28.3.2013   

MT

Il-Ġurnal Uffiċjali tal-Unjoni Ewropea

L 90/106

(1)

L-emissjonijiet tal-gassijiet serra mill-installazzjonijiet koperti bid-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva 96/61/KE (2) kif miksuba mir-Reġistru tal-Unjoni, mid-Deċiżjonijiet tal-Kummissjoni, mill-Pjanijiet Nazzjonali ta’ Allokazzjoni u mill-korrispondenza uffiċjali bejn il-Kummissjoni u l-Istati Membri rispettivi jikkostitwixxu dejta vverifikata dwar l-emissjonijiet skont ir-raba’ paragrafu tal-Artikolu 3(2) tad-Deċiżjoni Nru 406/2009/KE.

(2)

L-emissjonijiet totali ta’ gassijiet serra minn gassijiet u attivitajiet kif iddefiniti fl-Artikolu 2(1) tad-Deċiżjoni Nru 406/2009/KE sottomessi skont id-Deċiżjoni Nru 280/2004/KE tal-Parlament Ewropew u tal-Kunsill tal-11 ta’ Frar 2004 li tikkonċerna l-mekkaniżmu għall-monitoraġġ tal-emissjonijiet ta’ gass serra tal-Komunità u biex jiġi implimentat il-Protokoll ta’ Kjoto (3) fis-sena 2012 kif stabbilit b’segwitu għall-analiżi inizjali tal-2012 imwettqa mill-Kummissjoni skont il-Linji Gwida għall-Analiżi Teknika tal-2012 tal-Inventarji tal-Emissjonijiet tal-Gassijiet Serra (4) jikkostitwixxu dejta analizzata dwar l-emissjonijiet tal-gassijiet serra għas-snin 2005, 2008, 2009 u 2010 skont ir-raba’ paragrafu tal-Artikolu 3(2) tad-Deċiżjoni Nru 406/2009/KE.

(3)

Biex tiġi żgurata l-konsistenza bejn kif għandhom jiġu ddeterminati l-allokazzjonijiet annwali tal-emissjonijiet u l-emissjonijiet tal-gassijiet serra rrappurtati għal kull sena, l-allokazzjonijiet annwali tal-emissjonijiet tal-Istati Membri għandhom jiġu kkalkulati wkoll billi jiġu applikati l-valuri tal-potenzjal ta’ tisħin globali mir-raba’ rapport ta’ valutazzjoni tal-IPCC adottat bid-Deċiżjoni 15/CP.17. L-allokazzjoni annwali tal-emissjonijiet ikkalkulata b’dan il-mod għandha ssir applikabbli mill-ewwel sena li għaliha r-rappurtar tal-inventarji tal-gassijiet serra li jsir bl-użu ta’ dawn il-valuri ġodda ta’ potenzjal ta’ tisħin globali jsir obbligatorju skont l-Artikolu 3 tad-Deċiżjoni Nru 280/2004/KE.

(4)

Id-dejta rrappurtata bħalissa fl-inventarji nazzjonali tal-gassijiet serra u fir-reġistri nazzjonali u tal-Unjoni mhijiex biżżejjed sabiex jiġu ddeterminati, fil-livell tal-Istati Membri, l-emissjonijiet ta’ CO2 mill-avjazzjoni ċivili fil-livell nazzjonali li mhumiex koperti bid-Direttiva 2003/87/KE. L-emissjonijiet tad-CO2 minn titjiriet mhux koperti bid-Direttiva 2003/87/KE jirrappreżentaw biss parti żgħira ħafna mit-total tal-emissjonijiet tal-gassijiet serra, u l-ġbir ta’ informazzjoni addizzjonali dwar dawn l-emissjonijiet joħloq piż amministrattiv sproporzjonat. Għalhekk, il-kwantità ta’ emissjonijiet ta’ CO2 tal-kategorija tal-inventarju “1.A.3.A avjazzjoni ċivili” għandha titqies ekwivalenti għal żero għall-finijiet tad-determinazzjoni tal-allokazzjonijiet annwali tal-emissjonijiet.

(5)

L-allokazzjonijiet annwali tal-emissjonijiet għal Stat Membru għas-sena 2020 għandhom jiġu kkalkulati billi titnaqqas il-kwantità tal-emissjonijiet tal-gassijiet serra vverifikati tal-installazzjonijiet li kienu jeżistu fl-2005 mill-emissjonijiet tal-gassijiet serra analizzati għas-sena 2005 u bl-aġġustament tar-riżultat bil-perċentwal stipulat fl-Anness II tad-Deċiżjoni Nru 406/2009/KE.

(6)

Il-kwantità tal-emissjonijiet tal-gassijiet serra vverifikati tal-installazzjonijiet għandhom jiġu ddeterminati kif ġej:

(7)

Il-kwantità medja ta’ emissjonijiet ta’ gassijiet serra fis-sena 2009 ta’ Stat Membru b’limitu pożittiv ta’ emissjonijiet ta’ gassijiet serra skont l-Anness II tad-Deċiżjoni Nru 406/2009/KE għandha tiġi kkalkulata billi titnaqqas il-kwantità medja ta’ emissjonijiet ta’ gassijiet serra vverifikati minn installazzjonijiet koperti bid-Direttiva 2003/87/KE fis-snin 2008, 2009 u 2010 fl-Istat Membru rispettiv mit-total medju tiegħu ta’ emissjonijiet ta’ gassijiet serra għas-snin 2008, 2009 u 2010.

(8)

L-allokazzjonijiet annwali tal-emissjonijiet għal Stat Membru b’limitu pożittiv ta’ emissjonijiet ta’ gassijiet serra skont l-Anness II tad-Deċiżjoni Nru 406/2009/KE għas-snin mill-2013 sal-2019 għandhom jiġu ddefiniti bi trajettorja lineari li tibda bil-kwantità medja ta’ emissjonijiet ta’ gassijiet serra ta’ dak l-Istat Membru fis-sena 2009 u tispiċċa bl-allokazzjoni annwali tiegħu ta’ emissjonijiet għas-sena 2020.

(9)

L-allokazzjoni annwali ta’ emissjonijiet għal Stat Membru b’limitu negattiv ta’ emissjonijiet ta’ gassijiet serra skont l-Anness II tad-Deċiżjoni Nru 406/2009/KE għas-sena 2013 għandu jiġi kkalkulat billi titnaqqas kwantità medja ta’ emissjonijiet ta’ gassijiet serra vverifikati minn installazzjonijiet koperti bid-Direttiva 2003/87/KE fis-snin 2008, 2009 u 2010 fl-Istat Membru rispettiv mit-total medju analizzat tiegħu ta’ emissjonijiet ta’ gassijiet serra għas-snin 2008, 2009 u 2010.

(10)

L-allokazzjoni annwali tal-emissjonijiet għal Stat Membru b’limitu negattiv ta’ emissjonijiet ta’ gassijiet serra skont l-Anness II tad-Deċiżjoni Nru 406/2009/KE għas-snin mill-2014 sal-2019 għandha tiġi ddefinita bi trajettorja lineari li tibda bl-allokazzjoni annwali ta’ emissjonijiet ta’ dak l-Istat Membru għas-sena 2013 u tispiċċa bl-allokazzjoni annwali tiegħu ta’ emissjonijiet għas-sena 2020.

(11)

L-emissjonijiet ivverifikati ta’ gassijiet serra ta’ installazzjonijiet inklużi unilateralment fl-Iskema għan-Negozjar tal-Emissjonijiet skont l-Artikolu 24 tad-Direttiva 2003/87/KE matul il-perjodu mill-2008 sal-2012 ma għandhomx jitqiesu fil-kwantità medja tal-emissjonijiet tal-gassijiet serra ivverifikati minn installazzjonijiet koperti bid-Direttiva 2003/87/KE għas-snin 2008, 2009 u 2010 għax dan jirriżulta f’għadd doppju ta’ emissjonijiet ta’ gassijiet serra matul aġġustamenti futuri tal-allokazzjonijiet annwali tal-emissjonijiet skont l-Artikolu 10 tad-Deċiżjoni Nru 406/2009/KE.

(12)

Minħabba l-adeżjoni tal-Kroazja mal-Unjoni Ewropea, l-allokazzjoni annwali tagħha ta’ emissjonijiet għal kull sena tal-perjodu mill-2013 sal-2020 għandha tiġi ddeterminata billi tintuża l-istess metodoloġija li tintuża għall-Istati Membri l-oħra. Dawn il-valuri għandhom isiru applikabbli mid-data tal-adeżjoni tal-Kroazja.

(13)

Minħabba l-adozzjoni mill-Kunsill Ewropew tad-Deċiżjoni 2012/419/UE tal-11 ta’ Lulju 2012 dwar l-emenda tal-istatus tal-Majott fir-rigward tal-Unjoni Ewropea (5) mill-2014, l-allokazzjonijiet annwali tal-emissjonijiet għal Franza mill-2014 jiġu kkalkulati billi jitqiesu l-emissjonijiet rilevanti tal-gassijiet serra analizzati.

(14)

Il-miżuri pprovduti f’din id-Deċiżjoni huma skont l-opinjoni tal-Kumitat dwar it-Tibdil fil-Klima.