25.8.2009   

MT

Il-Ġurnal Uffiċjali tal-Unjoni Ewropea

C 200/51

—

jilqa’ l-inizjattiva tal-Kummissjoni Ewropea biex twaqqaf il-programm MEDIA Mundus;

—

huwa tal-fehma li t-twaqqif u l-implimentazzjoni ta’ programm għall-promozzjoni ta’ kooperazzjoni internazzjonali wiesgħa fis-settur awdjoviżiv, bil-għan li jissaħħu r-rabtiet kemm kulturali kif ukoll kummerċjali bejn l-industrija ċinematografika Ewropea u dik ta’ pajjiżi terzi, huwa l-mod ġust kif jiġu indirizzati l-isfidi attwali assoċjati mal-bidla fil-qasam awdjoviżiv internazzjonali;

—

jinnota li l-awtoritajiet lokali u reġjonali jistgħu jaqdu rwol importanti fil-promozzjoni ta’ xogħlijiet awdjoviżivi lokali u reġjonali, u jistgħu tabilħaqq isaħħu l-produzzjoni awdjoviżiva u jikkontribwixxu b’mod attiv għall-promozzjoni tad-diversità kulturali u d-djalogu interkulturali;

—

jenfasizza li s-settur awdjoviżiv, kif qed jiġi ssuġġerit hawn fuq, mhuwiex biss industrija ta’ importanza ewlenija għall-iżvilupp, il-kompetittività u l-impjieg, iżda huwa wkoll sfera kruċjali li tħares u tippromovi l-identità kulturali u d-diversità lokali u reġjonali. Is-settur huwa magħmul b’tali mod li huwa fattur ewlieni fl-iżvilupp tal-valuri soċjali Ewropej u t-tħaddim tas-soċjetajiet demokratiċi, peress li x-xogħlijiet awdjoviżivi jistgħu jaqdu rwol importanti fit-tiswir ta’ identità Ewropea.

Rapporteur

:

Is-Sur Ioannis Sgouros (EL/PSE), Prefett ta’ Ateni

1.

jilqa’ l-inizjattiva tal-Kummissjoni Ewropea biex twaqqaf il-programm MEDIA Mundus;

2.

għalhekk jappoġġja l-proposta tal-Kummissjoni Ewropea għal “programm ta’ appoġġ sabiex ikun hemm promozzjoni tal-kooperazzjoni bejn il-professjonisti tal-industrija awdjoviżiva Ewropea u l-professjonisti tal-industrija f’pajjiżi terzi għall-benefiċċju reċiproku tal-parteċipanti kollha”;

3.

huwa tal-fehma li t-twaqqif u l-implimentazzjoni ta’ programm għall-promozzjoni ta’ kooperazzjoni internazzjonali wiesgħa fis-settur awdjoviżiv, bil-għan li jissaħħu r-rabtiet kemm kulturali kif ukoll kummerċjali bejn l-industrija ċinematografika Ewropea u dik ta’ pajjiżi terzi, huwa l-mod ġust kif jiġu indirizzati l-isfidi attwali assoċjati mal-bidla fil-qasam awdjoviżiv internazzjonali, speċjalment b’riżultat tal-iżviluppi teknoloġiċi u n-nuqqasijiet strutturali li jaffettwaw iċ-ċirkolazzjoni ta’ xogħlijiet awdjoviżivi Ewropej fis-swieq ta’ pajjiżi terzi, u li qed iwaqqfu s-settur awdjoviżiv Ewropew milli jaħtaf opportunitajiet internazzjonali u jdgħajfu l-kompetittività tiegħu;

4.

jinnota l-ħtieġa għal kooperazzjoni internazzjonali fis-settur awdjoviżiv u għall-ħarsien u l-promozzjoni tad-diversità ta’ espressjonijiet kulturali, kif imfisser fil-Konvenzjoni tal-UNESCO rratifikata mill-Komunità Ewropea flimkien ma’ 13-il Stat Membru fit-18 ta’ Diċembru 2006;

5.

jaqbel li d-deċiżjoni tal-Kummissjoni Ewropea hija importanti ħafna, minħabba l-fatt li l-programmi Komunitarji eżistenti fil-qasam tal-appoġġ awdjoviżiv (MEDIA 2007, Euromed Audiovisual II jew il-programm UE-AKP għaċ-ċinema) ma jistgħux jindirizzaw l-isfidi kollha li jinħolqu mill-internazzjonalizzazzjoni rapida tas-settur awdjoviżiv (jew għax tfasslu għal kooperazzjoni fi ħdan l-Unjoni Ewropea jew għax iwieġbu għall-ħtiġijiet tal-politika tal-iżvilupp u mhux għal dawk tal-politika industrijali);

6.

jaħseb ukoll li r-reazzjoni pożittiva ħafna tal-professjonisti tal-industrija, li tidher biċ-ċar mill-konsultazzjoni miftuħa li saret bl-Internet bejn l-10 ta’ April u l-25 ta’ Ġunju 2008, tagħti prova li hemm bżonn li jitwaqqaf il-programm MEDIA Mundus;

7.

jaħseb ukoll li huwa importanti li — skont ir-riżultati tal-konsultazzjoni miftuħa — il-prijoritajiet għal azzjoni magħżula huma t-taħriġ, l-iffaċilitar tal-koproduzzjonijiet u d-distribuzzjoni ta’ xogħlijiet awdjoviżivi u l-għarfien ċinematografiku;

8.

jaċċetta l-konklużjoni tal-evalwazzjoni tal-impatt li tgħid li “l-ħolqien ta’ strument ġdid huwa l-iktar mod effettiv u effiċjenti biex jiġu ssodisfati l-għanijiet ġenerali u speċifiċi u biex ikun hemm rispons għall-isfidi li ġejjin mill-internazzjonalizzazzjoni tas-swieq awdjoviżivi”;

9.

jaqbel li l-programm MEDIA Mundus ser jgħin biex tissaħħaħ il-kompetittività tas-settur awdjoviżiv Ewropew fis-swieq internazzjonali, u fl-istess ħin biex jissaħħaħ ir-rwol kulturali u politiku tal-Ewropa fid-dinja; jaqbel li d-distribuzzjoni dinjija tax-xogħlijiet awdjoviżivi ser tiġi ffaċilitata b’mod konsiderevoli billi tiġi estiża l-għażla għall-konsumatur, iżda wkoll billi tissaħħaħ b’mod sostanzjali d-diversità kulturali;

10.

jemmen li l-iskambju ta’ għarfien espert tas-suq ser isaħħaħ kemm il-kompetittività tas-settur awdjoviżiv Ewropew kif ukoll dik ta’ pajjiżi terzi, filwaqt li ser ikun hemm żieda fid-domanda pubblika għad-diversità kulturali;

11.

jenfasizza l-importanza partikulari tal-objettiv marbut mal-iffaċilitar tal-koproduzzjonijiet, li l-professjonisti identifikaw bħala prijorità fil-konsultazzjoni miftuħa;

12.

jinnota wkoll il-ħtieġa li jiddaħħal fil-prattika l-prinċipju tat-trattament pożittiv għal Stati Membri b’settur awdjoviżiv żgħir; għaldaqstant jemmen li għandha tingħata attenzjoni partikulari lil dawk il-pajjiżi li ma jipproduċux numru kbir ta’ xogħlijiet awdjoviżivi u li jiffaċċjaw ostakoli ikbar minħabba l-karatteristiċi ġeografiċi u lingwistiċi tagħhom;

13.

jiġbed l-attenzjoni għar-rwol tal-MEDIA Mundus bħala mezz għall-promozzjoni tad-diversità kulturali u d-djalogu interkulturali fil-livell Ewropew u internazzjonali; għaldaqstant jenfasizza d-differenza bejn MEDIA Mundus u programmi Komunitarji oħrajn relatati mas-settur awdjoviżiv, li ġejja mill-fatt li l-għanijiet tal-programm MEDIA Mundus jikkonċentraw fuq il-kooperazzjoni internazzjonali bil-għan li tiġi promossa l-kompetittività tal-industrija awdjoviżiva fuq livell globali;

14.

japprova l-mod kif jaħdem il-programm, jiġifieri skont il-prinċipju tal-benefiċċju reċiproku, li jinvolvi proposti konġunti għal proġetti ma’ professjonisti minn pajjiżi terzi;

15.

jikkunsidra bħala sodisfaċenti l-kundizzjonijiet li jistipulaw li xogħlijiet prodotti minn konsorzji biss jingħataw fondi, sabiex ikun żgurat netwerking internazzjonali;

16.

għandu d-dubji dwar ir-rekwiżit li “kull proġett għandu jkollu minimu ta’ tliet imsieħba”;

17.

jikkumenta wkoll li fir-rigward tal-finanzjament ta’ proġetti, il-burokrazija u l-formalitajiet għat-tressiq tal-proposti, għall-ħolqien u t-tħaddim ta’ netwerks ta’ kooperazzjoni kif ukoll għar-rappurtar għandhom jinżammu kemm jista’ jkun limitati;

18.

jenfasizza wkoll li għandha tiġi ggarantita trasparenza totali fil-proċess tal-għażla ta’ xogħlijiet li għandhom jingħataw il-fondi u li jista’ jkun li l-kriterji ta’ evalwazzjoni jkollhom jiġu rfinati;

19.

jinnota li MEDIA Mundus jipprovdi reazzjoni effettiva għall-problema tal-frammentazzjoni tal-industrija ċinematografika Ewropea, bil-promozzjoni ta’ inizjattivi għal netwerking u kooperazzjoni bejn l-operaturi fis-settur awdjoviżiv; għaldaqstant, jemmen b’mod partikulari li dan il-programm joffri opportunità tajba sabiex jiġu appoġġjati l-SMEs;

20.

għaldaqstant jemmen li jagħmel sens li niffokaw fuq il-ħolqien ta’ impjiegi speċjalizzati u fuq il-provvista ta’ iktar taħriġ għall-professjonisti tal-oqsma tal-programmazzjoni, it-tekniki tax-xandir, id-distribuzzjoni u l-bejgħ internazzjonali, kif ukoll fuq il-promozzjoni ta’ xogħlijiet awdjoviżivi;

21.

jemmen ukoll li l-promozzjoni tal-iskambju ta’ informazzjoni u għarfien tekniku bejn il-professjonisti tgħin ħafna l-ħolqien ta’ netwerks ta’ kooperazzjoni, issaħħaħ l-aċċess għal swieq esterni u tippromovi t-twaqqif ta’ sħubijiet fit-tul, u b’hekk issaħħaħ mhux biss il-kompetittività tal-industrija awdjoviżiva Ewropea iżda wkoll ir-rwol kulturali u politiku globali tal-Ewropa;

22.

huwa tal-fehma li MEDIA Mundus ser jagħti kontribut deċiżiv għat-titjib taċ-ċirkolazzjoni internazzjonali ta’ xogħlijiet awdjoviżivi, u għaż-żieda fid-domanda pubblika għal diversità kulturali ikbar fir-rigward tal-kontenut awdjoviżiv;

23.

b’rabta ma’ dan jinnota l-benefiċċji ta’ żieda fil-wirjiet tax-xogħlijiet, kif ukoll anteprimi esklużivi ta’ xogħlijiet awdjoviżivi;

24.

għalhekk jemmen li MEDIA Mundus jista’ jservi biex iħeġġeġ lis-sidien tal-istabbilimenti ċinematografiċi fl-Ewropa u f’pajjiżi terzi biex isaħħu b’mod reċiproku l-kundizzjonijiet ta’ programmazzjoni u ta’ preżentazzjoni, kif ukoll it-tul ta’ żmien li fih jintwera x-xogħol, il-wiri ta’ reklami u n-numru ta’ wirjiet ta’ anteprimi esklużivi ta’ xogħlijiet awdjoviżivi;

25.

jemmen li, b’mod simili, għandu jkun possibbli li jiżdiedu u jittejbu l-kundizzjonijiet għax-xandir ta’ kontenut awdjoviżiv Ewropew f’pajjiżi terzi u, bl-istess mod, ta’ kontenut awdjoviż minn pajjiżi terzi fl-Ewropa;

26.

japprova wkoll il-fatt li l-Unjoni Ewropea tagħti prijorità liż-żgħażagħ bħala l-ġejjieni tas-settur awdjoviżiv Ewropew. Permezz tal-promozzjoni ta’ xogħlijiet ta’ żgħażagħ Ewropej ta’ talent, MEDIA Mundus jiżgura l-promozzjoni ta’ potenzjal ġdid, il-mobilità taż-żgħażagħ, u l-ksib ta’ għarfien mis-swieq Ewropej u internazzjonali, filwaqt li fl-istess ħin jimplimenta l-ekonomija msejsa fuq l-għarfien u d-djalogu interkulturali;

27.

jinnota li r-rwol taż-żgħażagħ li joħolqu kontenut awdjoviżiv jerġa’ juri li jagħmel sens għal MEDIA Mundus li jaħdem b’mod parallel bħala programm ta’ taħriġ, kif ukoll li jgħin biex jiġbed dejjem iktar żgħażagħ għal wirjiet ta’ xogħlijiet awdjoviżivi;

28.

jemmen ukoll li s-settur awdjoviżiv jagħti kontribut ewlieni għall-ekonomija Ewropea msejsa fuq il-kreattività u l-għarfien, u jaqdi rwol kruċjali fil-promozzjoni tad-diversità kulturali u l-pluraliżmu;

29.

jenfasizza li l-isfera kulturali bla dubju tikkontribwixxi b’mod deċiżiv għas-suċċess tal-għanijiet tal-Istrateġija ta’ Liżbona, iżda ma tistax titqies biss bħala forza ekonomika għaliex tagħti kontribut meqjus daqstant importanti għall-kultura permezz tal-ħolqien ta’ ambjent dinamiku u sostenibbli, li huwa kundizzjoni minn qabel għall-prosperità u l-iżvilupp tal-bniedem (1);

30.

jinnota li l-awtoritajiet lokali u reġjonali jistgħu jaqdu rwol importanti fil-promozzjoni ta’ xogħlijiet awdjoviżivi lokali u reġjonali, u jistgħu tabilħaqq isaħħu l-produzzjoni awdjoviżiva u jikkontribwixxu b’mod attiv għall-promozzjoni tad-diversità kulturali u d-djalogu interkulturali;

31.

jemmen li bis-saħħa tal-promozzjoni tal-produtturi lokali u reġjonali ta’ xogħlijiet awdjoviżivi, l-awtoritajiet lokali u reġjonali jistgħu wkoll, b’rabta mal-produzzjoni nazzjonali, joħolqu bilanċ fir-rigward tal-produzzjoni enormi ta’ films minn pajjiżi terzi;

32.

jinnota li l-awtoritajiet lokali u reġjonali jistgħu jaqdu rwol deċiżiv kemm fl-edukazzjoni u fit-taħriġ, kif ukoll fl-għoti ta’ appoġġ finanzjarju lil organizzazzjonijiet kulturali u lil partijiet interessati;

33.

jinnota wkoll li b’dan il-mod l-awtoritajiet lokali u reġjonali jistgħu jgħinu biex jissaħħu l-SMEs, u b’hekk jippromovu l-kompetittività tas-suq awdjoviżiv Ewropew ifframmentat, u fl-istess waqt jiżguraw il-vijabilità ta’ dawn il-kumpaniji;

34.

barra minn hekk, jemmen li l-awtoritajiet lokali u reġjonali jistgħu jaqdu rwol importanti kemm fit-taħriġ ta’ żgħażagħ li joħolqu kontenut awdjoviżiv kif ukoll biex jiġbdu udjenza żagħżugħa ikbar għal wirjiet ta’ xogħlijiet awdjoviżivi li jippromovu d-diversità kulturali u d-djalogu interkulturali;

35.

għaldaqstant jaħseb li l-awtoritajiet lokali u reġjonali jistgħu jagħtu kontribut deċiżiv kemm għall-produzzjoni ta’ xogħlijiet awdjoviżivi fil-livell lokali u reġjonali, kif ukoll għall-ħolqien ta’ identità Ewropea b’saħħitha, speċjalment fost iż-żgħażagħ;

36.

jemmen li permezz tal-organizzazzjoni ta’ festivals, avvenimenti tematiċi u seminars ta’ taħriġ, l-awtoritajiet lokali u reġjonali jistgħu jieħdu inizjattivi importanti u jaqdu rwol kruċjali fl-iżvilupp tas-settur awdjoviżiv sabiex ikun fattur ewlieni fil-ħolqien tal-kultura, it-tiswir ta’ identità Ewropea multikulturali, u l-appoġġ għall-edukazzjoni ċinematografika, speċjalment għall-udjenza żagħżugħa;

37.

għalhekk jemmen li jkun utli għall-ambitu usa’ tal-programm MEDIA Mundus li tiddaħħal referenza speċifika fl-Artikolu 7 għar-rwol li l-awtoritajiet lokali u reġjonali huma mitluba jaqdu permezz ta’ programmi u attivitajiet speċjali fl-isforzi tagħhom biex isaħħu l-kompetittività tas-suq Ewropew. Bl-istess mod, ikun xieraq u utli ħafna li jissaħħu u jiġu aġġornati l-uffiċċji tal-informazzjoni li joperaw fil-livell reġjonali, għaliex huma sors bażiku ta’ tagħrif dwar l-iżviluppi kollha fil-qasam awdjoviżiv għall-pubbliku ġenerali Ewropew;

38.

jinnota wkoll li b’rabta diretta mal-punt li ssemma qabel, ikun ta’ ġid għall-awtoritajiet lokali u reġjonali li jkunu iktar involuti fl-isforzi favur kooperazzjoni bejn netwerks fl-industrija awdjoviżiva, u li konsorzji reġjonali jissaħħu, speċjalment fir-rigward tat-taħriġ, il-produzzjoni u d-distribuzzjoni ta’ xogħlijiet awdjoviżivi;

39.

jenfasizza li s-settur awdjoviżiv, kif qed jiġi ssuġġerit hawn fuq, mhuwiex biss industrija ta’ importanza ewlenija għall-iżvilupp, il-kompetittività u l-impjieg, iżda huwa wkoll sfera kruċjali li tħares u tippromovi l-identità kulturali u d-diversità lokali u reġjonali. Is-settur huwa magħmul b’tali mod li huwa fattur ewlieni fl-iżvilupp tal-valuri soċjali Ewropej u t-tħaddim tas-soċjetajiet demokratiċi, peress li x-xogħlijiet awdjoviżivi jistgħu jaqdu rwol importanti fit-tiswir ta’ identità Ewropea;

40.

jemmen li dan il-programm speċifiku huwa ta’ importanza partikulari għaliex jikkombina l-promozzjoni tal-kultura mat-tisħiħ tal-kompetittività, jiġifieri l-valur kummerċjali u ekonomiku tas-settur awdjoviżiv Ewropew, waqt li l-industrija awdjoviżiva Ewropea tingħata dimensjoni internazzjonali b’mod li huwa ħafna iktar effettiv u mmirat minn MEDIA International, li jista’ jitqies bħala l-prekursur ta’ MEDIA Mundus;

41.

jinnota li l-programm jibda bħala proġett fuq medda qasira ta’ żmien (2011-2013) b’baġit limitat (EUR 15-il miljun, li minnhom EUR 13.5-il miljun huma allokati lil azzjonijiet), li jfisser li la l-perijodu ta’ żmien u lanqas ir-riżorsi mhuma ser jippermettu li jiġu żviluppati ammont kbir ta’ inizjattivi jew li jiġu implimentati l-azzjonijiet;

42.

għaldaqstant huwa tal-fehma, u fl-istess waqt jittama, li r-riżultati ser ikun informattivi u ser jitqiesu bħala pożittivi, sabiex il-programm mhux biss jitkompla iżda wkoll jingħata iktar fondi fil-ġejjieni;

43.

jenfasizza l-bżonn li niffokaw fuq l-istrateġija ta’ komunikazzjoni tal-programm u jemmen li l-awtoritajiet lokali u reġjonali jistgħu jaqdu rwol daqstant vitali billi jippromovuh. Ikun partikolarment utli li l-uffiċċji tal-informazzjoni jikkooperaw ma’ assoċjazzjonijiet u konfederazzjonijiet ta’ professjonisti awdjoviżivi, u mal-ACE (Assoċjazzjoni tal-Arkivji Ċinematografiċi Ewropej) u l-FIAF (Federazzjoni Internazzjonali tal-Arkivji Ċinematografiċi), kif ukoll mal-arkivji ċinematografiċi nazzjonali;

44.

Għandha ssir enfasi partikulari — jekk mhux immedjatament, ċertament matul l-istadju li jmiss tal-programm — fuq id-dimensjoni edukattiva ta’ MEDIA Mundus, li għandha tmur lil hinn minn taħriġ addizzjonali għal professjonisti u timmira wkoll lejn studenti żgħażagħ. Dan l-objettiv jista’ jintlaħaq kemm permezz ta’ koordinazzjoni ma’ programmi oħra fil-qafas MEDIA kif ukoll bis-saħħa ta’ kooperazzjoni ma’ uffiċċji tal-informazzjoni li żviluppaw attivitajiet simili għal programmi, fakultajiet universitarji u dipartimenti tal-istudji awdjoviżivi, u ma’ arkivji ċinematografiċi li jkollhom kuntatt ma’ studenti, riċerkaturi u professjonisti fis-settur. Barra minn hekk, attivitajiet edukattivi u workshops tematiċi jistgħu jkunu sors importanti ta’ informazzjoni, kif ukoll opportunità tajba ħafna għal laqgħat ma’ professjonisti mill-Unjoni Ewropea u minn pajjiżi terzi.