31988L0411

Id-Direttiva tal-Kummissjoni

tal-21 Ġunju 1988

li tadatta għall-progress tekniku d-Direttiva tal-Kunsill 75/321/KEE dwar l-approssimazzjoni tal-liġijiet ta’ l-Istati Membri fir-rigward ta’ l-apparat ta’ l-istering ta’ tratturi bir-roti ta’ l-agrikoltura jew tal-foresterija

(88/411/KEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat id-Direttiva tal-Kunsill 74/150/KEE ta’ l-4 Marzu 1974 dwar l-approssimazzjoni tal-liġijiet ta’ l-Istati Membri fir-rigward ta’ l-approvazzjoni tat-tip ta’ tratturi bir-roti ta’ l-agrikoltura jew tal-foresterija [1], kif l-aħħar emendata bid-Direttiva 88/297/KEE [2], u b’mod partikolari Artikolu 11 ta’ l-istess,

Billi, minħabba l-esperjenza miksuba u waqt li jittieħed kont ta’ l-istat kurrenti l-aktar aġġornat, issa huwa possibbli li ċerti dispożizzjonijiet tad-Direttiva tal-Kunsill 75/321/KEE [3], kif emendata bid-Direttiva 82/890/KEE [4], isiru aktar preċiżi u kompluti;

Billi l-miżuri li hemm ipprovdut dwarhom f’din id-Direttiva huma skond l-opinjoni tal-Kumitat dwar l-Adattazzjoni għall-Progress Tekniku tad-Direttiva mmirat għat-tneħħija ta’ barrieri tekniċi għall-kummerċ fis-settur tat-tratturi għall-użu fl-agrikoltura jew fil-foresti,

ADOTTAT DIN ID-DIRETTIVA:

Artikolu 1

Anness tad-Direttiva 75/321/KEE qiegħed b’dan jiġi emendat kif ġej:

- Fil-punt 2.2.1.2 wara ‘Fil-każ ta’ l-apparat ta’ l-istering assistit’, qed tiġi miżjuda ‘li ma jkunx ikkonnettjat ma’ apparat ieħor’.

- Is-sentenza ta’ qabel ta’ l-aħħar ta’ l-ewwel paragrafu tal-punt 2.2.4.1.1, i.e. ‘Is-sistemi ta’ l-istering u tal-brejkijiet m’għandhomx ikollhom sors komuni ta’ l-enerġija’, qegħda tiġi sostitwita bis-segwenti:

"Mingħajr preġudizzju għad-dispożizzjonijiet tad-Direttiva 76/432/KEE dwar il-brejkijiet, jekk ikun hemm konnessjoni idrawlika bejn l-apparat idrawliku ta’ l-istering u l-apparat idrawliku tal-brejkijiet, u jekk it-tnejn ikunu qed jieħdu mill-istess sors ta’ enerġija, il-forza meħtieġa sabiex tattiva l-apparat ta’ l-istering m’għandhiex teċċedi l-40 daN jekk xi waħda mis-sistemi jkollha l-ħsara".

Artikolu 2

1. Mill-1 Ottubru 1988 ebda Stat Membru ma jista’:

- jirrifjuta, fir-rigward ta’ tip ta’ trattur, li jagħti l-approvazzjoni tat-tip tal-KEE, li joħroġ id-dokument li ssir riferenza għalih f’Artikolu 10(1), l-aħħar inċiż, tad-Direttiva 74/150/KEE, jew jagħti l-approvazzjoni tat-tip nazzjonali, jew

- jipprojbixxi d-dħul fis-servizz ta’ tratturi;

jekk l-apparat ta’ l-istering ta’ dan it-tip ta’ trattur jew tratturi ikun konformi mad-dispożizzjonijiet ta’ din id-Direttiva.

2. Mill-1 Ottubru 1989 l-Istati Membri:

- ma jistgħux aktar joħorġu d-dokument li ssir riferenza għalih f’Artikolu10 (1), l-aħħar inċiż tad-Direttiva 74/150/KEE għal tip ta’ trattur li l-apparat ta’ l-istering tiegħu ma jkunx konformi mad-dispożizzjonijiet ta’ din id-Direttiva;

- jistgħu jirrifjutaw li jagħtu l-approvazzjoni tat-tip nazzjonali għal tip ta’ trattur, li l-apparat ta’ l-istering tiegħu ma jkunx konformi mad-dispożizzjonijiet ta’ din id-Direttiva.

Artikolu 3

L-Istati Membri għandhom idaħħlu fis-seħħ id-dispożizzjonijiet neċessarji sabiex ikunu konformi ma’ din id-Direttiva mhux aktar tard mit-30 Settembru 1988. Huma għandhom jinfurmaw minnufih lill-Kummissjoni dwar dan.

Artikolu 4

Din id-Direttiva hija indirizzata lill-Istati Membri.

Magħmula fi Brussel, il-21 Ġunju 1988.

Għall-Kummissjoni

Cockfield

Viċi-President

[1] ĠU L 84, tat-28.3.1974, p. 10.

[2] ĠU L 126, ta’ l-20.5.1988, p. 52.

[3] ĠU L 147, tad-9.6.1975, p. 24.

[4] ĠU L 378, tal-31.12.1982, p. 45.

--------------------------------------------------