31975R2729

Ir-Regolament Tal-Kunsill (KEE) Nru 2729/75

tad-29 ta’ Ottubru 1975

dwar imposti fuq l-importazzjoni ta’ taħlit ta’ ċereali, ross u ross maqsum

Il-Kunsill tal-Komunitajiet Ewropej,

Wara li kkunsidra t-Trattat li jistabbilixxi l-Komunità Ekonomika Ewropea, u partikolarment Artikolu 43 tiegħu,

Wara li kkunsidra l-proposta tal-Kummissjoni,

Wara li kkunsidra l-Opinjoni tal-Parlament Ewropew [1],

Sabiex jiżgura t-tħaddim tajjeb tas-sistema ta’ imposti applikabbli għall-importazzjoni ta’ ċereali, ross u ross maqsum minn pajjiżi terzi ntrodotti permezz tar-Regolament tal-Kunsill (KEE) Nru 2727/75 [2] tad– 29 ta’ Ottubru 1975 dwar l-organizzazzjoni komuni tas-suq taċ-ċereali, u r-Regolament tal-Kunsill Nru 359/67/KEE [3] tal-25 ta’ Lulju 1967 dwar l-organizzazzjoni komuni tas-suq tar-ross, kif l-aħħar emendat permezz tar-Regolament (KEE) Nru 668/75 [4], għandhom ikunu applikati regoli adattati għall-kummerċ ta’ taħlit ta’ ċereali, ross u ross maqsum;

Billi l-imposta ta’ importazzjoni fuq dan it-taħlit jirriżulta mill-klassifikar tat-tariffa tagħhom, li hija normalment stabbilita skond ir-regoli ġenerali għall-interpretazzjoni tat-Tariffa Komuni tad-Dwana;

Billi, fil-każ ta’ taħlit ta’ cereali, ross u ross maqsum, il-klassifikar tat-tariffi tista’ tagħti lok għal diffikultajiet jekk stabbilita skond dawn ir-regoli; billi fil-fatt, dan il-klassifikar kultant jirriżulta f’imposta ta’ importazzjoni baxxa li tiġi miżjuda fuq taħlit li, madanakollu, jkun fihom proporzjon sostanzjali ta’ prodotti soġġetti għal imposta ta’ importazzjoni għolja;

Sabiex jiġu evitati diffikultajiet bħal dawn, għandhom jiġu adottati dispożizzjonijiet speċjali sabiex tiġi stabbilita l-imposta ta’ importazzjoni fuq taħlit ta’ ċereali, ross u ross maqsum;

ADOTTA DAN IR-REGOLAMENT:

Artikolu 1

1. Il-imposta ta’ importazzjoni applikabbli għal taħlit magħmul minn żewġ ċereali li jaqgħu taħt Artikolu 1(a) u (b) tar-Regolament (KEE) Nru 2727/75 għandha tkun dik applikabbli:

- għaċ-ċereali kompenenti li jippredomina fil-piż, meta dak iċ-ċereali jirrappreżenta mill-inqas 90 % tal-użin tat-taħlita,

- għaċ-ċereali komponenti li jattira l-ogħla imposta ta’ importazzjoni, meta l-ebda miż-żewġ ċereali komponenti ma jirrappreżenta mill-inqas 90 % tal-użin tat-taħlita.

2. Fejn taħlita hija komposta minn iktar minn żewġ ċereali li jaqgħu taħt Artikolu 1(a) u (b) tar-Regolament (KEE) Nru 2727/75, u fejn ħafna ċereali kull wieħed jirrapreżenta iktar minn 10 % tal-piż tat-taħlita, l-imposta ta’ importazzjoni applikabbli għat-taħlita għandha tkun l-ogħla fost l-imposti ta’ importazzjoni applikabbli għal dawn iċ-ċereali, anke meta l-ammont tal-imposta ta’ importazzjoni hija l-istess għal żerġ ċereali jew aktar.

Meta ċereali wieħed biss jirrapreżenta iktar minn 10 % tal-piż tat-taħlita, l-imposta ta’ importazzjoni li għandha tkun applikata għandha tkun dik applikabbli għal dan iċ-ċereali.

3. L-imposta ta’ importazzjoni applikabbli għal taħlit kompost minn ċereali li jaqgħu taħt l-Artikolu 1(a) u (b) tar-Regolament (KEE) Nru 2727/75 u mhux regolat mir-regoli ta’ hawn fuq, għandha tkun l-imposta ta’ importazzjoni ogħla jew l-iktar għolja applikabbli għaċ-ċereali li jagħmlu t-taħlita konċernata, anke meta l-ammont ta’ imposta ta’ importazzjoni huwa l-istess għal żewġ ċereali jew iktar.

Artikolu 2

1. L-imposta ta’ importazzjoni applikabbli għal taħlit magħmul minn ċereali wieħed jew aktar li jaqgħu taħt Artikolu 1(a) u (b) tar-Regolament (KEE) Nru 2727/75 u ta’ wieħed jew aktar mill-prodotti speċifikati f’Artikolu 1(a) u (b) tar-Regolament Nru 359/67/KEE għandu jkun dak applikabbli għaċ-ċereali komponenti jew prodott li jattira l-ogħla imposta ta’ importazzjoni jew dik l-aktar għolja.

2. L-imposta ta’ importazzjoni applikabbli għal taħlit kompost minn ross klassifikabbli taħt gruppi jew stadji ta’ proċessar differenti jew ta’ ross klassifikabbli taħt grupp(i) jew stadju(i) ta’ proċessar differenti u ta’ ross maqsum, għandha tkun dik applikabbli:

- għall-komponent li jippredomina fil-piż, meta dak il-komponent jirrapreżenta mill-inqas 90 % tal-piż tat-taħlita,

- il-komponent li jattira l-ogħla imposta ta’ importazzjoni jew dik l-aktar għolja, meta l-ebda komponent ma jirrapreżenta mill-inqas 90 % tal-piż tat-taħlita.

Artikolu 3

Meta dan il-metodu ta’ stima ta’ l-imposta ta’ importazzjoni stabbilit minn Artikoli 1 u 2 ma jistax ikun applikat, l-imposta li għandha tkun applikata għal dan it-taħlit kopert permezz ta’ dan ir-Regolament għandha tkun dik determinata mill-klassifika tat-tariffa tat-taħlit.

Artikolu 4

1. Ir-Regolament tal-Kunsill Nru 156/66/KEE [5] tal-25 ta’ Ottubru 1966 dwar il-imposti fuq taħlit ta’ ċereali, ross u ross maqsum, huwa hawnhekk imħassar.

2. Referenzi għar-Regolament imħassar permezz tal-paragrafu 1 għandhom jinftiehmu bħala referenzi għal dan ir-Regolament

Artikolu 5

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul il-Lussemburgu, fid-29 ta’ Ottubru 1975.

Għall-Kunsill

Il-President

G. Marcora

[1] Opinjoni mogħtija fis-16 ta’ Ottubru 1975 (għad mhux pubblikata fil-Ġurnal Uffiċjali).

[2] ĠU L 281, tad-29.10.1975, p. 1.

[3] ĠU C 174, tal-31.7.1967, p. 1.

[4] ĠU L 72, ta’ l-20.3.1975, p. 18

[5] ĠU C 192, tas-27.10.1966, p. 3278/66.

--------------------------------------------------