19.9.2013   

MT

Il-Ġurnal Uffiċjali tal-Unjoni Ewropea

C 271/70

1.1

Il-KESE jaqbel mal-linji ewlenin tal-pjan ta’ azzjoni attwali fir-rigward tal-governanza korporattiva.

1.2

Il-KESE jwissi kontra r-riskju li jiżdied il-piż leġislattiv tal-konformità għall-intrapriżi li huma elenkati fil-Borża u jfakkar li l-intrapriżi għandhom ħtieġa vitali ta’ suq finanzjarju miftuħ. Bilanċ ġust bejn miżuri leġislattivi u standard legali mhux vinkolanti, bħar-rakkomandazzjonijiet u l-kodiċi ta’ governanza, jiddependi mid-dettalji tal-implimentazzjoni ta’ kull inizjattiva ppreżentata.

1.3

B’mod partikolari, fir-rigward tal-miżura innovattiva li tirrekjedi li l-intrapriżi jkunu trasparenti dwar il-politika ta’ remunerazzjoni tagħhom, il-KESE jistenna li l-Kummissjoni tistabbilixxi rekwiżiti raġonevoli biex ma tipperikolax l-iżvilupp ta’ dawn l-intrapriżi minħabba li l-piż tal-ispejjeż tal-funzjonament tagħhom jiżdied. Huwa jiġbed l-attenzjoni fuq il-fatt li dawn ir-regoli l-ġodda jridu jirrispettaw “il-kunfidenzjalità tan-negozju”.

1.4

Dwar il-kwistjoni essenzjali tal-vot tal-azzjonisti dwar il-politika tar-remunerazzjoni, il-KESE jqis li t-tfittxija għal armonizzazzjoni Ewropea ma tistax tmur lil hinn minn vot konsultattiv mingħajr ma tqajjem dubji dwar il-bażi tal-liġi tal-kumpaniji.

1.5

Fil-qafas tal-valutazzjoni tal-impatt li hija ppjanata, il-KESE jistieden lill-Kummissjoni teżamina bir-reqqa kemm fil-fatt kull inizjattiva tapplika għall-każ speċifiku tal-SMEs.

1.6

B’mod kumplimentari għall-inizjattivi mħabbra, il-KESE jqis li f’perspettiva ta’ funzjonament tajjeb tal-intrapriżi, partikolarment f’perjodu ta’ kriżi, kien hemm bżonn li tiġi enfasizzata l-ħtieġa li tissaħħaħ il-parteċipazzjoni tal-impjegati.

1.7

Barra minn hekk, il-KESE jappella għat-tisħiħ tat-taħriġ tal-amministraturi u jenfasizza li jkun opportun li jiġi promoss l-iskambju dwar prattiki tajba osservati fil-qasam.

1.8

Fil-qasam tad-dritt soċjetarju, il-KESE jqis li huwa meħtieġ li l-prijoritajiet jiġu ffukati mill-ġdid fuq il-proġett tal-kumpanija privata Ewropea kif ukoll fuq miżuri bil-għan li jiffaċilitaw it-trasferiment tal-uffiċċji rreġistrati fi ħdan l-UE. F’kull każ, il-parteċipazzjoni tal-impjegati trid tiġi aasigurata u msaħħa b’mod partikolari fuq il-bażi tal-konsultazzjoni speċifika tal-imsieħba soċjali li hija prevista fit-trattati Ewropej.

1.9

Il-KESE ma jaqbilx mal-idea li l-kunċett tal-“interess tal-grupp” jingħata rikonoxximent, li fuq tul ta’ żmien ikollha l-konsegwenza li ddgħajjef il-prinċipju tal-indipendenza tal-persuni morali fi ħdan grupp ta’ kumpaniji, b’mod partikolari jekk huma ma jkunux Ewropej. Barra minn hekk huwa mħasseb dwar il-loġika li tagħti prijorità lill-interess tal-grupp bi ħsara għal dak ta’ kumpanija sussidjarja li tista’ tiġi sagrifikata.

2.1

B’koerenza mal-Komunikazzjoni tagħha dwar l-“Ewropa 2020” li fiha għamlet appell għat-titjib fl-ambjent tal-intrapriżi fl-Ewropa, f’dan il-pjan ta’ azzjoni l-Kummissjoni qed tipproponi inizjattivi li għandhom l-għan li jsaħħu l-qafas ta’ governanza korporattiva fl-UE b’konformità ma’ żewġ linji ta’ azzjoni:

2.2

B’mod parallel tħabbru diversi inizjattivi fil-qasam tad-dritt soċjetarju, li fid-definizzjoni tagħhom jirrigwardaw mhux biss il-kumpaniji elenkati fil-Borża iżda wkoll il-kumpaniji anonimi kollha: il-faċilitazzjoni tal-operazzjonijiet transkonfinali (fużjonijiet u diviżjonijiet transkonfinali, u, eventwalment it-trasferiment tal-uffiċċji rreġistrati), analiżi tas-segwitu li jrid jingħata lill-proposta li jinħoloq statut għal Kumpanija Privata Ewropea, kampanji ta’ informazzjoni dwar l-istatut tal-kumpanija Ewropea u ta’ Soċjetà Kooperattiva Ewropea, miżuri li jimmiraw gruppi ta’ intrapriżi (rikonoxximent tal-kunċett tal-“interess ta’ grupp” b’mod partikolari), kodifikazzjoni tad-dritt soċjetarju Ewropew. Dawn l-inizjattivi kollha ser ikunu s-suġġett ta’ valuzzjonijiet tal-impatt ex-ante, u jistgħu jiġu modifikati bħala konsegwenza.

3.6.1

Il-KESE kien diġà fakkar li l-governanza korporattiva għandha l-għan li tassigura s-sopravivenza u l-prosperità tal-intrapriża (4) billi tistabbilixxi sitwazzjoni ta’ kunfidenza bejn l-atturi differenti (5). Bħalma hu l-każ tad-dritt soċjetarju Ewropew, l-inizjattivi fil-qasam tal-governanza għandhom jikkontribwixxu biex jiffaċilitaw il-ħajja u t-tħaddim tal-intrapriżi u biex dawn ikunu kompetittivi.

3.6.2

Fir-rigward tat-tnaqqis qawwi osservat fl-għadd ta’ kumpaniji ġodda elenkati fil-Borża u l-għadd li qed jikber ta’ kumpaniji li qed joħorġu mill-borża, il-KESE jfakkar li l-intrapriżi, u l-SMEs, b’mod partikolari, għandhom bżonn essenzjali ta’ aċċess għas-suq finanzjarju. Id-diffikultajiet attwali biex numru minn dawn l-intrapriżi jiksbu finanzjament iwaqqaf l-iżvilupp tagħhom b’mod konsiderevoli. Biex jassigura suq finanzjarju miftuħ, il-KESE jqis li huwa essenzjali li ma jiżdidux il-limitazzjonijiet li huma diġà qawwija marbuta mal-governanza korporattiva għall-kumpaniji elenkati fil-Borża, u b’mod partikolari l-SMEs, biex b’hekk l-elenkar fil-Borża ma jkomplix isir inqas attraenti. Barra minn hekk, huwa jiġbed l-attenzjoni għar-riskju li jiżdied in-nuqqas ta’ bilanċ fil-kompetizzjoni bejn il-kumpaniji elenkati fil-Borża u dawk li mhumiex, dawn tal-aħħar m’humiex soġġetti għall-obbligi ta’ trasparenza li huma imposti fuq tal-ewwel, filwaqt li huma l-kumpaniji elenkati fil-Borża li jiggwadanjaw mill-informazzjoni li jkunu qed ixandru l-oħrajn.

3.6.3

Il-KESE jiddispjaċih li l-preokkupazzjoni espressa mill-Kummissjoni biex titqies in-natura speċifika tal-SMEs – f’termini ta’ daqs kif ukoll ta’ strutturi tal-azzjonisti – ma tissemmiex ħlief f’termini ġenerali ħafna u mhijiex maqsuma fid-dettall u b’mod speċifiku għal kull inizjattiva proposta.

3.6.4

F’dan ir-rigward il-KESE jenfasizza l-ħtieġa li tiġi modifikata d-definizzjoni Ewropea tal-SMEs biex ikunu jistgħu jitqiesu aħjar il-karatteristiċi ta’ intrapriżi ta’ daqs żgħir u medju.

3.6.5

Aktar minn approċċ regolatorju, il-KESE jirrakkomanda kemm jista’ jkun approċċ li jiddefinixxi l-prinċipji li wara l-Istati Membri jadattaw bl-aħjar mod għall-karatteristiċi nazzjonali. Fl-2003 (6), il-Kummissjoni kienet diġà ġibdet l-attenzjoni għall-konverġenza konsiderevoli tal-kodiċi nazzjonali tal-governanza korporattiva. Il-KESE jinnota b’sodisfazzjon li l-Kummissjoni tidher li qed tieħu dan l-approċċ fuq il-punti essenzjali tal-pjan ta’ azzjoni attwali, b’mod partikolari fir-rigward tat-titjib tal-ispjegazzjonijiet li jridu jagħtu l-kumpaniji li jitbiegħdu mill-kodiċi.

3.6.6

Fir-rigward tal-għan ġenerali tat-trasparenza, il-KESE jappoġġja l-inizjattivi tal-Kummissjoni mmirati li jimplimentaw fl-UE kollha regoli li qed jiġu implimentati f’xi Stati Membri, b’mod partikolari dawk li jippromovu l-prestazzjoni fit-tul tal-intrapriżi. Id-diffikultà tidher li qiegħda biex jinstab il-punt ta’ bilanċ bejn l-eżiġenzi leġittimi tat-trasparenza u l-ħtieġa li t-tkabbir tagħhom ma’ jiġix imfixkel minn piż amministrattiv żejjed u bid-divulgazzjoni ta’ informazzjoni sensittiva għall-kompetittività.

3.6.7

Peress li jqis li l-eżiġenza tal-“konformità jew spjegazzjoni” hija fil-bażi tal-prinċipji tal-governanza, il-KESE jaqbel li hemm bżonn ta’ implimentazzjoni aktar rigoruża tagħha. Huwa jilqa’ b’sodisfazzjon inizjattiva tal-Kummissjoni f’dan is-sens.

3.6.8

Il-KESE jieħu nota tar-rieda tal-Kummissjoni li ssaħħaħ ir-rwol tal-azzjonisti, biex jinstab bilanċ sodisfaċenti bejn il-poteri differenti. Huwa konxju tal-fatt li apparti d-drittijiet mħabbra biex jippermettu lill-azzjonisti jipparteċipaw aktar hemm ukoll dmirijiet li huma jridu jwettqu.

3.6.9

Peress li għal dan il-għan jeħtieġ li jiġi promoss id-djalogu bejn l-azzjonisti u l-emittenti, il-KESE jagħti importanza speċjali lill-inizjattiva li timmira li tippromovi li l-intrapriżi jsiru jafu lill-azzjonisti tagħhom, li huwa prerekwiżit indispensabbli. L-istrument Ewropew futur f’dan il-qasam irid jagħti każ tad-differenzi fil-leġislazzjoni dwar il-ħarsien tad-data personali.

3.6.10

Il-KESE jappoġġja wkoll il-proposta li tobbliga lill-investituri istituzzjonali li jiddivulgaw il-politiki ta’ vot u ta’ impenn tagħhom, u b’mod partikolari l-pjani tagħhom ta’ investiment fil-kumpaniji li huma jixtru l-ishma tagħhom.

3.6.11

Dwar il-kwistjoni essenzjali tal-vot tal-azzjonisti dwar il-politika tar-remunerazzjoni u r-rapport dwar ir-remunerazzjoni, il-KESE jqis li t-tfittxija għal armonizzazzjoni Ewropea ma tistax tmur lil hinn minn vot konsultattiv.

3.7.1

Fost l-inizjattivi differenti li tħabbru, il-KESE għandu prijoritajiet differenti minn dawk proposti mill-Kummissjoni.

3.7.2

Għall-kuntrarju tal-Kummissjoni, il-KESE jqis li l-isforzi dwar il-proġett tal-kumpanija privata Ewropea għandhom jitkomplew u li għandha tinstab soluzzjoni li tiġbed kunsens.

3.7.3

Il-KESE jqis li huwa daqstant ieħor importanti li jiġu ffaċilitati t-trasferimenti tal-uffiċċji rreġistrati fi ħdan l-UE u li l-inizjattiva f’dan il-qasam li qed jitlob għandha tkompli tiggarantixxi l-kundizzjonijiet biex l-impjegati jipparteċipaw b’mod attiv.

4.1.1

Il-KESE jirrikonoxxi l-ħtieġa li l-intrapriżi jtejbu l-kwalità tal-ispjegazzjonijiet li għandhom jippreżentaw meta jitbiegħdu mill-kodiċi ta’ governanza. Xi drabi, dawn l-ispjegazzjonijiet jidhru eżerċizzju fir-retorika, meta għall-kuntrarju huma għandhom ikunu ġustifikati b’mod adatt u jsemmu meta jkun rilevanti s-soluzzjoni alternattiva li ġiet implimentata.

4.1.2

Il-KESE jinnota b’sodisfazzjon li l-Kummissjoni tħalli r-responsabbiltà tal-kodiċi nazzjonali f’idejn l-Istati Membri biex jiċċaraw il-modalitajiet li jippermettu li jittejbu d-dikjarazzjonijiet dwar il-prattiki ta’ governanza.

4.1.3

Kif diġà rrimarka (7), il-kwalità tajba tal-ispjegazzjonijiet li għandhom jagħtu l-intrapriżi tħares qabel kollox l-istess interessi tal-kumpanija, u din tiġi penalizzata mis-suq f’każ li l-ispjegazzjonijiet ikunu insuffiċjenti.

4.1.4

Jekk il-Kummissjoni tixtieq li tikkontrolla jew saħansitra tiċċertifika l-kwalità tal-informazzjoni dwar il-governanza trasmessa lis-swieq, il-KESE jixtieq jiċċara li mhuwiex favur approċċ vinkolanti f’dan il-qasam. Barra minn hekk, huwa jindika d-diffikultà teknika li proġett bħal dan ikollu li, bħad-Direttiva dwar il-kontroll legali tal-awditjar statutorju li tistabbilixxi kumitat tal-awditjar, jirrikjedi li jiġu definiti kriterji omoġenji fil-livell tal-UE applikabbli għall-intrapriżi kollha.

4.1.5

Il-miżura li l-aktar li tista’ żżid il-piżijiet amministrattivi għall-intrapriżi tirrigwarda l-eżiġenzi tat-trasparenza fir-rigward tal-politiki tar-remunerazzjoni u d-dettalji tar-remunerazzjonijiet individwali tal-amministraturi, li attwalment huma bbażati fuq diversi rakkomandazzjonijiet u kodiċi nazzjonali ta’ governanza, u li għalihom il-Kummissjoni qed tipprevedi strument vinkolanti fil-livell tal-UE fil-pjan ta’ azzjoni tagħha. Il-KESE jista’ jaċċetta miżura bħal din biss sakemm l-implimentazzjoni konkreta tagħha ma ttaqqalx ħafna l-piż regolamentari għall-intrapriżi, dan irid jiġi vvalutat b’mod rigoruż waqt il-valutazzjoni tal-impatt li ssir qabel. Il-KESE jwissi wkoll kontra r-riskju li d-divulgazzjoni tal-kriterji rigward il-parti varjabbli tar-remunerazzjoni għall-amministraturi eżekuttivi tista’ tipperikola “s-sigriet tan-negozju”. Barra mil-livelli tal-ammonti permessi, il-KESE jenfasizza l-importanza li l-azzjonisti jiġu informati b’mod ċar u komprensiv dwar il-kalkoli u l-kriterji li jkunu intużaw.

4.1.6

Wieħed mill-punti li l-aktar joħloq diffikultajiet f’għajnejn il-KESE jirrigwarda l-kunċett tad-dritt tal-vot tal-azzjonisti fuq il-politika tar-remunerazzjoni u r-rapport dwar ir-remunerazzjonijiet, u jappella li tingħata attenzjoni kbira għall-arranġamenti ta’ dan il-vot. Il-KESE jiġbed l-attenzjoni li l-Kummissjoni għadha pjuttost vaga dwar il-kwistjoni u ma tiċċarax jekk dan il-vot ikunx konsultattiv jew vinkolanti.

4.1.7

Barra mid-diffikultajiet legali u tekniċi tal-implimentazzjoni, vot vinkolanti jfisser li l-kompetenzi jiġu trasferiti mill-bord għall-azzjonisti. Il-KESE ma jistax jappoġġja din id-direzzjoni, li timmodifika fil-fond id-dritt soċjetarju, anke jekk huwa jemmen li kull Stat Membru għandu jiddeċiedi dwar in-natura konsultattiva jew vinkolanti tal-vot.

4.1.8

Il-KESE diġà esprima l-fehma tiegħu dwar din il-kwistjoni favur vot ta’ approvazzjoni filwaqt li jiġi ċċarat li r-riżoluzzjoni fil-qasam tal-politika tar-remunerazzjoni proposta lill-azzjonisti waqt l-assemblea ġenerali trid tiġi diskussa u adottata minn qabel mill-bord kollu, kif diġà jsir fil-Ġermanja (8).

4.1.9

Rigward il-parti varjabbli tar-remunerazzjoni attribwita lill-amministraturi eżekuttivi, il-KESE jrid ifakkar li l-approvazzjoni tal-azzjonisti waqt l-assemblea ġenerali trid tkun marbuta mas-sistema u r-regoli applikati (kriterji ta’ prestazzjoni deċiżi minn qabel u li jistgħu jitkejlu), kif ukoll fuq l-ammont stess – kif jitħallas skont l-istess regoli (9).

4.1.10

Fir-rigward tal-attività tal-konsulenti delegati, il-KESE jirrikonoxxi l-ħtieġa ta’ regoli aktar stretti. Huwa jirrakkomanda, b’mod partikolari li huma jkunu obbligati li: jiddikjaraw l-politika ta’ vot tagħhom (bir-raġunijiet għar-rakkomandazzjonijiet tagħhom); jippreżentaw l-abbozz ta’ rapport ta’ analiżi tagħhom lill-kumpanija qabel ma jippreżentawh lill-investituri (b’mod li l-kumpanija tkun tista’ tikkomunikalhom il-kummenti tagħha); jiddikjaraw kull kunflitt ta’ interessi li jistgħu jinfluwenzawhom fl-attività tagħhom, partikolarment minħabba relazzjonijiet li jista’ jkollhom mal-kumpanija u l-azzjonisti tagħha, u jsemmu x’miżuri wettqu biex ikunu jistgħu jevitaw dawn il-kunflitti.

4.2.1

Il-KESE jqis li l-isforzi dwar il-proġett tal-kumpanija privata Ewropea għandhom jitkomplew u t-twettiq tagħhom għandu jkun konformi mad-dispożizzjonijiet tat-Trattat kif ukoll mad-dritt soċjetarju li jkun qed jiġi applikat. Lil hinn minn armonizzazzjoni tal-liġijiet nazzjonali, strument uniformi bħall-kumpanija privata Ewropea jista’ jkollu, fil-fehma tiegħu, effett ta’ lieva importanti li jippromovi l-attività transkonfinali tal-SMEs. Il-parteċipazzjoni attiva tal-impjegati fi ħdan l-SPE bl-istess regoli li huma fis-seħħ għall-kumpanija Ewropea u għas-Soċjetà Kooperattiva Ewropea hija eżiġenza li f’għajnejn il-KESE ma tistax titpoġġa f’dubju mingħajr ma tipperikola l-proġett u hija kundizzjoni essenzjali għall-qbil li l-KESE jixtieq jara.

4.2.2

Bl-istess mod, fir-rigward tal-kwistjoni tar-regoli Ewropej li jridu jiġu implimentati biex jiġi faċilitat it-trasferiment tal-uffiċċji rreġistrati bejn Stat Membru u ieħor, il-KESE kien qed jittama li l-Kummissjoni tkun aktar determinata, peress li hi stess tagħraf il-ħtieġa reali f’dan il-qasam. L-inizjattiva f’dan il-qasam li qed jitlob għandha tkompli tiggarantixxi l-kundizzjonijiet biex l-impjegati jipparteċipaw. L-impjegati għandhom jiġu informati u konsultati dwar it-trasferiment propost, b’konformità mal-Artikolu 4 tad-Direttiva 2002/14/KE u d-Direttiva dwar il-Kumitati tal-Intrapriżi Ewropej.

4.2.3

Għall-kuntrarju, il-KESE għandu dubji kbar dwar kull inizjattiva tal-UE li tippromovi li l-kunċett tal-“interess tal-grupp” jingħata rikonoxximent, li fuq tul ta’ żmien ikollha l-konsegwenza li ddgħajjef il-prinċipju tal-indipendenza tal-persuni morali fi ħdan grupp ta’ kumpaniji, b’mod partikolari jekk huma ma jkunux Ewropewj. Minkejja l-atteġġjament prudenti u moderat tal-Kummissjoni, huwa mħasseb ukoll dwar il-loġika li tagħti prijorità lill-interess tal-grupp bi ħsara għal dak ta’ kumpanija sussidjarja li tista’ tiġi sagrifikata. Madankollu, jekk il-Kummissjoni tibqa’ żżomm ma’ din id-direzzjoni, din tirrikjedi li l-ewwel nett issir ħidma dwar definizzjoni legali komuni tal-kunċett “grupp ta’ kumpaniji”, fil-livell Ewropew, biċċa xogħol li hija partikolarment delikata u iebsa peress li l-kunċetti tal-Istati Membri fil-qasam huma differenti ħafna.

4.2.4

Fid-dawl tal-firxa tal-pjan ta’ azzjoni, il-KESE ma jqisx li l-kodifikazzjoni tad-dritt soċjetarju tal-UE hija prijoritarja minn issa sa l-aħħar tas-sena, biċċa xogħol li b’mod ġenerali tieħu ħafna ħin.

4.2.5

Barra minn hekk, il-KESE jiddubita li dan jista’ jsir fuq il-bażi tal-liġijiet stabbiliti peress li l-Kummissjoni tappella biex in-nuqqasijiet u t-trikkib legali li mhumiex intenzjonati fid-Direttivi jiġu rimedjati.

4.2.6

Fl-aħħar il-KESE jindika d-diffikultà li dan l-eżerċizzju joħloq peress li d-Direttivi inkwistjoni, li fihom għadd ta’ għażliet, diġà ġew trasposti fil-liġijiet nazzjonali fil-biċċa l-kbira tagħhom.