This document is an excerpt from the EUR-Lex website
Document 32014D0481
2014/481/EU: Council Decision of 14 July 2014 on the position to be taken on behalf of the European Union with regard to the participation in the CARIFORUM-EU Consultative Committee provided for by the Economic Partnership Agreement between the CARIFORUM States, of the one part, and the European Community and its Member States, of the other part
2014/481/UE: Deċiżjoni tal-Kunsill tal- 14 ta' Lulju 2014 dwar il-pożizzjoni li għandha tittieħed f'isem l-Unjoni Ewropea rigward il-parteċipazzjoni fil-Kumitat Konsultattiv tal-CARIFORUM-UE previst mill-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra
2014/481/UE: Deċiżjoni tal-Kunsill tal- 14 ta' Lulju 2014 dwar il-pożizzjoni li għandha tittieħed f'isem l-Unjoni Ewropea rigward il-parteċipazzjoni fil-Kumitat Konsultattiv tal-CARIFORUM-UE previst mill-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra
ĠU L 216, 22.7.2014, p. 1–4
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
22.7.2014 |
MT |
Il-Ġurnal Uffiċjali tal-Unjoni Ewropea |
L 216/1 |
DEĊIŻJONI TAL-KUNSILL
tal-14 ta' Lulju 2014
dwar il-pożizzjoni li għandha tittieħed f'isem l-Unjoni Ewropea rigward il-parteċipazzjoni fil-Kumitat Konsultattiv tal-CARIFORUM-UE previst mill-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra
(2014/481/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 207 flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1) |
Il-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra (1) (il-“Ftehim”), ġie ffirmat fil-15 ta' Ottubru 2008, u ġie applikat provviżjorjament sa mid-29 ta' Diċembru 2008. |
(2) |
L-Artikolu 232(2) tal-Ftehim jipprevedi li l-Kunsill Konġunt tiegħu jiddeċiedi dwar il-parteċipazzjoni fil-Kumitat Konsultattiv tal-CARIFORUM-UE tas-soċjetà ċivili, bl-għan li tkun żgurata rappreżentazzjoni wiesgħa tal-partijiet interessati kollha. |
(3) |
Huwa importanti li jiġu stabbiliti l-istituzzjonijiet kollha previsti mill-Ftehim, speċjalment il-Kumitat Konsultattiv tal-CARIFORUM-UE li għadu ma ssejjaħx, minkejja r-rwol tiegħu fil-promozzjoni tad-djalogu, il-kooperazzjoni u l-monitoraġġ skont il-Ftehim. |
(4) |
Il-Kumitat Ekonomiku u Soċjali Ewropew esprima r-rieda tiegħu li jgħin lill-Kumitat Konsultattiv tal-CARIFORUM-UE, billi jorganizza l-għażla tar-rappreżentanti Ewropej għal dak il-Kumitat, u billi jassumi l-funzjoni tas-Segretarjat ta' dak il-Kumitat fil-perjodu inizjali wara li dan jiġi stabbilit. |
ADOTTA DIN ID-DEĊIŻJONI:
Artikolu 1
Il-pożizzjoni li għandha tiġi adottata f'isem l-Unjoni fir-rigward tal-adozzjoni ta' deċiżjoni tal-Kunsill Konġunt tal-CARIFORUM-UE prevista mill-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra, dwar il-Kumitat Konsultattiv tagħha, għandha tiġi bbażata fuq l-abbozz ta' deċiżjoni tal-Kunsill Konġunt mehmuża ma' din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, l-14 ta' Lulju 2014.
Għall-Kunsill
Il-President
M. MARTINA
(1) ĠU L 289, 30.10.2008, p. 3.
ABBOZZ
DEĊIŻJONI Nru …/2014 TAL-KUNSILL KONĠUNT TAL-CARIFORUM-UE
ta'
stabbilit mill-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra, rigward il-parteċipazzjoni fil-Kumitat Konsultattiv tal-CARIFORUM-UE
IL-KUNSILL KONĠUNT TAL-CARIFORUM-UE,
Wara li kkunsidra l-Ftehim ta' Sħubija Ekonomika bejn l-Istati tal-CARIFORUM, min-naħa l-waħda, u l-Komunità Ewropea u l-Istati Membri tagħha, min-naħa l-oħra (“il-Ftehim”), u b'mod partikolari l-Artikolu 232(2) tiegħu,
Billi fid-dawl tal-għanijiet stabbiliti fl-Artikolu 1 tal-Ftehim, u l-impenn lejn il-monitoraġġ tiegħu stipulat fl-Artikolu 5 tal-Ftehim, huwa xieraq li tiġi determinata l-parteċipazzjoni fil-Kumitat Konsultattiv tal-CARIFORUM-UE,
ADOTTA DIN ID-DEĊIŻJONI:
Artikolu 1
1. Il-Kumitat Konsultattiv tal-CARIFORUM-UE (“il-Kumitat”) ikun magħmul minn erbgħin (40) rappreżentant permanenti ta' organizzazzjonijiet tas-soċjetà ċivili kif ġej:
(a) |
ħamsa u għoxrin (25) li jirrappreżentaw organizzazzjonijiet allokati fl-Istati tal-CARIFORUM; u |
(b) |
ħmistax (15) li jirrappreżentaw organizzazzjonijiet allokati fl-Unjoni Ewropea. |
2. F'kull sett ta' rappreżentanti msemmija hawn fuq, ikun hemm rappreżentanza bbilanċjata ta':
(a) |
l-organizzazzjonijiet ta' min jimpjega, |
(b) |
trade unions, |
(c) |
organizzazzjonijiet oħra ekonomiċi, soċjali u mhux governattivi, inklużi organizzazzjonijiet għall-iżvilupp u organizzazzjonijiet ambjentali; u |
(d) |
il-komunità akkademika. |
3. Ir-rappreżentanti permanenti jservu għal sentejn. Jiġu żgurati l-kompetenzi rilevanti u r-rappreżentanza ġeografika u settorjali wiesgħa.
4. Għall-finijiet ta' din id-Deċiżjoni, “organizzazzjonijiet tas-soċjetà ċivili” jinkludi istituzzjonijiet, assoċjazzjonijiet, fondazzjonijiet, gruppi ta' promozzjoni u entitajiet oħra ta' natura mhux governattiva li ma għandhomx skop ta' qligħ u li huma kapaċi jipprovdu pariri jew jikkontribwixxu informazzjoni speċjalizzata dwar kwistjonijiet koperti mill-Ftehim, kif ukoll rappreżentanti tal-komunità akkademika.
5. Organizzazzjoni titqies li tkun fit-territorju ta' wieħed mill-Istati tal-CARIFORUM jew fit-territorju tal-Unjoni Ewropea jekk tali organizzazzjoni jkollha l-uffiċċju statutorju, it-tmexxija u l-kontroll ċentrali fit-territorju ta' wieħed mill-Istati tal-CARIFORUM jew fit-territorju tal-Unjoni Ewropea skont ma jkun il-każ.
Artikolu 2
1. Il-Kumitat għandu jkun kompost mill-Kunsill Konġunt tal-CARIFORUM-UE tar-rappreżentanti ta' organizzazzjonijiet tas-soċjetà ċivili magħżula skont l-Artikolu 1 mill-Unjoni Ewropea u mill-Istati tal-CARIFORUM, rispettivament.
2. Il-Kunsill Konġunt tal-CARIFORUM-UE jista' wkoll jimmodifika l-lista tal-membri fejn meħtieġ.
3. Kull post vakanti fis-sħubija tal-Kumitat ma għandux jinvalida l-kostituzzjoni tal-Kumitat jew inaqqas id-dritt tal-membri li jifdal milli jaġixxu.
4. Maġġoranza tal-membri magħżula mill-Unjoni Ewropea u maġġoranza ta' membri magħżula mill-Istati tal-CARIFORUM tikkostitwixxi kworum tal-Kumitat.
Artikolu 3
Il-membri permanenti jistgħu jirċievu assistenza finanzjarja għat-twettiq ta' dmirijiethom fil-Kumitat.
Artikolu 4
Kull organizzazzjoni li tissodisfa r-rekwiżiti tal-paragrafu 1 tal-Artikolu 232 tal-Ftehim tista' tattendi l-laqgħat tal-Kumitat bħala osservatur.
Artikolu 5
Il-Kumitat Ekonomiku u Soċjali Ewropew għandu jservi bħala s-segretarjat tal-Kumitat għal perijodu inizjali li jintemm fil-31 ta' Diċembru 2014. Wara din id-data, organizzazzjoni jew entità magħżula mill-Istati tal-CARIFORUM segwita minn organizzazzjoni jew entità magħżula mill-Unjoni Ewropea għandha taġixxi fuq bażi alternata għal perijodi ta' 12-il xahar bħala s-segretarjat tal-Kumitat.
Artikolu 6
Din id-Deċiżjoni għandha tidħol fis-seħħ fil-[…]
Magħmul fi …,
għall-Kunsill Konġunt CARIFORUM-UE