħħla xkora b'mod ieħor milli meħjuta f'dik il-parti tax-xibka 'l quddiem mill-ixkora;

(e)	kwalunkwe xibka tat-tkarkir, tartarun Daniż jew tagħmir simili b'daqs tal-malji ta' 90 mm jew akbar b'aktar minn 100 malja djamant miftuħa u inqas minn 40 malja djamant miftuħa fi kwalunkwe ċirkonferenza ta' l-ixkora, bl-esklużjoni tal-parti mwaħħla jew taċ-ċmusi;

(f)	kwalunkwe xkora li t-tul imġebbed tan-nofs ta' fuq tagħha ma jkunx approssimament daqs it-tul imġebbed tan-nofs ta' isfel.

Artikolu 7

Selettività fis-sajd bit-tkarkir għall-merluzz

Il-Kummissjoni għandha, abbażi ta' parir mill-Kumitat Xjentifiku, Tekniku u Ekonomiku għas-Sajd, tippreżenta lill-Kunsill mhux aktar tard minn Settembru 2007 valutazzjoni tas-selettività għall-merluzz tat-tagħmir attiv li għalih il-merluzz ikun rikonoxxut bħala speċi mmirata.

TAQSIMA III

Tagħmir passiv

Artikolu 8

Dimensjonijiet u l-ħin ta' immersjoni

1.   Meta s-sajd isir bl-użu ta' l-għeżuli, bix-xbieki tat-tħabbil jew bil-pariti, l-użu ta' aktar minn 9 km ta' xbieki għall-bastimenti b'tul totali ta' 12 m jew anqas u ta' 21 km ta' xbieki għall-bastimenti b'tul totali ta' aktar minn 12 m għandu jkun projbit.

2.   Il-ħin ta' immersjoni tax-xbieki msemmija fil-paragrafu 1 ma għandux jaqbeż it-48 siegħa.

3.   B'deroga mill-paragrafu 2, il-ħin ta' l-immersjoni tax-xbieki msemmija fil-paragrafu 1 meta s-sajd isir taħt il-kopertura tas-silġ ma għandux ikun limitat.

Artikolu 9

Restrizzjonijiet dwar xbieki tal-mitlaq

1.   Mill-1 ta' Jannar 2008 'il quddiem, għandhom ikunu projbiti ż-żamma abbord, jew l-użu għas-sajd, ta' xbieki tal-mitlaq.

2.   Fl-2006 u 2007, bastiment jista' jżomm abbord, jew juża għas-sajd, xbieki tal-mitlaq jekk ikun awtorizzat li jagħmel hekk mill-awtoritajiet kompetenti ta' l-Istat Membru li tiegħu itajjar il-bandiera.

3.   Fl-2006 u 2007, in-numru massimu ta' bastimenti li jistgħu jkunu awtorizzati minn Stat Membru li jżommu abbord, jew jużaw għas-sajd, xbieki tal-mitlaq, ma jistax jaqbeż l-40 % u l-20 % rispettivament tal-bastimenti tas-sajd li kienu jużaw ix-xbieki tal-mitlaq matul il-perjodu mill-2001 sa l-2003.

4.   B'deroga mill-paragrafu 3, fis-suddiviżjonijiet 25-32 in-numru massimu ta' bastimenti li jistgħu jkunu awtorizzati minn Stat Membru sabiex iżommu xbieki tal-mitlaq abbord jew sabiex jużawhom għas-sajd ma għandux jaqbeż l-40 % tal-bastimenti tas-sajd li użaw xbieki tal-mitlaq matul il-perjodu mill-2001 sa l-2003.

5.   L-Istati Membri għandhom jikkomunikaw lill-Kummissjoni, sat-30 ta' April ta' kull sena, lista tal-bastimenti awtorizzati li jistagħdu bl-użu tax-xbieki tal-mitlaq.

Artikolu 10

Kondizzjonijiet għax-xbieki tal-mitlaq

1.   Il-kaptan ta' bastiment tas-sajd li juża x-xbieki tal-mitlaq għandhu jżomm ġurnal ta' abbord li fih huwa għandu jirreġistra l-informazzjoni li ġejja ġurnata b'ġurnata:

(a)	it-tul totali tax-xbieki abbord:

(b)	it-tul totali tax-xbieki użati f'kull operazzjoni tas-sajd:

(ċ)	il-kwantità, id-data u l-pożizzjoni ta' qabdiet sekondarji ta' ċetaċji.

2.   Il-bastimenti tas-sajd kollha li jużaw ix-xbieki tal-mitlaq għandhom iżommu abbord l-awtorizzazzjoni imsemmija fl-Artikolu 9(2).

TAQSIMA IV

Dispożizzjonijiet komuni dwar it-tagħmir u l-użu tiegħu

Artikolu 11

Determinazzjoni tad-daqs tal-malji u l-ħxuna ta' l-ispag

Għandu japplika r-Regolament tal-Kummissjoni (KE) Nru 129/2003 ta' l-24 ta’ Jannar 2003 li jippreskrivi regoli dettaljati sabiex jiġi stabbilit id-daqs tal-malji u l-ħxuna ta' l-ispag tax-xbiek tas-sajd (9).

Artikolu 12

L-ilħuq tal-perċentwali rekwiżiti ta' qabdiet

1.   Il-kwantitajiet ta' riżorsi akwatiċi ħajjin maqbuda li jeċċedu l-perċentwali permessi speċifikati fl-Annessi II u III ma jistgħux jitniżżlu l-art iżda għandhom jintefgħu lura l-baħar qabel ma l-qabda titniżżel l-art.

2.   Minkejja l-paragrafu 1, kull meta waqt vjaġġ ta' sajd xi bastiment jitlaq minn wieħed mill-gruppi ta' suddiviżjonijiet elenkati fl-Annessi II u III, il-perċentwali minima ta' speċi mmirati kif stabbilita fl-Annessi II u III li tkun maqbuda u miżmuma abbord minn dik iż-żona ġeografika għandha tintlaħaq fi żmien sagħtejn.

Artikolu 13

Kondizzjonijiet għall-użu tat-tagħmir

1.   Tagħmir li ma jistax jintuża ġewwa żona ġeografika partikolari jew matul ċertu perjodu għandu jiġi stivat b'tali mod li ma jkunx lest sabiex jintuża fiż-żona projbita jew matul il-perjodu projbit. It-tagħmir ta' riżerva għandu jiġi stivat separatament u b'tali mod li ma jkunx lest sabiex jintuża.

2.   It-tagħmir tas-sajd għandu jitqies li ma jkunx lest sabiex jintuża jekk:

(a)	fil-każ ta' xbieki tat-tkarkir, ta' tartaruni Daniżi u ta' tagħmir simili ħlief għat-tkarkir tal-par: (i) it-twavel tat-tkarkir ikunu marbuta sew man-naħa ta' ġewwa jew ta' barra tal-murata jew mal-gallows, (ii) il-gerlini jkunu maħlulin minn mat-twavel jew mill-piżijiet tat-tkarkir;

(b)	fil-każ ta' tkarkir bil-par il-piżijiet tan-naħa ta' barra ikunu maħlulin u stivati

(ċ)	fil-każ ta' lenez, għeżuli, xbieki tat-tħabbil u pariti: (i) ix-xbieki jkunu stivati taħt kopertura marbuta, (ii) il-lenez u s-snanar jinżammu f'kaxex magħluqa;

(d)	fil-każ ta' tartaruni xkora, il-fil prinċipali jew dak ta' isfel ikun maħlul minn mat-tartarun.

3.   B'deroga mill-paragrafu 1, fejn jintuża tagħmir li jkollu l-merluzz (Gadus morhua) definit għalih bħala speċi mmirata skond l-Annessi II jew III, l-ebda tip ta' tagħmir ieħor ma għandu jinżamm abbord.

KAPITOLU III

DAQS MINIMU TAL-ĦUT IMNIŻŻEL L-ART

Artikolu 14

Kejl tal-ħut

1.   Ħuta għandha titqies bħala taħt id-daqs indikat jekk tkun iżgħar mid-daqs minimu speċifikat fl-Anness IV għall-ispeċi relevanti u għaż-żona ġeografika relevanti.

2.   Id-daqs ta' ħuta għandu jitkejjel mill-ponta tal-ħalq magħluq sat-tarf estrem tar-rixa tad-denb.

Artikolu 15

Żamma abbord ta' ħut taħt id-daqs

1.   Ħut li jkun taħt id-daqs indikat ma għandux jinżamm abbord jew jiġi trasbordat, imniżżel l-art, trasportat, maħżun, mibjugħ, esibit jew offrut għall-bejgħ, iżda għandu jintefa' lura l-baħar minnufih.

2.   Għall-ħut minbarra dawk definiti fl-Anness II bħala speċi mmirati għall-kategoriji ta' daqs tal-malji “iżgħar minn 16 mm” jew “16 sa 31 mm” maqbud bix-xbieki tat-tkarkir, bit-tartaruni Daniżi jew b'tagħmir simili ta' daqs tal-malji inqas minn 32 mm, jew b'tartaruni xkora, il-paragrafu 1 ma għandux japplika, bil-kondizzjoni li dawk il-ħut ma jiġux magħżula u ma jiġux mibjugħa, ma jiġux esibiti jew offruti għall-bejgħ għall-konsum uman.

KAPITOLU IV

RESTRIZZJONIJIET RELATATI MA' ĊERTI ŻONI, TIPI TA' SAJD JEW RIŻORSI AKWATIĊI ĦAJJIN

Artikolu 16

Żoni projbiti

Għandu jkun projbit tul is-sena kollha, li jsir sajd bi kwalunkwe tagħmir attiv fiż-żona ġeografika delimitata permezz ta' lossodromji (“rhumb lines”) bejn il-pożizzjonijiet li ġejjin, li għandhom jitkejlu skond is-sistema ta' koordinati WGS84:

1.	54° 23′ N, 14° 35′ E

2.	54° 21′ N, 14° 40′ E

3.	54° 17′ N, 14° 33′ E

4.	54° 07′ N, 14° 25′ E

5.	54° 10′ N, 14° 21′ E

6.	54° 14′ N, 14° 25′ E

7.	54° 17′ N, 14° 17′ E

8.	54° 24′ N, 14° 11′ E

9.	54° 27′ N, 14° 25′ E

10.	54° 23′ N, 14° 35′ E

Artikolu 17

Restrizzjonijiet fuq is-sajd għas-salamun u għat-trota tal-baħar

1.   Iż-żamma abbord tas-salamun (Salmo salar) jew tat-trota tal-baħar (Salmo trutta) għandu jkun projbit:

(a)	mill-1 ta' Ġunju sal-15 ta' Settembru fl-ilmijiet tas-suddiviżjonijiet 22 sa 31,

(b)	mill-15 ta' Ġunju sat-30 ta' Settembru fl-ilmijiet tas-suddiviżjoni 32.

2.   Iż-żona ta' projbizzjoni matul l-istaġun magħluq għandha tkun lil hinn minn erba' mili nawtiċi mkejla mil-linji bażi.

3.   B'deroga mill-paragrafu 1, għandu jkun permess li jinżamm abbord salamun (Salmo salar) jew trota tal-baħar (Salmo trutta) maqbuda bi xbieki tan-nassa.

Artikolu 18

Restrizzjonijiet fuq sajd għas-sallur

Iż-żamma abbord ta' sallur maqbud bi kwalunkwe tagħmir attiv għandha tkun projbita tul is-sena kollha.

Artikolu 19

Restrizzjonijiet fuq il-ħatt ta' qabdiet li ma jkunux ġew magħżula

1.   Qabdiet mhux magħżula għandhom jitniżżlu l-art biss fil-portijiet u fl-iskali fejn ikun operat programm ta' kampjunament imsemmi fil-paragrafu 2.

2.   L-Istati Membri għandhom jiżguraw li jkun hemm fis-seħħ programm adegwat ta' kampjunament li jippermetti monitoraġġ effettiv tal-ħatt ta' qabdiet mhux magħżula skond l-ispeċi.

KAPITOLU V

MIŻURI SPEĊIFIĊI GĦALL-GOLF TA' RIGA

Artikolu 20

Permess tas-sajd speċjali

1.   Sabiex isir sajd fis-suddiviżjoni 28-1, il-bastimenti għandhom ikollhom permess speċjali tas-sajd maħruġ skond l-Artikolu 7 tar-Regolament (KE) Nru 1627/94.

2.   L-Istati Membri għandhom jiżguraw li l-bastimenti li nħarġilhom il-permess speċjali tas-sajd msemmi fil-paragrafu 1, jiġu inklużi f'lista, li jkun fiha l-isem u n-numru ta' reġistrazzjoni interna tagħhom, li titqiegħed għad-dispożizzjoni tal-pubbliku fuq website ta' l-Internet, li l-indirizz tiegħu jkun provdut minn kull Stat Membru lill-Kummissjoni u lill-Istati Membri.

3.   Il-bastimenti inklużi fil-lista għandhom jissodisfaw il-kondizzjonijiet li ġejjin:

(a)	il-qawwa totali tal-magni (kW) tal-bastimenti fil-listi ma għandhiex tkun aktar minn dik osservata għal kull Stat Membru fis-snin 2000 - 2001 fis-suddiviżjoni 28-1; u

(b)	il-qawwa tal-magni ta' bastiment ma għandhiex tkun aktar minn 221 kilowatt (kW) fi kwalunkwe waqt.

Artikolu 21

Sostituzzjoni tal-bastimenti jew tal-magni

1.   Kwalunkwe bastiment individwali fil-lista msemmija fl-Artikolu 20(2) jista' jiġi sostitwit b'bastiment jew bastimenti oħra, bil-kondizzjoni li:

(a)	tali sostituzzjoni ma twassalx għal żieda fit-total ta' qawwa tal-magni kif indikat fl-Artikolu 20(3)(a) fl-Istat Membru konċernat, u

(b)	il-qawwa tal-magni ta' kwalunkwe bastiment ta' sostituzzjoni ma taqbiżx il-221 kW fi kwalunkwe waqt.

2.   Il-magna ta' kwalunkwe bastiment individwali inkluż fil-lista msemmija fl-Artikolu 20(2) tista' tiġi sostitwita, bil-kondizzjoni li:

(a)	is-sostituzzjoni ta' magna ma twassalx sabiex il-qawwa tal-magni tal-bastiment taqbeż il-221 kW fi kwalunkwe waqt, u

(b)	il-qawwa tal-magna ta' sostituzzjoni ma tkunx tali li s-sostituzzjoni twassal għal żieda fil-qawwa totali tal-magni kif indikat fl-Artikolu 20(3) (a) għall-Istat Membru konċernat.

Artikolu 22

Projbizzjoni tat-tkarkir

Fis-suddiviżjoni 28-1, is-sajd bit-tkarkir għandu jkun projbit f'ilmijiet ta' inqas minn 20 m fond.

KAPITOLU VI

DISPOŻIZZJONIJIET ĠENERALI

Artikolu 23

Tagħmir u prattika tas-sajd projbiti

1.   Il-qbid ta' riżorsi akwatiċi ħajjin bl-użu ta' metodi li jinkorporaw l-użu ta' splussivi, ta' sustanzi velenużi jew stupefaċenti, ta' kurrent elettriku jew ta' kwalunkwe tip ta' projettili għandu jkun projbit.

2.   Il-bejgħ, il-wiri jew l-offerta għall-bejgħ ta' riżorsi akwatiċi ħajjin maqbuda bl-użu ta' metodi msemmija fil-paragrafu 1 għandhom ikunu pprojbiti.

Artikolu 24

Riċerka xjentifika

1.   Dan ir-Regolament ma għandux japplika għal operazzjonijiet ta' sajd imwettqa biss għall-fini ta' investigazzjonijiet xjentifiċi, suġġett għall-kondizzjonijiet li ġejjin:

(a)	l-operazzjonijiet ta' sajd għandhom jitwettqu bil-permess u taħt l-awtorità ta' l-Istat Membru jew l-Istati Membri konċernati,

(b)	l-Istat Membru jew l-Istati Membri li fl-ilmijiet tagħhom titwettaq ir-riċerka għandhom ikunu ġew mgħarrfa minn qabel dwar l-operazzjonijiet ta' sajd, u

(ċ)	il-bastiment li jwettaq l-operazzjonijiet ta' sajd irid iġorr abbord awtorizzazzjoni maħruġa mill-Istat Membru li tiegħu l-bastiment itajjar il-bandiera.

2.   Minkejja l-paragrafu 1, ir-riżorsi akwatiċi ħajjin maqbuda għall-finijiet speċifikati fil-paragrafu 1 ma jistgħux jiġu mibjugħa, maħżuna, esibiti jew offruti għall-bejgħ, ħlief jekk:

(a)	jissodisfaw id-daqsijiet minimi għall-ħatt elenkati fl-Anness IV u, għar-riżorsi li għalihom ikunu ffissati l-opportunitajiet għas-sajd, tali opportunitajiet ma jkunux eżawriti; jew

(b)	jinbiegħu direttament għal finijiet diversi mill-konsum uman.

Artikolu 25

Stokkjar mill-ġdid artifiċjali u trapjant

Dan ir-Regolament ma għandux japplika għal operazzjonijiet ta' sajd imwettqa biss għall-fini ta' stokkjar mill-ġdid artifiċjali jew ta' trapjant ta' riżorsi akwatiċi ħajjin li jitwettqu bil-permess u taħt l-awtorità ta' l-Istat Membru jew ta' l-Istati Membri konċernati. Meta l-istokkjar mill-ġdid artifiċjali jew it-trapjant jitwettqu fl-ilmijiet ta' Stat Membru jew ta' Stati Membri oħra, l-Istati Membri kollha konċernati għandhom ikunu mgħarrfa minn qabel.

Artikolu 26

Miżuri meħuda minn Stati Membri applikabbli biss għal bastimenti tas-sajd li jtajru l-bandiera tagħhom

1.   L-Istati Membri jistgħu, għall-konservazzjoni u l-immaniġġar ta' l-istokkijiet jew sabiex inaqqsu l-effett tas-sajd fuq l-ekosistema tal-baħar, jieħdu miżuri tekniċi maħsuba sabiex jillimitaw l-opportunitajiet ta' sajd li:

(a)	jissupplementaw miżuri disposti fir-Regolamenti Komunitarji dwar is-sajd; jew

(b)	imorru lil hinn mir-rekwiżiti minimi stabbiliti fir-Regolamenti Komunitarji dwar is-sajd.

2.   Il-miżuri msemmija fil-paragrafu 1 għandhom japplikaw biss għas-sajjieda ta' l-Istati Membri konċernati u għandhom ikunu kompatibbli mal-liġi Komunitarja.

3.   L-Istat Membru konċernat għandu jikkomunika mingħajr dewmien tali miżuri lill-Istati Membri l-oħra u lill-Kummissjoni.

4.   L-Istati Membri għandhom jipprovdu lill-Kummissjoni, fuq talba tagħha, bl-informazzjoni kollha meħtieġa għall-valutazzjoni jekk il-miżuri jikkonformawx mal-kondizzjonijiet stabbiliti fil-paragrafu 1.

5.   Jekk il-Kummissjoni tikkonkludi li l-miżuri ma jikkonformawx mal-kondizzjonijiet stabbiliti fil-paragrafu 1, hija għandha tadotta deċiżjoni li titlob lill-Istat Membru jirtira jew jimmodifika l-miżuri.

Artikolu 27

Valutazzjoni xjentifika tat-tipi ta' tagħmir

Sa l-1 ta' Jannar 2008, il-Kummissjoni għandha tiżgura li ssir valutazzjoni xjentifika ta' l-effetti ta' l-użu b'mod partikolari ta' l-għeżuli, pariti u xbieki tat-tħabbil fuq ċetaċji u li l-konklużjonijiet tagħha jiġu preżentati lill-Parlament Ewropew u lill-Kunsill.

KAPITOLU VII

DISPOŻIZZJONIJIET FINALI

Artikolu 28

Regoli implementattivi

Għandhom jiġu adottati regoli dettaljati għall-implementazzjoni ta' dan ir-Regolament skond il-proċedura msemmija fl-Artikolu 30(2) tar-Regolament (KE) Nru 2371/2002.

Artikolu 29

Emendi lill-Annessi

Għandhom jiġu adottati emendi għall-Anness I u għall-Appendiċi 1 u 2 ta' l-Anness II skond il-proċedura msemmija fl-Artikolu 30(3) tar-Regolament (KE) Nru 2371/2002.

Artikolu 30

Emendi lir-Regolament (KE) Nru 1434/98

Ir-Regolament (KE) Nru 1434/98 huwa b'dan emendat kif ġej:

1)	fl-Artikolu 1, il-paragrafu 2 għandu jiġi mħassar;

2)	fl-Artikolu 2, il-paragrafi 2 u 3 għandhom jiġu mħassra;

3)

fl-Artikolu 3, il-paragrafu 1 għandu jiġi mibdul b'dan li ġej: “1.   Il-qabdiet ta' l-aringi li jinqabdu: — fir-Reġjuni 1 u 2 bi xbieki mkarkra li d-daqs ta' l-iżgħar toqob tagħhom ikun ta' 32 mm jew akbar jew, — fir-Reġjun 3 bi xbieki mkarkra li d-daqs ta' l-iżgħar toqob tagħhom ikun ta' 40 mm jew akbar jew, — fir-Reġjuni 1 jew 2 jew 3 bi kwalunkwe tagħmir tas-sajd minbarra bi xbieki mkarkra, ma għandhomx jinħattu ħlief għall-konsum dirett tal-bniedem sakemm ma jkunux l-ewwel ġew offruti għall-bejgħ għall-konsum dirett tal-bniedem u ma jkunx instab xerrej għalihom.” ;

4)	fl-Artikolu 3, il-paragrafu 2 għandu jiġi mibdul b'dan li ġej: “2.   Madankollu, l-aringi li jinqabdu bi kwalunkwe tagħmir tas-sajd taħt il-kondizzjonijiet speċifikati fl-Artikolu 2 jistgħu jinħattu għal skopijiet oħra minbarra dak tal-konsum dirett tal-bniedem.”

Artikolu 31

Taħsir

Ir-Regolament (KE) Nru 88/98 huwa b'dan imħassar.

Kull referenza għar-Regolament imħassar għandha tiġi mifhuma bħala referenza għal dan ir-Regolament u għandha tinqara skond it-Tabella ta' Korrelazzjoni fl-Anness V.

Artikolu 32

Dħul fis-seħħ

Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

Dan ir-Regolament għandu japplika mill-1 ta' Jannar 2006.

---

(1)  ĠU C 125, 24.5.2005, p. 12.

(2)  Opinjoni mogħtija fit-13 ta' Ottubru 2005 (għadha mhijiex pubblikata fil-Ġurnal Uffiċjali).

(3)  ĠU L 358, 31.12.2002, p. 59.

(4)  ĠU L 237, 26.8.1983, p. 4.

(5)  ĠU L 9, 15.1.1998, p. 1. Regolament kif l-aħħar emendat bir-Regolament (KE) Nru 289/2005 (ĠU L 49, 22.2.2005, p. 1).

(6)  ĠU L 171, 6.7.1994, p. 7.

(7)  ĠU L 191, 7.7.1998, p. 10.

(8)  ĠU L 184, 17.7.1999, p. 23.

(9)  ĠU L 22, 25.1.2003, p. 5.

---

---

---

---

---

---