DEĊIŻJONI 2004/833/PESK TAL-KUNSILL

tat-2 ta' Diċembru 2004

li timplementa l-Azzjoni Konġunta 2002/589/PESK bil-ħsieb ta' kontribut ta' l-Unjoni Ewropea għall-ECOWAS fil-qafas tal-Moratorju fuq l-armamenti ħfief u ta' kalibru żgħir

(2004/833/KE)

IL-KUNSILL TA' L-UNJONI EWROPEA,

Wara li kkunsidra l-Azzjoni Konġunta tal-Kunsill 2002/589/PESK tat-12 ta' Lulju 2002 dwar il-kontribut ta' l-Unjoni Ewropea għall-ġlieda kontra l-akkumulazzjoni u t-tixrid destabilizzanti ta' armamenti ħfief u ta' kalibru żgħir (1), u b'mod partikolari l-Artikolu 3 tagħha, flimkien ma' l-Artikolu 23(2) tat-Trattat dwar l-Unjoni Ewropea,

Billi:

IDDEĊIEDA KIF ĠEJ:

Artikolu 1

1.   Unjoni Ewropea għandha tikkontribwixxi għat-twettiq ta' proġetti fil-qafas tal-Moratorju ta' l-ECOWAS dwar l-importazzjoni, l-esportazzjoni u l-fabrikazzjoni ta' l-armamenti ħfief u ta' kalibru żgħir.

2.   Għal dan il-għan, l-Unjoni Ewropea għandha toffri kontribut finanzjarju u assistenza teknika biex tiġi stabbilita l-Unità Armamenti Ħfief fi ħdan is-Segretarjat Tekniku ta' l-ECOWAS u biex il-Moratorju jiġi konvertit f'Konvenzjoni dwar armamenti ħfief u ta' kalibru żgħir bejn l-Istati Membri ta' l-ECOWAS. Il-modalitajiet ta' din l-assistenza tidher fl-Anness.

Artikolu 2

1.   Sabiex jintlaħqu l-għanijiet speċifikati fl-Artikolu 1, il-Presidenza għandha taħtar direttur tal-proġett b'bazi f'Abuja, Niġerja.

2.   Id-direttur tal-proġett għandu jwettaq il-kompiti tiegħu taħt ir-responsabbiltà tal-Presidenza.

3.   Id-direttur tal-proġett għandu jirrapporta b'mod regolari lill-Kunsill jew lill-korpi maħtura tiegħu permezz tal-Presidenza, megħjuna mis-Segretarju-Ġenerali/Rappreżentant Għoli għall-PESK.

4.   Fit-twettiq ta' l-attivitajiet tiegħu, id-direttur tal-proġett għandu jikkopera, kif xieraq, mal-missjonijiet lokali ta' l-Istati Membri u mal-Kummissjoni.

Artikolu 3

Il-Kummissjoni għandha tiġi nkarigata bl-implimentazzjoni finanzjarja ta' din id-Deċiżjoni. Għal dak il-għan, din għandha tikkonkludi ftehim ta' finanzjament ma' l-ECOWAS dwar il-kondizzjonijiet għall-użu tal-kontribut ta' l-Unjoni Ewropea, li għandu jkun f'forma ta' għotja mhux rimborsabbli. Fost affarijiet oħrajn, din l-għotja għandha tkopri, tul perijodu ta' 12-il xahar, salarji, spejjeż ta' l-ivvjaġġar, fornimenti u tagħmir meħtieġ biex tiġi stabbilita l-Unità Armamenti Ħfief fi ħdan is-Segretarjat Tekniku ta' l-ECOWAS u biex il-Moratorju jiġi konvertit f'Konvenzjoni dwar armamenti ħfief bejn l-Istati Membri tal-ECOWAS. Il-ftehim ta' finanzjament li għandu jiġi konkluż ser jistipula li l-ECOWAS għandha tiżgura li l-kontribut ta' l-Unjoni Ewropea jkollu viżibbiltà xierqa għad-daqs tal-kontribut.

Artikolu 4

1.   L-ammont ta' referenza finanzjarja għall-finijiet imsemmija fl-Artikolu 1 għandu jkun ta' EUR 515 000.

2.   Il-Presidenza u l-Kummissjoni għandhom jippreżentaw lill-korpi tal-Kunsill rilevanti rapporti regolari dwar il-konsistenza ta' l-attivitajiet ta' l-Unjoni Ewropea fil-qasam ta' l-armamenti ħfief u ta' kalibru żgħir, b'mod partikolari fir-rigward tal-linji politiċi tagħha fuq l-iżvilupp, skond l-Artikolu 9(1) ta' l-Azzjoni Konġunta 2002/589/PESK. B'mod iżjed partikolari, il-Kummissjoni għandha tirrapporta dwar l-aspetti msemmija fl-ewwel sentenza ta' l-Artikolu 3. Din l-informazzjoni għandha tkun ibbażata, fost affarijiet oħrajn, fuq rapporti regolari li għandhom jiġu mogħtija mill-ECOWAS taħt ir-relazzjoni kontrattwali tagħha mal-Kummissjoni.

Artikolu 5

Din id-Deċiżjoni għandha tidħol b'effett fid-data ta' l-adozzjoni tagħha. Għandha tiskadi fil-31 ta' Diċembru 2005.

Artikolu 6

Din il-Deċiżjoni għandha tiġi riveduta sitt xhur wara d-data ta' l-adozzjoni tagħha.

Artikolu 7

Din id-Deċiżjoni għandha tiġi ppubblikata fil-Ġurnal Uffiċjali.

(1)  ĠU L 191, 19.7.2002. p. 1.