Dan id-dokument hu mislut mis-sit web tal-EUR-Lex
Dokument 62020CJ0513
Judgment of the Court (Seventh Chamber) of 13 January 2022.#Autoridade Tributária e Aduaneira v Termas Sulfurosas de Alcafache SA.#Request for a preliminary ruling from the Supremo Tribunal Administrativo.#Reference for a preliminary ruling – Common system of value added tax (VAT) – Directive 2006/112/EC – Article 132(1)(b) – Exemptions for certain activities in the public interest – Exemption of hospital and medical care – Closely related activities – Thermal treatment – Amount charged for compiling an individual file including the user’s clinical history.#Case C-513/20.
Sentenza tal-Qorti tal-Ġustizzja (Is-Seba’ Awla) tat-13 ta’ Jannar 2022.
Autoridade Tributária e Aduaneira vs Termas Sulfurosas de Alcafache SA.
Talba għal deċiżjoni preliminari, imressqa mis-Supremo Tribunal Administrativo.
Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Artikolu 132(1)(b) – Eżenzjonijiet favur ċerti attivitajiet ta’ interess ġenerali – Eżenzjoni tal-kura fl-isptar u tal-kuri mediċi – Attivitajiet marbuta mill-qrib – Kuri termali – Ammont irċevut għall‑istabbiliment ta’ fajl individwali, li jinkludi fajl mediku.
Kawża C-513/20.
Sentenza tal-Qorti tal-Ġustizzja (Is-Seba’ Awla) tat-13 ta’ Jannar 2022.
Autoridade Tributária e Aduaneira vs Termas Sulfurosas de Alcafache SA.
Talba għal deċiżjoni preliminari, imressqa mis-Supremo Tribunal Administrativo.
Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Artikolu 132(1)(b) – Eżenzjonijiet favur ċerti attivitajiet ta’ interess ġenerali – Eżenzjoni tal-kura fl-isptar u tal-kuri mediċi – Attivitajiet marbuta mill-qrib – Kuri termali – Ammont irċevut għall‑istabbiliment ta’ fajl individwali, li jinkludi fajl mediku.
Kawża C-513/20.
IdentifikaturECLI: ECLI:EU:C:2022:18
SENTENZA TAL-QORTI TAL-ĠUSTIZZJA (Is-Seba’ Awla)
13 ta’ Jannar 2022 ( *1 )
“Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Artikolu 132(1)(b) – Eżenzjonijiet favur ċerti attivitajiet ta’ interess ġenerali – Eżenzjoni tal-kura fl-isptar u tal-kuri mediċi – Attivitajiet marbuta mill-qrib – Kuri termali – Ammont irċevut għall‑istabbiliment ta’ fajl individwali, li jinkludi fajl mediku”
Fil-Kawża C‑513/20,
li għandha bħala suġġett talba għal deċiżjoni preliminari skont l‑Artikolu 267 TFUE, imressqa mis-Supremo Tribunal Administrativo (il-Qorti Amministrattiva Suprema, il-Portugall), permezz ta’ deċiżjoni tal‑1 ta’ Lulju 2020, li waslet fil-Qorti tal-Ġustizzja fit‑13 ta’ Ottubru 2020, fil-proċedura
Autoridade Tributária e Aduaneira
vs
Termas Sulfurosas de Alcafache SA,
IL-QORTI TAL-ĠUSTIZZJA (Is-Seba’ Awla),
komposta minn I. Ziemele (Relatriċi), Presidenta tas-Sitt Awla, li qiegħda taġixxi bħala President tas-Seba’ Awla, T. von Danwitz u A. Kumin, Imħallfin,
Avukat Ġenerali: M. Szpunar,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– |
għall-Kummissjoni Ewropea, minn J. Jokubauskaitė u B. Rechena, bħala aġenti, |
wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,
tagħti l-preżenti
Sentenza
1 |
It-talba għal deċiżjoni preliminari tirrigwarda l-interpretazzjoni tal‑Artikolu 132(1)(b) tad-Direttiva tal-Kunsill 2006/112/KE tat‑28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60, iktar ’il quddiem id-“Direttiva dwar il-VAT”). |
2 |
Din it-talba tressqet fil-kuntest ta’ tilwima bejn l-Autoridade Tributária e Aduaneira (l-Awtorità Fiskali u Doganali, il-Portugall) (iktar ’il quddiem l‑“amministrazzjoni fiskali”) u Termas Sulfurosas de Alcafache SA (iktar ’il quddiem “Termas Sulfurosas”) dwar l-eżenzjoni mit-taxxa fuq il-valur miżjud (VAT) tal-ammonti miġbura għar-reġistrazzjoni termali. |
Il-kuntest ġuridiku
Id-dritt tal-Unjoni
3 |
L-Artikolu 131 tad-Direttiva dwar il-VAT jikkostitwixxi l-uniku artikolu li jinsab fil-Kapitolu 1, intitolat “Disposizzjonijiet ġenerali”, tat-Titolu IX tagħha, intitolat “Eżenzjonijiet”. Dan l-artikolu jipprovdi kif ġej: “L-eżenzjonijiet ipprovduti fil-Kapitoli 2 sa 9 għandhom japplikaw mingħajr preġudizzju għal disposizzjonijet oħrajn tal-Komunità skond kondizzjonijiet li l-Istati Membri għandhom jistabilixxu għall-finijiet li jiżguraw l-applikazzjoni korretta u ċara ta’ dawk l-eżenzjonijet u tal-prevenzjoni ta’ kawlunkwe evażjoni, evitar jew abbuż possibbli.” |
4 |
L-Artikolu 132(1)(b) tad-Direttiva dwar il-VAT, li jinsab fil-Kapitolu 2, intitolat “Eżenzjonijet għal ċertu attivitajiet fl-interess pubbliku” tal-imsemmi Titolu IX, jipprevedi: “L-Istati Membri għandhom jeżentaw it-transazzjonijiet li ġejjin: […]
[…]” |
5 |
L-Artikolu 134 tad-Direttiva dwar il-VAT huwa fformulat kif ġej: “Il-provvista ta’ merkanzija jew servizzi m’għandhiex tingħata eżenzjoni, kif previst fil-punti (b), (g), (h), (i), (l), (m) u (n) ta’ l-Artikolu 132(1), fil-każijiet li ġejjin:
|
Id-dritt Portugiż
6 |
Il-punt 2 tal-Artikolu 9 tal-Código do Imposto sobre o Valor Acrescentado (il‑Kodiċi tat-Taxxa fuq il-Valur Miżjud, iktar ’il quddiem il-“Kodiċi dwar il‑VAT”) jipprevedi li huma eżentati mill-VAT, b’mod partikolari, il-provvisti ta’ servizzi mediċi u tas-saħħa u l-attivitajiet marbuta mill-qrib magħhom, imwettqa minn sptarijiet, kliniċi, ċentri mediċi u entitajiet simili. |
It-tilwima fil-kawża prinċipali u d-domanda preliminari
7 |
Iċ-ċentru termali Termas ta’ Alcafache (il-Portugall) huwa unità ta’ kura tas-saħħa primarja li ma taqax taħt is-servizz nazzjonali tas-saħħa Portugiż u ma għandhiex kapaċità ta’ kura fl-isptar. |
8 |
Termas Sulfurosas tiżgura l-operat ta’ dan iċ-ċentru termali. Hija tiffattura lill‑utenti tagħha servizz imsejjaħ “reġistrazzjoni termali” għal ammont totali li tela’, għas-snin 2010, 2011 u 2012, rispettivament, għal EUR 87003, għal EUR 72654 u għal EUR 55 627.50. Wara rapport tal-ispezzjoni tat-taxxa, dawn l‑ammonti taw lok għal stima ex officio tal-VAT, bir-rata ta’ 23 %, flimkien mal‑ħlas ta’ interessi. |
9 |
Skont dan ir-rapport tal-ispezzjoni tat-taxxa, Termas Sulfurosas tapplika żewġ proċeduri differenti, skont is-servizz mixtieq mill-utent. |
10 |
Għas-servizz ta’ “termaliżmu klassiku”, huwa neċessarju li jiġi kkonsultat minn qabel wieħed mit-tobba taċ-ċentru termali, bl-għan tal-preskrizzjoni tat-trattamenti li għandhom isiru. Mal-ħlas tal-konsultazzjoni, l-utent iħallas ukoll kontribuzzjoni għar-reġistrazzjoni termali, li tkun valida għas-sena kurrenti, li tkopri t-trattamenti preskritti, u li mingħajrha l-imsemmija trattamenti ma humiex aċċessibbli. Termas Sulfurosas ma titlobx il-ħlas tal-VAT għal din il-kontribuzzjoni, iżda tindika fuq il-fatturi riferiment għall-Artikolu 9(2) tal-Kodiċi dwar il-VAT. Fis-sit uffiċjali ta’ Termas Sulfurosas huwa speċifikat li r-reġistrazzjonijiet termali kollha huma individwali, u intiżi sabiex jirriżervaw il-konsultazzjoni medika minn qabel, fejn it-trattamenti jiġu mbagħad preskritti mit-tabib taċ-ċentru termali. Matul is-snin finanzjarji rilevanti, ir-reġistrazzjoni termali kienet iffatturata, rispettivament, għal EUR 30, EUR 33 u EUR 36. |
11 |
Fir-rigward tas-servizzi msejħa ta’ “spa thermal”, il-konsultazzjoni medika minn qabel hija fakultattiva għat-trattamenti ta’ tul ta’ mhux iktar minn tlett ijiem. Għal dan it-tip ta’ servizzi, Termas Sulfurosas ma tiffatturax reġistrazzjoni termali, kemm jekk ikun hemm konsultazzjoni medika jew le. |
12 |
Mir-rapport tal-ispezzjoni tat-taxxa jirriżulta wkoll li l-ħlas tar-reġistrazzjoni termali għandu bħala korrispettiv waħdieni l-possibbiltà ta’ aċċess għat‑trattamenti idroloġiċi, indipendentement minn jekk jiġux effettivament ipprovduti. Dan il-ħlas jagħti lill-utenti d-dritt li jixtru t-trattamenti li huma jixtiequ. |
13 |
Termas Sulfurosas ippreżentat quddiem it-Tribunal Administrativo e Fiscal de Viseu (il-Qorti Amministrattiva u Fiskali ta’ Viseu, il-Portugall) rikors kontra d‑deċiżjoni tal-amministrazzjoni fiskali li tipproċedi bl-istima ex officio tal-VAT dovuta abbażi tar-reġistrazzjoni termali, bir-rata ta’ 23 %, flimkien mal-interessi. |
14 |
Permezz ta’ sentenza tal‑14 ta’ Ġunju 2018, it-Tribunal Administrativo e Fiscal de Viseu (il-Qorti Amministrattiva u Fiskali ta’ Viseu) iddikjarat ir-rikors ippreżentat minn Termas Sulfurosas bħala fondat. |
15 |
Dik il-qorti kkunsidrat, minn naħa, li, peress li l-ammont għar-reġistrazzjoni termali jinġabar għall-aċċess għat-trattamenti termali, li huma stess huma kkunsidrati eżenti mill-VAT, dan l-ammont għandu huwa wkoll jiġi kkunsidrat bħala eżentat, sa fejn dan jinġabar biss wara konsultazzjoni medika u wara l-preskrizzjoni ta’ trattament termali minn tabib awtorizzat. |
16 |
Min-naħa l-oħra, l-imsemmija qorti kkonstatat, fir-rigward tas-servizzi ta’ “termaliżmu klassiku” li jinkludu diversi trattamenti ta’ otorinolaringoloġija, tas-sistema respiratorja u tas-sistema rewmatoloġika, li l-eżistenza ta’ funzjoni terapewtika kienet ipprovata, b’mod differenti mis-servizz ta’ “spa thermal”. |
17 |
L-amministrazzjoni fiskali ppreżentat rikors quddiem is-Supremo Tribunal Administrativo (il-Qorti Amministrattiva Suprema, il-Portugall), fejn sostniet, b’mod partikolari, li l-eżenzjoni prevista fl-Artikolu 132(1)(b) tad-Direttiva dwar il-VAT, trasposta fid-dritt Portugiż mill-punt 2 tal-Artikolu 9 tal-Kodiċi dwar il-VAT, għandha tiġi interpretata b’mod strett, peress li din tikkostitwixxi eċċezzjoni mill-prinċipju ġenerali li kull provvista ta’ servizzi mwettqa bi ħlas minn persuna taxxabbli hija suġġetta għall-VAT. |
18 |
Skont l-amministrazzjoni fiskali, mill-ġurisprudenza tal-Qorti tal-Ġustizzja jirriżulta li anki jekk l-“għan terapewtiku” ta’ attività ma għandux jiġi interpretat b’mod partikolarment restrittiv, huma biss is-servizzi mediċi fis-sens strett tal‑kelma u dawk li għandhom “rabta mill-qrib” ma’ dawn li għandhom jitqiesu li huma koperti mill-eżenzjoni. |
19 |
Din l-amministrazzjoni tiddeduċi, b’mod partikolari, mis-sentenza tat‑2 ta’ Lulju 2015, De Fruytier (C‑334/14, EU:C:2015:437), li att li r-rabta tiegħu ma’ provvista ta’ kuri mediċi “prinċipali” hija inqas jew ugwali għal dik ikkonstatata f’dik is-sentenza ma jistax jitqies bħala “attività marbuta mill-qrib mas-servizzi mediċi jew tas-saħħa”. L-ammont miġbur minn Termas Sulfurosas għar‑reġistrazzjoni termali ma jistax jitqies bħala “attività marbuta mill-qrib” mal‑provvista ta’ servizzi mediċi jew tas-saħħa. |
20 |
Il-qorti tar-rinviju tindika li, fid-dawl tal-kriterji diġà ddefiniti mill-Qorti tal‑Ġustizzja, ma jidhirx b’mod ċar jekk l-ammonti miġbura għar-reġistrazzjoni termali għandhomx jitqiesu li għandhom rabta mill-qrib mal-provvista ta’ kuri mediċi, fis-sens tal-Artikolu 132(1)(b) tad-Direttiva dwar il-VAT. |
21 |
Skont il-qorti tar-rinviju, ċerti elementi jimmilitaw favur risposta fl-affermattiv għal din id-domanda, bħall-fatt li jiġi inkluż is-servizz ta’ ftuħ ta’ fajl individwali għal kull utent, li jinkludi l-fajl mediku li jagħti d-dritt li jinxtraw trattamenti li jaqgħu taħt it-“termaliżmu klassiku” li n-natura tiegħu ta’ provvista ta’ servizzi u ta’ attività eżentata ma hijiex ikkontestata fil-kawża prinċipali. |
22 |
F’dawn iċ-ċirkustanzi, is-Supremo Tribunal Administrativo (il-Qorti Amministrattiva Suprema) iddeċidiet li tissospendi l-proċeduri u li tagħmel lill‑Qorti tal-Ġustizzja d-domanda preliminari li ġejja: “Il-pagamenti mwettqa bħala korrispettiv għas-servizz ta’ ftuħ tal-fajl individwali ta’ kull utent, inkluż il-fajl kliniku li jagħti dritt għax-xiri ta’ trattamenti ta’ ‘termaliżmu klassiku’ jistgħu […] jaqgħu taħt il-kunċett ta’ ‘attivitajiet relatati mill-viċin’ imsemmi fl-Artikolu 132(1)(b) tad-Direttiva dwar il-VAT, u għalhekk għandhom jitqiesu li huma eżenti mill-VAT?” |
Fuq id-domanda preliminari
23 |
Permezz tad-domanda tagħha, il-qorti tar-rinviju tistaqsi, essenzjalment, jekk l‑Artikolu 132(1)(b) tad-Direttiva tal-VAT għandux jiġi interpretat fis-sens li l‑attività li tikkonsisti fl-istabbiliment ta’ fajl individwali, li jinkludi fajl mediku, li jagħti d-dritt li jinxtraw trattamenti li jaqgħu taħt it-“termaliżmu klassiku” fi stabbiliment termali, tistax taqa’ taħt l-eżenzjoni mill-VAT prevista minn din id‑dispożizzjoni bħala attività marbuta mill-qrib ma’ kuri mediċi. |
24 |
Skont l-Artikolu 132(1)(b) tad-Direttiva dwar il-VAT, l-Istati Membri għandhom jeżentaw il-kura fl-isptar u l-kuri mediċi kif ukoll l-attivitajiet marbuta mill-qrib magħhom, ipprovduti minn korpi rregolati mid-dritt pubbliku jew, f’kundizzjonijiet soċjali komparabbli għal dawk applikabbli għal dawn tal-aħħar, minn sptarijiet, ċentri ta’ kura medika u ta’ djanjosi u stabbilimenti oħra tal-istess natura debitament irrikonoxxuti. |
25 |
F’dan ir-rigward, għandu jitfakkar qabelxejn li l-kliem użat sabiex jiġu indikati l‑eżenzjonijiet li jinsabu fl-Artikolu 132 tad-Direttiva dwar il-VAT għandu jiġi interpretat b’mod strett, peress li dawn jikkostitwixxu derogi mill-prinċipju ġenerali li jgħid li l-VAT tinġabar fuq kull provvista ta’ servizzi magħmula mill‑persuna taxxabbli bi ħlas. Madankollu, l-interpretazzjoni ta’ dan il-kliem għandha tosserva r-rekwiżiti tal-prinċipju ta’ newtralità fiskali inerenti fis-sistema komuni tal-VAT u għandha tkun konformi mal-għanijiet imfittxija permezz tal‑imsemmija eżenzjonijiet. B’hekk, din ir-regola ta’ interpretazzjoni stretta ma tfissirx li l-kliem użat sabiex jiġu ddefiniti l-eżenzjonijiet previsti fl-imsemmi Artikolu 132 għandhom jiġu interpretati b’mod li jċaħħad lil dawn l-eżenzjonijiet mill-effetti tagħhom (sentenza tal‑15 ta’ April 2021, Administration de l’Enregistrement, des Domaines et de la TVA, C‑846/19, EU:C:2021:277, punt 57). |
26 |
Il-kuri mediċi u l-kura fl-isptar imsemmija fl-Artikolu 132(1)(b) tad-Direttiva dwar il-VAT huma, skont il-ġurisprudenza, dawk li għandhom l-għan li jiddijanjostikaw, li jagħtu kura u, sa fejn huwa possibbli, li jfejqu mard jew anomaliji tas-saħħa (sentenzi tas‑6 ta’ Novembru 2003, Dornier, C‑45/01, EU:C:2003:595, punt 48; tal‑1 ta’ Diċembru 2005, Ygeia, C‑394/04 u C‑395/04, EU:C:2005:734, punt 24; kif ukoll tat‑18 ta’ Settembru 2019, Peters, C‑700/17, EU:C:2019:753, punt 20). Barra minn hekk, is-servizzi mediċi pprovduti bil-għan tal-protezzjoni, inkluż iż-żamma jew l-irkupru, tas-saħħa tal-persuni jibbenefikaw mill-eżenzjoni prevista f’din id-dispożizzjoni (ara, f’dan is-sens, is-sentenza tal‑10 ta’ Ġunju 2010, CopyGene, C‑262/08, EU:C:2010:328, punt 30). |
27 |
F’dan il-każ, il-qorti tar-rinviju tqis li huwa stabbilit li t-trattamenti offruti fiċ‑ċentru termali inkwistjoni fil-kawża prinċipali fil-kuntest tat-“termaliżmu klassiku”, b’mod partikolari ċerti trattamenti ta’ otorinolaringoloġija, tas-sistema respiratorja u tas-sistema rewmatoloġika li għandhom funzjoni terapewtika u li huma preskritti minn tabib, jikkostitwixxu kuri mediċi fis-sens tal‑Artikolu 132(1)(b) tad-Direttiva dwar il-VAT. |
28 |
Għalhekk, għandu jiġi ddeterminat jekk l-attività li tikkonsisti fl-istabbiliment ta’ fajl individwali, li jinkludi fajl mediku, li jagħti d-dritt li jinxtraw tali kuri mediċi li għandha bħala korrispettiv il-ħlas tal-kontribuzzjoni għar-reġistrazzjoni termali, taqax taħt il-kunċett ta’ “attivitajiet marbuta mill-qrib” mal-kuri mediċi. |
29 |
Peress li l-Artikolu 132(1)(b) tad-Direttiva dwar il-VAT ma jiddefinixxix il‑kunċett ta’ “attivitajiet marbuta mill-qrib” mal-kura fl-isptar u mal-kuri mediċi (ara, f’dan is-sens, is-sentenza tal‑11 ta’ Jannar 2001, Il‑Kummissjoni vs Franza, C‑76/99, EU:C:2001:12, punt 22), din id-dispożizzjoni għandha tiġi interpretata fid-dawl tal-kuntest li hija tagħmel parti minnu, tal-għanijiet u tal-istruttura tad‑Direttiva dwar il-VAT, b’teħid inkunsiderazzjoni b’mod partikolari tar-ratio legis tal-eżenzjoni li hija tipprevedi (sentenza tal‑4 ta’ Marzu 2021, Frenetikexito, C‑581/19, EU:C:2021:167 punt 23, u l-ġurisprudenza ċċitata). Madankollu, mill‑kliem stess tal-imsemmija dispożizzjoni jirriżulta li din ma tkoprix servizzi li ma għandhom l-ebda rabta mal-kura fl-isptar ta’ dawk li jirċievu dawn is-servizzi u lanqas ma’ kuri mediċi rċevuti eventwalwent minnhom (ara, f’dan is-sens, is‑sentenza tal-1 ta’ Diċembru 2005, Ygeia, C‑394/04 u C‑395/04, EU:C:2005:734, punt 17 u l-ġurisprudenza ċċitata). |
30 |
Fir-rigward tal-kuntest li jagħmel parti minnu l-Artikolu 132(1)(b) tad-Direttiva dwar il-VAT, għandu jitfakkar li dan għandu jinqara fid-dawl, b’mod partikolari, tal-Artikolu 134(a) ta’ din id-direttiva li jeżiġi, f’kull każ, li l-kunsinni ta’ oġġetti jew il-provvisti ta’ servizzi kkonċernati għandhom ikunu indispensabbli għat‑twettiq tal-attivitajiet li jaqgħu taħt il-kura fl-isptar u l-kuri mediċi (ara, f’dan is-sens, is-sentenzi tal‑1 ta’ Diċembru 2005, Ygeia, C‑394/04 u C‑395/04, EU:C:2005:734, punt 26; tal‑14 ta’ Ġunju 2007, Horizon College, C‑434/05, EU:C:2007:343, punt 38, kif ukoll tat‑8 ta’ Ottubru 2020, Finanzamt D, C‑657/19, EU:C:2020:811, punt 31). |
31 |
F’dak li jirrigwarda l-għan segwit permezz tal-Artikolu 132(1)(b) tad-Direttiva dwar il-VAT, il-Qorti tal-Ġustizzja diġà ddeċidiet li l-eżenzjoni tal-attivitajiet marbuta mill-qrib mal-kura fl-isptar u mal-kuri mediċi previsti f’din id‑dispożizzjoni hija intiża sabiex tiggarantixxi li l-benefiċċju tal-kuri mediċi u tal-isptarijiet ma jsirx inaċċessibbli minħabba l-ispiża ikbar ta’ dawn il-kuri kieku dawn stess, jew l-attivitajiet li huma marbuta mill-qrib magħhom, kienu suġġetti għall-VAT (sentenzi tal‑11 ta’ Jannar 2001, Il‑Kummissjoni vs Franza, C‑76/99, EU:C:2001:12, punt 23, kif ukoll tal‑1 ta’ Diċembru 2005, Pajg, C‑394/04 u C‑395/04, EU:C:2005:734, punt 23). |
32 |
Fid-dawl ta’ dan l-għan, huma biss il-provvisti ta’ servizzi li jaqgħu loġikament fil-kuntest tal-provvista ta’ servizzi ta’ kura fl-isptar u ta’ kuri mediċi u li jikkostitwixxu stadju indispensabbli fil-proċess ta’ provvista ta’ dawn is-servizzi sabiex jintlaħqu l-għanijiet terapewtiċi segwiti minn dawn tal-aħħar li jistgħu jikkostitwixxu “attivitajiet marbuta mill-qrib”, fis-sens tal-imsemmija dispożizzjoni, peress li biss tali servizzi huma tali li jaffettwaw l-ispiża tal-kuri tas-saħħa li l-eżenzjoni tagħhom tippermetti li dawn isiru aċċessibbli għall‑individwi (ara, f’dan is-sens, is-sentenzi tal‑1 ta’ Diċembru 2005, Ygeia, C‑394/04 u C‑395/04, EU:C:2005:734, punt 25; tal‑10 ta’ Ġunju 2010, CopyGene, C‑262/08, EU:C:2010:328, punt 40; kif ukoll tat‑2 ta’ Lulju 2015, De Fruytier, C‑334/14, EU:C:2015:437, punt 29). |
33 |
Sabiex jiġi stabbilit jekk servizzi bħal dawk inkwistjoni fit-tilwima fil-kawża prinċipali humiex indispensabbli għat-twettiq tal-kuri mediċi, għandu jittieħed inkunsiderazzjoni, b’mod partikolari, l-għan li għalih jiġu pprovduti l-imsemmija servizzi (ara, f’dan is-sens, is-sentenzi tal‑11 ta’ Jannar 2001, Il-Kummissjoni vs Franza, C‑76/99, EU:C:2001:12, punt 24, kif ukoll tal‑1 ta’ Diċembru 2005, Ygeia, C‑394/04 u C‑395/04, EU:C:2005:734, punt 22), kif ukoll l-elementi kollha tat-tilwima li tressqet quddiem il-qorti tar-rinviju (sentenza tat-2 ta’ Lulju 2015, De Fruytier, C‑334/14, EU:C:2015:437, punt 30). |
34 |
Barra minn hekk, mill-ġurisprudenza jirriżulta li l-possibbiltà li jista’ jkun hemm dewmien twil bejn il-provvista inkwistjoni u l-kuri mediċi ma tipprekludix, bħala tali, li dan is-servizz ikun jista’ jaqa’ taħt l-eżenzjoni li tinsab fl‑Artikolu 132(1)(b) tad-Direttiva dwar il-VAT. Madankollu, l-attivitajiet li għandhom biss il-possibbiltà, jekk iseħħu ċerti eventwalitajiet, li jkunu marbuta mill-qrib ma’ kuri mediċi, li la huma effettivi, la kurrenti u lanqas ippjanati, ma jistgħux jiġu kkunsidrati bħala servizzi li huma “marbuta mill-qrib” mal-kuri mediċi fis-sens ta’ din id-dispożizzjoni (ara, f’dan is-sens, is-sentenza tal‑10 ta’ Ġunju 2010, CopyGene, C‑262/08, EU:C:2010:328, punti 45, 46 u 50). |
35 |
F’dan il-każ, l-attività inkwistjoni fil-kawża prinċipali tikkonsisti, skont il-qorti tar-rinviju, fl-istabbiliment ta’ fajl individwali, li jinkludi fajl mediku, li jagħti d‑dritt li jinxtraw kuri mediċi fil-kuntest tat-“termaliżmu klassiku”. |
36 |
Hija l-qorti tar-rinviju, li hija l-unika li għandha ġurisdizzjoni sabiex tevalwa l‑fatti, li għandha tiddetermina n-natura ta’ din l-attività u tal-informazzjoni li tinsab fl-imsemmi fajl individwali, kif ukoll l-għan tagħhom. |
37 |
Fil-każ li l-imsemmija attività tikkonsisti fl-istabbiliment ta’ fajl individwali, li jinkludi fajl mediku, li jirriproduċi data dwar l-istat ta’ saħħa tal-utent u dwar il‑kuri preskritti, li jistgħu, għaldaqstant, jitqiesu li huma ppjanati, kif ukoll dwar il-modalitajiet tal-amministrazzjoni tagħhom, u data li l-konsultazzjoni tagħha hija indispensabbli sabiex jingħataw dawn il-kuri u jintlaħqu l-għanijiet terapewtiċi segwiti, tali attività tista’ titqies li hija “marbuta mill-qrib” ma’ dawn il-kuri mediċi fis-sens tal-Artikolu 132(1)(b) tad-Direttiva dwar il-VAT. |
38 |
Min-naħa l-oħra, fil-każ fejn il-korrispettiv għall-ħlas tar-reġistrazzjoni jikkonsisti biss fil-possibbiltà li jinxtraw kuri preskritti jew jekk il-kontenut tal-fajl individwali, inkluż il-fajl mediku, ma jkunx indispensabbli sabiex jingħataw dawn il-kuri u sabiex jintlaħqu l-għanijiet terapewtiċi previsti, tali attività ma għandhiex titqies li hija “marbuta mill-qrib” mal-kuri mediċi fis-sens tal-Artikolu 132(1)(b) tad-Direttiva dwar il-VAT, indipendentement mill-fatt li, mingħajr il-ħlas tar‑reġistrazzjoni termali, il-kuri preskritti ma humiex aċċessibbli. |
39 |
Jekk il-qorti tar-rinviju tqis li l-attività inkwistjoni fil-kawża prinċipali tikkostitwixxi effettivament stadju indispensabbli fil-proċess ta’ provvista ta’ kuri mediċi sabiex jintlaħqu l-għanijiet terapewtiċi segwiti permezz ta’ dawn tal-aħħar, u tikkostitwixxi għalhekk attività marbuta mill-qrib mal-kuri mediċi, hija għandha mbagħad tivverifika jekk din l-attività hijiex żgurata minn stabbiliment imsemmi fl-Artikolu 132(1)(b) tad-Direttiva dwar il-VAT, fil-kundizzjonijiet previsti f’dan l-artikolu. |
40 |
Fil-fatt, mill-Artikolu 132(1)(b) tad-Direttiva dwar il-VAT jirriżulta li, meta ma jkunux korpi rregolati mid-dritt pubbliku, il-kura fl-isptar u l-kuri mediċi kif ukoll l-attivitajiet li huma marbuta mill-qrib magħhom huma eżentati, jekk jingħataw “f’kundizzjonijiet soċjali komparabbli” għal dawk applikabbli għall-korpi rregolati mid-dritt pubbliku, minn “sptarijiet, ċentri għat-trattament mediku jew djanjosi u stabblimenti oħrajn ta’ natura simili debitament rikonoxxuti”. |
41 |
F’dan il-każ, peress li ċ-ċentru termali inkwistjoni fil-kawża prinċipali ma jikkostitwixxix manifestament sptar, hija l-qorti tar-rinviju li għandha tivverifika jekk il-kuri mediċi kif ukoll l-attivitajiet li huma marbuta mill-qrib magħhom mogħtija fih jiġux ipprovduti f’kundizzjonijiet soċjali komparabbli għal dawk applikabbli għall-korpi rregolati mid-dritt pubbliku u jekk huwiex ċentru ta’ kura medika u ta’ djanjosi jew minn stabbiliment ieħor tal-istess natura debitament irrikonoxxut fis-sens tal-Artikolu 132(1)(b) tad-Direttiva dwar il-VAT, b’tali mod li r-rekwiżiti kollha previsti f’dan l-artikolu huma ssodisfatti. |
42 |
Fid-dawl ta’ dak li ntqal iktar ’il fuq, ir-risposta għad-domanda preliminari għandha tkun li l-Artikolu 132(1)(b) tad-Direttiva dwar il-VAT għandu jiġi interpretat fis-sens li l-attività li tikkonsisti fl-istabbiliment ta’ fajl individwali, li jinkludi fajl mediku, li jagħti d-dritt li jinxtraw kuri mediċi li jaqgħu taħt it‑“termaliżmu klassiku” fi stabbiliment termali, tista’ taqa’ taħt l-eżenzjoni mill‑VAT prevista f’din id-dispożizzjoni inkwantu attività marbuta mill-qrib mal‑kuri mediċi, meta dawn il-fajls jirriproduċu data dwar l-istat ta’ saħħa, il-kuri mediċi preskritti u ppjanati, kif ukoll dwar il-modalitajiet tal-amministrazzjoni tagħhom, data li l-konsultazzjoni tagħha hija indispensabbli sabiex jingħataw dawn il-kuri u jintlaħqu l-għanijiet terapewtiċi segwiti. L-imsemmija kuri mediċi kif ukoll l-attivitajiet li huma marbuta mill-qrib magħhom għandhom barra minn hekk jingħataw f’kundizzjonijiet soċjali komparabbli ma’ dawk applikabbli għall‑korpi rregolati mid-dritt pubbliku, minn ċentru ta’ kura medika u ta’ djanjosi jew minn stabbiliment ieħor tal-istess natura debitament irrikonoxxut fis-sens ta’ dan l-Artikolu 132(1)(b). |
Fuq l-ispejjeż
43 |
Peress li l-proċedura għandha, fir-rigward tal-partijiet fil-kawża prinċipali, in‑natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal‑osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura. |
Għal dawn il-motivi, il-Qorti tal-Ġustizzja (is-Seba’ Awla) taqta’ u tiddeċiedi: |
L-Artikolu 132(1)(b) tad-Direttiva tal-Kunsill 2006/112/KE tat‑28 ta’ Novembru 2006 dwar is-sistema komuni ta’ taxxa fuq il-valur miżjud għandu jiġi interpretat fis-sens li l-attività li tikkonsisti fl-istabbiliment ta’ fajl individwali, li jinkludi fajl mediku, li jagħti d-dritt li jinxtraw kuri mediċi li jaqgħu taħt it-“termaliżmu klassiku” fi stabbiliment termali, tista’ taqa’ taħt l-eżenzjoni mit-taxxa fuq il-valur miżjud prevista f’din id-dispożizzjoni inkwantu attività marbuta mill-qrib mal-kuri mediċi, meta dawn il-fajls jirriproduċu data dwar l-istat ta’ saħħa, il-kuri mediċi preskritti u ppjanati, kif ukoll dwar il-modalitajiet tal-amministrazzjoni tagħhom, data li l‑konsultazzjoni tagħha hija indispensabbli sabiex jingħataw dawn il-kuri u jintlaħqu l-għanijiet terapewtiċi segwiti. |
L-imsemmija kuri mediċi kif ukoll l-attivitajiet li huma marbuta mill-qrib magħhom għandhom barra minn hekk jingħataw f’kundizzjonijiet soċjali komparabbli ma’ dawk applikabbli għall-korpi rregolati mid-dritt pubbliku, minn ċentru ta’ kura medika u ta’ djanjosi jew minn stabbiliment ieħor tal‑istess natura debitament irrikonoxxut fis-sens ta’ dan l‑Artikolu 132(1)(b). |
Firem |
( *1 ) Lingwa tal-kawża: il-Portugiż.