(1)

Fis-16 ta' Awwissu 2017, il-Kummissjoni Ewropea (“il-Kummissjoni”) imponiet dazju antidumping proviżorju fuq l-importazzjonijiet fl-Unjoni Ewropea (“l-Unjoni”) ta' ċerti oġġetti tal-ħadid fondut bil-grafit lamellari (magħruf ukoll bħala ħadid griż) jew ħadid fondut bil-grafit sferojdali (magħruf ukoll bħala ħadid fondut duttili), u partijiet tagħhom, li joriġinaw fir-Repubblika tal-Poplu taċ-Ċina (“ir-RPĊ”) permezz tar-Regolament ta' Implimentazzjoni tal-Kummissjoni (UE) 2017/1480 (2) (“ir-Regolament proviżorju”).

(2)

Il-Kummissjoni nediet l-investigazzjoni fl-10 ta' Diċembru 2016 billi ppubblikat Notifika ta' Bidu f'Il-Ġurnal Uffiċjali tal-Unjoni Ewropea (“in-Notifika ta' Bidu”) wara lment ippreżentat fil-31 ta' Ottubru 2016 minn seba' produtturi tal-Unjoni, jiġifieri Fondatel Lecompte SA, Ulefos Niemisen Valimo Oy Ltd, Saint-Gobain PAM SA, Fonderies Dechaumont SA, Heinrich Meier Eisengießerei GmbH & Co. KG, Saint-Gobain Construction Products UK Ltd u Fundiciones de Odena SA (“l-ilmentaturi”), li jirrappreżentaw aktar minn 40 % mill-produzzjoni totali tal-Unjoni ta' ċerti oġġetti tal-ħadid fondut.

(3)

Kif iddikjarat fil-premessa 33 tar-Regolament proviżorju, l-investigazzjoni ta' dumping u ta' ħsara kopriet il-perjodu mill-1 ta' Ottubru 2015 sat-30 ta' Settembru 2016 (“il-perjodu ta' investigazzjoni”) u l-eżami tax-xejriet rilevanti għall-valutazzjoni tad-dannu kopriet il-perjodu mill-1 ta' Jannar 2013 sa tmiem il-perjodu ta' investigazzjoni (“il-perjodu taħt kunsiderazzjoni”).

(4)

Wara d-divulgazzjoni tal-fatti u tal-kunsiderazzjonijiet essenzjali li fuq il-bażi tagħhom ġie impost dazju antidumping proviżorju (“divulgazzjoni proviżorja”), l-ilmentaturi, il-Kamra tal-Kummerċ taċ-Ċina għall-Importazzjoni u għall-Esportazzjoni ta' Makkinarju u ta' Prodotti Elettroniċi (China Chamber of Commerce for Import and Export of Machinery and Electronic Products, “is-CCCME”), l-assoċjazzjoni ad hoc ta' importaturi mhux relatati Free Castings Imports (“FCI”), żewġ importaturi mhux relatati, il-produtturi esportaturi Indjani, u seba' produtturi esportaturi Ċiniżi għamlu sottomissjonijiet bil-miktub biex jaqsmu l-fehmiet tagħhom dwar is-sejbiet proviżorji.

(5)

Il-partijiet li talbu li jinstemgħu ngħataw din l-opportunità. Saru seduti mas-CCCME, mal-FCI, u mal-ilmentaturi. Żewġ seduti li saru mas-CCCME kienu ppreseduti mill-Uffiċjal tas-Seduta fi proċedimenti kummerċjali.

(6)

Il-Kummissjoni kkunsidrat il-kummenti ppreżentati mill-partijiet interessati u indirizzathom hawn taħt.

(7)

Il-Kummissjoni kompliet tfittex u tivverifika l-informazzjoni kollha li ħasset li kienet meħtieġa għas-sejbiet finali tagħha. Sabiex jiġu vverifikati t-tweġibiet għall-kwestjonarju tal-importaturi mhux relatati, saru żjarat ta' verifika fl-istabbilimenti tal-partijiet li ġejjin:

(8)

Il-Kummissjoni informat lill-partijiet kollha dwar il-fatti u l-kunsiderazzjonijiet essenzjali li fuq il-bażi tagħhom kien biħsiebha timponi dazju antidumping definittiv fuq l-importazzjonijiet fl-Unjoni ta' oġġetti tal-ħadid fondut li joriġinaw fir-RPĊ u tiġbor b'mod definittiv l-ammonti garantiti permezz ta' dazju proviżorju, u ttemm l-investigazzjoni fuq l-importazzjonijiet fl-Unjoni ta' oġġetti tal-ħadid fondut li joriġinaw fl-Indja (“divulgazzjoni finali”).

(9)

Il-partijiet kollha ngħataw perjodu li fih setgħu jikkummentaw fuq id-divulgazzjoni finali. Is-CCCME, l-FCI, l-industrija tal-Unjoni u tliet produtturi esportaturi kkummentaw fi preżentazzjonijiet bil-miktub wara divulgazzjoni finali u waqt seduti. Il-kummenti ppreżentati mill-partijiet interessati tqiesu u ttieħdu inkunsiderazzjoni.

(10)

Is-CCCME u Botou City Wangwu Town Tianlong Casting Factory iddikjaraw li d-divulgazzjoni proviżorja tal-Kummissjoni kienet insuffiċjenti, u b'hekk taffettwa d-drittijiet tad-difiża tagħhom u talbu lill-Kummissjoni tagħmel kjarifiki u divulgazzjoni ulterjuri.

(11)

Fir-rigward tal-kalkoli tad-dumping, dawn il-partijiet talbu informazzjoni addizzjonali rigward il-metodoloġija speċifika segwita għal kull tip ta' prodott, il-valur normali miksub fuq il-bażi ta' dawk il-metodoloġiji skont it-tip ta' prodott, il-marġini tad-dumping li jirriżultaw mill-metodoloġiji differenti, l-ammonti użati għall-SG&A u l-profitt u l-volum ta' bejgħ tat-tipi ta' prodotti differenti mibjugħa fis-suq Indjan bil-proporzjon ta' tranżazzjonijiet profittabbli.

(12)

Is-CCCME talbet ukoll lill-Kummissjoni biex tipprovdi lista ta' tipi ta' prodotti bil-volum totali ta' esportazzjonijiet mill-produtturi esportaturi Ċiniżi kollha fil-kampjun skont it-tip ta' prodott u l-volum totali ta' bejgħ domestiku mill-produtturi Indjani.

(13)

Barra minn hekk, is-CCCME affermat li l-Kummissjoni naqset milli tiddivulga l-informazzjoni dwar it-tipi ta' prodotti speċifiċi tal-produtturi tal-pajjiż analogu u li l-produtturi esportaturi Ċiniżi u s-CCCME ma kinux f'pożizzjoni li jidentifikaw jekk kienx hemm differenzi li kien jistħoqqilhom aġġustament, billi dawn ma kinux jafu t-tip ta' prodotti li ntużaw għad-determinazzjoni tal-valur normali.

(14)

Il-metodoloġija segwita għall-kalkolu tal-marġni tad-dumping ġiet deskritta f'dettall fil-premessi minn 61 sa 98 tar-Regolament proviżorju. Biex tipproteġi l-informazzjoni kummerċjalment sensittiva tal-produtturi Indjani li kkooperaw u tal-produtturi esportaturi Ċiniżi fil-kampjun, il-kalkoli dettaljati tad-dumping ġew iddivulgati biss lill-produtturi esportaturi fil-kampjun, inkluża l-metodoloġija użata għall-kalkolu tal-valur normali għal kull tip ta' prodott.

(15)

Madankollu, minħabba li d-dejta użata biex tiddetermina l-valuri normali kienet tirrigwarda żewġ gruppi ta' kumpaniji biss fil-pajjiż analogu, ma kienx possibbli li jiġu pprovduti ċifri aggregati rigward il-valur normali mingħajr ma tiġi ddivulgata dejta sensittiva kummerċjalment relatata ma' dawn il-partijiet. Għaldaqstant, il-valur normali ġie ddivulgat f'meded.

(16)

Il-Kummissjoni ma għamlitx kalkoli aggregati ġenerali għal kull tip ta' prodott mibjugħ mill-produtturi esportaturi Ċiniżi kollha fil-kampjun. Minflok, il-Kummissjoni għamlet kalkoli skont it-tip ta' prodott għal kull produttur esportatur. Barra minn hekk, id-dejta aggregata mitluba mis-CCCME għall-produtturi esportaturi Ċiniżi kollha fil-kampjun u għall-produtturi Indjani analogi rigward il-volumi ta' bejgħ skont kull tip ta' prodott tikkostitwixxi informazzjoni kummerċjalment sensittiva fis-sens tal-Artikolu 19 tar-Regolament bażiku. Għalhekk, il-Kummissjoni ċaħdet din it-talba.

(17)

Minkejja dan, qabel id-divulgazzjoni proviżorja, fil-fajl mhux kunfidenzjali ddaħħal dokument li jagħti d-dettalji tal-karatteristiċi tekniċi tal-firxa sħiħa ta' tipi ta' prodotti mibjugħa fis-suq analogu u fis-suq tal-Unjoni mill-produtturi Indjani fil-kampjun.

(18)

Sabiex tappoġġa t-talba tagħha għal aktar divulgazzjoni, is-CCCME esprimiet dubji dwar il-konsistenza tat-twaqqigħ tal-prezzijiet u tal-marġnijiet ta' dumping ippubblikati fir-Regolament proviżorju u tenniet l-istess tħassib wara d-divulgazzjoni finali. Affermat li, billi l-Indja kienet intgħażlet bħala l-pajjiż analogu u u billi l-produtturi esportaturi Ċiniżi u Indjani kellhom marġnijiet ta' twaqqigħ tal-prezzijiet simili, kien korollarju loġiku li jinħtieġ li l-produtturi esportaturi taż-żewġ pajjiżi jkollhom marġnijiet ta' dumping simili. Is-CCCME argumentat li l-informazzjoni disponibbli għaliha ma kinitx biżżejjed biex tifhem u tikkummenta dwar is-sejbiet tal-Kummissjoni f'dan ir-rigward.

(19)

Il-Kummissjoni nnotat li, kif spjegat fil-premessa 179 tar-Regolament proviżorju, id-differenzi fil-marġini tat-twaqqigħ tal-prezz tal-produtturi esportaturi Indjani u Ċiniżi huma spjegati mid-differenza fit-taħlita ta' prodotti tal-esportazzjonijiet Ċiniżi u Indjani lejn l-Unjoni. Il-Kummissjoni fakkret li l-marġini tat-twaqqigħ tal-prezz jirriżultaw minn tqabbil tal-prodotti esportati mill-produtturi esportaturi Ċiniżi bi prodotti simili mibjugħa mill-industrija tal-Unjoni, filwaqt li l-marġini tad-dumping tal-produtturi esportaturi Ċiniżi jirriżultaw mit-tqabbil tal-prodotti esportati mir-RPĊ lejn l-Unjoni bi prodotti simili mibjugħa fis-suq domestiku Indjan. B'hekk, u kif rikonoxxut mis-CCCME stess, diskrepanza bejn dawn iż-żewġ marġini hi eżitu possibbli.

(20)

Barra minn hekk, matul is-seduta li saret mas-CCCME ippreseduta mill-Uffiċjal tas-Seduta, fit-8 ta' Settembru 2017, il-Kummissjoni spjegat għaliex l-aġġustament għall-VAT mhux rifondibbli fil-marġni tad-dumping stabbilit għall-produtturi esportaturi Ċiniżi affettwa t-tqabbil bejn ir-riżultati Indjani u Ċiniżi. Dan l-aġġustament kien ukoll is-suġġett tal-kummenti tas-CCCME indirizzati hawn taħt.

(21)

Fir-rigward tal-kalkoli tad-dannu, is-CCCME affermat li l-Kummissjoni kienet injorat it-talba tas-CCCME għal aċċess sħiħ għall-effetti fuq il-volum u l-prezz, għall-kalkoli tal-marġni tad-dannu u tal-indikaturi tad-dannu, u għal kwalunkwe informazzjoni kunfidenzjali oħra li fuqha ġew ibbażati dawk il-kalkoli. F'dan ir-rigward is-CCCME ddikjarat li l-obbligu tal-Kummissjoni li tirrispetta l-kunfidenzjalità mhuwiex assolut u jinħtieġ li dan jiġi bbilanċjat mad-drittijiet ta' difiża tal-partijiet interessati. Bħala eżempju, is-CCCME nnotat li l-Kummissjoni ma ddivulgatilhiex il-karatteristiċi tal-prodott li ntużaw għat-tqabbil tal-prezzijiet mil-lat tal-industrija tal-Unjoni.

(22)

Is-CCCME ssuġġerixxiet ukoll modi kif il-Kummissjoni setgħet issib dik li affermat li kien il-bilanċ meħtieġ bejn il-kunfidenzjalità u d-drittijiet tad-difiża. Dawn kienu jinkludu, pereżempju, proposti biex jiġu pprovduti “divulgazzjonijiet aggregati”. Is-CCCME ssuġġerixxiet li l-Kummissjoni tista' tipprovdi l-kalkoli tat-twaqqigħ tal-prezz mad-dejta kkonsolidata tal-produtturi esportaturi Ċiniżi kollha fil-kampjun u d-dejta kkonsolidata tal-produtturi tal-Unjoni kollha fil-kampjun. Is-CCCME qieset li billi tipprovdi dejta kkumpilata bħal din lill-partijiet interessati li mhumiex huma nfushom attivi bħala atturi ekonomiċi fis-suq, il-Kummissjoni tkun qed tirrispetta kif xieraq il-kunfidenzjalità tad-dejta sottostanti.

(23)

Is-CCCME maqdret il-fatt li l-Kummissjoni konsistentement tat prijorità lill-kunfidenzjalità fuq id-drittijiet tad-difiża tas-CCCME, mingħajr ebda valutazzjoni taċ-ċirkustanzi speċifiċi, tal-pożizzjoni tas-CCCME fir-rigward tal-informazzjoni inkwistjoni u, b'mod ġenerali, mingħajr ebda kunsiderazzjoni għall-importanza tad-drittijiet tad-difiża.

(24)

Il-Kummissjoni ma qablitx ma' din il-valutazzjoni. Hi analizzat kull biċċa informazzjoni mitluba mis-CCCME b'mod individwali u fil-25 ta' Awwissu 2017 hi pprovdiet l-informazzjoni kollha lis-CCCME bl-eċċezzjoni ta' informazzjoni li ma kinitx eżistenti, ma kinitx parti mill-fajl, jew kienet kunfidenzjali. Meta l-informazzjoni ma kinitx parti mill-fajl, jew kunfidenzjali, il-Kummissjoni mmotivat kif xieraq iċ-ċaħda tagħha għad-divulgazzjoni. B'mod partikolari, il-Kummissjoni ma għamlitx kalkoli aggregati ġenerali tat-twaqqigħ tal-prezz u kalkoli tat-twaqqigħ tal-prezz skont in-numru ta' kontroll tal-prodott (product control number, “PCN” jew “tip ta' prodott”). Minflok, hi għamlet kalkoli tat-twaqqigħ tal-prezz għal kull tip ta' prodott u għal kull produttur esportatur. Għaldaqstant, l-informazzjoni aggregata ma ntużatx fl-investigazzjoni u, għalhekk, ma kinitx parti mill-fajl.

(25)

Fir-rigward tal-informazzjoni kunfidenzjali, il-Kummissjoni fakkret li kienet taħt l-obbligu li tipproteġi t-tali informazzjoni skont l-Artikolu 19 tar-Regolament bażiku. Barra minn hekk, il-Kummissjoni qieset li l-fajl miftuħ tal-każ imqiegħed għad-dispożizzjoni tal-partijiet, inkluż għas-CCCME, kien fih l-informazzjoni rilevanti kollha għall-preżentazzjoni tal-każ tagħhom u użata fl-investigazzjoni. Meta l-informazzjoni tqieset kunfidenzjali, il-fajl miftuħ kien fih sommarji sinifikattivi tagħha. Il-partijiet interessati kollha, inkluża s-CCCME, kellhom aċċess għall-fajl miftuħ u setgħu jikkonsultawh. Fir-rigward tas-CCCME, il-Kummissjoni osservat li għad li din tirrappreżenta, fost l-oħrajn, lill-industrija tal-fonderija taċ-Ċina, din ma kienet awtorizzata minn l-ebda produttur esportatur individwali fil-kampjun biex ikollha aċċess għall-informazzjoni kunfidenzjali tiegħu. B'hekk, id-divulgazzjoni kunfidenzjali mibgħuta lill-produtturi esportaturi Ċiniżi individwali fil-kampjun ma setgħetx tiġi pprovduta lis-CCCME.

(26)

Fid-dawl ta' dan li ntqal hawn fuq, il-Kummissjoni qieset li s-CCCME u l-produttur esportatur kienu ngħataw l-opportunità biex jeżerċitaw id-drittijiet tad-difiża tagħhom bis-sħiħ u ċaħdet l-affermazzjonijiet tagħhom.

(27)

Wara d-divulgazzjoni finali, is-CCCME tenniet id-dikjarazzjoni tagħha li ma tpoġġietx f'pożizzjoni li ppermettitilha li teżerċita d-drittijiet ta' difiża tagħha bis-sħiħ. Is-CCCME ma saqsietx għal informazzjoni ġdida u lanqas ma ppreżentat argumenti ġodda. B'mod partikolari, is-CCCME ma weġbitx għall-ittra ta' divulgazzjoni li fiha l-Kummissjoni indirizzat fid-dettall il-kwistjonijiet li ppreżentat quddiem l-Uffiċjali tas-Seduta fil-15 ta' Settembru 2017. Il-Kummissjoni ċaħdet din l-affermazzjoni għax, kif stabbilit fil-premessi minn 10 sa 26 ta' dan ir-Regolament, hija pprovdiet aċċess sħiħ lis-CCCME għal informazzjoni mhux kunfidenzjali u debitament iġġustifikat iċ-ċaħda tagħha li tiddivulga informazzjoni kunfidenzjali jew informazzjoni li ma kenitx parti mill-fajl.

(28)

Il-lista ta' produtturi esportaturi Ċiniżi inkluża fl-Anness għal dan ir-Regolament ġiet immodifikata biex tinkludi l-ismijiet ta' żewġ produtturi esportaturi li ma kinux iddaħħlu jew li kienu ġew spelluti ħażin fir-Regolament proviżorju.

(29)

Matul l-investigazzjoni, produttur esportatur Ċiniż mhux fil-kampjun informa lill-Kummissjoni li kien biddel ismu. Il-Kummissjoni kienet sodisfatta bl-evidenza ppreżentata. Il-lista ta' produtturi esportaturi Ċiniżi ġiet immodifikata kif xieraq.

(30)

Is-CCCME stiednet lill-Kummissjoni tagħti eżami individwali lit-18-il produttur esportatur Ċiniż mhux fil-kampjun li kienu talbu b'mod formali eżami bħal din f'konformità mal-Artikolu 17(3) tar-Regolament bażiku.

(31)

Kif spjegat fil-premessa 27 tar-Regolament proviżorju, l-eżami ta' numru tant kbir ta' talbiet kienet tkun wisq impenjattiva u ma kinitx tippermetti li l-investigazzjoni titlesta fil-perjodu ta' żmien stabbilit fir-Regolament bażiku. Għaldaqstant, il-Kummissjoni ma laqgħet ebda talba għal eżami individwali.

(32)

Matul din l-investigazzjoni, is-CCCME u żewġ produtturi esportaturi Ċiniżi tennew l-affermazzjoni li billi t-Taqsima 15 tal-Protokoll tal-Adeżjoni tar-RPĊ fid-WTO kienet skadiet wara l-11 ta' Diċembru 2016, l-għażla ta' pajjiż analogu ma kinitx għadha ġġustifikata u jinħtieġ li l-eżistenza tad-dumping tiġi stabbilita fuq il-bażi tal-prezzijiet u tal-ispejjeż domestiċi tal-produtturi esportaturi Ċiniżi.

(33)

Il-Kummissjoni applikat il-leġiżlazzjoni li hi attwalment fis-seħħ. L-Artikolu 2(7)(a) u (b) tar-Regolament bażiku jipprovdi għall-applikazzjoni tal-metodoloġija tal-pajjiż analogu għall-istabbiliment tal-valur normali fil-każ ta' produtturi esportaturi fir-RPĊ.

(34)

L-FCI tenniet l-affermazzjoni li l-perjodu taħt kunsiderazzjoni hu qasir wisq biex issir xi determinazzjoni sinifikattiva, speċjalment dwar il-volum ta' importazzjonijiet mir-RPĊ, u perjodu li hu iqsar minn erba' snin imur kontra l-prattika stabbilita tal-Kummissjoni, li normalment tagħżel perjodu ta' mill-inqas erba' snin.

(35)

Il-Kummissjoni nnotat li l-perjodu taħt kunsiderazzjoni ġie stabbilit fil-bidu f'konformità mal-prattika standard tal-Kummissjoni. Kif spjegat fil-premessa 35 tar-Regolament proviżorju, il-perjodu kkunsidrat ikopri tliet snin kalendarji sħaħ u l-perjodu ta' investigazzjoni. Ma kien hemm ebda raġuni għaliex il-Kummissjoni tvarja mill-prattika standard tagħha u tagħżel perjodu differenti. Għaldaqstant, din l-affermazzjoni ġiet miċħuda.

(36)

Fi kwalunkwe każ, anki li kieku l-Kummissjoni kellha ssegwi l-FCI u tinkludi l-2012 fl-analiżi tad-dannu, il-volum tal-importazzjonijiet mir-RPĊ xorta waħda jkun juri żieda ta' madwar 10 % tul il-perjodu sħiħ.

(37)

Fin-nuqqas ta' kummenti oħra rigward il-perjodu ta' investigazzjoni u l-perjodu taħt kunsiderazzjoni, il-premessa 33 tar-Regolament proviżorju hi kkonfermata.

(38)

Il-premessa 36 tar-Regolament proviżorju stipulat id-definizzjoni proviżorja tal-prodott ikkonċernat.

(39)

Il-premessi minn 39 sa 60 tar-Regolament proviżorju jistabbilixxu l-affermazzjonijiet tal-produtturi esportaturi Indjani, ta' produttur esportatur Ċiniż wieħed, tal-FCI, u ta' żewġ importaturi separati mhux relatati u l-valutazzjoni tagħhom mill-Kummissjoni rigward l-ambitu tal-prodott.

(40)

Wara l-impożizzjoni tal-miżuri proviżorji, iż-żewġ importaturi mhux relatati u l-FCI ppreżentaw talbiet għal kjarifika u affermazzjonijiet oħra li jargumentaw li ċerti tipi ta' prodotti jinħtieġ li jiġu esklużi mill-ambitu tal-prodott. It-talbiet ta'esklużjoni kkonċernaw it-tipi ta' prodotti li ġejjin:

(41)

Fir-rigward tat-talba ta' importatur minnhom li tiġi kkonfermata l-esklużjoni tal-prodott tal-uċuħ fonduti u tal-ispralli tal-kanali soġġetti għall-istandard EN 1433, il-Kummissjoni kkonfermat li l-ispralli tal-kanali huma soġġetti għall-istandard EN 1433 u, għaldaqstant, huma esklużi mill-prodott ikkonċernat f'konformità mal-premessi 44 u 60 tar-Regolament proviżorju. Fir-rigward tal-uċuħ fonduti, il-Kummissjoni nnotat li dawn għandhom l-istess karatteristiċi u applikazzjonijiet u huma soġġetti għall-istess standard bħall-ispralli tal-kanali. Għaldaqstant, il-Kummissjoni eskludiet l-uċuħ fonduti mill-prodott ikkonċernat.

(42)

Fir-rigward tat-talba tal-FCI biex tiġi kkonfermata l-esklużjoni tal-prodott tat-turġien tal-ħadid u tal-vireg tal-irfigħ, il-Kummissjoni stabbilixxiet li t-tali turġien tal-ħadid u vireg tal-irfigħ mhumiex meqjusa li huma parti mill-ambitu tal-prodott ta' din l-investigazzjoni, għaliex dawn għandhom funzjoni differenti minn dawk deskritti fid-definizzjoni tal-prodott ikkonċernat. Dawn huma aċċessorji għall-prodott ikkonċernat, iżda ma għandhomx l-istess karatteristiċi tekniċi bħall-prodott ikkonċernat jew il-partijiet tiegħu. Tabilħaqq, it-turġien tal-ħadid u l-vireg tal-irfigħ ma jintużawx biex jgħattu sistemi ta' koperturi tal-art jew ta' taħt il-wiċċ jew biex jagħtu aċċess jew jipprovdu tieqa għal sistemi ta' koperturi tal-art jew ta' taħt il-wiċċ.

(43)

L-importatur imsemmi fil-premessa 41 ippreżenta informazzjoni addizzjonali rigward it-talba ta' esklużjoni tal-prodott tiegħu msemmija fil-premessi minn 45 sa 53 tar-Regolament proviżorju dwar il-komponenti Gatic b'dimensjoni li taqbeż l-1 000 mm. Tali komponenti ma jaqgħux fl-ambitu tal-istandard EN 124 u jiswew iktar mid-doppju mill-għotjien tat-tappieri tradizzjonali.

(44)

Billi komponenti b'dimensjoni iżgħar minn 1 000 mm jistgħu jkunu parti minn prodott b'dimensjoni li taqbeż l-1 000 mm, dawn ma jistgħux jiġu distinti mill-prodott ikkonċernat fl-ebda waħda mill-karatteristiċi fiżiċi u tekniċi tal-prodott. Dan ġie indirizzat mill-Kummissjoni fil-premessa minn 51 sa 53 tar-Regolament proviżorju. Għaldaqstant, id-differenza fil-prezz tal-prodott mhix rilevanti.

(45)

Wara divulgazzjoni finali, Gatic tenniet l-affermazzjoni tagħha li jinħtieġ li jiġu esklużi mill-ambitu tal-prodott komponenti li jgħattu l-aċċess bi ftuħ ċar individwali/erja ċara ta' aktar minn 1 000 mm, għax dawn il-komponenti kbar ma jaqgħux taħt l-istandard EN124. Barra minn hekk, l-awtoritajiet doganali tal-Istati Membri jistgħu jiddistingwu faċilment komponenti bi ftuħ ċar ta' aktar minn 1 000 mm (mhux soġġetti għal kejl) minn komponenti bi ftuħ ċar ta' anqas minn 1 000 mm (soġġeti għal kejl). Għaldaqstant, ma hemm l-ebda raġuni valida biex jiġu esklużi komponenti bi ftuħ ċar ta' aktar minn 1 000 mm mill-ambitu tal-miżuri.

(46)

Il-premessi 52 u 53 tar-Regolament proviżorju stabbilixxew li l-karatteristiċi fiżiċi u tekniċi kollha tal-prodott ikkonċernat japplikaw ukoll għall-komponenti Gatic, irrispettivament mid-dimensjoni tal-ftuħ ċar tal-prodott. Dawn il-karatterisitiċ ma jinbidlux bil-fatt li l-komponenti Gatic bi ftuħ ċar individwali ta' aktar minn 1 000 mm ma jaqgħux taħt l-istandard EN 124. Il-prodott ikkonċernat mhuwiex definit bl-istandard u jinkludi firxa usa' ta' tipi ta' prodotti minn dawk li jaqgħu taħt l-istandard EN 124. Għaldaqstant, il-Kummissjoni ċaħdet din l-affermazzjoni.

(47)

Importatur ieħor ippreżenta talba għall-esklużjoni espliċita mill-prodott ikkonċernat ta' prodotti soġġetti għall-istandard EN 1253.

(48)

Għar-raġunijiet stipulati fil-premessi minn 54 sa 56 tar-Regolament proviżorju, il-Kummissjoni kkonfermat li t-tali prodotti mhumiex parti mill-ambitu tal-prodott ta' din l-investigazzjoni u aġġustat id-definizzjoni tal-prodott fil-parti operattiva kif xieraq.

(49)

L-FCI ddikjarat li fl-Unjoni ma teżisti ebda produzzjoni ta' kaxex tas-superfiċe f'konformità mal-istandards Ġermaniżi u li l-kaxex tas-superfiċe duttili mhux se jibqgħu disponibbli fl-Unjoni li kieku kellhom jiġu imposti miżuri antidumping definittivi fuq l-importazzjonijiet ta' kaxex tas-superfiċe mir-RPĊ.

(50)

Il-Kummissjoni nnotat li hemm produzzjoni tal-kaxex tas-superfiċe, anki f'konformità mal-istandards Ġermaniżi, mill-produtturi tal-Unjoni fil-kampjun.

(51)

Barra minn hekk, il-Kummissjoni fakkret li l-miżuri antidumping definittivi mhumiex imposti biex jagħlqu s-suq għall-prodott ikkonċernat għall-importazzjonijiet mir-RPĊ. Li kieku fl-Unjoni ma tkun teżisti ebda produzzjoni ta' ċerti tipi ta' kaxex tas-superfiċe f'konformità mal-istandards Ġermaniżi, l-utenti xorta waħda jkollhom il-possibbiltà li jiksbu dan il-prodott minn pajjiżi terzi, inkluż mir-RPĊ.

(52)

L-FCI ppreżentat talba għall-esklużjoni ta' kaxex tar-rubinett tal-għeluq, billi dawn ma jaqgħux taħt l-istandard EN 124, iżda huma soġġetti għall-istandard EN 1563. Il-kaxex tar-rubinett tal-għeluq huma kategorija ta' kaxex tas-superfiċe. Dawn tal-aħħar diġà kienu soġġetti għal talba ta' esklużjoni li ġiet irrifjutata fil-premessa 59 tar-Regolament proviżorju. Għaldaqstant, il-Kummissjoni rrifjutat ukoll it-talba ta' esklużjoni tal-kaxex tar-rubinett tal-għeluq mill-prodott ikkonċernat.

(53)

L-FCI ppreżentat talba għall-esklużjoni ulterjuri tal-ispralli soġġetti għall-istandard EN 124, billi dawn iwettqu l-istess funzjonijiet eżatti bħall-ispralli tal-kanali soġġetti għall-istandard EN 1433. Dawn jaqgħu taħt standards differenti għaliex l-ispralli tal-kanali soġġetti għall-istandard EN 1433 jiġu ttestjati flimkien mal-kanal ta' taħthom, filwaqt li l-ispralli soġġetti għall-istandard EN 124 huma ttestjati waħedhom, b'mod simili għall-għotjien tal-gandotti u għall-għotjien tat-tappieri.

(54)

Il-Kummissjoni nnotat li l-karatteristiċi tekniċi għat-tali spralli u għotjien tal-gandotti u għotjien tat-tappieri huma l-istess, billi lkoll huma soġġetti għall-istandard EN 124. Dawn ma jistgħux jiġu distinti faċilment u direttament minn tipi oħra tal-prodott ikkonċernat u, għaldaqstant, it-talba għall-esklużjoni ta' spralli soġġetti għall-istandard EN 124 mill-prodott ikkonċernat ġiet irrifjutata.

(55)

Wara divulgazzjoni finali, l-FCI tenniet l-affermazzjoni tagħha li l-komponent tal-ispralli tal-kanali soġġetti għall-istandard EN 1433 u l-ispralli soġġetti għall-istandard EN124 għandhom l-istess karatteristiċi fiżiċi u materjali u l-istess proċess ta' produzzjoni. Għaldaqstant, huma prodotti identiċi. Barra minn hekk, l-FCI ddikjarat li l-fatti tal-każ iwaqqgħu biċ-ċar l-allegazzjoni tal-Kummissjoni li l-ispralli tal-kanali waħidhom ma jistgħux jintgħażlu faċilment u direttament minn tipi oħra tal-prodott ikkonċernat.

(56)

Il-Kummissjoni nnutat li l-ambitu tal-istandard EN 124 huwa limitat għal għotjien tat-tappieri u għotjien tal-gandotti. Għaldaqstant, l-ispralli soġġetti għall-istandard EN 124 huma meqjusa parti minn dawn il-prodotti. Għaldaqstant, il-komponent tal-ispralli tal-kanali soġġett għall-istandard EN 1433 u l-ispralli soġġetti għall-istandard EN124 ma jistgħux jitqiesu bħala prodotti identiċi.

(57)

Bid-dikjarazzjoni li dawn l-ispralli li huma soġġetti għall-istandard EN 124 ma jistgħux jintgħażlu viżwalment faċilment minn tipi oħra tal-prodott ikkonċernat, il-Kummissjoni riedet tfisser li dawn l-ispralli ma jistgħux jintgħażlu viżwalment faċilment minn spralli li jintużaw bħala kopertura f'għatu tat-tappieri jew għatu tal-gandotti li jippermetti li jgħaddi ilma minnhom fit-tappiera jew fil-gandott, li jaqgħu taħt il-prodott ikkonċernat bħala parti minnu. Għaldaqstant, din l-affermazzjoni ġiet miċħuda.

(58)

L-ilmentaturi tennew l-oppożizzjoni tagħhom għall-għażla tal-Indja bħala pajjiż analogu fuq il-bażi tat-tfixkil li jirriżulta mis-sussidji fuq l-esportazzjonijiet, taxxa tal-esportazzjoni u politika ta' merkanzija doppja li taffettwa l-prezz tal-mineral tal-ħadid.

(59)

Il-Kummissjoni indirizzat dawn l-affermazzjonijiet fil-premessi 80 u 81 tar-Regolament proviżorju. Ma ġie ppreżentat ebda argument ġdid u, għaldaqstant, din l-affermazzjoni ġiet irrifjutata.

(60)

Kif stipulat fil-premessa 88 tar-Regolament proviżorju, għall-kalkolu tal-valur normali għall-marġini tad-dumping proviżorju, għal kull tip ta' prodott esportat mill-produtturi esportaturi Ċiniżi fil-kampjun, l-ewwel ġie ddeterminat valur normali għal kull produttur analogu Indjan u mbagħad dawn il-valuri normali għal kull tip ta' prodott ġew ponderati flimkien bl-użu tal-kwantità prodotta minn kull produttur Indjan.

(61)

Wara d-divulgazzjoni proviżorja, il-Kummissjoni rċeviet kummenti mingħand diversi partijiet interessati li allegaw li l-użu tal-valuri maħduma seta' kabbar wisq il-valur normali stabbilit fil-pajjiż analogu.

(62)

B'mod partikolari, is-CCCME ddikjarat li l-Kummissjoni kellha d-diskrezzjoni meta tikkalkola l-valur normali f'pajjiż analogu rigward il-livell ta' “kwantitajiet suffiċjenti” skont it-termini tal-Artikolu 2(2) tar-Regolament bażiku.

(63)

Is-CCCME argumentat ukoll li jekk produttur esportatur Ċiniż wieħed issodisfa t-test tar-rappreżentattività, mela jinħtieġ li jintuża l-istess valur normali bbażat fuq il-prezz għall-produtturi esportaturi Ċiniżi kollha l-oħra għall-istess tip ta' prodott.

(64)

Il-Kummissjoni aċċettat iż-żewġ argumenti tekniċi rigward it-test tal-kwantità suffiċjenti u l-użu tal-valur normali bbażat fuq il-prezz u rrevediet il-kalkolu tal-valur normali kif xieraq.

(65)

Fid-dawl tal-fatt li kien hemm aktar minn produttur wieħed fil-kampjun fil-pajjiż analogu li kkooperaw mal-investigazzjoni, il-Kummissjoni reġgħet ikkunsidrat l-istabbiliment tal-valur normali biex tnaqqas l-użu tal-valuri normali maħduma kemm jista' jkun.

(66)

F'dan ir-rigward, fejn kien hemm valur normali bbażat fuq il-prezz tal-bejgħ domestiku fl-Indja li sar matul il-perkors normali tal-kummerċ u fi kwantitajiet suffiċjenti, intuża dan il-prezz minflok il-valur normali medju meħud minn dan il-prezz u valur normali maħdum minn produtturi oħra. Dan hu konformi mal-Artikolu 2(7) li skont dan jinħtieġ li l-valur normali jiġi kkalkolat bi preferenza għall-prezzijiet domestiċi tal-prodott simili fil-pajjiż analogu.

(67)

Meta tip ta' prodott ma jkunx inbiegħ fis-suq domestiku minn ebda wieħed mill-produtturi Indjani fil-kampjun iżda mill-inqas kien hemm produttur Indjan wieħed fil-kampjun li pproduċa dan it-tip ta' prodott, il-valur normali nħadem bl-użu tal-ispiża tal-manifattura, flimkien mal-ispejjeż tal-SG&A u l-profitt tal-bejgħ domestiku fil-perkors normali tal-kummerċ magħmul minn dan il-produttur Indjan. Espressa bħala perċentwal tal-fatturat, is-somma tal-ispejjeż tal-SG&A u tal-profitt użata f'dawn il-każijiet kienet fil-medda minn 1 % sa 10 % għall-prodotti ta' ħadid griż u minn 10 % sa 20 % tal-prodotti tal-ħadid duttili.

(68)

Meta ma kien hemm ebda tlaqqigħ fil-livell tat-tip ta' prodott, il-Kummissjoni użat valur normali bbażat fuq il-bejgħ domestiku fil-perkors normali tal-kummerċ tat-tipi kollha ta' prodotti li użaw l-istess materja prima. Għal erbgħa mill-ħames produtturi esportaturi Ċiniżi inklużi fil-kampjun, din is-sitwazzjoni kienet tikkonċerna inqas minn 1,2 % tal-volum totali tal-esportazzjonijiet. Għal esportatur Ċiniż inkluż fil-kampjun, dan kien jirappreżenta aktar minn 50 % tal-volum tal-esportazzjonijiet. Dan l-esportatur Ċiniż biegħ prodotti niċċa relattivament għaljin li ma setgħux jiġu mqabbla mat-tipi ta' prodotti manifatturati u mibjugħa mill-produtturi inklużi fil-kampjun fil-pajjiż analogu u li ma kienx possibbli għalihom li jikkwantifikaw aġġustament 'il fuq mill-valur normali. L-użu ta' valur normali medju tat-tipi ta' prodotti kollha tal-istess materja prima ma żiedx il-marġini tad-dumping ta' dan il-produttur esportatur.

(69)

Is-CCCME u Botou City Wangwu Town Tianlong Casting Factory ukoll esprimew in-nuqqas ta' qbil tagħhom mal-metodoloġija użata mill-Kummissjoni meta ħadmet il-valur normali għat-tipi ta' prodotti mibjugħa fi kwantitajiet insuffiċjenti. Wara t-tibdiliet stabbiliti fil-premessi minn 64 sa 68 aktar 'il fuq, din l-affermazzjoni ma baqgħetx rilevanti billi ma qamet l-ebda sitwazzjoni biex jinħadem valur normali.

(70)

Wara divulgazzjoni finali, is-CCCME ppreżentat li jinħtieġ li l-Kummissjoni tuża l-ispejjeż tal-SG&A u l-profitt tal-bejgħ domestiku fil-perkors normali tal-kummerċ li jagħmlu l-produtturi Indjani kollha meta jaħdmu l-valur normali.

(71)

Fiċ-ċirkustanzi deskritti fil-premessa 67 u skont il-formulazzjoni ċara tal-Artikolu 2(6) tar-Regolament bażiku, il-Kummissjoni kienet obbligata tuża l-ammonti għall-ispejjeż tal-SG&A u l-profitt tal-bejgħ domestiku tal-prodott simili fil-perkors normali tal-kummerċ li jagħmel il-produttur Indjan li jkun immanifattura t-tip ta' prodott inkwistjoni.

(72)

Għaldaqstant, l-affermazzjoni tas-CCCME li jinħtieġ li l-Kummissjoni tagħżel spejjeż varji tal-SG&A u profitt minn kumpaniji oħra li ma mmanifatturawx it-tip ta' prodott ikkonċernat u toħroġ medja tagħhom b'xi mod ġiet miċħuda.

(73)

Wara divulgazzjoni finali, is-CCCME talbet lill-Kummissjoni biex tikkonferma li t-taxxi indiretti ma ġewx inklużi fl-ispejjeż tal-produzzjoni tal-produtturi Indjani, ma kellhomx effett fuq it-test ta' profittabbiltà u ma ġewx inklużi fil-prezzijiet domestiċi użati biex jiġi determinat il-valur normali.

(74)

Il-Kummissjoni kkonfermat li la l-prezzijiet u lanqas l-ispejjeż li ntużaw biex jiġi determinat il-valur normali ma kienu jinkludu taxxi indiretti u li t-taxxi indiretti ma kellhom l-ebda impatt fuq it-test ta' profittabbiltà.

(75)

Fin-nuqqas ta' kummenti rigward il-prezzijiet tal-esportazzjoni, il-premessa 89 tar-Regolament proviżorju ġiet ikkonfermata.

(76)

Produttur esportatur minnhom afferma li jenħtieġ li l-valur normali jiġi aġġustat skont l-Artikolu 2(10) tar-Regolament bażiku biex jirrifletti l-fatt li l-produtturi esportaturi Ċiniżi ma ddisinjawx il-prodott ikkonċernat. Id-disinn ġie pprovdut mill-importatur mhux relatat.

(77)

Billi l-produtturi Indjani fil-kampjun iddisinjaw il-prodott simili mibjugħ fis-suq domestiku tagħhom, il-Kummissjoni aċċettat din l-affermazzjoni. Il-kwantifikazzjoni relattiva tal-aġġustament saret fuq il-bażi tad-dejta rilevanti tal-produtturi tal-Unjoni fil-kampjun.

(78)

Is-CCCME ddikjarat li l-aġġustament għat-taxxi indiretti kien illegali u ma ssemmiex fil-premessa 91 tar-Regolament proviżorju fl-aġġustamenti li saru fl-Artikolu 2(10). Is-CCCME affermat li l-aġġustament għar-rifużjoni parzjali tal-VAT hu bbażat fuq il-valutazzjoni mill-Kummissjoni tal-istatus ta' ekonomija mhux tas-suq tar-RPĊ.

(79)

Il-Kummissjoni ma laqgħetx dawn l-affermazzjonijiet. Il-Kummissjoni għamlet aġġustament skont l-Artikolu 2(10)(b) għad-differenza fit-taxxi indiretti bejn il-bejgħ mill-esportazzjonijiet mir-RPĊ lejn l-Unjoni (fejn tintalab taxxa ta' 17 % fuq l-esportazzjoni u 5 % minnha mbagħad tintradd lura) u t-taxxi indiretti fuq il-bejgħ domestiku fl-Indja (fejn it-taxxi ġew esklużi mill-prezz dometiku). Dan l-aġġustament ma huwa relatat bl-ebda mod mal-applikazzjoni tal-metodoloġija tal-pajjiż analogu għar-RPĊ. Il-premessa 91 tar-Regolament proviżorju ma semmietx dan l-aġġustament, li tħalla barra bi żball. Madankollu, l-aġġustament ġie rrapportat fid-divulgazzjoni proviżorja speċifika mogħtija lill-produtturi esportaturi fil-kampjun. Ħadd minnhom ma kkummenta fuq dan l-aġġustament.

(80)

Wara divulazzjoni finali, is-CCCME tenniet l-oġġezzjoni tagħha għall-fatt li l-Kummissjoni użat l-Artikolu 2(10)(b) tar-Regolament bażiku biex tiżgura l-komparabbiltà bejn il-prezz ta' esportazzjoni mir-RPĊ u l-valur normali mill-Indja. Is-CCCME ddikjarat li billi s-sistema tal-VAT tal-esportazzjonijiet kienet waħda mir-raġunijiet għaliex ir-RPĊ mhijiex pajjiż b'ekonomija tas-suq, ma tistax tintuża biex isir aġġustament għall-paragun tal-prezzijiet. Dan l-argument ġie miċħud. L-Artikolu 2(7)(a) tar-Regolament bażiku jirrikjedi li l-Kummissjoni ssib sors alternattiv tal-valur normali meta pajjiż ma jkunx ekonomija tas-suq u meta kumpanija ma tiddikjarax li tkun ingħatat Trattament ta' Ekonomija tas-Suq (“TES”). Ladarba jiġi determinat il-valur normali, il-Kummissjoni tiġi obbligata tiżgura paragun ġust u raġonevoli, f'konformità mad-dispożizzjonijiet tal-Artikolu 2(10) tar-Regolament bażiku.

(81)

Kif speċifikat fil-premessa 79 hawn fuq, l-esportazzjonijiet tal-oġġetti fonduti mir-RPĊ huma soġġetti għal VAT tal-esportazzjonijiet parzjalment rifondabbli, filwaqt li l-bejgħ domestiku fl-Indja għandu t-taxxi kollha rimborżati. Għaldaqstant, sabiex jiġi żgurat paragun ġust u f'konformità mal-ġurisprudenza stabbilita (3), il-Kummissjoni kienet obbligata taġġusta l-valur normali skont l-Artikolu 2(10)(b) tar-Regolament bażiku, bħal kif il-Kummissjoni kienet diġà għamlet għal differenzi oħra li jaffettwaw paragun skont dispożizzjonijiet oħra tal-Artikolu 2(10) tar-Regolament bażiku.

(82)

Jekk kumpanija fir-RPĊ tkun ingħatat TES, jiġi applikat l-istess aġġustament għall-valur normali, billi tinstab l-istess differenza fit-taxxa.

(83)

Is-CCCME u żewġ produtturi esportaturi Ċiniżi ddikjaraw li jinħtieġ li l-Kummissjoni tagħmel divulgazzjoni ulterjuri għar-raġunament dwar l-użu tal-PCN imqassar li jidentifika t-tipi ta' prodotti differenti għall-kalkoli u l-impatt ta' dan fuq il-paragun ġust.

(84)

F'dan ir-rigward, il-Kummissjoni nnotat li kienet ikkonformat mal-obbligu tagħha li tiżgura paragun ġust u li l-PCN imqassar ippermettielha tqabbel it-totalità tal-volum ta' esportazzjonijiet mal-aktar tipi li jixxiebhu tal-prodott simili b'kunsiderazzjoni tal-karatteristiċi fiżiċi bażiċi tagħhom. Il-Kummissjoni ma stabbilixxiet ebda differenza fil-valur tas-suq tal-karatteristiċi tal-prodott imħollija barra fil-PCN imqassar. Barra minn hekk, ebda produttur esportatur Ċiniż ma għamel affermazzjoni kkwantifikata biex jitlob aġġustament għad-differenzi fil-karatteristiċi fiżiċi.

(85)

Wara divulgazzjoni finali, is-CCCME u żewġ produtturi esportaturi Ċiniżi tennew li l-Kummissjoni naqqset milli tiżgura l-komparabbiltà tal-prezzijiet. Is-CCCME ddikjarat li jinħtieġ li l-Kummissjoni tagħmel aġġustamenti għad-differenzi fil-prodotti riflessi jew le bil-karatteristiċi oriġinali tal-PCN. Is-CCCME ddikjarat li ma kellhiex aċċess għall-karatteristiċi tekniċi tal-prodott mibjugħ mill-produtturi Indjani u li d-divulgazzjoni tal-PCN sħiħ tal-prodott manifatturat mill-produtturi Indjani ma kenitx biżżejjed.

(86)

Il-Kummissjoni ma laqgħetx dawn l-affermazzjonijiet. Il-Kummissjoni fakkret li, f'Ġunju 2017, għamlet il-klassifikazzjoni tal-prodotti manifatturati fil-pajjiż analogu disponibbli għall-partijiet interessati kollha skont il-15-il karatteristika teknika tal-PCN oriġinali. Barra mill-katalogi tal-prodotti, li l-produtturi Indjani ma kellhomx, il-Kummissjoni ma kellha l-ebda sors alternattiv ieħor ta' informazzjoni teknika li ma kienx kunfidenzjali min-natura tiegħu jew seta' jitqassar b'mod sinifikattiv biex jiġi rivedut minn partijiet interessati oħra.

(87)

Barra minn hekk, filwaqt li l-15-il karatteristika tal-prodott manifatturat mill-produtturi Indjani fil-PCN oriġinali kienu magħrufa sew mas-CCCME, hija ma għamlet l-ebda dikjarazzjoni speċifika dwar x'tip ta' aġġustament jinħtieġ li jsir, mhux biss lil hinn mill-PCN, iżda anki fil-PCN. Barra minn hekk, il-Kummissjoni ma identifikatx il-ħtieġa għal dan l-aġġustament matul iż-żjajjar ta' verifika tagħha. Ġie nnutat li, fil-preżentazzjoni tagħha tat-22 ta' Diċembru 2016 dwar l-għażla ta' pajjiż analogu, is-CCCME stess saħqet li “l-użu tal-Indja jindirizza wkoll kwistjonijiet tal-paragun ta' tipi ta' prodotti, għal darb'oħra għax id-dejta tkun aktar rappreżentattiva […]. Bl-Indja bħala l-pajjiż analogu, id-dejta tas-sors tkun akbar b'mod sinifikanti u skont dan ikun ħafna aktar probabbli li l-Kummissjoni jkollha biżżejjed dejta biex tagħmel paragun tat-tipi ta' prodotti” [traduzzjoni mhux uffiċjali]. Għaldaqstant, din l-affermazzjoni ġiet miċħuda.

(88)

Is-CCCME ddikjarat li jinħtieġ li l-Kummissjoni tagħmel aġġustamenti għall-ispiża tal-produzzjoni tal-produtturi Indjani għall-irregolaritajiet allegati li rriżultaw mill-volum baxx ta' produzzjoni ta' prodotti tal-ħadid duttili. Is-CCCME ma pprovdiet ebda evidenza biex issostni din id-dikjarazzjoni.

(89)

Billi nstab li l-bejgħ tal-prodotti tal-ħadid duttili fl-Indja kien rappreżentattiv, il-Kummissjoni qieset li t-tali aġġustament ma kienx iġġustifikat. F'kull każ, billi din l-affermazzjoni ma kinitx sostanzjata, kellha tiġi miċħuda.

(90)

Wara divulgazzjoni finali, is-CCCME tenniet din l-affermazzjoni u ppreżentat li kienet spjegat lill-Kummissjoni li l-irregolaritajiet allegati rriżultaw fi spiża tal-produzzjoni li kienet għolja b'mod mhux raġonevoli. Is-CCCME żiedet li fin-nuqqas tad-divulgazzjoni tal-informazzjoni dwar l-ispejjeż pertinenti għall-produtturi Indjani, mhux dejjem kienet f'pożizzjoni li tagħmel talba sostanzjata għal aġġustament.

(91)

Il-Kummissjoni ma rċeviet l-ebda spjegazzjoni dettaljata dwar din it-talba. Fil-kummenti tagħha dwar id-divulgazzjoni proviżorja, is-CCCME ppreżentat li “jista' jkun hemm irregolarità fil-produzzjoni jew konsum żejjed ta' diversi fatturi tal-ispejjeż li jirriżulta fi spiża tal-produzzjoni unitarja li hija għolja b'mod żbaljat”. Is-CCCME baqgħet vaga jew siekta dwar liema spejjeż ta' produzzjoni ġew affettwati, fil-konfront ta' liema parametru referenzjarju jinħtieġ li tiġi stabbilita l-irregolarità allegata u kif jinħtieġ li jiġi kkalkulat l-aġġustament.

(92)

Il-Kummissjoni ma qablitx li din l-affermazzjoni ma setgħetx issir fin-nuqqas ta' divulgazzjoni tal-ispiża tal-produzzjoni tal-produtturi Indjani.

(93)

L-ewwel nett, id-dejta dwar l-ispejjeż tal-produtturi Indjani kienet kunfidenzjali fin-natura tagħha u ma setgħetx titqassar għall-ispezzjoni minn parti interessata oħra b'mod sinifikattiv għall-finijiet tas-CCCME u tipproteġi d-dejta sensittiva kummerċjali tal-produtturi Indjani.

(94)

It-tieni nett, il-proċessi tal-produzzjoni fl-Indja u r-RPĊ huma simili ħafna. Dan ġie kkonfermat fil-premessa 79 tar-Regolament proviżorju u fil-preżentazzjoni tas-CCCME tat-22 ta' Diċembru 2016 dwar l-għażla tal-Indja bħala l-pajjiż analogu. Is-CCCME ddikjarat li “l-maġġoranza tal-produtturi Ċiniżi huma fonderiji żgħar u l-proċess tal-produzzjoni mhuwiex awtomatizzat, iżda aktar manwali”. Innutat ukoll li “huwa fatt magħruf li l-Indja u ċ-Ċina huma simili fil-livelli ta' żvilupp u fid-daqs tagħhom” u “fir-rigward ta' elementi oħra li jaffettwaw l-ispejjeż u l-prezzijiet”, li r-RPĊ u l-Indja huma “aktar simili għal xulxin miċ-Ċina u kull wieħed mill-pajjiżi l-oħrajn”. Għaldaqstant, is-CCCME, li tiddikjara li tirrappreżenta għadd għoli ta' produtturi Ċiniżi ta' kull daqs, setgħet għamlet id-dikjarazzjonijiet tagħha mingħajr il-ħtieġa li taċċessa d-dejta kunfidenzjali tal-produtturi Indjani. Fuq il-bażi tal-għarfien tagħha rigward l-industrija, kellha tkun kapaċi tispeċifika x-xejriet tal-manifattura u l-proporzjonijiet tal-produzzjoni li jwasslu għall-ispiża ta' produzzjoni unitarja mhux raġonevoli allegata u tissostanzja l-aġġustament iddikjarat.

(95)

Il-Kummissjoni ma sabet l-ebda element li kien jiġġustifika aġġustament għall-ispiża tal-produzzjoni tal-produtturi Indjani fir-rigward tad-determinazzjoni tal-valur normali fil-pajjiż analogu. Meta wieħed iqis li nstab li l-volum tal-bejgħ tal-produtturi Indjani huwa rappreżentattiv u fin-nuqqas ta' xi talba speċifika u sostanzjata mis-CCCME, il-Kummissjoni ċaħdet it-talba li jinħtieġ li tiġi aġġustata l-ispiża tal-produzzjoni tal-produtturi Indjani.

(96)

Produttur esportatur Ċiniż minnhom afferma li l-Kummissjoni kienet aġġustat b'mod indebitu l-prezzijiet tal-esportazzjoni tagħha għall-ispejjeż tal-kreditu billi hi ma ġarrbet ebda spiża bħal din.

(97)

Il-Kummissjoni ċaħdet din l-affermazzjoni. Biex tiżgura paragun ġust tal-prezzijiet, ġew applikati provvedimenti għall-ispejjeż ta' kreditu fuq il-prezz tal-esportazzjoni tal-produtturi esportaturi Ċiniżi kollha li taw termini ta' pagament lill-klijenti tagħhom, billi kull kreditu mogħti hu fattur meħud f'kunsiderazzjoni fid-determinazzjoni tal-prezzijiet mitluba. Dan il-produttur esportatur instab li ta kreditu lill-klijenti tiegħu u, għalhekk, aġġustament għall-ispejjeż tal-kreditu kien iġġustifikat, għad li l-kumpanija ma sselfitx flus biex tkopri ż-żmien ta' trasportazzjoni u l-pagament mill-klijent.

(98)

Wara divulgazzjoni finali, is-CCCME ppreżentat li jinħtieġ li l-Kummissjoni tagħmel aġġustament għall-valur normali meta jkun ibbażat fuq prezzijiet biex jagħmel tajjeb għat-taxxi indiretti mġarrba minn materjali fiżikament inkorporati fil-prodott simili.

(99)

Madankollu, billi f'dan il-każ il-materjali inkorporati fil-prodott simili ma kinux jinkludu imposti ta' importazzjoni jew taxxi mhux rimborżati, is-suġġeriment tas-CCCME li kellu jwassal għal aġġustament tal-prezz kien irrelevanti.

(100)

Kif spjegat fil-premessi aktar 'il fuq, il-Kummissjoni ħadet f'kunsiderazzjoni ċerti kummenti mingħand partijiet interessati u reġgħet ikkalkolat il-marġni tad-dumping tal-produtturi esportaturi Ċiniżi.

(101)

Il-marġini tad-dumping definittivi mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 1

Marġini tad-dumping definittivi

(102)

Wara d-divulgazzjoni, il-Kummissjoni ma rċeviet ebda kumment ieħor rigward l-Indja.

(103)

Għalhekk, il-Kummissjoni kkonfermat is-sejbiet proviżorji tagħha ta' stabbiliment ta' ebda dumping għall-gruppi fil-kampjun tal-produtturi esportaturi fl-Indja.

(104)

B'konsegwenza ta' dan, il-Kummissjoni kkonfermat li hi ma stabbilixxiet l-ebda dumping għall-produtturi esportaturi li kkooperaw barra l-kampjun, f'konformità mal-Artikolu 9(6) tar-Regolament bażiku, u l-ebda dumping għall-produtturi esportaturi l-oħra kollha fl-Indja billi l-esportazzjonijiet tal-produtturi esportaturi Indjani li kkooperaw jirrappreżentaw volum għoli ħafna (madwar 85 %) tal-esportazzjonijiet Indjani totali lejn l-Unjoni.

(105)

Fin-nuqqas ta' kummenti fir-rigward tal-industrija tal-Unjoni u tal-produzzjoni tal-Unjoni, il-Kummissjoni kkonfermat il-konklużjonijiet tagħha stabbiliti fil-premessi minn 108 sa 111 tar-Regolament proviżorju.

(106)

Fin-nuqqas ta' kummenti fir-rigward tal-konsum tal-Unjoni, il-Kummissjoni kkonfermat il-konklużjonijiet tagħha stabbiliti fil-premessi minn 112 sa 114 tar-Regolament proviżorju.

(107)

Is-CCCME tenniet it-tħassib tagħha li qasmet fis-sottomissjoni tagħha tat-23 ta' Jannar 2017 rigward l-kredibbiltà tad-dejta dwar l-importazzjonijiet tal-prodott ikkonċernat. Hi xeħtet dubju fuq il-metodu użat mill-ilmentaturi biex waslu għad-dejta dwar l-importazzjonijiet limitata għall-prodott ikkonċernat billi użaw id-dejta aġġustata tal-Eurostat u aċċettata mill-Kummissjoni, u argumentat li jinħtieġ li l-Kummissjoni tibbaża l-eżami tad-dannu tagħha b'mod oġġettiv fuq evidenza pożittiva u mhux fuq suppożizzjonijiet mhux sostanzjati mill-ilmentaturi. Is-CCCME affermat ukoll li l-oneru li tikseb dejta kredibbli dwar l-importazzjonijiet jaqa' fuq il-Kummissjoni.

(108)

B'appoġġ għall-affermazzjoni tagħha li d-dejta dwar l-importazzjonijiet użata mill-Kummissjoni allegatament ma kenitx kredibbli u ma setgħetx tikkwalifika bħala evidenza pożittiva, fis-6 ta' Novembru 2017 is-CCCME ppreżentat għall-ewwel darba ċifri ta' volum tal-esportazzjonijiet għall-prodott ikkonċernat mir-RPĊ li ddikjarat li kienu bbażati fuq statistika tal-esportazzjoni doganali tar-RPĊ għall-prodott ikkonċernat li ġabret fuq bażi ta' tranżazzjoni bi tranżazzjoni u fuq bażi kunfidenzjali. Is-CCCME kompliet tafferma li setgħet tidentifika mid-deskrizzjoni tal-prodott liema prodotti ma kinux ikkonċernati mill-prodott u, b'riżultat ta' dan, setgħet tikkalkula l-volum attwali tal-prodotti kkonċernat esportat mir-RPĊ.

(109)

Il-Kummissjoni nnutat li s-CCCME kienet ikkalkulat hi stess il-volum esportat tal-prodott ikkonċernat, anki fuq bażi ta' tranżazzjoni bi tranżazzjoni, billi użat id-dejta doganali tar-RPĊ, u b'hekk eskludiet ċerti deskrizzjonijiet ta' prodotti. Il-Kummissjoni qieset id-dejta tal-esportazzjoni pprovduta mis-CCCME u sabet li din id-dejta ma setgħetx tibdel is-sejbiet tagħha skont ix-xejriet tas-sehem mis-suq, il-volum tal-importazzjonijiet u l-konsum tal-Unjoni matul il-perjodu taħt kunsiderazzjoni, Il-Kummissjoni kompliet tinnota li s-CCCME ma pprovdiet l-ebda evidenza dwar il-kompjutezza u l-preċiżjoni tal-ġbir tad-dejta tagħha. Il-Kummissjoni nnutat ukoll li s-CCCME ma speċifikatx liema bażi ta' dejta uffiċjali mill-awtoritajiet doganali tar-RPĊ kienet użat li kienet tippermetti ġbir ta' dejta tranżazzjoni bi tranżazzjoni u identifikazzjoni tad-deskrizzjoni tal-prodott. Fl-aħħar nett, il-Kummissjoni nnutat li l-istatistika tal-esportazzjoni mir-RPĊ mhijiex neċessarjament identika għall-istatistika tal-importazzjoni miġbura mill-Eurostat minħabba ż-żmien meħud bejn l-esportazzjoni mir-RPĊ sal-importazzjoni attwali fl-Unjoni. Il-Kummissjoni analizzat id-dejta tal-esportazzjoni pprovduta mis-CCCME u sabet li din id-dejta ma setgħetx tibdel is-sejbiet tagħha skont ix-xejriet tas-sehem mis-suq, il-volum tal-importazzjonijiet u l-konsum tal-Unjoni matul il-perjodu kkunsidrat. Konsegwentement, il-Kummissjoni ċaħdet id-dikjarazzjoni li d-dejta tal-importazzjoni użata minnha ma kenitx kredibbli.

(110)

Il-Kummissjoni nnotat li l-metodu użat mill-ilmentaturi biex jaslu għad-dejta dwar l-importazzjonijiet kien relatat mal-prodott ikkonċernat matul il-perjodu taħt kunsiderazzjoni kien ibbażat fuq dejta tal-Eurostat. Dan il-metodu inkluda għall-2013 it-totali tal-kodiċijiet NM 7325 10 50 u 7325 10 92, perċentwal ta' 30 % tal-kodiċi NM 7325 10 99, u tal-kodiċi NM 7325 99 10 nieqes volum fiss. Wara tibdil fil-kodiċijiet NM għall-2014 sal-perjodu ta' investigazzjoni l-ilmentaturi użaw perċentwal ta' 60 % tal-kodiċi NM 7325 10 00 fir-rigward tal-importazzjonijiet mir-RPĊ u tal-kodiċi NM 7325 99 10 nieqes volum fiss.

(111)

Billi l-Kummissjoni ma sabet ebda sors alternattiv ieħor ta' informazzjoni li jkun jirrifletti b'mod aktar preċiż id-dejta dwar l-importazzjonijiet għall-prodott ikkonċernat, hi qieset il-metodu bbażat fuq id-dejta tal-Eurostat bħala l-aktar wieħed xieraq. Għaldaqstant, hi ċaħdet l-affermazzjoni tas-CCCME.

(112)

Kemm l-FCI kif ukoll is-CCCME ddikjaraw li l-metodoloġija użata għall-valutazzjoni tal-importazzjonijiet mir-RPĊ inkludiet b'mod skorrett il-prodotti importati kollha taħt il-kodiċi NM 7325 99 10 nieqes volum fiss, kif ipproponew l-ilmentaturi, billi dan il-kodiċi tipikament ma kienx jintuża għall-prodott ikkonċernat qabel l-impożizzjoni tal-miżuri antidumping fl-2005 u l-ilmentaturi ma pprovdewx evidenza li dan il-kodiċi NM kien jintuża għall-importazzjonijiet tal-prodott ikkonċernat wara l-2009. Għaldaqstant, l-FCI talbet l-esklużjoni jew it-teħid f'kunsiderazzjoni ta' proporzjon ta' dan il-kodiċi NM għall-kalkolu tal-volum ta' importazzjoni tal-prodott ikkonċernat.

(113)

Il-Kummissjoni nnotat li analiżi tal-importazzjonijiet taħt dan il-kodiċi NM mindu ġew imposti l-miżuri proviżorji sal-bidu ta' Ottubru 2017 uriet importazzjonijiet sinifikanti ta' 6 796 tunnellata taħt il-kodiċi TARIC 7325991051 mir-RPĊ li jirreferi b'mod esklużiv għall-prodott ikkonċernat. Għaldaqstant, hu ċar li l-prodott ikkonċernat hu importat taħt il-kodiċi NM 7325 99 10 ukoll. Madankollu, il-Kummissjoni ma kellha ebda evidenza li l-importazzjonijiet ta' prodotti oħra taħt dan il-kodiċi NM segwew l-istess xejra bħall-prodott ikkonċernat mill-2005. Konsegwentement, l-użu ta' perċentwal fuq il-perjodu taħt kunsiderazzjoni ma jkunx kredibbli.

(114)

Għaldaqstant, il-Kummissjoni ddeċidiet li ma taġġustax il-volum tal-importazzjonijiet mir-RPĊ. Il-Kummissjoni nnotat ukoll li anki li kieku hi teskludi dan il-kodiċi NM mill-analiżi tagħha, il-volum tal-importazzjonijiet xorta waħda juri żieda komparabbli fis-sehem mis-suq tul il-perjodu taħt kunsiderazzjoni.

(115)

Is-CCCME ddikjarat li la l-ilmentaturi u lanqas il-Kummissjoni ma spjegaw il-perċentwal stmat tal-volum tal-importazzjonijiet tal-prodott ikkonċernat taħt il-kodiċijiet NM 7325 10 99 u r-raġuni għaliex il-perċentwal tal-volum tal-importazzjonijiet taħt il-kodiċi 7325 10 99 baqa' stabbli matul il-perjodu taħt kunsiderazzjoni.

(116)

Kif indirizzat fil-premessa 122 tar-Regolament proviżorju, il-Kummissjoni bbażat id-determinazzjoni tal-volum tal-importazzjonijiet tal-prodott ikkonċernat mir-RPĊ fuq il-metodu propost mill-ilmentaturi għaliex hi qisitu kredibbli u oġġettiv. Ebda parti ma pproponiet metodu aktar kredibbli ieħor. Għall-esklużjoni tal-ispralli tal-kanali, il-Kummissjoni ħadet il-bejgħ medju tal-ispralli tal-kanali tal-produtturi esportaturi Ċiniżi fil-kampjun fil-perjodu ta' investigazzjoni, li ammonta għal 10 % tal-importazzjonijiet totali. Dan il-perċentwal intuża għall-perjodu taħt kunsiderazzjoni. Billi s-CCCME ma pprovdiet ebda dejta alternattiva għall-volum tal-importazzjonijiet tal-ispralli tal-kanali mir-RPĊ, l-affermazzjoni ġiet miċħuda.

(117)

L-FCI ddikjarat li f'dan il-każ ma tista' tiġi stabbilita ebda żieda sinifikanti fl-importazzjonijiet billi, meta wieħed iqis is-snin kollha mindu skadew il-miżuri antidumping fl-2010, l-importazzjonijiet żdiedu biss bejn l-2013 u l-2014 u filwaqt li l-importazzjonijiet fil-perjodu ta' investigazzjoni kienu ogħla mil-livelli tal-2013, dawn kienu ferm inqas mil-livelli tal-importazzjonijiet tal-2010 u tal-2011.

(118)

Il-Kummissjoni sabet li l-perjodu taħt kunsiderazzjoni kien raġonevoli u konformi mal-prattika standard tal-Kummissjoni biex teżamina x-xejriet rilevanti għall-valutazzjoni tad-dannu. Għaldaqstant, ma ħaditx f'kunsiderazzjoni s-snin preċedenti, kif issuġġerixxiet l-FCI.

(119)

Fir-rigward tat-twaqqigħ tal-prezz, l-FCI ddikjarat li l-kalkoli proviżorji huma qarrieqa, billi dawn iqabblu l-prezzijiet tal-prodotti mibjugħa mill-fonderiji Ċiniżi lill-importaturi fl-Unjoni ma' dak tal-prodotti mibjugħa mill-industrija tal-Unjoni lill-klijenti finali u ma kinux jieħdu f'kunsiderazzjoni l-ispejjeż imġarrba esklużivament mill-importaturi mhux relatati. Spejjeż bħal dawn jinkludu l-ispejjeż tar-RuŻ, spejjeż għall-ħolqien ta' mudelli u ta' prototipi, spejjeż ta' ċertifikazzjoni, spejjeż ta' omologazzjoni, verifiki tal-kwalità u verifiki tal-konformità, spejjeż tal-ħżin, u spejjeż tal-bejgħ.

(120)

Il-Kummissjoni vverifikat din id-dejta u ddeċidiet li taġġusta l-marġnijiet ta' twaqqigħ tal-prezz għal dawn l-ispejjeż. Il-prezzijiet tal-produttur tal-industrija tal-Unjoni ġew aġġustati 'l isfel bl-ispejjeż tar-RuŻ medji ponderati tal-produtturi tal-Unjoni inklużi fil-kampjun li koprew l-ispejjeż rilevanti kollha msemmija fil-premessa preċedenti. L-aġġustament kien 2,2 % tal-fatturat tal-produtturi tal-Unjoni inklużi fil-kampjun.

(121)

Barra minn hekk, sar aġġustament ta' madwar EUR 33 għal kull tunnellata fuq il-prezz tal-importazzjonijiet għall-ispejjeż tal-importazzjoni fuq il-bażi tad-dejta taż-żewġ importaturi mhux relatati vverifikata wara l-impożizzjoni tal-miżuri proviżorji.

(122)

Is-CCCME talbet għal aktar dettalji dwar il-marġini tat-twaqqigħ tal-prezz għal kull produttur esportatur inkluż fil-kampjun. Għall-finijiet tad-determinazzjoni tad-dannu, l-effett tal-importazzjonijiet oġġett ta' dumping fuq il-prezzijiet huwa analizzat bħala wieħed mill-indikaturi tad-dannu u l-Artikolu 3(3) tar-Regolament bażiku jitlob li t-twaqqigħ tal-prezz ikun sinifikanti. F'dan il-każ it-twaqqigħ tal-prezz fil-firxa minn 31,6 % sa 39,2 % jista' jitqies sinifikanti. Għal din is-sejba mhuwiex meħtieġ li kull tranżazzjoni turi t-twaqqigħ tal-prezz. Dan għaliex l-effett u l-impatt tal-importazzjonijiet oġġett ta' dumping fuq l-industrija tal-Unjoni huwa analizzat kollu kemm hu; dan jinkludi t-twaqqigħ tal-prezz mill-importazzjonijiet oġġett ta' dumping. F'kull każ, għal informazzjoni, il-marġni tat-twaqqigħ tal-prezz tal-produtturi esportaturi inklużi fil-kampjun huma hekk:

Tabella 2

Marġni tat-twaqqigħ tal-prezz

(123)

Wara divulgazzjoni finali, l-ilmentaturi oġġezzjonaw għall-metodoloġija użata mill-Kummissjoni biex jaġġustaw il-prezzijiet tal-produtturi tagħhom 'l isfel minflok ma jaġġustaw il-prezzijiet tal-importazzjoni 'l fuq, filwaqt li l-maġġoranza tal-ispejjeż tar-RuŻ ma jiġġarbux mill-importaturi affattu iżda jiġġarrbu mill-produtturi fir-RPĊ. Barra minn hekk, l-ilmentaturi qiesu li l-ispejjeż ta' wara l-importazzjoni kienu għoljin wisq u jistgħu jinkludu spejjeż relatati mal-importazzjonijiet tal-ispralli tal-kanali u dazju tal-importazzjoni mhux korrett ta' 2,7 % minflok 1,7 % għall-prodotti kollha tal-ħadid duttili.

(124)

L-aġġustament tal-ispejjeż tar-RuŻ għall-marġni tat-twaqqigħ tal-prezz u għal-livell ta' eliminazzjoni tal-ħsara kien ibbażat, minn naħa waħda, fuq dejta vverifikata tal-produtturi tal-Unjoni inklużi fil-kampjun, u min-naħa l-oħra, fuq evidenza li ħarġet matul iż-żjajjar ta' verifika għand l-importaturi mhux relatati li jġarrbu dawn l-ispejjeż għall-produzzjoni tal-prodott ikkonċernat fir-RPĊ. Billi l-ilmentaturi ma pprovdewx evidenza għall-affermazzjoni tagħhom li dawn l-ispejjeż ma ġġarbux minn importaturi mhux relatati, il-Kummissjoni ċaħdet l-affermazzjoni tagħhom.

(125)

Il-kalkolu tal-ispejjeż wara l-importazzjoni huwa bbażat fuq dejta vverifikata taż-żewġ importaturi mhux relatati inklużi fil-kampjun. Din id-dejta kienet unikament għall-prodott ikkonċernat, għaldaqstant ma kenitx tinkludi l-prodotti esklużi (pereżempju l-ispralli tal-kanali). Għalhekk, il-Kummissjoni ċaħdet din l-affermazzjoni.

(126)

Rigward l-aġġustament għad-dazji tal-importazzjoni, il-Kummisjoni użat ir-rata tad-dazju doganali applikabbli għall-importazzjonijiet tal-prodotti tal-ħadid duttili. Ma qisitx dikjarazzjonijiet ħżiena possibbli biex tevita milli tħallas il-livell korrett ta' dazji tal-importazzjoni. Għaldaqstant, din l-affermazzjoni ġiet miċħuda.

(127)

Wara divulgazzjoni finali, l-FCI pprovdiet ir-riżultati ta' żewġ offerti riċenti mnedija minn korpi pubbliċi Taljani, li ntrebħu minn (rivenditur ta') produtturi tal-Unjoni, li offrew prezz aktar baxx għall-prodott simili mill-importaturi mhux relatati għall-prodott ikkonċernat li kien ħafna aktar baxx minn dak li ġie ddikjarat mill-ilmentaturi u rrappurtat fir-Regolament proviżorju.

(128)

Il-Kummissjoni nnutat li din l-evidenza aneddotali riċenti mhijiex biżżejjed biex jiġi konkluż li jinħtieġ li d-dejta vverifikata tagħha għall-perjodu ta' investigazzjoni titqies mhux kredibbli. Barra minn hekk, it-taħlita ta' prodotti ta' dawn l-offerti tvarja mit-taħlita ta' prodotti ta' produzzjoni medja u l-ispiża ta' produzzjoni korrispondenti tagħha Għalhekk, il-Kummissjoni ċaħdet din l-affermazzjoni.

(129)

Fin-nuqqas ta' xi kumment ieħor fir-rigward tal-importazzjonijiet mir-RPĊ u wara r-reviżjoni tal-kalkoli tat-twaqqigħ tal-prezz stipulati fil-premessi minn 119 sa 122, il-Kummissjoni kkonfermat il-konklużjonijiet l-oħra kollha stabbiliti fil-premessi minn 115 sa 128 tar-Regolament proviżorju.

(130)

Is-CCCME nnotat li l-Kummissjoni bbażat l-analiżi tagħha tad-dejta makroekonomika fuq dejta attwali fir-rigward tal-ilmentaturi u tal-industrija li takkumpanja u fuq stimi pprovduti mill-ilmentaturi għall-bqija tal-industrija tal-Unjoni. Iddikjarat li dawn l-istimi ma setgħux jitqiesu bħala evidenza pożittiva billi l-ammonti u s-sorsi tagħhom ma ġewx divulgati lill-partijiet interessati. Wara divulgazzjoni finali, is-CCCME tenniet l-affermazzjoni tagħha.

(131)

Il-Kummissjoni enfasizzat li ma ddiżaggregatx l-analiżi tagħha tal-industrija tal-Unjoni f'ilmentaturi fil-konfront ta' mhux ilmentaturi u nnutat li kienet talbet għad-dejta makroeknomika mill-industrija tal-Unjoni u kienet għamlet din id-dejta li użat fl-investigazzjoni disponibbli fil-fajl miftuħ għall-ispezzjoni mill-partijiet interessati. Kif speċifikat fil-premessa 32 tar-Regolament proviżorju, hi kienet ivverifikat ukoll fil-post fil-bini tal-ilmentaturi s-sorsi u l-proċess segwit minn dawn tal-aħħar għall-kumpilazzjoni tad-dejta għall-bqija tal-industrija. Barra minn hekk, id-dejta vverifikata li ġiet mingħand il-kumpaniji fil-kampjun kopriet sehem sinifikanti mid-dejta makroekonomika ġenerali, jiġifieri 48 % tal-volum totali tal-produzzjoni u 43 % tal-bejgħ totali tal-industrija tal-Unjoni. Għalhekk, il-Kummissjoni ċaħdet din l-affermazzjoni mis-CCCME.

(132)

Wara divulgazzjoni finali, l-FCI ddikjarat li l-Kummissjoni tikkontradixxi lilha nnifisha, għax il-premessa 132 tar-Regolament proviżorju tirrapporta li l-Kummissjoni evalwat indikaturi makroekonomiċi relatati mal-produtturi kollha tal-Unjoni. Madankollu, fil-premessa 131 hawn fuq ġie ddikjarat li d-dejta makroekonomika hija bbażata fuq dejta vverifikata li ġejja mill-kumpaniji inklużi fil-kampjun li jkopru 48 % tal-volum tal-produzzjoni totali u 43 % tal-bejgħ totali tal-industrija tal-Unjoni. Huwa ċar li d-dejta li tkopri inqas minn 50 % tal-output totali mhijiex rappreżentattiva tal-industrija tal-Unjoni kollha kemm hi. Fuq il-bażi ta' dak li ntqal qabel, is-sejbiet tal-Kummissjoni dwar indikaturi makroekonomiċi huma bbażati fuq dejta parzjali u qarrieqa li ma tippermettix evalwazzjoni xierqa tas-sitwazzjoni ġenerali tal-industrija tal-Unjoni.

(133)

Il-Kummissjoni nnutat li vverifikat id-dejta makroekonomika rigward l-industrija tal-Unjoni kollha kemm hi fil-post fil-bini tal-ilmentaturi. Barra minn hekk, il-Kummissjoni vverifikat fid-dettall il-kumpaniji inklużi fil-kampjun, li jkopru parti kbira mill-volum tal-produzzjoni tal-industrija tal-Unjoni. Għaldaqstant, id-dejta makroekonomika mhijiex unikament ibbażata fuq il-kumpaniji inklużi fil-kampjun.

(134)

Barra minn hekk, l-FCI ddikjarat li d-dejta dwar l-indikaturi makroekonomiċi huma problematiċi kif jidher mill-fatt li l-Kummissjoni kellha tivverifika s-sorsi oriġinali tad-dejta fil-post tal-avukati tal-ilmentaturi f'aktar minn okkażjoni waħda. Barra minn hekk, l-ilmentaturi ppreżentaw verżjonijiet differenti tad-dejta dwar l-indikaturi makroekonomiċi, kull darba f'ċifri differenti. Dan il-fatt waħdu juri li l-metodoloġija li segwew l-ilmentaturi hija żbaljata b'mod irrimedjabbli.

(135)

Barra minn hekk, l-FCI nnutat li d-dejta li fuqha huma bbażati s-sejbiet tal-Kummissjoni huma parzjali. Id-dejta tirreferi biss għall-ilmentaturi u għal wieħed biss miż-żewġ sostenituri. B'kollox, id-dejta tammonta għal inqas minn 50 % tal-produzzjoni totali tal-prodott simili fl-Unjoni.

(136)

Wara divulgazzjoni finali, l-ilmentaturi ċċaraw ukoll li sabiex tinġabar id-dejta, użaw dejta dettaljata dwar indikaturi tad-dannu minn tweġibiet tal-kwestjonarju, iffirmati minn uffiċjali responsabbli fil-kumpaniji inkwistjoni, li ġew fornuti mill-ilmentaturi u wieħed mill-produtturi sostenituri fl-ilment u sussegwentement ġew aġġornati biex ikopru l-perjodu ta' investigazzjoni. L-istimi saru mill-ilmentaturi għad-dejta li tikkonċerna produtturi tal-Unjoni oħrajn fuq il-bażi tal-informazzjoni dwar is-suq tagħhom. Fin-nuqqas ta' dejta fattwali rigward uħud mill-produtturi tal-Unjoni, l-ilmentaturi ħadu approċċ konservattiv, billi assumew 100 % tal-użu tal-kapaċità u ċifra ta' bejgħ kostanti matul il-perjodu taħt kunsiderazzjoni.

(137)

Il-fatt li l-ilmentaturi aġġornaw id-dejta makroekonomika matul il-perjodu ta' investigazzjoni ma kellu l-ebda implikazzjoni fuq il-kredibbiltà tad-dejta finali li ġabru. Id-dejta finali ġiet ivverifikata u nstab li kienet kredibbli mill-Kummissjoni. Għalhekk, il-Kummissjoni ċaħdet din l-affermazzjoni mill-FCI.

(138)

Is-CCCME affermat ukoll li l-Kummissjoni naqset milli tagħmel analiżi segmentata għal kull Stat Membru, u dan irriżulta f'qasma bejn l-Istati Membri li għandhom primarjament swieq ta' ħadid duttili jew ħadid griż.

(139)

Il-Kummissjoni rreferiet għall-premessa 199 tar-Regolament proviżorju fejn hi enfasizzat li s-suq tal-Unjoni hu suq uniku u l-prodotti tal-ħadid duttili u griż huma prodotti interskambjabbli. Għaldaqstant hi ċaħdet l-affermazzjoni li għamlet is-CCCME.

(140)

L-ewwel is-CCCME affermat li d-dejta dwar l-importazzjonijiet għas-sena 2013 ma setgħetx titqabbel mad-dejta dwar l-importazzjonijiet għas-snin sussegwenti u għall-perjodu ta' investigazzjoni minħabba tibdiliet fil-kodiċijiet doganali għall-prodott ikkonċernat li seħħew fl-2014. It-tieni, is-CCCME affermat li l-użu ta' settijiet ta' dejta mhux komparabbli ma jippermettix lill-Kummissjoni tislet konklużjonijiet dwar l-evoluzzjoni tal-volumi tal-importazzjonijiet. Is-CCCME finalment affermat li li kieku l-Kummissjoni analizzat l-effetti tal-volumi fir-rigward tad-dejta fuq il-bażi tal-istess metodoloġija, jiġifieri għall-perjodu mill-2014 sal-perjodu ta' investigazzjoni, hi kienet tikkonkludi li ma kien hemm ebda żieda fl-importazzjonijiet.

(141)

Il-Kummissjoni nnotat li l-perjodu għall-eżami tax-xejriet rilevanti għall-valutazzjoni tad-dannu kopra l-perjodu mill-2013 sal-perjodu ta' investigazzjoni. Għall-analiżi tagħha tax-xejriet tal-importazzjonijiet, il-Kummissjoni aċċettat il-metodu tal-ilmentaturi biex jaslu għad-dejta dwar l-importazzjonijiet tal-prodott ikkonċernat bl-użu ta' dejta tal-Eurostat u li hi vverifikat u aċċettat bħala raġonevoli. Ma kien hemm ebda sors alternattiv ta' informazzjoni disponibbli. Għaldaqstant, il-Kummissjoni ċaħdet l-affermazzjoni tas-CCCME.

(142)

L-FCI u s-CCCME ddikjaraw li s-sejba tal-Kummissjoni fil-premessa 139 tar-Regolament proviżorju mhix sostnuta mill-fatti, billi l-volum tal-importazzjonijiet tal-prodott ikkonċernat mir-RPĊ naqas bejn l-2014 u l-perjodu ta' investigazzjoni, għall-kuntrarju ta' dak li hu stipulat fil-premessa 139 tar-Regolament proviżorju.

(143)

Il-Kummissjoni aċċettat dawn is-sottomissjonijiet. It-tnaqqis fil-volum tal-produzzjoni bejn l-2014 u l-perjodu ta' investigazzjoni kien xprunat b'mod sinifikanti mit-tnaqqis fil-konsum kif irrapportat fit-Tabella 3 tal-premessa 113 tar-Regolament proviżorju. Madankollu, matul il-perjodu taħt kunsiderazzjoni, għad li l-konsum naqas bi 8 %, l-importazzjonijiet oġġett ta' dumping mir-RPĊ żdiedu b'16 % u l-volum tal-produzzjoni mill-industrija tal-Unjoni naqas b'4 %.

(144)

L-FCI ddikjarat li l-ilmentaturi kkalkolaw l-użu tal-kapaċità tagħhom kif irrapportat fit-Tabella 6 tal-premessa 137 tar-Regolament proviżorju fuq il-bażi ta' tliet xiftijiet. Skont l-FCI, hu magħruf b'mod ġenerali fis-suq għall-prodotti tal-ħadid fondut li fonderija hi f'pożizzjoni tajba jekk taħdem b'żewġ xiftijiet, filwaqt li t-tielet xift tal-produzzjoni jiġi għali u jaħdem b'kapaċità ta' produzzjoni inferjuri.

(145)

L-argument tal-FCI ma kienx sostnut minn xi evidenza u xorta waħda ma kienx jipprekludi l-possibbiltà tat-tielet xift. Il-Kummissjoni nnotat ukoll li anki li kieku l-użu tal-kapaċità kellu jiġi kkalkolat fuq il-bażi ta' żewġ xiftijiet, ix-xejra tibqa' l-istess bħal dik mogħtija fit-Tabella 6 tar-Regolament proviżorju u jifdal kapaċità żejda sostanzjali. Meta wieħed jassumi li l-produzzjoni tibqa' stabbli matul ix-xiftijiet kollha, l-użu tal-kapaċità bbażat fuq żewġ xiftijiet jammonta għal madwar 80 %.

(146)

Fin-nuqqas ta' xi kumment ieħor fir-rigward tal-produzzjoni, tal-kapaċità tal-produzzjoni u tal-użu tal-kapaċità u wara l-korrezzjoni tal-premessa 139 tar-Regolament proviżorju kif stipulat fil-premessi 142 u 143, il-Kummissjoni kkonfermat il-konklużjonijiet l-oħra kollha stabbiliti fil-premessi minn 137 sa 142 tar-Regolament proviżorju.

(147)

L-FCI u s-CCCME ddikjaraw li s-sejba fil-premessa 145 tar-Regolament proviżorju mhix sostnuta mill-fatti, billi l-volum tal-importazzjonijiet tal-prodott ikkonċernat mir-RPĊ naqas bejn l-2014 u l-perjodu ta' investigazzjoni, għall-kuntrarju ta' dak li hu stipulat fil-premessa 145 tar-Regolament proviżorju.

(148)

Il-Kummissjoni taċċetta r-referenza żbaljata għall-importazzjonijiet miżjuda bejn l-2014 u l-perjodu ta' investigazzjoni fil-premessa 145 tar-Regolament proviżorju u tinnota li t-tnaqqis fil-volum tal-bejgħ seħħ matul il-perjodu taħt kunsiderazzjoni sħiħ u għaldaqstant jista' jiġi attribwit għat-tnaqqis fil-konsum kif irrapportat fit-Tabella 3 tal-premessa 113 tar-Regolament proviżorju kif ukoll għall-volum akbar ta' importazzjonijiet li huma oġġett ta' dumping mir-RPĊ tul il-perjodu taħt kunsiderazzjoni sħiħ. Madankollu, matul il-perjodu taħt kunsiderazzjoni, għad li l-konsum naqas bi 8 %, l-importazzjoni li huma oġġett ta' dumping mir-RPĊ żdiedet b'16 %, u dan irriżulta f'żieda ferm aktar sinifikanti tas-sehem mis-suq ta' din tal-aħħar, jiġifieri b'26 %.

(149)

Fin-nuqqas ta' xi kumment ieħor fir-rigward tal-volum tal-bejgħ u tas-sehem mis-suq u wara l-korrezzjoni tal-premessa 145 tar-Regolament proviżorju kif stipulat fil-premessi 147 u 148, il-Kummissjoni tikkonferma l-konklużjonijiet l-oħra kollha stabbiliti fil-premessi minn 143 sa 146 tar-Regolament proviżorju.

(150)

Fin-nuqqas ta' kummenti fir-rigward tat-tkabbir, il-Kummissjoni kkonfermat il-konklużjonijiet tagħha stabbiliti fil-premessa 147 tar-Regolament proviżorju.

(151)

L-FCI ddikjarat li s-sejba fil-premessa 149 tar-Regolament proviżorju mhix sostnuta mill-fatti, billi l-livell inferjuri ta' impjiegi ma jistax jiġi marbut mal-kwantitajiet dejjem akbar ta' importazzjonijiet mir-RPĊ, billi l-unika sena li fiha l-importazzjonijiet żdiedu (mill-2013 għall-2014), l-impjiegi tal-industrija tal-Unjoni żdiedu wkoll. Fis-snin li fihom naqsu l-impjiegi, l-importazzjonijiet mir-RPĊ naqsu wkoll.

(152)

Il-Kummissjoni nnotat li x-xejra tul il-perjodu taħt kunsiderazzjoni sħiħ uriet numru inqas ta' impjegati, li primarjament hu r-riżultat tal-produzzjoni mnaqqsa. Min-naħa tagħha l-produzzjoni mnaqqsa kienet dovuta għall-bejgħ imnaqqas fl-Unjoni minħabba t-tnaqqis fid-domanda kif ukoll iż-żieda fl-importazzjonijiet oġġett ta' dumping matul il-perjodu taħt kunsiderazzjoni. Din is-sekwenza ta' avvenimenti hi riflessa fl-analiżi tal-perjodu taħt kunsiderazzjoni sħiħ u mhux billi jitqabblu l-iżviluppi sena wara sena. B'hekk, l-argument tal-FCI ma jistax jiġi aċċettat.

(153)

L-FCI ddikjarat li l-livelli ta' impjiegi u ta' produttività ma jappoġġawx sejba ta' dannu materjali. Il-livelli ta' impjiegi baqgħu relattivament stabbli, speċjalment b'kunsiderazzjoni tal-fatt li erba' kumpaniji waqqfu l-produzzjoni tal-prodott investigat matul il-perjodu taħt kunsiderazzjoni. Il-livelli ta' produttività żdiedu.

(154)

Il-Kummissjoni nnotat li t-tnaqqis fl-impjiegi jista' jiġi attribwit ukoll għall-isforzi tal-industrija tal-Unjoni biex tnaqqas l-ispejjeż tal-produzzjoni u tagħmel titjib fl-effiċjenza fid-dawl tal-kompetizzjoni dejjem akbar mill-importazzjonijiet oġġett ta' dumping mir-RPĊ. Dan it-titjib fl-effiċjenza rriżulta f'żieda ta' 3 % fil-produttività. B'hekk, l-argument tal-FCI ġie miċħud.

(155)

Fin-nuqqas ta' xi kumment ieħor fir-rigward tal-impjiegi u tal-produttività, il-Kummissjoni kkonfermat il-konklużjonijiet tagħha stabbiliti fil-premessa 149 tar-Regolament proviżorju.

(156)

L-FCI ppreżentat li s-sitwazzjoni tal-industrija tal-Unjoni matul il-perjodu ta' investigazzjoni hi simili għas-sitwazzjoni fiż-żmien li fih fl-2011 tħassru l-miżuri kontra ċerti oġġetti fonduti li joriġinaw fir-RPĊ, għaliex l-industrija tal-kostruzzjoni għadha ma rkupratx mill-kriżi ekonomika u diversi Stati Membri fl-Unjoni naqqsu l-baġit tagħhom għall-proġetti infrastrutturali b'mod konsiderevoli.

(157)

Madankollu, l-FCI tirreferi għall-istatistiċi tal-Eurostat li ma jappoġġawx dawn l-affermazzjonijiet. L-istatistiċi tal-produzzjoni fis-settur tal-kostruzzjoni u tal-inġinerija ċivili juru żieda matul il-perjodu kkunsidrat. Il-konsum tal-Unjoni tal-oġġetti tal-ħadid fondut ma bbenefikax minn dan it-tkabbir, kif jidher fit-Tabella 3 tar-Regolament proviżorju. Għaldaqstant, il-Kummissjoni tiċħad din is-sottomissjoni. B'hekk, l-argument tal-FCI ma jistax jiġi aċċettat.

(158)

Wara divulgazzjoni finali, l-FCI affermat li l-premessa 157 ta' hawn fuq tikkonkludi ħażin li l-istatistika dwar is-settur tal-kostruzzjoni tal-inġinerija ċivili turi żieda minn meta l-miżuri antidumping tħassru fl-2011. Meta wieħed iħares lejn l-evoluzzjoni tal-industrija tal-kostruzzjoni minn tmiem il-perjodu ta' investigazzjoni tal-investigazzjoni tar-rieżami ta' skadenza f'nofs l-2010, l-FCI tafferma li dan is-settur għadu ma rkuprax mill-kriżi ekonomika tal-2008/2009.

(159)

Il-Kummissjoni nnutat li s-settur tal-kostruzzjoni u tal-inġinerija ċivili juru xejra 'l fuq mill-2013, u dan jindika rkupru kajman mix-xejra 'l isfel preċedenti. Dan jikkontradixxi l-affermazzjoni tal-FCI li s-sitwazzjoni attwali tal-industrija tal-Unjoni hija l-istess bħal kif kienet sal-2011, billi s-settur tal-kostruzzjoni u tal-inġinerija ċivili wera xejra 'l isfel f'dak il-perjodu. Għaldaqstant, din l-affermazzjoni ġiet miċħuda.

(160)

Fin-nuqqas ta' xi kumment ieħor dwar il-kobor tal-marġni tad-dumping u l-irkupru mid-dumping tal-passat, il-Kummissjoni tikkonferma l-konklużjonijiet tagħha stabbiliti fil-premessi 150 u 151 tar-Regolament proviżorju.

(161)

L-FCI ddikjarat li ma jista' jinstab ebda tnaqqis sinifikanti fil-prezzijiet tal-bejgħ meta jiġi kkunsidrat it-tnaqqis fl-ispejjeż tal-produzzjoni u, għalhekk, it-tnaqqis fil-prezz tal-bejgħ ma jistax jitqies li hu sinjal ta' dannu materjali.

(162)

Kif indirizzat fil-premessa 153 tar-Regolament proviżorju, il-prezzijiet medji tal-bejgħ tal-produtturi tal-Unjoni fil-kampjun naqsu kontinwament b'5 %, filwaqt li l-kost unitarju medju tal-produzzjoni naqas bi 3 % biss matul il-perjodu taħt kunsiderazzjoni. Billi t-tnaqqis fil-prezz qabeż it-tnaqqis fl-ispejjeż tal-produzzjoni, din l-affermazzjoni ġiet miċħuda.

(163)

Wara l-impożizzjoni tal-miżuri proviżorji, ma ġie ppreżentat ebda kumment fir-rigward tal-kostijiet lavorattivi tal-produtturi tal-Unjoni fil-kampjun.

(164)

Wara l-impożizzjoni ta' miżuri proviżorji, ma ġie ppreżentat ebda kumment fir-rigward tal-inventarji tal-produtturi tal-Unjoni fil-kampjun.

(165)

Is-CCCME xeħtet dubju fuq il-konklużjoni tal-Kummissjoni li kien hemm tnaqqis gradwali fil-profittabbiltà mill-2006 billi għamlet riferiment għat-talba tar-rieżami ta' skadenza tal-2010.

(166)

Il-Kummissjoni kkonfermat li fuq il-bażi tad-dejta vverifikata pprovduta mill-produtturi tal-Unjoni fil-kampjun u disponibbli fil-fajl, il-konklużjoni tagħha stabbilita fil-premessa 162 tar-Regolament proviżorju hi korretta. Għaldaqstant, il-Kummissjoni ċaħdet l-affermazzjoni li għamlet is-CCCME.

(167)

Fin-nuqqas ta' xi kumment ieħor dwar l-indikaturi mikroekonomiċi, il-konklużjonijiet stabbiliti fil-premessi minn 152 sa 166 tar-Regolament proviżorju huma kkonfermati.

(168)

Is-CCCME affermat li l-Kummissjoni ma investigatx is-sitwazzjoni tal-produtturi tal-Unjoni fil-parti Ċentrali u tal-Lvant tal-Unjoni u b'hekk ma setgħetx tikkonkludi dwar id-dannu għall-industrija tal-Unjoni fis-sħuħija tagħha.

(169)

Il-Kummissjoni ċaħdet din l-affermazzjoni billi hi kienet investigat is-suq kollu tal-Unjoni għall-indikaturi makroekonomiċi tad-dannu. Il-Kummissjoni tqis li l-kampjun ta' produtturi tal-Unjoni hu rappreżentattiv biżżejjed għall-fini tal-analiżi tad-dannu tagħha tal-indikaturi makroekonomiċi u tikkonferma l-eżistenza tal-kummerċ intra-Unjoni tal-prodott simili.

(170)

Fin-nuqqas ta' kummenti oħrajn, il-Kummissjoni kkonfermat il-konklużjonijiet tagħha stabbiliti fil-premessi minn 167 sa 170 tar-Regolament proviżorju.

(171)

L-FCI ddikjarat li r-Regolament proviżorju ma jirriflettix il-fatt li l-volum tal-importazzjonijiet mir-RPĊ għall-ewwel żdied u mbagħad naqas b'mod kostanti mill-2014 sal-perjodu ta' investigazzjoni, filwaqt li l-volum tal-bejgħ fl-Unjoni naqas matul il-perjodu taħt kunsiderazzjoni sħiħ u s-sehem mis-suq tal-industrija tal-Unjoni baqa' stabbli.

(172)

Il-Kummissjoni nnotat li filwaqt li l-volum tal-bejgħ u s-sehem mis-suq tal-industrija tal-Unjoni naqsu matul il-perjodu taħt kunsiderazzjoni bi 11 % u bi 3 % rispettivament, il-volum u s-sehem mis-suq tal-importazzjonijiet mir-RPĊ żdiedu b'16 % u b'26 % tul l-istess perjodu. Dan juri rabta ċara bejn żieda fl-importazzjonijiet mir-RPĊ u suq iżgħar għall-industrija tal-Unjoni. Għalhekk il-Kummissjoni ċaħdet din l-affermazzjoni.

(173)

Wara divulgazzjoni finali, l-FCI talbet lill-Kummissjoni tispjega x-xejriet diverġenti bejn it-tnaqqis fl-importazzjonijiet mir-RPĊ ta' 8 % (b'żieda fil-prezzijiet) bejn l-2014 u l-perjodu ta' investigazzjoni u t-tnaqqis fil-bejgħ tal-industrija tal-Unjoni matul dak il-perjodu wkoll.

(174)

Għalkemm f'termini ta' volum il-bejgħ mill-industrija tal-Unjoni ma jurix xejra parallela mal-volum tal-importazzjonijiet mir-RPĊ matul il-perjodu taħt kunsiderazzjoni, f'termini tal-ishma mis-suq ix-xejriet huma simili. Barra minn hekk, il-volum tal-produzzjoni tal-industrija tal-Unjoni żviluppa f'konformità mal-volum tal-importazzjonijiet mir-RPĊ, u dan juri żieda mill-2013 sal-2014 u tnaqqis wara. Dan juri li l-industrija tal-Unjoni segwiet ix-xejra tal-importazzjonijiet Ċiniżi. Barra minn hekk, ix-xejra matul il-perjodu taħt kunsiderazzjoni kollu tappoġġa l-eżistenza ta' rabta ta' kawżalità, kemm f'termini ta' volumi kif ukoll ta' ishma mis-suq. Għaldaqstant, il-Kummissjoni kkonkludiet li kien hemm koinċidenza ġenerali fiż-żmien bejn iċ-ċaqliq 'il fuq fl-importazzjonijiet Ċiniżi u ċ-ċaqliq 'l isfel fl-indikaturi tad-dannu rigward l-industrija tal-Unjoni.

(175)

L-FCI ddikjarat li l-prezzijiet tal-bejgħ tal-produtturi tal-Unjoni naqsu b'mod kostanti bejn l-2013 u l-perjodu ta' investigazzjoni, anki meta l-prezzijiet tal-importazzjonijiet Ċiniżi żdiedu b'4 % bejn l-2013 u l-perjodu ta' investigazzjoni. Jidher ċar li ż-żewġ xejriet huma diverġenti u, għalhekk, l-ebda impatt fuq il-prezzijiet tal-bejgħ tal-produtturi tal-Unjoni ma jista' jiġi attribwit għall-istrateġija tal-ipprezzar tal-produtturi esportaturi Ċiniżi.

(176)

Barra minn hekk, l-FCI ddikjarat li l-fatt li l-produtturi tal-Unjoni ma żidux il-profittabbiltà tal-bejgħ tagħhom minkejja li żdiedu l-prezzijiet tal-prodotti Ċiniżi hu dimostrazzjoni ċara li kull dannu materjali matul il-perjodu taħt kunsiderazzjoni ma jistax jiġi attribwit għall-importazzjonijiet mir-RPĊ.

(177)

Il-Kummissjoni ċaħdet dawn is-sottomissjonijiet, għaliex l-importazzjonijiet oġġett ta' dumping mir-RPĊ, anki wara ż-żieda fil-prezz tul il-perjodu taħt kunsiderazzjoni, waqqgħu b'mod sinifikanti l-prezzijiet tal-produtturi tal-Unjoni u, għalhekk, ikkawżaw dannu materjali lill-industrija tal-Unjoni.

(178)

Wara divulgazzjoni finali, l-FCI rritornat għal dan il-kwistjoni u talbet lill-Kummissjoni tispjega r-rabta ta' kawżalità minkejja xejra diverġenti mill-2014 'il quddiem hekk kif l-importazzjonijiet mir-RPĊ naqsu (– 8 %) filwaqt li l-prezzijiet għall-prodotti Ċiniżi żdiedu (+ 1 %) u s-sehem mis-suq tal-industrija tal-Unjoni baqa' stabbli (58,8 %).

(179)

Il-Kummissjoni nnutat li, biex tevita l-effetti taċ-ċaqliq ekonomiku normali, hija tħares lejn il-perjodu taħt kunsiderazzjoni kollu sabiex tistabbilixxi xejra. Barra minn hekk, anki matul xejra 'l isfel fil-konsum tal-Unjoni matul il-perjodu taħt kunsiderazzjoni, l-importazzjonijiet mir-RPĊ urew żieda fis-sehem mis-suq.

(180)

Is-CCCME affermat li l-Kummissjoni naqset milli tiżgura l-komparabbiltà tal-prezzijiet fl-analiżi tagħha tat-twaqqigħ tal-prezz billi ma qisitx ċerti karatteristiċi tal-prodott ikkonċernat. Hi affermat ukoll li l-Kummissjoni kienet ħadet f'kunsiderazzjoni karatteristiċi differenti tal-prodott għad-determinazzjoni tal-marġni tad-dumping.

(181)

Il-Kummissjoni saħqet li hi kienet ikkunsidrat il-karatteristiċi ewlenin tal-prodott investigat fit-tqabbil tal-prezz tagħha u żgurat komparabbiltà bejn il-prodott ikkonċernat u l-prodott simili mmanifatturat fl-Unjoni fuq il-bażi tal-informazzjoni disponibbli. Għaldaqstant l-affermazzjoni mis-CCCME ġiet miċħuda.

(182)

Is-CCCME affermat li la s-CCCME u lanqas il-produtturi esportaturi Ċiniżi ma kellhom il-possibbiltà li jidentifikaw id-differenzi bejn il-prodotti Ċiniżi esportati u l-prodotti mibjugħa mill-produtturi tal-Unjoni li jimpattaw il-komparabbiltà tal-prezzijiet u jitolbu aġġustamenti għall-fini tad-determinazzjoni tat-twaqqigħ tal-prezz.

(183)

Il-Kummissjoni nnotat li hi ddivulgat il-kalkoli speċifiċi tat-twaqqigħ tal-prezz u l-metodoloġija użata lill-produtturi esportaturi Ċiniżi u kkonfermat li fuq il-bażi tal-karatteristiċi ewlenin tal-prodott investigat hi kienet żgurat il-komparabbiltà bejn il-prodott ikkonċernat u l-prodott simili mmanifatturat u mibjugħ fl-Unjoni. Ma kien intwera ebda bżonn ta' xi aġġustament speċifiku għad-differenza fil-karatteristiċi fiżiċi. Għaldaqstant l-affermazzjoni mis-CCCME ġiet miċħuda.

(184)

Wara divulgazzjoni finali, is-CCCME ddikjarat li hi u l-produtturi esportaturi Ċiniżi ma kellhomx l-opportunità li jirrieżaminaw il-kalkolu tal-Kummissjoni tal-volum u l-valur tal-bejgħ għal kull PCN mill-produtturi tal-Unjoni inklużi fil-kampjun, u għaldaqstant ma setgħetx tivvaluta l-iżbalji li kienu saru f'dan ir-rigward. Għaldaqstant, is-CCCME affermat li l-bażi fattwali għall-analiżi tat-twaqqigħ tal-prezz tqajjem dubju, u ma tammontax għal evidenza pożittiva.

(185)

Il-Kummissjoni nnutat li fid-divulgazzjoni finali lis-CCCME hija spjegat ir-raġuni għaliex jinħtieġ li din id-dejta tinżamm kunfidenzjali. Għaldaqstant, hi ċaħdet l-affermazzjoni tas-CCCME.

(186)

Is-CCCME affermat li l-Kummissjoni kienet naqset milli tivvaluta l-firxa tat-twaqqigħ tal-prezz b'rabta mal-proporzjon tal-bejgħ domestiku tal-produtturi tal-Unjoni inklużi fil-kampjun li ma nstab l-ebda twaqqigħ tal-prezz għalihom u, għalhekk, xeħtet dubju fuq l-oġġettività tal-Kummissjoni fl-eżami tagħha tal-effett tal-importazzjonijiet li huma oġġett ta' dumping fuq il-prezzijiet tal-bejgħ tal-produtturi tal-Unjoni. Is-CCCME tenniet l-affermazzjoni tagħha wara d-divulgazzjoni finali.

(187)

Il-Kummissjoni stabbilixxiet li 62,6 % tal-bejgħ totali fl-Unjoni tal-produtturi tal-Unjoni inklużi fil-kampjun kien waqqa' l-prezz mill-importazzjonijiet li huma oġġett ta' dumping mill-produtturi esportaturi mir-RPĊ inklużi fil-kampjun. Il-Kummissjoni sabet li t-tipi ta' prodotti kollha importati kienu paragunabbli għat-tipi ta' prodotti mibjugħa mill-produtturi tal-Unjoni inklużi fil-kampjun. Il-Kummissjoni kompliet tinnota li l-prezzijiet tat-tipi ta' prodotti kollha importati kienu waqqgħu l-prezzijiet tal-bejgħ tat-tipi paragunabbli mibjugħa mill-produtturi tal-Unjoni inklużi fil-kampjun. B'hekk, il-Kummissjoni kkonkludiet li dan juri biżżejjed l-effetti dannużi tal-prezzijiet tal-importazzjonijiet Ċiniżi fuq il-bejgħ tal-industrija tal-Unjoni.

(188)

Wara divulgazzjoni finali, l-FCI tenniet li ċ-ċifri dwar il-livell tal-impjiegi u l-produttività ma jappoġġawx sejba ta' dannu materjali kkawżat mill-importazzjonijiet mir-RPĊ. Barra minn hekk, iż-żieda fl-effiċjenza tal-linji ta' produzzjoni awtomatizzati jirrikjedu tnaqqis fl-għadd ta' unitajiet ta' xogħol.

(189)

Il-Kummissjoni nnutat li t-tnaqqis fl-impjiegi jista' jiġi attribwit għat-tnaqqis fil-volum tal-produzzjoni kkawżat minn żieda fil-kwantitajiet ta' importazzjonijiet li huma l-oġġett ta' dumping mir-RPĊ matul il-perjodu taħt kunsiderazzjoni u l-isforzi tal-industrija tal-Unjoni biex tnaqqas l-ispejjeż tal-produzzjoni u tikseb l-effiċjenza fid-dawl taż-żieda fil-kompetizzjoni mill-importazzjonijiet li huma l-oġġett ta' dumping mir-RPĊ. It-tnaqqis fl-impjiegi huwa akbar miż-żieda fil-produttività, u dan juri dannu kkawżat mill-importazzjonijiet mir-RPĊ.

(190)

Fin-nuqqas ta' kwalunkwe kumment ieħor, il-Kummissjoni kkonfermat il-konklużjonijiet tagħha stabbiliti fil-premessi 173 u 174 tar-Regolament proviżorju.

(191)

Hekk kif il-Kummissjoni spjegat fil-premessi 179 u 180 tar-Regolament proviżorju, l-importazzjonijiet mill-Indja ma kissrux ir-rabta ta' kawżalità bejn l-importazzjonijiet oġġett ta' dumping mir-RPĊ u d-dannu mġarrab mill-industrija tal-Unjoni, u ma setax kellhom aktar minn impatt marġinali fuq id-dannu tal-industrija tal-Unjoni.

(192)

Madankollu, is-CCCME affermat li l-importazzjonijiet mill-Indja jistgħu jkissru r-rabta ta' kawżalità bejn l-importazzjonijiet oġġett ta' dumping mir-RPĊ u d-dannu mġarrab mill-industrija tal-Unjoni billi ma hemm ebda bażi ta' evidenza għall-Kummissjoni biex tikkonkludi li l-produtturi esportaturi mir-RPĊ iggwadanjaw sehem mis-suq mingħand l-industrija tal-Unjoni, iż-żieda u t-tnaqqis rispettivi tas-sehem mis-suq tal-Indja u tal-Unjoni huma l-istess, l-evoluzzjoni mill-2014 sal-perjodu ta' investigazzjoni tal-volum tal-importazzjonijiet mill-Indja evolviet b'mod aktar konformi mal-evoluzzjoni tal-produzzjoni u l-volum tal-bejgħ tal-industrija tal-Unjoni mill-volum tal-importazzjonijiet mir-RPĊ, u t-twaqqigħ tal-prezz mill-Indja hu ogħla mit-twaqqigħ tal-prezz mir-RPĊ li wera li kull effett fuq il-prezz hu aktar probabbli li jkun riżultat tal-importazzjonijiet mill-Indja, minflok mill-importazzjonijiet mir-RPĊ.

(193)

Is-CCCME affermat ukoll li jinħtieġ li l-Kummissjoni tissepara u tagħmel distinzjoni f'dettall tal-effetti differenti kollha tal-importazzjonijiet mill-Indja, u tissepara kull wieħed minn dawn mill-effetti allegatament dannużi tal-importazzjonijiet Ċiniżi permezz ta' analiżi segmentata skont kull Stat Membru u skont il-ħadid griż, il-prodott Indjan, u l-ħadid duttili, il-prodott Ċiniż.

(194)

Il-Kummissjoni qieset li għar-raġunijiet diġà spjegati fil-premessa 199 tar-Regolament proviżorju, ma hemm ebda ħtieġa li ssir analiżi segmentata għall-eżami ta' jekk l-importazzjonijiet oġġett ta' dumping mir-RPĊ ikkawżawx dannu materjali għall-industrija tal-Unjoni.

(195)

Il-Kummissjoni nnutat li ż-żieda relattiva fis-sehem mis-suq tal-Unjoni miżmuma mill-importazzjonijiet mill-Indja hija kemxejn ogħla milli għar-RPĊ tul il-perjodu taħt kunsiderazzjoni iżda f'termini assoluti l-volumi tal-importazzjonijiet u s-sehem mis-suq tal-Indja huma ferm anqas mill-volumi tal-importazzjonijiet u mis-sehem mis-suq tar-RPĊ tul l-istess perjodu u matul il-perjodu ta' investigazzjoni.

(196)

Il-Kummissjoni nnutat li fuq il-bażi tal-volumi assoluti hija ma tistax tikkonkludi li t-tnaqqis fis-sehem mis-suq tal-industrija tal-Unjoni hu kompletament dovut għaż-żieda fis-sehem mis-suq tal-importazzjonijiet Indjani.

(197)

Il-Kummissjoni nnotat ukoll li l-affermazzjoni tas-CCCME rigward l-evoluzzjoni tal-volumi tal-importazzjonijiet mill-2014 sal-perjodu ta' investigazzjoni hi f'kontradizzjoni mal-fatti. Il-volumi tal-importazzjonijiet kemm mill-Indja kif ukoll mir-RPĊ evolvew bl-istess mod meta mqabbla mal-evoluzzjoni tal-produzzjoni u tal-volum tal-bejgħ tal-industrija tal-Unjoni.

(198)

Barra minn hekk, il-Kummissjoni rrikonoxxiet it-twaqqigħ tal-prezz mill-Indja u kkonfermat il-konklużjoni tagħha fil-premessa 179 tar-Regolament proviżorju li d-differenzi fil-prezzijiet medji mhumiex indikattivi billi t-taħlita tal-prodott bejn l-importazzjonijiet mill-Indja u mir-RPĊ kienet differenti.

(199)

Wara divulgazzjoni finali, is-CCCME affermat li ma kellhiex l-informazzjoni li kienet tippermettilha tikkummenta dwar id-differenzi fil-prezzijiet li kienu jkunu indikattivi skont il-Kummissjoni u, għaldaqstant, ma qablitx mal-konklużjoni tal-Kummissjoni.

(200)

Il-Kummissjoni kkonfermat li meta titqies l-evoluzzjoni tal-volumi tal-importazzjonijiet, tas-sehem mis-suq u tal-prezzijiet, l-importazzjonijiet Indjani setgħu kkontribwixxew għad-dannu mġarrab mill-industrija tal-Unjoni. Madankollu, wieħed ma jistax jassumi li l-importazzjonijiet mill-Indja kienu l-unika raġuni għas-sitwazzjoni li kienet qed tiddeterjora tal-industrija tal-Unjoni. Kieku, ipotetikament, kellu jiġi eliminat l-effett tal-importazzjonijiet mill-Indja, kieku l-importazzjonijiet mir-RPĊ jibqgħu kawża indipendenti tad-dannu fihom innifishom. B'mod partikolari, il-livell tal-importazzjonijiet mir-RPĊ matul il-perjodu ta' investigazzjoni hu ferm aktar sinifikanti (aktar minn tliet darbiet ogħla) mil-livell tal-importazzjonijiet mill-Indja matul l-istess perjodu.

(201)

Għalhekk, il-Kummissjoni kkonkludiet li hu probabbli li l-importazzjonijiet mill-Indja setgħu kkontribwixxew għad-dannu materjali mġarrab mill-industrija tal-Unjoni. Madankollu, dawn l-importazzjonijiet ma kissrux ir-rabta ta' kawżalità bejn id-dannu mġarrab mill-industrija tal-Unjoni u l-importazzjonijiet oġġett ta' dumping mir-RPĊ minħabba l-volumi u s-sehem mis-suq inferjuri tagħhom. Madankollu, il-Kummissjoni nnotat li kull effett mill-importazzjonijiet mill-Indja mhuwiex attribwit lir-RPĊ, billi l-livell ta' eliminazzjoni tad-dannu kkalkolat għall-implimentazzjoni tar-regola tad-dazju inferjuri jqis biss l-effetti tal-importazzjonijiet oġġett ta' dumping mir-RPĊ.

(202)

Il-Kummissjoni kkonfermat il-konklużjonijiet tagħha stabbiliti fil-premessi minn 175 sa 182 tar-Regolament proviżorju għar-raġunijiet imsemmija aktar 'il fuq u b'dan tiċħad l-affermazzjonijiet li għamlet is-CCCME.

(203)

L-FCI ppreżentat li l-profittabbiltà tal-industrija tal-Unjoni kienet affettwata b'mod negattiv mill-esportazzjonijiet akbar mill-industrija tal-Unjoni lil pajjiżi terzi bi prezzijiet anqas mill-kost unitarju tal-produzzjoni tagħhom.

(204)

Il-Kummissjoni nnotat li l-esportazzjonijiet lejn pajjiżi terzi kienu jammontaw biss għal madwar 10 % mill-bejgħ tal-produtturi tal-Unjoni fil-kampjun matul il-perjodu taħt kunsiderazzjoni. Għaldaqstant, il-Kummissjoni kkonkludiet li l-esportazzjonijiet lejn pajjiżi terzi seta' kellhom biss effett marġinali fuq is-sitwazzjoni ta' dannu tal-industrija tal-Unjoni fil-perjodu ta' investigazzjoni, u għalhekk ma setgħux ikissru r-rabta ta' kawżalità bejn l-importazzjonijiet Ċiniżi oġġett ta' dumping u d-dannu materjali mġarrab mill-industrija tal-Unjoni.

(205)

Wara divulgazzjoni finali, l-FCI talbet spjegazzjoni mill-Kummissjoni dwar kif il-kombinazzjoni ta' żieda fl-esportazzjonijiet bi prezzijiet baxxi ħafna ma kenitx kapaċi tkisser ir-rabta ta' kawżalità bejn id-dannu allegat imġarrab mill-industrija tal-Unjoni u l-importazzjonijiet tal-prodott ikkonċernat mir-RPĊ. L-FCI affermat li kieku l-industrija tal-Unjoni ma begħitx il-prodotti tagħha lil swieq terzi u minflok biegħet dik il-parti tal-output domestikament, bi prezzijiet tal-Unjoni medji, hija setgħet ittejjeb il-profitt tagħha bi 17,20 %.

(206)

Il-Kummissjoni nnutat li s-suppożizzjoni tal-FCI li l-produtturi tal-Unjoni setgħu jbigħu l-prodotti li esportaw fis-suq tal-Unjoni għall-istess prezz li bih ibigħu fl-Unjoni ma hija bbażata fuq l-ebda evidenza u hija sempliċiment spekulazzjoni. L-ewwel nett, il-prezzijiet fl-industrija tal-Unjoni jinsabu taħt pressjoni minħabba l-importazzjonijiet li huma l-oġġett ta' dumping mir-RPĊ. It-tieni nett, skont il-liġi fundamentali ekonomika tal-provvista u tad-domanda, żieda fil-provvista tnaqqas il-prezz tal-prodott. Barra minn hekk, it-taħlita tal-prodotti tal-prodotti esportati mill-produtturi tal-Unjoni inklużi fil-kampjun tista' tkun differenti mill-produzzjoni medja tagħhom u mill-ispiża korrispondenti tal-produzzjoni. Għaldaqstant, il-Kummissjoni ċaħdet l-affermazzjoni tal-FCI li l-produtturi tal-Unjoni setgħu jtejbu l-marġni ta' profitt tagħhom billi jbigħu l-esportazzjonjiet tagħhom fis-suq tal-Unjoni.

(207)

L-FCI ppreżentat evidenza li skont din l-għeluq tal-fonderiji msemmija fil-premessa 190 tar-Regolament proviżorju jinħtieġ li jkunu attribwixxew għal fatturi għajr iż-żieda fl-importazzjonijiet tal-prodott ikkonċernat mir-RPĊ.

(208)

Il-Kummissjoni tinnota li rigward l-ACO, l-informazzjoni disponibbli pubblikament indikat li l-pressjoni fuq il-prezzijiet u l-kompetizzjoni mir-RPĊ kienu wħud mir-raġunijiet għall-għeluq tal-fonderija tal-Unjoni. Rigward il-każijiet l-oħra ta' għeluq, l-FCI ma pprovdiet ebda prova konklużiva dwar ir-raġunijiet għall-għeluq. F'kull każ, mhumiex dawn il-każijiet ta' għeluq li niżżlu l-prezzijiet tal-bejgħ u l-profittabbiltà tal-produtturi tal-Unjoni fil-kampjun għax dawn jirriflettu telf fil-kompetizzjoni fis-suq intra-Unjoni. Għaldaqstant, il-Kummissjoni tiċħad din is-sottomissjoni u tibqa' tal-fehma li dawn il-każijiet ta' għeluq ikkoinċidew mad-dannu mġarrab mill-Unjoni u, għalhekk, ma jkissrux ir-rabta ta' kawżalità bejn l-importazzjonijiet Ċiniżi oġġett ta' dumping u d-dannu materjali mġarrab mill-industrija tal-Unjoni.

(209)

Is-CCCME affermat li kien ikun aħjar li kieku l-Kummissjoni sseparat u għamlet distinzjoni bejn l-effett dannuż tat-tnaqqis fil-konsum u l-effetti allegatament dannużi tal-importazzjonijiet mir-RPĊ billi hu ċar li meta tiġi kkunsidrata l-evoluzzjoni tal-bejgħ u tal-volumi tal-produzzjoni tal-industrija tal-Unjoni, dan it-tnaqqis ma jistax jiġi attribwit għall-importazzjonijiet mir-RPĊ.

(210)

Barra minn hekk, is-CCCME affermat li billi ż-żieda fl-importazzjonijiet mir-RPĊ ma tikkoinċidix mat-tnaqqis fil-volum tal-bejgħ tal-industrija tal-Unjoni, ma hemm ebda bażi fattwali għall-allegazzjoni tal-Kummissjoni li billi ż-żieda fl-importazzjonijiet mir-RPĊ hi ogħla mit-tnaqqis fil-konsum u fil-bejgħ tal-industrija tal-Unjoni, it-tnaqqis fid-domanda ma jistax ikisser ir-rabta ta' kawżalità bejn l-importazzjonijiet oġġett ta' dumping mir-RPĊ u d-dannu materjali mġarrab mill-industrija tal-Unjoni.

(211)

Il-Kummissjoni tinnota li għall-kuntrarju ta' dak li affermat is-CCCME, iż-żieda fl-importazzjonijiet mir-RPĊ ma tikkoinċidix mat-tnaqqis fil-volumi tal-bejgħ tal-industrija tal-Unjoni meta jiġi kkunsidrat il-perjodu sħiħ tal-valutazzjoni tad-dannu.

(212)

Għaldaqstant, il-Kummissjoni tiċħad din l-affermazzjoni u tikkonferma l-konklużjonijiet tagħha stabbiliti fil-premessi minn 189 sa 191 tar-Regolament proviżorju.

(213)

L-FCI ddikjarat li l-istandards nazzjonali u r-rekwiżiti differenti fil-livell tal-Istati Membri jaqsmu l-Unjoni f'diversi swieq nazzjonali għall-oġġetti tal-ħadid fondut.

(214)

Il-Kummissjoni nnotat li minkejja l-eżistenza ta' standards nazzjonali għal tipi ta' prodotti differenti, il-produtturi tal-Unjoni u l-produtturi esportaturi wkoll jistgħu jissodisfaw dawn ir-rekwiżiti nazzjonali relatati maċ-ċertifikazzjoni tal-prodotti. Għaldaqstant, din l-affermazzjoni ġiet miċħuda.

(215)

L-FCI ddikjarat li l-piż tal-oġġetti mibjugħa kien naqas u, għalhekk, volum tal-produzzjoni ekwivalenti f'tunnellati juri numru akbar ta' oġġetti mibjugħa. Skont l-FCI, nuqqas ta' żieda fil-profitti u fis-sehem mis-suq jinħtieġ li jiġi attribwit għal tibdil strutturali fit-teknoloġija u fil-proċessi tal-produzzjoni aktar milli għall-kompetizzjoni ma' prodotti mmanifatturati fir-RPĊ.

(216)

Il-Kummissjoni tinnota li fuq il-bażi tad-dejta tal-produtturi tal-Unjoni fil-kampjun, hi ma setgħetx tistabbilixxi xi tnaqqis sinifikanti fil-piż matul il-perjodu taħt kunsiderazzjoni. Għalhekk, l-affermazzjoni ġiet miċħuda.

(217)

Wara divulgazzjoni finali, l-FCI allegat li kien hemm tnaqqis ġenerali fil-piż tal-oġġetti tal-ħadid fondut. Il-fatt li l-volumi tal-produzzjoni fl-Unjoni matul il-perjodu ta' investigazzjoni kienu ekwivalenti għas-sitwazzjoni prevalenti fl-2013 (96 %) juri li l-industrija tal-Unjoni kienet meħtieġa żżid l-għadd ta' oġġetti mibjugħa. Għaldaqstant, jinħtieġ li kull ħsara tiġi attribwita għal tibdil strutturali fit-teknoloġija u fil-proċessi tal-produzzjoni aktar milli għall-kompetizzjoni ma' prodotti mmanifatturati fir-RPĊ.

(218)

Il-Kummissjoni kienet talbet lill-produtturi tal-Unjoni inklużi fil-kampjun mhux biss għad-dejta kollha f'tunnellati prodotti, iżda anki f'biċċiet prodotti. Din id-dejta vverifikata ma wriet l-ebda tnaqqis sinifikanti fil-piż tal-prodott simili. Għaldaqstant, il-Kummissjoni ma qablitx mal-FCI fl-affermazzjoni tagħha li l-industrija tal-Unjoni kienet meħtieġa żżid l-għadd ta' oġġetti mibjugħa. Għaldaqstant, din l-affermazzjoni ġiet miċħuda.

(219)

Is-CCCME affermat li minkejja t-twaqqigħ allegat tal-prezz fil-perjodu ta' investigazzjoni, l-industrija tal-Unjoni rnexxielha żżomm is-sehem mis-suq tagħha, xi ħaġa li diffiċli tiġi rrikonċiljata ma' sejba ta' rabta ta' kawżalità.

(220)

Il-Kummissjoni nnutat li l-industrija tal-Unjoni tilfet sehem mis-suq tul il-perjodu taħt kunsiderazzjoni filwaqt li s-sehem mis-suq tal-importazzjonijiet mir-RPĊ żdied b'mod konsiderevoli. Hi sabet ukoll twaqqigħ sinifikanti tal-prezz. Għaldaqstant, hi ċaħdet din l-affermazzjoni.

(221)

Wara divulgazzjoni finali, is-CCCME tenniet l-affermazzjoni tagħha li ma hemm l-ebda koinċidenza fiż-żmien bejn l-importazzjonijiet mir-RPĊ u d-dannu allegat imġarrab mill-industrija tal-Unjoni. Is-CCCME enfasizzat li d-dejta wriet li hemm koinċidenza fiż-żmien bejn l-indikaturi tal-ħsara inkwistjoni u l-evalwazzjoni tal-konsum, li hija affermat li kienet tidher li hi l-kawża attwali ta' xi dannu allegat. Kompliet tafferma li dan, min-naħa l-oħra, kellu impatt fuq indikaturi tad-dannu oħra bħall-profittabbiltà. Fl-aħħar nett, is-CCCME affermat li, fl-analiżi tad-dannu u tar-rabta ta' kawżalità tagħha, il-Kummissjoni kellha tqis ix-xejriet fl-importazzjonijiet matul il-perjodu taħt kunsiderazzjoni minflok sempliċiment tqabbel il-punti ta' wasla kif iddikjarat mill-Korp tal-Appell (4).

(222)

B'kuntrast għar-Rapport tal-Korp tal-Appell, fejn ma saret l-ebda analiżi tax-xejriet iżda paragun bejn il-punt ta' tluq u ta' wasla tal-perjodu taħt kunsiderazzjoni biss, fil-każ inkwistjoni l-Kummissjoni wettqet analiżi bir-reqqa tax-xejriet prevalenti li seħħew matul il-perjodu kollu taħt kunsiderazzjoni, inkluż bejn kull sena ta' dak il-perjodu. Fuq il-bażi ta' dan, il-Kummissjoni sabet koinċidenza fiż-żmien bejn l-importazzjonijiet mir-RPĊ u d-dannu mġarrba mill-industrija tal-Unjoni fuq il-bażi ta' dak il-perjodu. Għaldaqstant, din l-affermazzjoni ġiet miċħuda.

(223)

Wara l-pubblikazzjoni tar-Regolament proviżorju, is-CCCME affermat għall-ewwel darba matul l-investigazzjoni li d-dannu mġarrab mill-industrija tal-Unjoni seta' kien awtoinflitt billi diversi produtturi tal-Unjoni bdew jissostitwixxu l-bejgħ tagħhom stess tal-prodott simili mal-bejgħ tal-prodotti komposti, li jipproduċu huma wkoll, u ssuġġerixxiet li kellha titqies il-kompetizzjoni minn dawn il-prodotti, billi din setgħet tkisser l-allegata rabta ta' kawżalità bejn l-importazzjonijiet oġġett ta' dumping mir-RPĊ u d-dannu allegatament imġarrab mill-industrija tal-Unjoni.

(224)

Il-Kummissjoni ċaħdet din l-affermazzjoni billi s-CCCME, ħlief għal sempliċi fuljett tal-prodotti mingħand wieħed mill-produtturi tal-Unjoni, ma ssostanzjatha bl-ebda evidenza konklużiva. Fuq kollox, is-sejbiet tal-Kummissjoni huma bbażati fuq id-dejta relatata mal-prodott investigat.

(225)

Wara divulgazzjoni finali, l-ilmentaturi komplew itennu li l-bejgħ tal-prodotti mħallta huwa minimu u jirrappreżenta inqas minn 1 % tan-negozju tagħhom. Għalhekk, l-affermazzjonijiet ġew miċħuda.

(226)

Fin-nuqqas ta' kummenti oħrajn, il-Kummissjoni kkonfermat il-konklużjonijiet tagħha stabbiliti fil-premessi minn 202 sa 205 tar-Regolament proviżorju.

(227)

L-FCI ddikjarat li l-importazzjonijiet mir-RPĊ fil-perjodu taħt kunsiderazzjoni ma kellhomx l-effett ta' tniżżil tal-prezzijiet domestiċi għall-prodott investigat tal-industrija tal-Unjoni, billi l-prezzijiet Ċiniżi żdiedu b'mod notevoli matul il-perjodu taħt kunsiderazzjoni, filwaqt li l-prezzijiet medji tal-bejgħ tal-industrija tal-Unjoni naqsu b'mod progressiv fil-perjodu taħt kunsiderazzjoni u din ix-xejra segwiet tnaqqis ġenerali fil-kost unitarju tal-produzzjoni, li kien fl-interess tal-industrija tal-Unjoni.

(228)

Il-Kummissjoni ċaħdet din il-preżentazzjoni, għaliex l-importazzjonijiet mir-RPĊ, anki wara ż-żieda fil-prezz tul il-perjodu taħt kunsiderazzjoni, kienu għadhom qed iwaqqgħu b'mod sinifikanti l-prezzijiet tal-industrija tal-Unjoni u, għalhekk, ibaxxu l-prezzijiet fl-Unjoni. Dan hu appoġġat mit-tnaqqis fil-prezzijiet tal-bejgħ tal-industrija tal-Unjoni, li kien akbar mit-tnaqqis fil-kost unitarju tal-produzzjoni. Għaldaqstant, hu fl-interess tal-industrija tal-Unjoni li twaqqaf it-tali tnaqqis fil-prezz dovut għall-importazzjonijiet Ċiniżi oġġett ta' dumping bi prezzijiet baxxi.

(229)

Wara divulgazzjoni finali, l-FCI ppreżentat li l-produtturi tal-Unjoni jġibu parti mill-firxa ta' prodotti tagħhom mir-RPĊ. B'riżultat ta' dan, l-impożizzjoni ta' dazju proviżorju fuq ir-RPĊ qed tikkawża problemi wkoll għall-produtturi tal-Unjoni.

(230)

Barra minn hekk, wieħed mill-produtturi tal-Unjoni dan l-aħħar għamel investiment kbir għall-iżvilupp ta' fonderija ġdida fl-Istati Uniti; l-impożizzjoni ta' dazju definittiv se jwassal għal żieda fl-importazzjonijiet mill-Istati Uniti u għall-konsolidazzjoni tal-pożizzjoni dominanti ta' dan il-produttur tal-Unjoni fis-suq tal-Unoni għall-oġġetti ta' ħadid fondut għad-detriment tal-kompetizzjoni ħielsa u ġusta.

(231)

Il-Kummissjoni nnutat li l-impożizzjoni ta' miżuri antidumping tista' taffettwa lill-parteċipanti kollha fis-suq tal-Unjoni, inkluż il-produtturi tal-Unjoni. Madankollu, wara divulgazzjoni finali, l-ilmentaturi u produttur ta' sostenn ippreżentaw li huwa fl-interess tal-industrija tal-Unjoni li jiġi impost dazju definittiv li jikkontribwixxi għall-ħolqien ta' kundizzjonijiet ekwi fis-suq.

(232)

Matul iż-żjara ta' verifika għand il-produttur imsemmi fil-premessa 230, il-kumpanija infurmat lill-Kummissjoni li l-investiment fl-Istati Uniti sar biex jinbidel impjant diġà eżistenti. Billi l-FCI ma ġabet l-ebda evidenza ta' sostenn għall-affermazzjoni tagħha li dan il-produttur se juża dan l-investiment biex iżid l-importazzjonijiet mill-Istati Uniti lejn l-Unjoni, il-Kummissjoni ċaħdet din l-affermazzjoni.

(233)

L-ilmentaturi affermaw li jekk ir-rati tad-dazju definittiv jitnaqqsu għal-livelli proposti fid-divulgazzjoni finali, dawn ma jkunux kapaċi jikkompetu mal-importazzjoni li huma l-oġġett ta' dumping, billi l-importaturi tal-prodott ikkonċernat mir-RPĊ għadhom kapaċi jwaqqgħu l-prezzijiet tal-industrija tal-Unjoni minkejja l-impożizzjoni tad-dazju proviżorju ta' medja ta' 33 %.

(234)

Il-miżuri antidumping huma stabbiliti fil-livell meħtieġ biex jitneħħa l-effett tad-dumping dannuż. Għaldaqstant, huwa possibbli li l-prezzijiet tal-importazzjonijiet għadhom jikkompetu mal-prezz tal-prodott simili mibjugħ mill-industrija tal-Unjoni, b'mod partikulari billi d-dazju antidumping proviżorju impost fuq il-marġnijiet tad-dumping instabu li huma aktar baxxi mil-livell tal-eliminazzjoni tad-dannu. Għaldaqstant, il-Kummissjoni ċaħdet din l-affermazzjoni.

(235)

L-FCI ddikjarat li l-Kummissjoni ssottovalutat ir-rwol u l-impjiegi maħluqa minn konsorzju kbir ta' SMEs Ewropej fis-suq għall-prodott ikkonċernat.

(236)

Il-Kummissjoni nnutat li fl-investigazzjoni hi sabet li l-importaturi mhux relatati jġarrbu ċerti spejjeż għad-disinn, għaċ-ċertifikazzjoni u għar-RuŻ tal-prodott ikkonċernat u għalhekk iddeċidew li jaġġustaw il-kalkoli tat-twaqqigħ tal-prezz u tal-livell ta' eliminazzjoni tad-dannu kif xieraq skont kif indikat fil-premessi minn 119 sa (122) aktar 'il fuq. Madankollu, anki wara t-tali aġġustament, it-tnaqqis u l-livell ta' eliminazzjoni tad-dannu jibqgħu sinifikanti.

(237)

L-FCI ddikjarat li l-Kummissjoni mhix qed tqis l-importanza taċ-ċertifikazzjonijiet għall-prodott ikkonċernat u l-preżenza ta' kuntratti ta' terminu twil.

(238)

Il-Kummissjoni nnutat li ma sabet ebda evidenza tal-eżistenza ta' kuntratti ta' terminu twil bħal dawn matul l-investigazzjoni. L-ispejjeż għaċ-ċertifikazzjonijiet għall-prodott ikkonċernat huma integrati fl-aġġustament li sar għall-ispejjeż tar-RuŻ fil-kalkoli tat-twaqqigħ tal-prezz u tal-eliminazzjoni tad-dannu.

(239)

In-numru totali ta' impjegati tal-kumpaniji membri tal-FCI hu stmat għal madwar 1 200 għal importazzjonijiet mill-pajjiżi kollha, u b'hekk il-miżuri fuq l-importazzjonijiet mir-RPĊ biss se jkollhom impatt potenzjali fuq numru iżgħar ta' impjegati.

(240)

L-FCI ddikjarat li filwaqt li l-industrija tal-Unjoni xorta tista' żżomm il-livelli attwali ta' impjiegi tagħha anki fil-preżenza tal-importazzjonijiet tal-prodott ikkonċernat mir-RPĊ, ħafna mill-kumpaniji membri tal-FCI se jkunu mġiegħla jagħlqu jew jagħtu s-sensja lill-ħaddiema jekk il-Kummissjoni tiddeċiedi li timponi dazju antidumping definittiv.

(241)

Il-Kummissjoni ċaħdet dan l-argument billi l-FCI naqset milli tissostanzja l-affermazzjoni tagħha b'xi evidenza jew analiżi li kkawżaw għeluq jew tnaqqis fl-impjiegi. Għall-kuntrarju, fid-dawl tal-livell sinifikanti ta' twaqqigħ tal-prezz, minkejja l-effett ta' kwalunkwe dazju definittiv il-prezzijiet tal-importazzjonijiet Ċiniżi se jibqgħu anqas kompetittivi mal-prezzijiet tal-industrija tal-Unjoni, u ma jwasslux għal għeluq u għal tnaqqis fl-impjiegi bħal dawn.

(242)

L-FCI ddikjarat li l-importaturi mhux relatati ma jistgħux isibu sorsi alternattivi ta' provvista faċilment u f'perjodu qasir u l-produtturi tal-Unjoni mhux se jbigħu l-prodott investigat lill-importaturi mhux relatati, billi jinsabu f'kompetizzjoni diretta ma' xulxin.

(243)

Rigward l-argumenti li l-impożizzjoni ta' miżuri tista' twassal għal nuqqas tal-provvista tal-prodott investigat, il-Kummissjoni l-ewwel innotat li l-objettiv tal-miżuri antidumping mhuwiex li jingħalaq is-suq tal-Unjoni għal kull importazzjoni, iżda li jitreġġa' lura l-kummerċ ġust billi jitneħħa l-effett tad-dumping dannuż. Għalhekk, jinħtieġ li l-importazzjonijiet mir-RPĊ ma jiqfux, iżda se jkomplu, però bi prezzijiet ġusti.

(244)

Fl-istess ħin, ma jistax jiġi eskluż fil-prattika li l-miżuri kontra r-RPĊ ma jkollhomx effett. Madankollu, kif spjegat fil-premessa 220 tar-Regolament proviżorju, l-importaturi mhux relatati jistgħu potenzjalment jirrikorru għal importazzjonijiet minn pajjiżi terzi oħra. F'dan ir-rigward, il-Kummissjoni stabbilixxiet li l-importaturi mhux relatati mhumiex esklużivament dipendenti fuq l-importazzjonijiet mir-RPĊ, iżda matul il-perjodu taħt kunsiderazzjoni xtraw il-prodott investigat ukoll mingħand produtturi f'pajjiżi terzi oħra, bħall-Indja, it-Turkija u l-Brażil. Il-Kummissjoni nnotat ukoll importazzjonijiet oħra mill-Vjetnam, mill-Eġittu u mill-Ukrajna.

(245)

Barra minn hekk, matul l-investigazzjoni l-Kummissjoni sabet li l-industrija tal-Unjoni għandha kapaċità żejda disponibbli, billi hi kienet qed topera b'livell ta' użu tal-kapaċità ta' madwar 50 %. L-FCI naqset milli tippreżenta xi evidenza biex tappoġġa l-allegazzjoni li l-industrija tal-Unjoni mhix se tbigħ il-prodott investigat lill-importaturi mhux relatati.

(246)

Wara divulgazzjoni finali, l-FCI rritornat għall-kwistjoni tas-sigurtà tal-provvista, u ddikjarat li l-produtturi tal-Unjoni qatt ma qablu u qatt ma huma se jaqblu biex jipproduċu oġġetti fonduti f'isem il-kumpaniji membri tal-FCI. Il-kumpaniji membri tal-FCI kkuntattjaw diversi fonderiji fl-Unjoni u dawn kollha rrifjutaw li jipprovdu materjali ta' provvista prodotti skont il-forom tagħhom jew iddikjaraw li ma kinux disponibbli biex jipproduċu oġġetti ta' ħadid fondut għad-dimensjonijiet kollha mitluba.

(247)

Rigward bidla possibbli għal pajjiżi terzi, l-FCI ddikjarat li l-ebda pajjiż imsemmi f'dan ir-Regolament ma jirrappreżenta alternattiva vijabbli għar-RPĊ. L-Indja u t-Turkija mhumiex alternattivi raġonevoli. Huma esportaw biss kwantitajiet limitati tal-prodott ikkonċernat matul il-perjodu ta' investigazzjoni. B'mod partikulari, il-produtturi fl-Indja kważi esklużivament jipproduċu ħadid fondut griż, filwaqt li l-produtturi fir-RPĊ jipproduċu l-aktar ħadid fondut duttili. Kważi 30 000 tunnellata ta' oġġetti tal-ħadid fondut ġew impurtati minn pajjiżi terzi għajr l-Indja matul il-perjodu ta' investigazzjoni, għaldaqstant skont l-FCI huwa inkonċepibbli li jibdew jiġu prodotti biżżejjed volumi ta' oġġetti fonduti f'perjodu ta' żmien raġonevoli f'pajjiżi oħra għajr ir-RPĊ. Barra minn hekk, kull bidla fis-sors tal-importazzjonijiet għall-prodott ikkonċernat tfisser spejjeż addizzjonali għall-importaturi mhux relatati. L-investiment kollu fil-forom sjieda tal-produtturi fir-RPĊ ma jistgħux jintużaw xi mkien ieħor u għaldaqstant jitilfu l-valur tagħhom jekk jiġi impost dazju definittiv. Barra minn hekk, kull bidla tal-produzzjoni teħtieġ iż-żmien u dan id-dewmien jirriżulta fi tluq ta' importaturi mhux relatati mis-suq tal-Unjoni.

(248)

Il-Kummissjoni nnutat li l-FCI ma pprovdiet l-ebda evidenza li tappoġġa l-affermazzjoni li l-produtturi tal-Unjoni qatt ma huma se jaqblu li jipproduċu oġġetti fonduti f'isem il-kumpaniji membri tal-FCI.

(249)

Min-naħa l-oħra, wara divulgazzjoni finali, l-ilmentaturi ppreżentaw li huma lesti li jfornu lill-importaturi u pprovdew evidenza li huma diġà jagħmluh dan. Għaldaqstant, din l-affermazzjoni ġiet miċħuda.

(250)

Il-fatt li kienu jeżistu biss importazzjonijiet limitati matul il-perjodu ta' investigazzjoni minn pajjiżi terzi għajr ir-RPĊ ma jeskludix il-possibbiltà li l-produzzjoni tiċċaqqlaq lejn pajjiżi terzi oħra. Barra minn hekk, il-miżuri ma għandhomx l-objettiv li jagħlqu s-suq tal-Unjoni mill-importazzjonijiet Ċiniżi, iżda li jreġġgħu lura l-kummerċ ġust billi jneħħu l-effett ta' dumping dannuż. Billi r-rati ta' dazju definittiv jinsabu taħt il-livell ta' eliminazzjoni tad-dannu u saħansitra taħt il-marġnijiet tat-twaqqigħ tal-prezz għall-produtturi esportaturi Ċiniżi kollha inklużi fil-kampjun, dawn mhumiex mistennija li jkollhom effett projbittiv fuq l-importazzjonijiet mir-RPĊ. Dan huwa appoġġat mill-istatistika ta' importazzjonijiet sa mill-impożizzjoni ta' miżuri antidumping proviżorji, u din għadha turi importazzjonijiet sinifikanti mir-RPĊ.

(251)

Għaldaqstant, l-ispejjeż addizzjonali implikati marbuta ma' bidla potenzjali fil-produzzjoni huma primarjament suġġestivi u mhux marbuta b'mod inerenti mal-impożizzjoni ta' miżuri antidumping.

(252)

Fid-dawl ta' dan ta' hawn fuq, il-Kummissjoni ċaħdet l-affermazzjonijiet kollha li għamlet l-FCI rigward is-sigurtà tal-provvista.

(253)

L-FCI ddikjarat li l-miżuri jkunu jmorru kontra l-ħtiġijiet u l-ispeċifiċitajiet differenti mitluba mill-awtoritajiet pubbliċi u mill-entitajiet privati li huma dipendenti fuq l-importazzjonijiet minn importaturi mhux relatati, speċjalment f'reġjuni mhux qrib biżżejjed tal-produtturi tal-Unjoni.

(254)

Il-Kummissjoni tenniet li l-utenti finali ma jistgħux jibbażaw fuq prezzijiet oġġett ta' dumping għas-skapitu tal-industrija tal-Unjoni. Barra minn hekk, l-investigazzjoni wriet li diġà hemm kummerċ intra-UE tal-prodott ikkonċernat u tal-prodott simili, inkluż lejn reġuni li ma jinsabux qrib il-produtturi tal-Unjoni.

(255)

Fil-qosor, l-ebda argument ippreżentat mill-partijiet interessati ma juri li hemm raġunijiet konvinċenti kontra l-impożizzjoni ta' miżuri fuq l-importazzjonijiet tal-prodott ikkonċernat mir-RPĊ.

(256)

Kull effett negattiv fuq l-importaturi mhux relatati ma jistax jiġi kkunsidrat sproporzjonat u hu mmitigat mid-disponibbiltà tas-sorsi alternattivi tal-provvista, kemm minn pajjiżi terzi kif ukoll mill-industrija tal-Unjoni. L-effetti pożittivi tal-miżuri antidumping fuq is-suq tal-Unjoni, b'mod partikolari fuq l-industrija tal-Unjoni, jegħlbu l-effett potenzjalment negattiv fuq il-gruppi ta' interess l-oħra.

(257)

Fin-nuqqas ta' kummenti oħrajn, il-Kummissjoni tikkonferma l-konklużjonijiet tagħha stabbiliti fil-premessa 226 tar-Regolament proviżorju.

(258)

Fid-dawl tal-fatt li ma kien ġie stabbilit ebda dumping, il-proċediment fir-rigward tal-importazzjonijiet li joriġinaw fl-Indja għandu jiġi tterminat.

(259)

L-ilmentaturi ddikjaraw li huma ma kinux jaqblu ma' profittabbiltà ta' 5,3 % użata fil-valutazzjoni tal-livell ta' eliminazzjoni tad-dannu. Dawn affermaw li l-profittabbiltà tal-produtturi tal-Unjoni kienet tammonta għal madwar 10 % fl-2006. Madankollu, il-profittabbiltà użata fil-valutazzjoni tad-dannu hi waħda miksuba mill-produtturi tal-Unjoni fil-kampjun fl-2013.

(260)

Kif spjegat fil-premessa 231 tar-Regolament proviżorju, il-livell ta' profitt tal-2013 jirrifletti dak li jista' jinkiseb b'mod raġonevoli fil-kundizzjonijiet normali ta' kompetizzjoni, jiġifieri fin-nuqqas ta' importazzjonijiet oġġett ta' dumping. Barra minn hekk, dan il-profitt fil-mira hu konformi mal-perċentwal propost mill-ilmentaturi għall-kalkoli tal-bejgħ bil-prezz imwaqqa' fl-ilment tagħhom.

(261)

L-FCI ddikjarat li l-valutazzjoni proviżorja tal-livell ta' eliminazzjoni tad-dannu hi qarrieqa, billi din tqabbel il-prezzijiet tal-prodotti mibjugħa mill-fonderiji Ċiniżi lill-importaturi fl-Unjoni ma' dak tal-prodotti mibjugħa mill-industrija tal-Unjoni lill-klijenti finali u ma tiħux f'kunsiderazzjoni l-ispejjeż imġarrba esklużivament mill-importaturi mhux relatati. Spejjeż bħal dawn jinkludu l-ispejjeż tar-RuŻ, spejjeż għall-ħolqien ta' mudelli u ta' prototipi, spejjeż ta' ċertifikazzjoni, spejjeż ta' omologazzjoni, verifiki tal-kwalità u verifiki tal-konformità, spejjeż tal-ħżin, u spejjeż tal-bejgħ.

(262)

Il-Kummissjoni vverifikat din id-dejta u ddeċidiet li taġġusta l-marġni tat-twaqqigħ tal-prezz (ara l-premessi minn 119 sa 122 aktar 'il fuq) u l-livell ta' eliminazzjoni tad-dannu għat-tali spejjeż, billi aġġustat 'l isfel il-prezzijiet mill-fabbrika tal-industrija tal-Unjoni filwaqt li ħadet l-ispejjeż medji ponderati tar-RuŻ fuq il-fatturat tal-produtturi tal-Unjoni fil-kampjun. Minbarra dan, sar aġġustament fil-prezz tal-importazzjonijiet għall-ispejjeż ivverifikati ta' wara l-importazzjoni.

(263)

Fid-dawl tal-konklużjonijiet li saru fir-rigward tad-dumping, id-dannu, il-kawżalità u l-interess tal-Unjoni, u f'konformità mal-Artikolu 9(4) tar-Regolament bażiku, jinħtieġ li jiġu imposti miżuri antidumping definittivi fuq l-importazzjonijiet tal-prodott ikkonċernat fil-livell tal-marġni tad-dumping, f'konformità mar-regola tad-dazju l-aktar baxx.

(264)

Fuq il-bażi ta' hawn fuq, ir-rati li bihom se jiġi impost id-dazju antidumping definittiv huma stabbiliti kif jidhru fit-Tabella 3 hawn taħt:

Tabella 3

Marġni ta' dumping, livell ta' eliminazzjoni tad-dannu u rata ta' dazju

(265)

Ir-rati ta' dazju antidumping ta' kumpaniji individwali speċifikati f'dan ir-Regolament ġew stabbiliti fuq il-bażi tas-sejbiet tal-investigazzjoni preżenti. Għalhekk, huma jirriflettu s-sitwazzjoni li nstabet matul l-investigazzjoni fir-rigward ta' dawn il-kumpaniji. Dawn ir-rati ta' dazju (għall-kuntrarju tad-dazju applikabbli fil-pajjiż kollu għall-“kumpaniji l-oħra kollha”) huma għalhekk applikabbli esklużivament għal importazzjonijiet tal-prodott ikkonċernat li joriġina mir-RPĊ u maħdum mill-kumpaniji u għalhekk mill-entitajiet ġuridiċi speċifiċi msemmija. Il-prodotti importati mmanifatturati minn xi kumpanija oħra mhux imsemmija speċifikament fil-parti operattiva ta' dan ir-Regolament, bl-isem u bl-indirizz tagħha, inklużi l-entitajiet relatati ma' dawk imsemmija speċifikament, ma jistgħux jibbenifikaw minn dawn ir-rati u għandhom ikunu soġġetti għar-rata ta' dazju applikabbli għall-“kumpaniji l-oħra kollha”.

(266)

Jinħtieġ li kull affermazzjoni li titlob l-applikazzjoni ta' dawn ir-rati ta' dazju antidumping tal-kumpaniji individwali (pereż. wara bidla fl-isem tal-entità jew wara t-twaqqif ta' entitajiet ġodda tal-produzzjoni jew tal-bejgħ) tiġi indirizzata lill-Kummissjoni (5) flimkien mal-informazzjoni kollha rilevanti, b'mod partikolari kull tibdil fl-attivitajiet tal-kumpanija marbuta mal-produzzjoni, mal-bejgħ domestiku u esportat, assoċjat pereżempju ma' dik il-bidla fl-isem jew dik il-bidla fl-entità tal-produzzjoni jew tal-bejgħ. Jekk ikun xieraq, ir-Regolament se jiġi emendat kif meħtieġ billi tiġi aġġornata l-lista tal-kumpaniji li jibbenefikaw minn rati ta' dazju individwali.

(267)

Sabiex jitnaqqsu kemm jista' jkun ir-riskji ta' żgiċċar mill-miżuri, minħabba d-differenza kbira fir-rati ta' dazju, jinħtieġu miżuri speċjali biex tkun żgurata l-applikazzjoni tad-dazji antidumping individwali. Il-kumpaniji b'dazji antidumping individwali jridu jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stipulati fl-Artikolu 1(3) hawnhekk. Jinħtieġ li l-importazzjonijiet li ma jkunux akkumpanjati minn dik il-fattura jkunu soġġetti għad-dazju antidumping applikabbli għall-“kumpaniji l-oħra kollha”.

(268)

Sabiex jiġi żgurat infurzar xieraq tad-dazju antidumping, ir-rata ta' dazju tal-“kumpaniji l-oħra kollha” jinħtieġ li ma tapplikax biss għall-produtturi esportaturi li ma kkooperawx iżda anki għal dawk il-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni sakemm dawn tal-aħħar ma jikkonformawx mal-kundizzjonijiet stabbiliti fl-Artikolu 3.

(269)

Grupp ta' produtturi esportaturi li kkooperaw, flimkien mas-CCCME offrew impenn konġunt fuq il-prezz skont l-Artikolu 8(1) tar-Regolament bażiku. Din l-offerta ta' impenn qed tiġi evalwata.

(270)

Fid-dawl tal-ġurisprudenza riċenti tal-Qorti tal-Ġustizzja (6), huwa xieraq li iġi pprovdut għall-imgħax ta' inadempjenza li jrid jitħalla f'każ ta' rimborż ta' dazji definittivi, għax id-dispożizzjonijiet rilevanti fis-seħħ li jikkonċernaw id-dazji doganali ma jiprovdux għal din ir-rata tal-imgħax, u l-applikazzjoni tar-regoli nazzjonali twassal għal distorsjonijiet mhux dovuti bejn l-operaturi ekonomiċi skont liema Stat Membru jintgħażel għall-iżdoganar tal-merkanzija.

(271)

Wara divulgazzjoni finali, is-CCCME u 64 produttur esportatur ippreżentaw offerta ta' impenn fuq il-prezz skont l-Artikolu 8 tar-Regolament bażiku.

(272)

Il-Kummissjoni evalwat din l-offerta u kkonkludiet li l-aċċettazzjoni ta' dan l-impenn ma jkunx prattiku fis-sens tal-Artikolu 8 tar-Regolament bażiku fuq il-bażi ta' dawn l-elementi:

(273)

Is-CCCME u l-produtturi esportaturi kkonċernati kif ukoll l-industrija tal-Unjoni ġew infurmati bir-raġunijiet għaliex il-Kummissjoni kienet beħsiebha tirrifjuta l-offerta ta' impenn. L-industrija tal-Unjoni esprimiet il-qbil tagħha maċ-ċaħda.

(274)

Is-CCCME ppreżentat ċerti kummenti u suġġerimenti b'reazzjoni għall-evalwazzjoni tal-Kummissjoni tal-offerta tal-impenn. Is-CCCME offriet li tuża prezz ta' importazzjoni minimu medju abbażi tal-aktar tipi ta' prodotti għaljin, biex tillimita l-esportazzjonijiet ta' prodotti oħra u biex tiddefinixxi xi kriterji ta' eliġibbiltà sabiex tnaqqas l-għadd ta' produtturi esportaturi li pparteċipaw fl-impenn. Madankollu, għalkemm dawn is-suġġerimenti setgħu jtaffu kemxejn ċerti riskji ta' monitoraġġ, dawk li jikkonċernaw it-tnaqqis tal-għadd ta' produtturi esportaturi u r-riskju inerenti marbut mal-affidabbiltà tar-rekords kontabilistiċi ma setgħux jiġu vvalutati mill-Kummissjoni billi ma kinux preċiżi biżżejjed biex jiffurmaw offerta riveduta. Barra minn hekk, ir-restrizzjoni tal-produtturi esportaturi parteċipanti jistgħu jwasslu għat-trasferiment tal-esportazzjonijiet tal-produtturi esportaturi mhux parteċipanti permezz ta' dawk parteċipanti. Fl-aħħar nett, il-Kummissjoni fakkret li impenn simili li jkopri għadd ħafna iżgħar ta' produtturi esportaturi kien soġġett għal ksur ripetut u eventwalment tneħħa fil-passat. Għaldaqstant, b'mod ġenerali, il-kummenti u s-suġġerimenti tas-CCCME ma bidlux il-valutazzjoni tal-Kummissjoni.

(275)

Fid-dawl tal-marġini tad-dumping li nstabu u minħabba l-livell ta' dannu kkawżat lill-industrija tal-Unjoni, l-ammonti garantiti permezz tad-dazju antidumping proviżorju impost bir-Regolament proviżorju jenħtieġ li jinġabru b'mod definittiv.

(276)

Ir-rati definittivi ta' dazju huma anqas mir-rati proviżorji ta' dazju. B'hekk, l-ammonti miġbura li jeċċedu r-rata definittiva ta' dazju antidumping jinħtieġ li jiġu rilaxxati.

(277)

Il-Kumitat stabbilit bl-Artikolu 15(1) tar-Regolament(UE) 2016/1036 ma ta l-ebda opinjoni,