(1)

Ir-Regolament tal-Kummissjoni (UE) Nru 142/2011 (2) jistabbilixxi regoli għas-saħħa pubblika u tal-annimali għat-tqegħid fis-suq u l-esportazzjoni ta’ prodotti derivati.

(2)

L-iżvilupp mgħaġġel tas-settur tal-produzzjoni tal-insetti rriżulta f’ammont sinifikanti ta’ eskrementi tal-insetti li, fin-nuqqas ta’ regoli armonizzati tal-Unjoni, jintremew b’mod differenti f’kull Stat Membru. Sabiex tiġi żgurata l-valorizzazzjoni tal-eskrementi tal-insetti bħala fertilizzanti, huwa meħtieġ li jiġu stabbiliti r-regoli tal-Unjoni.

(3)

Għall-fini tar-Regolament (UE) Nru 142/2011, jenħtieġ li “frass” jiġi ddefinit bħala t-taħlita ta’ eskrementi tal-insetti b’partijiet ta’ insetti mejta u s-substrat tal-għalf. Il-larva tal-insetti, li hija użata b’mod komuni għall-produzzjoni tal-proteina pproċessata tal-annimali jew għall-konsum mill-bniedem, tgħix fil-frass. Jenħtieġ li tiddaħħal definizzjoni ta’ “frass” fl-Anness I tar-Regolament (UE) Nru 142/2011 sabiex jiġu allinjati r-rekwiżiti għat-trattament u għat-tqegħid fis-suq tal-frass mar-rekwiżiti għad-demel ipproċessat. Għalhekk, jenħtieġ li l-Anness I tar-Regolament (UE) Nru 142/2011 jiġi emendat skont dan.

(4)

Il-ġbir f’waqtu ta’ karkassi waħedhom ta’ annimal tar-razzett mhux ruminanti mhux dejjem ikun ekonomikament fattibbli, b’mod partikolari fir-rigward tal-karkassi miġbura minn irziezet żgħar. Għaldaqstant, l-Anness IX, il-Kapitolu V tar-Regolament (UE) Nru 142/2011 jipprevedi metodi ta’ konteniment biex jiġi żgurat il-ħżin sikur ta’ ċerti annimali tar-razzett mhux ruminanti mejtin sal-ġbir. Il-metodu ta’ konteniment “Idroliżi u r-rimi sussegwenti” attwalment ikopri biss il-karkassi tal-annimali porċini. Huwa xieraq li dak il-metodu ta’ konteniment jiġi estiż biex jinkludi wkoll il-karkassi tat-tjur u tal-lagomorfi mrobbija. Għaldaqstant, jenħtieġ li l-Anness IX, il-Kapitolu V, it-Taqsima 2.B, il-punt 2 tar-Regolament (UE) Nru 142/2011 jiġi emendat skont dan.

(5)

F’konformità mal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (Ftehim dwar il-Ħruġ), u b’mod partikolari l-Artikolu 5(4) tal-Protokoll dwar l-Irlanda/l-Irlanda ta’ Fuq flimkien mal-Anness 2 ta’ dak il-Protokoll, ir-Regolament (KE) Nru 1069/2009, kif ukoll l-atti tal-Kummissjoni bbażati fuqu, japplikaw għar-Renju Unit u fir-Renju Unit fir-rigward tal-Irlanda ta’ Fuq wara tmiem il-perjodu ta’ tranżizzjoni previst fil-Ftehim dwar il-Ħruġ.

(6)

Peress li l-perjodu ta’ tranżizzjoni previst fil-Ftehim dwar il-Ħruġ spiċċa fil-31 ta’ Diċembru 2020, jenħtieġ li l-Anness IX, il-Kapitolu V, it-Taqsima 2.B, il-punt 1 tar-Regolament (UE) Nru 142/2011 jiġi emendat sabiex jissostitwixxi r-referenza għar-Renju Unit fil-lista tal-Istati Membri awtorizzati biex japplikaw il-metodu ta’ konteniment b’referenza għar-Renju Unit fir-rigward tal-Irlanda ta’ Fuq. Barra minn hekk, jenħtieġ li r-referenzi għar-Renju Unit fl-Anness IX, il-Kapitolu V, it-Taqsima 2.A tar-Regolament (UE) Nru 142/2011 u fit-Tabella 3 tal-Anness XIV, il-Kapitolu II, it-Taqsima 11 ta’ dak ir-Regolament jitħassru.

(7)

Fit-8 ta’ Ottubru 2015, l-Awtorità Ewropea dwar is-Sigurtà fl-Ikel (EFSA) ippubblikat opinjoni xjentifika dwar il-profil tar-riskju relatat mal-produzzjoni u l-konsum ta’ insetti bħala ikel u għalf (3). Fost diversi speċijiet ta’ insetti, l-EFSA vvalutat id-dud tal-ħarir bħala sors possibbli għall-produzzjoni tal-proteina pproċessata tal-annimali. Is-serikultura għandha tradizzjoni antika f’ċerti reġjuni tal-Unjoni. Peress li d-dud tal-ħarir domestiku jikkonsma biss il-weraq tat-tut u taċ-ċawsli (Morus alba u Morus nigra), m’hemmx riskju ta’ kontaminazzjoni mal-għalf ta’ oriġini tal-annimali, li mhuwiex awtorizzat għall-għalf tal-insetti. Jenħtieġ għalhekk li jiġi awtorizzat għall-ipproċessar fi proteina pproċessata tal-annimali maħsuba għall-manifattura tal-għalf għall-annimali mrobbija, ladarba jkun inġabar il-ħarir. Huwa xieraq li d-dud tal-ħarir (Bombyx mori) jiżdied mal-lista ta’ speċijiet ta’ insetti awtorizzata għall-produzzjoni ta’ proteina pproċessata tal-annimali maħsuba għall-manifattura ta’ għalf għall-annimali mrobbija. Għalhekk, jenħtieġ li l-Anness X tar-Regolament (UE) Nru 142/2011 jiġi emendat skont dan.

(8)

L-Anness XI tar-Regolament (UE) Nru 142/2011 jistabbilixxi r-rekwiżiti għat-tqegħid fis-suq tad-demel. Wara l-introduzzjoni tad-definizzjoni ta’ “frass” fl-Anness I ta’ dak ir-Regolament, jenħtieġ li r-rekwiżiti tat-tqegħid fis-suq tal-frass ipproċessat jiżgura l-kummerċ sikur fil-frass ipproċessat. Għaldaqstant, jenħtieġ li r-rekwiżiti stabbiliti f’dak l-Anness ikopru wkoll il-frass. Għalhekk, jenħtieġ li l-Anness XI tar-Regolament (UE) Nru 142/2011 jiġi emendat skont dan.

(9)

Jenħtieġ li l-Istati Membri li attwalment japplikaw il-miżuri nazzjonali għall-ipproċessar tal-frass, jallinjaw il-miżuri nazzjonali tagħhom mal-metodu stabbilit fl-Anness XI tar-Regolament (UE) Nru 142/2011, kif emendat b’dan ir-Regolament. Jenħtieġ li dan ir-Regolament jipprevedi perjodu ta’ tranżizzjoni ta’ 12-il xahar.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,