Ekonomija ċirkulari

Ekonomija ċirkulari hija sistema li żżomm il-valur tal-prodotti, tal-materjali u tar-riżorsi fl-ekonomija għall-iktar żmien twil possibbli u tnaqqas kemm jista’ jkun il-ġenerazzjoni tal-iskart. Dan ifisser sistema fejn il-prodotti jerġgħu jintużaw, jissewwew, jerġgħu jiġu mmanifatturati jew irriċiklati.

Azzjonijiet fuq l-ekonomija ċirkulari jikkontribwixxu wkoll għal prijoritajiet oħra prinċipali tal-UE, inkluż irkupru ekoloġiku, mitigazzjoni tal-klima u iffrankar tal-enerġija, protezzjoni tal-biodiversità u sforzi globali dwar l-iżvilupp sostenibbli.

Fl-2015, il-Kummissjoni Ewropea adottat pjan ta’ azzjoni ambizzjuż dwar l-ekonomija ċirkulari. Hija ħabbret 54 miżura matul iċ-ċiklu kollu tal-ħajja tal-prodotti biex tħaffef it-tranżizzjoni tal-UE lejn l-ekonomija ċirkulari. Dawn il-miżuri kollha ġew adottati.

Fost miżuri oħra, leġiżlazzjoni riveduta tal-UE dwar l-iskart daħlet fis-seħħ fl-2018. Din stabbiliet miri ċari għar-riċiklaġġ u pjan fit-tul għall-immaniġġjar modern tal-iskart. Din kienet tinkludi:

• miri għar-riċiklaġġ ta’ skart muniċipali u mill-imballaġġ;
• miri vinkolanti biex tnaqqas il-miżbliet sa limitu massimu;
• miżuri biex jitnaqqas l-iskart mill-ikel u dak marittimu.

Fl-2018 kien hemm ukoll iktar inizzjattivi bħal dik tal-istrateġija tal-UE dwar il-plastiks, rapport dwar materja prima kritika fl-ekonomija ċirkulari, regoli dwar il-plastiks li jintużaw darba biss u leġislazzjoni proposta dwar ir-rekwiżiti minimi biex jerġa’ jintuża l-ilma (adottata fl-2020).

F’Marzu 2020, bħala parti ewlenija tal-Patt Ekoloġiku Ewropew tal-2019 biex issaħħaħ l-użu effiċjenti tar-riżorsi billi timxi lejn ekonomija ċirkulari nadifa, tirrestawra l-biodiversità u taqta’ t-tniġġiż, il-Kummissjoni adottat pjan ta’ azzjoni ġdid dwar l-ekonomija ċirkulari għall-UE. Dan jinkludi miżuri sabiex:

• il-prodotti sostenibbli jsiru n-norma fl-UE;
• tagħti iktar saħħa lill-konsumaturi u lix-xerrejja pubbliċi;
• tiffoka fuq is-setturi li jużaw l-iktar riżorsi u fejn il-potenzjal taċ-ċirkulazzjoni jkun għoli, bħal pereżempju:
  • elettroniċi u ICT,
  • batteriji u vetturi,
  • imballaġġ, plastiks u tessuti,
  • kostruzzjoni u bini,
  • ikel, ilma u nutrijenti;
• tassigura inqas skart;
• tagħmel l-ekonomija ċirkulari taħdem għan-nies, għar-reġjuni u għall-ibliet;
• tmexxi ħiliet globali dwar l-ekonomija ċirkulari.

ARA WKOLL

• Il-bijodiversità
• Azzjoni klimatika
• Il-Politika dwar l-Ambjent
• Żvilupp sostenibbli
• Konvenzjoni ta’ Basel dwar il-kontroll ta’ movimenti transkonfinali ta’ skart perikoluż u r-rimi tiegħu (sommarju)
• Patt Ekoloġiku Ewropew (sommarju)
• Liġi tal-UE dwar l-immaniġġjar tal-iskart (sommarju)
• Miżbla tal-iskart (sommarju)
• Nagħmlu dak kollu li nistgħu bl-apparat tal-elettriku u elettroniku mormi (sommarju)
• Rekwiżiti minimi għall-użu mill-ġdid tal-ilma (sommarju)
• L-imballaġġ u l-iskart mill-imballaġġ (sommarju)
• Faċilitajiet tal-port għal skart minn bastimenti, inklużi fdalijiet mill-merkanzija (sommarju)
• It-tnaqqis tal-konsum tal-basktijiet tal-plastik ħfief fl-UE (sommarju)
• Projbizzjoni tal-plastiks li jintużaw darba biss (sommarju)
• Trattament tal-ilma urban mormi (sommarju)
• Pjan ta’ Azzjoni dwar l-Ekonomija Ċirkulari (Il-Kummissjoni Ewropea)