21.6.2006   

MT

Il-Ġurnal Uffiċjali ta' l-Unjoni Ewropea

328

(1)

L-Artikolu 2 tar-Regolament tal-Kunsill (KE) Nru 2371/2002 ta' l-20 ta' Diċembru 2002 dwar il-konservazzjoni u l-isfruttament sostenibbli ta’ riżorsi tas-sajd skond il-Politika Komuni dwar is-Sajd (2) jipprovdi li l-politika komuni tas-sajd għandha tapplika l-approċċ prekawzjonali billi jittieħdu miżuri għat-tnaqqis, sal-minimu possibbli, ta' l-impatt ta' l-attivitajiet tas-sajd fuq l-ekosistemi tal-baħar.

(2)

Ir-Regolament tal-Kunsill (KE) Nru 850/98 tat-30 ta' Marzu 1998 dwar il-konservazzjoni ta' riżorsi tas-sajd permezz ta' miżuri tekniċi għall-protezzjoni ta' żgħar ta' organiżmi tal-baħar (3) jistabbilixxi restrizzjonijiet fuq l-użu ta' tagħmir ta' tkarkir mal-qiegħ.

(3)

Skond rapporti xjentifiċi reċenti, u b'mod partikolari r-rapporti tal-Kunsill Internazzjonali għall-Esplorazzjoni tal-Baħar (ICES), instabu u ġew kartografati habitats tal-fond fl-Atlantiku li huma sensittivi ħafna. Dawk il-habitats jospitaw komunitajiet bioloġiċi importanti u varjati ħafna u huma meqjusa li jeħtieġu protezzjoni prijoritarja. B'mod partikolari, huma definiti bħala habitats ta' interess Komunitarju fid-Direttiva tal-Kunsill 92/43/KEE tal-21 ta' Mejju dwar il-konservazzjoni ta’ l-habitat naturali u tal-fawna u l-flora selvaġġa (4). Barra minn hekk, reċentement ġew inklużi sikek tal-qroll tal-fond f'lista ta' habitats minaċċjati fil-qafas tal-Konvenzjoni għall-Protezzjoni ta' l-Ambjent tal-Baħar ta' l-Atlantiku tan-Nord-Est (il-“Konvenzjoni OSPAR”).

(4)

Il-protezzjoni ta' dawn iż-żoni mill-impatt negattiv tas-sajd hija kompletament koerenti ma' l-Artikoli 5 u 6 tal-Ftehim tan-NU ta' l-1995 dwar Stokkijiet ta' Ħut (5) kif ukoll meħtieġa minnhom, b'mod partikolari d-disposizzjonijiet li jeħtieġu l-applikazzjoni ta' l-approċċ prekawzjonali u l-protezzjoni tal-bio-diversità fl-ambjent marin.

(5)

Skond l-evidenza xjentifika, l-irkupru mill-ħsara li ssir lil dawn l-habitats mit-tagħmir tas-sajd huwa jew impossibbli jonkella diffiċli ħafna u jsir bil-mod. Huwa għalhekk xieraq li jiġi projbit l-użu ta' tagħmir tas-sajd li aktarx jagħmel ħsara lill-habitats f'żoni fejn dawn għadhom fi stat ta' konservazzjoni favorevoli.

(6)

L-ibħra madwar l-Azores, Madeira u l-Gżejjer Kanarji fihom bosta habitats tal-fond magħrufa jew potenzjali li sa ftit ilu ġew preservati mit-tkarkir permezz tar-reġim speċjali ta' aċċess definit fir-Regolament tal-Kunsill (KE) Nru 2027/95 tal-15 ta' Ġunju 1995 li jistabbilixxi sistema għall-amministrazzjoni ta’ l-isforzi li jsiru fis-sajd fir-rigward ta' ċerti żoni u riżorsi tas-sajd tal-Komunità (6). Ir-Regolament (KE) Nru 2027/95 ġie mħassar mir-Regolament tal-Kunsill 1954/2003 ta' l-4 ta' Novembru 2003 dwar l-immaniġġar ta’ l-isforz għas-sajd li jirrigwarda ċerti żoni u riżorsi tas-sajd tal-Komunità (7).

(7)

Għalhekk, huwa xieraq li tiġi żgurata l-protezzjoni ta' dawk iż-żoni permezz ta' estensjoni fir-restrizzjonijiet dwar l-użu ta' tagħmir tal-qiegħ li jinsabu fir-Regolament (KE) Nru 850/98.

(8)

Ir-Regolament (KE) Nru 850/98 għandu għalhekk jiġi emendat skond kif meħtieġ,