This document is an excerpt from the EUR-Lex website
Document 52014DC0339
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Research and innovation as sources of renewed growth
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Ir-riċerka u l-innovazzjoni bħala sorsi tat-tkabbir imġedded
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Ir-riċerka u l-innovazzjoni bħala sorsi tat-tkabbir imġedded
/* COM/2014/0339 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Ir-riċerka u l-innovazzjoni bħala sorsi tat-tkabbir imġedded /* COM/2014/0339 final */
1. Ir-riċerka u
l-innovazzjoni bħala investiment li jtejjeb it-tkabbir L-Ewropa tinsab f’pożizzjoni tajba biex
taħtaf l-opportunitajiet tat-tkabbir li jmiss. Bl-akbar suq intern
tad-dinja, l-Ewropa tospita ħafna mill-kumpaniji innovattivi pijunieri
tad-dinja, u għandha pożizzjoni prominenti f’ħafna oqsma
tal-għarfien u tat-teknoloġiji ewlenin bħalma huma
s-saħħa, l-ikel, l-enerġija rinnovabbli, it-teknoloġiji
ambjentali u t-trasport.[1]
Il-ġid tal-Ewropa mhux magħruf
jirriżulta minn forza tax-xogħol bi kwalifiki għolja u
mill-pożizzjoni fuq quddiem tagħha fl-industriji kulturali u ta’
kreattività. Madankollu, huma meħtieġa aktar sforzi sabiex ikun
żgurat il-funzjonament mingħajr xkiel tas-suq uniku tagħha,
sabiex jittejbu l-kundizzjonijiet ta’ qafas għan-negozji biex jinnovaw, u
sabiex jitħaffu l-investimenti fit-teknoloġiji rivoluzzjonarji
f’oqsma li qed jikbru b’rata mgħaġġla.[2] Opportunitajiet ġodda ta’ tkabbir
jiġu mid-disponibbiltà tal-prodotti u s-servizzi ġodda li
jirriżultaw mill-avvanzi teknoloġiċi, minn proċessi u
mudelli ta’ negozju ġodda, mill-innovazzjoni mhux teknoloġika u
mill-innovazzjoni fis-settur tas-servizzi, flimkien mal-kreattività,
il-ħiliet u t-talent u xprunati minnhom, jew, fi kliem ieħor,
mill-innovazzjoni fl-usa' tifsira tagħha. Iridu jgawdu minn direzzjoni
qawwija mogħtija mill-politika ekonomika u politiki li jindirizzaw
l-isfidi tas-soċjetà bħalma huma t-tixjiħ tal-popolazzjoni,
is-sigurtà tal-enerġija, it-tibdil fil-klima, inkluż il-ġestjoni
tar-riskji tad-diżastri, u l-inklużjoni soċjali, li
jeħtieġu innovazzjonijiet rivoluzzjonarji. Sabiex jittieħdu l-benefiċċji
minn dawn il-vantaġġi f’termini ta’ prosperità ekonomika u ta’
kwalità tal-ħajja, il-gvernijiet madwar l-Ewropa jridu jieħdu
pożizzjoni attiva fl-appoġġ ta’ politiki li jżidu
t-tkabbir, speċifikament ir-riċerka u l-innovazzjoni. Is-sitwazzjoni ekonomika li qed titjieb
gradwalment tippermetti lill-Ewropa biex issa titfa’ l-attenzjoni tagħha
fuq it-tisħiħ tat-tkabbir filwaqt li jinżamm ir-ritmu
tar-riforma u b’hekk jinkiseb irkupru dewwiemi. Hekk kif l-Ewropa qed tinqala’
mill-kriżi, joħroġ dejjem aktar ċar kemm fil-fatt swew dawk
il-politiki li jappoġġaw it-tisħiħ tat-tkabbir. Il-provi
juru li l-biċċa l-kbira tal-gwadanni tal-produttività ta’ dan
l-aħħar ġejjin mill-innovazzjoni[3]
u li, bħala medja, dawk il-pajjiżi li kienu investew aktar
fir-riċerka u l-innovazzjoni, qabel u waqt il-kriżi, kienu dawk li
l-aktar setgħu jirreżistu matul il-perjodu ta’ reċessjoni.[4] Ir-riċerka u l-innovazzjoni bħala
investiment li jsaħħaħ it-tkabbir Għal din ir-raġuni,
l-istrateġija Ewropa 2020 u l-Istħarriġ Annwali dwar it-Tkabbir
tal-aħħar,[5]
jenfasizzaw il-ħtieġa tas-sostenn u fejn possibbli tal-promozzjoni
tal-infiq li jsaħħaħ it-tkabbir fil-qafas ta’ sforzi
ġenerali ta’ konsolidazzjoni fiskali. Dan huwa rifless ukoll
fir-Rakkomandazzjonijiet Speċifiċi għall-Pajjiżi
tas-Semestru Ewropew tal-2014. L-investiment pubbliku jiġġenera l-bażi
tal-għarfien u l-ħiliet li l-kumpaniji innovattivi għandhom
bżonn u dan jiggwida wkoll l-investiment tan-negozji fir-riċerka u
l-innovazzjoni, elementi kruċjali sabiex jintlaħqu l-ambizzjonijiet
tal-Istrateġija Ewropa 2020. It-trażżin tal-investiment pubbliku
fir-riċerka u l-innovazzjoni, anki jekk minħabba kundizzjonijiet
baġitarji diffiċli, jista’ jkollu wkoll impatt konsiderevoli fuq
il-potenzjal tat-tkabbir fuq perjodu fit-tul tal-pajjiż billi jnaqqas
il-kapaċità tal-assorbiment tar-riċerka u l-innovazzjoni mwettqa
f’postijiet oħra u billi jtellef opportunitajiet attraenti ta’ karrieri
għaż-żgħażagħ ta' talent ta' pajjiż. Il-baġit tal-Unjoni għall-2014-20
juri bidla deċiżiva favur ir-riċerka u l-innovazzjoni u favur
elementi oħra li jsaħħu t-tkabbir, b’żieda f’termini reali
ta’ 30 % fil-baġit għall-Orizzont 2020, il-programm il-ġdid
tal-UE għar-Riċerka u l-Innovazzjoni. Ammont ieħor ta’
EUR 83 biljun mistenni li jiġi investit fir-riċerka u
l-innovazzjoni kif ukoll fl-SMEs permezz tal-Fondi Ewropej Strutturali u ta’
Investiment il-ġodda. Madankollu, dan
l-investiment addizzjonali mill-baġit tal-Unjoni għandu
jikkomplementa, u mhux jieħu post, l-investimenti mill-Istati Membri kemm
minn sorsi pubbliċi u kemm privati. Biex isir iktar progress lejn il-mira
ta’ investiment tal-Ewropa 2020 fir-riċerka u l-iżvilupp ta’ 3 %
tal-PDG,[6]
jeħtieġ li l-gvernijiet madwar l-Ewropa jkomplu jinvestu
fir-riċerka u l-innovazzjoni, billi jiżguraw l-effiċjenza kif
ukoll l-ingranaġġ tal-investiment privat. Jeħtieġ ukoll li
jittejbu l-kundizzjonijiet ta’ qafas li jiffaċilitaw dan,[7] billi jitqiesu
l-orjentazzjonijiet attwali tal-politika industrijali[8]. Nefqa pubblika
bħal din mhijiex spiża, iżda investiment fil-futur, realtà li
issa hija rikonoxxuta fis-Sistema Ewropea riveduta tal-Kontijiet Nazzjonali u
Reġjonali, il-metodu tal-Eurostat għall-kalkolu tal-infiq pubbliku.[9] Bosta Stati Membri naqqsu l-infiq dirett tagħhom
fir-riċerka u l-Iżvilupp fil-qafas tal-isforzi tagħhom ta’
konsolidazzjoni fiskali, kif murija fil-Grafika 1, anke jekk f’xi każijiet
dan huwa parzjalment ikkumpensat biż-żieda fl-inċentivi
tat-taxxa tar-Riċerka u l-Iżvilupp. Dan it-tnaqqis ġie nnutat
l-aktar mill-2012. Matul l-ewwel perjodu tal-kriżi, mill-2008 sal-2010,
ħafna Stati Membri pproteġew il-baġits tagħhom
tarr-Riċerka u l-Iżvilupp u xi wħud saħansitra żiedu
l-infiq tagħhom fir-Riċerka u l-Iżvilupp. Barra minn hekk, ħafna Stati Membri
għadhom’ il bogħod mill-miri nazzjonali tagħhom tar-Riċerka
u l-Iżvilupp tal-Istrateġija Ewropa 2020 kif jidher fil-Grafika 2.[10] Dan jirrifletti
prinċipalment defiċit fin-nefqa tar-riċerka u l-iżvilupp.[11] Din il-Komunikazzjoni se tesplora kif
il-potenzjal tar-riċerka u l-innovazzjoni bħala fatturi li jixprunaw
it-tkabbir imġedded jistgħu jiġu massimizzati permezz tat-titjib
tal-kwalità tal-investimenti fil-qafas tal-istrateġiji tal-Istati Membri ta’
konsolidament fiskali li jiffavorixxu t-tkabbir. Grafika 1. Bidliet fir-riċerka u l-iżvilupp
bħala proporzjon tan-nefqa totali tal-gvern (2008-2012) Grafika 2. L-intensità tar-riċerka u l-iżvilupp
pubbliċi u privati fl-2012, l-Istati Membri tal-UE u pajjiżi terzi, 2. Iż-żieda fl-impatt
u l-valur għall-flus 2.1 It-titjib tal-kwalità
tan-nefqa pubblika fir-riċerka u l-innovazzjoni F’kuntest ta’ kundizzjonijiet baġitarji
diffiċli kontinwi, huwa essenzjali li jiġi massimizzat l-impatt
tal-infiq pubbliku billi tittejjeb il-kwalità tiegħu. L-investimenti
tal-gvern għalhekk jeħtieġ li jimxu id f’id mar-riformi
estensivi fis-sistemi tar-riċerka u l-innovazzjoni, inkluż permezz
tat-titjib fl-effett tal-ingranaġġ tal-infiq pubbliku fl-investiment
privat. Jeħtieġ li l-gvernijiet jsiru aktar intelliġenti dwar
kif u meta jinvestu,[12]
u b’hekk għandhom ikunu ispirati mill-approċċ strateġiku
kuraġġuż żviluppat fl-inizjattiva ewlenija tal-Unjoni
tal-Innovazzjoni u fl-aġenda taż-Żona Ewropea tar-Riċerka.[13] Il-valutazzjoni tal-kwalità, l-effiċjenza
u l-impatt tal-infiq pubbliku fir-riċerka u l-innovazzjoni hija sfida u
l-indikaturi disponibbli għandhom il-limitazzjonijiet tagħhom.
Bl-iffokar esklussivament fuq il-kapaċità tas-setturi pubbliċi u
privati li jbiddlu l-investiment fir-riċerka u l-iżvilupp
f’applikazzjonijiet għall-privattivi,[14]
kif turi l-Grafika 3, il-metriċi disponibbli jindikaw li ċerti
pajjiżi kapaċi jiksbu aktar impatt mill-infiq pubbliku u privat
tagħhom fir-riċerka u l-iżvilupp minn pajjiżi oħra.
Ix-xejra hi li l-pajjiżi li għandhom effiċjenza ogħla
fl-infiq huma wkoll dawk b’livelli ogħla ta’ nfiq pubbliku
fir-riċerka u l-iżvilupp u ta’ PDG per capita, u b’bażi ta’
għarfien aktar b’saħħitha. Barra minn hekk, l-investimenti
tan-negozji fir-riċerka u l-iżvilupp x’aktarx li jkunu ogħla
f’dawk il-pajjiżi b’livelli ogħla ta’ nfiq pubbliku fir-riċerka
u l-iżvilupp, minħabba li sistemi effiċjenti ta’ nfiq pubbliku
fir-riċerka u l-innovazzjoni huma aktar kapaċi
għall-ingranaġġ tal-investiment privat fir-riċerka u
l-iżvilupp[15].
It-titjib fil-kwalità u l-effiċjenza
tal-infiq jista’ jikkontribwixxi għall-ħolqien ta’ ċiklu
virtwuż bl-ingranaġġ ta’ livelli ogħla ta’ investiment
mis-settur privat u billi dan jiġġenera żieda fil-qligħ ekonomiku.[16] Riformi li jtejbu
l-kwalità u l-effiċjenza tal-infiq pubbliku huma importanti
għall-Istati Membri kollha. B’mod ġenerali, għal dawk li huma
iktar ristretti fiskalment u inqas effiċjenti fl-infiq tagħhom (ara
l-Grafika 3), huwa importanti li jinkiseb impatt akbar bis-saħħa
ta’ riformi estensivi u li jkunu fil-qagħda li jżidu l-investiment
b’mod għaqli hekk kif l-ekonomiji tagħhom jirkupraw. Min-naħa
l-oħra, għal dawk li għandhom marġni fiskali adegwat u
effiċjenza għolja, se jirriżultaw benefiċċji
mill-għaqal tagħhom li jinvestu b’mod li jiġġenera aktar
valur għall-flus. Grafika 3. Il-punteġġi tal-intensità u
tal-effiċjenza tar-riċerka u l-iżvilupp[17] Iż-żieda
tal-effiċjenza fl-infiq tar-riċerka u l-iżvilupp se
tikkontribwixxi wkoll għat-titjib fil-kwalità ġenerali tal-finanzi
pubbliċi. Din se tippermetti użu aħjar ta’ riżorsi skarsi u
b’hekk se tagħti wkoll titjib fuq perjodu ta’ żmien itwal, billi
tappoġġa l-valorizzazzjoni tal-eżiti tar-riċerka u
l-innovazzjoni. Il-prattiki trasversali adottati biex titjieb l-effiċjenza
tal-politiki jinkludu reviżjonijiet regolari tal-infiq pubbliku jew
ibbaġitjar ibbażat fuq prestazzjoni mmirata lejn riżultati.
Studji tal-każijiet (Franza, l-Awstrija, l-Isvezja u l-Pajjiżi
l-Baxxi) jenfasizzaw li l-Istati Membri li qed jużaw dawn
l-approċċi rnexxielhom jiġġeneraw riżultati
sinifikanti u kkwantifikati f’termini tat-trasparenza, l-effiċjenza u
l-iffrankar baġitarji mingħajr ma jitbaxxa (u saħansitra
jittejjeb) il-livell tal-kwalità tas-servizz pubbliku. 2.2 L-assi prijoritarji
tar-riformi Ir-riformi fir-riċerka u l-innovazzjoni
jeħtieġ li jkunu adattati skont il-karatteristiċi ta’ kull Stat
Membru. Għalhekk, hija sfida ewlenija għall-Istati Membri kollha biex
jidentifikaw, ifasslu u jimplimentaw dawn ir-riformi meħtieġa
bil-għan li titjieb il-kwalità tal-investimenti tagħhom
fir-riċerka u l-innovazzjoni. S’issa sar progress fir-rigward ta’ riformi
li jirriżultaw mill-Unjoni tal-Innovazzjoni u miż-Żona Ewropea
tar-Riċerka. Ir-rapport dwar l-Istat tal-Unjoni tal-Innovazzjoni tal-2014 li
jakkumpanja din il-Komunikazzjoni juri ritmu li jiżdied
għall-innovazzjoni[18],
fil-kuntest tar-reviżjoni tal-Istrateġija Ewropa 2020[19]. Ir-riżultati
prinċipali jinkludu ambjent tan-negozju aktar miftuħ
għall-innovazzjoni permezz tal-Privattiva Unitarja (Unitary Patent) u
l-passaport tal-Kapital ta’ Riskju (Venture Capital). L-appoġġ
tal-Unjoni għar-riċerka u l-innovazzjoni nbidel mill-qiegħ u
ġie inkorporat mill-ġdid f’programm uniku, integrat u simplifikat,
l-Orizzont 2020, b’għanijiet ċari li jistgħu jitkejlu u li
jiffoka fuq l-eċċellenza xjentifika, it-tmexxija industrijali u
l-isfidi tas-soċjetà. Bosta Stati Membri qed iwettqu wkoll riformi
fl-appoġġ pubbliku tagħhom għar-riċerka u
l-innovazzjoni. L-esperjenza turi li l-implimentazzjoni tar-riformi b’mod li
jżid il-kwalità tal-infiq u li jiżgura l-impatti ekonomiċi u
tas-soċjetà hija proċess kontinwu u sfida fit-tul
għall-pajjiżi kollha. It-titjib tal-valur għall-flus
jeħtieġ li jiġi massimizzat l-impatt ta’ politiki
tar-riċerka u l-innovazzjoni, inkluż billi jiġu stabbiliti
rabtiet iktar mill-qrib bejn il-kwalità u r-riżorsi allokati lil dawn
l-oqsma. Għalhekk huma essenzjali inċentivi konsistenti li
jgħollu l-kwalità tal-infiq pubbliku u li jippreservaw l-infiq li
jiffavorixxi t-tkabbir, b’mod partikolari nfiq fir-riċerka u
l-innovazzjoni. Minn
din l-esperjenza, joħorġu tliet assijiet ta’ riforma, li huma
rilevanti għall-Istati Membri kollha. I It-titjib tal-kwalità tal-iżvilupp
tal-istrateġija u tal-proċess tat-tfassil tal-politika Ir-riċerka u
l-innovazzjoni jaffettwaw ħafna oqsma ta’ politika u jinvolvu għadd
kbir ta’ atturi u għalhekk għandhom jitmexxew bi strateġija li
tiġbor kollox fiha u f’livell politiku suffiċjentement għoli.
Strateġija bħal din għandha tinkludi kemm l-attivitajiet
tar-riċerka kif ukoll tal-innovazzjoni, inklużi l-investimenti
fl-infrastruttura. It-tfassil tal-politika għandu jqis l-impatt
tar-riċerka u l-innovazzjoni fuq perjodu ta’ żmien twil u għandu
jopera fuq il-bażi ta’ qafas strateġiku pluriannwali stabbli u ta’
ppjanar bil-quddiem tal-investiment pubbliku. Il-benefiċċji ta’
finanzi pubbliċi aktar sodi kkombinati ma’ viżibbiltà
msaħħa tal-prijoritajiet tal-gvernijiet fiż-żmien medju
jinkisbu billi l-infiq li jgħin it-tkabbir, bħar-riċerka u
l-innovazzjoni, jiddaħħal fil-perspettiva ta’ ppjanar pluriannwali ta’
qafas baġitarju fuq perjodu ta’ żmien medju[20]. Dan jista’ jibni
l-kredibilità u jtejjeb l-attrazzjoni tas-sistema tar-riċerka u
l-innovazzjoni, Fl-istess ħin l-Istati Membri
għandhom jieħdu ħsieb li ma jaħlux riżorsi skarsi,
billi jiffokaw fuq għadd limitat ta’ aspetti u opportunitajiet ewlenin,
permezz tal-proċess tal-ispeċjalizzazzjoni intelliġenti kif
appoġġati bil-Fondi Ewropej Strutturali u ta’ Investiment.
Minħabba l-bidliet dinamiċi fir-riċerka u l-innovazzjoni,
it-tfassil tal-politika għandu jqis ukoll ideat u mudelli emerġenti.[21] L-informazzjoni u
l-provi oġġettivi jiffurmaw parti integrali mit-tfassil tal-politika,
inkluż l-antiċipazzjoni u l-evalwazzjonijiet sistematiċi ex-ante
u ex-post, b’mod partikolari biex jiġi evalwat l-impatt soċjoekonomiku
tal-iffinanzjar tar-riċerka u l-innovazzjoni fuq perjodu ta’ żmien
twil. Jeħtieġ li l-Istati Membri jissorveljaw kontinwament l-impatt u
li jeżaminaw mill-ġdid il-politiki tagħhom fil-kuntest Ewropew u
dak internazzjonali, Kaxxa 1. Ħafna Stati Membri qed jiddefinixxu
mill-ġdid l-istrateġiji tagħhom tar-riċerka u
l-innovazzjoni fuq il-bażi ta’ kunċett wiesa’ ta’ innovazzjoni, li
jinkorpora l-edukazzjoni, ir-riċerka u
l-innovazzjoni. Il-Ġermanja ressqet strateġija kompresiva
bl-innovazzjoni fil-mira (“The High-Tech Strategy for Germany”) ibbażata
fuq analiżi prospettiva, b’attenzjoni fuq teknoloġiji li jħarsu
l-quddiem u marbuta mal-isfidi tas-soċjetà, fuq kooperazzjoni bejn
ix-xjenza u l-industriia, u fuq it-titjib fil-kundizzjonijiet ta’ qafas
għan-negozji innovattivi. Wara l-aġġornament tagħha
fl-2010, il-Ġermanja issa qed tippjana biex issaħħaħ
l-Istrateġija u l-approċċ globali tal-politika tal-innovazzjoni
interdipartimentali tagħha. Bosta Stati Membri qegħdin jivvalutaw
il-kosteffettività tan-nefqa fir-riċerka u l-innovazzjoni bħala parti
mir-reviżjonijiet usa’ tal-infiq pubbliku. Il-Pajjiżi l-Baxxi,
pereżempju, waqqfu sistema estensiva tal-monitoraġġ tal-politika
għar-rieżami ta’ oqsma ta’ politika magħżula, inkluż
ir-riċerka u l-innovazzjoni, biex jidentifikaw l-alternattivi
għall-iffrankar fil-ġejjieni u b’hekk jinkiseb aktar valur
għall-flus fuq il-bażi ta’ evalwazzjonijiet ex ante u ex
post. Dawn ir-reviżjonijiet jiġbru flimkien il-Ministeru
tal-Finanzi Pubbliċi, il-Ministeru tar-Riċerka, il-Ministeru
tal-Affarijiet Ekonomiċi, u organizzazzjonijiet indipendenti u
jibbenefikaw mill-appoġġ pubbliku għar-riċerka b’rabta
mal-politika rilevanti kif ukoll minn konklużjonijiet ibbażati fuq
l-provi miġbura. L-Estonja żammet strateġija fit-tul ta’
żidiet sostnuti fl-investiment tar-riċerka u l-iżvilupp, billi
fl-2000 immultiplikat il-livell inizjali tagħha tal-infiq b’10 darbiet
aktar u fuqhom. Il-pajjiż għandu strateġija olistika li
tikkonsolida r-riżorsi disponibbli kollha tal-UE b’tali mod li jagħtu
impetus għall-iżvilupp. II It-titjib tal-kwalità tal-programmi, b’enfasi fuq
riżorsi u fuq mekkaniżmi ta’ ffinanzjar Ammonti sinifikanti ta’ fondi pubbliċi
għar-riċerka u l-innovazzjoni huma ġestiti fil-qafas ta’
programmi, li l-għanijiet tagħhom tradizzjonalment kienu stabbiliti
f’termini ta’ dixxiplini xjentifiċi, ta’ oqsma tat-teknoloġija, jew
ta’ setturi industrijali. Bħal fil-programm Orizzont 2020, l-Istati Membri
jridu jqisu li jżidu l-enfasi tal-programmi tagħhom fuq l-isfidi ewlenin
tas-soċjetà, għaliex hemm potenzjal ta’ tkabbir konsiderevoli billi
dawn jissarfu f’opportunitajiet tan-negozju fil-ġejjini, filwaqt li
fl-istess ħin jipprovdu soluzzjonijiet għat-tħassib
taċ-ċittadini. Koordinazzjoni aħjar ta’ prijoritajiet bejn
l-Istati Membri permezz ta’ programmazzjoni konġunta tal-aġendi
nazzjonali tar-riċerka u l-innovazzjoni żżid l-impatt ta’
investiment pubbliku f’qasam partikolari tar-riċerka u l-innovazzjoni. [22] Kif ġie stabbilit fiż-Żona
Ewropea tar-Riċerka, il-kwalità tal-infiq pubbliku tista’ tissaħħaħ
permezz ta’ programmi billi l-fondi jiġu allokati fuq bażi
kompetittiva, permezz ta’ sejħiet miftuħa għal proposti skont
l-eċċellenza, pereżempju fuq il-bażi ta’ evalwazzjoni
internazzjonali bejn il-pari , u billi l-fondi istituzzjonali jiġu allokati
fuq il-bażi ta’ prestazzjoni ppruvata. Il-kompetizzjoni miftuħa
għandha tapplika ugwalment għal programmi speċifiċi mmirati
lejn għanijiet ekonomiċi u/jew tas-soċjetà li għandhom
impatti mistennija ċari u definiti u b’sistema ta’ evalwazzjoni robusta li
bl-użu ta’ għarfien espert indipendenti, tivvaluta l-proposti mqabbla
ma’ dawk l-impatti. F’konformità mal-istrateġiji aktar iffukati u
allinjati (“speċjalizzazzjoni intelliġenti”), il-monitoraġġ
ta’ riżultati reali u l-impatti tal-proġetti appoġġati
għandhom jipprovdu informazzjoni preċiża u komparabbli dwar
il-kwalità u l-effiċjenza tal-iffinanzjar permezz ta’ programmi ta’
riċerka u innovazzjoni. Jeħtieġ li l-programmi ta’
riċerka u innovazzjoni jkunu rilevanti u aċċessibbli
għan-negozji, inkluż permezz tat-tnaqqis tal-piżijiet
amministrattivi għall-parteċipazzjoni, l-aċċelerazzjoni
taż-żmien li jittieħed sa ma tingħata l-għotja,
il-monitoraġġ tal-involviment tan-negozji, u billi tittieħed
bis-serjetà r-reazzjoni tal-parteċipanti. Ir-rwol essenzjali tax-xjenza
fuq il-fruntieri tal-għarfien fl-avvanz tal-ogħla livell ta’
żvilupp u sabiex tistimula innovazzjonijiet teknoloġiċi
revoluzzjonarji għandu jiġi indirizzat, billi tibni fuq l-inizjattivi
li rnexxew fil-livell tal-UE bħall-Kunsill Ewropew tar-Riċerka. Kaxxa 2. Bosta Stati Membri qed jintroduċu
kompetizzjoni aktar qawwija fl-allokazzjoni tal-fondi pubbliċi
għar-riċerka u l-innovazzjoni. Wara l-Abbozz dwar ir-Riċerka u
l-Innovazzjoni fl-2008, l-Isvezja introduċiet l-allokazzjoni kompetittiva
ta’ ċertu proporzjon ta’ fondi bażiċi lill-universitajiet
-inizjalment 10 % u sussegwentement dan żdied għal 20 % fuq
il-bażi tal-prestazzjoni tagħhom f’pubblikazzjonijiet xjentifiċi
u fuq il-kapaċità tagħhom li jattiraw fondi esterni. Fl-2011
il-Polonja introduċiet riformi biex iżżid is-sehem tal-fondi
pubbliċi allokati għar-riċerka u l-innovazzjoni fuq bażi
kompetittiva permezz ta’ sejħiet għal proposti vvalutati minn esperti
indipendenti u internazzjonali. Mill-2013, il-Kroazja stabbilixxiet mudell
ġdid ta’ ffinanzjar pubbliku għar-riċerka fundamentali, li
juża kuntratti istituzzjonali ta’ tliet snin ibbażati fuq
il-prestazzjoni. Dan l-aħħar il-Greċja waqqfet proċess
kompetittiv biex tiddeċiedi dwar għadd limitat ta’ proġetti
infrastrutturali nazzjonali tar-riċerka. Science Foundation
tal-Irlanda introduċa evalwazzjonijiet bejn il-pari tal-impatt ekonomiku u
fuq is-soċjetà tal-applikazzjonijiet għall-għotja, u dan
jikkomplementa l-evalwazzjonijiet xjentifiċi bejn il-pari. Għadd ta’ aġenziji ta’ ffinanzjar
qed jibdew jissorveljaw u jevalwaw b’mod rigoruż l-impatt tal-programmi
tagħhom. Is-sistema ta’ monitoraġġ ta’ Tekes, l-Aġenzija
tal-Innovazzjoni Finlandiża, turi li għal kull euro investit minn
Tekes, il-kumpaniji jżidu n-nefqa tagħhom fir-riċerka u
l-iżvilupp b’2 euro, u li l-SMEs li tappoġġa għandhom
20 % żieda aktar fil-fatturat u 17 % żieda aktar
fl-impjiegi meta mqabbla ma’ SMEs komparabbli. III Il-perfezzjonament tal-kwalità tal-istituzzjonijiet
pubbliċi li jwettqu r-riċerka u l-innovazzjoni Fl-Istati Membri kollha, sehem kbir ta’ fondi
pubbliċi għar-riċerka u l-innovazzjoni jingħata bħala
fondi istituzzjonali lill-universitajiet, lill-istituti tat-teknoloġija u
lil organizzazzjonijiet tar-riċerka pubbliċi oħrajn.
Jeħtieġ li dawn l-istituzzjonijiet jiġu mħeġġa
jkunu intraprendenti u jfittxu opportunitajiet u sħubijiet ġodda,
inkluż barra l-Ewropa, biex ikun hemm titjib fit-trasferiment
tal-għarfien lis-settur privat u biex ir-riżorsi jiġu allokati
mill-ġdid favur attivitajiet li jkollhom l-akbar impatt. Għalhekk
dawn l-istituzzjonijiet jeħtieġu awtonomija u flessibilità
suffiċjenti, filwaqt li tiġi ggarantita l-akkontabililtà, li jfisser
li bħala parti minnha, għandhom ikunu suġġetti regolarment
għall-evalwazzjoni indipendenti u għall-valutazzjoni tal-kwalità. L-istituzzjonijiet għandhom ukoll ikunu
kapaċi jattiraw l-aqwa riċerkaturi biex jaħdmu magħhom.
Madankollu, kif identifikati miż-Żona Ewropea tar-Riċerka, f’xi
pajjiżi, in-nuqqas ta’ reklutaġġ miftuħ, trasparenti u
msejjes fuq il-mertu jdgħajjef il-prestazzjoni tal-istituzzjonijiet u
jżomm lura l-attrattiva u l-iżvilupp tal-karriera għar-riċerkaturi
l-aktar kapaċi. Kaxxa 3. Bosta Stati Membri, fosthom l-Awstrija, il-Polonja u
l-Italja, introduċew regolamenti nazzjonali li jistipulaw li l-postijiet
vakanti fl-universitajiet u f’organizzazzjonijiet tar-riċerka
pubbliċi oħrajn għandhom ikunu ppublikati internazzjonalment,
pereżempju permezz tal-portal tar-riċerkaturi Ewropej “EURAXESS”. Sħubijiet ġodda li jinvolvu
l-istituzzjonijiet li jwettqu r-riċerka u l-innovazzjoni qed jagħtu
spinta lill-iżvilupp ekonomiku fil-livell reġjonali. Sħubija ta’
sitt universitajiet bejn il-Ġermanja, Franza, il-Belġju u
l-Lussemburgu qed tiffaċilita speċjalizzazzjoni akbar, il-qsim ta’
korsijiet u t-titjib fit-trasferiment tal-għarfien lin-negozji. F’April
2014, il-Gvern tar-Renju Unit ħabbar il-Greater Cambridge City Deal ta’ £1
biljun fi sħubija mal-Università ta’ Cambridge biex jinvestu fit-tkabbir
tar-raggruppament tat-teknoloġija tar-reġjun, li diġà jimpjega
aktar minn 54 000 persuna f’aktar minn 1 500 kumpanija bbażati
fuq it-teknoloġija, li jiġġenera dħul annwali ta’ aktar
minn £12 biljun. L-inizjattiva “Vanguard” tiġbor flimkien 18-il
reġjun tal-UE (Asturias, Baden-Wurttenberg, Euskadi, Cataluña, Lombardia,
Małopolska, Nordrhein-Westfalen, Norte, Oberösterreich, Pays de la Loire,
Rhône-Alpes, l-Iskozja, Śląsk, Skåne, Tampere, il-Fjandri,
il-Wallonja u Zuid Nederland) li b’mod konġunt jimplimentaw
strateġiji ta’ speċjalizzazzjoni intelliġenti, u b’hekk
jimmobilizzaw ir-riżorsi pubbliċi u privati favur ir-riċerka u
l-innovazzjoni madwar raggruppament ta’ inizjattivi għal teknoloġiji
emerġenti u ta’ trasformazzjoni. 2.3 L-appoġġ
tal-Kummissjoni għar-riformi tal-Istati Membri Biex tgħin lill-Istati Membri
fil-proċess tal-implimentazzjoni tar-riformi tar-riċerka u
l-innovazzjoni bbażati fuq l-assi prijoritarji identifikati
fit-Taqsima 2.2 ta’ din il-Komunikazzjoni, il-Kummissjoni se tirrevedi
l-għodod attwalment disponibbli għall-valutazzjoni tal-kwalità u
l-effikaċja tar-riformi ta’ prijorità tar-riċerka u l-innovazzjoni u
se tniedi diskussjonijiet mal-Istati Membri dwar l-implimentazzjoni tar-riformi
prijoritarji u l-ħtieġa possibbli ta’ sistema integrata,
ibbażata fuq il-provi għall-valutazzjoni tal-kwalità tal-politiki
tar-riċerka u l-innovazzjoni fil-livell tal-Istati Membri. B’hekk se
tibbaża fuq l-esperjenza rilevanti miksuba mill-għodda ta’
awtovalutazzjoni ppreżentata fl-Unjoni tal-Innovazzjoni u
mill-analiżi tal-progress fir-rigward taż-Żona Ewropea
tar-Riċerka, u se tagħmel użu mill-indikaturi rilevanti,
inkluż it-Tabella tal-Valutazzjoni tal-Unjoni tal-Innovazzjoni
tal-Kummissjoni u l-indikatur dwar l-eżitu tal-innovazzjoni.[23] Il-Kummissjoni se
tipprovdi wkoll dejta, analiżi u informazzjoni ta’ klassi dinjija, dwar
il-politiki u l-prestazzjoni tar-riċerka u l-innovazzjoni u fil-livell
tal-UE, u fil-livell nazzjonali,[24]
u se tuża l-Faċilità tal-Appoġġ tal-Politika prevista
f’Orizzont 2020 inklużi l-assistenza teknika, l-evalwazzjonijiet bejn
il-pari u t-tagħlim reċiproku. F’dan il-kuntest, il-Kummissjoni se
tippromwovi wkoll aktar riċerka biex tipprovdi bażi ta’ evidenza
aħjar għat-tfassil tal-politika tar-riċerka u l-innovazzjoni,
pereżempju bl-użu ta’ approċċi tad-dejta kbira u billi
ttejjeb il-mod kif l-impatt pożittiv fit-tul tar-riċerka u
l-innovazzjoni jiġi kkunsidrat f’uħud mill-mudelli makroekonomiċi
użati sabiex jappoġġaw it-tfassil tal-politika.[25] Il-Kummissjoni se tiffaċilita l-iskambju
ta’ esperjenzi bit-tfassil u l-implimentazzjoni ta’ miżuri indiretti
bħal inċentivi fiskali tar-riċerka u l-iżvilupp
ibbażati fuq n-nefqa, bil-għan li tiġi żgurata
l-kosteffettività, jiġu evitati effetti transfruntieri mhux mixtieqa, u
jiġi eżaminat jekk il-kumpaniji ġodda li qed jikbru malajr, u li
jirrappreżentaw għadd kbir sproporzjonat ta’ impjiegi ġodda,
jistgħux jibbenefikaw minnhom. 3. It-tisħiħ
tal-ekosistema tal-innovazzjoni L-innovazzjoni b’suċċess tiddependi
mhux biss fuq il-kwalità tal-politiki pubbliċi iżda wkoll fuq
kundizzjonijiet ta’ qafas li jiffavorixxu l-innovazzjoni. F’dawn l-aħħar snin, il-Kummissjoni għamlet sforz qawwi
biex tnaqqas il-frammentazzjoni tas-suq intern u biex tiġi rrestawrata
l-fiduċja ekonomika. Il-Kummissjoni ppromwoviet il-funzjonament tas-Suq
Uniku,[26]
ħadet passi biex tlesti l-Unjoni Bankarja,[27] u ħadet
miżuri biex tiffaċilita u tiddiversifika l-aċċess
għall-finanzi,[28]
biex tissimplifika l-leġiżlazzjoni u biex tnaqqas il-piżijiet regolatorji,[29] u tinsab impenjata li
tippromwovi l-iffinanzjar fit-tul tal-ekonomija Ewropea.[30] Il-Kummissjoni ppromwoviet ukoll l-użu
effettiv tal-akkwist pubbliku u ta’ strumenti min-naħa tad-domanda,
indirizzat l-ostakli għall-kooperazzjoni bejn ix-xjenza u n-negozju, u
ħeġġet sistema favorevoli u effiċjenti tad-drittijiet
tal-proprjetà intellettwali. Il-linji gwida riveduti dwar l-għajnuna
mill-Istat jappoġġaw lill-Istati Membri biex mill-ġdid jiggwidaw
l-għajnuna mill-Istat lejn ir-riċerka u l-innovazzjoni,
pereżempju fir-Regolament il-ġdid dwar l-Eżenzjoni Ġenerali
Sħiħa u billi jżidu l-livelli limiti għan-notifika u billi
jwessgħu l-kategoriji ta’ għajnuna, pereżempju biex
jappoġġaw il-kostruzzjoni u t-titjib tal-infrastrutturi
tar-riċerka u biex jippermettu l-appoġġ aktar mill-qrib
għas-suq. Bl-istess mod, il-linji gwida riveduti dwar l-għajnuna
mill-Istat għal Finanzjament ta’ Riskju jippermettu flessibbiltà akbar li
tappoġġa l-kapital ta’ riskju u strumenti finanzjarji oħra favur
in-negozji innovattivi, u b’hekk jgħinuhom jegħlbu l-aktar stadji
kritiċi taċ-ċiklu tal-ħajja tagħhom. B’mod parallel,
ir-regoli riveduti dwar l-għajnuna mill-Istat jintroduċu
rekwiżiti ġodda dwar l-evalwazzjoni tal-impatt ta’ skemi kbar ta’
għajnuna li se jikkontribwixxu għal miżuri aktar effettivi
b’effett ċar ta’ inċentiv.[31]
Madankollu, il-valutazzjoni tal-progress
mehmuża fil-kuntest tal-Unjoni tal-Innovazzjoni turi li hemm għadd
ta’ oqsma fejn hemm bżonn li jsiru iktar sforzi: –
Is-Suq Uniku
jikkostitwixxi assi ewlieni li jista’ jattira investimenti innovattivi lejn
l-Ewropa. Madankollu, il-frammentazzjoni u l-ineffiċjenzi fis-Suq Uniku
jimmina l-investimenti tan-negozji fir-riċerka u l-innovazzjoni b’mod
partikolari fl-oqsma tat-teknoloġija għolja bħall-ICT,
inklużi n-netwerks diġitali, il-kontenut u s-servizzi, u l-kura
tas-saħħa. Bil-kontra ta’ dan, l-Ewropa hija mexxejja globali
fir-riċerka u t-teknoloġija tat-trasport, imsaħħa minn suq
uniku żviluppat tajjeb, li, madankollu, jeħtieġ li jżomm
il-pass mal-innovazzjoni rapida hekk kif is-settur tat-trasport iżid
l-effiċjenza fl-enerġija, itejjeb is-sikurezza u jindirizza
l-konġestjoni. Barra minn hekk, għandhom jiġu antiċipati
l-innovazzjonijiet kbar bl-iżvilupp ta’ oqfsa tas-Suq Uniku li jippermettu
l-adozzjoni kummerċjali fuq skala kbira.[32]
L-implimentazzjoni sħiħa tas-suq uniku tas-servizzi, li
jirrappreżenta 60 % tal-ekonomija tal-UE, għandu jkollu impatt
qawwi fuq l-innovazzjoni, b’mod partikolari fuq l-innovazzjoni mhux
teknoloġika, bħall-iżvilupp ta’ mudelli tan-negozju ġodda u
t-tfassil ta’ servizzi. Barra minn hekk, jeħtieġ li l-oqfsa
regolatorji jippromwovu l-użu kummerċjali ta’ għarfien ġdid
u li jiffaċilitaw id-dħul ta’ kumpaniji ġodda. –
Is-settur pubbliku huwa
attur ekonomiku importanti u jeħtieġ li jsir aktar intraprendenti
biex jibbenefika mill-innovazzjoni bil-għan li jiżdiedu
l-produttività, l-effiċjenza u l-kwalità tas-servizzi pubbliċi, kif
ukoll biex tinħoloq domanda għal innovazzjoni fis-settur privat.[33] It-tagħlim
reċiproku huwa ta’ rilevanza partikolari f’dan il-kuntest. L-akkwist
pubbliku, li jammonta għal madwar għoxrin fil-mija tal-PDG tal-Unjoni
kollha kemm hi, jista’ jipprovdi swieq li jesiġu soluzzjonijiet
innovattivi. Dan jeħtieġ sforz ikkoordinat mill-awtoritajiet tal-akkwist
kollha sabiex tiġi evitata l-frammentazzjoni tad-domanda. Il-bidla
għal dejta miftuħa għandha l-potenzjal kbir li ttejjeb
is-servizzi pubbliċi, toħloq opportunitajiet għal prodotti u
servizzi ġodda, u ssaħħaħ l-akkontabilità u t-trasparenza
fl-amministrazzjoni pubblika. Iż-żieda fil-kwalità tas-servizzi
pubbliċi u tal-finanzjament pubbliku teħtieġ bażi robusta
ta’ provi għal deċiżjonijiet baġitarji u ta’ politika skont
il-prinċipji tar-regolamentazzjoni intelliġenti. Azzjonijiet pilota
li jiffokaw fuq l-utenti, l-użu intelliġenti tal-ICT u l-ftuħ
ta’ servizzi pubbliċi diġitali se jippermettu lis-settur pubbliku
jiżviluppa b’mod effiċjenti u jipprovdi servizzi ġodda. –
It-trasformazzjoni tal-ekonomija Ewropea għal kompetittività sostenibbli tirrikjedi bażi ta’
riżorsi umani bil-ħiliet meħtieġa u b’ħafna aktar
riċerkaturi li jkollhom ħiliet intraprendenti u tan-negozju. Dan
jeħtieġ ukoll li x-xjenza fuq il-fruntieri tal-għarfien tavvanza
l-livell ta’ żvilupp tekniku u li jkollha rwol attiv fl-istimolu ta’
innovazzjonijiet rivoluzzjonarji. Is-sistemi tal-edukazzjoni u
t-taħriġ jeħtieġ li jipprovdu ħiliet ta’ innovazzjoni
mifruxa (il-ġenerazzjoni ta’ ideat, is-soluzzjoni ta’ problemi,
il-ħsieb kritiku, il-komunikazzjoni bejn il-kulturi, eċċ.) li
jippermettu lill-impjegati u lill-istituzzjonijiet,[34] jaddattaw
rwieħhom għaċ-ċirkostanzi l-ġodda. It-teknoloġiji
diġitali jġibu magħhom opportunitajiet ġodda ta’
aċċess għall-edukazzjoni,[35]
iżda jeħtieġu innovazzjonijiet kbar fis-sistemi nazzjonali
tal-edukazzjoni, bħall-promozzjoni ta’ prattiki ta’ tagħlim
miftuħa u ta’ taħriġ diġitali. –
Iċ-ċittadini Ewropej iridu jifhmu li r-riċerka u l-innovazzjoni qed itejbu l-kwalità
ta’ ħajjithom u qed iwieġbu għat-tħassib tagħhom,
pereżempju, billi l-individwi jitħallew jesprimu l-fehma tagħhom
meta jiġu stabbiliti l-prijoritajiet.[36]
Jeħtieġ li l-politika tar-riċerka u l-innovazzjoni tagħti
inċentivi u tippermetti lill-individwi biex jidħlu
għall-innovazzjoni bħala kokreaturi u bħala klijenti pijunieri,
tippromwovi l-innovazzjoni u l-intraprenditorija soċjali, u tippermetti
kumpaniji innovattivi li jittestjaw u jintroduċu soluzzjonijiet
fl-ambjenti reali. 4. Konklużjonijiet Sabiex jiġi sfruttat bis-sħiħ
il-potenzjal tar-riċerka u l-innovazzjoni bħala sorsi ta’ tkabbir
imġedded, l-elementi li ġejjin huma kruċjali: –
F’konformità mal-kunċett ta’ konsolidament
fiskali, jeħtieġ li l-Istati Membri jipprijoritizzaw in-nefqa li
ssaħħaħ it-tkabbir, b’mod partikolari fir-riċerka u
l-innovazzjoni. –
Dawk l-investimenti jridu jimxu id f’id mar-riformi
li jżidu l-kwalità, l-effiċjenza u l-impatti tal-infiq pubbliku
fir-riċerka u l-innovazzjoni, inkluż bl-ingranaġġ
tal-investiment tan-negozji fir-riċerka u l-iżvilupp –
Huma u jagħmlu dan, l-Istati Membri
għandhom jiffokaw fuq it-tliet assijiet tar-riforma, marbuta mal-kwalità tal-iżvilupp
tal-istrateġija u l-proċess tat-tfassil tal-politika, il-kwalità
tal-programmi, l-iffokar tar-riżorsi u tal-mekkaniżmi
tal-iffinanzjar; u l-kwalità tal-istituzzjonijiet li jwettqu r-riċerka u
l-innovazzjoni. –
Biex tgħin lill-Istati Membri fl-implimentazzjoni
b’suċċess tar-riformi tar-riċerka u l-innovazzjoni,
il-Kummissjoni se tibbaża fuq l-esperjenza miksuba bl-inizjattiva ewlenija
l-Unjoni tal-Innovazzjoni u fiż-Żona Ewropea għar-Riċerka,
u se tisfrutta bis-sħiħ l-Osservatorju tar-Riċerka u l-Innovazzjoni
u l-Faċilità tal-Appoġġ tal-Politika previsti fil-qafas
tal-programm Orizzont 2020 sabiex tappoġġa t-tfassil ta’ politika u
t-teħid tad-deċiżjonijiet baġitarji bbażati fuq
approċċ integrat, mibni fuq il-provi. –
It-tisħiħ tal-ekosistema tal-innovazzjoni
usa’ u l-istabbiliment tal-kundizzjonijiet ta’ qafas tajbin li jistimolaw
il-kumpaniji tal-Ewropa biex jinnovaw huma kruċjali. Minn mindu tnediet
l-Unjoni tal-Innovazzjoni, sar progress siewi iżda jeħtieġ li
jsiru aktar sforzi fl-approfondiment tas-Suq Uniku, billi jiġi
ffaċilitat u diversifikat l-aċċess għall-finanzi,
tissaħħaħ il-kapaċità innovattiva tas-settur pubbliku,
jinħolqu impjiegi reżistenti f’attivitajiet li huma intensivi fl-għarfien,
tiġi żviluppata bażi ta’ riżorsi umani b’ħiliet,
għall-innovazzjoni, titħeġġeġ ir-riċerka fuq
il-fruntieri tal-għarfien, tiġi indirizzata d-dimensjoni esterna
tal-politika tar-riċerka u l-innovazzjoni, u billi x-xjenza u
l-innovazzjoni jiġu integrati aktar fis-soċjetà. Ir-reviżjoni
tal-Istrateġija Ewropa 2020 se tanalizza l-progress li sar bl-Unjoni
tal-Innovazzjoni. Il-Kummissjoni tistieden lill-Kunsill biex
iniedi diskussjonijiet dwar it-titjib tal-kwalità tal-investimenti
fir-riċerka u l-innovazzjoni f’konformità ma’ din il-Komunikazzjoni,
bħala parti mill-proċess usa’ tagħha ta’ diskussjonijiet dwar
it-titjib tal-kwalità tal-finanzi pubbliċi u dwar l-implimentazzjoni
tar-riformi strutturali. Barra minn hekk, il-Kummissjoni tistieden
lill-Kunsill biex jiddiskuti l-isfidi tal-politika futura tar-riċerka u l-innovazzjoni.
[1] Rapport dwar il-Kompetittività tal-Unjoni
tal-Innovazzjoni 2013, SWD (2013) 505. [2] COM(2014) 014. [3] Sa ċertu punt, it-tkabbir tal-PDG fil-pajjiżi
tal-OECD mill-1985 sal-2009 rriżulta mit-tkabbir tal-kapital u
tal-produttività bbażata fuq fatturi multipli, b’din tal-aħħar
xprunata mill-eżiti tas-sistemi tar-riċerka u l-innovazzjoni. Ara
OECD (2011) “Productivity and growth accounting”. [4] Conte (2014), “Efficiency of R&D Spending at
national and regional level”, Ċentru Konġunt tar-Riċerka,
Il-Kummissjoni Ewropea, għandha tiġi ppubblikata. Ciriaci, D.,
Moncada Paternò Castello, P., u Voigt, P. (2013) “Innovation and job creation:
a sustainable relation?”, IPTS Working Papers on Corporate R&D and
Innovation serje Nru. 01/2013, Il-Kummissjoni Ewropea. [5] COM(2013) 800 final. [6] F’din il-Komunikazzjoni, l-infiq tar-riċerka u
l-iżvilupp jintuża għal skopijiet statistiċi. Ma jkoprix
l-innovazzjoni fit-tifsira usa’ tagħha, li taqa’ barra d-definizzjoni
tar-riċerka u l-iżvilupp. [7] Dawn jinkludu l-aċċess
għall-finanzjament, strateġiji adegwati għar-riżorsi umani,
l-implimentazzjoni sħiħa tas-Suq Uniku għas-servizzi, u
l-appoġġ tal-iżvilupp tat-teknoloġiji tal-ġejjieni,
inkluż it-trawwim tal-ekonomija diġitali. [8] COM(2014)014 [9] Is-Sistema Ewropea ta’ Kontijiet Nazzjonali u
Reġjonali (SEC 2010) se tiġi aġġornata f’Settembru 2014. [10] COM(201) 130final/2. [11] F’dan ir-rigward, matul l-aħħar snin
seħħet evoluzzjoni importanti li tikkomplementa l-investiment
pubbliku dirett fir-riċerka u l-innovazzjoni bil-miżuri indiretti
bħalma huma l-inċentivi fiskali tar-riċerka u l-iżvilupp. [12] Il-Kummissjoni Ewropea, 2012, “The quality of public
expenditures in the EU”, Occasional Paper (DĠ ECFIN) nru. 125 [13] COM(2010)
546; COM(2012) 392 [14] Conte (2014), “Efficiency of R&D Spending at national
and regional level”, Technical Report, Iċ-Ċentru Konġunt
tar-Riċerka, Il-Kummissjoni Ewropea, jippreżenta analiżi
komprensiva tal-għażliet u l-approċċi metodoloġiċi
biex jitqabblu l-punteġġi għall-kejl tal-effiċjenza tas-sistemi
tar-riċerka u l-iżvilupp. Il-punteġġi
għall-effiċjenza tal-Grafika 3 huma kkalkulati bl-użu ta’
teknika statistika (Stochastic Frontier Analysis), li tikkalkula l-livell
tal-effiċjenza billi tuża l-intensità totali tar-riċerka u
l-iżvilupp bħala l-kejl tal-input u l-privattivi r-ras bħala
l-kejl tal-produzzjoni, matul il-perjodu 2005-2011. Għandu jiġi
nnutat li l-varjabbiltà ta’ miżuri relattivi tar-riċerka u
l-iżvilupp u l-prestazzjoni tal-privattivi huma akbar fis-setturi minn
madwar il-pajjiżi kollha (Meliciani, 2000), u li l-proporzjon
tal-privattivi mal-infiq tar-riċerka u l-iżvilupp ukoll ivarjaw
ħafna fis-setturi tal-manifattura (Danguy et al, 2013).
Għalhekk il-punteġġi tal-effiċjenza bl-użu
tal-privattivi huma affettwati fil-parti l-kbira, mill-profili
tal-ispeċjalizzazzjoni tar-riċerka u l-iżvilupp ta’ kull
pajjiż. Jistgħu jintużaw ukoll indikaturi ta’ produzzjoni
oħra għall-approssimazzjoni tal-effiċjenza, inklużi b’mod
partikolari l-pubblikazzjonijiet u l-kwotazzjonijiet xjentifiċi. Madankollu,
l-indikaturi komposti jistgħu jintużaw ukoll għal dan
il-għan. [15] Il-provi juru li l-livell ta’ kooperazzjoni bejn is-settur
pubbliku u n-negozji huwa influwenzat b’mod pożittiv mill-intensità
tal-infiq pubbliku fir-riċerka u l-iżvilupp. Id-dejta tal-2011 turi
korrelazzjoni statistikament sinifikanti bejn il-livell ta’ finanzjament privat
tar-riċerka u l-iżvilupp pubbliku u l-intensità tar-riċerka u
l-iżvilupp pubbliku. [16] Jeżistu wkoll differenzi persistenti:
fil-prestazzjoni globali tal-innovazzjoni fl-Istati Membri kollha, kif tidher
fit-Tabella tal-Valutazzjoni tal-Unjoni tal-Innovazzjoni; fil-prodotti
tal-innovazzjoni kif ikkonfermati mill-indikatur tal-produzzjoni
tal-innovazzjoni tal-Kummissjoni u fil-kwalità ġenerali tal-Gvern, kif
jidher mis-6 Rapport tal-Kummissjoni dwar il-Koeżjoni. [17] Il-livelli ta’
effiċjenza fl-Istati Membri huma spjegati f’din il-Grafika fuq
il-bażi tar-relazzjoni bejn il-privattivi per capita u l-intensità
totali tar-riċerka u l-iżvilupp. Ara Conte (2014). [18] Id-Dokument ta’ Ħidma tal-Persunal “State of the
Innovation Union, Taking Stock 2010 – 2014”. [19] COM(2014 130). [20] kif tinkoraġixxi d-Direttiva
tal-Kunsill 2011/85/UE dwar ir-rekwiżiti għal oqfsa
baġitarji tal-Istati Membri, li tistipula, fost l-oħrajn,
il-karatteristiċi u l-benefiċċji ta’ oqfsa baġitarji
kredibbli fuq perjodu medju. [21] bħal fil-każ tad-dejta ta’ volum kbir,
l-innovazzjoni miftuħa, u x-Xjenza 2.0. L-għarfien ġdid rigward
l-effetti tal-globalizzazzjoni u tal-innovazzjoni fuq il-ħolqien
tal-impjiegi u fuq l-inugwaljanza jew fuq ir-rwol tal-innovazzjoni
fil-promozzjoni tat-tkabbir inklużiv għandu jiġi kkunsidrat.
Xjenza 2.0 tiddeskrivi l-bidliet għaddejjin bħalissa fil-mod ta’ kif
titwettaq ir-riċerka u kif inhi organizzata x-xjenza. Bis-saħħa
tat-teknoloġiji diġitali u mmexxija mill-globalizzazzjoni
tal-komunità xjentifika, din twiegħed valur aħjar għall-flus
minħabba aktar trasparenza, ftuħ, netwerking u kollaborazzjoni,
iżda tinvolvi wkoll ir-riskji, f’dak li jirrigwarda l-frodi, u l-integrità
xjentifika. [22] Il-Pjan Strateġiku Ewropew għat-Teknoloġija
“SET-plan”, COM(2013)253, jipprovdi eżempju ta’ kif pjan direzzjonali
uniku integrat ta’ prijoritajiet fil-livell tal-UE jappoġġa
koordinazzjoni aħjar ta’ investimenti industrijali, u tal-programmi tal-Istati
Membri u tal-UE. [23] COM(2013) 624 final. [24] Bħala parti mill-attivitajiet tal-Osservatorju
tar-Riċerka u l-Innovazzjoni tal-Kummissjoni. [25] Dan l-aħħar ir-Royal Netherlands Academy of Arts
and Sciences ippubblika r-rapport tiegħu “Public knowledge investments and
the value of science”, li jargumenta li, filwaqt li l-Pajjiżi l-Baxxi
għandhom tradizzjoni twila tal-użu ta’ mudelli makroekonomiċi
biex jiġi eżaminat l-impatt tal-politiki u l-baġits
pubbliċi, dawn ma jirriflettux biżżejjed il-benefiċċji
fit-tul tal-investimenti pubbliċi fir-riċerka u l-innovazzjoni. [26] COM (2011) 206; COM(2012) 573. [27] Fl-20 ta’ Marzu 2014, il-Parlament Ewropew u l-Kunsill
laħqu ftehim dwar il-propost Mekkaniżmu Uniku ta’ Riżoluzzjoni
(Single Resolution Mechanism - SRM) għall-Unjoni Bankarja.
Il-mekkaniżmu jikkomplementa l-Mekkaniżmu Superviżorju Uniku
(Single Supervisory Mechanism - SSM) li, bis-saħħa tiegħu,
ladarba jkun kompletament operattiv lejn it-tmiem tal-2014, il-Bank
Ċentrali Ewropew (BĊE) se jissorvelja direttament il-banek
fiż-żona tal-euro u fl-Istati Membri l-oħra li jiddeċiedu
jissieħbu fl-Unjoni Bankarja. [28] Il-Kummissjoni Ewropea tappoġġa l-kumpaniji
matul iċ-ċiklu tal-ħajja tal-innovazzjoni. Minbarra l-kapital
ta’ riskju, tappoġġa l-iffinanzjar permezz ta’ “business angels”,
bit-trasferiment tat-teknoloġija jew b’self aktar tradizzjonali tal-banek.
[29] COM(2012) 746; COM(2013) 685. [30] COM(2014) 168. [31] Ara ĠU C 19, 11.1.2014, paġna 4. [32] Pereżempju, is-swieq ġodda tal-bijofjuwils
avvanzati, tal-iskart u r-riċiklaġġ, tal-enerġija
rinnovabbli u tat-teknoloġiji ambjentali li jikkostitwixxu l-oqsma fejn
l-UE hija f’saħħitha fl-innovazzjoni. [33] L-evidenza tappoġġa wkoll ir-rwol tal-Gvern
fil-promozzjoni tal-investimenti fir-riċerka u l-innovazzjoni biex
jagħmlu tajjeb għall-fallimenti tas-suq, li jinkludu
l-inċertezza teknoloġika u l-indiviżibilitajiet u l-ekonomiji
ta’ skala, u fid-diffużjoni ta’ effetti oħrajn tal-għarfien. [34] F’kooperazzjoni mal-OECD u fil-qafas tal-inizjattiva
“HEInnovate”, il-Kummissjoni żviluppat għodda ta’ awtovalutazzjoni
għall-appoġġ tal-istituzzjonijiet tal-edukazzjoni għolja
biex dawn isiru aktar intraprendenti. [35] COM(2012) 173 final. “Lejn irkupru li jwassal
għall-ħolqien abbundanti ta’ impjiegi” [36] Ara pereżempju l-proġett “Voices” (www.voicesforinnovation.eu/)
li jippermetti liċ-ċittadini jesprimu l-opinjonijiet tagħhom
dwar it-temi tar-riċerka u li huwa ffinanzjat fil-qafas tal-programm
Orizzont 2020 dwar l-iskart bħala riżors.