32020R1148

Language
- My EUR-Lex
- Sign in
- Register
- My recent searches (0)

This document is an excerpt from the EUR-Lex website

Search tips

Need more search options? Use the Advanced search

EUROPA
EUR-Lex home
Regolament implimentattiv - 2020/1148 - EN - EUR-Lex

Document 32020R1148

Help

Regolament ta’ Implimentazzjoni tal-Kummissjoni (UE) 2020/1148 tal-31 ta’ Lulju 2020 li jistabbilixxi l-ispeċifikazzjonijiet metodoloġiċi u tekniċi f’konformità mar-Regolament (UE) 2016/792 tal-Parlament Ewropew u tal-Kunsill fir-rigward tal-indiċijiet armonizzati tal-prezzijiet għall-konsumatur u l-indiċi tal-prezzijiet tad-djar (Test b’rilevanza għaż-ŻEE)

C/2020/5166

OJ L 252, 4.8.2020, p. 12–23 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force: This act has been changed. Current consolidated version: 01/01/2024

ELI: http://data.europa.eu/eli/reg_impl/2020/1148/oj

Date of document:: 31/07/2020; Data ta' adozzjoni
Date of effect:: 24/08/2020; Dħul fis-seħħ Data tal-pubblikazzjoni +20 Ara Art. 29
Date of end of validity:: No end date

Author:: Il-Kummissjoni Ewropea, Eurostat
Responsible body:: Eurostat, ESTAT
Form:: Regolament implimentattiv
Additional information:: Rilevanza għaż-ŻEE

Treaty:

Trattat dwar il-Funzjonament tal-Unjoni Ewropea

Legal basis:

32016R0792 - A03P10 32016R0792 - A03P6 32016R0792 - A03P8 32016R0792 - A03P9 32016R0792 - A04P4 32016R0792 - A07P6 32016R0792 - A09P4

Link

Select all documents mentioning this document

Modifies:

Relation	Act	From
Repeal	31996R1749	24/08/2020
Repeal	31996R2214	24/08/2020
Repeal	31998R1687	24/08/2020
Implicit repeal	31998R1688	24/08/2020
Repeal	31998R2646	24/08/2020
Repeal	31999R1617	24/08/2020
Implicit repeal	31999R1749	24/08/2020
Repeal	31999R2166	24/08/2020
Repeal	32000R2601	24/08/2020
Repeal	32000R2602	24/08/2020
Repeal	32001R1920	24/08/2020
Repeal	32001R1921	24/08/2020
Repeal	32005R1708	24/08/2020
Repeal	32006R0701	24/08/2020
Implicit repeal	32007R1334	24/08/2020
Repeal	32009R0330	24/08/2020
Repeal	32010R1114	24/08/2020
Repeal	32013R0093	24/08/2020
Implicit repeal	32013R0119	24/08/2020
Implicit repeal	32015R2010	24/08/2020

Modified by:

Relation	Act	Comment	Subdivision concerned	From
Modified by	32023R1470	Tħassir	artikolu 27 paragrafu 2	07/08/2023
Modified by	32023R1470	Tħassir	artikolu 22	07/08/2023
Modified by	32023R1470	Sostituzzjoni	artikolu 1	07/08/2023
Modified by	32023R1470	Tħassir	artikolu 23	07/08/2023
Modified by	32023R1470	Tħassir	artikolu 24	07/08/2023
Modified by	32023R1470	Tħassir	artikolu 25	07/08/2023

Instruments cited:

Link

EUROVOC descriptor:

Subject matter:

Politika ekonomika u monetarja

Directory code:

10.20.10.00 Politika ekonomika u monetarja u l-moviment liberu tal-kapital / Politika monetarja / Dispożizzjonijiet monetarji istituzzjonali

HTML

PDF

Official Journal

4.8.2020

Il-Ġurnal Uffiċjali tal-Unjoni Ewropea

L 252/12

REGOLAMENT TA’ IMPLIMENTAZZJONI TAL-KUMMISSJONI (UE) 2020/1148

tal-31 ta’ Lulju 2020

li jistabbilixxi l-ispeċifikazzjonijiet metodoloġiċi u tekniċi f’konformità mar-Regolament (UE) 2016/792 tal-Parlament Ewropew u tal-Kunsill fir-rigward tal-indiċijiet armonizzati tal-prezzijiet għall-konsumatur u l-indiċi tal-prezzijiet tad-djar

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/792 tal-Parlament Ewropew u tal-Kunsill tal-11 ta’ Mejju 2016 dwar l-indiċijiet armonizzati tal-prezzijiet għall-konsumatur u l-indiċi armonizzat tal-prezzijiet tad-djar, u li jħassar ir-Regolament tal-Kunsill (KE) Nru 2494/95 (1), u b’mod partikolari l-Artikoli 3(6), 3(8), 3(9), 3(10), 4(4), 7(6) u 9(4) tiegħu.

Billi:

(1)

Ir-Regolament (UE) 2016/792 jistabbilixxi qafas komuni għall-produzzjoni tal-indiċi armonizzat tal-prezzijiet għall-konsumatur (HICP), l-indiċi armonizzat tal-prezzijiet għall-konsumatur b’rati tat-taxxa kostanti (HICP-CT), l-indiċi tal-prezzijiet tad-djar okkupati mis-sidien (OOH) u l-indiċi tal-prezzijiet tad-djar (HPI).

(2)

B’konformità mal-Artikolu 12(3) tar-Regolament (UE) 2016/792, il-Kummissjoni jenħtieġ tintegra, sa fejn ikun kompatibbli ma’ dak ir-Regolament, id-dispożizzjonijiet rilevanti tar-Regolament tal-Kummissjoni (KE) Nru 1749/96 (2) u (KE) Nru 2214/96 (3), ir-Regolament tal-Kunsill (KE) Nru 1687/98 (4), ir-Regolament tal-Kummissjoni (KE) Nru 2646/98 (5), u (KE) Nru 1617/1999 (6), ir-Regolament tal-Kunsill (KE) Nru 2166/1999 (7), ir-Regolament tal-Kummissjoni (KE) Nru 2601/2000 (8), (KE) Nru 2602/2000 (9) (KE) Nru 1920/2001 (10) (KE) Nru 1921/2001 (11) u (KE) Nru 1708/2005 (12), ir-Regolament tal-Kunsill (KE) Nru 701/2006 (13), ir-Regolament tal-Kummissjoni (KE) Nru 330/2009 (14), (UE) Nru 1114/2010 (15) u (UE) Nru 93/2013 (16) adottati abbażi tar-Regolament tal-Kunsill (KE) Nru 2494/95 (17), filwaqt li tnaqqas, sa fejn hu xieraq, in-numru totali tal-atti ta’ implimentazzjoni.

(3)	L-Istati Membri jenħtieġ jaġġornaw il-piżijiet subindiċi għall-indiċijiet armonizzati kull sena. Għalhekk, jenħtieġ jiġu speċifikati regoli għad-derivazzjoni tal-piżijiet.

(4)	Billi mhux possibbli li jiġu osservati t-tranżazzjonijiet kollha tal-univers fil-mira tal-HICP, jenħtieġ jiġu stabbiliti regoli għall-kampjunar.

(5)	L-HICP ikejjel il-bidliet fil-prezzijiet tal-konsumatur. Biex ikun żgurat li l-kunċett ta’ “prezz” jiġi applikat b’mod armonizzat mill-Istati Membri, jenħtieġ jiġu stabbiliti regoli dwar it-trattament tal-prezzijiet.

(6)	L-HICP jenħtieġ jipprovdi miżura ta’ bidla pura fil-prezzijiet, li ma tkunx affettwata b’bidla fil-kwalità. Għalhekk, jenħtieġ jiġu stabbiliti regoli għas-sostituzzjonijiet u għall-aġġustamenti tal-kwalità.

(7)	L-indiċijiet armonizzati jenħtieġ ikunu indiċijiet ta’ kull sena tat-tip Laspeyres marbuta katina. Għalhekk, jenħtieġ jiġu ddefiniti aggregati elementari u jiġu speċifikati metodi għall-kombinament tal-prezzijiet osservati ħalli jinħolqu indiċijiet elementari tal-prezz.

(8)	Biex tkun żgurata l-kwalità għolja tal-istimi rapidi tal-HICP u biex il-Kummissjoni (il-Eurostat) tkun tista’ tidderivi l-aggregati meħtieġa, l-Istati Membri li l-munita tagħhom hi l-euro jenħtieġ jittrażmettu stimi rapidi skont l-istess tqassim bħall-HICP.

(9)	L-indiċijiet armonizzati u s-subindiċijiet tagħhom li jkunu diġà ġew ippubblikati jistgħu jiġu riveduti. Għalhekk, jenħtieġ jiġu speċifikati l-kundizzjonijiet li skonthom jenħtieġ isiru r-reviżjonijiet.

(10)	Biex jinkisbu riżultati affidabbli u komparabbli mill-Istati Membri kollha, jenħtieġ jiġi stabbilit u jitħaddem qafas metodoloġiku komuni għall-kompilazzjoni tal-HICP-CT.

(11)	L-Istati Membri jenħtieġ jibagħtu l-indiċi tal-prezzijiet tal-OOH u tal-HPI skont tqassim dettaljat.

(12)	L-Istati Membri jenħtieġ jibagħtu d-data u l-metadata lill-Kummissjoni (il-Eurostat) f’konformità ma’ standards u proċeduri ta’ skambju speċifikati.

(13)	Fis-sistema Ewropea tal-istatistika, jenħtieġ jinħolqu gwida u rakkomandazzjonijiet prattiċi dwar kwistjonijiet rilevanti mal-kejl u l-kompilazzjoni tal-HICP, b’mod partikolari dwar l-aġġustament tal-kwalità, il-kompilazzjoni tal-indiċi u t-trattament tal-prezzijiet.

(14)

Ir-Regolamenti (KE) Nru 1749/96, (KE) Nru 2214/96, (KE) Nru 1687/98, (KE) Nru 2646/98, (KE) Nru 1617/1999, (KE) Nru 2166/1999, (KE) Nru 2601/2000, (KE) Nru 2602/2000, (KE) Nru 1920/2001, (KE) Nru 1921/2001, (KE) Nru 1708/2005, (KE) Nru 701/2006, (KE) Nru 330/2009, (UE) Nru 1114/2010 u (UE) Nru 93/2013 jenħtieġ jitħassru.

(15)	Il-miżuri previsti f’dan ir-Regolament huma skont l-opinjoni tal-Kumitat tas-Sistema Ewropea tal-Istatistika,

ADOTTAT DAN IR-REGOLAMENT:

KAPITOLU 1

DISPOŻIZZJONIJIET ĠENERALI

Artikolu 1

Suġġett

Dan ir-Regolament jistabbilixxi kundizzjonijiet uniformi biex jinħolqu:

(a)	l-indiċi armonizzat tal-prezzijiet għall-konsumatur (HICP) u l-indiċi armonizzat tal-prezzijiet għall-konsumatur b’rati tat-taxxa kostanti (HICP-CT); u

(b)	l-indiċi tal-prezzijiet tad-djar okkupati mis-sidien (OOH) u l-indiċi tal-prezzijiet tad-djar (HPI).

Artikolu 2

Definizzjonijiet

Għall-finijiet ta’ dan ir-Regolament, japplikaw id-definizzjonijiet li ġejjin:

(1)	“sehem ta’ nefqa” tfisser persentaġġ tat-total tan-nefqa monetarja finali tal-unitajiet domestiċi għall-konsum, kif speċifikat fl-Anness;

(2)	“piż tas-subindiċi” tfisser il-piż għal kull kategorija tal-klassifikazzjoni Ewropea tal-konsum individwali skont l-għan (ECOICOP), kif stabbilit fl-Anness I tar-Regolament (UE) 2016/792, inkluż fl-HICP;

(3)	“univers fil-mira” tal-HICP tfisser it-tranżazzjonijiet kollha inklużi fin-nefqa monetarja finali tal-unitajiet domestiċi għall-konsum;

(4)	“offerta tal-prodott” tfisser prodott speċifikat mill-karatteristiċi tiegħu, il-ħin u l-post tax-xiri u t-termini tal-provvista, u li għalih jiġi osservat prezz;

(5)	“prodott omoġenju” tfisser sett ta’ offerti tal-prodott li fosthom ma jkunx hemm differenzi sinifikanti fil-kwalità u li għalih jiġi kkalkulat prezz medju;

(6)	“prodott individwali” tfisser offerta tal-prodott jew prodott omoġenju;

(7)	“kampjun fil-mira” tfisser sett ta’ prodotti individwali li jappartjenu għal tranżazzjonijiet mill-univers fil-mira u li għalihom għandha tintuża d-data dwar il-prezz biex jiġi kkompilat l-HICP;

(8)	“differenza fil-kwalità” tfisser differenza bejn il-karatteristiċi, il-ħin, il-post tax-xiri jew it-termini tal-provvista ta’ żewġ prodotti individwali, meta dan ikun rilevanti mill-perspettiva tal-konsumatur;

(9)	“prodott ta’ sostituzzjoni” tfisser prodott individwali li jissostitwixxi prodott individwali ieħor fil-kampjun fil-mira;

(10)	“aġġustament tal-kwalità” tfisser proċedura ta’ żieda jew tnaqqis tal-prezz osservat ta’ prodott ta’ sostituzzjoni jew tal-prodott sostitwit bil-valur tad-differenza fil-kwalità bejniethom;

(11)	“prezz osservat” tfisser il-prezz għall-konsumatur ta’ prodott individwali, kif użat mill-Istat Membru għall-kumpilazzjoni tal-HICP;

(12)	“prezz stmat” tfisser prezz ibbażat fuq proċedura ta’ stima xierqa;

(13)	“aggregat elementari” tfisser l-iżgħar aggregat użat f’indiċi tat-tip Laspeyres;

(14)	“indiċi elementari tal-prezz” tfisser indiċi għal aggregat elementari jew indiċi għal strat f’aggregat elementari;

(15)	“tranżittività” tfisser il-proprjetà meta indiċi li jqabbel il-perjodi (a) u (b) indirettament tul il-perjodu (c) ikun identiku għal wieħed li jqabbel il-perjodi (a) u (b) direttament;

(16)	“riversibbiltà tal-ħin” tfisser il-proprjetà meta l-indiċi bejn il-perjodi (a) u (b) ikun daqs l-invers tal-istess indiċi bejn il-perjodi (b) u (a);

(17)

“rimborż” tfisser pagament parzjali jew sħiħ minn gvern jew istituzzjonijiet mingħajr skop ta’ qligħ li jservu lill-unitajiet domestiċi, ta’ xirjiet approvati mill-unitajiet domestiċi ta’ prodotti speċifikati, kif definit fil-paragrafi 4.108-4.110 tal-Anness A tar-Regolament (UE) Nru 549/2013 tal-Parlament Ewropew u tal-Kunsill (18) (ESA 2010);

(18)	“inċitament” tfisser bidla, ħafna drabi temporanja, fil-karatteristiċi ta’ prodott individwali billi tiżdied il-kwantità tal-prodott, jingħata prodott individwali ieħor mingħajr ħlas jew jiġu offruti benefiċċji oħra lill-konsumatur;

(19)	“primjums attwali” tfisser l-ammonti mħallsa għal polza tal-assigurazzjoni speċifika biex tinkiseb kopertura tal-assigurazzjoni għal perjodu taż-żmien iddikjarat;

(20)	“ħlas impliċitu għas-servizz” tfisser l-output tal-kumpaniji tal-assigurazzjoni, kif definit fil-paragrafu 16.51 tal-Anness A tal-ESA 2010;

(21)	“pretensjonijiet tal-assigurazzjoni mhux tal-ħajja” tfisser pretensjonijiet kif definiti fil-paragrafu 4.114 tal-Anness A tal-ESA 2010;

(22)

“prodott staġunali” tfisser prodott individwali li jkun disponibbli għax-xiri jew li jinxtara b’ammonti sinifikanti biss f’parti minn sena u b’xejra rikorrenti. F’xahar partikolari, il-prodott jitqies li jkun fl-istaġun jew mhux fl-istaġun. Il-perjodi fl-istaġun jistgħu jvarjaw minn sena għall-oħra.

(23)	“prezz tipiku” tfisser prezz stmat għal prodott staġunali li mhux eċċezzjonali bħal prezz tal-bejgħ fi tmiem l-istaġun;

(24)	“metodu ta’ imputazzjoni staġunali” tfisser trattament li permezz tiegħu l-prezzijiet tal-prodotti staġunali li mhumiex fl-istaġun jiġu stmati bi stima kontrostaġunali jew staġunali kollha;

(25)

“stima kontrostaġunali” tfisser proċedura biex jinkiseb prezz stmat għal prodott staġunali ħalli:

(a)	fl-ewwel xahar mhux fl-istaġun, jintuża prezz tipiku mill-perjodu preċedenti fl-istaġun;

(b)	fix-xhur ta’ wara li mhumiex fl-istaġun, il-prezz stmat ikun daqs il-prezz tax-xahar preċedenti aġġustat bil-bidla medja fil-prezzijiet osservati fuq il-prodotti staġunali fl-istaġun kollha fl-istess grupp, klassi, sottoklassi tal-ECOICOP, jew fl-istess aggregat f’xi livell taħt is-sottoklassi;

(26)

“stima għalkollox staġunali” tfisser proċedura biex jinkiseb prezz stmat għal prodott staġunali ħalli:

(a)	fl-ewwel xahar li mhux fl-istaġun, jintuża prezz tipiku mill-perjodu preċedenti fl-istaġun;

(b)	fix-xhur ta’ wara li mhux fl-istaġun, il-prezz stmat ikun daqs il-prezz tax-xahar preċedenti aġġustat bil-bidla medja fil-prezzijiet osservati fuq il-prodotti individwali kollha fl-istess grupp, klassi, sottoklassi tal-ECOICOP, jew fl-istess aggregat f’xi livell taħt is-sottoklassi;

(27)	“metodu tal-piż staġunali” tfisser trattament ta’ prodotti staġunali li matulu l-piżijiet tal-prodotti staġunali li mhumiex fl-istaġun ikunu żero jew ikunu stabbiliti għal żero;

(28)	“tariffa” tfisser lista ta’ prezzijiet u kundizzjonijiet għal prodott li tkun differenzjata skont il-kwantitajiet mixtrija, il-ħin tal-konsum jew il-karatteristiċi tax-xerrejja;

(29)	“reviżjoni” tfisser bidla fl-indiċijiet jew fil-piżijiet ippubblikati mill-Kummissjoni (il-Eurostat). Bidla bejn l-istima rapida u l-HICP għall-istess xahar ta’ referenza ma għandhiex titqies bħala reviżjoni;

(30)	“data provviżorja” tfisser indiċijiet jew piżijiet li Stat Membru hu mistenni jiffinalizza f’xahar aktar tard;

(31)	“settur tal-gvern ġenerali” tfisser gvern ċentrali, gvern statali, gvern lokali u fondi tas-sigurtà soċjali, kif definit fil-paragrafi 2.113-2.117 tal-Anness A tal-ESA 2010;

(32)	“taxxi fuq prodotti” tfisser taxxi li huma pagabbli għal kull unità ta’ prodott jew servizz partikolari prodott jew fi tranżazzjoni, kif definit fil-paragrafi 4.16-4.20 tal-Anness A tal-ESA 2010;

(33)

“taxxi individwali fil-kamp ta’ applikazzjoni għall-HICP-CT” tfisser taxxi individwali fuq prodotti relatati mal-konsum domestiku u li inklużi fil-kategoriji li ġejjin, definiti fit-Tabella 9 (“Dħul dettaljat mit-taxxa u mill-kontribuzzjonijiet soċjali skont it-tip ta’ taxxa jew kontribuzzjoni soċjali u subsettur li jinkludi l-lista ta’ taxxi u kontribuzzjonijiet soċjali skont il-klassifikazzjoni nazzjonali”) fl-Anness B tal-ESA 2010:

(a)	D.211 Taxxi tat-tip tal-valur miżjud (VAT);

(b)	D.2122e Taxxi fuq servizzi speċifiċi;

(c)	D.214a Dazji tas-sisa u t-taxxi fuq il-konsum (għajr dawk inklużi fit-taxxi u d-dazji fuq l-importazzjonijiet);

(d)	D.214d Taxxi fuq ir-reġistrazzjoni tal-karozzi;

(e)	D.214e Taxxi fuq id-divertiment;

(f)	D.214 g Taxxi fuq primjums tal-assigurazzjoni;

(g)	D.214h Taxxi oħra fuq servizzi speċifiċi;

(h)	D214 l Taxxi oħra fuq prodotti li mhumiex ikklassifikati x’imkien ieħor.

KAPITOLU 2

INDIĊI ARMONIZZAT TAL-PREZZIJIET GĦALL-KONSUMATUR (HICP) U INDIĊI ARMONIZZAT TAL-PREZZIJIET GĦALL-KONSUMATUR B’RATI TAT-TAXXA KOSTANTI (HICP-CT);

Artikolu 3

Piżijiet

1. L-Istati Membri għandhom jieħdu s-subindiċi u l-piżijiet aggregati elementari użati fl-indiċi għas-sena t kif ġej:

(a)

Sal-31 ta’ Diċembru 2022, għandhom jintużaw id-data tal-kontijiet nazzjonali għas-sena t-2 u kull informazzjoni disponibbli u rilevanti minn stħarriġ baġitarju tal-unitajiet domestiċi u minn sorsi oħra tad-data biex jinkisbu ishma tan-nefqa tas-sottoklassi u jinqasmu fost l-aggregati elementari tas-sottoklassi. Mill-1 ta’ Jannar 2023, għandha tintuża d-data tal-kontijiet nazzjonali għas-sena t-2, li tista’ tiġi kkumplimentata b’data minn stħarriġ baġitarju riċenti tal-unitajiet domestiċi u minn sorsi oħra, biex jinkisbu ishma tan-nefqa tas-sottoklassi u jinqasmu fost l-aggregati elementari tas-sottoklassi;

(b)	L-ishma tan-nefqa għas-sena t-2 għandhom jiġu riveduti u aġġornati biex ikunu rappreżentattivi għas-sena t-1;

(c)	L-ishma tan-nefqa għall-aggregati elementari għandhom jiġu aġġustati b’bidla xierqa fil-prezz bejn is-sena t-1 u Diċembru tas-sena t-1.

2. Il-piżijiet tas-subindiċi għandhom jinżammu kostanti tul is-sena kalendarja kollha.

3. Il-piż ta’ aggregat elementari għandu jinżamm kostanti tul is-sena kalendarja, diment li l-lista tal-aggregati elementari fi ħdan sottoklassi tiġi aġġustata biex tkun tirrifletti bidliet sinifikanti fl-univers fil-mira.

4. Il-piż tas-subindiċi għal diviżjoni, grupp jew klassi tal-ECOICOP għandu jkun daqs it-total tal-piżijiet tas-subindiċi tal-kategoriji kostitwenti tiegħu. It-total tal-piżijiet tas-subindiċi kollha fi kwalunkwe livell tal-ECOICOP għandu jkun 1 000.

5. Il-piż tas-subindiċi għal kwalunkwe sottoklassi għandu jkun daqs it-total tal-piżijiet tal-aggregati elementari ta’ dik is-sottoklassi.

6. Il-piżijiet tas-subindiċi relatati mal-assigurazzjoni mhux tal-ħajja għandhom jiġu derivati min-nefqa aggregata tal-unitajiet domestiċi fuq ħlasijiet impliċiti għas-servizz.

7. In-nefqa tal-konsum iffinanzjata mill-pretensjonijiet tal-assigurazzjoni mhux tal-ħajja, inkluż il-pagamenti li jagħmlu direttament il-kumpaniji tal-assigurazzjoni, għandha tkun inkluża fil-piżijiet tal-subindiċi tal-kategoriji rilevanti tal-ECOICOP.

Artikolu 4

Kampjunar u rappreżentanza

1. L-Istati Membri għandhom jagħmlu kampjun fil-mira li jkun rappreżentattiv tal-univers fil-mira billi jiddefinixxu aggregati elementari u jagħżlu prodotti individwali għal dawn l-aggregati elementari.

2. In-numru ta’ prodotti individwali u aggregati elementari għandu jiddependi mill-piż tas-sottoklassi u l-varjanza tal-movimenti tal-prezz tal-prodotti individwali li jappartjenu għaliha.

3. Maż-żmien, l-Istati Membri għandhom jiżguraw li l-kampjun fil-mira jibqa’ rappreżentattiv tal-univers fil-mira billi mill-inqas iwettqu reviżjoni u aġġornament annwali tal-kampjun fil-mira, u billi jagħżlu l-prodotti ta’ sostituzzjoni.

4. Il-prodotti li għalihom is-sehem tan-nefqa jkun mill-inqas parti waħda kull elf għandhom jiġu rrappreżentati fil-kampjun fil-mira.

Artikolu 5

Trattament tal-prezzijiet

1. L-Istati Membri għandhom jużaw il-prezzijiet osservati biex jikkumpilaw l-HICP. Għandhom jużaw il-prezzijiet stmati biss għall-finijiet stabbiliti fl-Artikoli 9, 11 u 14.

2. Il-prezzijiet osservati għall-prodotti tas-saħħa, tal-edukazzjoni u tal-protezzjoni soċjali għandhom ikunu netti mir-rimborżi.

3. Il-bidliet fil-prezzijiet osservati jew fil-kundizzjonijiet ta’ tariffa għandhom jintwerew bħala bidliet fil-prezz fl-HICP.

4. Meta l-prezzijiet osservati jkunu marbuta mal-indiċi, il-bidliet li jsiru minħabba bidliet fl-indiċi għandhom jintwerew bħala bidliet fil-prezz fl-HICP.

5. Jekk l-introjtu tal-unitajiet domestiċi hu kundizzjoni li tiddetermina l-prezz, il-bidliet fil-prezzijiet osservati li jsiru minħabba bidliet fl-introjtu tal-unitajiet domestiċi għandhom jintwerew bħala bidliet fil-prezz fl-HICP.

6. Il-prezzijiet osservati għall-assigurazzjoni għandhom ikunu primjums attwali.

7. Jekk prodott individwali jkun disponibbli għall-konsumaturi mingħajr ħlas u sussegwentement jiġi impost xi ħlas, dan għandu jintwera bħala żieda fil-prezz fl-HICP. Min-naħa l-oħra, jekk jintalab prezz għal prodott individwali li sussegwentement jitqiegħed għad-dispożizzjoni tal-konsumaturi mingħajr ħlas, dan għandu jintwera bħala tnaqqis fil-prezz fl-HICP.

Artikolu 6

Skonti u inċitamenti

1. L-Istati Membri għandhom iqisu l-iskonti li:

(a)	jistgħu jiġu attribwiti għal prodott individwali; u

(b)	jistgħu jintalbu waqt ix-xiri.

Meta possibbli, għandhom jitqiesu l-iskontijiet disponibbli biss għal grupp ristrett ta’ konsumaturi.

2. L-inċitamenti għandhom jiġu trattati skont l-Artikoli 10 u 11.

Artikolu 7

Ħlasijiet ta’ servizzi proporzjonati għal prezzijiet tat-tranżazzjoni

1. L-HICP għandu jinkludi l-ħlasijiet imposti direttament fuq il-konsumaturi għas-servizz mogħti u jistgħu jiġu espressi bħala tariffa fissa jew proporzjon tal-prezz tat-tranżazzjoni. Jekk il-prezz ta’ servizz jiġi ddeterminat bħala proporzjon tal-prezz tat-tranżazzjoni, il-proporzjon multiplikat bil-prezz tat-tranżazzjoni ta’ unità rappreżentattiva għandu jintuża bħala prezz osservat.

2. Il-bidliet fit-tariffa tas-servizz li jsiru minħabba bidliet fil-prezz tat-tranżazzjoni ta’ unità rappreżentattiva għandhom jintwerew bħala bidliet fil-prezz fl-HICP.

3. Jekk bidla fil-prezz tat-tranżazzjoni ta’ unità rappreżentattiva ma tkunx tista’ titkejjel, din għandha tiġi stmata b’indiċi xieraq tal-prezzijiet.

Artikolu 8

Osservazzjoni tal-prezzijiet

1. Prezz osservat għal oġġett għandu jkun inkluż fl-HICP għax-xahar meta jkunu jistgħu jsiru t-tranżazzjonijiet b’dak il-prezz.

2. Prezz osservat għal servizz għandu jiġi inkluż fl-HICP għax-xahar meta jkun jista’ jibda l-konsum tas-servizz.

3. Jekk il-prezz ta’ servizz ikun jiddependi fuq il-ħin bejn ix-xiri u l-bidu tas-servizz, l-Istati Membri għandhom iqisu l-prezzijiet li huma rappreżentattivi għax-xiri tas-servizz.

4. Il-prezzijiet osservati għandhom jirreferu għal mill-inqas ġimgħa tax-xogħol (1) waħda, f’nofs ix-xahar jew qrib nofs ix-xahar.

5. Jekk ikun magħruf li l-prezzijiet għal prodott individwali huma volatili fi żmien xahar, il-prezzijiet osservati għandhom jirreferu għal aktar minn ġimgħa (1) waħda.

Artikolu 9

Stima tal-prezzijiet

1. Jekk il-prezz ta’ prodott individwali fil-kampjun fil-mira ma jkunx jista’ jiġi osservat, il-prezz stmat għandu jintuża għal mhux aktar minn xahrejn, u wara għandu jintgħażel prodott ta’ sostituzzjoni. Dan il-paragrafu ma għandux japplika għall-prodotti staġunali jew għal prodotti individwali oħra li mistennija jerġgħu jkunu disponibbli.

2. Prezz osservat qabel ma għandux jintuża bħala prezz stmat diment li dan ma jkunx jista’ jiġi ġġustifikat bħala stima xierqa.

Artikolu 10

Sostituzzjonijiet

1. L-Istati Membri għandhom jagħżlu prodott ta’ sostituzzjoni li jkun simili għall-prodott li jisparixxi, filwaqt li jiżguraw li l-kampjun fil-mira jibqa’ rappreżentattiv.

2. L-Istati Membri ma għandhomx jagħżlu prodotti ta’ sostituzzjoni abbażi ta’ prezz simili.

Artikolu 11

Aġġustament tal-kwalità

1. Jekk ma jkunx hemm differenza fil-kwalità bejn prodott sostitwit u s-sostitut tiegħu, l-Istati Membri għandhom iqabblu direttament il-prezzijiet osservati. Inkella, l-Istati Membri għandhom jagħmlu aġġustament tal-kwalità.

2. L-Istati Membri għandhom jagħmlu aġġustament tal-kwalità daqs id-differenza sħiħa fil-prezz bejn il-prodott sostitwit fix-xahar m-1 u s-sostitut tiegħu fix-xahar m, diment li dan ikun jista’ jiġi ġġustifikat bħala stima xierqa tad-differenza fil-kwalità.

Artikolu 12

Indiċijiet elementari tal-prezz

1. Il-prezzijiet ta’ prodotti individwali għandhom jiġu aggregati biex jinkisbu indiċijiet elementari tal-prezz b’xi waħda minn dawn li ġejjin:

(a)	formula tal-indiċi li tiżgura tranżittività. L-indiċi tal-prezzijiet tal-perjodi preċedenti ma għandux jiġi rivedut meta jintużaw il-formuli tal-indiċi tat-tranżittività; jew

(b)	formula tal-indiċi li tiżgura r-riversibbiltà tal-ħin u tqabbel il-prezzijiet ta’ prodotti individwali fil-perjodu attwali mal-prezzijiet ta’ dawk il-prodotti fil-perjodu bażi. Il-perjodu bażi ma għandux jinbidel spiss jekk din il-bidla twassal għal ksur sinifikanti tal-prinċipju tat-tranżittività.

2. Formula tal-indiċi li tkun konsistenti ma’ dawk deskritti fil-paragrafu 1 għandha tintuża biex jinkiseb indiċi tal-prezzijiet għal aggregat elementari minn żewġ indiċijiet elementari tal-prezz jew aktar.

Artikolu 13

Integrazzjoni tas-subindiċijiet wara l-perjodu ta’ referenza tal-indiċi

Kull subindiċi li jkun integrat fl-HICP wara l-perjodu ta’ referenza tal-indiċi għandu jintrabat ma’ Diċembru ta’ sena partikolari u jintuża minn Jannar tas-sena ta’ wara.

Artikolu 14

Prodotti staġunali

Jekk jittieħed kampjun ta’ prodotti staġunali f’aggregat elementari, l-Istati Membri għandhom jużaw il-metodu tal-imputazzjoni staġunali jew il-metodu tal-piżijiet staġunali biex jikkumpilaw indiċi tal-prezzijiet għal dak l-aggregat.

Artikolu 15

Tqassim tal-istima rapida

L-Istati Membri li l-munita tagħhom hi l-euro għandhom jibagħtu stimi rapidi lill-Kummissjoni (il-Eurostat) għas-subindiċijiet kollha fl-HICP tagħhom.

Artikolu 16

Tlestija tad- data provviżorja

Meta Stat Membru jibgħat is-subindiċijiet jew il-piżijiet tagħhom bħala provviżorji, dan għandu jiffinalizzahom mat-trażmissjoni tax-xahar ta’ wara.

Artikolu 17

Reviżjonijiet minħabba żbalji

1. L-Istati Membri għandhom jikkoreġu l-iżbalji u jibagħtu s-subindiċijiet riveduti jew il-piżijiet tas-subindiċijiet riveduti lill-Kummissjoni (il-Eurostat) mingħajr dewmien mhux ġustifikat.

2. L-Istati Membri għandhom jipprovdu informazzjoni lill-Kummissjoni (il-Eurostat) dwar il-kawża tal-iżball sa mhux aktar tard minn meta jagħmlu t-trażmissjoni tad-data riveduta.

Artikolu 18

Reviżjonijiet oħra

1. Il-ħin, it-tul u l-integrazzjoni fl-HICP ta’ reviżjonijiet, għajr dawk konformi mal-Artikoli 16 u 17, għandhom jiġu kkoordinati mal-Kummissjoni (il-Eurostat).

2. L-Istati Membri għandhom jipprovdu stimi lill-Kummissjoni (il-Eurostat) tas-subindiċijiet tal-HICP riveduti sa mhux aktar tard minn tliet (3) xhur qabel l-implimentazzjoni ppjanata tar-reviżjoni proposta.

Artikolu 19

Rilaxx tar-reviżjonijiet

Għajr għar-reviżjonijiet konformi mal-Artikolu 16, kull reviżjoni tal-punti kollha tal-HICP għandha ssir pubblika, flimkien ma’ spjegazzjoni, fuq is-sit web tal-korp nazzjonali responsabbli għall-kompilazzjoni tal-HICP.

Artikolu 20

Reviżjonijiet tal-piżijiet tas-subindiċi

Mingħajr preġudizzju għall-Artikoli 16 u 17, il-piżijiet tas-subindiċi ma għandhomx jiġu riveduti.

Artikolu 21

Indiċi armonizzat tal-prezzijiet għall-konsumatur b’rati tat-taxxa kostanti

1. Għandha titqies taxxa individwali fil-kamp ta’ applikazzjoni għall-HICP-CT, jekk l-introjtu annwali tiegħu jkun jirrappreżenta 2 % jew aktar tat-total tat-taxxi individwali kollha fil-kamp ta’ applikazzjoni miġbura mis-settur tal-gvern ġenerali.

2. L-introjtu annwali mit-taxxi meqjus fil-HICP-CT għandu jkopri mill-inqas 90 % tat-total tat-taxxi individwali kollha fil-kamp ta’ applikazzjoni miġbura mis-settur tal-gvern ġenerali.

3. L-HICP-CT għandu jiġi kkompilat bl-istess mod bħall-HICP, ħlief li l-prezzijiet osservati jiġu aġġustati ħalli r-rati tat-taxxa fuq il-prodotti jinżammu kostanti fil-perjodu tal-osservazzjoni, meta mqabbla mal-perjodu ta’ referenza tal-prezzijiet.

4. Il-bidliet fir-rati tat-taxxa għandhom jiġu riflessi fl-HICP-CT:

(a)	tul ix-xahar meta r-rata l-ġdida tiġi applikata għall-prodott individwali u tiġi inkluża fil-prezz osservat; jew

(b)	fl-ewwel xahar sħiħ li għalih tiġi applikata r-rata l-ġdida. Il-bidliet fir-rata li jidħlu fis-seħħ fl-ewwel jum tax-xahar għandhom jiġu riflessi fl-HICP-CT għal dak ix-xahar. Il-bidliet fir-rata li jidħlu fis-seħħ aktar tard tul dak ix-xahar għandhom jiġu riflessi fl-HICP-CT għax-xahar ta’ wara.

KAPITOLU 3

L-INDIĊI TAL-PREZZIJIET TAD-DJAR OKKUPATI MIS-SIDIEN U L-INDIĊI TAL-PREZZIJIET TAD-DJAR

Artikolu 22

Tqassim tal-indiċi tal-prezzijiet tad-djar okkupati mis-sidien

L-indiċi tal-prezzijiet tad-djar okkupati mis-sidien (OOH) għandu jkopri l-kategoriji tan-nefqa li ġejjin:

(a)	O.1. Infiq tal-abitazzjonijiet okkupati mis-sidien

(b)	O.1.1. Akkwisti ta’ abitazzjonijiet;

(c)	O.1.1.1. Abitazzjonijiet ġodda;

(d)	O.1.1.1.1. Xiri ta’ abitazzjonijiet ġodda;

(e)	O.1.1.1.2. Abitazzjonijiet mibnija mill-individwi stess u rinnovazzjonijiet kbar

(f)	O.1.1.2. Abitazzjonijiet eżistenti li huma ġodda għall-unitajiet domestiċi

(g)	O.1.1.3. Servizzi oħra relatati mal-akkwist tal-abitazzjonijiet;

(h)	O.1.2. Sjieda tal-abitazzjonijiet;

(i)	O.1.2.1. Manutenzjoni u tiswijiet kbar;

(j)	O.1.2.2. Assigurazzjoni marbuta mal-abitazzjonijiet;

(k)	O.1.2.3. Servizzi oħra relatati mas-sjieda tal-abitazzjonijiet.

Artikolu 23

Tqassim tal-indiċi tal-prezzijiet tad-djar

L-indiċi tal-prezzijiet tad-djar (HPI) għandu jkopri l-kategoriji tan-nefqa li ġejjin:

(a)	H.1. Xiri ta’ abitazzjonijiet;

(b)	H.1.1. Xiri ta’ abitazzjonijiet ġodda

(c)	H.1.2. Xiri ta’ abitazzjonijiet eżistenti

Artikolu 24

Piżijiet

Kull sena, l-Istati Membri għandhom jikkompilaw u jibagħtu żewġ settijiet ta’ piżijiet lill-Kummissjoni (il-Eurostat), wieħed għall-indiċijiet tal-prezzijiet tad-djar okkupati mis-sidien (OOH) u ieħor għall-indiċijiet tal-prezzijiet tad-djar (HPI), fit-tqassim speċifikat fl-Artikoli 22 u 23.

Artikolu 25

Kompilazzjoni tal-indiċi tal-prezzijiet tad-djar okkupati mis-sidien

L-indiċi tal-prezzijiet tad-djar okkupati mis-sidien (OOH) għandu jkun ibbażat fuq l-approċċ ta’ “akkwiżizzjonijiet netti”, li jkejjel il-bidliet fil-prezzijiet imħallsa mill-konsumaturi għall-akkwist tal-abitazzjonijiet li huma ġodda għall-unitajiet domestiċi u l-bidliet fi spejjeż oħra relatati mas-sjieda u mat-trasferiment tas-sjieda tal-abitazzjonijiet.

KAPITOLU 4

STANDARDS U SKADENZI GĦALL-ISKAMBJI TAD-DATA U TAL-METADATA

Artikolu 26

Standards għall-iskambji tad- data u tal-metadata

1. L-Istati Membri għandhom jibagħtu d-data u l-metadata lill-Kummissjoni (il-Eurostat) b’format elettroniku permezz tas-servizzi tal-punt uniku ta’ dħul skont l-istandards għall-iskambju tad-data u l-metadata statistika.

2. Id-data kunfidenzjali kif definita fir-Regolament (KE) Nru 223/2009 tal-Parlament Ewropew u tal-Kunsill (19) għandha tiġi mmarkata kif xieraq meta tintbagħat lill-Kummissjoni (il-Eurostat).

Artikolu 27

Skadenzi għall-iskambji tal-metadata

1. Kull sena, l-Istati Membri għandhom jirrevedu u jaġġornaw il-metadata tal-HICP tagħhom u tal-HICP-CT tagħhom għas-sena attwali u jibagħtuhom lill-Kummissjoni (il-Eurostat) sal-31 ta’ Marzu.

2. Kull sena, l-Istati Membri għandhom jirrevedu u jaġġornaw l-indiċi tal-prezzijiet tal-OOH tagħhom u l-metadata tal-HPI tagħhom għas-sena attwali u jibagħtuhom lill-Kummissjoni (il-Eurostat) sat-30 ta’ Ġunju.

KAPITOLU 5

DISPOŻIZZJONIJIET FINALI

Artikolu 28

Tħassir

Artikolu 29

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-31 ta’ Lulju 2020.

Għall-Kummissjoni

Il-President

Ursula VON DER LEYEN

(1) ĠU L 135, 24.5.2016, p. 11.

(2) Ir-Regolament tal-Kummissjoni (KE) Nru 1749/96 tad-9 ta’ Settembru 1996 dwar miżuri ta’ implimentazzjoni inizjali għar-Regolament tal-Kunsill (KE) Nru 2494/95 li jikkonċerna indiċi armonizzati tal-prezzijiet tal-konsumatur (ĠU L 229, 10.9.1996, p. 3).

(3) Ir-Regolament tal-Kummissjoni (KE) Nru 2214/96 tal-20 ta’ Novembru 1996 li jikkonċerna indiċi armonizzati tal-prezzijiet għall-konsumatur: trażmissjoni u tixrid ta’ sotto-indiċi tal-HICP (ĠU L 296, 21.11.1996, p. 8).

(4) Ir-Regolament tal-Kunsill (KE) Nru 1687/98 tal-20 ta’ Lulju 1998 li jemenda r-Regolament tal-Kummissjoni (KE) Nru 1749/96 dwar il-kopertura ta’ merkanzija u servizzi tal-indiċi armonizzat tal-prezzijiet għall-konsumatur (ĠU L 214, 31.7.1998, p. 12).

(5) Ir-Regolament tal-Kummissjoni (KEE) Nru 2646/98 tad-9 ta’ Diċembru 1998 li jiffissa regoli dettaljati għall-implementazzjoni tar-Regolament tal-Kunsill (KE) Nru 2494/95 f’dak li għandu x’jaqsam ma’ livelli minimi għat-trattament ta’ tariffi fl-Indiċi Armonizzat tal-Prezzijiet għall-Konsumatur (ĠU L 335, 10.12.1998, p. 30).

(6) Ir-Regolament tal-Kummissjoni (KE) Nru 1617/1999 tat-23 ta’ Lulju 1999 li jistabbilixxi d-dettalji għall-implimentazzjoni tar-Regolament tal-Kunsill (KE) Nru 2494/95 – dwar l-istandards minimi għat-trattament tal-assigurazzjoni fl-Indiċi Armonizzati tal-Prezzijiet għall-Konsumatur u li jimmodifika r-Regolament tal-Kummissjoni (KE) Nru 2214/96 (ĠU L 192, 24.7.1999, p. 9).

(7) Ir-Regolament tal-Kunsill (KE) Nru 2166/1999 tat-8 ta’ Ottubru 1999 li jistabilixxi r-regoli dettaljati għall-implimentazzjoni tar-Regolament (KE) Nru 2494/95 rigward l-istandards minimi għat-trattament ta’ prodotti li għandhom x’jaqsmu mal-oqsma tas-saħħa, l-edukazzjoni u l-protezzjoni soċjali fl-Indiċi Armonizzat tal-Prezzijiet għall-Konsumatur (ĠU L 266, 14.10.1999, p. 1).

(8) Ir-Regolament tal-Kummissjoni (KE) Nru 2601/2000 tas-17 ta’ Novembru 2000 li jistabbilixxi reġoli dettaljati għall-implimentazzjoni tar-Regolament tal-Kunsill (KE) Nru 2494/95 dwar iż-żmien biex jiddaħħlu prezzijiet tax-xiri fl-Indiċi Armonizzat tal-Prezzijiet għall-Konsumatur (ĠU L 300, 29.11.2000, p. 14).

(9) Ir-Regolament tal-Kummissjoni (KE) Nru 2602/2000 tas-17 ta’ Novembru 2000 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 dwar livelli minimi għat-trattament ta’ tnaqqis fil-prezzijiet fl-Indiċi Armonizzat ta’ Prezzijiet għall-Konsumatur (ĠU L 300, 29.11.2000, p. 16).

(10) Ir-Regolament tal-Kummissjoni (KE) Nru 1920/2001 tat-28 ta’ Settembru 2001 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 fir-rigward ta’ standards minimi għat-trattament ta’ ħlasijiet dovuti għal servizzi li jikkorrispondu għall-valuri ta’ tranżazzjoni fl-indiċi armonizzat ta’ prezzijiet tal-konsumatur u li jemenda r-Regolament (KE) Nru 2214/96 (ĠU L 261, 29.9.2001, p. 46).

(11) Ir-Regolament tal-Kummissjoni (KE) Nru 1921/2001 tat-28 ta’ Settembru 2001 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 fir-rigward ta’ standards minimi għat-trattament ta’ ħlasijiet dovuti għal servizzi li jikkorrispondu għall-valuri ta’ tranżazzjoni fl-indiċi armonizzat tal-prezzijiet tal-konsumatur u li jemenda r-Regolament (KE) Nru 2602/2000 (ĠU L 261, 29.9.2001, p. 49).

(12) Ir-Regolament tal-Kummissjoni (KE) Nru 1708/2005 tad-19 ta’ Ottubru 2005 li jistipula regoli ddettaljati għall-implimentazzjoni tar-Regolament tal-Kunsill (KE) Nru 2494/95 dwar l-indiċijiet armonizzati tal-prezzijiet għall-konsumatur, u li jemenda r-Regolament tal-Kummissjoni (KE) Nru 2214/96 (ĠU L 274, 20.10.2005, p. 9).

(13) Ir-Regolament tal-Kunsill (KE) Nru 701/2006 tal-25 ta’ April 2006 li jistabbilixxi regoli dettaljati għall-implementazzjoni tar-Regolament (KE) Nru 2494/95 rigward il-kopertura temporali tal-ġbir ta’ prezzijiet fl-indiċi armonizzat tal-prezzijiet għall-konsumatur (ĠU L 122, 9.5.2006, p. 3).

(14) Ir-Regolament tal-Kummissjoni (KE) Nru 330/2009 tat-22 ta’ April 2009 li jistipula regoli ddettaljati għall-implimentazzjoni tar-Regolament tal-Kunsill (KE) Nru 2494/95 dwar l-istandards minimi għat-trattament tal-prodotti staġjonali fl-Indiċijiet Armonizzati tal-Prezzijiet għall-Konsumatur (HICP) (ĠU L 103, 23.4.2009, p. 6).

(15) Ir-Regolament tal-Kummissjoni (UE) Nru 1114/2010 tal-1 ta’ Diċembru 2010 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 fir-rigward tal-istandards minimi għall-kwalità ta’ peżar HICP u li jirrevoka r-Regolament tal-Kummissjoni (KE) Nru 2454/97 (ĠU L 316, 2.12.2010, p. 4).

(16) Ir-Regolament tal-Kummissjoni (UE) Nru 93/2013 tal-1 ta’ Frar 2013 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 dwar l-indiċijiet armonizzati tal-prezzijiet għall-konsumatur, fir-rigward tal-iffissar ta’ indiċijiet tal-prezzijiet tal-abitazzjonijiet okkupati mis-sidien (ĠU L 33, 2.2.2013, p. 14).

(17) Ir-Regolament tal-Kunsill (KE) Nru 2494/95 tat-23 ta’ Ottubru 1995 dwar l-indiċijiet armonizzati tal-prezzijiet għall-konsumatur (ĠU L 257, 27.10.1995, p. 1).

(18) Ir-Regolament (UE) Nru 549/2013 tal-Parlament Ewropew u tal-Kunsill tal-21 ta’ Mejju 2013 dwar is-sistema Ewropea tal-kontijiet nazzjonali u reġjonali fl-Unjoni Ewropea (ĠU L 174, 26.6.2013, p. 1).

(19) Ir-Regolament (KE) Nru 223/2009 tal-Parlament Ewropew u tal-Kunsill tal-11 ta’ Marzu 2009 dwar l-Istatistika Ewropea u li jħassar ir-Regolament (Euratom, KE) Nru 1101/2008 tal-Parlament Ewropew u tal-Kunsill dwar it-trażmissjoni ta’ data suġġetta għall-kunfidenzjalità statistika lill-Uffiċċju tal-Istatistika tal-Komunitajiet Ewropej, ir-Regolament tal-Kunsill (KE) Nru 322/97 u d-Deċiżjoni tal-Kunsill 89/382/KEE, Euratom li tistabbilixxi Kumitat dwar il-Programmi tal-Istatistika tal-Komunitajiet Ewropej (ĠU L 87, 31.3.2009, p. 164).

ANNESS

Nefqa monetarja finali tal-unitajiet domestiċi għall-konsum

In-nefqa monetarja finali tal-unitajiet domestiċi għall-konsum hi definita fil-punt 20 tal-Artikolu 2 tar-Regolament (UE) 2016/792.

Biex tispeċifika f’aktar dettall il-kwalità tal-piżijiet, in-nefqa monetarja finali għall-konsum għandha tinkludi l-eżempji li ġejjin tan-nefqa finali tal-unitajiet domestiċi għall-konsum kif definit fil-punti li ġejjin fil-paragrafu 3.95 tal-Anness A tal-ESA 2010:

—	il-punti (c), (d), (h) u (i),

—	il-parti tal-punt (e) li għandha x’taqsam mas-servizzi finanzjarji li jintalbu l-ħlas direttament, il-parti tal-punt (f) li għandha x’taqsam mas-servizzi tal-assigurazzjoni mhux tal-ħajja bl-ammont tal-ħlas impliċitu għas-servizz.

In-nefqa monetarja finali għall-konsum għandha tinkludi wkoll il-kwoti tal-abitazzjoni li huma parti minn D.632, li hi definita fil-paragrafu 4.109 tal-Anness A tal-ESA 2010.

In-nefqa monetarja finali għall-konsum għandha teskludi l-eżempji li ġejjin tan-nefqa finali tal-unitajiet domestiċi għall-konsum kif definit fil-punti li ġejjin fil-paragrafu 3.95 tal-Anness A tal-ESA 2010:

—	il-punti (a), (b) u (g).

In-nefqa monetarja finali għall-konsum għandha teskludi wkoll l-eżempji li ġejjin li mhumiex parti min-nefqa finali tal-unitajiet domestiċi għall-konsum:

—	il-punti (a) sa (f) fil-paragrafu 3.96 tal-Anness A tal-ESA 2010, għajr il-kwoti tal-abitazzjoni li huma parti minn D.632, li hi definita fil-paragrafu 4.109 tal-Anness A tal-ESA 2010,

—	it-taxxi fuq l-introjtu, definiti fil-paragrafu 4.78 tal-Anness A tal-ESA 2010,

—	l-introjtu minn proprjetà, definit fil-paragrafu 4.41 tal-Anness A tal-ESA 2010,

—	il-kontribuzzjonijiet soċjali reali tal-impjegaturi, definiti fil-paragrafu 4.92 tal-Anness A tal-ESA 2010,

—	il-primjums tal-assigurazzjoni mhux tal-ħajja, definiti fil-paragrafu 4.112 tal-Anness A tal-ESA 2010,

—	it-trasferimenti attwali bejn l-unitajiet domestiċi, definiti fil-paragrafu 4.129 tal-Anness A tal-ESA 2010,

—	il-multi u l-penali imposti fuq l-unitajiet istituzzjonali minn qrati tal-liġi jew minn korpi kważi ġudizzjarji, definiti fil-paragrafu 4.132 tal-Anness A tal-ESA 2010.

It-tranżazzjonijiet monetarji huma dawk it-tranżazzjonijiet meta l-unitajiet involuti jagħmlu jew jirċievu pagamenti, jew ikollhom obbligazzjonijiet jew jirċievu assi denominati f’unitajiet tal-munita. It-tranżazzjonijiet li ma jinvolvux l-iskambju ta’ flus kontanti, jew assi jew obbligazzjonijiet denominati f’unitajiet tal-munita, huma tranżazzjonijiet mhux monetarji.

Top

All