Rekwiżiti għal oqfsa baġitarji tal-Istati Membri

PUNTI EWLENIN

Id-direttiva tirrekjedi li l-gvernijiet tal-Istati Membri jagħmlu dan li ġej.

• Joperaw sistemi ta’ kontabilità pubblika li konsistentement u komprensivament ikopru s-sottotaqsimiet ta’ amministrazzjoni pubblika u jkollhom l-informazzjoni kollha neċessarja biex jiġġeneraw ċifri tad-dovuti bil-ħsieb li jippreparaw ċifri bbażati fuq is-sistema Ewropea tal-kontijiet nazzjonali u reġjonali. Dawn is-sistemi jridu jkunu suġġetti għal kontroll intern u awditjar indipendenti.
• Jagħmlu id-data fiskali pubblikament disponibbli u jippubblikawhom qabel it-tmiem tat-trimestru li jmiss jew wara l-pubblikazzjoni tad-data rilevanti mill-uffiċċju tal-Istatistika tal-Unjoni Ewropea — Eurostat.
• Jassikuraw li l-ippjannar annwali u multiannwali tagħhom ikun ibbażat fuq tbassir realistiku makroekonomiku u baġitarju, billi jużaw l-iktar data li hi aġġornata. Ippjannar baġitarju jrid ikun ibbażat fuq ix-xenarju makrofiskali l-iktar probabbli jew fuq xenarju iktar prudenti. It-tbassir makroekonomiċku u baġitarju jrid ikun imqabbel mat-tbassir l-iktar riċenti tal-Kummissjoni Ewropea u, jekk xieraq, ma’ dak ta’ entitajiet indipendenti oħra. Fejn ikun hemm differenzi sinifikanti bejn it-tbassir ta’ Stat Membru u dak tal-Kummissjoni, dawn iridu jkunu mfissra.
• Jassikuraw li t-tbassir makroekonomiku u baġitarju għal ippjannar fiskali annwali u multiannwali huwa suġġett għal evalwazzjoni regolari, objettiva u komprensiva ex post minn entità indipendenti jew entitajiet oħra b’awtonomija funzjonali vis-à-vis l-awtoritajiet fiskali tal-Istati Membri differenti minn dik li tkun pproduċiet it-tbassir. Ir-riżultat ta’ dik l-evalwazzjoni trid issir pubblika u tittieħed inkunsiderazzjoni b’mod xieraq fit-tbassir futur makroekonomiku u baġitarju.
• Jistabbilixxu IFI wieħed jew bosta — entitajiet pubbliċi li għandhom l-għan li jippromwovu finanzi pubbliċi sostenibbli billi jissurveljaw il-konformità ta’ gvernijiet ma’ regoli fiskali u magħmula minn membri nominati u appuntati abbażi tal-esperjenza u kompetenza tagħhom f’finanzi pubbliċi, ġestjoni makroekonomika jew baġitarja, u permezz ta’ proċeduri trasparenti. IFIs għandu jkollhom il-kapaċità li jikkomunikaw pubblikament; b’riżorsi adegwati, stabbli u suffiċjenti u aċċess fil-ħin għal informazzjoni. Il-kompiti tagħhom ser jinkludu:
  • il-produzzjoni, assessjar jew approvazzjoni ta’ tbassir annwali u multiannwali makroekonomiku;
  • sorveljanza tal-konformità ma’ regoli fiskali numeriċi speċifiċi għall-pajjiż;
  • assessjar tal-konsistenza, koorenza u effettività tal-qafas baġitarju nazzjonali;
  • fuq stedina, parteċipazzjoni f’seduti regolari u diskussjonijiet fil-parliamenti nazzjonali;
  • l-ewwel fuq stedina u wara, mill-1 ta’ Mejju 2032, obbligatorjament joħroġu opinjonijiet fuq tbassir u assunzjonijiet makroekonomiċi konformi ma’ Regolament (UE) 2024/1263 — ara s-sommarju; u
  • fuq stedina, fil-kuntest tal-proċedura ta’ defiċit eċċessiv, jippreparaw rapporti dwar is-suffiċjenza tal-miżuri li ttieħdu u previsti fir-rigward tal-miri tan-nefqa tal-gvern.
• Jistabbilixxu qafas baġitarju għat-terminu medju² kredibbli, effettiv li jinkludi orizzont b’ippjannar fiskali ta’ tal-inqas tliet snin. Dawn l-oqfsa għandu jkollhom objettivi baġitarji multiannwali komprensivi, projezzjonijiet ta’ spiża maġġuri u punti ta’ dħul, deskrizzjoni ta’ politiki għat-terminu medju, inklużi riformi u investiment, u evalwazzjoni tas-sostenibbilità għat-terminu twil ta’ finanzi pubbliċi.
• Fid-dokumentazzjoni tal-baġit annwali u tal-ippjannar tat-terminu twil, jippubblikaw, sal-estent possibbli, informazzjoni dwar imputabilitajiet kontinġenti u spejjeż fiskali minn diżastri naturali u xokkijiet relatati mal-klima. Barra minn hekk, il-valutazzjoni tal-impatt tal-politiki previsti fuq is-sostenibbilità tal-finanzi pubbliċi għandha, sal-estent possibbli, tqis ir-riskji makrofiskali tat-tibdil fil-klima. Ir-riskji makrofiskali jirreferu għas-sorsi ta’ devjazzjonijiet potenzjali kbar minn tbassir makroekonomiku, tbassir fiskali jew baġits. Riskji fiskali minn diżastri u relatati mal-klima huma devjazzjonijiet li jirriżultaw minn diżastri u xokkijiet relatati mal-klima.
• Jassikuraw il-konsistenza u koordinazzjoni tar-regoli u tal-proċeduri tal-kontabilità fl-oqsma kollha tal-attività tal-gvern, flimkien mal-integrità tal-ġbir ta' dejta sottostanti u sistemi ta’ pproċessar.