(a)

ifakkar li wieħed mill-valuri fundamentali rifless fid-deċiżjoni tal-komunità internazzjonali li jinħoloq Tribunal kienet ir-rieda li ssir ġustizzja u l-ġlieda kontra l-impunità; filwaqt li jappoġġja b’mod sħiħ il-ħidma li qed iwettaq it-Tribunal, jirrimarka li din mhix se tintlaħaq b’mod sħiħ sakem il-proċessi li għadhom għaddejjin ma jiġux konklużi mingħajr għaġla żejda u sakemm iż-żewġ akkużati, Ratko Mladić u Goran Hadžić, ma jitressqux quddiem il-ġustizzja u jgħaddu minn proċeduri kriminali;

(b)

jenfasizza li l-isforzi biex il-proċeduri jimxu aktar malajr m’għandhomx isiru bi ħsara għal proċeduri ġusti, u jtenni l-fehma ta’ ħafna li l-operat tat-Tribunal se jkun iġġudikat mhux biss skont jekk jirnexxielux jiġġudika lil dawk responsabbli għall-iktar delitti serji li huma fil-ġurisdizzjoni tiegħu iżda wkoll skont jekk jagħmilx dan f’konformità mal-iktar standards stretti ta’ ġustizzja;

(c)

jenfasizza li ż-żamma ta’ persunal ikkwalifikat ħafna fit-Tribunal huwa fattur importanti ħafna għat-tlestija b’mod li jirnexxi tal-proċessi u l-appelli, u li t-telf tal-għerf speċjalizzat istituzzjonali meħtieġ biex ikomplu l-proċessi li għad baqa’ jista’ jsir aktar serju minħabba l-iskeda prevista fl-istrateġija tat-tlestija; f’dan ir-rigward, jilqa’ b’sodisfazzjon ir-riżoluzzjoni A/RES/63/256 hawn fuq imsemmija tal-Assemblea Ġenerali tan-NU li tippermetti lit-Tribunal li joffri kuntratti lil membri tal-persunal f’konformità mal-iskedi taż-żmien tal-istrateġija tat-tlestija u li jesplora inċentivi mhux monetarji mfassla biex jinżamm il-persunal ewlieni;

(d)

jenfasizza l-fatt li, min-naħa l-oħra, id-data ffissata biex tintlaħaq l-istrateġija tat-tlestija tikkontribwixxi għall-produttività tat-Tribunal, iżda li, min-naħa l-oħra, jekk għandha ssir ġustizzja u jekk għandhom isiru l-proċessi kontra Ratko Mladić u Goran Hadžić, dik id-data m’għanda bl-ebda mod tkun skadenza għall-attivitajiet tat-Tribunal;

(e)

għaldaqstant jistieden lill-Kunsill biex jeżamina bħala kwistjoni urġenti jekk għandhiex tiġi prevista estensjoni ta’ sentejn tal-mandat tat-Tribunal u jekk dan ikunx biżżejjed, filwqat li wieħed iżomm f’moħħu li kwalunkwe estensjoni għandha titqies mhux biss mil-lat taż-żmien iżda meta mqabbla mar-riżultati, u li jressaq dawn il-kwistjonijiet fl-istrutturi xierqa tan-NU biex jiġu eżaminati;

(f)

jistieden lill-Kunsill biex jinkoraġġixxi lill-Kunsill tas-Sigurtà tan-NU biex jimpenja ruħu li jipprovdi biżżejjed riżorsi u appoġġ lit-Tribunal permezz tal-baġit ġenerali tan-NU sat-tmiem tal-mandat tat-Tribunal;

(g)

iħeġġeġ lill-Kunsill biex ikompli jappoġġja l-isforzi tat-Tribunal biex jara li l-pajjiżi kkonċernati jsaħħu l-koperazzjoni u jħaffu l-isforzi biex jaqbdu ż-żewġ akkużati li għad fadal, biex b’hekk it-Tribunal ikun jista’ jwettaq il-mandat tiegħu, kif ukoll biex jiċċara man-NU li wieħed irid ifiehem b’mod ċar li l-kawża kontra ż-żewġ persuni maħruba li għad fadal trid tinstema’ jew mit-Tribunal jew mill-mekkaniżmi residwi, biex b’hekk jiġi evitat kwalunkwe ħjiel ta’ impunità;

(h)

jenfasizza li dokumenti ewlenin li huma importanti ħafna għall-prosekuzzjoni tal-Ġeneral Ante Gotovina, Mladen Markać u Ivan Čermak għandhom jingħataw mill-awtoritajiet responsabbli; jenfasizza li t-talbiet riċenti li saru mill-Kap Prosekutur tat-Tribunal Serge Brammertz biex tinstab id-dokumentazzjoni nieqsa rilevanti u biex din tkun disponibbli għat-Tribunal għandhom jintlaqgħu;

(i)

jirrimarka li l-UE għandha tkompli tenfasizza li l-konformità mal-kriterji ta’ Kopenħagen tinkludi li jkun hemm sistema ġudizzjarja li taħdem b’mod sħiħ, kapaċi tittratta proċessi dwar ksur tal-liġi umanitarja, anke meta l-qafas tat-Tribunal ma jkunx għadu qed jopera; jistieden lill-Kunsill biex jistabbilixxi regoli ċari biex tiġi evalwata l-ħidma tal-ġudikatura fil-pajjiżi tal-Balkani tal-Punent wara li l-mandat tat-Tribunal jasal fi tmiemu, inter alia biex jiġi żgurat li l-kundizzjonijiet ta’ priġunerija jissodisfaw l-istandards internazzjonali u li s-sentenzi mogħtija mit-Tribunal jiġu osservati, u jistieden lill-UE biex iżżid l-appoġġ tagħha għall-investigazzjonijiet u l-proċessi domestiċi tad-delitti tal-gwerra, pereżempju billi tipprovdi għajnuna lill-awtoritajiet tal-infurzar tal-liġi, dawk ġudizzjarji u dawk tal-prosekuzzjoni, inkluż finanzjament għat-taħriġ u għall-protezzjoni tax-xhieda;

(j)

jirrikonoxxi li l-importanza primarja tal-istati għadha waħda mill-pedamenti tas-sistema internazzjonali, u jirrimarka li huwa essenzjali li l-komunità internazzjonali wkoll tappoġġja l-iżvilupp tal-kapaċità domestika fil-Balkani sabiex il-qrati lokali jkunu jistgħu jkomplu l-ħidma li beda t-Tribunal; jappoġġja l-finanzjament eżistenti mill-UE ta’, pereżempju, il-programmi ta’ ħidma diretta mal-pubbliku tal-Istrument Ewropew għad-Demokrazija u d-Drittijiet tal-Bniedem; f’dan il-kuntest, jistieden lill-Kunsill biex jikkunsidra żieda fl-appoġġ tiegħu għat-tkomplija tal-istrateġija tat-Tribunal, u jitlob li jkun hemm aktar koperazzjoni bejn il-korpi ġudizzjarji u dawk tal-prosekuzzjoni fil-Balkani tal-Punent, b’mod partikolari f’każijiet li jinvolvu estradizzjoni u assistenza legali reċiproka;

(k)

jinnota li t-tħaddim ta’ mekkaniżmu ċar biex jiġu indirizzati l-funzjonijiet residwi tat-Tribunal ladarba jingħalaq se jkun ċentrali biex jiġi żgurat li l-wirt tiegħu ikun wieħed li jsaħħaħ il-prinċipji li ispiraw it-twaqqif tiegħu;

(l)

jistieden lill-Kunsill biex iniedi mingħajr dewmien, fl-istrutturi xierqa tan-NU, il-proċeduri previsti għal mekkaniżmu biex jiġu indirizzati l-funzjonijiet residwi immedjati u dawk fuq perjodu itwal ta’ żmien, li jikkonċernaw per eżempju l-protezzjoni tax-xhieda, il-protezzjoni kontra l-intimidazzjoni tax-xhieda, kwistjonijiet ta’ disprezz tal-qorti, reviżjonijiet f’każ li jaslu provi li jeskludu l-ħtija, il-monitoraġġ ta’ proċessi trasferiti lejn ir-reġjun (attwalment immoniterjati mis-Servizz tal-Prosekuzzjoni tat-Tribunal permezz tal-Organizzazzjoni għas-Sigurtà u l-Koperazzjoni fl-Ewropa (OSCE)), il-kundizzjonijiet tal-priġunerija u kwistjonijiet relatati mal-maħfriet jew il-kommutazzjoni tas-sentenzi, eċċ; jissuġġerixxi li titressaq proposta quddiem il-Kunsill tas-Sigurtà tan-NU dwar il-possibilità li jitwaqqaf uffiċċju konġunt biex jittratta l-funzjonijiet residwi futuri tat-Tribunal u tat-Tribunal Kriminali Internazzjonali għar-Rwanda u l-Qorti Speċjali għas-Sierra Leone;

(m)

ifakkar lill-Kunsill li l-UE għandha turi interess partikolari biex tissalvagwardja l-wirt tat-Tribunal billi tiżgura li l-arkivji tiegħu jkunu maħżuna f’post sikur, possibilment fir-reġjun tal-Balkani tal-Punent, li jkunu kompleti u aċċessibbli kemm jista’ jkun, u li d-dokumentazzjoni tkun aċċessibbli minn fuq l-internet; jissuġġerixxi li garanziji xierqa ta’ aċċess liberu għandhom jingħataw ukoll lill-prosekuturi u lill-avukati difensuri u, wara perjodu ta’ żmien xieraq, lill-istoriċi u lir-riċerkaturi;

(n)

jenfasizza li l-wirt tat-Tribunal għandu jkun konness ukoll mal-proċess ġenerali tar-rikonċiljazzjoni; f’dan il-kuntest, jistieden lill-istati tal-Balkani tal-Punent u lill-UE biex jappoġġjaw il-ħidma tal-organizzazzjonijiet mhux governattivi u istituzzjonijiet oħra li jgħinu lill-vittmi, jippromwovu d-djalogu u l-fehim interetniku, u jgħinu biex wieħed jasal għall-verità u r-rikonċiljazzjoni;