L-intrapriżi ta’ daqs żgħir u medju

Ir-Rakkomandazzjoni tal-Kummissjoni 2003/361 tiddefinixxi l-intrapriżi żgħar u medji (SMEs) bħala kumpaniji li l-membri tal-persunal u l-piż ekonomiku jaqgħu taħt ċerti limiti.

• Kumpanija ta’ daqs medju jkollha sa 250 impjegat, fatturat sa €50 miljun jew total tal-karta bilanċjali sa €43 miljun;
• Kumpanija ta’ daqs żgħir ikollha sa 50 impjegat u t-total tal-fatturat jew tal-karta bilanċjali sa €10 miljuni;
• Kumpanija mikro jkollha sa 10 impjegati u total tal-fatturat jew tal-karta bilanċjali sa €2 miljuni.

Hemm iktar minn 23 miljun SME fl-Unjoni Ewropea (UE) li jikkostitwixxu 99 % tan-negozji u tnejn minn kull tliet impjiegi fis-settur privat. Dawn huma mutur importanti tal-ekonomija.

L-UE tħeġġeġ l-użu ta’ din id-definizzjoni ta’ SMEs bħala referenza, inkluż minn Stati Membri tal-UE. Barra minn dan, hi vinkolanti biss għal ċerti kwistjonijiet bħall-għajnuna mill-Istat u l-implimentazzjoni ta’ fondi strutturali jew programmi oħra tal-UE.

Hemm bosta programmi tal-UE li jappoġġjaw ix-xogħol fuq kwistjonijiet relatati mal-SMEs, b’mod partikolari l-programm tas-suq uniku.

L-għanijiet ġenerali tal-programm tas-suq uniku (2021–2027) tal-UE jinkludu t-titjib tal-funzjonament tas-suq intern, notevolment il-protezzjoni u t-tisħiħ tal-pubbliku, tal-konsumaturi u tan-negozji, speċjalment tal-SMEs.

• Fi ħdan dan il-programm, hemm baġit speċifiku (EUR 1 biljun) disponibbli għal proġetti u attivitajiet relatati mal-SMEs. L-għan prinċipali hu li ngħinu biex nindirizzaw l-isfidi ewlenin li dawn in-negozji qed jiffaċċjaw f’termini ta’ kompetittività u sostenibbilità. Attivitajiet appoġġjati taħt il-komponent tal-SMEs ta’ dan il-programm jiffukaw ukoll fuq għanijiet bħall-promozzjoni ta’ intraprenditorija, opportunitajiet ġodda għan-negozji (inkluż aċċess għas-swieq), it-tisħiħ tal-kompetittività tal-ekosistemi industrijali u l-iżvilupp tal-ktajjen tal-valur industrijali.
• Proġetti u attivitajiet appoġġjati taħt il-komponent tal-SMEs ta’ dan il-programm ġeneralment huma implimentati mill-fornituri tal-appoġġ u entitajiet oħra involuti f’kooperazzjoni ma’ SMEs. Uħud minn dawn il-proġetti jipprovdu wkoll finanzjament lil partijiet terzi lil SMEs involuti f’soluzzjonijiet ta’ tfassil, ittestjar u implimentazzjoni jew servizzi.
• Il-programm tas-suq uniku u l-komponent tal-SMEs tiegħu mhumiex programm ta’ investiment. Strumenti oħra tal-UE bħal InvestEU u l-fondi strutturali ser jipprovdu appoġġ għal investimenti tan-negozji.

ARA WKOLL

• Il-kompetittività
• Il-koeżjoni ekonomika, soċjali u territorjali
• Politika tal-impriżi tal-UE
• Is-suq intern
• L-għajnuna mill-Istat
• Fondi strutturali u ta’ Investiment
• Il-Programm InvestEU (2021–2027) (sommarju)
• Il-Programm tas-suq uniku (sommarju)
• L-intraprenditorija u l-intrapriżi ta’ daqs żgħir u medju (il-Kummissjoni Ewropea)
• Strateġija tal-SME (il-Kummissjoni Ewropea).