EUR-Lex Access to European Union law
This document is an excerpt from the EUR-Lex website
Document 52012DC0742
COMMUNICATION FROM THE COMMISSION TO THE EUROPEAN PARLIAMENT, THE COUNCIL AND THE EUROPEAN ECONOMIC AND SOCIAL COMMITTEE A new European approach to business failure and insolvency
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW Approċċ Ewropew ġdid għall-falliment u l-insolvenza
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW Approċċ Ewropew ġdid għall-falliment u l-insolvenza
/* COM/2012/0742 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW Approċċ Ewropew ġdid għall-falliment u l-insolvenza /* COM/2012/0742 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI
EWROPEW Approċċ Ewropew ġdid
għall-falliment u l-insolvenza 1. Introduzzjoni: Ġustizzja
għat-tkabbir Peress li l-Ewropa qed tiffaċċa
kriżi ekonomika u soċjali severa, l-Unjoni Ewropea qed tieħu
azzjoni biex tippromwovi l-irkupru ekonomiku, timbotta l-investiment u
tħares l-impjiegi. Hija prijorità
politika għolja li jittieħdu miżuri li joħolqu tkabbir u
prosperità sostenibbli[1]. Il-kriżi tad-dejn għandha effett
dirett fuq il-poplu, fuq l-impjiegi u fuq in-negozji. Il-kriżi ekonomika
wasslet għal żieda fl-għadd ta' negozji li qed ifallu. Mill-2009
sal-2011, fallew medja ta' 200 000 kumpanija fis-sena fl-UE. Madwar kwart ta' dawn il-fallimenti għandhom
element transfruntieri. Xi 50% tan-negozji
l-ġodda kollha ma jaqbżux l-ewwel ħames snin ta' ħajthom. Huwa stmat li jintilfu 1,7 miljun impjieg
minħabba insolvenzi kull sena. It-tkabbir huwa l-qalba tal-aġenda għall-ġustizzja
tal-Kummissjoni ("Ġustizzja għat-Tkabbir"), b'konfomità
mal-istrateġija ta' tkabbir Ewropa 2020, l-Istħarriġ
Annwali dwar it-Tkabbir u l-Att dwar is-Suq Uniku II li għadu kif ġie
adottat[2]. L-immodernizzar tar-regoli ta' insolvenza tal-UE
biex tiġi ffaċilitata s-sopravivenza tan-negozji u tippreżenta
ċans ieħor lill-intraprendituri ġiet identifikata bħala
azzjoni ewlenija għat-titjib tal-funzjonament tas-suq intern. Il-Programm ta' Stokkolma 2009 għall-qasam
Ewropew tal-ġustizzja[3]
enfasizza l-importanza tar-regoli tal-insolvenza fis-sostenn tal-attività
ekonomika. Ir-reazzjoni Ewropea għandha tkun li
toħloq sistema effiċenti għar-ristrutturazzjoni u
r-riorganizzazzjoni tan-negozji ħalli jkunu jistgħu jissopravvivu
l-kriżi finanzjarja, joperaw b'iktar effiċenza u fejn ikun hemm
bżonn, jerġgħu jibdew mill-bidu. Dan ma japplikax biss
għall-kumpaniji multinazzjonali, imma wkoll għall-20 miljun kumpanija
żgħira li huma s-sinsla tal-ekonomija tal-Ewropa.
L-immaniġġjar b'mod effikaċi tal-kawżi ta' insolvenza huwa
suġġett importanti għall-ekonomija Ewropea u t-tkabbir
sostenibbli. Ir-Regolament tal-UE dwar proċedimenti ta' falliment[4] ġie
adottat biex jittratta kwistjonijiet ta' insolvenza transfruntieri permezz
tar-rikonixximent u l-koordinament xieraq tal-proċedimenti nazzjonali ta'
insolvenza u sabiex jiġu evitati inċentivi għall-partijiet milli
jittrasferixxu l-assi jew il-proċedimenti ġudizzjarji minn Stat
Membru għall-ieħor, biex ifittxu li jiksbu qagħda ġuridika
iktar favorevoli (għażla opportunistika tal-ġuriżdizzjoni).
Peress li għandu kamp ta' applikazzjoni transfruntieri, ir-Regolament
madankollu ma armonizzax il-liġijiet ta' insolvenza użati
f'kawżi nazzjonali ta' insolvenza. B'hekk,
differenzi fil-liġijiet nazzjonali jibqgħu hemm u, minħabba
f'hekk, jistgħu jintilfu attivitajiet ekonomiċi, kredituri
jistgħu jirkupraw inqas milli kieku jirkupraw, u kredituri minn Stati
Membri differenti ma jkunux ittrattati l-istess. Il-Kummissjoni bħalissa
qed tipproponi l-modernizzazzjoni tar-Regolament tal-UE dwar proċedimenti
ta' falliment imma l-bidliet proposti jikkonċernaw biss kawżi
transfruntieri. Il-liġi moderna tal-insolvenza fl-Istati Membri għandha
tgħin biex kumpaniji sodi jissopravvivu u tħeġġeġ
lill-intraprendituri biex jieħdu ċans ieħor. Hija għandha
tiżgura li l-proċeduri jkunu veloċi u effiċenti,
fl-interess kemm tad-debituri u kemm tal-kredituri, u għandhom jgħinu
biex iħarsu l-impjiegi, jgħinu lill-fornituri jżommu
lill-klijenti tagħhom, u lis-sidien biex iżommu l-valur fil-kumpaniji
vijabbli. Biex jintlaħqu l-għanijiet ta' Ewropa 2020, hemm bżonn
li niffukaw fuq l-għan ġenerali ta' titjib tal-effiċenza
tal-ġustizzja fl-UE. Sistemi ta'
ġustizzja effiċenti jikkontribwixxu sew għat-tnaqqis tar-riskji
u l-inċertezzi ġuridiċi u jħeġġu negozju,
kummerċ u investiment transfruntieri. Fl-esperjenza
tagħha mal-Istati Membri fi programm ta' rkupru ekonomiku, il-Kummissjoni
identifikat ir-rwol ewlieni tar-riformi ġudizzjarji. Ir-riformi tal-liġi nazzjonali tal-insolvenza
huma għodda importanti għall-promozzjoni tal-irkupru ekonomiku. Is-Semestru Ewropew 2012 irrifletta l-impatt
tas-sistemi ġudizzjarji fuq l-ekonomija billi jagħmel
ir-rakkomandazzjonijiet lil ċerti Stati Membri relatati ma'
proċedimenti ta' insolvenza effiċenti. L-isfida hija li
d-diffikultajiet finanzjarji tad-debitur ikunu indirizzati adegwatament u
malajr filwaqt li jitħarsu l-interessi leġittimi tal-kreditur u
jiġi żgurat aċċess għall-ġustizzja
għall-partijiet kollha. Matul l-aħħar għoxrin sena, is-suq uniku żviluppa
bħala żona bla fruntieri. Jekk
kumpanija jkollha inkwiet finanzjarju, għandu jkun faċli li ssib
għajnuna transfruntieri daqs kemm hi faċli domestikament. Il-ħolqien ta' kundizzjonijiet ekwi
tal-liġijiet nazzjonali ta' insolvenza għandu jwassal għal aktar
kunfidenza fis-sistemi ta' Stati Membri oħra għall-kumpaniji,
l-intraprendituri u l-individwi privati li lesti joperaw fis-suq intern. Regoli
effiċenti tal-insolvenza jtejbu wkoll l-aċċess
għall-kreditu, li jħeġġeġ l-investiment. Il-kredituri jkunu iktar lesti jsellfu meta jkunu
kunfidenti li se jirkupraw is-self li jkunu taw. Aktar
kompatibilità tar-regoli dwar il-proċedimenti ta' insolvenza tista'
għalhekk ittejjeb il-funzjonament tas-suq intern. Għalkemm
id-diversità tkun parti mill-kompetizzjoni regolatorja leġittima
bbażata fuq għażliet politiċi nazzjonali, ġeneralment
din twassal għall-problema tal-għażla opportunistika
tal-ġuriżdizzjoni[5]. L-għoti lill-intraprendituri ta'
ċans ieħor biex jerġgħu jibdew negozji vijabbli u
l-ħarsien tal-impjiegi huma elementi ewlenin tal-approċċ Ewropew
il-ġdid għall-falliment u l-insolvenza tan-negozji. Dan
l-approċċ għandu l-għan li jagħti spinta tajba
lin-negozju Ewropew fis-suq intern. Il-proposta
għall-aġġornament tar-Regolament tal-UE dwar proċedimenti
ta' falliment fil-kuntest transfruntieri, adottati b'mod parallel ma' din
il-Komunikazzjoni, diġà hija bbażata fuq dan l-approċċ
il-ġdid. Din se tkun appoġġata wkoll mill-Pjan ta' Azzjoni
tal-Intraprenditorjat Ewropew li ġej. Din il-komunikazzjoni tenfasizza dawk l-oqsma
fejn il-liġijiet tal-insolvenza domestika jkollhom l-ikbar potenzjal li
jostakolaw it-twaqqif ta' qafas ġuridiku effiċenti dwar l-insolvenza
fis-suq intern. Hija tfittex li tidentifika l-kwistjonijiet, li
l-approċċ Ewropew il-ġdid għall-falliment u l-insolvenza
tan-negozju għandu jkun iffukat fuqhom biex tiġi żviluppata kultura
ta' salvataġġ u rkupru fl-Istati Membri. 2. It-tfassil tal-approċċ
il-ġdid għall-insolvenza: il-bżonn ta' ħolqien ta' ambjent
iżjed faċli għan-negozji Diġà saret ħafna riċerka u
analiżi kemm mill-Parlament Ewropew u kemm mill-Kummissjoni rigward il-liġijiet
ta' insolvenza nazzjonali. F'Novembru 2011, il-Parlament Ewropew
adotta Riżoluzzjoni dwar il-proċedimenti ta' insolvenza[6]. Din sejħet, qabel kollox,
għar-reviżjoni tar-Regolament dwar il-Falliment u r-reviżjoni
proposta hija r-reazzjoni għal din is-sejħa.
Il-Parlament Ewropew irrakkomanda wkoll l-armonizzazzjoni ta' aspetti
speċifiċi tal-liġijiet nazzjonali dwar l-insolvenza u dwar
il-kumpaniji. Studju[7]
kkummissjonat minnu wera li d-diskrepanzi bejn il-liġijiet nazzjonali
tal-insolvenza jistgħu joħolqu ostakli, vantaġġi
kompetittivi u/jew żvantaġġi u diffikultajiet
għall-kumpaniji b'attivitajiet jew sjieda transfruntieri fi ħdan
l-UE. L-istudju sab li l-armonizzazzjoni
tal-proċessi ta' insolvenza madwar l-Istati Membri tal-UE jżidu
l-effiċenza tal-proċess ta' insolvenza u ta' riorganizzazzjoni
tan-negozju. Mill-banda l-oħra, dan
iżid ir-ritorn lill-kredituri jekk tittieħed deċiżjoni li
l-assi jiġu likwidati jew li jitjiebu l-prospetti
għar-riorganizzazzjoni billi iktar kredituri jitħeġġew
isostnu l-pjanijiet għal ristrutturazzjoni. Dawn
flimkien iżidu l-kunfidenza tas-setturi kummerċjali u finanzjarji
fl-effiċenza tal-infrastruttura finanzjarja tal-UE. Abbażi tal-istudju, il-Parlament Ewropew
ikkonkluda li "l-armonizazzjoni ta' ċerti oqsma tal-liġi dwar
l-insolvenza hija vallapena u tista' tinkiseb." Madankollu
kull kunsiderazzjoni ulterjuri ta' riforma tal-liġi tal-insolvenza trid
tqis l-impatt fuq oqsma importanti oħra tal-liġi. Il-Kummissjoni reċentement
studjat id-dinamiċi tan-negozju[8]. L-istudju ma żvela l-ebda evidenza ta' impatt
fuq it-tip ta' sistema ġuridika (dritt komuni/dritt ċivili) fuq
il-livell tal-intraprenditorjat (rata tat-twelid tal-kumpaniji, attività
intraprenditorjali totali, rata ta' sopravivenza tal-kumpaniji). Dan ifisser li proċeduri ta' falliment
effiċenti mhumiex iddeterminati bit-tip jew bil-fokus tas-sistema
ġuridika, imma b'dispożizzjonijiet speċifiċi bħal
soluzzjonijiet ekstraġudizzjarji, proċeduri mħaffin
għall-SMEs, sistema ta' twissija bikrija u dispożizzjonijiet
oħrajn li jaffettwaw b'mod sinifikanti l-effiċenza tas-sistema. Il-pajjiżi bl-aqwa prestazzjoni għandhom
qafas ġuridiku effiċenti għall-falliment u għas-sistema ta'
twissija bikrija. L-istudju juri li kważi l-pajjiżi kollha li
jitqiesu li għandhom sistema ġuridika effiċenti ħafna dwar
il-falliment jitqiesu wkoll li għandhom għodod ta' twissija bikrija
effiċenti ħafna. Kwistjoni importanti biex jiġi sostnut
ċans ieħor[9]
effettiv hija ż-"żmien ta' riabilitazzjoni", jiġifieri
l-ħin minn meta kumpanija tfalli (il-likwidazzjoni) sa meta tkun tista'
tibda tinnegozja mill-ġdid. Ir-riabilitazzjoni
spiss titqies bħala kruċjali għal opportunità ta' bidu
mill-ġdid. Bħalissa,
iż-żmien ta' riabilitazzjoni jvarja sew minn pajjiż
għall-ieħor. F'xi pajjiżi,
il-fallimenti ta' negozji onesti jingħataw riabilitazzjoni awtomatikament
minnufih wara li titlesta l-likwidazzjoni. F'xi
pajjiżi oħrajn, il-kumpaniji falluti jridu japplikaw
għar-riabilitazzjoni; u f'terġa'
oħrajn, kumpaniji falluti ma jistgħux jiksbu riabilitazzjoni. Riflessjoni addizzjonali li tikkonċerna
l-kwistjoni ta' "ċans ieħor" tirreferi għall-bidu
mill-ġdid tan-negozju ta' intraprenditur li kien iddikjarat fallut. F'ħafna pajjiżi Ewropej, jeżisti
impenn politiku biex tiġi indirizzata l-kwistjoni tal-falliment
tan-negozju u l-promozzjoni ta' ċans ieħor.
L-Istati Membri ressqu pjanijiet għal riforma
tal-leġiżlazzjoni nazzjonali dwar l-insolvenza sabiex
l-intraprendituri li jkunu qed ifittxu ċans ieħor jingħataw
sostenn. Il-parti l-kbira
tal-leġiżlazzjonijiet nazzjonali ma jidhrux li jagħmluha
faċli għal min ikun irid jerġa' jibda mill-ġdid. Dan iwassal għal inqas negozjanti li
jerġgħu jibdew mill-ġdid, minkejja l-fatt li intraprendituri li
jkunu fallew ikollhom inklinazzjoni kbira li jerġgħu jidħlu
fin-negozju. Il-Kunsill tal-Kompetittività ta'
Mejju 2011 sejjaħ biex jittieħdu miżuri
speċifiċi. Il-Kunsill
"jistieden lill-Istati Membri biex jippromwovu l-għoti ta' ċans
ieħor lill-intraprendituri billi jillimitaw, meta possibbli,
iż-żmien ta' kwittanza u l-ħlas ta' dejn għal intraprenditur
onest wara li jkun falla għal mhux aktar minn tliet snin sal-2013"[10]. 3. Oqsma tal-liġi nazzjonali
tal-insolvenza fejn l-approssimazzjoni tista' ġġib
il-benefiċċji Fuq il-bażi ta' analiżi tas-sejbiet
ta' hawn fuq, il-Kummissjoni identifikat għadd ta' oqsma fejn
id-differenzi bejn il-liġijiet nazzjonali tal-insolvenza jistgħu
joħolqu inċertezza ġuridika u ambjent "ostili"
għan-negozju. Dan joħloq klima inqas
favorevoli għall-investiment transfruntieri. 3.1. Ċans ieħor
għall-intraprendituri f'fallimenti onesti[11] Il-Prinċipju II tal-"Att dwar
in-Negozji ż-Żgħar għall-Ewropa"[12]
għandu l-għan tal-promozzjoni ta' ċans ieħor
għall-intraprendituri onesti[13].
Il-falliment "onest" huwa każ fejn il-falliment tan-negozju jkun
ġie bla ħtija ovvja tas-sid jew tal-maniġer, jiġifieri
onest u bir-rispett tar-regoli, kuntrarjament għal każijiet fejn
il-falliment ikun frodolenti jew irresponsabbli. Dan jitlob għal skambji
tal-aqwa prassi bejn l-Istati Membri. Proċeduri ta' falliment twal u
għaljin huma limitu ewlieni għal ċans ieħor effettiv. Barra minn hekk, intraprendituri falluti onesti
spiss ikunu suġġetti għall-istess limiti li jkunu
suġġetti għalihom intraprendituri frodolenti. Dan ma jissarrafx biss f'riskju li intraprendituri
onesti falluti jiffaċċaw stigma soċjali marbuta mal-falliment,
imma jfisser ukoll impedimenti ġuridiċi u amministrattivi
għall-bidu mill-ġdid ta' negozju. Diffikultajiet
biex wieħed isib finanzjament għal proġett kummerċjali
ġdid jitqiesu bħala l-problema ewlenija għan-negozjanti li jkunu
jridu jibdew mill-ġdid. Imma wieħed
irid iżomm f'moħħu li dawk li jipprovaw jibdew mill-ġdid,
jitgħallmu mill-iżbalji tagħhom u normalment jesperjenzaw
tkabbir iktar mgħaġġel minn kumpaniji stabbiliti
għall-ewwel darba. Tista' tittieħed azzjoni biex ikun hemm distinzjoni
ikbar bejn fallimenti onesti u oħrajn diżonesti. Reġimi ta' insolvenza jistgħu
joħolqu distinzjoni bejn debituri li jkunu aġixxew onestament
fl-imġiba jew fin-negozju tagħhom li wassal għad-dejn, u dawk li
aġixxew diżonestament, u jistgħu pereżempju jinkludu
dispożizzjoni li nonkonformità volontarja u irresponsabbli mal-obbligi
ġuridiċi minn debitur iwasslu għal sanzjonijiet ċivili u,
fejn xieraq, għal responsabilità penali. Kull
programm ta' sostenn għall-bidu ta' negozju ġdid għandu jkun
jista' jittieħed biss minn falluti onesti mingħajr ma dawk in-negozji
jkunu ttrattati b’mod differenti min-negozji mhux falluti. Il-miżuri li ġejjin għandhom
jitqiesu bħala l-iktar sinifikanti li għandhom jittieħdu biex
jissaħħaħ iċ-ċans ieħor: ·
Proċedimenti separati ta' likwidazzjoni
għal intraprendituri onesti u oħrajn diżonesti; ·
Tfassil u applikazzjoni ta' proċedimenti ta'
likwadazzjoni "mħeffa" għal falliment onest. 3.2. Il-perjodi ta'
riabilitazzjoni li ma jinkoraġġux ċans ieħor Ir-riabilitazzjoni hija wkoll essenzjali
għal ċans ieħor: perjodu ta'
tliet snin għar-riabilitazzjoni u s-saldu tad-dejn għandu jkun limitu
massimu raġonevoli għal intraprenditur onest u għandu jkun kemm
jista' jkun awtomatiku. Huwa kruċjali li
intraprenditur ma jispiċċax b'"sentenza għal
għomru" jekk l-affarijiet imorru ħażin[14]. L-Istati Membri qablu dwar il-bżonn li
jarmonizzaw iż-"żmien tar-riabilitazzjoni" għal inqas
minn tliet snin fil-konklużjonijiet tal-Kunsill tal-Kompetittività ta'
Mejju 2011, wara t-tnedija tar-Reviżjoni tal-Att dwar in-Negozji
ż-Żgħar għall-Ewropa[15]. It-tqassir u l-allinjament
taż-"żmien tar-riabilitazzjoni" jkunu pass importanti lejn
il-ħolqien ta' ambjent tan-negozju iktar innovattiv u faċli, li
jippermetti lill-intrapriżi Ewropej joperaw b'kundizzjonijiet ekwi. Dan jista' jkun l-ewwel pass lejn approssimazzjoni
usa' tal-liġijiet nazzjonali tal-falliment. 3.3. Diverġenzi
fiċ-ċansijiet għar-ristrutturazzjoni minħabba regoli
differenti dwar il-ftuħ tal-proċedimenti Hemm differenzi sinifikanti bejn il-kriterji
għall-ftuħ tal-proċedimenti tal-insolvenza. F'ċerti Stati Membri, il-proċedimenti ta'
insolvenza jkunu jistgħu jinfetħu biss għad-debituri li jkunu
diġà affettwati minn diffikultajiet finanzjarji u li huma insolventi. Fi Stati Membri oħrajn, il-proċedimenti
jkunu jistgħu jinfetħu għall-kumpaniji insolventi li
jantiċipaw l-insolvenza fil-futur imminenti. Differenzi
oħrajn jistgħu jinstabu f'testijiet ta' insolvenza (bħat-test
tal-likwidità) adottati fil-liġijiet tal-Istati Membri. Evidentement, id-differenzi bejn it-testijiet ta'
insolvenza jfissru li kumpaniji f'qagħda finanzjarja simili jistgħu
jgħaddu t-test tal-insolvenza fi Stat Membru imma mhux f'ieħor. Minħabba f'hekk, il-kumpaniji jista' jkollhom ċansijiet
inekwi biex jirrikorru għal ristrutturazzjoni ekstraġudizzjarja
informali sabiex jiġu solvuti diffikultajiet finanzjarji u jiġu
evitati proċedimenti ta' insolvenza li jinvolvu d-divestiment parzjali jew
totali ta' debitur u l-ħatra ta' likwidatur. Problema oħra hija relatata mar-regoli
dwar il-ftuħ obbligatorju ta' proċedimenti ta' insolvenza. Hemm differenzi sinifikanti bejn l-Istati Membri
rigward l-iskadenzi li jrid jirripetta d-debitur meta l-ftuħ ta'
proċedimenti ta' insolvenza jkun obbligatorju. F'xi
Stati Membri, id-debitur għandu ġimagħtejn wara li jsir
insolventi biex jiftaħ proċedimenti ta' falliment, f'oħrajn
id-debitur għandu xahrejn biex jiftaħ dawn il-proċedimenti li
jibdew mid-data meta jsir konxju tas-sitwazzjoni ta' insolvenza. Fi Stati Membri oħrajn, id-debitur irid
jiftaħ il-proċedimenti ta' fallimenti tal-inqas 45 jum wara li jieqfu
l-ħlasijiet. It-tul taż-żmien jista' jolqot
il-kapaċità tad-debitur li jsolvi d-diffikultajiet finanzjarji. Filwaqt li skadenza qasira wisq tista' taffettwa
negattivament din il-kapaċità, skadenzi twal jistgħu jipposponu
l-konċessjoni tal-ħelsien mid-dejn fil-qafas tal-proċedimenti
ta' insolvenza u jimminaw l-effiċenza tal-proċedimenti
għall-kredituri kollha. 3.4. Aspettattivi insodisfatti
tal-kredituri għal kategoriji differenti ta' debituri Il-liġijiet tal-Istati Membri jvarjaw
fil-possibilitajiet mogħtija lill-kredituri biex jiftħu
proċedimenti ta' insolvenza kontra debituri u fir-rigward tal-kategoriji
varji ta' debituri. Dawn id-differenzi
jistgħu jkunu diffiċli li jiġu rikonċiljati
mal-aspettattivi leġittimi tal-kredituri. Il-kredituri
jistennew li jkunu jistgħu jimponu proċedimenti ta' insolvenza fuq
id-debituri tagħhom u, minflok jirrikorru għal azzjoni ta'
eżekuzzjoni individwali, jistgħu jinstigaw proċedimenti ta'
insolvenza kollettiva. Qasam ieħor li jista' jkun
jeħtieġ approssimazzjoni huwa l-kapaċità li jinfetħu
proċedimenti kontra debitur. L-Istati
Membri għandhom sistemi li jippermettu li debitur (persuna fiżika jew
entità ġuridika pubblika jew privata) li jwettaq attività ta' negozju,
kreditur u l-istat iressqu rikors fil-qrati biex jiftħu proċedimenti
ta' insolvenza kontra debitur. Madankollu, xi
ġuriżdizzjonijiet jillimitaw il-kapaċità ta' kreditur li
jiftaħ proċedimenti ta' insolvenza billi jiżdiedu
kundizzjonijiet speċjali. Kull
limitazzjoni dwar il-kapaċità tal-kreditur li jiftaħ
proċedimenti ta' insolvenza tista' twassal għal sitwazzjonijiet fejn
kreditur jiġi ttrattat b'mod differenti fil-ftuħ u l-għeluq ta'
proċedimenti ewlenin u sekondarji kontra l-istess debitur. 3.5. Inċertezza
għall-kredituri relatata mal-proċeduri għat-tressiq jew
il-verifika tal-pretensjonijiet Sabiex tonqos l-inċertezza u
jinħoloq trattament ugwali fost il-kredituri fl-Istati Membri,
għandha titqies l-approssimazzjoni ulterjuri tar-regoli dwar it-tressiq u
l-verifika tal-pretensjonijiet, bħal pereżempju l-proċeduri,
il-limiti taż-żmien, is-sanzjonijiet u l-konsegwenzi għan-nuqqas
ta' konformità u l-informazzjoni li trid tiġi pprovduta lill-kredituri. It-trasparenza u l-effiċenza tat-tressiq
tal-pretensjonijiet u l-proċess ta' verifika jolqtu b'mod sinifikanti
l-kapaċità tal-kredituri li jiksbu riżultat sodisfaċenti ta'
proċedimenti ta' falliment. Il-liġijiet
tal-Istati Membri jirregolaw dan il-qasam b'mod differenti. Id-differenzi li nstabu jinkludu l-limiti
taż-żmien għat-tressiq tal-pretensjonijiet u
l-aċċertament tad-drittijiet, id-disponibilità u l-aċċess
għall-informazzjoni dwar il-proċess u l-konsegwenzi ta' dewmien żejjed
fit-tressiq tal-pretensjonijiet. Spiss,
il-limitu taż-żmien għat-tressiq tal-pretensjonijiet
jitniżżel fid-deċiżjoni tal-falliment. Jekk wieħed jonqos milli jirripetta l-limitu
taż-żmien jista' jkun hemm konsegwenzi differenti fi Stati Membri
differenti. F'xi wħud, kreditur li jkun
qabeż il-limitu ta' żmien jista' jitlef drittijietu li javvanza u
jikseb riżultat sodisfaċenti tal-pretensjoni tiegħu
fil-proċedimenti ta' falliment, filwaqt li fi Stati Membri oħra dan
ma jiġrix. Kredituri barranin huma iktar probabbli li
jintlaqtu mid-differenzi sinifikanti bejn il-liġijiet tal-Istati Membri
minn kredituri domestiċi, minħabba l-konsegwenzi potenzjali severi
tan-nuqqas ta' osservazzjoni tar-regoli li jirregolaw il-proċess. Dawn jinkludu t-telf ta' dritthom li jieħdu
sehem fid-distribuzzjonijiet. 3.6. Il-promozzjoni ta' pjanijiet
ta' ristrutturazzjoni Ir-regoli li jirregolaw il-pjanijiet ta'
ristruttrazzjoni (inklużi l-kontenuti u kwistjonijiet proċedurali
relatati) għandhom rwol kruċjali fil-ħolqien tal-kundizzjonijiet
għal ristrutturazzjoni b'suċċess tal-proċedimenti ta'
insolvenza. Regoli riġidi u
imprattikabbli jistgħu jtellfu ċ-ċans li jiġi adottat pjan
ta' ristrutturazzjoni, li ma jħalli l-ebda alternattiva oħra
ħlief l-istralċ tal-kumpanija. Il-qafas
ġuridiku għall-pjanijiet ta' ristrutturazzjoni adottati mill-Istati
Membri jvarjaw b'mod sinifikanti. Id-differenzi
ewlenin jikkonċernaw l-identifikazzjoni tal-partijiet li jistgħu
jaġixxu bħala promoturi tal-pjan kif ukoll l-adozzjoni, il-modifika u
l-verifika tal-pjanijiet. Filwaqt li l-liġijiet tal-Istati Membri
ġeneralment jaċċettaw li hija f'idejn id-debitur jipproponix
pjan ta' ristrutturazzjoni, ir-regoli dwar jekk kredituri jistgħux
jipproponu pjan jew jinfluwenzaw it-tħejjija tiegħu jvarjaw. Hemm ukoll differenzi ewlenin fir-regoli rigward il-proċedura
għall-adozzjoni tal-pjan, inkluż jekk il-kredituri jitqassmux
f'kategoriji u l-maġġoranzi meħtieġa. F'ċerti Stati Membri, dawn ma jinqasmux
f'kategoriji. Il-liġijiet tal-Istati
Membri fihom regoli differenti dwar il-maġġoranzi meħtieġa
għall-approvazzjoni ta' pjan. Il-liġijiet
tal-Istati Membri jvarjaw ukoll fl-istandards applikati mill-qrati
fir-reviżjoni tal-pjan. Skont xi
liġijiet, il-qrati għandhom setgħat ta' diskrezzjoni
wiesgħa, skont liġijiet oħra, dawn is-setgħat huma pjuttost
limitati. 4. Il-bżonnijiet speċjali
tal-SMEs biex ikun promoss ċans ieħor L-UE tagħti attenzjoni speċjali
għas-sitwazzjoni ffaċċata mill-SMEs u tagħtihom ċans
ieħor. Il-Kummissjoni tqis li s-sostenn
għall-SMEs biex jegħlbu d-diffikultajiet ekonomiċi għandhom
jingħataw[16]: ·
għall-prevenzjoni; ·
għal wara l-falliment u għal ċans
ieħor; ·
għal soluzzjonijiet ekstraġudizzjarji; ·
għal proċeduri fil-qrati. Ir-ristrutturazzjoni tista' tiswa ħafna
għall-SMEs, tant li spiss il-falliment ikun l-unika għażla
vijabbli. Għandhom jinstabu
soluzzjonijiet biex ibaxxu l-ispejjeż tar-ristrutturazzjoni
għall-SMEs. Soluzzjoni possibbli hija li
jkun hemm limitu massimu għall-ħlas tal-onorarji. Għandu jkun hemm proċeduri alternattivi
fis-seħħ biex ikun hemm soluzzjonijiet adegwati disponibbli għat-tipi
kollha ta' SMEs. Il-proċeduri
għandhom ikunu proporzjonati mad-daqs tan-negozju.
Għandhom jinfetħu proċeduri ekstraġudizzjarji
għat-tipi kollha ta' debituri, irrispettivament mill-fondi disponibbli. Filwaqt li ż-żmien medju li jieħdu
s-soluzzjonijiet ekstraġudizzjarji huwa relattivament qasir, ir-rata ta'
suċċess fil-kisba ta' soluzzjonijiet huwa 'l fuq minn 50% fil-parti
l-kbira tal-Istati Membri tal-UE. Għalkemm
soluzzjonijiet ekstraġudizzjarji u proċedimenti ta' qabel
l-insolvenza huma mekkaniżmi introdotti reċentement, dawn qed
jintużaw dejjem aktar mill-SMEs fl-UE. L-SMEs jistgħu jintlaqtu wkoll minn
diffikultajiet ekonomiċi bħala kredituri. Ċerti
rappreżentanti tal-SMEs iqisu li l-mikronegozji bħala kredituri
jitilfu proporzjon irraġonevoli tal-pretensjoni li baqgħet pendenti
fil-proċedimenti ta' insolvenza minħabba proċedimenti twal u
regoli nazzjonali tal-prijorità. Ta' min
jesplora x'jista' jsir biex jittejjeb l-istatus tal-SMEs bħala kredituri. 5. Passi li jridu jittieħdu Il-Kummissjoni,
bħala l-ewwel pass, tipproponi l-modernizzazzjoni tar-Regolament tal-UE
dwar proċedimenti ta' falliment. Barra minn hekk, hija biħsiebha
tadotta Pjan ta' Azzjoni Ewropew għall-Intraprenditorjat li jkun jinkludi
azzjoni ta' promozzjoni ta' proċeduri ta' falliment u li joffru ċans
ieħor. Bħala pass ulterjuri l-Kummissjoni qed
taħseb għal modi kif tista' timxi 'l quddiem biex issolvi l-problemi
ġejjin mid-diskrepanzi bejn il-liġijiet nazzjonali tal-insolvenza.
Azzjoni individwali fil-livell nazzjonali ma tistax tindirizza adegwatament
l-isfidi posti mill-aspetti transnazzjonali tas-suq intern. Ikun utli li tittieħed azzjoni biex titnaqqas
l-inċertezza u jinħoloq ambjent iktar faċli għan-negozju. L-isfida hija li d-diffikultajiet finanzjarji
tad-debitur ikunu indirizzati adegwatament u malajr flimkien mal-interessi
tal-kreditur, filwaqt li jiġu ffaċilitati s-salvataġġ u
r-ristrutturazzjoni tan-negozji. Il-Kummissjoni se tkompli l-approċċ
mibdi fiċ-ċiklu preċedenti tas-Semestru Ewropew, li fil-kuntest
tiegħu xi Stati Membri diġà rriformaw il-liġijiet ta' insolvenza
domestika tagħhom. Għalhekk, fejn ikun hemm bżonn, jistgħu
jinħarġu rakkomandazzjonijiet speċifiċi
għall-pajjiż li jistiednu lill-Istati Membri jaġġornaw
il-liġijiet ta' insolvenza tagħhom. Barra minn hekk, il-Kummissjoni biħsiebha
tanalizza iktar fil-fond l-impatt li jiġi mid-differenzi bejn
il-liġijiet ta' insolvenza nazzjonali dwar il-funzjonament tas-suq intern. Għal dan l-għan, hija se tidħol
f'djalogu mal-Parlament Ewropew u l-Kunsill fuq il-bażi ta' din
il-Komunikazzjoni. Minbarra dan,
il-Kummissjoni se tniedi konsultazzjoni pubblika biex tirċievi l-fehmiet
tal-partijiet interessati dwar il-kwistjonijiet identifikati f'din
il-Komunikazzjoni u kull tħassib ieħor kif ukoll dwar
is-soluzzjonijiet possibbli u l-alternattivi politiċi. [1] Ara
l-ittra tal-President Barroso lill-President tal-PE fil-qafas tal-indirizz
tal-Qagħda tal-Unjoni tat-12 ta' Settembru 2012. [2] COM(2012) 573. [3] ĠU C
115, 4.5.2010, p. 1. [4] Ir-Regolament
tal-Kunsill (KE) Nru 1346/2000 dwar proċedimenti ta’ falliment, ĠU
L 160 30.6.2000, p. 1. [5] Il-problema
hija deskritta f'iktar dettall fil-Valutazzjoni tal-Impatt li takkumpanja
r-Reviżjoni tar-Regolament (KE) Nru 1346/2000 dwar proċedimenti
ta' falliment, COM(2012) 744. [6] Riżoluzzjoni
tal-PE tal-15.11.2011 bir-rakkomandazzjonijiet lill-Kummissjoni dwar
il-proċedimenti ta' insolvenza fil-kuntest tal-liġi tal-UE dwar
il-kumpaniji. [7] "Harmonisation
of insolvency law at EU level", il-Parlament Ewropew 2010, PE 419.633. Dan
kien segwit mill-istudju "harmonisation of insolvency law at EU level with
respect to opening of proceedings, claims filing and verification and
reorganisation plans" EP 2011, PE 432.766 [8] "Business
dynamics: start-ups, business transfers and bankruptcy", il-Kummissjoni
Ewropea, DĠ għall-Intrapriża u l-Industrija, Jannar 2011. Dan
ir-rapport fih studju dwar l-impatt ekonomiku tal-proċeduri
ġuridiċi u amministrattivi għall-falliment u l-opportunitajiet
għal ċans ieħor wara l-falliment fi 33 pajjiż Ewropew (27
Stat Membru tal-UE flimkien mal-Islanda, in-Norveġja, il-Kroazja,
it-Turkija, is-Serbja u l-Montenegro). [9] Ara
"A second chance for entrepreneurs: prevention of bankruptcy,
simplification of bankruptcy procedures and support for a fresh start",
Rapport tal-Grupp Espert, il-Kummissjoni Ewropea, DĠ
għall-Intrapriżi u l-Industrija, Jannar 2011. [10] Dokument
tal-Kunsill tal-Unjoni Ewropea 10975/11. [11] Hemm
bżonn ċar li ssir distinzjoni bejn fallimenti "onesti" u
fallimenti frodolenti u biex wieħed jevita kjarament milli
jħeġġeġ lil dan tal-aħħar. [12] COM(2008) 394 finali.
Dan ġie preċedut minn Komunikazzjoni bl-isem "Negħlbu
l-istigma tal-falliment kummerċjali – lejn politika li tagħti
opportunità oħra", COM(2007) 584final. [13] Prinċipju
II: "Żgura li intraprendituri onesti li jkunu ffaċċaw
il-falliment ikunu jistgħu jieħdu ċans ieħor malajr". [14] Din kienet
rakkomandazzjoni fir-rapport imsemmi hawn fuq tal-grupp ta' esperti dwar
ċans ieħor. [15] COM(2011) 78 finali. [16] "A
second chance for entrepreneurs: prevention of bankruptcy, simplification of
bankruptcy procedures and support for a fresh start", ara n-nota 9
f'qiegħ il-paġna.