IL-KUMMISSJONI EWROPEA

Brussell, 23.6.2022

COM(2022) 323 final

KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-QORTI EWROPEA TAL-AWDITURI





KONTIJIET ANNWALI KONSOLIDATI TAL-UNJONI EWROPEA

GĦAS-SENA FINANZJARJA 2021

WERREJ

PREFAZJONI    

IL-PUNTI FINANZJARJI EWLENIN TAS-SENA    

NOTA LI TAKKUMPANJA L-KONTIJIET KONSOLIDATI    

RAPPORTI FINANZJARJI KONSOLIDATI U NOTI TA’ SPJEGAZZJONI    

IL-KARTA BILANĊJALI    

RAPPORT TAL-PRESTAZZJONI FINANZJARJA    

RAPPORT TAL-FLUSSI TAL-FLUS    

DIKJARAZZJONI TAL-BIDLIET FL-ASSI NETTI    

NOTI GĦAR-RAPPORTI FINANZJARJI    

RAPPORTI DWAR L-IMPLIMENTAZZJONI BAĠITARJA U NOTI TA’ SPJEGA    

GLOSSARJU    

LISTA TA’ ABBREVJAZZJONIJIET    

PREFAZJONI

Fl-2021, l-Ewropa sfidat il-pandemija li kienet għaddejja minnha. Is-solidarjetà kienet kruċjali sabiex tiġi kkontrollata l-isfida tal-Covid-19 u sabiex jittaffa l-impatt ekonomiku u soċjali tagħha. Il-baġit Ewropew immobilizza l-mezzi kollha disponibbli sabiex jappoġġa liċ-ċittadini, lin-negozji u lill-Istati Membri filwaqt li jagħmel lill-Ewropa addattata għall-futur: aktar ekoloġika, aktar diġitali u aktar reżiljenti.

L-Unjoni Ewropea nediet l-istrument ta’ rkupru dedikat NextGenerationEU sabiex tappoġġa l-irkupru tal-Ewropa u sabiex tindirizza l-isfidi kurrenti u futuri. B’ammonti straordinarji ta’ finanzjament li ġew iġġenerati fis-swieq finanzjarji minn Ġunju 2021, il-baġit tal-UE wera li għal darb’oħra kien għodda importanti li l-Unjoni għandha għad-dispożizzjoni tagħha sabiex tindirizza sitwazzjonijiet ta’ kriżi u tipprovdi valur miżjud ċar għal ħajjet in-nies.

Barra minn hekk, il-programm SURE (Appoġġ biex jittaffew ir-Riskji ta’ Qgħad f’Emerġenza), kompla jappoġġa lill-Istati Membri kemm sabiex iżommu n-nies fl-impjiegi kif ukoll sabiex jgħinu lill-impjiegi affettwati mill-pandemija.

Minbarra li indirizzat il-kriżi b’reazzjonijiet rapidi u b’aġġustamenti kontinwi fis-sitwazzjoni politika u finanzjarja, l-Unjoni Ewropea żammet il-wegħda tagħha u wettqet l-objettivi tal-politika tagħha. Għalhekk, għamlet l-aħjar użu mill-baġit tal-2021 – l-ewwel wieħed mill-qafas finanzjarju pluriennali attwali, bl-implimentazzjoni tal-baġit li ammontat għal EUR 268,3 biljun f’impenji magħmulin.

Bi pjaċir nippreżenta l-kontijiet annwali tal-2021 tal-Unjoni Ewropea. Huma jipprovdu ħarsa ġenerali sħiħa lejn il-finanzi tal-UE u lejn l-implimentazzjoni tal-baġit tal-UE għas-sena li għaddiet, inkluża informazzjoni dwar l-obbligazzjonijiet kontinġenti, l-impenji finanzjarji u l-obbligi l-oħrajn tal-Unjoni. Il-kontijiet annwali konsolidati tal-Unjoni Ewropea huma parti mill-pakkett tar-rapportar finanzjarju u ta’ responsabbiltà integrat tal-Kummissjoni u jifformaw parti essenzjali mis-sistema żviluppata ħafna tagħna ta’ trasparenza u ta’ responsabbiltà fiskali.

Johannes Hahn

Il-Kummissarju għall-Baġit u r-Riżorsi Umani

IL-PUNTI FINANZJARJI EWLENIN TAS-SENA

L-objettiv ta’ din it-taqsima tal-Punti Finanzjarji Ewlenin, li tħejjiet fuq il-bażi tal-prinċipji deskritti fil-Linja Gwida dwar il-Prattika Rakkomandata (RPB) tal-IPSASB 2 “Diskussjoni u Analiżi tar-Rapporti Finanzjarji”, huwa li tgħin lill-qarrejja jifhmu kif l-attivitajiet operazzjonali, finanzjarji u ta’ investiment tal-UE huma riflessi fl-elementi differenti tar-rapporti finanzjarji konsolidati tal-UE. L-informazzjoni ppreżentata f’din it-taqsima ma ġietx awditjata

Għandu jiġi nnotat li, minħabba l-ittondjar taċ-ċifri f’miljuni ta’ euro, xi data finanzjarja fit-tabelli ta’ hawn taħt tista’ tidher li ma taqbilx fl-għadd finali.

WERREJ

1.    ĊIFRI U PUNTI EWLENIN TAS-SENA    

2.    IL-QAFAS FINANZJARJU PLURIENNALI TAL-2021-2027 U NextGenerationEU    

2.1.    Il-QFP 2021-27 u NextGenerationEU – Iċ-Ċifri Ewlenin    

2.2.    NextGenerationEU – ħarsa ġenerali    

2.3.    Is-sitwazzjoni finanzjarja tal-NGEU fil-31 ta’ Diċembru 2021    

3.    SOMMARJU TAL-IMPLIMENTAZZJONI TAL-BAĠIT    

3.1.    Dħul    

3.2.    Nefqa    

4.    STRUMENTI FINANZJARJI U GARANZIJI BAĠITARJI    

4.1.    Strumenti finanzjarji ffinanzjati mill-baġit tal-UE    

4.2.    Garanziji baġitarji: Assi finanzjarji miżmumin fil-fondi ta’ garanzija    

4.3.    Is-self u t-teħid ta’ self relatat għall-programmi ta’ assistenza finanzjarja    

4.4.    Obbligazzjonijiet kontinġenti baġitarji għal programmi ta’ assistenza finanzjarja    

5.    ANALIŻI TAR-RAPPORTI FINANZJARJI    

5.1.    DĦUL    

5.2.    SPEJJEŻ    

5.3.    ASSI    

5.4.    OBBLIGAZZJONIJIET    

6.    QAFAS POLITIKU U FINANZJARJU, GOVERNANZA U RESPONSABBILTÀ TAL-UE    

6.1.    QAFAS POLITIKU U FINANZJARJU    

6.2.    GOVERNANZA U RESPONSABBILTÀ    

1.ĊIFRI U PUNTI EWLENIN TAS-SENA

2.IL-QAFAS FINANZJARJU PLURIENNALI TAL-2021-2027 U NextGenerationEU

3.Il-QFP 2021-27 u NextGenerationEU – Iċ-Ċifri Ewlenin

Il-baġit fit-tul tal-UE għall-2021-2027, flimkien mal-istrument għall-irkupru NextGenerationEU (“NGEU”), jammonta għal EUR 2 018-il triljun fi prezzijiet kurrenti (EUR 1,8 triljun fi prezzijiet tal-2018). Dan ir-rispons finanzjarju mingħajr preċedent għall-kriżi se jgħin sabiex jissewwa d-dannu ekonomiku u soċjali kkawżat mill-pandemija tal-coronavirus u jappoġġa t-tranżizzjoni lejn Ewropa aktar ekoloġika, aktar diġitali u aktar sostenibbli.

Il-pakkett jikkonsisti fil-baġit fit-tul, il-qafas finanzjarju pluriennali (“QFP”) tal-2021-2027, magħmul minn EUR 1 211-il triljun fi prezzijiet kurrenti (EUR 1 074 triljun fi prezzijiet tal-2018), flimkien mal-istrument għall-irkupru temporanju, l-NGEU sa EUR 806,9 biljun fi prezzijiet kurrenti (EUR 750 biljun fi prezzijiet tal-2018).

Dan huwa baġit verament modernizzat:

·Aktar minn 50 % tal-ammont totali tal-baġit fit-tul li jmiss u tal-NGEU se jappoġġa l-modernizzazzjoni tal-Unjoni Ewropea permezz tar-riċerka u l-innovazzjoni, permezz ta’ tranżizzjonijiet klimatiċi u diġitali ġusti, permezz tat-tħejjija, u permezz ta’ azzjonijiet ta’ rkupru u ta’ reżiljenza;

·30 % tal-baġit tal-UE se jintnefaq sabiex jiġi miġġieled it-tibdil fil-klima – l-akbar sehem mill-akbar baġit tal-UE fl-istorja;

·20 % tal-Faċilità għall-Irkupru u r-Reżiljenza (Recovery and Resilience Facility, RRF) – li tirrappreżenta 90 % tal-NGEU – se tiġi investita fit-trasformazzjoni diġitali;

·Fl-2026 u fl-2027, 10 % tal-infiq annwali taħt il-baġit fit-tul se jikkontribwixxi sabiex jitwaqqaf u jitreġġa’ lura t-tnaqqis tal-bijodiversità; u

·Għall-ewwel darba, prijoritajiet ġodda u msaħħin għandhom l-ogħla sehem mill-baġit fit-tul, 32 %.

Il-prijoritajiet politiċi li fuqhom huwa bbażat il-QFP 2021-27

Il-prijoritajiet politiċi tal-Kummissjoni huma definiti fil-linji gwida politiċi stabbiliti mill-President tal-Kummissjoni. Taħt il-President von der Leyen, il-Kummissjoni li bdiet il-mandat tagħha fl-1 ta’ Diċembru 2019 tiffoka fuq is-sitt ambizzjonijiet il-kbar li ġejjin:

6 AMBIZZJONIJIET KBAR

4.NextGenerationEU – ħarsa ġenerali 

B’baġit ta’ EUR 806,9 biljun, l-istrument NGEU huwa mfassal sabiex jgħin fit-tiswija tad-dannu ekonomiku u soċjali immedjat ikkawżat mill-pandemija tal-coronavirus, u b’hekk jibni Ewropa ta’ wara l-COVID-19 aktar ekoloġika, aktar diġitali, aktar reżiljenti u aktar adattata għall-isfidi attwali u dawk tal-ġejjieni.

Parti mill-fondi, sa EUR 338,0 biljun, huma pprovduti fil-forma ta’ appoġġ mhux ripagabbli, jew ta’ għotjiet. Il-parti l-oħra, sa EUR 385,8 biljun, tintuża sabiex jiġi pprovdut self mill-Unjoni lil Stati Membri individwali. Dan is-self ma jibdiex jitħallas lura minn dawk l-Istati Membri qabel ma jgħaddi l-perjodu attwali tal-QFP u jestendi fuq perjodu ta’ żmien twil, pereżempju bis-self kurrenti li ma jimmaturax qabel l-2051 (ara t-taqsima 2.3.3).

Barra minn hekk, l-NGEU jsaħħaħ diversi programmi u politiki eżistenti tal-UE, kif ġej:

·Il-politika ta’ Koeżjoni fil-qafas tal-assistenza fl-irkupru għall-koeżjoni u għat-territorji tal-Ewropa (REACT-EU), sabiex tgħin fl-indirizzar tal-konsegwenzi ekonomiċi tal-COVID-19 fl-ewwel snin tal-irkupru;

·Il-Fond għal Tranżizzjoni Ġusta, sabiex jiggarantixxi li t-tranżizzjoni għan-newtralità klimatika taħdem għal kulħadd;

·Il-Fond Agrikolu Ewropew għall-Iżvilupp Rurali, sabiex jissokta l-appoġġ għall-bdiewa;

·InvestEU, sabiex jiġu appoġġati l-isforzi ta’ investiment tan-negozji tagħna;

·Orizzont Ewropa, sabiex jiġi żgurat li l-UE jkollha l-kapaċità li tiffinanzja aktar eċċellenza fir-riċerka; u

·RescEU, jara li l-Mekkaniżmu tal-UE għall-Protezzjoni Ċivili jkollu l-kapaċità sabiex iwieġeb għal emerġenzi fuq skala kbira.

5.Is-sitwazzjoni finanzjarja tal-NGEU fil-31 ta’ Diċembru 2021

6.Ħarsa ġenerali

Sa mit-tnedija tal-operazzjonijiet ta’ finanzjament tal-NGEU fil-15 ta’ Ġunju 2021 sal-aħħar tal-2021, il-Kummissjoni ġġenerat EUR 71,0 biljun f’finanzjament fit-tul, prinċipalment billi ħarġet bonds fi tranżazzjonijiet sindakati. Barra minn hekk, minn Diċembru 2021, il-Kummissjoni għandha EUR 20 biljun pendenti f’kambjali tal-UE għal terminu qasir. Sa tmiem is-sena 2021, il-Kummissjoni kienet żborżat total ta’ EUR 71,6 biljun f’appoġġ finanzjarju. Il-maġġoranza ta’ dan l-ammont, EUR 64,3 biljun, ġiet żborżata lil 20 Stat Membru taħt l-RRF (minn dan l-ammont, EUR 46,4 biljun bħala appoġġ mhux ripagabbli u EUR 18,0-il biljun bħala self). EUR 7,2 biljun oħrajn ġew żborżati bħala pagamenti tal-QFP taħt programmi eżistenti. Il-likwidità li fadal ta’ EUR 19,4-il biljun tinżamm fil-kont bankarju tal-NGEU mal-BĊE u fil-kont tat-teżor ċentrali tal-Kummissjoni, sakemm isir l-iżborż għall-baġit għall-programmi tal-QFP.

NGEU – Teħid ta’ Self u Żborżi Pendenti fil-31 ta’ Diċembru 2021

   * EUR 1,4 biljun oħrajn f’fondi kienu miżmumin fil-kont tat-teżor ċentrali tal-Kummissjoni sakemm isir l-iżborż għall-baġit għall-programmi tal-QFP.

7.Teħid ta’ self

Sabiex tilħaq il-ħtiġijiet ta’ finanzjament tal-NGEU, il-Kummissjoni toħroġ titoli fis-swieq kapitali internazzjonali. Fuq il-bażi ta’ strateġija ta’ finanzjament diversifikata, il-Kummissjoni tlaqqa’ l-użu ta’ strumenti u ta’ tekniki ta’ finanzjament differenti ma’ komunikazzjoni miftuħa u trasparenti lill-parteċipanti fis-suq.

Fl-2021, id-Deċiżjoni ta’ Teħid ta’ Self annwali 1 ppermettiet lill-Kummissjoni toħroġ sa ammont massimu ta’ EUR 125 biljun f’finanzjament fit-tul u jkollha sa massimu ta’ EUR 60 biljun pendenti f’finanzjament fuq terminu qasir.

Finanzjament fit-tul – Tranżazzjonijiet sindakati u rkantar ta’ bonds tal-UE

Sal-31 ta’ Diċembru 2021, il-Kummissjoni ħadet b’self EUR 66,0 biljun permezz ta’ ħames ħarġiet ta’ bonds permezz ta’ tranżazzjonijiet sindakati (inkluża tranżazzjoni waħda b’segment doppju) kif ukoll EUR 5,0 biljun permezz tal-irkant ta’ bonds tal-UE:

L-ewwel tranżazzjoni sindakata f’Ġunju 2021 iġġenerat EUR 20,0 biljun. Kienet l-akbar ħarġa istituzzjonali ta’ bonds li qatt kien hemm fl-Ewropa, l-akbar tranżazzjoni istituzzjonali b’segment wieħed u l-akbar ammont li l-UE qatt iġġenerat fi tranżazzjoni waħda.

F’Ottubru 2021, il-Kummissjoni ħarġet l-ewwel bond ekoloġiku tal-NGEU, u ġġenerat EUR 12,0-il biljun li se jintużaw esklussivament għal investimenti ekoloġiċi u sostenibbli fl-UE. Dan il-ħruġ, li kien jirrappreżenta l-akbar ħruġ ta’ bonds ekoloġiċi fid-dinja, ħoloq viżibbiltà għall-politiki ekoloġiċi ffinanzjati minn bonds ekoloġiċi u appoġġa l-Patt Ekoloġiku Ewropew u t-tranżizzjoni ekoloġika. Il-ħruġ ta’ bonds ekoloġiċi jeħtieġ l-implimentazzjoni tar-rapportar dwar l-użu preċiż tar-rikavati mill-bonds ekoloġiċi u dwar l-impatt tal-investimenti li huma ffinanzjati permezz ta’ bonds ekoloġiċi.

Finanzjament fuq terminu qasir – Irkantar ta’ Kambjali tal-UE

Sal-31 ta’ Diċembru 2021, l-ammont pendenti ta’ finanzjament fuq terminu qasir, iġġenerat permezz tal-irkantar ta’ kambjali tal‑UE b’maturità ta’ tliet jew sitt xhur, kien jammonta għal EUR 20,0 biljun:

Filwaqt li t-tranżazzjonijiet sindakati se jibqgħu l-pedament tal-programm ta’ ħruġ tal-NGEU, tal-anqas fil-fażijiet inizjali, il-kapaċità li jiġu ġġenerati l-flus malajr u bl-irħis permezz tal-irkant ittejjeb b’mod sinifikanti l-kapaċità tal-Kummissjoni li taqdi l-ħtiġijiet tagħha ta’ pagament tal-NGEU bl-aktar termini vantaġġużi għall-baġit tal-Unjoni u/jew għall-Istati Membri benefiċjarji.

Barra minn hekk, il-finanzjament fuq terminu qasir ta’ EUR 16-il biljun ġie ġġenerat permezz ta’ tranżazzjonijiet tas-suq monetarju, li kollha tħallsu lura fl-aħħar tas-sena.

8.Żborżi

Sa tmiem is-sena 2021, il-Kummissjoni kienet irċiviet 26 pjan għall-irkupru u r-reżiljenza tal-Istati Membri, li minnhom 22 ġew ivvalutati b’mod pożittiv u sussegwentement ġew approvati mill-Kunsill (il-Belġju, il-Kroazja, Ċipru, iċ-Ċekja, id-Danimarka, il-Ġermanja, il-Greċja, Spanja, il-Portugall, Franza, l-Irlanda, l-Italja, il-Latvja, il-Lussemburgu, l-Awstrija, is-Slovakkja, il-Litwanja, Malta, is-Slovenja, ir-Rumanija, l-Estonja u l-Finlandja). Erba’ Stati Membri oħrajn (il-Bulgarija, l-Ungerija, il-Polonja u l-Iżvezja) ippreżentaw pjanijiet li għalihom il-valutazzjonijiet kienu għadhom għaddejjin fi tmiem is-sena. Is-sottomissjoni ta’ pjan ieħor (in-Netherlands) kienet pendenti. L-appoġġ finanzjarju totali approvat skont it-22 pjan approvat kien jammonta għal EUR 291,2 biljun f’appoġġ mhux ripagabbli (li minnu l-ftehimiet ta’ finanzjament iffirmati sa tmiem is-sena kienu jkopru EUR 195,4 biljun) u EUR 153,9 biljun f’appoġġ b’self finanzjarju (li minnhom il-ftehimiet ta’ self iffirmati sa tmiem is-sena kienu jkopru EUR 153,2 biljun).

Appoġġ mhux ripagabbli

Fl-2021, il-Kummissjoni żborżat total ta’ EUR 46,4 biljun f’appoġġ mhux ripagabbli lil 20 mit-22 Stat Membru bi pjanijiet għall-irkupru u r-reżiljenza sottomessi u approvati. Minn dan l-ammont, EUR 36,4 biljun tħallsu bħala prefinanzjament. Wara l-ilħuq tal-objettivi intermedji minn Spanja, tħallsu EUR 10 biljun oħrajn qabel tmiem is-sena, bl-approvazzjoni ta’ EUR 1,5 biljun mill-prefinanzjament oriġinali. EUR 0,3 biljun oħrajn fi prefinanzjament, relatati mal-appoġġ mhux ripagabbli lill-Finlandja, kienu għadhom ma ġewx żborżati fi tmiem is-sena. Fil-każ tal-Irlanda, kien ġie approvat appoġġ mhux ripagabbli ta’ EUR 1,0 biljun, iżda ma ġie ffirmat l-ebda ftehim ta’ finanzjament fi tmiem is-sena.

Self

Fl-2021, il-Kummissjoni żborżat total ta’ EUR 18,0-il biljun fil-forma ta’ prefinanzjament lil erba’ Stati Membri (Ċipru, il-Greċja, l-Italja u l-Portugall), ekwivalenti għal 13 % tal-allokazzjonijiet tas-self rispettivi tagħhom. EUR 1,9 biljun oħra fi prefinanzjament, relatat mal-appoġġ b’self finanzjarju lir-Rumanija, kienu għadhom ma ġewx żborżati fi tmiem is-sena. Fil-każ tas-Slovenja, l-appoġġ b’self finanzjarju ta’ EUR 0,7 biljun kien ġie approvat, iżda l-ebda ftehim ta’ self ma ġie ffirmat fi tmiem is-sena:

Skont il-ftehimiet ta’ self, l-Istati Membri jagħmlu ripagamenti annwali ta’ 5 % tal-ammonti żborżati li jibdew għaxar snin wara d-data tal-iżborż. Għalhekk, il-Portugall, il-Greċja, l-Italja u Ċipru se jibdew iħallsu lura s-self mill-2032, bis-self jimmatura fl-2051. L-iskeda ta’ ripagament għall-ammonti nominali pendenti fi tmiem is-sena hija kif ġej:

Il-kontribuzzjoni tal-NGEU għal programmi oħrajn taħt il-baġit tal-UE

Fi tmiem is-sena 2021, il-Kummissjoni kienet żborżat total ta’ EUR 7,2 biljun bħala pagamenti għal programmi oħrajn taħt il-QFP, prinċipalment relatati ma’ REACT-EU li jiffinanzja l-Fond Ewropew għall-Iżvilupp Reġjonali (FEŻR) u l-Fond Soċjali Ewropew (FSE):

9.Likwidità

Is-self ipprovdut taħt l-NGEU ma jsegwix il-prinċipju strett ta’ back-to-back ta’ strumenti oħrajn ta’ assistenza finanzjarja. Minflok, ġiet żviluppata strateġija ta’ finanzjament diversifikata u aggregata għall-NGEU li kienet teħtieġ l-implimentazzjoni ta’ immaniġġjar effiċjenti tal-likwidità. L-objettiv tal-immaniġġjar tal-likwidità tal-NGEU huwa li jiġi żgurat li l-ammonti miżmumin fil-kont bankarju tal-NGEU jkunu biżżejjed sabiex jissodisfaw il-ħtiġijiet kollha ta’ żborż li ġejjin u sabiex iżommu riżerva ta’ sikurezza definita, filwaqt li jevitaw kwalunkwe bilanċ eċċessiv. Għall-immaniġġjar tal-likwidità, il-Kummissjoni żviluppat għodda tal-IT li tippermetti l-monitoraġġ tal-kont tal-NGEU fuq bażi ta’ kuljum. Fi tmiem is-sena 2021, il-fondi totali miżmumin fil-kont barra l-baġit tal-NGEU ammontaw għal EUR 18,0-il biljun. Barra minn hekk, EUR 1,4 biljun f’fondi kienu miżmumin fil-kont tat-teżor ċentrali tal-Kummissjoni sakemm isir l-iżborż għall-baġit għall-programmi tal-QFP.

10.SOMMARJU TAL-IMPLIMENTAZZJONI TAL-BAĠIT 

10.1.Dħul

Fil-baġit inizjali adottat tal-UE, iffirmat mill-President tal-Parlament Ewropew fit-18 ta’ Diċembru 2020, l-ammont totali tal-approprjazzjonijiet ta’ pagament għall-2021 kien ta’ EUR 166 060 miljun u l-ammont totali li għandu jiġi ffinanzjat mir-riżorsi proprji kien jammonta għal total ta’ EUR 156 867 miljun. Ġeneralment, l-estimi ta’ dħul u ta’ nfiq fil-baġit inizjali jiġu aġġustati matul is-sena finanzjarja permezz ta’ baġits emendatorji. L-aġġustamenti fir-riżorsi proprji bbażati fuq l-ING jiżguraw li d-dħul ibbaġitjat ikun jaqbel eżattament man-nefqa bbaġitjata. B’dan il-mod, il-prinċipju tal-ekwilibriju baġitarju jiġi rrispettat, u l-ammonti tad-dħul u tan-nefqa tal-baġit (approprjazzjonijiet ta’ pagament) huma ugwali.

Matul l-2021 ġew adottati sitt baġits emendatorji. B’kunsiderazzjoni ta’ dawn, id-dħul finali adottat għall-2021 kien jammonta għal EUR 168 011-il miljun u t-total li għandu jiġi ffinanzjat mir-riżorsi proprji kien ta’ EUR 156 993 miljun. Il-kontribuzzjonijiet tal-Istati Membri fl-2021 baqgħu stabbli. Iż-żieda fl-approprjazzjonijiet ta’ pagament (EUR 1 950 miljun) kienet prinċipalment iffinanzjata mis-surplus mis-sena ta’ qabel.

Id-dħul ġej minn sitt sorsi (titoli):

Titolu 1: Riżorsi proprji

Il-ġbir ta’ Riżorsi proprji tradizzjonali (EUR 158 632 miljun) kien 1,0 % ogħla mill-ammonti fil-baġit (EUR 156 993 miljun). Dan kien dovut l-aktar għal ammont ogħla miġbur milli mistenni fl-aħħar xahrejn tas-sena.

Il-pagamenti finali tal-VAT, tal-ING u tal-Plastiks mill-Istati Membri jikkorrespondu mill-qrib għall-istima baġitarja finali. Id-differenzi bejn l-ammonti mbassrin u l-ammonti effettivament imħallsin huma dovuti għad-differenzi bejn ir-rati tal-euro użati għall-finijiet baġitarji u r-rati fis-seħħ fiż-żmien meta l-Istati Membri barra ż-żona tal-euro effettivament għamlu l-pagamenti tagħhom.

Titolu 2: Surpluses, bilanċi u aġġustamenti

Is-surplus tas-sena finanzjarja ta’ qabel kien jammonta għal EUR 1 769 miljun. Dan l-ammont iddaħħal fil-baġit 2021 permezz ta’ baġit emendatorju u l-kontribuzzjoni tar-riżorsi proprji mill-Istati Membri tnaqqset kif xieraq.

Għall-bilanċi tal-VAT u tal-ING, ir-regoli huma stabbiliti fl-Artikolu 10b tar-Regolament dwar it-Tqegħid għad-Dispożizzjoni (ir-Regolament tal-Kunsill (UE, Euratom) Nru 609/2014). Skont dawn ir-regoli, is-somma totali tal-bilanċi hija kkalkolata sabiex l-impatt fuq il-baġit tal-UE jkun żero (“sistema ta’ netting”) u l-proċedura ma tinvolvix emenda baġitarja. Għalhekk, il-Kummissjoni titlob direttament lill-Istati Membri sabiex iħallsu l-ammonti netti.

Titolu 3: Dħul amministrattiv

Dan it-titolu jinkludi dħul minn taxxi u imposti fuq ir-remunerazzjoni tal-persunal, li jammonta għal EUR 2 230 miljun.

Titolu 4: Dħul finanzjarju, imgħax ta’ inadempjenza, u multi

Fit-titolu 4, id-differenza bejn l-ammont ibbaġitjat (EUR 515-il miljun) u l-eżitu tal-baġit (EUR 1 633 miljun) tirreferi l-aktar għall-multi fil-qasam tal-kompetizzjoni.

Titolu 5: Garanziji baġitarji, operazzjonijiet mutwatarji u mutwanti

Dan it-titolu żdied b’mod sinifikanti bil-miġja tal-NGEU. Il-fondi tal-NGEU fi ħdan dan it-titolu huma dħul assenjat. It-Titolu 5 jkopri d-dħul relatat mal-garanziji u mal-imgħax u mar-ripagamenti tas-selfiet maħruġa. Jalloka wkoll il-fondi (għall-appoġġ mhux ripagabbli tal-NGEU taħt il-Faċilità għall-Irkupru u r-Reżiljenza u għat-tisħiħ tal-programmi tal-QFP) minn dħul assenjat li l-Istati Membri jirċievu taħt l-Istrument tal-Unjoni Ewropea għall-Irkupru (EURI). Ara l-Punti Finanzjarji Ewlenin tas-Sena, it-taqsimiet 2.2 u 2.3. għal ħarsa ġenerali komprensiva lejn l-NGEU.

Titolu 6: Dħul, kontribuzzjonijiet u ribassi relatati mal-politiki tal-Unjoni

Dan it-titolu jikkonċerna l-aktar id-dħul minn korrezzjonijiet finanzjarji relatati mal-fondi strutturali u agrikoli (FSIE, FAEG u FAEŻR). Jinkludi wkoll il-parteċipazzjoni ta’ pajjiżi terzi fi programmi ta’ riċerka, l-approvazzjoni ta’ kontijiet f’fondi agrikoli u kontribuzzjonijiet u rifużjonijiet oħrajn għal programmi/attivitajiet tal-UE. Parti sostanzjali minn dan it-total hija magħmula minn dħul assenjat, li jagħti lok għat-tidħil ta’ approprjazzjonijiet addizzjonali fuq in-naħa tan-nefqa.

Id-dħul baġitarju totali fl-2021 ammonta għal EUR 239 596 miljun

10.2.Nefqa

11.Implimentazzjoni tal-baġit

Fl-2021, l-ewwel sena tal-QFP 2021-2027 il-ġdid, il-baġit adottat finali ammonta għal total ta’ EUR 166,8 biljun f’approprjazzjonijiet ta’ impenn u għal EUR 168,0 biljun f’approprjazzjonijiet ta’ pagament. L-NGEU saħħaħ il-programmi ewlenin b’EUR 421,1 biljun addizzjonali f’approprjazzjonijiet ta’ impenn u b’EUR 55,5 biljun f’approprjazzjonijiet ta’ pagament imdaħħlin fil-baġit tal-UE bħala dħul assenjat estern 2 .

L-implimentazzjoni tal-baġit tal-2021 kienet affettwata b’mod sinifikanti mid-dewmien fl-adozzjoni ta’ bażijiet legali ġodda u mir-regoli l-ġodda għall-fondi strutturali. Il-maġġoranza tal-approprjazzjonijiet ta’ impenn tal-2021 għall-fondi strutturali (b’valur nett ta’ EUR 49 biljun) ġew riprogrammati għall-2022-2025 skont l-Artikolu 7 tar-Regolament dwar il-QFP. F’każijiet permessi mir-Regolament Finanzjarju u/jew minn bażijiet legali ġodda, l-approprjazzjonijiet mhux implimentati ġew riportati għall-2022: EUR 4,1 biljun f’approprjazzjonijiet ta’ impenn u EUR 4,2 biljun f’approprjazzjonijiet ta’ pagament. Għall-ewwel darba, il-possibbiltà li jiġu trasferiti approprjazzjonijiet tal-baġit adottati mhux użati għas-sena sussegwenti ntużat fl-2021 mill-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali – Ewropa Globali (NDICI – Ewropa Globali) 3 , 4 . Japplikaw u ntużaw dispożizzjonijiet simili għar-Riżerva ta’ Aġġustament għall-Brexit u għar-Riżerva ta’ Solidarjetà u Għajnuna ta’ Emerġenza (SEAR).

L-implimentazzjoni tal-approprjazzjonijiet ta’ impenn totali fl-2021 kienet tammonta għal EUR 268,3 biljun:

·EUR 113,4-il biljun mill-baġit finali adottat;

·EUR 0,6 biljun minn approprjazzjonijiet riportati mill-2020;

·EUR 154,3 biljun minn approprjazzjonijiet li ġejjin minn dħul assenjat;

oli minnhom EUR 143,5 biljun mill-NGEU.

Il-pagamenti totali li saru fl-2021 ammontaw għal total ta’ EUR 228,0 biljun:

·EUR 163,6 biljun mill-baġit finali adottat;

·EUR 1,8 biljun minn approprjazzjonijiet riportati mill-2020;

·EUR 62,6 biljun minn approprjazzjonijiet li ġejjin minn dħul assenjat;

oli minnhom EUR 53,6 biljun mill-NGEU.

Total tal-implimentazzjoni tal-approprjazzjonijiet ta’ impenn għall-2021 skont l-objettivi ta’ politika tal-UE

L-implimentazzjoni tal-2021 għat-tipi kollha ta’ approprjazzjonijiet (baġit, riporti mis-sena preċedenti u dħul assenjat) kienet ta’ 44 % għall-impenji u ta’ 92 % għall-pagamenti. Ir-rati ta’ implimentazzjoni tal-2021, minbarra d-dħul assenjat, urew 68 % għal approprjazzjonijiet ta’ impenn u 97 % għal approprjazzjonijiet ta’ pagament. Sehem importanti mill-pagamenti li saru fl-2021 kien relatat mat-tlestija tal-QFP 2014-2020.

Filwaqt li jitqiesu wkoll ir-riporti u l-impenji taħt ġestjoni kondiviża li ġew irriprogrammati f’konformità mal-Artikolu 7 tal-MFFR, l-implimentazzjoni tal-baġit ivvotat kienet tilħaq kważi 100 % kemm għall-approprjazzjonijiet ta’ impenn kif ukoll għall-approprjazzjonijiet ta’ pagament.

L-implimentazzjoni tal-approprjazzjonijiet tal-NGEU laħqet l-34 % għall-approprjazzjonijiet ta’ impenn totali u 97 % għall-approprjazzjonijiet ta’ pagament totali mdaħħlin fil-baġit tal-UE. L-ammont impenjat tal-NGEU kien jirrappreżenta 87 % tal-ammont awtorizzat 5 għall-impenn fl-2021, li kien ta’ EUR 164,6 biljun.

12.Impenji pendenti

L-impenji pendenti (komunement imsejħin RAL — reste à liquider), li huma ammonti impenjati li għadhom ma tħallsux, kienu ta’ EUR 341,6 biljun fl-aħħar tal-2021. L-impenji pendenti żdiedu meta mqabblin mal-2020 (b’EUR 38,4 biljun), iżda din iż-żieda kienet iżgħar milli kienet prevista inizjalment, peress li l-biċċa l-kbira tal-impenji għall-programmi taħt ġestjoni kondiviża (b’valur nett ta’ EUR 49 biljun) ippjanati għall-2021 ġew posposti għall-2022 u għas-snin ta’ wara, f’konformità mal-Artikolu 7 tar-Regolament dwar il-QFP. Ir-riprogrammazzjoni tal-implimentazzjoni ta’ ġestjoni kondiviża se tikkontribwixxi għal żieda ulterjuri tal-RAL fis-snin li ġejjin.

L-ixprunatur ewlieni taż-żieda tal-2021 tal-RAL kien il-bidu tal-implimentazzjoni tal-NGEU (il-parti mhux ripagabbli) – li kkontribwixxa EUR 89,9 biljun (26 %) għall-RAL totali fi tmiem l-2021. Id-dħul assenjat tal-NGEU se jwassal għaż-żieda tal-RAL fis-snin li ġejjin peress li l-impenji kollha se jiddaħħlu sal-31 ta’ Diċembru 2023 u se jiġu onorati b’pagamenti sal-31 ta’ Diċembru 2026, f’konformità mal-Artikolu 3(4) u mal-Artikolu 3(9) tar-Regolament dwar l-EURI 6 .

13.Riżultat tal-baġit

Ir-riżultat tal-baġit (surplus) żdied minn EUR 1,8 biljun fl-2020 għal EUR 3,2 biljun fl-2021, minħabba dħul ogħla milli mistenni mid-dazji doganali u mill-multi.

14.STRUMENTI FINANZJARJI U GARANZIJI BAĠITARJI

15.Strumenti finanzjarji ffinanzjati mill-baġit tal-UE

L-istrumenti finanzjarji ffinanzjati mill-baġit tal-UE jeżistu fil-forma ta’ strumenti ta’ garanzija, ta’ strumenti ta’ ekwità u ta’ strumenti ta’ self. Skont il-QFP 2021-2027, l-użu ta’ garanziji baġitarji mistenni li jiżdied meta mqabbel mal-użu ta’ strumenti finanzjarji ffinanzjati għalkollox jew ipprovduti mill-baġit tal-UE. B’mod partikolari, skont il-Programm InvestEU, se jiġu pprovduti EUR 26,2 biljun f’garanziji tal-UE lill-grupp tal-BEI u lil istituzzjonijiet finanzjarji oħrajn sabiex jiġu appoġġati diversi objettivi tal-politika tal-Unjoni permezz ta’ operazzjonijiet ta’ finanzjament u ta’ investiment. Il-kunċett bażiku wara dan l-approċċ, b’kuntrast mal-metodu tradizzjonali ta’ implimentazzjoni tal-baġit li jingħataw għotjiet u sussidji, huwa li għal kull euro li jintefaq mill-baġit permezz ta’ strumenti finanzjarji, il-benefiċjarju finali jirċievi aktar minn EUR 1 bħala appoġġ finanzjarju minħabba l-effett ta’ ingranaġġ.

Taħt implimentazzjoni tal-baġit ta’ dan it-tip, il-fondi jew diġà jkunu ġew żborżati fil-kontijiet fiduċjarji ġestiti mill-entitajiet fdati u jibqgħu disponibbli (bħala flus u ekwivalenti ta’ flus, titoli ta’ dejn jew investimenti f’fondi tas-suq monetarju jew portafolli aggregati ta’ assi) sabiex ikopru t-talbiet għal ħlas ta’ garanzija fil-ġejjieni, jew inkella jkunu ġew investiti f’ekwità. Is-sinifikat u l-volum tal-istrumenti finanzjarji ffinanzjati mill-baġit tal-UE taħt ġestjoni diretta u indiretta żdiedu minn sena għal sena.

16.Garanziji baġitarji: Assi finanzjarji miżmumin fil-fondi ta’ garanzija

Skont dan it-tip ta’ implimentazzjoni tal-baġit, l-UE tipprovdi garanziji lil kontropartijiet li għalihom il-finanzjament huwa biss ipprovdut parzjalment permezz ta’ fondi ta’ garanzija stabbiliti mill-Kummissjoni, u b’hekk jinħolqu obbligazzjonijiet kontinġenti għall-baġit tal-UE f’każ li l-provvediment ma jkunx suffiċjenti sabiex ikopri t-talbiet. L-UE tat garanziji fuq self mogħti barra mill-UE (l-hekk imsejjaħ Mandat ta’ Self Estern tal-BEI) u fuq operazzjonijiet ta’ dejn u ta’ ekwità koperti mill-garanzija tal-FEIS lill-Grupp tal-BEI, kif ukoll garanziji fuq operazzjonijiet koperti mill-EFSD u mill-Garanzija għall-Azzjoni Esterna tal-NDICI, mogħtijin lill-Grupp tal-BEI u lil istituzzjonijiet finanzjarji oħrajn.

Mill-2021, il-proviżjonament permezz ta’ fondi ta’ garanzija jinżamm fil-Fond ta’ Proviżjonament Komuni (Common Provisioning Fund, CPF). Is-CPF huwa stabbilit mir-Regolament Finanzjarju 7 sabiex iżomm il-provvedimenti magħmulin (jiġifieri l-fondi miżmumin) sabiex ikopri l-obbligazzjonijiet finanzjarji li jirriżultaw minn strumenti finanzjarji, minn garanziji baġitarji u minn self ta’ assistenza finanzjarja mill-QFP 2021-2027. Jinkludi wkoll xi assi ta’ proviżjonament li jkopru l-obbligazzjonijiet finanzjarji mill-Oqfsa ta’ Finanzjament Pluriennali preċedenti.

Is-CPF jinħoloq u jiffunzjona bħala portafoll wieħed, li bħalissa jikkombina dispożizzjonijiet għal garanziji baġitarji u programmi ta’ assistenza finanzjarja differenti tal-UE. Ir-riżorsi tas-CPF huma allokati f’kompartimenti għall-fini tat-traċċar tal-ammonti relatati mad-diversi strumenti ta’ kontribuzzjoni tas-CPF (garanziji baġitarji u programmi ta’ assistenza finanzjarja).

Wara d-dħul fis-seħħ tal-QFP 2021-2027, l-assi netti tal-Fond ta’ Garanzija tal-FEIS ġew ittrasferiti mill-1 ta’ Jannar 2021 fis-CPF. L-assi netti tal-Fond ta’ Garanzija tal-EFSD u tal-Fond ta’ Garanzija għall-azzjonijiet esterni ġew ittrasferiti lis-CPF matul l-2021.

Fil-31 ta’ Diċembru 2021, il-Kummissjoni għandha assi finanzjarji fis-CPF għall-kompartimenti li ġejjin:

·il-Fond ta’ Garanzija għall-azzjonijiet esterni - EUR 2,7 biljun;

·il-Fond ta’ Garanzija tal-FEIS - EUR 8,5 biljun;

·il-Fond ta’ Garanzija tal-EFSD - EUR 0,8 biljun; u

·il-Fond ta’ Garanzija InvestEU - EUR 0,3 biljun.

Barra minn hekk, EUR 92 miljun jinżammu fit-teżor ċentrali tal-Kummissjoni bħala riżerva ta’ likwidità sabiex ikopru talbiet immedjati għal ħlas ta’ garanzija.

17.Is-self u t-teħid ta’ self relatat għall-programmi ta’ assistenza finanzjarja

L-attivitajiet ta’ għoti u ta’ teħid ta’ self tal-UE għall-programmi ta’ assistenza finanzjarja huma operazzjonijiet mhux baġitarji. B’mod ġenerali, iżda għajr għall-NGEU, il-fondi ġġenerati jingħataw b’self back-to-back lill-pajjiż benefiċjarju, jiġifieri bl-istess kupun, maturità u ammont. Minkejja l-metodoloġija back-to-back, is-servizz tad-dejn tal-istrumenti ta’ finanzjament huwa obbligu legali tal-UE, li għandu jiżgura li l-pagamenti kollha jsiru b’mod sħiħ u f’waqtu. Il-Kummissjoni daħħlet fis-seħħ proċeduri sabiex tiżgura r-ripagament tas-self meħud anki f’każ ta’ inadempjenza tas-self.

L-appoġġ finanzjarju għall-Istati Membri u għall-pajjiżi terzi fil-forma ta’ self bilaterali ffinanzjat mis-swieq kapitali bil-garanzija tal-baġit tal-UE huwa pprovdut mill-Kummissjoni skont id-deċiżjonijiet tal-Parlament Ewropew u tal-Kunsill. Fl-2021 il-Kummissjoni, li taġixxi f’isem l-UE, operat ħames programmi ewlenin li taħthom tista’ tagħti self:

·Assistenza tal-Bilanċ tal-Pagamenti;

·Assistenza fil-qafas tal-Mekkaniżmu Ewropew ta’ Stabbilizzazzjoni Finanzjarja (EFSM);

·Assistenza makrofinanzjarja (MFA);

·Assistenza ta’ SURE; u

·NGEU – għal aktar informazzjoni dwar l-NGEU, ara t-taqsima 2.

Fil-31 ta’ Diċembru 2021, l-ammont nominali tas-self mogħti għal assistenza finanzjarja, eskluż l-NGEU, (ara t-taqsima 2), kien ta’:

L-iskeda ta’ ripagament għall-ammonti pendenti fi tmiem is-sena hija kif ġej:

SURE

SURE ġie stabbilit fl-2020 sabiex jipprovdi assistenza finanzjarja lill-Istati Membri li jkunu qegħdin jesperjenzaw, jew li huma mheddin serjament b’disturb ekonomiku serju kkawżat mill-pandemija tal-COVID-19 fit-territorju tagħhom. L-istrument jikkomplementa l-miżuri nazzjonali meħudin mill-Istati Membri affettwati. L-ammont massimu ta’ assistenza finanzjarja ma għandux jaqbeż il-EUR 100 biljun għall-Istati Membri kollha.

Fi tmiem l-2021, l-Istati Membri ffirmaw ftehimiet dwar il-faċilità ta’ self li jammontaw għal EUR 94,3 biljun u minn dan l-ammont ġew żborżati EUR 89,6 biljun sa tmiem is-sena 2021. L-ammont ta’ self ġdid żborżat fl-2021 ammonta għal EUR 50,1 biljun. Il-maturità tas-self tvarja bejn 5, 10, 15, 20 u 30 sena.

EFSM

L-EFSM inħoloq sabiex jipprovdi assistenza finanzjarja lill-Istati Membri kollha li qed jesperjenzaw jew huma mhedda serjament minn tfixkil finanzjarju ekonomiku serju kkawżat minn okkorrenzi eċċezzjonali lil hinn mill-kontroll tagħhom. L-EFSM intuża sabiex jipprovdi assistenza finanzjarja, bil-kundizzjoni tal-implimentazzjoni ta’ riformi, lill-Irlanda u lill-Portugall bejn l-2011 u l-2014. Dan il-programm skada u ma jista’ jittieħed ebda self addizzjonali, għalkemm għadu fis-seħħ għal kompiti speċifiċi bħall-estensjoni tal-maturitajiet għal self lill-Irlanda u lill-Portugall u l-għoti ta’ self tranżizzjonali. Fl-2021, ammont ta’ EUR 9,8 biljun li jimmatura matul is-sena ġie estiż sal-2036 (EUR 3 biljun għall-Irlanda u EUR 1,8 biljun għall-Portugall) u sal-2031 (EUR 5 biljun għall-Portugall).

L-ammont mogħti lill-Portugall tnaqqas minn EUR 26 biljun għal EUR 24,3 biljun peress li l-ammont ta’ EUR 1,7 biljun skada u ma kien possibbli l-ebda żborż ieħor. F’Diċembru 2021, il-Portugall talab li l-maturità tiġi estiża għal EUR 2,2 biljun tas-self totali ta’ EUR 2,7 biljun dovut f’April 2022. Fi Frar 2022, il-Kummissjoni ħadet EUR 2,2 biljun b’self sabiex tirriporta s-self, li ġie estiż b’4,5 snin.

AMF

Il-programm tal-AMF huwa forma ta’ assistenza finanzjarja estiża mill-UE lil pajjiżi sħab barra l-UE li jesperjenzaw kriżi ta’ bilanċ tal-pagamenti (inklużi EUR 4,4 biljun pendenti għall-Ukrajna). Jieħu l-forma ta’ self jew ta’ għotjiet fuq perjodu ta’ żmien medju/fit-tul, jew kombinazzjoni ta’ dawn, u huwa disponibbli biss għal pajjiżi li jibbenifikaw minn programm ta’ żborż tal-Fond Monetarju Internazzjonali (FMI).

Fl-2020, il-Kummissjoni adottat proposta għal pakkett ta’ AMF ta’ EUR 3 biljun lil għaxar sħab tat-tkabbir u tal-viċinat sabiex tgħinhom jillimitaw il-konsegwenzi ekonomiċi tal-pandemija tal-coronavirus. Id-deċiżjoni ġiet adottata mill-Parlament Ewropew u mill-Kunsill fil-25 ta’ Mejju 2020. Skont din id-deċiżjoni, fl-2021, il-Kummissjoni żborżat 10 selfiet ġodda f’ammont nominali totali ta’ EUR 1,7 biljun lil 9 benefiċjarji tal-MFA. Il-maturità tas-self il-ġdid tvarja bejn 10 snin u 15-il sena.

BOP

Il-BOP huwa programm ta’ assistenza maħsub għal pajjiżi barra ż-żona tal-euro li qegħdin jesperjenzaw jew li huma mhedda minn diffikultajiet fir-rigward tal-bilanċ tal-pagamenti tagħhom. L-assistenza tal-BOP tieħu l-forma ta’ self b’terminu medju li jingħata bil-kundizzjoni tal-implimentazzjoni ta’ politiki maħsuba sabiex jindirizzaw il-problemi ekonomiċi sottostanti. Tipikament, l-assistenza tal-BOP mill-UE tiġi offruta f’kooperazzjoni mal-FMI u ma’ pajjiżi jew ma’ istituzzjonijiet internazzjonali oħrajn.

L-ammont mogħti lil-Latvja taħt il-BOP tnaqqas minn EUR 3,1 biljun għal EUR 2,9 biljun peress li l-ammont disponibbli ta’ EUR 0,2 biljun skada u ma setax jiġi żborżat aktar. Fl-2021, ma seħħet l-ebda operazzjoni ġdida jew ripagamenti ta’ self.

18.Obbligazzjonijiet kontinġenti baġitarji għal programmi ta’ assistenza finanzjarja

It-teħid ta’ self tal-UE jikkostitwixxi obbligi diretti u mhux kondizzjonali tal-UE u dan huwa garantit mill-Istati Membri tal-UE (obbligazzjonijiet kontinġenti baġitarji). It-teħid ta’ self għall-finanzjament tas-self lil pajjiżi barra mill-UE huwa kopert mill-Fond ta’ Garanzija għall-azzjonijiet esterni. Jekk Stat Membru benefiċjarju jsir inadempjenti, is-servizz tad-dejn jiġi prelevat mill-bilanċ tat-teżor disponibbli għall-Kummissjoni, jekk ikun possibbli. Jekk dan ma jkunx possibbli f’dak il-mument, il-Kummissjoni tiġbed il-fondi neċessarji mingħand l-Istati Membri. L-Istati Membri tal-UE huma legalment obbligati, skont il-leġiżlazzjoni tal-UE dwar ir-riżorsi proprji (l-Artikolu 14 tar-Regolament tal-Kunsill (UE, Euratom) Nru 609/2014), li jagħmlu disponibbli biżżejjed fondi sabiex jissodisfaw l-obbligi tal-UE. B’hekk, l-investituri huma esposti biss għar-riskju ta’ kreditu tal-UE, mhux għal dak tal-benefiċjarju tas-self iffinanzjat. L-għoti ta’ self “back-to-back” jiżgura li l-baġit tal-UE ma jassumi l-ebda riskju ta’ ċaqliq fir-rata tal-imgħax jew riskju tal-kambju.

Self ipprovdut lill-Istati Membri taħt l-istrument SURE huwa sostnut minn sistema ta’ garanziji volontarji mill-Istati Membri li jammontaw għal 25 % tal-ammont massimu ta’ assistenza finanzjarja. Il-kontribuzzjoni ta’ kull Stat Membru għall-ammont globali tal-garanzija tikkorrispondi għas-sehem relattiv tagħha fl-introjtu nazzjonali gross (ING) totali tal-Unjoni Ewropea, abbażi tal-baġit tal-UE għall-2020.

Għal kull programm tal-pajjiżi, l-ammont komplessiv mogħti, l-għadd ta’ pagamenti parzjali li għandhom jiġu żborżati u l-maturità massima (medja) tal-pakkett tas-self jiġi determinat b’deċiżjoni tal-Parlament Ewropew, tal-Kunsill u tal-Kummissjoni. Sussegwentement, il-Kummissjoni u l-Istat Membru kkonċernat, jaqblu fuq il-parametri tas-self/tal-finanzjament, b’mod partikolari fuq il-maturità tal-pagamenti parzjali. Barra minn hekk, il-pagamenti parzjali kollha tas-self, ħlief l-ewwel wieħed, jiddependu fuq il-konformità mal-kundizzjonijiet tal-politika, fil-kuntest ta’ assistenza finanzjarja konġunta bejn l-UE/FMI, li huwa fattur ieħor li jinfluwenza ż-żmien meta jsiru l-operazzjonijiet ta’ finanzjament. Dan jimplika li t-twaqqit u l-maturitajiet tal-ħruġ jiddependu fuq l-attività relatata ta’ għoti b’self tal-UE. Il-finanzjament huwa denominat b’mod esklużiv f’euro u l-ispettru tal-maturità huwa ta’ minn tlieta (3) sa 30 sena.

19.ANALIŻI TAR-RAPPORTI FINANZJARJI

20.DĦUL

Id-dħul konsolidat tal-UE jinkorpora l-ammonti relatati mat-tranżazzjonijiet ta’ skambju u mat-tranżazzjonijiet mhux ta’ skambju, b’dawn tal-aħħar li huma l-aktar sinifikanti. Ix-xejra ta’ ħames snin tal-kategoriji ewlenin tad-dħul mhux minn skambju (li jinkludu Riżorsi tal-ING, Riżorsi proprji tradizzjonali, Riżorsi tal-VAT, Riżorsi proprji l-ġodda tal-plastiks, Multi u Rkupru tal-ispejjeż) hija kif ġej:

Ix-xejra fuq ħames snin tad-dħul minn tranżazzjonijiet prinċipali mhux ta’ skambju*

*ċifri tal-2020 u tal-2021: minbarra d-dħul relatat mal-ħruġ tar-Renju Unit mill-UE

Peress li d-dħul tal-baġit għandu jkun daqs (jew jisboq) in-nefqa tal-baġit, il-fattur ewlieni wara t-tendenza tad-dħul murija hawn fuq huwa l-pagamenti magħmulin kull sena.

Dħul konsolidat – l-iżviluppi ewlenin fl-2021

Fl-2021, id-dħul konsolidat, li jinkludi l-kategoriji kollha tad-dħul, ammonta għal EUR 178,9 biljun, meta mqabbel ma’ EUR 224,0 biljun fis-sena ta’ qabel. Ir-raġuni ewlenija għat-tnaqqis ta’ EUR 45,1 biljun jew ta’ 20,1 % kienet l-impatt li qed jonqos tal-ħruġ tar-Renju Unit mill-Unjoni Ewropea, li kien żied id-dħul tal-2020 b’EUR 47,5 biljun, iżda kkontribwixxa biss EUR 1,1 biljun għad-dħul tal-2021. Bl-esklużjoni ta’ dan id-dħul speċifiku, id-dħul konsolidat tal-2021 jammonta għal EUR 177,8 biljun, li huwa komparabbli mad-dħul konsolidat aġġustat tas-sena ta’ qabel (EUR 176,5 biljun).

Fir-rigward tal-kategoriji tad-dħul li jifdal, l-iżviluppi ewlenin kienu l-introduzzjoni tar-riżorsi proprji l-ġodda tal-plastiks, żieda fid-dħul mill-multi u tnaqqis fid-dħul mill-ING:

·Id-dħul mir-riżorsa proprja l-ġdida tal-plastiks, li ġiet introdotta fl-2021 bid-dħul fis-seħħ tad-Deċiżjoni l-ġdida dwar ir-Riżorsi Proprji tal-2020/2053 8 , ammonta għal EUR 5,8 biljun. Rata uniformi ta’ ġbir ta’ EUR 0,80 għal kull kilogramma tapplika għall-piż tal-iskart mill-imballaġġ tal-plastik iġġenerat minn kull Stat Membru li mhux irriċiklat. L-iskart mill-imballaġġ tal-plastik li ma jiġix irriċiklat f’sena partikolari jiġi kkalkolat bħala d-differenza bejn l-iskart mill-imballaġġ tal-plastik iġġenerat u l-iskart mill-imballaġġ tal-plastik irriċiklat f’dik is-sena fi Stat Membru. Il-Bulgarija, iċ-Ċekja, l-Estonja, il-Greċja, Spanja, il-Kroazja, l-Italja, Ċipru, il-Latvja, il-Litwanja, l-Ungerija, Malta, il-Polonja, il-Portugall, ir-Rumanija, is-Slovenja u s-Slovakkja huma intitolati għal tnaqqis annwali speċifiku fis-somma f’daqqa fil-kontribuzzjonijiet rispettivi tagħhom tar-riżorsi proprji tal-plastiks;

·Id-dħul mill-multi żdied minn EUR 0,5 biljun fl-2020 għal EUR 2,0 biljun fl-2021. Iż-żieda ta’ EUR 1,5 biljun hija dovuta kemm għan-numru ogħla kif ukoll għall-ammonti akbar ta’ multi maħruġin fl-2021. Fl-2021, il-multi ewlenin maħruġin kienu: EUR 875 miljun imposti fuq BMW u l-grupp Volkswagen (Volkswagen, Audi u Porsche) għall-kollużjoni fl-iżvilupp tekniku fil-qasam tat-tindif tal-ossidu tan-nitroġenu u EUR 371 miljun imposti fuq Nomura, UBS u UniCredit għall-parteċipazzjoni ta’ grupp ta’ kummerċjanti f’kartell fis-suq primarju u sekondarju għall-Bonds tal-Gvern Ewropej;

·Id-dħul mill-ING (introjtu nazzjonali gross), l-element primarju tad-dħul operatorju tal-UE, naqas minn EUR 125,4 biljun fl-2020 għal EUR 116,0-il biljun fl-2021. It-tnaqqis ta’ EUR 9,4 biljun jew ta’ 7,5 % huwa marbut maż-żieda tal-kategoriji l-oħrajn ta’ dħul (u d-dħul il-ġdid mir-riżorsi proprji tal-plastiks), peress li d-dħul mill-fondi tal-ING huwa l-parti tal-baġit li ma hijiex koperta minn sorsi oħrajn ta’ introjtu.

21.SPEJJEŻ

Il-komponent prinċipali tal-ispejjeż rikonoxxuti fir-rapporti finanzjarji kkonsolidati huma l-ispejjeż taħt il-modalità ta’ ġestjoni kondiviża, inklużi l-fondi li ġejjin: (i) il-Fond Agrikolu Ewropew ta’ Garanzija (FAEG), (ii) il-Fond Agrikolu Ewropew għall-Iżvilupp Rurali (FAEŻR) u strumenti oħrajn ta’ żvilupp rurali, (iii) il-Fond Ewropew għall-Iżvilupp Reġjonali (FEŻR) u l-Fond ta’ Koeżjoni (FK), u (iv) il-Fond Soċjali Ewropew (FSE). Dawn il-fondi kienu jammontaw għal EUR 119,9-il biljun jew għal 54,3 % tal-ispejjeż totali ta’ EUR 221,0 biljun imġarrbin fl-2021 (2020: EUR 109,7 biljun, 65,9 % tal-ispejjeż totali). Il-qsim tal-ispejjeż taħt il-modalità ta’ ġestjoni kondiviża u l-piżijiet relattivi tagħhom huma ppreżentati hawn taħt:

L-ispejjeż ewlenin taħt il-modalità ta’ ġestjoni kondiviża għas-sena finanzjarja 2021

Iż-żieda fl-ispejjeż taħt il-modalità ta’ ġestjoni kondiviża hija dovuta l-aktar għall-ispejjeż akbar relatati mal-FEŻR u mal-Fond ta’ Koeżjoni (EUR 5,8 biljun) u mal-FSE (EUR 3,0 biljun). Dan jirrifletti ż-żieda fl-implimentazzjoni lejn tmiem il-perjodu ta’ programmazzjoni tal-QFP 2014-2020 kif ukoll iż-żieda temporanja tar-rata ta’ kofinanzjament wara l-implimentazzjoni tal-miżuri tas-CRII+. L-ispejjeż relatati mal-FAEŻR u ma’ strumenti oħrajn tal-iżvilupp rurali u mal-FAEG żdiedu b’EUR 1,0 biljun u b’EUR 0,3 biljun, rispettivament.

Wara t-tnedija b’suċċess tal-NGEU (ara t-taqsima 2), l-ispejjeż taħt il-modalità ta’ ġestjoni diretta, li tirrappreżenta l-implimentazzjoni tal-baġit mill-Kummissjoni, mill-aġenziji eżekuttivi u mill-fondi fiduċjarji, żdiedu minn EUR 22,1 biljun fl-2020 għal EUR 63,0 biljun fl-2021. Iż-żieda ta’ EUR 40,9 biljun hija prinċipalment dovuta għall-appoġġ mhux ripagabbli mogħti skont l-RRF tal-NGEU, li ammonta għal EUR 42,9 biljun. L-ispejjeż tal-ġestjoni diretta relatata mal-programmi ta’ tilqim kontra l-Covid-19 naqsu minn EUR 1,6 biljun fl-2020 għal EUR 0,7 biljun fl-2021.

Taħt il-modalità ġestjoni indiretta, l-ispejjeż jirrappreżentaw l-implimentazzjoni tal-baġit minn aġenziji tal-UE, minn korpi tal-UE, minn pajjiżi terzi, minn organizzazzjonijiet internazzjonali u minn entitajiet oħrajn. Fl-2021, l-ispejjeż taħt il-modalità ta’ ġestjoni indiretta ammontaw għal EUR 10,9 biljun, simili għaċ-ċifra tas-sena ta’ qabel ta’ EUR 11,0-il biljun.

22.ASSI

Sal-31 ta’ Diċembru 2021, l-assi totali ammontaw għal EUR 414,1-il biljun (2020: EUR 280,0 biljun) – iż-żieda sinifikanti hija dovuta għal aktar self mill-istrument SURE u għas-self u għall-avvanzi mħallsin skont l-istrument tal-NGEU l-ġdid. L-aktar partiti sinifikanti kienu assi finanzjarji għajr flus u ekwivalenti ta’ flus (EUR 188,6 biljun), prefinanzjament (EUR 93,4 biljun), riċevibbli u rekuperabbli (EUR 72,4 biljun) u flus u ekwivalenti ta’ flus (EUR 44,9 biljun). Assi oħrajn, li jammontaw għal EUR 14,7-il biljun, kienu jinkludu prinċipalment proprjetà, impjanti u tagħmir u assi intanġibbli.

Il-kompożizzjoni tal-assi fil-31 ta’ Diċembru 2021

Iż-żieda sinifikanti fl-assi totali ta’ EUR 134,0 biljun jew ta’ 47,9 % mis-sena ta’ qabel kienet prinċipalment dovuta għall-effetti li ġejjin:

·Is-self pendenti żdied minn EUR 93,3 biljun fl-2020 għal EUR 163,6 biljun fl-2021. Iż-żieda ta’ EUR 70,3 biljun jew ta’ 75,3 % tirrifletti l-aktar il-ħruġ ta’ self ulterjuri għall-assistenza finanzjarja taħt l-istrument SURE (EUR 50,1 biljun) u l-ħruġ ta’ self taħt l-RRF il-ġdida (EUR 18,0-il biljun);

·Il-prefinanzjament totali żdied minn EUR 62,7 biljun fl-2020 għal EUR 93,4 biljun fl-2021. Iż-żieda ta’ EUR 30,7 biljun jew ta’ 49,0 % tirrifletti l-appoġġ finanzjarju mhux ripagabbli mogħti skont l-RRF (EUR 30,8 biljun);

·Il-flus u l-ekwivalenti ta’ flus żdiedu minn EUR 16,7-il biljun fl-2020 għal EUR 44,9 biljun fl-2021. Iż-żieda ta’ EUR 28,2 biljun hija prinċipalment dovuta għal-likwidità relatata mal-NGEU (EUR 18,0-il biljun miżmumin fil-kont tal-NGEU, kif ukoll EUR 1,4 biljun f’fondi miżmumin fil-kont tat-teżor ċentrali tal-Kummissjoni sakemm isir l-iżborż għall-baġit għall-programmi tal-QFP). Iż-żieda li jifdal kienet ikkawżata mill-ammont ogħla ta’ approprjazzjonijiet ta’ pagament mhux implimentati fl-2021, il-multi li saru definittivi fl-aħħar tas-sena u r-Riżorsi proprji tradizzjonali addizzjonali msarrfin iżda li kienu għadhom ma ġewx bbaġitjati fl-aħħar tas-sena.

Il-Ħruġ tar-Renju Unit mill-UE

Fil-31 ta’ Jannar 2020, ir-Renju Unit ħareġ mill-Unjoni Ewropea. It-termini tat-tluq tiegħu huma definiti fi Ftehim dwar il-ħruġ tar-Renju Unit mill-UE u mill-Komunità Ewropea tal-Enerġija Atomika, magħruf ukoll bħala l-“Ftehim dwar il-Ħruġ” jew “FĦ”. Bħala parti minn dan il-ftehim, ir-Renju Unit qabel li jonora l-obbligi finanzjarji kollha li kien daħal għalihom meta kien għadu membru tal-UE. Il-ftehim daħal fis-seħħ fil-31 ta’ Jannar 2020. Ir-Renju Unit se jkompli jikkontribwixxi għall-baġit tal-UE u jibbenefika mill-programmi u min-nefqa tal-UE ta’ qabel l-2021 daqslikieku kien Stat Membru. Ir-Renju Unit se jirċievi wkoll lura ċerti flejjes definiti li ħallas fil-baġit tal-UE jew flejjes riċevuti mill-baġit tal-UE marbuta mal-perjodu ta’ sħubija tiegħu. L-UE tirrapporta darbtejn fis-sena lir-Renju Unit dwar l-ammonti dovuti u r-Renju Unit iħallashom fuq bażi ta’ kull xahar. Ir-rapportar jiġi aġġornat kull sena fuq il-bażi taċ-ċifri attwali.

L-obbligi skont il-Ftehim dwar il-Ħruġ joħolqu obbligazzjonijiet u riċevibbli għall-UE li jridu jiġu kkalkolati u riflessi fil-kontijiet annwali tal-UE u jkopru b’mod partikolari l-oqsma li ġejjin:

·Riżorsi proprji (l-Artikolu 136)

·Impenji pendenti (l-Artikolu 140)

·Multi dovuti għall-kompetizzjoni (l-Artikolu 141)

·Obbligazzjonijiet tal-Unjoni (l-Artikolu 142)

·Obbligazzjonijiet finanzjarji kontinġenti u strumenti finanzjarji (l-Artikoli 143 u 144)

·Assi netti tal-Komunità Ewropea tal-Faħam u l-Azzar (l-Artikolu 145)

·Investiment tal-UE fil-Fond Ewropew tal-Investiment, FEI (l-Artikolu 146)

·Obbligazzjonijiet kontinġenti li jikkonċernaw każijiet legali (l-Artikolu 147).

Prefinanzjament

Fl-2021, il-prefinanzjament, minbarra avvanzi oħrajn lill-Istati Membri u kontribuzzjonijiet għall-fondi fiduċjarji Bêkou u Afrika, ammonta għal EUR 86,2 biljun (2020: EUR 55,5 biljun), li kważi kollha kienu relatati ma’ attivitajiet tal-Kummissjoni. Iż-żieda ta’ EUR 30,7 biljun jew ta’ 55,3 % hija kważi kompletament relatata mal-appoġġ mhux ripagabbli mogħti skont l-RRF, li rriżulta f’żieda ta’ prefinanzjament relatat mal-ġestjoni diretta minn EUR 14,3-il biljun fl-2020 għal EUR 43,7 biljun fl-2021:

Prefinanzjament mill-Kummissjoni skont il-modalità ta’ ġestjoni

Il-livell ta’ prefinanzjament mogħti taħt il-programmi tal-QFP huwa influwenzat b’mod sinifikanti miċ-ċiklu rispettiv tal-QFP – pereżempju, fil-bidu ta’ perjodu tal-QFP, huwa mistenni li jitħallsu avvanzi kbar lill-Istati Membri taħt il-politika ta’ koeżjoni u li dawn l-ammonti jibqgħu disponibbli għall-Istati Membri sal-għeluq tal-programmi. Jitħallas ukoll prefinanzjament annwali, li jrid jintuża matul is-sena jew jiġi rkuprat fis-sena ta’ wara bħala parti mill-għeluq annwali taċ-ċiklu tal-kontijiet. Il-Kummissjoni tagħmel kull sforz biex tiżgura li l-prefinanzjament jinżamm f’livell xieraq. Għandu jinstab bilanċ bejn l-iżgurar ta’ finanzjament suffiċjenti għall-proġetti u r-rikonoxximent f’waqtu tan-nefqa.

23.OBBLIGAZZJONIJIET

Sal-31 ta’ Diċembru 2021, l-obbligazzjonijiet totali kienu ta’ EUR 496,4 biljun (2020: EUR 313,5-il biljun) – iż-żieda enormi hija xprunata mis-self meħud fl-2021 taħt l-istrumenti SURE u NGEU. L-aktar entrati sinifikanti kienu s-self għall-NGEU u għall-assistenza finanzjarja (EUR 236,7 biljun), l-obbligi tal-pensjoni u obbligazzjonijiet oħrajn ta’ benefiċċji ta’ wara l-impjieg (EUR 122,5 biljun), l-imposti dovuti u l-introjtu differit (EUR 78,1 biljun), u l-ammonti pagabbli lil partijiet terzi (EUR 46,4 biljun):

Il-kompożizzjoni tal-obbligazzjonijiet fil-31 ta’ Diċembru 2021

Iż-żieda sinifikanti ta’ EUR 82,9 biljun jew ta’ 58,3 % matul is-sena ta’ qabel kienet prinċipalment dovuta għall-effetti li ġejjin:

·It-teħid ta’ self żdied minn EUR 93,2 biljun fl-2020 għal EUR 236,7 biljun fl-2021. Iż-żieda ta’ EUR 143,5 biljun hija prinċipalment relatata mal-RRF (EUR 91,0 biljun) u ma’ teħid ta’ self addizzjonali taħt SURE (EUR 50,1 biljun);

·L-imposti dovuti u l-introjtu differit żdiedu minn EUR 64,6 biljun fl-2020 għal EUR 78,1 biljun fl-2021. Iż-żieda ta’ EUR 13,5-il biljun jew ta’ 20,9 % hija prinċipalment relatata mal-RRF il-ġdid (EUR 8,2 biljun) u l-implimentazzjoni tal-QFP 2014-2020 taħt il-FEŻR u l-Fond ta’ Koeżjoni (EUR 1,9 biljun);

·L-ammonti pagabbli żdiedu minn EUR 32,4 biljun fl-2020 għal EUR 46,4 biljun fl-2021. Iż-żieda ta’ EUR 14,0-il biljun jew 43,2 % hija primarjament dovuta għall-RRF (EUR 19,1-il biljun) u tnaqqis fl-ammonti pagabbli fil-qasam tal-koeżjoni, fejn l-ammont tal-pretensjonijiet tal-kost li waslu qabel tmiem is-sena kien aktar baxx mis-sena ta’ qabel (EUR 5,3 biljun).

Il-pretensjonijiet tal-kost u l-fatturi totali rċevuti u rikonoxxuti fil-Karta Bilanċjali taħt l-intestatura “Ammonti Pagabbli”

Assi netti

L-eċċess tal-obbligazzjonijiet fuq l-assi fil-31 ta’ Diċembru 2021 kien jammonta għal EUR 82,3 biljun (2020: EUR 33,4 biljun). Iż-żieda konsiderevoli ta’ EUR 48,9 biljun hija dovuta primarjament għas-self fir-rigward tal-appoġġ mhux ripagabbli meħud taħt l-NGEU fl-2021 (li jirriżulta f’żieda fl-ispejjeż tal-ġestjoni diretta ta’ EUR 42,9 biljun). Huwa nnotat li l-eċċess tal-obbligazzjonijiet fuq l-assi ma jfissirx li l-istituzzjonijiet u l-korpi tal-UE jinsabu f’diffikultajiet finanzjarji, iżda pjuttost ifisser li ċerti obbligazzjonijiet se jiġu ffinanzjati minn baġits annwali futuri. Ħafna mill-ispejjeż huma rikonoxxuti skont ir-regoli dwar il-kontabilità fuq il-bażi tad-dovuti fis-sena kurrenti, għalkemm effettivament jistgħu jitħallsu fis-snin ta’ wara u jiġu ffinanzjati bl-użu ta’ baġits futuri; id-dħul relatat se jitqies fil-perjodi futuri biss. Minbarra t-teħid ta’ self għall-NGEU, li għandu jitħallas lura bejn l-2028 u l-2051, u l-obbligazzjoni għall-benefiċċji tal-impjegati, li trid titħallas matul diversi deċennji, l-aktar ammonti sinifikanti li għandhom jiġu enfasizzati huma l-attivitajiet relatati mal-FAEG, li l-biċċa l-kbira tagħhom normalment jitħallsu fl-ewwel kwart tas-sena ta’ wara.

24.QAFAS POLITIKU U FINANZJARJU, GOVERNANZA U RESPONSABBILTÀ TAL-UE

L-Unjoni Ewropea (UE) hija Unjoni li lilha l-Istati Membri jagħtu kompetenzi sabiex jilħqu objettivi li għandhom komuni bejniethom. L-Unjoni hija msejsa fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta’ persuni li jappartjenu għal minoranzi. Dawn il-valuri huma komuni għall-Istati Membri f’soċjetà fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel.

25.QAFAS POLITIKU U FINANZJARJU

L-UE ssegwi l-objettivi stabbiliti mit-Trattat b’għadd ta’ għodod, li waħda minnhom hija l-baġit tal-UE. Oħrajn huma, pereżempju, qafas leġiżlattiv komuni jew strateġiji ta’ politika konġunti.

Is-sorsi ta’ finanzjament ewlenin tal-UE huma d-dħul mir-riżorsi proprji, li huwa kkomplementat minn dħul ieħor. Hemm erba’ tipi ta’ riżorsi proprji: Riżorsi proprji tradizzjonali (prinċipalment dazji doganali), ir-riżorsa proprja bbażata fuq it-taxxa fuq il-valur miżjud (VAT), ir-riżorsa proprja bbażata fuq l-iskart mill-imballaġġ tal-plastik mhux irriċiklat (introdotta fl-2021) u r-riżorsa proprja bbażata fuq l-introjtu nazzjonali gross (ING). Dħul ieħor li jiġi mill-attivitajiet tal-UE (pereżempju, multi relatati mal-kompetizzjoni) normalment jirrappreżenta anqas minn 10 % tad-dħul totali.

·Ġestjoni kondiviża: proporzjon kbir ħafna mill-baġit (madwar 3/4 tal-baġit) huwa ġestit taħt sistema ta’ ġestjoni kondiviża mill-Kummissjoni b’kooperazzjoni mal-Istati Membri, b’mod partikolari fl-oqsma tal-fondi strutturali u tal-agrikoltura.

·Ġestjoni diretta: il-Kummissjoni tiġġestixxi wkoll il-programmi hija stess u tista’ tiddelega l-implimentazzjoni ta’ programmi speċifiċi lil aġenziji eżekuttivi.

·Ġestjoni indiretta: Id-deċiżjonijiet dwar in-nefqa jistgħu wkoll jiġu ġestiti indirettament permezz ta’ korpi oħrajn fl-UE jew barra minnha. Ir-Regolament Finanzjarju u/jew il-ftehimiet ta’ delega jiddefinixxu l-mekkaniżmi ta’ kontroll u rapportar meħtieġa minn dawn l-entitajiet u s-superviżjoni mill-Kummissjoni fejn il-kompiti ta’ implimentazzjoni tal-baġit huma fdati lil aġenziji nazzjonali, lill-Grupp tal-Bank Ewropew tal-Investiment, lil pajjiżi terzi, organizzazzjonijiet internazzjonali (eż. il-Bank Dinji jew in-Nazzjonijiet Uniti) u entitajiet oħrajn (eż. aġenziji deċentralizzati tal-UE, Impriżi Konġunti).

26.GOVERNANZA U RESPONSABBILTÀ

27.Struttura istituzzjonali

L-UE għandha qafas istituzzjonali li permezz tiegħu għandha l-għan li tippromwovi l-valuri tagħha, tmexxi ’l quddiem l-objettivi tagħha, isservi l-interessi tagħha, dawk taċ-ċittadini tagħha u dawk tal-Istati Membri, kif ukoll tiżgura l-konsistenza, l-effettività u l-kontinwità tal-politiki u tal-azzjonijiet tagħha. L-istruttura organizzazzjonali tikkonsisti f’istituzzjonijiet, f’aġenziji u f’korpi oħrajn tal-UE. Ir-Regolament Finanzjarju, flimkien mar-regoli kontabilistiċi applikabbli, jiddefinixxi liema minn dawn l-entitajiet huma inklużi fil-kontijiet konsolidati tal-UE (jekk jogħġbok ara n-nota 9 tal-kontijiet annwali konsolidati tal-UE għal-lista ta’ entitajiet inklużi fil-kamp ta’ applikazzjoni tal-konsolidazzjoni).

Il-Parlament Ewropew, flimkien mal-Kunsill, jeżerċita funzjonijiet leġiżlattivi u baġitarji. Il-Kummissjoni hija politikament responsabbli lejn il-Parlament Ewropew. Il-Kunsill iwettaq ukoll funzjonijiet ta’ tfassil tal-politika u ta’ koordinazzjoni skont id-direzzjoni politika ġenerali u l-prijoritajiet tal-Unjoni stabbiliti mill-Kunsill Ewropew.

Il-Kummissjoni Ewropea hija l-fergħa eżekuttiva tal-Unjoni Ewropea. Hija tippromwovi l-interess ġenerali tal-Unjoni u tieħu inizjattivi xierqa għal dak il-għan. Tiżgura l-applikazzjoni tat-Trattati u tissorvelja l-applikazzjoni tad-dritt tal-Unjoni mill-Istati Membri taħt il-kontroll tal-Qorti tal-Ġustizzja tal-Unjoni Ewropea. Hija teżerċita funzjonijiet ta’ koordinazzjoni, eżekuttivi u ta’ ġestjoni, teżegwixxi l-baġit u timmaniġġa l-programmi.

Il-Kummissjoni timplimenta l-baġit, fil-biċċa l-kbira b’kooperazzjoni mal-Istati Membri 11 . Flimkien, huma jiżguraw li l-approprjazzjonijiet jintużaw f’konformità mal-prinċipji ta’ ġestjoni finanzjarja tajba. Ir-regolamenti jistabbilixxu l-obbligi ta’ kontroll u verifika tal-Istati Membri meta jikkondividu l-implimentazzjoni tal-baġit u r-responsabbiltajiet li jirriżultaw. Huma jistabbilixxu wkoll ir-responsabbiltajiet u r-regoli dettaljati għal kull waħda mill-istituzzjonijiet tal-UE fir-rigward tan-nefqa tagħhom stess.

28.L-istruttura ta’ governanza tal-Kummissjoni

L-arranġamenti ta’ governanza tal-Kummissjoni u kif dawn jiżguraw li l-Kummissjoni tiffunzjona bħala istituzzjoni moderna, responsabbli u orjentata lejn il-prestazzjoni huma deskritti fil-Komunikazzjoni 12 dwar il-Governanza fil-Kummissjoni Ewropea.

Il-Kummissjoni twettaq il-funzjonijiet tagħha taħt it-tmexxija tal-Kulleġġ tal-Kummissarji, li jistabbilixxi l-prijoritajiet u jerfa’ responsabbiltà politika ġenerali għall-ħidma tal-Kummissjoni. Bħala Kulleġġ, il-Kummissjoni taħdem taħt il-gwida politika tal-President tagħha, li jippreżenta lill-Parlament Ewropew, bħala parti min-nomina tiegħu, l-objettivi li biħsiebu jsegwi fil-forma ta’ linji gwida politiċi. Il-President jiddeċiedi dwar l-organizzazzjoni interna tal-Kummissjoni, sabiex jiżgura li din taġixxi b’mod konsistenti, effiċjenti u bħala korp kolleġġjali.

Il-Kulleġġ jiddelega l-implimentazzjoni operazzjonali tal-baġit u l-ġestjoni finanzjarja lid-Diretturi Ġenerali u lill-Kapijiet tas-Servizz li jmexxu l-istruttura amministrattiva tal-Kummissjoni. Dan l-approċċ deċentralizzat joħloq kultura amministrattiva li tħeġġeġ lill-impjegati taċ-ċivil jerfgħu r-responsabbiltà għall-attivitajiet li fuqhom għandhom kontroll u jitlobhom jipprovdu assigurazzjoni fir-rigward tal-attivitajiet li għalihom huma responsabbli.

Taħt l-awtorità tal-President u f’kooperazzjoni mill-qrib mal-Membru tal-Kummissjoni inkarigat mill-baġit, mir-riżorsi umani u mill-amministrazzjoni, u bl-involviment tas-servizzi ċentrali u tal-President, il-Bord tal-Ġestjoni Korporattiva jipprovdi koordinazzjoni, sorveljanza, pariri u orjentazzjonijiet strateġiċi.

L-arranġamenti interni jiddefinixxu sett koerenti ta’ kontrolli u ta’ għodod ta’ ġestjoni robusti li jippermettu lill-Kulleġġ tal-Kummissarji jerfa’ r-responsabbiltà politika għall-ħidma tal-Kummissjoni 13 .

29.Il-ġestjoni finanzjarja tal-Kummissjoni

Fil-Kummissjoni, ir-rwoli u r-responsabbiltajiet fil-ġestjoni finanzjarja huma definiti b’mod ċar (eż. fir-Regolament Finanzjarju u fir-Regoli Interni 14 ) u applikati kif xieraq. Bħala uffiċjali awtorizzanti b’delega, id-Diretturi Ġenerali u l-Kapijiet tas-Servizzi tal-Kummissjoni huma responsabbli għall-ġestjoni finanzjarja tajba tar-riżorsi tal-UE, għall-konformità mad-dispożizzjonijiet tar-Regolament Finanzjarju, għall-ġestjoni tar-riskji u għall-istabbiliment ta’ qafas ta’ kontroll intern xieraq.

Ir-responsabbiltà tal-Uffiċjali Awtorizzanti tkopri l-proċess kollu tal-ġestjoni, mid-determinazzjoni ta’ x’hemm bżonn li jsir biex jintlaħqu l-objettivi tal-politika stabbiliti mill-istituzzjoni sal-ġestjoni tal-attivitajiet minn perspettiva kemm operattiva kif ukoll ta’ ġestjoni finanzjarja tajba. Il-kompiti jistgħu jiġu ddelegati wkoll lid-Diretturi, lill-Kapijiet ta’ Unitajiet u lil oħrajn, li b’hekk isiru Uffiċjali Awtorizzanti b’Sottodelega. Kull uffiċjal awtorizzanti b’delega jista’ jibbaża fuq direttur wieħed jew fuq żewġ diretturi inkarigat(i) mill-ġestjoni tar-riskju u mill-kontroll intern biex jissorvelja u jimmonitorja l-implimentazzjoni tas-sistemi ta’ kontroll intern.

Is-servizzi ċentrali tal-Kummissjoni jipprovdu gwida u pariri u jippromwovu l-aħjar prattiki, inkluż permezz tal-ħidma tal-Bord tal-Ġestjoni Korporattiva.

Ir-Regolament Finanzjarju jesiġi li kull uffiċjal tal-awtorizzazzjoni jħejji rapport annwali tal-attività (RAA)bid-dettalji tal-kisbiet, u tal-attivitajiet ta’ kontroll intern u tal-ġestjoni finanzjarja matul is-sena. Ir-RAA jinkludi dikjarazzjoni li r-riżorsi ntużaw abbażi tal-prinċipji ta’ ġestjoni finanzjarja tajba u li hemm fis-seħħ proċeduri ta’ kontroll li jipprovdu l-garanziji meħtieġa li jikkonċernaw il-legalità u r-regolarità tat-tranżazzjonijiet sottostanti. Ir-Rapport Annwali dwar il-Ġestjoni u l-Prestazzjoni għall-baġit tal-UE 15 huwa l-istrument ewlieni li permezz tiegħu, il-Kulleġġ tal-Kummissarji jassumi responsabbiltà politika għall-ġestjoni finanzjarja tal-baġit tal-UE.

L-Uffiċjal tal-Kontabilità tal-Kummissjoni huwa ċentralment responsabbli għall-ġestjoni tat-teżor, għall-proċeduri ta’ rkupru, għall-istabbiliment ta’ regoli tal-kontabilità bbażati fuq metodi u Standards Internazzjonali tal-Kontabbiltà għas-Settur Pubbliku, għall-validazzjoni tas-sistemi kontabilistiċi u għat-tħejjija tal-kontijiet annwali konsolidati tal-Kummissjoni u tal-UE. Barra minn hekk, l-Uffiċjal tal-Kontabilità huwa mitlub jiffirma l-kontijiet annwali, filwaqt li jiddikjara li dawn jippreżentaw b’mod ġust, fl-aspetti materjali kollha, il-pożizzjoni finanzjarja, ir-riżultati tal-operazzjonijiet u l-flussi tal-flus tal-Unjoni. Il-kontijiet annwali jiġu adottati mill-Kulleġġ tal-Kummissarji. L-Uffiċjal tal-Kontabilità huwa funzjoni indipendenti u għandu responsabbiltà ewlenija fir-rigward tar-rapportar finanzjarju fil-Kummissjoni.

L-Awditur Intern tal-Kummissjoni huwa wkoll funzjoni ċentralizzata u indipendenti u jipprovdi pariri, opinjonijiet u rakkomandazzjonijiet indipendenti dwar il-kwalità u l-funzjonament ta’ sistemi ta’ kontroll intern ġewwa l-Kummissjoni, l-aġenziji tal-UE u korpi awtonomi oħrajn.

Il-Kumitat tal-Progress tal-Awditjar jiżgura l-indipendenza tal-Awditur Intern u jissorvelja l-kwalità tax-xogħol tal-awditjar intern u kif is-servizzi tal-Kummissjoni segwew ir-rakkomandazzjonijiet tal-awditjar intern u estern, kif ukoll is-sejbiet u r-rakkomandazzjonijiet relatati mal-kwittanza tal-Qorti Ewropea tal-Awdituri dwar l-affidabbiltà tal-kontijiet konsolidati annwali tal-UE. Ir-rwol konsultattiv tal-kumitat jikkontribwixxi għat-titjib ulterjuri ġenerali tal-effettività u l-effiċjenza tal-Kummissjoni biex tilħaq l-għanijiet tagħha u jiffaċilita s-sorveljanza mill-Kulleġġ tal-governanza, tal-ġestjoni tar-riskji u tal-prattiki ta’ kontroll intern tal-Kummissjoni.

30.Awditjar estern u l-proċedura ta’ kwittanza

F’konformità mal-prinċipji ta’ ġestjoni finanzjarja tajba, il-fondi jridu jiġu ġestiti b’mod effettiv, effiċjenti u ekonomiku. Jeżisti qafas ta’ responsabbiltà bbażat fuq ir-rapportar komprensiv, l-awditjar estern u l-kontroll politiku sabiex tiġi pprovduta assigurazzjoni raġonevoli li l-fondi tal-UE jintnefqu b’mod xieraq.

Il-Parlament Ewropew jiddeċiedi, wara rakkomandazzjoni mill-Kunsill, dwar jekk jipprovdix jew le l-approvazzjoni finali tiegħu, magħrufa bħala “għoti tal-kwittanza”, fuq il-mod li bih il-Kummissjoni implimentat il-baġit tal-UE f’sena partikolari. Il-proċedura ta’ kwittanza annwali tiżgura li l-Kummissjoni tinżamm politikament responsabbli għall-implimentazzjoni tal-baġit tal-UE.

Kull sena, il-Qorti Ewropea tal-Awdituri teżamina l-affidabbiltà tal-kontijiet, jekk id-dħul kollu kienx riċevut u jekk in-nefqa kollha kinitx imġarrba b’mod leġittimu u regolari u jekk il-ġestjoni finanzjarja u l-aspetti kwalitattivi tal-ibbaġitjar, inkluża d-dimensjoni tal-prestazzjoni, kinux b’saħħithom. Il-pubblikazzjoni tar-rapport annwali tal-Qorti Ewropea tal-Awdituri hija l-punt tat-tluq għall-proċedura ta’ kwittanza. L-awdituri jħejju wkoll rapporti speċjali dwar l-oqsma ta’ nfiq jew ta’ politika speċifiċi, jew dwar kwistjonijiet baġitarji jew maniġerjali.

Id-deċiżjoni dwar il-kwittanza hija bbażata wkoll fuq ir-rapportar finanzjarju u ta’ responsabbiltà integrat tal-Kummissjoni, fuq is-seduti ta’ smigħ tal-Kummissarji fil-Parlament Ewropew u fuq it-tweġibiet ipprovduti għall-mistoqsijiet bil-miktub indirizzati lill-Kummissjoni.

NOTA LI TAKKUMPANJA L-KONTIJIET KONSOLIDATI

Il-kontijiet annwali konsolidati tal-Unjoni Ewropea għas-sena 2021 tħejjew fuq il-bażi tal-informazzjoni ppreżentata mill-istituzzjonijiet u l-korpi skont l-Artikolu 246(2) tar-Regolament Finanzjarju applikabbli għall-baġit ġenerali tal-Unjoni Ewropea. Jiena b’dan niddikjara li tħejjew skont it-Titolu XIII ta’ dan ir-Regolament Finanzjarju u skont il-prinċipji kontabilistiċi, ir-regoli u l-metodi stabbiliti fin-noti tar-rapporti finanzjarji.

Ksibt l-informazzjoni kollha meħtieġa mingħand l-uffiċjali tal-kontabilità ta’ dawn l-istituzzjonijiet u l-korpi, li ċċertifikaw l-affidabilità tagħha, għall-produzzjoni tal-kontijiet li juru l-assi u l-obbligazzjonijiet tal-Unjoni Ewropea u l-implimentazzjoni tal-baġit.

Jien b’dan niċċertifika li, fuq il-bażi ta’ din l-informazzjoni, u rigward il-kontrolli li qist li huma meħtieġa biex niffirma l-kontijiet tal-Kummissjoni Ewropea, għandi aċċertament raġonevoli li l-kontijiet jippreżentaw b’mod ġust, fl-aspetti materjali kollha, il-pożizzjoni finanzjarja, ir-riżultati tal-operazzjonijiet u l-flussi tal-flus tal-Unjoni Ewropea.

Rosa ALDEA BUSQUETS

Uffiċjal tal-Kontabilità tal-Kummissjoni

Is-17 ta’ Ġunju 2022

L-UNJONI EWROPEA

IS-SENA FINANZJARJA 2021

RAPPORTI FINANZJARJI KONSOLIDATI U NOTI TA’ SPJEGAZZJONI

Għandu jiġi nnotat li minħabba l-ittondjar taċ-ċifri f’miljuni ta’ euro, xi data finanzjarja fit-tabelli t’hawn taħt tista’ tidher li ma taqbilx fl-għadd finali.

WERREJ

IL-KARTA BILANĊJALI    

RAPPORT TAL-PRESTAZZJONI FINANZJARJA    

RAPPORT TAL-FLUSSI TAL-FLUS    

DIKJARAZZJONI TAL-BIDLIET FL-ASSI NETTI    

NOTI GĦAR-RAPPORTI FINANZJARJI    

1.    POLITIKI KONTABILISTIĊI SINIFIKANTI    

2.    NOTI GĦALL-KARTA BILANĊJALI    

3.    NOTI GĦAR-RAPPORT TAL-PRESTAZZJONI FINANZJARJA    

4.    OBBLIGAZZJONIJIET U ASSI KONTINĠENTI    

5.    IMPENJI LEGALI U BAĠITARJI    

6.    ĠESTJONI TAR-RISKJU FINANZJARJU    

7.    DIKJARAZZJONIJIET TAL-PARTIJIET RELATATI    

8.    EVENTI WARA D-DATA TAL-KARTA BILANĊJALI    

9.    AMBITU TAL-KONSOLIDAZZJONI    

IL-KARTA BILANĊJALI

*    Il-Parlament Ewropew adotta baġit fl-24 ta’ Novembru 2021 li jipprovdi għall-ħlas tal-obbligazzjonijiet bi skadenza qasira tal-Unjoni mir-riżorsi proprji li għandhom jinġabru mill-Istati Membri, jew jiġu mitluba lilhom, fl-2021. Barra minn hekk, taħt l-Artikolu 83 tar-Regolamenti tal-Persunal (ir-Regolament (KEE, Euratom, KEFA) Nru 259/68 tad-29 ta’ Frar 1968, kif emendat), l-Istati Membri għandhom jiggarantixxu b’mod konġunt l-obbligazzjoni għall-pensjonijiet.

RAPPORT TAL-PRESTAZZJONI FINANZJARJA

RAPPORT TAL-FLUSSI TAL-FLUS

*Iċ-ċifra tal-2020 hija relatata (maż-żieda)/mat-tnaqqis fl-assi finanzjarji disponibbli għall-bejgħ.

DIKJARAZZJONI TAL-BIDLIET FL-ASSI NETTI

NOTI GĦAR-RAPPORTI FINANZJARJI

Innota li fit-tabelli li ġejjin, l-ammonti li jikkonċernaw ir-Renju Unit b’rabta mal-QFP sa tmiem l-2020 għadhom jidhru taħt l-intestatura Stati Membri, minħabba li għalkemm ir-Renju Unit ħareġ mill-Unjoni fl-1 ta’ Frar 2020, f’konformità mal-Ftehim dwar il-Ħruġ, huwa għad għandu relazzjoni finanzjarja mal-Unjoni ekwivalenti għal dik ta’ Stat Membru għal dawn il-perjodi.

1.POLITIKI KONTABILISTIĊI SINIFIKANTI

2.Il-BAŻI LEGALI U R-REGOLI KONTABILISTIĊI

Il-kontijiet tal-UE jinżammu f’konformità mar-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014 u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, it-30 ta’ Lulju 2018, p. 1) minn hawn ’il quddiem imsejjaħ ir-“Regolament Finanzjarju” (RF).

F’konformità mal-Artikolu 80 tar-Regolament Finanzjarju, l-UE tħejji r-rapporti finanzjarji tagħha fuq il-bażi ta’ regoli tal-kontabbiltà fuq il-bażi tad-dovuti li huma bbażati fuq l-Istandards Internazzjonali tal-Kontabbiltà għas-Settur Pubbliku (IPSAS). Dawn ir-regoli kontabilistiċi, adottati mill-Uffiċjal tal-Kontabilità tal-Kummissjoni, iridu jiġu applikati mill-istituzzjonijiet u mill-korpi kollha tal-UE li jaqgħu fil-kamp ta’ applikazzjoni tal-konsolidazzjoni sabiex tiġi żgurata l-konsistenza interna tal-kontijiet konsolidati tal-UE.

L-applikazzjoni ta’ Regoli Kontabilistiċi tal-Unjoni Ewropea (EAR) ġodda u emendati

EAR ġodda adottati iżda li kienu għadhom ma japplikawx fil-31 ta’ Diċembru 2021

Ma hemm l-ebda EAR ġdida adottata iżda li għadha ma hijiex effettiva fil-31 ta’ Diċembru 2021.

EAR riveduti effettivi għal perjodi annwali li jibdew fl-1 ta’ Jannar 2021 jew wara

Fis-17 ta’ Diċembru 2020, l-Uffiċjal tal-Kontabilità tal-Kummissjoni adotta l-EAR 11 riveduta “Strumenti finanzjarji”, li tistabbilixxi l-prinċipji tar-rapportar finanzjarju għall-assi finanzjarji u għall-obbligazzjonijiet finanzjarji u hija bbażata fuq l-IPSAS 41 il-ġdid “Strumenti Finanzjarji”, fuq l-IPSAS 28 emendat “Strumenti Finanzjarji: Preżentazzjoni” u l-IPSAS 30 emendat “Strumenti Finanzjarji: Divulgazzjonijiet” (maħruġin f’Awwissu 2018).

L-EAR 11 riveduta hija effettiva b’mod obbligatorju mill-1 ta’ Jannar 2021, bi kwalunkwe bidla mill-applikazzjoni inizjali kontabbilizzata f’dik id-data, u b’hekk ma teħtieġx dikjarazzjoni mill-ġdid tal-ammonti tal-perjodu ta’ qabel. B’riżultat ta’ dan, l-assi finanzjarji, l-obbligazzjonijiet finanzjarji, ir-riċevibbli ta’ skambju u d-dħul/l-ispiża tal-imgħax fil-31 ta’ Diċembru 2020 ippreżentati f’dawn il-kontijiet ġew ikkunsidrati f’konformità mal-politiki kontabilistiċi kif iddikjarati fir-rapporti finanzjarji tal-UE tal-2020 skont in-noti 1.5.5, 1.5.8 (għal tranżazzjonijiet ta’ skambju biss), 1.5.12 u 1.6.1 (għal tranżazzjonijiet ta’ skambju biss).

Il-bidliet ewlenin u l-impatti tagħhom fuq il-kontijiet tal-UE għall-2021 huma kif ġejjin:

Prinċipji ġodda ta’ klassifikazzjoni u ta’ kejl għall-assi finanzjarji

L-EAR 11 riveduta tintroduċi approċċ ibbażat fuq il-prinċipji għall-klassifikazzjoni tal-assi finanzjarji u teħtieġ l-użu ta’ żewġ kriterji: il-mudell tal-entità għall-ġestjoni tal-assi finanzjarji tagħha u l-karatteristiċi kuntrattwali tal-fluss tal-flus ta’ dawk l-assi. Skont dawn il-kriterji, l-assi finanzjarji jiġu kklassifikati fil-kategoriji li ġejjin: “assi finanzjarji b’kost amortizzat” (AC), “assi finanzjarji b’valur ġust permezz ta’ assi/ekwità netti” (FVNA), jew “assi finanzjarji b’valur ġust permezz ta’ surplus jew defiċit” (FVSD).

Fl-1 ta’ Jannar 2021, l-applikazzjoni tal-kriterji l-ġodda wasslet għar-riklassifikazzjoni tal-investimenti ta’ ekwità u tat-titoli ta’ dejn kollha minn “disponibbli għall-bejgħ” għall-assi finanzjarji fl-FVSD. Ir-riżerva tal-valur ġust relatata ġiet riklassifikata – fi ħdan l-Assi Netti – għal surplus jew għal defiċit akkumulat.

Mudell ta’ indeboliment ġdid

Billi l-mudell ta’ indeboliment preċedenti kien ibbażat fuq it-telf imġarrab, l-EAR 11 riveduta introduċiet mudell ta’ indeboliment li jħares ’il quddiem ibbażat fuq telf ta’ kreditu mistenni (expected credit losses, ECL) matul il-ħajja tal-assi finanzjarju. L-ECL tqis avvenimenti ta’ inadempjenza possibbli u l-evoluzzjoni tal-kwalità tal-kreditu tal-assi finanzjarji. Il-mudell il-ġdid ta’ indeboliment japplika għall-assi finanzjarji kollha mkejlin f’AC jew f’FVNA kif ukoll għal impenji ta’ self u għal kuntratti ta’ garanziji finanzjarji.

B’mod partikolari, fl-1 ta’ Jannar 2021, l-applikazzjoni tal-mudell il-ġdid ta’ indeboliment għall-assi finanzjarji kklassifikati bħala AC, wasslet għar-rikonoxximent ta’ indeboliment fuq is-self għall-assistenza finanzjarja pprovdut lill-pajjiżi sħab skont il-programmi tal-MFA u tal-Euratom.

Kontabilità ta’ garanzija finanzjarja

Taħt l-EAR 11 preċedenti, il-biċċa l-kbira tal-garanziji finanzjarji – b’mod partikolari dawk ipprovduti mingħajr ħlas jew b’konsiderazzjoni nominali – ġew ikkontabbilizzati f’konformità mal-prinċipji ta’ EAR 10 “Provvedimenti, obbligazzjonijiet kontinġenti u assi kontinġenti”, għalhekk jew rikonoxxuti bħala provvedimenti jew iddivulgati bħala obbligazzjonijiet kontinġenti skont il-probabbiltà ta’ telf.

L-EAR 11 riveduta teħtieġ l-applikazzjoni tar-rekwiżiti kontabilistiċi tal-garanzija finanzjarja għall-kuntratti ta’ garanziji finanzjarji kollha. Il-kejl tal-obbligazzjoni ta’ garanzija finanzjarja jiddependi fuq il-valur ġust tal-garanzija fir-rikonoxximent inizjali u fuq l-evoluzzjoni tat-telf ta’ kreditu mistenni mill-portafoll tad-djun garantiti. Ara n-nota 1.5.12.

B’konsegwenza ta’ dan, fl-1 ta’ Jannar 2021 il-kuntratti ta’ garanziji finanzjarji eżistenti ġew irriklassifikati minn dispożizzjonijiet finanzjarji għall-kategorija ta’ obbligazzjoni ta’ garanzija finanzjarja u tkejlu mill-ġdid f’konformità mar-rekwiżiti tal-EAR 11 riveduta. Din il-bidla wasslet għal żieda fl-obbligazzjonijiet finanzjarji, b’mod partikolari fir-rigward tal-garanziji pprovduti lill-Grupp tal-BEI skont il-Mandat ta’ Self Estern. Wara l-bidla fit-trattament kontabilistiku u r-rikonoxximent tal-obbligazzjoni tal-kuntratt ta’ garanzija finanzjarja għall-Mandat ta’ Self Estern, ir-riżerva għall-Fond ta’ Garanzija għall-azzjonijiet esterni – f’Assi Netti sal-31 ta’ Diċembru 2020 – ġiet irrilaxxata għas-surplus jew għad-defiċit akkumulat.

It-tabella li ġejja turi l-kategoriji ta’ kejl oriġinali skont l-EAR 11 kif applikati għar-rapporti finanzjarji tal-UE tal-2020 u l-kategoriji ta’ kejl il-ġodda skont l-EAR 11 riveduta għall-assi u għall-obbligazzjonijiet finanzjarji tal-Unjoni Ewropea fl-1 ta’ Jannar 2021:

It-tabella li ġejja tanalizza l-impatt tat-tranżizzjoni għall-EAR 11 riveduta fuq l-assi finanzjarji, fuq ir-riċevibbli, fuq id-dispożizzjonijiet finanzjarji u fuq l-obbligazzjonijiet finanzjarji tal-Unjoni Ewropea. Tirrikonċilja l-ammonti riportati mill-kategorija ta’ kejl preċedenti tagħha taħt l-EAR 11 kif applikata għar-rapporti finanzjarji tal-UE tal-2020, għall-kategoriji ta’ kejl il-ġodda tagħhom mat-tranżizzjoni għall-EAR 11 riveduta fl-1 ta’ Jannar 2021:

It-tabella li ġejja tanalizza l-impatt tat-tranżizzjoni għall-EAR 11 riveduta fuq l-Assi Netti tal-Unjoni Ewropea fl-1 ta’ Jannar 2021:

It-tabella li ġejja tirrikonċilja l-provvediment għall-indeboliment tal-għeluq tal-perjodu ta’ qabel imkejjel f’konformità mal-EAR 11 kif applikata għar-rapporti finanzjarji u għall-provvedimenti finanzjarji tal-UE tal-2020 imkejlin f’konformità mal-EAR 10 għall-provvediment għall-indeboliment il-ġdid imkejjel f’konformità mal-EAR 11 riveduta fl-1 ta’ Jannar 2021:

*    Sal-2020 kien ġie rikonoxxut b’mod inizjali self surrogat (self inadempjenti li għalih il-grupp tal-BEI ħareġ talba għal ħlas ta’ garanzija fuq il-garanzija tal-UE) bl-ammont imħallas sabiex tiġi saldata t-talba għal ħlas ta’ garanzija u ġie minnufih indebolit kompletament għall-ammont tat-telf ta’ kreditu diġà mġarrab fiż-żmien tas-surroga, li wassal għal ammont riportat nett żero fil-karta bilanċjali. Kwalunkwe mgħax akkumulat wara r-rikonoxximent inizjali ġie wkoll kompletament indebolit. F’konformità mal-EAR 11 riveduta, is-self surrogat issa huwa kklassifikat bħala self b’indeboliment fil-kreditu mixtri jew oriġinat (“POCI”), u għalhekk il-provvediment għal indeboliment huwa relatat biss ma’ bidliet fit-telf ta’ kreditu mistenni mġarrab wara r-rikonoxximent inizjali. Barra minn hekk, taħt l-EAR 11 riveduta għal self POCI, l-imgħax jakkumula biss fuq l-ammont riportat nett. Għalhekk, il-provvediment għal indeboliment rikonoxxut sa tmiem l-2020 għas-self surrogat tħassar kontra l-ammont riportat gross tas-self surrogat fl-1 ta’ Jannar 2021, mingħajr ebda impatt fuq l-ammont riportat ta’ dak is-self fil-karta bilanċjali.