20.3.2009   

MT

Il-Ġurnal Uffiċjali tal-Unjoni Ewropea

CE 66/71

—

wara li kkunsidra r-riżoluzzjonijiet preċedenti tiegħu dwar l-Afganistan,

—

wara li kkunsidra l-Kostituzzjoni Afgana li ġiet adottata fl-2004,

—

wara li kkunsidra r-Riżoluzzjoni ta' l-Assemblea Ġenerali tan-Nazzjonijiet Uniti tat-18 ta' Diċembru ta' l-2007 li titlob moratorju dinji dwar l-użu tal-piena tal-mewt (A/RES/62/149),

—

wara li kkunsidra d-Dikjarazzjoni Universali tan-Nazzjonijiet Uniti dwar id-Drittijiet tal-Bniedem, il-Konvenzjoni Internazzjonali dwar id-Drittijiet Ċivili u Politiċi u l-Konvenzjoni Internazzjonali dwar id-Drittijiet Ekonomiċi, Soċjali u Kulturali,

—

wara li kkunsidra l-Artikolu 115(5) tar-Regoli ta' Proċedura tiegħu,

A.

billi fit-22 ta' Jannar 2008 qorti reġjonali fil-provinċja ta' Balkh fit-tramuntana ta' l-Afganistan ikkundannat għall-mewt lill-ġurnalist Afgan ta' 23 sena Sayed Perwiz Kambakhsh talli ċċirkola artiklu dwar id-drittijiet tan-nisa fl-Islam li kien niżżel mill-internet; billi l-qorti iddeċidiet li l-artikolu kien dagħwa u kkundannaw lis-Sur Kambakhsh għall-mewt,

B.

billi s-Sur Kambakhsh kien imċaħħad minn rappreżentazzjoni legali u kkundannatu mingħajr smigħ xieraq; billi hu kien allegatament imsawwat u mhedded li jiġi ġġustizzjat sakemm iffirma konfessjoni ta' ħtija,

C.

billi fis-6 ta' Frar 2008, delegazzjoni mill-Assoċjazzjoni tal-Ġurnalisti Indipendenti Afgani (AIJA) iltaqgħat mal-President Afgan Hamid Karzai f'Kabul, u tagħtu d-dettalji ta' dan il-każ u talbitu jintervjeni f'isem is-Sur Kambakhsh,

D.

billi l-Artikolu 34 tal-Kostituzzjoni ta' l-Afgana tiddefendi b'mod ċar id-dritt għall-libertà ta' l-espressjoni, b'konformità mad-Dikjarazzjoni Universali tad-Drittijiet tal-Bniedem, u tistipula: “il-libertà ta' l-espressjoni hi invjolabbli; kull Afgan għandu d-dritt li jesprimi ħsibijiet permezz ta' kliem, kitba, illustrazzjonijiet kif ukoll b'mezzi oħra skond id-dispożizzjonijiet ta' din il-Kostituzzjoni”,

E.

billi ġurnalisti fl-Afganistan, b'mod speċjali n-nisa, qegħdin jiffaċjaw dejjem iktar intimidazzjoni, theddid ta' mewt, ħtif u vjolenza,

F.

billi l-kundanna għall-mewt tas-Sur Kambakhsh ingħatat minkejja l-adozzjoni mill-Assemblea Ġenerali tan-NU tar-riżoluzzjoni fuq imsemmija li ssejjaħ għal moratorju dinji fuq l-użu tal-piena tal-mewt u waqt li total ta' 135 pajjiż neħħew il-piena tal-mewt fil-liġi jew fil-prattika,

1.

Jafferma mill-ġdid l-oppożizzjoni bla kundizzjoni tiegħu għall-piena tal-mewt u l-impenn tiegħu għar-rispett ta' l-istat tad-dritt;

2.

Jikkundanna l-arrest tas-Sur Kambakhsh u d-deċiżjoni mill-qorti ta' l-ewwel istanza tal-provinċja ta' Balkh sabiex jiġi ġġustizzjat minħabba id-dagħa; jitlob li s-Sur Kambakhsh jinħeles;

3.

Jistieden b'mod urġenti lill-awtoritajiet Afgani sabiex juru l-impenn tagħhom għad-drittijiet tal-bniedem u dawk demokratiċi biex jagħmlu ħilithom kollha sabiex iwaqqfu l-eżekuzzjoni tiegħu u jiksbu reviżjoni tal-każ tiegħu; jitlob lill-President Hamid Karzai, f'każ li l-qorti ta' l-appell tikkonferma l-piena tal-mewt, sabiex juża l-poter tiegħu biex jagħti l-maħfra lis-Sur Kambakhsh;

4.

Ifakkar fl-assigurazzjonijiet tal-President Karzai dwar is-sikurezza tas-Sur Kambakhsh, li hu ta lil delegazzjoni mill-Assoċjazzjoni tal-Ġurnalisti Indipendenti Afgani fis-6 ta' Frar 2008;

5.

Jesprimi s-solidarjetà tiegħu ma' dawk kollha li qed jiġġieldu għall-ġurnaliżmu indipendenti fl-Afganistan;

6.

Jistieden lill-President u lill-Parlament ta' l-Afganistan biex jieħdu l-passi xierqa sabiex iħaffu l-iżvilupp ta' sistema penali u ġudizzjarja li tiffunzjona u li tkun imsejsa fuq l-istandards u l-aħjar prattiki internazzjonali; jilqa' bi pjaċir l-istqarrija tal-Kummissjarju għall-Affarijiet Barranin ta' l-UE dwar appoġġ finanzjarju immedjat sabiex jgħin lill-Afganistan isaħħaħ l-istat tad-dritt u jirriforma l-ġudikatura tiegħu, stqarrija li saret fil-konferenza ta' Ruma dwar “L-Istat tad-Dritt fl-Afganistan” f'Lulju 2007;

7.

Jistieden lill-Gvern Afgan sabiex jirrispetta b'mod sħiħ id-Dikjarazzjoni Universali tad-Drittijiet tal-Bniedem tan-Nazzjonijiet Uniti u biex jiżgura li l-libertà ta' l-espressjoni tkun garantita u rispettata b'mod sħiħ għaċ-ċittadini kollha ta' l-Afganistan;

8.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u l-parlamenti ta' l-Istati Membri, u lill-Gvern u l-Parlament tar-Repubblika Iżlamika ta' l-Afganistan.