—

wara li kkunsidra l-Artikolu 39 tat-Trattat dwar il-Funzjonament tal-Unjoni Ewropea (TFUE), li jelenka l-iżgurar tad-disponibbiltà tal-provvisti, l-istabbilizzazzjoni tas-swieq u l-iżgurar li l-provvisti jaslu għand il-konsumaturi bi prezzijiet raġonevoli bħala objettivi tal-politika agrikola komuni,

—

wara li kkunsidra r-riżoluzzjoni tiegħu tal-15 ta’ Jannar 2020 dwar il-Patt Ekoloġiku Ewropew (1),

—

wara li kkunsidra l-Artikolu 25 tad-Dikjarazzjoni Universali tad-Drittijiet tal-Bniedem u l-Artikolu 11 tal-Patt Internazzjonali dwar id-Drittijiet Ekonomiċi, Soċjali u Kulturali, li fihom huwa rikonoxxut id-dritt għall-ikel bħala parti mid-dritt għal livell ta’ għajxien xieraq,

—

wara li kkunsidra l-komunikazzjoni tal-Kummissjoni tat-3 ta’ Ottubru 2012, bit-titolu “L-approċċ tal-UE għar-reżiljenza: nitgħallmu mill-kriżijiet tas-sigurtà tal-ikel” (COM(2012)0586),

—

wara li kkunsidra l-komunikazzjoni tal-Kummissjoni tat-12 ta’ Novembru 2021 bit-titolu “Pjan ta’ kontinġenza biex jiġu żgurati l-provvista tal-ikel u s-sigurtà alimentari fi żminijiet ta’ kriżi” (COM(2021)0689),

—

wara li kkunsidra l-komunikazzjoni tal-Kummissjoni tat-23 ta’ Marzu 2022 dwar is-salvagwardja tas-sigurtà tal-ikel u t-tisħiħ tar-reżiljenza tas-sistemi tal-ikel (COM(2022)0133),

—

wara li kkunsidra r-riżoluzzjoni tiegħu tal-24 ta’ Marzu 2022 dwar il-ħtieġa ta’ pjan ta’ azzjoni urġenti tal-UE biex tiġi żgurata s-sigurtà tal-ikel kemm fl-UE kif ukoll barra l-UE fid-dawl tal-invażjoni Russa tal-Ukrajna (2),

—

wara li kkunsidra r-riżoluzzjoni tiegħu tas-6 ta’ Lulju 2022 dwar l-indirizzar tas-sigurtà alimentari fil-pajjiżi li qed jiżviluppaw (3),

—

wara li kkunsidra d-Direttiva (UE) 2022/2557 tal-Parlament Ewropew u tal-Kunsill tal-14 ta’ Diċembru 2022 dwar ir-reżiljenza tal-entitajiet kritiċi u li tħassar id-Direttiva tal-Kunsill 2008/114/KE (4), li żżid il-produzzjoni, l-ipproċessar u d-distribuzzjoni tal-ikel mal-lista ta’ setturi koperti,

—

wara li kkunsidra r-rapporti dwar l-istat tas-sigurtà tal-ikel u n-nutrizzjoni fid-dinja, ir-Rapport Globali dwar il-Kriżijiet tal-Ikel u r-rapport dwar in-nutrizzjoni globali, inkluża l-edizzjoni tal-2021, il-Linji Gwida dwar id-Dritt għall-Ikel tal-Organizzazzjoni tal-Ikel u l-Agrikoltura (FAO) tan-NU, il-Linji Gwida Volontarji dwar is-Sistemi tal-Ikel u n-Nutrizzjoni tal-Kumitat tal-FAO dwar is-Sigurtà tal-Ikel Dinjija, l-għaxar elementi tal-agroekoloġija bħala linji gwida għat-tranżizzjoni lejn sistema agrikola u tal-ikel sostenibbli (FAO), u l-Qafas għal Azzjoni għas-Sigurtà Alimentari u n-Nutrizzjoni fi Kriżijiet Imtawla tal-2014,

—

wara li kkunsidra r-riżoluzzjoni tal-Assemblea Ġenerali tan-Nazzjonijiet Uniti tal-25 ta’ Settembru 2015 intitolata “Transforming our World: the 2030 Agenda for Sustainable Development” (Nittrasformaw id-Dinja tagħna: l-Aġenda 2030 għall-Iżvilupp Sostenibbli),

—

wara li kkunsidra r-riżoluzzjoni tal-Assemblea Ġenerali tan-NU tal-1 ta’ April 2016, bit-titolu “United Nations Decade of Action on Nutrition (2016-2025)” (Għaxar Snin ta’ Azzjoni tan-Nazzjonijiet Uniti dwar in-Nutrizzjoni (2016-2025)), li għandha l-għan li ssaħħaħ l-isforzi biex jintemm il-ġuħ u tinqered il-malnutrizzjoni fid-dinja kollha u li jiġi żgurat aċċess universali għal nutrizzjoni aktar tajba għas-saħħa u sostenibbli għall-bnedmin kollha, huma min huma u jgħixu fejn jgħixu,

—

wara li kkunsidra l-Linji Gwida Volontarji tal-Kumitat dwar is-Sigurtà Alimentari Dinjija (CFS) għall-governanza responsabbli tal-pussess tal-art, is-sajd u l-foresti fil-kuntest tas-sigurtà alimentari nazzjonali (2012) u l-Prinċipji tas-CFS għal Investiment Responsabbli fis-Sistemi tal-Agrikoltura u tal-Ikel (2015),

—

wara li kkunsidra l-Għanijiet ta’ Żvilupp Sostenibbli tan-Nazzjonijiet Uniti (SDGs) u r-rabta mill-qrib u l-integrazzjoni tagħhom, b’mod partikolari l-SDG 1 biex jintemm il-faqar fil-forom kollha tiegħu, l-SDG 2 biex jintemm il-ġuħ, jinkisbu sigurtà tal-ikel u nutrizzjoni aħjar u tiġi promossa agrikoltura sostenibbli,

—

wara li kkunsidra r-Rapport tan-NU tat-30 ta’ Diċembru 2021 bit-titolu “Seeds, right to life and farmers’ rights” (Żrieragħ, dritt għall-ħajja u drittijiet tal-bdiewa) (A/HRC/49/43) mir-Rapporteur Speċjali dwar id-dritt għall-ikel,

—

wara li kkunsidra l-komunikazzjoni tal-Kummissjoni tad-9 ta’ Novembru 2022 bit-titolu “L-iżgurar tad-disponibbiltà u l-affordabbiltà tal-fertilizzanti” (COM(2022)0590),

—

wara li kkunsidra r-rapport mill-Kummissjoni lill-Kunsill u lill-Parlament Ewropew dwar l-iżvilupp tal-proteini tal-pjanti fl-Unjoni Ewropea tat-22 ta’ Novembru 2018 (COM(2018)0757),

—

wara li kkunsidra r-riżoluzzjoni tiegħu tat-13 ta’ Diċembru 2022 dwar viżjoni fit-tul għaż-Żoni Rurali tal-UE – Lejn żoni rurali aktar b’saħħithom, konnessi, reżiljenti u prosperi sal-2040 (5),

—

wara li kkunsidra l-opinjoni tal-Kumitat Ekonomiku u Soċjali Ewropew,

—

wara li kkunsidra l-opinjoni tal-Kumitat tar-Reġjuni,

—

wara li kkunsidra r-Regola 54 tar-Regoli ta’ Proċedura tiegħu,

—

wara li kkunsidra l-opinjonijiet tal-Kumitat għall-Ambjent, is-Saħħa Pubblika u s-Sikurezza tal-Ikel u l-Kumitat għall-Iżvilupp,

—

wara li kkunsidra r-rapport fuq inizjattiva proprja tal-Kumitat għall-Agrikoltura u l-Iżvilupp Rurali (A9-0185/2023),

A.

billi fl-24 ta’ Frar 2022 il-Federazzjoni Russa invadiet illegalment lill-Ukrajna, li kellha konsegwenzi diżastrużi, inkluża theddida serja għas-sigurtà globali tal-ikel, bl-aktar pajjiżi vulnerabbli jkunu l-aktar f’riskju; billi l-invażjoni tal-Ukrajna fuq skala sħiħa tar-Russja aggravat serjament sitwazzjoni diġà diffiċli u ta’ sfida fis-settur agroalimentari, li għadu qed jirkupra mill-konsegwenzi tal-pandemija tal-COVID-19 u qed ibati mill-kriżi klimatika li għaddejja bħalissa u miż-żieda fil-prezzijiet tal-enerġija u tal-fertilizzanti;

B.

billi l-effetti tal-kriżi kkawżata mill-aggressjoni Russa kontra l-Ukrajna poġġew is-sigurtà tal-ikel u r-reżiljenza tas-sistema globali tal-ikel fiċ-ċentru tal-aġenda politika; billi l-produzzjoni Ewropea tal-ikel trid għalhekk titqies bħala settur strateġiku u tingħata l-istess prijorità daqs is-sigurtà l-enerġija, id-difiża u l-ġlieda kontra t-tibdil fil-klima fil-livell tal-UE u dak internazzjonali;

C.

billi, skont l-FAO, fil-bidu tal-2022, l-Ukrajna u r-Russja kienu jirrappreżentaw kważi 30 % tal-esportazzjonijiet globali tal-qamħ u tal-qamħirrum, filwaqt li r-Russja kienet l-akbar esportatur ta’ fertilizzanti fid-dinja; billi aktar minn 30 pajjiż, prinċipalment fl-Afrika, fil-Lvant Nofsani u fl-Asja Ċentrali, jiddependu fuq l-Ukrajna u r-Russja għal aktar minn 30 % tal-ħtiġijiet tagħhom ta’ importazzjoni tal-qamħ; billi l-invażjoni tar-Russja fl-Ukrajna qed taggrava din l-insigurtà tal-ikel globali u tista’ twassal biex bejn tmien sa 13-il miljun persuna oħra jispiċċaw f’insigurtà tal-ikel, skont is-simulazzjonijiet tal-FAO;

D.

billi l-politika agrikola komuni (PAK) tat kontribut pożittiv għat-tisħiħ tar-rwol tal-PAK tal-agrikoltura Ewropea fis-60 sena li ilha fis-seħħ; billi għandha tkompli tagħmel dan fil-futur b’appoġġ baġitarju li jkun suffiċjenti u estensiv biżżejjed biex jiggarantixxi s-sigurtà u l-provvista tal-ikel fl-Ewropa;

E.

billi l-gwerra kontra l-Ukrajna u ż-żidiet sinifikanti fil-prezzijiet għal inputs bħall-fertilizzanti, l-enerġija u l-għalf li rriżultaw mill-kunflitt, flimkien mal-ispekulazzjoni tal-ikel, qed iwasslu għal distorsjonijiet u tensjonijiet kumulattivi sinifikanti fis-swieq agrikoli, tas-sajd u tal-akkwakultura globali, b’mod partikolari għaċ-ċereali, iż-żejt veġetali u l-bhejjem; billi l-produzzjoni tal-ikel u l-aċċess għall-ikel ma jridux jiġu pperikolati aktar u taħt l-ebda ċirkostanza ma għandhom jintużaw bħala arma ġeopolitika, peress li dan ikollu impatt fuq l-ekonomiji madwar id-dinja, speċjalment fuq iċ-ċittadini u dawk l-aktar vulnerabbli fis-soċjetà;

F.

billi l-ewwel irvellijiet tal-ikel li faqqgħu fil-pajjiżi Għarab fl-2008 urew kemm l-ikel jista’ jintuża b’mod effettiv bħala arma biex jikkawża instabbiltà ġeopolitika;

G.

billi mhux biss il-prezzijiet tal-ikel għall-konsumatur, iżda wkoll l-introjti tal-unitajiet domestiċi, huma fatturi kruċjali tas-sigurtà tal-ikel; billi, meta jiffaċċjaw prezzijiet tal-ikel għoljin bla preċedent, l-unitajiet domestiċi b’introjtu aktar baxx, li jonfqu sehem kbir mill-baġit tagħhom fuq l-ikel, jistgħu jiġu mġiegħla jagħżlu ikel anqas tajjeb għas-saħħa u anqas varjat, u b’hekk isiru partikolarment vulnerabbli għar-riskju ta’ mard li ma jitteħidx marbut ma’ dieti ħżiena;

H.

billi għalkemm il-prezzijiet tal-ikel huma għoljin, mhumiex qed jikkumpensaw l-ispejjeż tal-produzzjoni għall-bdiewa u l-kooperattivi agrikoli tal-UE; billi l-ispejjeż tal-produzzjoni tagħhom kienu qed jiżdiedu b’mod esponenzjali matul is-sena li għaddiet minħabba ż-żieda qawwija fil-prezzijiet tal-enerġija u tal-imballaġġ kif ukoll minħabba d-disponibilità u l-kwistjonijiet tal-prezzijiet tal-fertilizzanti u l-makkinarju;

I.

billi skont il-Kunsill Internazzjonali taċ-Ċereali, ir-Russja u l-Ukrajna rrappreżentaw 8,6 % tal-produzzjoni globali taċ-ċereali, eskluż ir-ross, u 24 % tal-esportazzjonijiet fis-sena tal-ħsad 2021; billi bħala riżultat tal-gwerra li qed isseħħ mir-Russja kontra l-Ukrajna, l-interruzzjonijiet u l-konġestjonijiet fl-infrastruttura kritika, b’mod partikolari l-faċilitajiet tat-trasport u tal-ħżin għall-prodotti agrikoli, qed jillimitaw il-moviment tal-ikel, tal-għalf u ta’ prodotti agrikoli oħra, b’mod partikolari ċ-ċereali u ż-żrieragħ li minnhom jintgħasar iż-żejt mill-Baħar l-Iswed; billi l-prezzijiet fis-swieq agrikoli globali kienu diġà għolew qabel l-invażjoni Russa tal-Ukrajna, parzjalment minħabba l-impatti klimatiċi u l-effetti tal-pandemija tal-COVID-19;

J.

billi l-infrastrutturi tat-trasport u tal-ħżin huma essenzjali biex jiġu żgurati flussi kummerċjali, provvisti u stabbiltà tas-suq effiċjenti u siguri; billi kwalunkwe tfixkil għal dawn jista’ jaffettwa l-livelli tal-prezzijiet tal-konsumatur li qabel kienu raġonevoli; billi s-sigurtà tal-ikel tmur lil hinn mill-agrikoltura u l-produzzjoni tal-ikel u għandha impatti fuq diversi oqsma, mhux biss fuq il-produtturi u l-konsumaturi primarji, iżda wkoll fuq l-ekonomija inġenerali, il-kummerċ, l-iżvilupp u l-isforzi umanitarji, u fuq il-koeżjoni soċjali u reġjonali;

K.

billi l-Kummissjoni għandha tuża l-mezzi kollha possibbli biex tiżgura li s-suq uniku Ewropew jiffunzjona tajjeb; billi l-Kummissjoni għandha żżid l-isforzi tagħha biex tindirizza l-ostakli kollha agroalimentari fis-suq uniku, inkluż l-iżblukkar tal-konġestjonijiet tat-trasport;

L.

billi, skont l-FAO, il-kunċett tas-sigurtà tal-ikel mhuwiex limitat għall-produzzjoni tal-ikel, iżda jinkludi wkoll id-dimensjonijiet tad-disponibbiltà, l-aċċessibbiltà u l-istabbiltà, kif ukoll id-dritt tal-bniedem rikonoxxut fuq livell internazzjonali għall-ikel u aċċess stabbli u affordabbli għal dieti tajbin għas-saħħa u nutrittivi għal kulħadd; billi l-ebda dritt tal-bniedem ma jinkiser daqshekk ta’ spiss;

M.

billi nutrizzjoni tajba għas-saħħa u bbilanċjata tagħmel differenza pożittiva fil-ħajja tan-nies u tippermetti l-iżvilupp ekwu u sostenibbli tas-soċjetà; billi l-konsumaturi qed jagħżlu dejjem aktar għażliet tal-ikel tajbin għas-saħħa u siguri, prodotti sostenibbli, trasparenza fil-katina tal-provvista, traċċabbiltà aħjar tal-proċessi kollha ta’ produzzjoni u distribuzzjoni abbażi tad-dritt tagħhom għal aktar informazzjoni dwar l-oriġini u l-metodi ta’ produzzjoni tal-oġġetti tal-ikel li jikkunsmaw;

N.

billi l-aċċess għal ikel sigur u tajjeb għas-saħħa għal kulħadd huwa dritt rikonoxxut internazzjonalment; billi huwa essenzjali li s-soċjetà tiffoka fuq id-disponibbiltà u l-affordabbiltà tal-ikel għal kulħadd, minħabba l-implikazzjonijiet u l-konsegwenzi soċjali, ekonomiċi u ambjentali tagħhom kif ukoll l-effetti tagħhom fuq is-saħħa tal-bniedem;

O.

billi d-dritt għall-edukazzjoni huwa dritt fundamentali tal-bniedem; billi l-Għan ta’ Żvilupp Sostenibbli 2 jimmira li jinqered il-ġuħ sal-2030; billi l-UE għandha tiddefendi d-dritt għal ikel adegwat bħala prijorità tas-sistemi tal-ikel sabiex tinkiseb is-sigurtà tal-ikel u tittejjeb in-nutrizzjoni;

P.

billi, skont ir-Rapport tan-NU mir-Rapporteur Speċjali dwar id-dritt għall-ikel bit-titolu “Seeds, right to life and farmers’ rights” (Żrieragħ, dritt għall-ħajja u drittijiet tal-bdiewa), id-dritt għall-ikel huwa marbut b’mod inerenti mas-sistemi taż-żrieragħ tal-bdiewa u d-dritt indiviżibbli tagħhom li jaħżnu, jużaw, jiskambjaw u jbigħu b’mod liberu ż-żrieragħ maħżuna mill-azjendi agrikoli; billi Tim Ewropa għandu jappoġġa programmi li jqisu l-ħtiġijiet tas-sistemi taż-żrieragħ tal-bdiewa jew tas-sistemi taż-żrieragħ informali u jappoġġa l-banek taż-żrieragħ jew il-libreriji taż-żrieragħ li jippermettu lill-bdiewa u lill-ġardinara jiġbru, jikkonservaw u jikkondividu żrieragħ indiġeni, razez lokali u varjetajiet;

Q.

billi l-kriżi tal-ikel ma tirrispettax fruntieri u l-ebda pajjiż ma jista’ jegħlibha waħdu; billi hemm ħtieġa urġenti għal azzjoni konġunta u solidarjetà;

R.

billi bħala riżultat tal-kriżi tal-provvista globali, l-FAO tistma li l-prezzijiet internazzjonali tal-ikel u tal-għalf għolew għal livelli mingħajr preċedent minn meta l-FAO bdiet twettaq l-analiżi tal-prezzijiet u ogħla mil-livelli diġà għoljin tagħhom, anke għal prodotti li għalihom l-ebda żieda fil-prezz ma kienet ġustifikata; billi l-inflazzjoni tal-prezzijiet tal-ikel laħqet 17,26 % f’Ottubru 2022; billi ħafna nies fid-dinja jinsabu f’riskju li l-iskarsezza tal-ikel, il-ġuħ u l-ikel ma jibqgħux affordabbli; billi sabiex tiġi identifikata, evitata u eliminata l-ispekulazzjoni tal-ikel li tikkontribwixxi għall-volatilità tal-prezzijiet tal-ikel, l-operaturi tul il-katina tal-provvista tal-ikel jeħtieġ li jkunu aktar trasparenti dwar is-sehem tagħhom tal-valur miżjud, li jżid it-trasparenza ġenerali tas-suq;

S.

billi l-insigurtà tal-ikel globali mhijiex primarjament ikkawżata minn nuqqasijiet fil-provvista iżda minn kunflitti, distribuzzjoni inugwali tal-ikel, ikel mhux affordabbli u interruzzjonijiet fil-katina tal-provvista globali; billi ż-żieda fil-prezzijiet tal-ikel taffettwa l-aktar lill-familji b’introjtu baxx, li jonfqu l-akbar proporzjon tal-introjtu tagħhom fuq l-ikel; billi huwa essenzjali li jiġu analizzati l-fatturi li qed jgħollu l-prezzijiet għall-inputs agrikoli u l-effett li dan għandu fuq iż-żieda fil-prezzijiet tal-ikel;

T.

billi wieħed minn kull tliet persuni madwar id-dinja għad m’għandux aċċess għal ikel adegwat u suffiċjenti u għal nutrizzjoni tajba għas-saħħa; billi 2,3 biljun persuna fid-dinja batew minn insigurtà tal-ikel moderata jew severa fl-2021; billi ħafna minn dawn il-persuni huma impjegati fl-agrikoltura; billi, skont id-WFP, l-insigurtà akuta tal-ikel affettwat rekord ta’ 349 miljun persuna fl-2022;

U.

billi l-ġuħ u l-insigurtà tal-ikel qed jiżdiedu madwar id-dinja u ħafna pajjiżi jinsabu ’l bogħod b’mod sinifikanti milli jilħqu l-mira ta’ ġuħ żero sal-2030; billi li l-malnutrizzjoni tirrappreżenta piż tul il-ħajja għall-individwi u għas-soċjetajiet peress li tipprevjeni lit-tfal milli jilħqu l-potenzjal sħiħ tagħhom u għalhekk tillimita l-iżvilupp ekonomiku tal-bniedem u dak nazzjonali;

V.

billi l-Ftehim ta’ Marrakech tal-1994 u b’mod partikolari l-Ftehim tal-Organizzazzjoni Dinjija tal-Kummerċ (WTO) dwar l-Agrikoltura kkontribwew għall-ispeċjalizzazzjoni tar-reġjuni agrikoli fil-produzzjoni ta’ għelejjel tal-prodotti bażiċi speċifiċi, u b’hekk ħolqu dipendenzi mill-perkors fis-sistemi ta’ produzzjoni; billi din is-sitwazzjoni mhijiex reżiljenti għall-kriżijiet, peress li tħalli b’mod partikolari lill-pajjiżi importaturi tal-ikel vulnerabbli għal xokkijiet fil-prezzijiet;

W.

billi n-natura u l-bijodiversità jinteraġixxu mal-agrikoltura, l-ikel u n-nutrizzjoni f’għadd ta’ oqsma ewlenin, billi jipprovdu varjetà ta’ pjanti u annimali minn sorsi domestikati u selvaġġi;

X.

billi l-bijodiversità tal-għelejjel hija importanti peress li din tippermetti lill-bdiewa individwali jadattaw l-ippjanar agrikolu tagħhom għall-kundizzjonijiet klimatiċi u jagħmlu s-sistemi tal-ikel naturalment aktar reżiljenti għat-tibdil fil-klima, il-pesti u l-patoġeni; billi, fl-istess ħin, dan l-approċċ ibbażat fuq in-natura jikkontribwixxi għat-tisħiħ tal-bijodiversità; billi ġew stabbiliti għadd ta’ proġetti innovattivi minn xi pajjiżi mhux tal-UE, bħall-inizjattiva Afrikana “Great Green Wall”, li tippromwovi proġetti agroekoloġiċi; billi l-appoġġ tal-UE għal sistemi tal-ikel sostenibbli huwa waħda mill-prijoritajiet tal-programmi indikattivi pluriennali adottati ma’ madwar 70 pajjiż sieħeb fl-ambitu tal-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali (NDICI) – l-istrument Ewropa Globali għall-perjodu 2021–2027;

Y.

billi d-disponibbiltà tal-ikel tvarja minħabba x-xokkijiet ekonomiċi, il-klima, l-istaġuni u l-interuzzjonijiet; billi l-UE trid tinvesti fir-reżiljenza tas-settur agroalimentari u tikseb tranżizzjoni lejn agrikoltura aktar sostenibbli, li se ssaħħaħ is-sigurtà tal-ikel fit-tul u tista’ tipprovdi sorsi alternattivi ta’ introjtu għall-bdiewa; billi huma meħtieġa sforzi biex jiġi miġġieled it-tisħin globali biex jiġi żgurat li l-agrikoltura tkun reżiljenti u sostenibbli fit-tul;

Z.

billi 63 % tal-persuni b’introjtu baxx madwar id-dinja huma impjegati fl-agrikoltura u l-maġġoranza l-kbira tagħhom jaħdmu f’azjendi agrikoli żgħar u ta’ daqs medju li s-sostenibbiltà ekonomika tagħhom bħalissa hija mhedda;

AA.

billi skont il-valutazzjonijiet tal-Organizzazzjoni Dinjija għas-Saħħa tal-Annimali (OIE), il-kompetizzjoni għall-użu tal-art agrikola u l-foresti qed tiżdied bl-istess pass bħat-tkabbir fil-popolazzjoni tal-bniedem tad-dinja, li hija stmata li se tiżdied minn 8 biljun illum għal 9,5 biljun sal-2050;

AB.

billi s-sigurtà tal-ikel attwali u dik futura fl-Unjoni Ewropea hija marbuta direttament mal-għanijiet tal-Istrateġija mill-Għalqa sal-Platt u l-Istrateġija għall-Bijodiversità; billi l-Istrateġija mill-Għalqa sal-Platt iddeskriviet diversi inizjattivi importanti, inkluż pjan ta’ kontinġenza tal-UE biex jiġu żgurati l-provvista u s-sigurtà tal-ikel fi żminijiet ta’ kriżi;

AC.

billi l-ambizzjonijiet tal-Patt Ekoloġiku jistgħu jagħmlu s-sistema tal-ikel tal-UE aktar ġusta, aktar b’saħħitha u aktar favur l-ambjent, peress li s-sigurtà tal-ikel tal-UE u dik globali jiddependu fuq sistemi tal-ikel reżiljenti u sostenibbli fuq terminu qasir u twil; billi l-effett kumulattiv tal-implimentazzjoni ta’ leġiżlazzjoni relatata mal-Patt Ekoloġiku jrid ikun li tiġi ppreservata l-kapaċità tal-produzzjoni tal-ikel tal-UE, jinvolvi tranżizzjoni bla xkiel kemm fir-rigward taż-żmien kif ukoll tar-rekwiżiti u ma jridx iżid id-dipendenza fuq l-importazzjonijiet minn pajjiżi terzi, li kollha kemm huma jistgħu jipperikolaw is-sigurtà tal-ikel fl-UE; billi huwa vitali li jiġi allokat finanzjament pubbliku suffiċjenti għas-setturi tal-għelejjel u tal-bhejjem sabiex jiġu protetti kontra effetti negattivi u jiġi evitat tnaqqis fil-produzzjoni tal-ikel tal-UE;

AD.

billi l-implimentazzjoni tal-Patt Ekoloġiku għandha tiżgura tranżizzjoni ġusta li tiggarantixxi protezzjoni adegwata għall-bdiewa, speċjalment il-bdiewa f’azjendi agrikoli żgħar u ta’ daqs medju, u ammonti suffiċjenti ta’ prodotti agrikoli siguri u affordabbli għall-konsumaturi, f’konformità mal-għanijiet fit-tul tal-UE dwar ir-reżiljenza u s-sostenibbiltà; billi għajxien sostenibbli għall-produtturi primarji, li l-introjtu tagħhom għadu lura, huwa ċentrali għall-ġestjoni sostenibbli tal-kriżijiet attwali fis-swieq agrikoli u għall-kisba dejjiema tal-miri tal-Patt Ekoloġiku;

AE.

billi kważi 34 % tal-bdiewa Ewropej kellhom 65 sena jew aktar fl-2016; billi l-fatt li ħafna bdiewa se jirtiraw fil-futur qarib huwa kwistjoni ta’ tħassib kbir f’għadd ta’ Stati Membri; billi t-tiġdid ġenerazzjonali huwa waħda mill-akbar sfidi għall-eżistenza kontinwa ta’ settur agrikolu u ta’ sistemi tal-ikel reżiljenti fl-UE; billi, filwaqt li huma prijorità tal-UE, l-isforzi li saru permezz tal-PAK s’issa ma kinux biżżejjed biex jindirizzaw is-sitwazzjoni għall-aħjar u għalhekk se jkun meħtieġ sett usa’ ta’ għodod ta’ politika;

AF.

billi l-bdiewa żgħażagħ b’mod partikolari huma innovattivi, speċjalment fl-użu ta’ teknoloġiji ġodda; billi, jekk jiġu mħallsa, motivati u mogħtija s-setgħa kif xieraq, huma lesti li jagħmlu investimenti li jistgħu jżidu s-sostenibbiltà agrikola, il-kapaċità tal-produzzjoni u l-kompetittività; billi l-konnettività ma’ networks tal-broadband b’kapaċità għolja hija kruċjali għall-modernizzazzjoni tal-azjendi agrikoli, iż-żieda fil-produttività u t-titjib tal-effiċjenza; billi huma meħtieġa inċentivi biex jiġi promoss it-taħriġ fl-IT għall-bdiewa;

AG.

billi ż-żieda qawwija u sinifikanti fil-prezzijiet globali tal-fertilizzanti u tal-enerġija flimkien maż-żieda qawwija fi spejjeż oħra tal-input qed joħolqu diffikultajiet għall-bdiewa u jheddu l-produzzjoni futura tal-għelejjel u b’hekk is-sigurtà tal-ikel u l-affordabbiltà; billi f’Settembru 2022 il-prezzijiet tal-fertilizzanti nitroġenużi żdiedu b’149 % meta mqabbla mal-prezzijiet fis-suq tal-fertilizzanti tal-UE fis-sena ta’ qabel; billi fid-dawl tal-kriżi attwali tal-input u tal-enerġija, il-Kummissjoni trid tagħti attenzjoni mill-qrib lis-sitwazzjoni ekonomika tal-bdiewa Ewropej;

AH.

billi l-isfidi ġeopolitiċi attwali juru li s-sigurtà tal-ikel mhijiex kisba permanenti, li l-produzzjoni Ewropea tal-ikel għandha titqies bħala settur strateġiku u għandha tiġi ppreservata u msaħħa f’dan ir-rigward; billi l-funzjonament kif suppost tas-suq uniku Ewropew huwa prekondizzjoni biex tiġi żgurata s-sigurtà tal-ikel; billi l-ostakli tariffarji u mhux tariffarji kollha fis-settur agroalimentari għandhom jiġu rieżaminati; billi żoni u komunitajiet rurali aktar b’saħħithom, vibranti, reżiljenti u prosperi huma kruċjali għas-sigurtà u l-awtonomija tal-ikel tal-Ewropa u għall-prosperità tal-Unjoni Ewropea;

AI.

billi l-agrikoltura hija ta’ importanza kbira għall-ekonomija tar-reġjuni ultraperiferiċi tal-UE, li spiss jiffaċċjaw sitwazzjoni partikolarment fraġli tas-sigurtà tal-ikel; billi minħabba n-natura tas-sigurtà tal-ikel, l-ispejjeż ta’ reazzjoni wara li jseħħ il-fatt huma ogħla minn dawk ta’ intervent aktar kmieni;

AJ.

billi jekk l-UE trid tevita d-destabbilizzazzjoni, il-faqar tal-ikel, il-karestija, l-inkwiet soċjali u politiku f’pajjiżi oħra, l-Unjoni trid tiżviluppa viżjoni biex tiżgura s-sigurtà tal-ikel u n-nutrizzjoni fl-UE u tikkontribwixxi għas-sigurtà tal-ikel fil-livell internazzjonali;

AK.

billi huwa stmat li 20 % tal-ikel kollu prodott jintilef jew jinħela; billi aktar minn 36 miljun persuna mhumiex f’pożizzjoni finanzjarja biex jieklu ikla ta’ kwalità kull jumejn; billi l-popolazzjoni l-aktar fil-bżonn qed tiżdied b’riżultat tal-kriżi ekonomika attwali;

AL.

billi l-kumpaniji tal-ikel involuti fil-loġistika u d-distribuzzjoni bl-ingrossa, il-produzzjoni industrijali fuq skala kbira u l-ipproċessar ġew identifikati bħala entitajiet kruċjali li r-reżiljenza tagħhom jeħtieġ li tissaħħaħ peress li jipprovdu servizzi essenzjali; billi s-swieq bl-ingrossa huma entitajiet ta’ interess pubbliku li jipprovdu lil żoni reġjonali u interreġjonali vasti b’servizz li huwa essenzjali għall-provvista u d-distribuzzjoni lill-konsumatur finali ta’ prodotti agrikoli u tas-sajd friski u li jitħassru u li jiggarantixxu l-kwalità u l-konformità tagħhom mal-istandards tas-saħħa; billi, barra minn hekk, is-swieq bl-ingrossa diġà wrew ir-reżiljenza tagħhom u r-rwol vitali li għandhom billi jiżguraw il-kontinwità tal-provvista u d-distribuzzjoni tal-ikel matul il-pandemija tal-COVID-19;

AM.

billi 11,9 % biss tal-maniġers kollha tal-azjendi agrikoli fl-UE fl-2020 kellhom anqas minn 40 sena, filwaqt li 33,2 % tal-maniġers tal-azjendi agrikoli tal-UE kellhom 65 sena u aktar; billi l-età medja tal-bdiewa Ewropej żdiedet għal 57 sena; billi fl-2020 kien hemm 5,3 miljun azjenda agrikola anqas fl-UE milli fl-2005, tnaqqis ta’ 37 %; billi l-għadd ta’ maniġers tal-azjendi agrikoli naqas b’ 11,2 % bejn l-2016 u l-2020; billi l-biċċa l-kbira tal-Istati Membri tal-UE rreġistraw tnaqqis ġenerali fl-għadd ta’ maniġers tal-azjendi agrikoli;

AN.

billi n-nisa għandhom rwol vitali fiż-żoni rurali; billi, bl-għan li jiġi miġġieled it-tnaqqis previst ta’ dawn iż-żoni fl-UE, huwa vitali li n-nisa jingħataw rikonoxximent u viżibbiltà għall-ħidma tagħhom fl-azjendi agrikoli u s-sjieda konġunta tagħhom; billi azzjonijiet u miżuri huma meħtieġa biex titnaqqas ukoll id-differenza bejn il-ġeneri fis-settur agroalimentari, u huwa imperattiv li n-nisa jiġu involuti fil-proċess tat-teħid tad-deċiżjonijiet fil-livelli kollha meta jiġu żviluppati pjanijiet u politiki;